1. Аци киунугӕ ахур кӕнгӕй, ӕвӕдзи, цӕбӕл райдӕдтай сагъӕс кӕнун?

АЦИ киунугӕ ахур кӕнгӕй Библийӕй берӕ цидӕртӕ базудтай. Зӕгъӕн, базудтай, Хуцау нин цӕхуӕн цардӕй зӕрдӕ ӕвӕруй, мӕрдтӕ ци уавӕри ’нцӕ, удта райгасдзийнади туххӕй (Екклесиаст 9:5; Лукай 23:43; Иоанни 5:28, 29; Раргомадӕ 21:3, 4).  Ӕвӕдзи, райдӕдтай Йегови Ӕвдесӕнти ӕмбурдтӕмӕ цӕун, ӕма федарӕй ӕууӕндис, раст динбӕл хуӕст ке ’нцӕ, уобӕл (Иоанни 13:35). Удта, ӕвӕдзи, Йеговӕ дӕуӕн дӕр де ’мбал иссӕй ӕма дӕхецӕн федарӕй загътай, лӕггадӕ ин ке кӕндзӕнӕ. Ӕма нур, ӕвӕдзи, сагъӕс кӕнис: «Ци мӕ гъӕуй кӕнун, цӕмӕй Хуцауи лӕггадгӕнӕг исуон?»

2. Эфиопаг лӕги цӕмӕн бафӕндадтӕй донаргъуд райсун?

² Уобӕл расагъӕс кодта, Йесо Киристей дзамани ка цардӕй, еу уӕхӕн эфиопаг лӕг дӕр. Йесо ку райгас ӕй, уомӕй еу цӕйбӕрцӕдӕр рӕстӕги фӕсте Йесой ахуркӕнуйнаг Филипп еци лӕгӕн игъосун кодта хуарз хабар. Филипп ин балӕдӕрун кодта, Йесо Мессийӕ ке ӕй. Эфиопаг лӕг ци базудта, е ӕ зӕрдӕмӕ багъардта, ӕма загъта: «Мӕнӕ дон! Ци мӕ хъор кӕнуй донаргъуд райсунмӕ?» (Гъуддӕгтӕ 8:26–36).

3. а) Йесо ӕ фӕдбӕлдзӕугутӕн ци бафӕдзахста? б) Донаргъуд дӕттун куд гъӕуй?

³ Библи комкоммӕ зӕгъуй, Йеговӕн лӕггадӕ кӕнун ке фӕндуй, е донаргъуд ке гъӕуама райса. Йесо ӕ фӕдбӕлдзӕугутӕн бафӕдзахста: «Ӕгас адӕнихӕттитӕй дӕр цӕттӕ кӕнтӕ ахуркӕнуйнӕгтӕ. Дӕттетӕ син донаргъуд» (Матфеййи 28:19). Йесо ӕхуӕдӕг дӕр донаргъуд райста, ӕма уомӕй бавдиста, иннети дӕр уотӕ кӕнун ке гъӕуй. Йесойӕн дон ӕ сӕрбӕл не ’ркалдтонцӕ, фал ӕй ӕнӕгъӕнӕйдӕр дони ранихъулдтонцӕ (Матфеййи 3:16). Ӕма абони дӕр адӕймаг донаргъуд ку еса, уӕд ӕй гъӕуама ӕнӕгъӕнӕйдӕр дони ранихъолонцӕ.

4. Донаргъуд ку райсай, уӕд уомӕй ци бавдесдзӕнӕ?

 ⁴ Донаргъуд ку райсай, уӕд ӕй иннетӕ дӕр фӕууиндзӕнцӕ, ӕцӕгӕйдӕр дӕ ке фӕндуй Хуцауи ӕмбал исун ӕма ин лӕггадӕ кӕнун (Псалом 40:7, 8). Мадта, ӕвӕдзи, сагъӕс кӕнис: «Ци мӕ гъӕуй кӕнун, цӕмӕй донаргъуд райсон?»

5. а) Донаргъуди размӕ дӕ ци гъӕуй бакӕнун? б) Киристон ӕмбурдтӕмӕ цӕун ӕхсидзгӕ цӕмӕн ӕй?

⁵ Донаргъуди размӕ бал гъӕуама базонай Йегови ӕма Йесо Киристей. Ӕма нур дӕр уобӕл архайис, уомӕн ӕма Библи ахур кӕнис. (Бакӕсӕ Иоанни 17:3.) Фал е фагӕ нӕй. Библий куд финст ӕй, уомӕ гӕсгӕ дӕ гъӕуй Хуцауи фӕндон «бӕлвурдӕй зонун» (Колоссӕгтӕмӕ 1:9). Йегови Ӕвдесӕнти ӕмбурдти фӕрци дӕ бон уодзӕй Йеговӕмӕ хӕстӕгдӕр кӕнун. Уой туххӕй ба дӕ гъӕуй еци ӕмбурдтӕмӕ алкӕддӕр цӕун (Дзиуиттӕгтӕмӕ 10:24, 25).

6. Донаргъуд райсуни размӕ бал Библийӕй ци гъӕуама базонай?

⁶ Йеговӕ ди уой нӕ агоруй, цӕмӕй донаргъуди размӕ Библи листӕг хабӕртти уӕнгӕ дӕр зонай. Эфиопаг хецауӕй дӕр, уой нӕ агурдта (Гъуддӕгтӕ 8:30, 31). Ӕности дӕргъи дӕр ма Хуцауи туххӕй берӕ нӕуӕг цидӕртӕ базондзиан (Екклесиаст 3:11). Цӕмӕй донаргъуд райсай, уой туххӕй бал дӕ ӕрмӕстдӕр гъӕуй Библий сӕйраг ахурӕдтӕ зонун ӕма сӕбӕл ӕууӕндун (Дзиуиттӕгтӕмӕ 5:12).

7. Библи ке ахур кӕнис, е дин куд банхус кодта?

 ⁷ Библи зӕгъуй: «Ӕнӕ ӕууӕндундзийнадӕй... Хуцауи зӕрдӕ барохс кӕнӕн нӕййес» (Дзиуиттӕгтӕмӕ 11:6). Мадта цалинмӕ донаргъуд нӕма райстай, уӕдмӕ дӕмӕ гъӕуама фӕззинна ӕууӕндундзийнадӕ. Рагидзаманти горӕт Коринфи цӕргутӕй кадӕртӕ ку фегъустонцӕ, Йесой фӕдбӕлдзӕугутӕ ци хабар игъосун кодтонцӕ, уой, уӕд «баууӕндтӕнцӕ ӕма донаргъуд райстонцӕ» (Гъуддӕгтӕ 18:8). Библи ке ахур кӕнис, уой фӕрци ду дӕр баууӕндтӕ Хуцауи зӕрдӕвӕрдтӕбӕл ӕма, Йесой нивонд тӕрегъӕд ӕма мӕлӕтӕй ке ервӕзун кӕнуй, уобӕл (Йесо Навин 23:14; Гъуддӕгтӕ 4:12; 2 Тимофеймӕ 3:16, 17).

8. Ци базудтай, уой иннетӕн дзорунмӕ дӕ ци баразӕнгард кӕндзӕй?

⁸ Библийӕй куд фулдӕр зонгӕ цӕуай ӕма дин е царди куд ӕнхус кӕнуй, уой куд арӕхдӕр уинай, уотӕ де ’ууӕндундзийнадӕ федардӕр кӕндзӕй. Ӕма дӕ уӕд бафӕнддзӕй, ци базудтай, уой иннетӕн дӕр дзорун (Йереми 20:9; 2 Коринфӕгтӕмӕ 4:13). Фал дӕ бон кӕмӕн ӕй дзорун?

9, 10. а) Ци базудтай, уой дӕ бон кӕмӕн ӕй дзорун? б) Цӕмӕй ӕмбурди хӕццӕ игъосун кӕнун райдайай, уой туххӕй дӕ ци гъӕуй бакӕнун?

⁹ Ци базудтай, уой туххӕй дӕ бон ӕй дӕ бийнонтӕн, де ’мбӕлттӕн, дӕ синхонтӕн кенӕ де ’мкосгутӕн дзорун. Дӕ дзурдигъӕдӕй бӕрӕг уӕд хӕларзӕрдӕ ке дӕ. Фӕстӕдӕр ба дӕ бон уодзӕй ӕмбурди  хӕццӕ дӕр игъосун кӕнун. Еци гъуддагмӕ цӕттӕ ке дӕ, уой ку балӕдӕрай, уӕд ӕй зӕгъӕ, дӕ хӕццӕ Библи ка ахур кӕнуй, уомӕн. Уомӕ дӕр уотӕ ку кӕса, ӕма цӕттӕ дӕ, удта Библий уагӕвӕрдтӕмӕ гӕсгӕ ку цӕрай, уӕд уӕ бон уодзӕй бадзубанди кӕнун, цӕмӕй дууӕ хестӕр нӕлгоймаги уӕ хӕццӕ фембӕлонцӕ.

¹⁰ Еци фембӕлд цӕмӕн гъӕуй? Хестӕр нӕлгоймӕгтӕ дӕ хӕццӕ радзубанди кӕндзӕнцӕ, цӕмӕй ӕй фӕууинонцӕ, Библий сӕйраг ахурӕдтӕ ке лӕдӕрис ӕма сӕбӕл ке ӕууӕндис, уой, удта дӕ цард Библимӕ гӕсгӕ ке аразис ӕма дӕ ӕцӕгӕйдӕр ке фӕндуй Йегови Ӕвдесӕн исун. Иронх ди ма уӕд: хестӕр нӕлгоймӕгтӕ ӕмбурди алкӕбӕлдӕр куд тухсунцӕ, дӕубӕл дӕр уотӕ тухсунцӕ. Уомӕ гӕсгӕ еци фембӕлдӕй ма тӕрсӕ (Гъуддӕгтӕ 20:28; 1 Петури 5:2, 3). Фембӕлди фӕсте дин хестӕр нӕлгоймӕгтӕ зӕгъдзӕнцӕ, дӕ бон ӕй ӕмбурди хӕццӕ игъосун кӕнун райдайун ӕви нӕма.

11. Цалинмӕ ӕмбурди хӕццӕ игъосун кӕнун нӕма райдӕдтай, уӕдмӕ дӕ дӕ царди цидӕртӕ раййевун цӕмӕн гъӕуй?

¹¹ Ка ’й зонуй дин хестӕр нӕлгоймӕгтӕ зӕгъдзӕнцӕ, дӕ царди ма дӕ никкидӕр цидӕртӕ раййевун ке гъӕуй, ӕма уой фӕсте дӕ бон уодзӕй ӕмбурди хӕццӕ игъосун кӕнун. Еци ӕййивддзийнӕдтӕ искӕнун ӕхсидзгӕ цӕмӕн ӕй? Уомӕн ӕма иннетӕн Йеговӕ Хуцауи туххӕй ку фӕдздзорӕн, уӕд фӕдздзорӕн ӕ номӕй. Ӕма ’й уомӕ гӕсгӕ гъӕуама нӕ цардӕй дӕр ӕма не ’гъдауӕй дӕр кадгин кӕнӕн (1 Коринфӕгтӕмӕ 6:9, 10; Галатӕгтӕмӕ 5:19–21).

12. Алли адӕймаги дӕр ӕрфӕсмон кӕнун цӕмӕн гъӕуй?

¹² Донаргъуди размӕ ма дӕ цӕхуӕн къахдзӕфтӕ гъӕудзӕй искӕнун, уой туххӕй апостол Петур ниффинста: «Мадта ӕрфӕсмон кӕнтӕ ӕма уӕ цард раййеветӕ, цӕмӕй уӕ тӕрегъӕдтӕй искӕдзос уайтӕ» (Гъуддӕгтӕ 3:19). Адӕймаг гъӕуама ӕрфӕсмон кӕна, раздӕр ци лӕгъуз гъуддӕгтӕ кодта, уонӕбӕл. Зӕгъӕн, ӕрфӕсмон кӕнун гъӕуй, ихӕлд цард ка кодта, уони. Фал е уобӕл дзорӕг нӕй, ӕма алкӕддӕр рӕстӕй цӕрунбӕл ка архайдта, уони нецӕбӕл гъӕуй фӕсмон кӕнун. Алкедӕр ни рӕдуйуй ӕма ни алкедӕр гъӕуй, цӕмӕй ин Хуцау ниххатир кӕна (Ромӕгтӕмӕ 3:23; 5:12).

13. Дзурдтӕ, «уӕ цард раййеветӕ», зӕгъгӕ, куд лӕдӕргӕ ’нцӕ?

¹³ Фал цума, ци гъуддӕгтӕ кодтан, уонӕбӕл айдагъ ӕрфӕсмон кӕнун фагӕ ӕй? Нӕй. Петур ма загъта, «уӕ цард раййеветӕ», зӕгъгӕ. Аци рауӕн дзурдбаст «цард раййевун» ци дзурдӕй ратӕлмац кодтонцӕ, е комкоммӕ нисан кӕнуй «разелун» кенӕ «раздӕхун». Е уобӕл дзорӕг ӕй, ӕма кӕд лӕгъуз гъуддӕгтӕ кодтай, уӕд сӕ гъӕуама ниууадзай ӕма райдайай, раст ци ӕй, уой кӕнун. Ӕрхӕссӕн цӕветтон. Зӕгъӕн, цӕхуӕндӕр горӕтмӕ фиццаг хатт фӕццӕуис. Минкъий фӕстӕдӕр ба ’й балӕдӕрдтӕ, ӕндӕр ӕрдӕмӕ дӕ цӕун ке гъудӕй. Куд бакӕндзӕнӕ? Ӕвӕдзи, ӕрлӕудзӕнӕ, разелдзӕнӕ ӕма дӕ ци ’рдӕмӕ гъӕуй, еци ’рдӕмӕ раздӕхдзӕнӕ. Уотӕ Библи ахур кӕнгӕй дӕр, ӕвӕдзи,  базудтай, дӕ царди дӕ цидӕртӕ раййевун ке гъӕуй кенӕ цӕхуӕндӕр гъуддӕгтӕ ниууадзун. Мадта уӕд гъӕуама цӕттӕ уай «разелунмӕ», гъома, ци гъӕуй, уой раййевунмӕ ӕма, раст ци ӕй, уой кӕнунмӕ.

14. Адӕймаг ӕхе Хуцауӕн куд иснивонд кӕнуй?

¹⁴ Донаргъуди размӕ ма дӕ гъӕуй искӕнун еу ӕхсидзгӕ къахдзӕф: дӕхе Йеговӕн иснивонд кӕнун. Адӕймаг ӕхе Йеговӕн куд иснивонд кӕнуй? Зӕрдибунӕй имӕ исковуй ӕма ин дзурд раттуй, ӕрмӕстдӕр уомӕн ке лӕггадӕ кӕндзӕй ӕма ин царди тӕккӕ сӕйрагдӕр уой фӕндон ӕнхӕст кӕнун ке уодзӕй (Лукай 4:8).

15, 16. Адӕймаги цӕмӕн бафӕндуй ӕхе Хуцауӕн иснивонд кӕнун?

¹⁵ Йеговӕн дзурд ку раттай, ӕрмӕстдӕр уомӕн ке лӕггадӕ кӕндзӕнӕ, уӕд уой рабарӕн ес еу адӕймаг иннемӕн ци дзурд раттуй, уой хӕццӕ. Зӕгъӕн, лӕхъуӕн кизги хӕццӕ ӕмбӕлун райдӕдта. Рӕстӕг рацудӕй, ӕма ’й хуӕздӕр базудта, ба ’й уарзта ӕма ’й бафӕндадтӕй ӕ цард ӕ хӕццӕ байеу кӕнун. Лӕхъуӕн ӕй лӕдӕруй, еци гъуддагмӕ уӕлӕнгай цӕстӕй кӕсӕн ке нӕййес, фал уӕддӕр цӕттӕ ’й ӕхемӕ уӕхӕн ихӕс райсунмӕ, уомӕн ӕма кизги берӕ уарзуй.

¹⁶ Уотӕ адӕймаг дӕр Йегови ку базонуй, уӕд ӕй бауарзуй ӕма ’й бафӕндуй, цӕмӕй ин ӕгас зӕрдӕй лӕггадӕ кӕна. Гъема имӕ исковуй ӕма ин дзурд  раттуй, лӕггадӕ ин ке кӕндзӕй. Библий куд финст ӕй, уомӕ гӕсгӕ Йесой фӕдбӕл цӕун ке фӕндуй, е гъӕуама «ӕхе туххӕй мабал цӕра» (Марки 8:34). Цума е куд лӕдӕргӕ ’й? Гъӕуама алкӕддӕр Йеговӕмӕ игъосӕн. Удта нин царди фиццаг бунати гъӕуама уа, Йегови фӕндон ӕнхӕст кӕнун, нӕхе фӕндон нӕ, фал. (Бакӕсӕ 1 Петури 4:2.)

17. Еуӕй-еуетӕ сӕхе Йеговӕн иснивонд кӕнунмӕ цӕмӕннӕ тагъд кӕнунцӕ?

¹⁷ Еуӕй-еуетӕ сӕхе Йеговӕн иснивонд кӕнунмӕ нӕ фӕттагъд кӕнунцӕ, уомӕн ӕма фӕттӕрсунцӕ, сӕ дзурд ку не ’сӕнхӕст кӕнонцӕ, уомӕй. Нӕ сӕ фӕндуй Йегови фӕффудӕнгъӕл кӕнун. Кӕмӕдӕрти ба уотӕ фӕккӕсуй, ӕма сӕхе Хуцауӕн ку не ’снивонд кӕнонцӕ, уӕд сӕ сӕ гъуддӕгтӕбӕл дзуапп дӕттун нӕ гъӕудзӕй.

18. Йегови фӕффудӕнгъӕл кӕнунӕй ку тӕрсай, уӕд дин ци банхус кӕндзӕй?

¹⁸ Фал Йегови ку уарзай, уӕд ӕй ке фӕффудӕнгъӕл кӕндзӕнӕ, уомӕй нӕ тӕрсдзӕнӕ, уомӕн ӕма ӕгас хъауритӕй архайдзӕнӕ, цӕмӕй ин ци дзурд равардтай, уой ӕнхӕст кӕнай (Екклесиаст 5:4; Колоссӕгтӕмӕ 1:10). Йегови фӕндон ӕнхӕст кӕнун дӕмӕ зин нӕ кӕсдзӕй. Апостол Иоанн финста: «Хуцауи ке уарзӕн, е бӕрӕг уодзӕй, ӕ фӕдзӕхститӕ ин ку ӕнхӕст кӕнӕн, уӕд. Ӕма ӕ фӕдзӕхститӕ ба зинӕнхӕстгӕнӕн нӕ ’нцӕ» (1 Иоанни 5:3).

19. Цард Йеговӕн иснивонд кӕнунӕй тӕрсун цӕмӕннӕ гъӕуй?

 ¹⁹ Йеговӕ уотӕ нӕ зӕгъуй, ӕма ин цӕмӕй дӕхе иснивонд кӕнай, уой туххӕй гъӕуама ӕнхӕст адӕймаг уай. Дӕ бон ци ӕй, уомӕй фулдӕр ди нӕ агоруй (Псалом 103:14). Йеговӕ дин ӕнхус кӕндзӕй, цӕмӕй дӕ бон уа, раст ци ӕй, уой кӕнун (Исай 41:10). Дӕ зӕрдӕ ибӕл ӕгасӕйдӕр дарӕ, «ӕма дин дӕ над раст кӕндзӕй» (Ӕмбесӕндтӕ 3:5, 6).

20. Дӕхе Хуцауӕн ку иснивонд кӕнай, уӕд ма дӕ цӕхуӕн къахдзӕф гъӕудзӕй искӕнун?

²⁰ Цӕттӕ дӕ дӕхе Йеговӕн иснивонд кӕнунмӕ? Еци къахдзӕф ку искӕнай, уӕд цӕттӕ уодзӕнӕ иннемӕ дӕр – донаргъуд райсунмӕ.

21, 22. Йеговӕн лӕггадӕ кӕнун дӕ ке фӕндуй, уой дӕ бон куд ӕй иннетӕн бавдесун?

²¹ Кӕд дӕхе Йеговӕн иснивонд кодтай ӕма дӕ фӕндуй донаргъуд райсун, уӕд уой туххӕй зӕгъӕ хестӕр нӕлгоймӕгти совети координаторӕн. Е хестӕр нӕлгоймӕгтӕн зӕгъдзӕй, цӕмӕй дӕ хӕццӕ Библий сӕйраг ахурӕдтӕбӕл радзубанди кӕнонцӕ. Донаргъудмӕ цӕттӕ ке дӕ, уой ку фӕууинонцӕ, уӕд дин зӕгъдзӕнцӕ, дӕ бон иннӕ конгресси донаргъуд райсун ке уодзӕй, уой. Конгресси уодзӕй радзубанди донаргъуди фӕдбӕл. Радзубанди кӕмӕн уа, еци ӕнсувӕр дзордзӕй, донаргъуд ци нисан кӕнуй, уобӕл. Ӕ радзубандий кӕрон ба, донаргъуд ка есдзӕй, уонӕмӕ ратдзӕй дууӕ хумӕтӕг фарстай. Еци фарстатӕбӕл дзуапп  ку раттай, уӕд ӕй иннетӕн бавдесдзӕнӕ, Йеговӕн лӕггадӕ кӕнун дӕ ке фӕндуй (Ромӕгтӕмӕ 10:10).

²² Уой фӕсте ба дин ратдзӕнцӕ донаргъуд – ӕнӕгъӕнӕйдӕр дӕ дони ранихъолдзӕнцӕ. Донаргъуд ке райстай, уомӕй еугурӕйдӕр базондзӕнцӕ, дӕхе Йеговӕн ке иснивонд кодтай ӕма Йегови Ӕвдесӕн ке исдӕ.

23. «Фидӕ, Фурт ӕма сугъдӕг хъаури номбӕл» донаргъуд райсун ци нисан кӕнуй?

²³ Йесо Киристе загъта, ӕ ахуркӕнуйнӕгтӕ донаргъуд ке есдзӕнцӕ «Фидӕ, Фурт ӕма сугъдӕг хъаури номбӕл». (Бакӕсӕ Матфеййи 28:19.) Е ба уобӕл  дзорӕг ӕй, ӕма адӕймаг лӕдӕруй, Йеговӕ Дуйнедарӕг Хуцау ке ӕй, ӕ фӕндон Йесой фӕрци куд исӕнхӕст кӕндзӕй ӕма еци фӕндон исӕнхӕст кӕнунмӕ сугъдӕг хъаурӕй куд пайда кӕнуй, уой (Псалом 83:18; Матфеййи 28:18; Галатӕгтӕмӕ 5:22, 23; 2 Петури 1:21).

24, 25. а) Донаргъуд цӕбӕл дзорӕг ӕй? б) Фӕстаг сӕри дзурд цӕбӕл цӕудзӕй?

²⁴ Донаргъуд еу ӕхсидзгӕ гъуддагмӕ амонуй. Дони дӕ ке ранихъолдзӕнцӕ, е уобӕл дзорӕг уодзӕй, ӕма дӕ раздӕриккон цардӕн рамардтӕ, гъома, раздӕр куд цардтӕ, уотӕ ке нӕбал цӕрдзӕнӕ. Донӕй ку исхезай, уӕдта райдайдзӕнӕ нӕуӕг цард кӕнун – ӕнхӕст кӕндзӕнӕ Хуцауи фӕндон. Еци бонӕй фӕстӕмӕ лӕггадӕ кӕндзӕнӕ Йеговӕн. Дӕ зӕрдӕбӕл дарӕ, дӕхе цӕхуӕндӕр адӕймагӕн, организацийӕн кенӕ гъуддагӕн ке не ’снивонд кодтай. Ду дӕхе иснивонд кодтай Йеговӕн.

²⁵ Дӕхе Хуцауӕн ку иснивонд кӕнай ӕма донаргъуд ку райсай, уӕд Хуцаумӕ никки хъӕбӕрдӕр бахӕстӕг уодзӕнӕ (Псалом 25:14). Фал е уобӕл дзорӕг нӕма ӕй, ӕма нӕ фӕййервӕзунмӕ нецибал гъӕуй кӕнун. Апостол Павел ниффинста: «Идарддӕр дӕр тӕрсгӕ-резгӕй ӕгас хъауритӕй архайетӕ уӕ ервӕзундзийнадӕбӕл» (Филиппӕгтӕмӕ 2:12). Ервӕзундзийнади надбӕл донаргъуд ӕрмӕстдӕр фиццаг къахдзӕф ӕй. Мадта цӕмӕй Хуцауӕй макӕд раидард уӕн, уой туххӕй нӕ ци кӕнун гъӕуй? Аци фарстабӕл дзуапп иссердзӕнӕ аци киунуги фӕстаг сӕри.