1, 2. Дӕ бон Хуцаумӕ ковун ке ӕй, е дин уӕлдай хъазар лӕвар цӕмӕн ӕй? Ковун куд гъӕуй, уой туххӕй Библий ци финст ес, уой зонун цӕмӕн гъӕуй?

ДУН-ДУЙНЕЙ хӕццӕ рабаргӕй зӕнхӕ хъӕбӕр минкъий ӕй. Ци адӕн ибӕл цӕрунцӕ, етӕ ба никки минкъийдӕр. Библи зӕгъуй, ӕгас адӕнихӕттитӕ дӕр Йегови цӕсти дони тъинкки бӕрцӕ дӕр ке нӕ ’нцӕ (Псалом 115:15; Исай 40:15). Фал кӕд уотӕ ’й, уӕддӕр Псаломи 145:18, 19 финст ӕй: «Йеговӕ хӕстӕг ӕй, ка имӕ ковуй, уонӕмӕ, рӕстдзийнадӕмӕ гӕсгӕ имӕ ка ковуй, уонӕмӕ се ’гасемӕдӕр. Фегъосдзӕй син сӕ дзиназун ӕма сӕ фӕййервӕзун кӕндзӕй». Расагъӕс кӕнӕ, Йегови, Дун-дуйне ка сфӕлдиста, еци Хуцауи фӕндуй дӕ фарсмӕ ун ӕма дин дӕ кувдтитӕмӕ игъосун. Хуцаумӕ ковун устур кадӕ ӕма устур лӕвар ӕй, ӕма еци лӕварӕй не ’гасейдӕр исхайгин кодта.

² Фал нин цӕмӕй Йеговӕ нӕ кувдтитӕ игъоса, уой туххӕй имӕ гъӕуама ковӕн, ӕхуӕдӕг куд зӕгъуй, уотӕ. Мадта базонӕн, уой туххӕй Библий ци финст ес, уой.

3. Йеговӕмӕ ковун цӕмӕн гъӕуй?

³ Йегови фӕндуй, цӕмӕй имӕ ковай, гъома ӕ хӕццӕ дзорай. Кӕцӕй ӕй зонӕн? Дӕ хуарзӕнхӕй, бакӕсай Филиппӕгтӕмӕ 4:6, 7. Расагъӕс кӕнӕ, аци стихти  ци дзурдтӕ ес, уонӕбӕл. Дун-дуйне ка сфӕлдиста, еци Хуцауӕн хъӕбӕр хъазар дӕ. Ӕма ’й фӕндуй, цӕмӕй ин дзорай, дӕ зӕрди ци ес ӕма цӕбӕл тухсис, уой.

4. Цӕмӕн ес зӕгъӕн, ӕма Йеговӕмӕ ку ковай уӕд имӕ хӕстӕгдӕр кӕндзӕнӕ?

⁴ Йеговӕмӕ ку ковай, уӕд имӕ хӕстӕгдӕр кӕндзӕнӕ. Ӕмбӕлттӕ кӕрӕдзей хӕццӕ арӕх ку фӕдздзубанди кӕнунцӕ ӕма, цӕбӕл сагъӕс кӕнунцӕ кенӕ цӕбӕл тухсунцӕ, уой ӕргом ку фӕдздзорунцӕ, уӕд никки хъӕбӕрдӕр балимӕн унцӕ. Уотӕ фӕууй, Йеговӕмӕ ку фӕкковӕн, уӕд дӕр. Йеговӕ Библий ӕргом кӕнуй ӕ гъудитӕ ӕма е ’нкъарӕнтӕ, удта дзоруй, федӕни ци искӕндзӕй, уой дӕр. Ӕма дӕуӕн дӕр дӕ бон ӕй ӕ хӕццӕ дзорун, сауӕнгӕ ма ин дӕ зӕрди арф сагъӕстӕ дӕр дзорун. Уотӕ ку кӕнай, уӕд имӕ хӕстӕгдӕр кӕндзӕнӕ (Иакови 4:8).

5. Йеговӕ ӕгасей кувдтитӕмӕ ке нӕ фегъосуй, уой кӕцӕй зонӕн?

⁵ Цума Йеговӕ ӕгасей кувдтитӕмӕ дӕр игъосуй? Нӕъ. Пахампар Исаййи дзамани Йеговӕ израилӕгтӕн загъта: «Уӕ къохтӕ мӕмӕ ку февазетӕ, уӕд мӕ цӕститӕ иннердӕмӕ разелун. Цӕйбӕрцӕфӕнди мӕмӕ ма ковайтӕ – нӕ уӕмӕ игъосун. Сумахӕн уӕ къохтӕ тогӕйдзаг ӕнцӕ» (Исай 1:15). Мадта гъӕуама нӕхе еуварс дарӕн, Йеговӕ е ’сӕфт кӕмӕй уинуй, еци гъуддӕгтӕй, кенӕ ба нин нӕ кувдтитӕ нӕ игъосдзӕй.

6. Ӕууӕндундзийнадӕ ӕхсидзгӕ цӕмӕн ӕй? Хуцаубӕл ке ӕууӕндис, е цӕмӕй бӕрӕг уодзӕй?

⁶ Цӕмӕй нин Йеговӕ нӕ кувдтитӕ игъоса, уой туххӕй ибӕл гъӕуама ӕууӕндӕн (Марки 11:24). Апостол  Павел балӕдӕрун кодта: «Ӕнӕ ӕууӕндундзийнадӕй ба Хуцауи зӕрдӕ барохс кӕнӕн нӕййес, уомӕн ӕма Хуцауӕн ковӕг адӕймаг гъӕуама ӕууӕнда, Хуцау ке ес ӕма ’й зӕрдиагӕй ка агоруй, уонӕн ке арфӕ кӕнуй» (Дзиуиттӕгтӕмӕ 11:6). Фал уотӕ дзорун, ӕз Хуцаубӕл ӕууӕндун, зӕгъгӕ, фагӕ нӕй. Ӕууӕндундзийнадӕ нӕмӕ ке ес, уой ӕвдесдзиан, алли гъуддаги дӕр Йеговӕмӕ ку игъосӕн, уӕд. (Бакӕсӕ Иакови 2:26.)

7. а) Йегови хӕццӕ сӕрниллӕгӕй ӕма уӕзданӕй цӕмӕн гъӕуама дзорӕн? б) Йеговӕмӕ зӕрдӕй ке ковӕн, е цӕмӕй бӕрӕг уодзӕй?

⁷ Йегови хӕццӕ гъӕуама дзорӕн сӕрниллӕгӕй ӕма уӕзданӕй. Зӕгъӕн, паддзахмӕ кенӕ президентмӕ ку бацудайсӕ, уӕд, ӕвӕдзи, ӕ хӕццӕ уӕзданӕй дзурдтайсӕ. Йеговӕ ба Дун-дуйней Хецау ӕй ӕма ӕ хӕццӕ дзоргӕй гъӕуама никки сӕрниллӕгдӕр ӕма уӕздандӕр уӕн (Райдайӕн 17:1; Псалом 138:6).  Уомӕй уӕлдай ма имӕ гъӕуама зӕрдӕй ковӕн ӕма ин нӕ сагъӕстӕ дзорӕн. Удта кувди медӕг еци-еу дзурдтӕ дзорун нӕ гъӕуй (Матфеййи 6:7, 8).

8. Йеговӕй ести ку фӕккорӕн, уӕд нӕхе дӕр ци фӕгъгъӕуй кӕнун?

⁸ Йеговӕй ести ку фӕккорӕн, уӕд гъӕуама нӕхуӕдтӕ дӕр, нӕхецӕй кӕнгӕ ци ӕй, уой кӕнӕн. Зӕгъӕн, алли бон дӕр нӕ ӕнӕмӕнгӕй ци фӕгъгъӕуй, уой туххӕй Йеговӕмӕ ку ковӕн, уӕд нӕмӕ гъӕуама уотӕ ма кӕса, ӕма нин Йеговӕ алцидӕр цӕттӕй ратдзӕй. Гъӕуама кустуарзагӕ уӕн ӕма цийфӕнди куст дӕр нӕ сӕрмӕ хӕссӕн (Матфеййи 6:11; 2 Фессалоникӕгтӕмӕ 3:10). Кенӕ ба, зӕгъӕн, Йеговӕмӕ ковӕн, цӕмӕй нин цӕхуӕндӕр лӕгъуз гъуддаг ниууадзунмӕ банхус кӕна. Уӕд гъӕуама нӕхе хезӕн, фӕррӕдуйунӕй нин тӕссаг кӕми уа, уӕхӕн уавӕртӕй (Колоссӕгтӕмӕ 3:5). Нур ба ӕркӕсӕн, кувди туххӕй адӕймагмӕ арӕхдӕр цӕхуӕн фарстатӕ фӕззиннуй, уонӕй цалдӕремӕ.

9. Ковгӕ кӕмӕ гъӕуама кӕнӕн? Иоанни 14:6 финст дзурдтӕй ци ес базонӕн Хуцаумӕ ковун куд гъӕуй, уой туххӕй?

⁹ Ковгӕ кӕмӕ гъӕуама кӕнӕн? Йесо ӕ фӕдбӕлдзӕугути ахур кодта ковун «нӕ уӕларвон Фидӕмӕ» (Матфеййи 6:9). Уомӕй уӕлдай ма загъта: «Ӕз дӕн над, рӕстдзийнадӕ ӕма цард. Мӕ Фидӕмӕ ӕрмӕстдӕр мӕнбӕлти ес ӕрбацӕуӕн, ӕндӕр некӕбӕлти» (Иоанни 14:6). Мадта ковгӕ гъӕуама ӕрмӕстдӕр Йеговӕмӕ кӕнӕн, Йесой номӕй. Йесо Киристей номӕй ковун ци нисан кӕнуй? Цӕмӕй нин Йеговӕ нӕ  кувдтитӕ игъоса, уой туххӕй ин гъӕуама ӕ Фурт Йесо Киристей нимайӕн ӕма ’й лӕдӕрӕн, цӕхуӕн ӕхсидзгӕ гъуддаг ин баихӕс кодта, уой. Куд ӕй базудтан, уомӕ гӕсгӕ Йесо зӕнхӕмӕ ӕрцудӕй, цӕмӕй нӕ тӕрегъӕд ӕма мӕлӕтӕй фӕййервӕзун кӕна (Иоанни 3:16; Ромӕгтӕмӕ 5:12). Уомӕй уӕлдай ма Йеговӕ Йесой исӕвардта Хестӕр саугинӕй ӕма Тӕрхонгӕнӕгӕй (Иоанни 5:22; Дзиуиттӕгтӕмӕ 6:20).

10. Хуцаумӕ куд гъӕуй ковун? Ба ’й лӕдӕрун кӕнӕ.

¹⁰ Хуцаумӕ куд гъӕуй ковун? Библийӕй куд зиннуй, уомӕ гӕсгӕ ковун нӕ бон ӕй бадгӕй дӕр ӕма лӕугӕй дӕр, удта нӕ бон ӕй нӕ уӕргутӕбӕл ӕрлӕуун кенӕ ба уотид нӕ сӕр ӕркъолӕ кӕнун (1 Анзфинстити 17:16; Нееми 8:6; Данел 6:10; Марки 11:25). Йеговӕн ӕхсидзгӕдӕр ӕй, цӕмӕй ӕ хӕццӕ уӕзданӕй дзорӕн ӕма нӕ дзурдтӕ зӕрдӕй цӕуонцӕ. Нӕ бон ӕй ковун гъӕрӕй дӕр ӕма нӕхенимӕр дӕр, удта кӕмифӕнди дӕр ӕма цийфӕнди афони дӕр. Йеговӕмӕ ку фӕкковӕн, уӕд гъӕуама ӕппундӕр ма дузӕрдуг кӕнӕн, ке нӕ игъосуй, уобӕл (Нееми 2:1–6).

11. Йеговӕмӕ цӕй туххӕй нӕ бон ӕй ковун?

¹¹ Нӕ бон цӕй туххӕй ӕй ковун? Йегови фӕндонмӕ гӕсгӕ цидӕриддӕр ӕй, уой туххӕй. Библий финст ӕй: «Мах ӕй федарӕй зонӕн, Хуцауӕй ӕ фӕндонмӕ гӕсгӕ цийфӕнди ма ракорӕн,– игъосуй нӕ» (1 Иоанни 5:14). Нӕхе ци гъӕуй кенӕ нӕ ци тухсун кӕнуй, уой туххӕй дӕр ин ес дзорӕн? Гъо. Йеговӕмӕ ку фӕкковӕн, уӕд гъӕуама ӕ хӕццӕ дзорӕн, нӕ хуарз ӕмбали хӕццӕ куд дзурдтайанӕ, уотӕ. Нӕ бон ин ӕй алцидӕр дзорун – нӕ зӕрди цидӕриддӕр ес ӕма цӕбӕл сагъӕс кӕнӕн, уой (Псалом 62:8). Нӕ бон ма ӕй  Йеговӕй ӕ сугъдӕг хъаурӕ корун, цӕмӕй нин ӕнхус кӕна, раст ци ӕй, уой кӕнунмӕ (Лукай 11:13). Уомӕй уӕлдай ма си нӕ бон ӕй зунд корун раст унаффитӕ хӕссунмӕ, удта хъауритӕ – зиндзийнӕдти сӕрти хезунмӕ (Иакови 1:5). Удта ма нӕ гъӕуй Йеговӕй корун, цӕмӕй нин нӕ тӕрегъӕдтӕ хатир кӕна (Ефесӕгтӕмӕ 1:3, 7). Уомӕй уӕлдай ма гъӕуама ковӕн иннети туххӕй дӕр, зӕгъӕн, нӕ бийнонти, удта не ’мбурди хуӕртӕ ӕма ӕнсувӕрти туххӕй (Гъуддӕгтӕ 12:5; Колоссӕгтӕмӕ 4:12).

12. Йеговӕмӕ фиццагидӕр цӕй туххӕй гъӕуама ковӕн?

¹² Фиццагидӕр цӕй туххӕй гъӕуй ковун? Йегови ӕма ӕ фӕндони хӕццӕ баст ци ӕй, уой туххӕй. Гъӕуама ин е ’гас хуарздзийнӕдти туххӕй зӕрдӕй арфӕ кӕнӕн (1 Анзфинстити 29:10–13). Фиццагидӕр цӕй туххӕй гъӕуй ковун, уой базонӕн ес, Йесо ӕ ахуркӕнуйнӕгти ковунбӕл куд ахур кодта, уомӕй. (Бакӕсӕ Матфеййи 6:9–13.) Йесо син загъта, фиццагидӕр сӕ ке гъӕуй ковун, цӕмӕй Хуцауи ном исрохс уа. Уой фӕсте ба цӕмӕй Хуцауи Паддзахадӕ ӕрцӕуа ӕма ӕгас зӕнхӕбӕл дӕр Хуцауи фӕндон уа. Уой фӕсте ба нӕ бон ӕй, нӕхе ци гъӕуй, уой туххӕй дӕр раковун. Нӕ кувдтитӕ фиццагидӕр, Йегови ӕма ӕ фӕндони хӕццӕ баст ци ӕй, уобӕл ку уонцӕ, уӕд ӕй ӕвдесдзиан, уомӕй ӕхсидзгӕдӕр нин ке неци ес, уой.

13. Цӕйбӕрцӕ рӕстӕг гъӕуй ковун?

¹³ Цӕйбӕрцӕ рӕстӕг гъӕуй ковун? Уой туххӕй Библий неци финст ес. Е уавӕртӕй кӕнгӕ ’й. Зӕгъӕн, хуӕрди разӕй нӕ бон ӕй цубуртӕй раковун. Йеговӕн естӕй туххӕй райарфӕ кӕнун нӕ ку фӕндӕуа кенӕ ба – ци нӕ тухсун кӕнуй, уой радзорун, уӕдта нӕ багъӕудзӕй  фулдӕр рӕстӕг ковун (1 Самуили 1:12, 15). Фал еске рази ковгӕй гъӕуама ӕргом нӕхемӕ ма ’здахӕн ӕма нӕ кувд ма ниддаргъ кӕнӕн, Киристей рӕстӕги кадӕртӕ куд кодтонцӕ, уотӕ (Лукай 20:46, 47). Уӕхӕн кувдтитӕй Йегови деси нӕ бафтаудзиан. Йеговӕн ӕхсидзгӕдӕр ӕй, цӕхуӕн зӕрдӕй имӕ ковӕн, е.

14. Хуцаумӕ куд арӕх гъӕуама ковӕн ӕма нин е Йегови туххӕй цӕбӕл дзорӕг ӕй?

¹⁴ Куд арӕх гъӕуй ковун? Йеговӕ нин зӕгъуй,  цӕмӕй имӕ арӕхдӕр ковӕн. Библий финст ӕй, «алкӕддӕр коветӕ», зӕгъгӕ (Матфеййи 26:41; Ромӕгтӕмӕ 12:12; 1 Фессалоникӕгтӕмӕ 5:17). Йеговӕ кӕдфӕндидӕр цӕттӕ фӕууй нӕ кувдмӕ байгъосунмӕ. Нӕ бон ин ӕй алли бон дӕр ӕ уарзондзийнадӕ ӕма ӕ рӕдаудзийнади туххӕй арфӕ кӕнун, удта си разамунд, хъауритӕ ӕма уодӕнцойнӕ корун. Нӕ бон Йеговӕмӕ ковун ке ӕй, уомӕн ӕцӕгӕйдӕр ку аргъ кӕнӕн, уӕд алли фадуатӕй дӕр пайда кӕндзиан, цӕмӕй ӕ хӕццӕ радзорӕн.

15. Кувди кӕрон амменӕ цӕмӕн фӕззӕгъӕн?

¹⁵ Кувди кӕрон «амменӕ» цӕмӕн фӕззӕгъӕн? Дзурд амменӕ нисан кӕнуй «уотӕ ’й» кенӕ «уотӕ уӕд». «Амменӕ» ку фӕззӕгъӕн, уӕд уомӕй бавдесӕн,  нӕ кувди ци загътан, е нӕ зӕрдӕй ке цудӕй (Псалом 41:13). Еу адӕймаг къуари номӕй ку исковуй, уӕд кувди кӕрон гъӕрӕй кенӕ нӕхенимӕр амменӕ ку фӕззӕгъӕн, уӕд бавдесӕн ӕ дзурдти, хӕццӕ арази ке ан (1 Анзфинстити 16:36; 1 Коринфӕгтӕмӕ 14:16).

16. Йеговӕ нин нӕ кувдтитӕбӕл ӕцӕгӕйдӕр дӕттуй дзуапп? Уой туххӕй Библи ци зӕгъуй?

¹⁶ Цума нин Йеговӕ ӕцӕгӕйдӕр нӕ кувдтитӕбӕл дзуапп фӕддӕттуй? Гъо. Библий финст ӕй, Йеговӕ, «кувдтитӕ ка игъосуй, еци Хуцау» ке ӕй (Псалом 65:2). Йеговӕ фегъосуй милиуангай адӕни зӕрдиаг кувдтитӕ ӕма син дзуапп дӕттуй. Дзуапп ба син дӕттуй аллихузти.

17. Йеговӕ нин ӕ зӕнхон лӕггадгӕнгути ӕма ӕ изӕдти фӕрци нӕ кувдтитӕбӕл дзуапп куд раттуй?

¹⁷ Йеговӕ нин нӕ кувдтитӕбӕл дзуапп раттуй изӕдти ӕма ӕ зӕнхон лӕггадгӕнгути фӕрци (Дзиуиттӕгтӕмӕ 1:13, 14). Зӕгъӕн, арӕх фӕууй уотӕ, ӕма адӕймаг Хуцаумӕ исковуй, цӕмӕй Библи хуӕздӕр балӕдӕра, ӕма имӕ еци рӕстӕг Йегови Ӕвдесӕнтӕ ӕрбацӕунцӕ. Уомӕй бӕрӕг ӕй, ӕгас зӕнхӕбӕл дӕр «хуарз хабар» игъосун кӕнуни гъуддаги изӕдтӕ дӕр ке архайунцӕ. (Бакӕсӕ Раргомадӕ 14:6.) Кенӕ ба ести тухст уавӕри ку бахауӕн ӕма Йеговӕмӕ ку исковӕн, уӕд нин хуӕртӕ ӕма ӕнсувӕрти фӕрци банхус кӕнуй (Ӕмбесӕндтӕ 12:25; Иакови 2:16).

18. Йеговӕ нин ӕ сугъдӕг хъаури ӕма Библий фӕрци нӕ кувдтитӕбӕл дзуапп куд раттуй?

¹⁸ Йеговӕ ма пайда кӕнуй ӕ сугъдӕг хъаурӕй дӕр,  цӕмӕй нин нӕ кувдтитӕбӕл дзуапп дӕтта. Зӕгъӕн, зин уавӕрти имӕ ку фӕкковӕн, уӕд нин ӕ сугъӕдӕг хъаури фӕрци раттуй разамунд ӕма хъауритӕ (2 Коринфӕгтӕмӕ 4:7). Дзуапп ма нин раттуй Библийӕй дӕр. Библи ку фӕккӕсӕн, уӕд си иссерӕн, нӕ уавӕри нин раст унаффитӕ хӕссунмӕ ка банхус кӕндзӕй, уӕхӕн стихтӕ. Хатгай ба Йеговӕ ӕмбурди еске баразӕнгард кӕнуй, цӕмӕй дзуапп дӕтгӕй зӕгъа, ка нин банхус кӕндзӕй, уӕхӕн гъуди. Кенӕ ба уотӕ бакӕнуй, цӕмӕй нӕ хестӕр нӕлгоймаг Библийӕй цӕхуӕндӕр гъудийӕй бафедар кӕна (Галатӕгтӕмӕ 6:1).

19. Уотӕ нӕмӕ цӕмӕн фӕккӕсуй, ӕма нин Йеговӕ нӕ кувдтитӕбӕл дзуапп нӕ дӕттуй?

¹⁹ Еуӕй-еухатт нӕмӕ уотӕ фӕккӕсуй, ӕма нин Йеговӕ нӕ кувдтитӕбӕл дзуапп нӕ дӕттуй. Фал ӕй гъӕуама лӕдӕрӕн: Йеговӕ ’й зонуй, нӕ кувдтитӕбӕл нин кӕд ӕма куд гъӕуй исдзуапп кӕнун, уой. Ка ’й зонуй нӕ багъӕуа еу цӕйбӕрцӕдӕр рӕстӕг ковун, цӕмӕй бавдесӕн, цӕй туххӕй ковӕн, е нин ӕхсидзгӕ ке ӕй ӕма нин дзуапп ке ратдзӕй, уобӕл ке ӕууӕндӕн, уой (Лукай 11:5–10). Хатгай нин Йеговӕ дзуапп раттуй, ӕнгъӕл дӕр ӕй куд нӕ фӕууӕн, уотӕ. Зӕгъӕн, кӕцидӕр уавӕрти нӕ Йеговӕ нӕ зиндзийнӕдтӕй не ’суӕгъдӕ кӕнуй, фал нин хъаурӕ раттуй, цӕмӕй бафӕразӕн. (Бакӕсӕ Филиппӕгтӕмӕ 4:13.)

20. Йеговӕмӕ арӕх цӕмӕн гъӕуама ковӕн?

²⁰ Расагъӕс кӕнӕ, Йеговӕ нин цӕхуӕн устур кадӕ искодта! Нӕ кувдтитӕ нин ке игъосуй, уобӕл гъӕуама ӕппундӕр ма гурусхӕ кӕнӕн (Псалом 145:18). Куд арӕхдӕр имӕ ковӕн, уотӕ имӕ хӕстӕгдӕр кӕндзиан.