1, 2. Цӕхуӕн фарстабӕл дӕ гъӕуй расагъӕс кӕнун ӕма цӕмӕн?

БИБЛИ ахур кӕнгӕй базудтай, беретӕ сӕхе Хуцауи лӕггадгӕнгутӕ ке хонунцӕ, фал цитӕ кӕнунцӕ ӕма цитӕ амонунцӕ, уонӕй Хуцау е ’сӕфт уинуй (2 Коринфӕгтӕмӕ 6:17). Ӕма нин Йеговӕ уомӕ гӕсгӕ зӕгъуй, цӕмӕй мӕнгӕ динӕй, кенӕ «Устур Вавилонӕй», рацӕуӕн (Раргомадӕ 18:2, 4). Мадта уӕд куд бакӕндзӕнӕ? Алкедӕр ни гъӕуама ӕхемӕ ратта уӕхӕн фарста: «Хуцауӕн, уой куд фӕндуй, уотӕ ковдзӕн ӕви ин нурмӕти куд кувтон, уотӕ?»

² Кӕд мӕнгӕ дин ниууагътай, уӕд хуарз бакодтай. Фал ма уӕддӕр, ка ’й зонуй, мӕнгӕ дини ӕгъдӕуттӕй кӕцидӕртӕ дӕ зӕрдӕмӕ цӕунцӕ. Гъӕйдӕ си еуӕй-еуетӕмӕ ӕркӕсӕн ӕма базонӕн, Йеговӕ сӕмӕ ци цӕстӕй кӕсуй ӕма сӕмӕ мах дӕр уой цӕстӕй цӕмӕн гъӕуама кӕсӕн.

3. а) Еуӕй-еуетӕн Хуцаумӕ ӕнӕ хузтӕй ковун зин цӕмӕн фӕууй? б) Хузтӕн ковуни туххӕй Библий ци финст ес?

³ Еуӕй-еу адӕн берӕ ӕнзти дӕргъи Хуцаумӕ ковгӕй пайда кӕнунцӕ хузтӕй кенӕ сӕ хӕдзари еци гъуддагӕн цӕхуӕндӕр къум рахецӕн кӕнунцӕ  ӕма си ковӕндонӕ рауайун кӕнунцӕ. Кӕд ду дӕр уотӕ ахур дӕ, уӕд дин, ӕвӕдзи, зин балӕдӕрӕн ӕй, ӕнӕ уонӕй Хуцаумӕ ковун куд ӕнгъезуй, уой. Фал Йеговӕн ковун куд гъӕуй, уобӕл фиццагидӕр гъӕуама ӕхе бафӕрсӕн. Библий комкоммӕ финст ӕй, Йегови ке нӕ фӕндуй, цӕмӕй хузтӕн ковӕн. (Бакӕсӕ Рацуд 20:4, 5; Псалом 115:4–8; Исай 42:8; 1 Иоанни 5:21.)

4. а) Мӕрдтӕн ковун раст цӕмӕннӕ ’й? б) Йеговӕ ӕ адӕни мӕрдти хӕццӕ дзорунӕй цӕмӕн фӕдзахста?

⁴ Еуӕй-еу адӕн берӕ рӕстӕг, хъауритӕ ӕма ӕхца бахарз кӕнунцӕ, цӕмӕй, ка син рамардӕй, уони хуарзӕнхӕ иссеронцӕ. Сауӕнгӕ ма син ковгӕ дӕр фӕккӕнунцӕ. Фал ӕй куд базудтан, уомӕ гӕсгӕ мӕрдтӕн сӕ бон нӕй махӕн нӕдӕр хуарз ракӕнун, нӕдӕр лӕгъуз. Етӕ ӕндӕр кӕмидӕр нӕ цӕрунцӕ. Удта мӕрдти хӕццӕ радзорунбӕл архайун дӕр тӕссаг ӕй, уомӕн ӕма уонӕй цийфӕнди «хабар» ма рацӕуа, уӕддӕр ӕй гъӕуама лӕдӕрӕн, е сайтӕнттӕй ке цӕуй. Йеговӕ дӕр израилӕгтӕн уой туххӕй загъта, цӕмӕй уӕхӕн гъуддӕгтӕй сӕхе гъӕуай кодтайуонцӕ, гъома сайтӕнтти хӕццӕ баст цидӕриддӕр ӕй, уомӕй (Дуккаг закъон 18:10–12; кӕсӕ 26 ӕма 31 уӕлӕнхасӕн).

5. Ци дин банхус кӕндзӕй Хуцаумӕ ковгӕй хузтӕй мабал пайда кӕнун ӕма мӕрдтӕн мабал ковун?

⁵ Ци дин банхус кӕндзӕй Хуцаумӕ ковгӕй хузтӕй мабал пайда кӕнун ӕма мӕрдтӕн мабал ковун? Библи кӕсӕ ӕма лӕмбунӕг сагъӕс кӕнӕ,  Йеговӕ уӕхӕн гъуддӕгтӕмӕ цӕхуӕн цӕстӕй кӕсуй, уобӕл. Етӕ ин ӕнцӕ «ӕнадӕ», кенӕ илгъаг (Дуккаг закъон 27:15). Йеговӕмӕ ковӕ, цӕмӕй дин ӕнхус кӕна алцӕмӕдӕр уой цӕстӕй кӕсун ӕма ин дӕ бон уа, уой куд фӕндуй, уотӕ лӕггадӕ кӕнун (Исай 55:9). Ӕппундӕр ма дузӕрдуг кӕнӕ, Хуцау дин уойбӕрцӕ хъаурӕ ке ратдзӕй, цӕмӕй мӕнгӕ дин ниууадзай ӕма дин ӕ хӕццӕ еумӕйагӕй мацибал уа.

6. Йесо Киристей игурӕн бон 25 декабри цӕмӕн бӕрӕг кӕнунцӕ?

⁶ Рождество ӕй, дуйней кадгиндӕр бӕрӕгбӕнттӕбӕл нимад ка ӕй, уонӕй сӕ еу. Ӕма адӕнӕн сӕ фулдӕр еци бон нимайунцӕ Йесой игурӕн бонбӕл. Фал Рождество мӕнгӕ дини хӕццӕ баст ӕй. Еу энциклопедий финст ӕй, ромӕгтӕ 25 декабри хори игурӕн бон ке бӕрӕг кодтонцӕ. Аргъауӕни разамонгути ба уотӕ фӕндадтӕй, цӕмӕй етӕ дӕр киристӕнттӕ иссайуонцӕ. Ӕма 25 декабри искодтонцӕ Йесо Киристей игурӕн бон, кӕд еци бон нӕ райгурдӕй, уӕддӕр * (Лукай 2:8–12). Йесой ахуркӕнуйнӕгтӕ Рождество нӕ бӕрӕг кодтонцӕ. Еу киунуги куд финст ӕй, уомӕ гӕсгӕ ӕ райгурци фӕсте 200 анзей дӕргъи «неке зудта, кӕци бон райгурдӕй, уой, удта уобӕл сагъӕс дӕр неке кодта» (Sacred Origins of Profound Things). Рождество  бӕрӕг кӕнун райдӕдтонцӕ, Йесо зӕнхӕбӕл ку цардӕй, уомӕй еу 300 анзи фӕсте.

7. Ӕцӕг киристӕнттӕ Рождество цӕмӕннӕ бӕрӕг кӕнунцӕ?

⁷ Беретӕ зонунцӕ, Рождество ӕма е ’гъдӕуттӕ, зӕгъӕн, фингтӕ ӕвӕрун ӕма кӕрӕдземӕн лӕвӕрттӕ кӕнун, киристон динбӕл хуӕст ка н’ адтӕй, уӕхӕн адӕнихӕттитӕй ке рацудӕнцӕ *. Уой туххӕй еу рӕстӕг Англий ӕма Цӕгат Америки кӕцидӕр рауӕнти Рождество бӕрӕг кӕнун нӕбал уагътонцӕ. Удта ’й ка бӕрӕг кодта, уони дӕр хъӕбӕр бафхуӕриуонцӕ. Фал ӕй фӕстӕдӕр нӕуӕгӕй бӕрӕг кӕнун райдӕдтонцӕ. Ӕцӕг киристӕнттӕ ба Рождество цӕмӕннӕ бӕрӕг кӕнунцӕ? Уомӕн ӕма сӕ алли гъуддаги дӕр фӕндуй Хуцауи зӕрдӕ рохс кӕнун.

8, 9. Фиццаг киристӕнттӕ игурӕн бӕнттӕ цӕмӕннӕ бӕрӕг кодтонцӕ?

⁸ Беретӕ ма уарзунцӕ сӕ игурӕн бон бӕрӕг кӕнун. Фал Библий ци игурӕн бӕнтти кой цӕуй, уони бӕрӕг кодтонцӕ, Йеговӕн ка нӕ лӕггадӕ кодта, уӕхӕн адӕн (Райдайӕн 40:20; Марки 6:21). Игурӕн бӕнтти кадгин кодтонцӕ мӕнгӕ хуцӕутти. Уомӕ гӕсгӕ фиццаг киристӕнттӕ «игурӕн бон бӕрӕг кӕнун нимадтонцӕ, мӕнгӕ хуцӕуттӕн  ковӕг адӕни ӕгъдаубӕл» (The World Book Encyclopedia).

⁹ Рагон Роми ӕма Греций цӕргутӕ ӕууӕндтӕнцӕ, алли адӕймаг дӕр ку райгуруй, уӕд ӕ рази цӕхуӕндӕр идауӕг ке фӕууй ӕма ’й цӕрӕнбонти гъӕуай ке фӕккӕнуй. Еу киунуги финст ӕй: «Адӕн ӕууӕндтӕнцӕ, еци идауӕг, адӕймаг ци хуцауи игурӕн бон райгурдӕй, еци хуцауи хӕццӕ баст ке ӕй, уобӕл» (The Lore of Birthdays).

10. Абони киристӕнттӕ игурӕн бӕнттӕ цӕмӕннӕ бӕрӕг кӕнунцӕ?

¹⁰ Куд дӕмӕ кӕсуй, мӕнгӕ дини хӕццӕ баст бӕрӕгбӕнттӕ Йегови зӕрдӕмӕ цӕунцӕ? (Исай 65:11, 12). Нӕ цӕунцӕ. Ӕма мах дӕр игурӕн бӕнттӕ ӕма мӕнгӕ дини хӕццӕ баст ка ӕй, ӕндӕр уӕхӕн бӕрӕгбӕнттӕ уой туххӕй нӕ бӕрӕг кӕнӕн.

11. Еуӕй-еуетӕ бӕрӕгбӕнттӕ цӕмӕн фӕббӕрӕг кӕнунцӕ? Фиццагидӕр цӕбӕл гъӕуама сагъӕс кӕнӕн?

¹¹ Еуӕй-еуетӕ ’й зонунцӕ, Рождество ӕма ӕндӕр кӕцидӕр бӕрӕгбӕнттӕ, киристон динӕй нӕ, фал ӕндӕр динтӕй ке рацудӕнцӕ, фал сӕ уӕддӕр бӕрӕг кӕнунцӕ, уомӕн ӕма сӕ нимайунцӕ хуарз фадуатбӕл, цӕмӕй рӕстӕг сӕ бийнонти хӕццӕ рарветонцӕ. Ду дӕр бӕрӕгбӕнттӕмӕ уӕхӕн цӕстӕй кӕсис? Дӕ бийнонти хӕццӕ дӕ рӕстӕг рарветун ке фӕндуй, уоми лӕгъузӕй неци ес. Бийнонтӕ Йеговӕ искодта ӕма ’й фӕндуй, цӕмӕй кӕрӕдзей уарзонцӕ (Ефесӕгтӕмӕ 3:14, 15).  Фал мах фиццагидӕр гъӕуама сагъӕс кӕнӕн, Йеговӕн ӕхцӕуӕн ци уодзӕй, уобӕл, нӕ хӕстӕгути зӕрдӕ барохс кӕнунбӕл нӕ, фал. Апостол Павел дӕр уой туххӕй загъта: «Алкӕддӕр архайетӕ, нӕ Хецауи зӕрдӕмӕ ци цӕуй, уой хуӕздӕр базонунбӕл» (Ефесӕгтӕмӕ 5:10)

12. Йегови зӕрдӕмӕ цӕхуӕн бӕрӕгбӕнттӕ нӕ цӕунцӕ?

¹² Беретӕмӕ уотӕ кӕсуй, ӕма бӕрӕгбон кӕцӕй рацудӕй, е уотӕ ӕхсидзгӕ нӕй. Фал Йеговӕ уотӕ нӕ гъуди кӕнуй. Уой зӕрдӕмӕ нӕ цӕунцӕ, мӕнгӕ динтӕй ка рацудӕй, уӕхӕн бӕрӕгбӕнттӕ. Зӕгъӕн, египеттӕгтӕ сӕ мӕнгӕ хуцӕутти номбӕл берӕ бӕрӕгбӕнттӕ кодтонцӕ. Ӕма израилӕгтӕ Египетӕй ку рацудӕнцӕ, уӕд еци бӕрӕгбӕнттӕй еу исбӕрӕг кодтонцӕ ӕма ’й исхудтонцӕ «бӕрӕгбон Йегови номбӕл». Фал сӕ Йеговӕ уой туххӕй бафхуардта (Рацуд 32:2–10). Пахампар Исай куд загъта, уомӕ гӕсгӕ, «цъумур ци ӕй, уӕхӕнӕй» гъӕуама мацӕмӕ ӕвналӕн! (Бакӕсӕ Исай 52:11.)

13. Дӕхецӕн ӕй ку ниллух кӕнай, бӕрӕгбӕнттӕ ке нӕбал кӕндзӕнӕ, уӕд дӕмӕ, ӕвӕдзи, цӕхуӕн фарстатӕ фӕззиндзӕй?

¹³ Дӕхецӕн ӕй ку ниллух кӕнай, бӕрӕгбӕнттӕ ке нӕбал кӕндзӕнӕ, уӕд дӕмӕ, ка ’й зонуй, берӕ фарстатӕ фӕззиндзӕй. Зӕгъӕн: «Ме ’мкосгутӕ мӕ ку бафӕрсонцӕ, нӕ хӕццӕ бӕрӕгбон цӕмӕннӕ бӕрӕг кӕнис, зӕгъгӕ, уӕд ци зӕгъдзӕн? Еске мин бӕрӕгбонмӕ ести ку лӕвар кӕна, уӕд куд гъӕуама бакӕнон? Мӕ цардӕмбал мин ести  бӕрӕгбон ку кӕнун кӕна, уӕдта? Мӕ сувӕллӕнттӕн куд банхус кӕнон, цӕмӕй ма ӕнкъард кӕнонцӕ, бӕрӕгбӕнттӕ ӕма син игурӕн бӕнттӕ ке нӕ кӕндзӕн, уой туххӕй?»

14, 15. Еске дин бӕрӕгбони номбӕл арфитӕ ку кӕна кенӕ дин ести ку лӕвар кӕна, уӕд дӕ бон куд ӕй бакӕнун?

¹⁴ Уавӕртӕ аллихузи фӕуунцӕ. Уомӕ гӕсгӕ гъӕуама лӕдӕргӕй архайай. Зӕгъӕн, еске дин уотӕ ку зӕгъа, бӕрӕгбони хуарзӕнхӕ дӕ уӕд, зӕгъгӕ, уӕд дӕ дӕхе уотӕ ма дарӕ, цума ’й нӕ фегъустай. Дӕ бон ин ӕй райарфӕ кӕнун. Фал еске фулдӕр базонун ку бафӕндӕуа, уӕдта ин дӕ бон ӕй балӕдӕрун кӕнун, бӕрӕгбон цӕмӕннӕ бӕрӕг кӕнис, уой. Ӕрмӕст, дӕ дзурд уӕд фӕлмӕн ӕма уӕздан. Библий финст ӕй: «Уӕ дзурд алкӕддӕр уӕд фӕлмӕн ӕма зӕрдӕмӕдзӕугӕ, цӕмӕй зонайтӕ, кӕмӕн цӕхуӕн дзуапп раттун гъӕуй, уой» (Колоссӕгтӕмӕ 4:6). Зӕгъӕн, дӕ бон ӕй зӕгъун, дӕуӕн дӕр ӕхцӕуӕн ке фӕууй иннети хӕццӕ рабадун ӕма лӕвӕрттӕ кӕнун, фал еци бӕрӕгбони номбӕл нӕ.

¹⁵ Ӕма дин еске ести ку лӕвар кӕна, уӕдта? Библи нин, алли уавӕри дӕр куд кӕнгӕ ’й, уой нӕ амонуй, фал си финст ес, нӕ цӕсгон Хуцауи рази кӕдзос ке гъӕуама уа (1 Тимофеймӕ 1:18, 19). Адӕймаг ӕй, гӕнӕн ес, ӕма зонгӕ дӕр ма кӕна, бӕрӕгбон ке нӕ бӕрӕг кӕнис, уой. Кенӕ ба дин, ка ’й зонуй, зӕгъа: «Зонун ӕй, аци бӕрӕгбон ке нӕ бӕрӕг кӕнис, фал мӕ уӕддӕр фӕндуй, цӕмӕй аци лӕвар райсай». Уӕхӕн уавӕри куд  бакӕндзӕнӕ, уой дӕхуӕдӕг гъӕуама равзарай. Фал кудфӕнди ма бакӕнай, гъӕуама дӕ цӕсгон Хуцауи рази уа кӕдзос. Мах нӕ фӕндуй, Хуцауӕй ке туххӕй раидард адтайанӕ, уӕхӕнӕй ести бакӕнун.

16. Дӕ бийнонти бӕрӕгбон исбӕрӕг кӕнун ку фӕндӕуа, уӕд куд гъӕуама бакӕнай?

¹⁶ Дӕ бийнонти бӕрӕгбон исбӕрӕг кӕнун ку фӕндӕуа, уӕд куд гъӕуама бакӕнай? Иронх ди ма уӕд, уонӕн дӕр ес уӕхӕн барӕ, цӕмӕй, сӕхе куд фӕндуй, уотӕ бакӕнонцӕ. Дӕу фӕндуй, цӕмӕй дин дӕ гъуди нимайонцӕ. Мадта син ду дӕр сӕ гъуди нимайӕ ӕма сӕ хӕццӕ фӕлмӕнӕй дзорӕ. (Бакӕсӕ Матфеййи 7:12.) Фал дӕ бийнонти ку фӕндӕуа, цӕмӕй бӕрӕгбӕнтти рӕстӕг ӕнӕуой сӕ хӕццӕ рӕстӕг рарветай, уӕд куд гъӕуама бакӕнай? Унаффӕ рахӕссуни размӕ Йеговӕмӕ раковӕ, цӕмӕй дин, раст куд ӕй, уотӕ бакӕнунмӕ банхус кӕна. Удта еци бӕрӕгбони туххӕй ӕма ’й куд фӕббӕрӕг кӕнунцӕ, уой туххӕй фулдӕр базонӕ. Йегови зӕрдӕ рохс кӕнун дин сӕйраг ке ӕй, уой дӕ зӕрдӕбӕл дарӕ.

17. Дӕ бон куд ӕй дӕ сувӕллӕнттӕн банхус кӕнун, цӕмӕй бӕрӕгбӕнтти рӕстӕг иннетӕмӕ ма хицӕ кӕнонцӕ?

¹⁷ Дӕ бон куд ӕй дӕ сувӕллӕнттӕн банхус кӕнун, цӕмӕй бӕрӕгбӕнтти рӕстӕг иннетӕмӕ ма хицӕ кӕнонцӕ? Дӕ бон син ӕй ӕндӕр ести ӕргъуди кӕнун, цӕмӕй уӕ рӕстӕг игъӕлдзӕгӕй рарветайтӕ. Кенӕ ба син дӕ бон ӕй ӕнӕнгъӕлти  ести лӕвӕрттӕ искӕнун. Тӕккӕ устурдӕр лӕвар ба син уодзӕй, дӕ рӕстӕг ӕма дӕ уарзондзийнадӕ.

18. Киристон ӕмбурдтӕмӕ цӕмӕн гъӕуама цӕуӕн?

¹⁸ Цӕмӕй Йегови зӕрдӕ рохс кӕнӕн, уой туххӕй гъӕуама мӕнгӕ дин ӕма ӕ хӕццӕ баст гъуддӕгтӕ ӕма ӕгъдӕуттӕ ниууадзӕн. Уомӕй уӕлдай ма гъӕуама нӕ цард аразӕн, раст дин куд амонуй, уотӕ. Уой туххӕй ба гъӕуй киристон ӕмбурдтӕмӕ алкӕддӕр цӕун. (Бакӕсӕ Дзиуиттӕгтӕмӕ 10:24, 25.) Ӕцӕг Хуцауи лӕггадгӕнгутӕн ӕмбурдтӕмӕ цӕун хъӕбӕр ӕхсидзгӕ ӕй (Псалом 22:22; 122:1). Еумӕ ку ӕрӕмбурд уӕн, уӕд нӕ бон фӕууй кӕрӕдзей нифс бафедар кӕнун (Ромӕгтӕмӕ 1:12).

19. Библийӕй ци базудтай, уой иннетӕн дзорун ӕхсидзгӕ цӕмӕн ӕй?

¹⁹ Уомӕй уӕлдай ма гъӕуама иннетӕн дзорӕн, Библийӕй ци базудтан, уой. Зӕнхӕбӕл ци лӕгъуз хабӕрттӕ ӕма бӕллӕхтӕ цӕуй, уонӕмӕ кӕсгӕй беретӕн сӕ нифс басӕттуй. Ӕвӕдзи, ду дӕр уӕхӕн адӕни зонис. Ра син дзорӕ, цӕхуӕн цард нӕмӕ ӕнгъӕлмӕ кӕсуй, уой. Ӕмбурдтӕмӕ ку цӕуай ӕма иннетӕн, Библий ци финст ес, уой ку дзорай, уӕд дӕ нӕбал фӕнддзӕй, цӕмӕй ма дӕ мӕнгӕ дини ӕма е ’гъдӕутти хӕццӕ ести бӕтта. Йеговӕн, уой куд фӕндуй, уотӕ ку лӕггадӕ кӕнай, уӕд уодзӕнӕ амондгун ӕма дин Йеговӕ арфӕ кӕндзӕй! (Малахи 3:10).