БИБЛИ зӕгъуй: «Рӕстгӕнӕг цӕрдзӕй е ’ууӕндундзийнади фӕрци» (Ромӕгтӕмӕ 1:17). Аци дзурдти ес дессаги зӕрдӕвӕрд ӕма еци зӕрдӕвӕрд дӕумӕ дӕр хауй. Цума куд?

Йесо ӕ ихӕс кӕронмӕ ку исӕнхӕст кодта, уӕд ӕ фӕдбӕлдзӕугутӕн сӕ «цӕстити рази уӕларвмӕ иссудӕй, мегъӕ ’й ӕрбамбарзта, ӕма ’й нӕбал уидтонцӕ» (Гъуддӕгтӕ 1:9). Уӕлӕрвти ’й Хуцау исӕвардта Паддзахӕй. Тагъд рӕстӕги Йесо, кенӕ адӕймаги Фурт, «е ’гас изӕдти хӕццӕ кадгин цуд» ӕркӕндзӕй. Библи зӕгъуй: «Уӕд ӕрбаддзӕй ӕ кадгин паддзахбадӕнбӕл. Ӕма еугур адӕмтӕ дӕр ӕ рази ӕрӕмбурд уодзӕнцӕ, ӕма фиййау фусти сӕгътӕй куд рахецӕн кӕнуй, уотӕ е дӕр рахецӕн кӕндзӕй адӕми» (Матфеййи 25:31, 32). Еци рӕстӕг кӕд уодзӕй?

Библий пахампарӕдти финст ӕрцудӕй, зӕнхӕбӕл дуйней змӕнститӕ ке уодзӕй ӕма е, Киристе тагъд рӕстӕги тӕрхон кӕнунмӕ ке ӕрцӕудзӕй, уой бӕрӕггӕнӕн ке уодзӕй. Еци рӕстӕг цӕхуӕн хабӕрттӕ цӕудзӕй, уой туххӕй Йесо загъта: «Еу адӕм исистдзӕй иннӕ адӕми нихмӕ, ӕма еу паддзахадӕ иннӕ паддзахади нихмӕ. Уодзӕй устур зӕнхинкъуститӕ, ӕма уӕд еу рауӕн, уӕд иннӕ рауӕн фӕззиндзӕй фуднезтӕ ӕма адӕм уодзӕнцӕ хуӕруйнаггъӕуагӕ. Удта уиндзӕнцӕ ӕверхъау хабӕрттӕ ӕма арвбӕл устур дессӕгтӕ» (Лукай 21:7, 10, 11).

Абони хуарз уинӕн, Йесой дзурдтӕ куд ӕнхӕст кӕнунцӕ, уой. Тагъд Йесо фудгӕнгути фесафдзӕй. Фӕстагмӕ ба исӕфт ӕрцӕудзӕй Сайтан дӕр! Ӕгас зӕнхӕ дӕр исуодзӕй Дзенет. Адӕм кӕрӕдзей хӕццӕ, удта ма сауӕнгӕ сирдти хӕццӕ дӕр лимӕнӕй цӕрдзӕнцӕ. Библи зӕгъуй: «Берӕгъ ӕма уӕриккӕ рӕстӕгӕй-рӕстӕгмӕ уодзӕнцӕ еумӕ, фӕранк хусдзӕй дӕркъи фарсмӕ. Уӕс, ӕвзонг домбай ӕма хуӕрзхаст фонс уодзӕнцӕ еумӕ ӕма сӕ минкъий биццеу рахонӕ-бахонӕ кӕндзӕй» (Исай 11:6, 9). «Ӕма уоми цӕрӕг адӕмӕй еу дӕр нӕбал зӕгъдзӕй: „Ӕз сӕйгӕ дӕн“». «Уӕд хъӕрӕутӕ цӕстӕй ракӕсдзӕнцӕ ӕма къурути гъостӕ райгон уодзӕнцӕ» (Исай 33:24; 35:5). Сауӕнгӕ ма мӕрдтӕ дӕр райгас уодзӕнцӕ. «Йеговӕ се ’гасемӕн дӕр сӕ цӕстисугтӕ сӕ ростӕй ниссӕрфдзӕй» ӕма «нӕбал уодзӕй нӕдӕр мӕлӕт, нӕдӕр маст, нӕдӕр гъарӕнгӕ, нӕдӕр рист» (Исай 25:8; Раргомадӕ 21:4). Хуцаумӕ зӕнхи туххӕй ци фӕндӕ адтӕй, е исӕнхӕст уодзӕй. Ци дессаги нифс нин ес!

Хуцау Дзенети цардӕй исхайгин кӕндзӕй, ӕцӕгӕй ибӕл ка ӕууӕндуй, уӕхӕн адӕми.

Иронх ди ма уӕд, федар ӕууӕндундзийнадӕ ӕнцойнӕ кӕнуй Хуцауи Дзурдбӕл. Мадта идарддӕр дӕр архайӕ, цӕмӕй Хуцауи ӕма Йесой хуӕздӕр базонай!

Ӕцӕг ӕууӕндундзийнадӕ гъуддӕгтӕй бӕрӕг фӕууй. Хуцауи Дзурди уотӕ финст ес: «Ӕууӕндундзийнадӕ ӕнӕ гъуддӕгтӕй мард ӕй» (Иакови 2:26). Хуцауи менеугутӕ: хъаурӕ, рӕстдзийнадӕ, зунд ӕма уарзондзийнадӕ – дӕ гъуддӕгтӕй ӕвдесӕ. Идарддӕр дӕр еци менеугутӕ дӕ уодигъӕди федар кӕнӕ.

 Мадта архайӕ, цӕмӕй дӕмӕ ӕцӕг ӕууӕндундзийнадӕ уа. Гъеуӕд берӕ арфӕдзийнӕдтӕй исхайгин уодзӕнӕ ӕма ӕцӕг амондгун цард кӕндзӕнӕ абони дӕр ӕма федӕни дӕр!