АДӔЙМАГ уотӕ ку фӕдздзоруй, Хуцау ес, зӕгъгӕ, уӕд е алкӕд уобӕл дзорӕг нӕ фӕууй, ӕма ибӕл ӕцӕгӕй ӕууӕндуй. Абони милиуангай адӕм ӕууӕндунцӕ Хуцаубӕл, фал уӕддӕр ӕнӕгъдау цард кӕнунцӕ. Уӕхӕн «ӕууӕндундзийнадӕ» рабарӕн ес хъалбехцай хӕццӕ. Хъалбехца ӕцӕг ӕхцай хузӕн ӕй, фал ин аргъ ба уӕддӕр нӕййес. Мадта ӕцӕг ӕууӕндундзийнадӕ ци ӕй?

Ӕцӕг ӕууӕндундзийнадӕ ӕнцойнӕ кӕнуй Хуцауи Дзурдбӕл. Хуцауи разамундӕй финст ка ӕй, еци киунуги фӕрци нӕ бон ӕй базонун, ӕцӕг Хуцау ка ӕй, уой. Уоми финст ӕнцӕ ӕ закъӕнттӕ, ӕ фӕндтӕ ӕма ӕ ахурӕдтӕ. Мӕнӕ еци ахурӕдтӕй цалдӕр:

• Хуцау еунӕг ӕй. Ӕмбал ин нӕййес;

• Йесо – алцигъон Хуцау нӕй. Е Хуцауи пахампар ӕй;

• хузтӕн кенӕ гумеритӕн ковун Хуцауи цӕсти раст нӕй;

• адӕммӕ ӕнгъӕлмӕ кӕсуй тӕрхони бон;

• хъӕбӕр берӕ адӕм райгас уодзӕнцӕ Дзенети цардмӕ.

Ӕцӕг ӕууӕндундзийнадӕ разӕнгард кӕнуй хуарз гъуддӕгтӕмӕ. Нӕ хуарз гъуддӕгтӕ Хуцауи кадгин кӕнунцӕ, удта нӕхецӕн дӕр ӕма иннетӕн дӕр пайда хӕссунцӕ. Зӕгъӕн, хуарз гъуддӕгтӕмӕ хауй:

• Хуцауӕн ковун;

• Хуцауи зӕрдӕмӕ ка цӕуй, еци менеугутӕ уодигъӕди федар кӕнун, уӕлдайдӕр ба уарзондзийнадӕ;

• лӕгъуз гъудитӕй ӕма фӕндтӕй хе хезун;

• фӕлварӕнти рӕстӕг федар лӕуун;

• Хуцауи туххӕй иннетӕн дзорун.

Хуцауӕй ӕнхус корӕ. Пахампар Моисей Хуцаумӕ кувта: «Байамонӕ мин дӕ нӕдтӕ, цӕмӕй дӕ зонон ӕма мин амӕй фӕстӕмӕ дӕр дӕ хуарзӕнхӕ уа» a. Хуцау ин ӕ кувд фегъуста ӕма ин дзуапп равардта. Моисей иссӕй фӕнзуйнаг е ’ууӕндундзийнадӕй. Хуцау махӕн дӕр ӕнӕмӕнгӕй банхус кӕндзӕй, цӕмӕй не ’ууӕндундзийнадӕ федар кӕнӕн.

Хуцауи Дзурд ӕртасунмӕ рӕстӕг ерӕ. Хуцауи разамундӕй финст ка ’рцудӕй, еци киунугутӕ – Торӕ, Псаломтӕ ӕма Евангелитӕ (кенӕ Таурат, Забур ӕма Инджил) иссерӕн ес Библий. Е ӕй дуйней тӕккӕ зундгонддӕр киунугӕ ӕма цӕйбӕрцӕ ӕвзӕгтӕмӕ тӕлмацгонд ӕрцудӕй, уотӕ еу киунугӕ дӕр нӕй. Дӕумӕ ба Библи ес?

Библий унаффитӕй дӕ царди пайда кӕнӕ. Спортсмен тренировкитӕй куд федар кӕнуй, уотӕ ӕууӕндундзийнадӕ дӕр федардӕр кӕнуй, гъуддӕгтӕй ӕй ку ’вдесай, уӕд. Дӕхебӕл ӕй бавзардзӕнӕ, Хуцауи унаффитӕ царди цӕхуӕн пайда хӕссунцӕ, уой. Еци унаффитӕ берети цард фӕххуӕздӕр кодтонцӕ. Аци брошюри дӕр ес цалдӕр цӕветтони.