Аввакум 1:1—17
1 Ӕз, пехуымпар Аввакум, цӕстылуайӕны кӕй фехъуыстон, уыцы хабар. Ӕз загътон:
2 «О Йегъовӕ, цас ма дӕм дзыназдзынӕн, цӕмӕй мӕ фехъусай?+ Цас ма дӕм сиддзынӕн ӕххуысмӕ, цӕмӕй мӕ ацы фыддзинадӕй фервӕзын кӕнай?+
3 Цӕмӕн мын уынын кӕныс фыддзинад ӕмӕ фыдбылыз? Мӕ цӕстыты раз стигъынц ӕмӕ тыхми кӕнынц, алы ран загъд кӕнынц ӕмӕ кӕрӕдзи хӕрынц+.
4 Уый тыххӕй закъон йӕ тых фесӕфта ӕмӕ рӕстдзинад никуыуал ис+. Фыдгӕнӕгӕн рӕстгӕнӕгыл йӕ бар кӕй цӕуы, уый тыххӕй рӕстдзинад дӕр сзыгъуыммӕ+.
5 „Акӕсут адӕмтӕм, лӕмбынӕг ӕркӕсут, дисгӕнгӕ бакӕсут кӕрӕдзимӕ+. Дис кӕнут, уымӕн ӕмӕ уӕ рӕстӕджы ахӕм хабар ӕрцӕудзӕн, ӕмӕ уын ӕй куы дзырдтаиккой, уӕд уӕ нӕ бауырныдтаид+.
6 Ӕз сыстын кӕндзынӕн халдейты+, ӕгъатыр ӕмӕ тӕвдтуг адӕмы. Уыдон тыгъд быдырты цӕуынц ӕмӕ кӕйдӕр цӕрӕнбынӕттӕ исынц+.
7 Адӕмыл тас ӕфтауынц ӕмӕ сӕ тӕссӕй дзыллӕтӕ зыр-зыр кӕнынц. Уыдонӕн сӕхи рӕстдзинад ис ӕмӕ, лӕгдзинад цы у, уый дӕр сӕхирдыгонау ӕмбарынц+.
8 Сӕ бӕхтӕ сты фыранктӕй цӕрдӕгдӕр, ӕхсӕвы бирӕгътӕй – знӕтдӕр+. Сӕ хӕстон бӕхтӕ зӕхх сӕ къӕхтӕй ӕрцӕвынц, сӕ хӕстон бӕхтӕ дардӕй ӕрбацӕуынц. Цӕргӕс йӕ амӕттагыл йӕхи куыд рауадзы, афтӕ тагъд тӕхынц+.
9 Иууылдӕр сты тыхгӕнджытӕ+. Скӕсӕйнаг дымгӕйау+ сӕ ных размӕ сарӕзтой ӕмӕ уацайрӕгты змисау ӕмбырд кӕнынц.
10 Уыдон паддзӕхтӕй дӕр хынджылӕг кӕнынц ӕмӕ стыр хицӕуттыл худӕгӕй мӕлынц+. Цыфӕнды фидаргонд горӕтыл дӕр фӕхудынц+: сыджыт ныккалынц ӕмӕ йӕ байсынц.
11 Уыцы рӕстӕг дымгӕйау размӕ абырсдзысты, ацы зӕххыл дӕр ацӕудзысты ӕмӕ фӕаххосджын уыдзысты+. Цы тых сӕм ис, уый сын у сӕ хуыцауӕй“+.
12 О Йегъовӕ+, ды рагӕй фӕстӕмӕ нӕ дӕ? О мӕ Хуыцау, мӕ Сыгъдӕг Хуыцау, ды мӕлгӕ нӕ кӕныс+. Йегъовӕ, ды сӕ уый тыххӕй сӕвӕрдтай, цӕмӕй нын стӕрхон кӕнай. Мӕ Къӕдзӕх+, уый тыххӕй сӕ скодтай, цӕмӕй нын зонд бацамонай+.
13 Дӕ цӕстытӕ фыддзинадмӕ кӕсынӕн ӕгӕр сыгъдӕг сты, фыдхъуыддӕгтӕм кӕсын дӕ бон нӕу+. Ӕмӕ уӕдӕ уӕд цӕмӕн кӕсыс, иннӕтыл гадзрахатӕй чи цӕуы, уыдонмӕ?+ Фыдгӕнӕг, йӕхицӕй растдӕр чи у, уый куы аныхъуыры, уӕд ӕнцад цӕмӕн фӕлӕууыс?+
14 Адӕймаджы денджызы кӕсӕгты хуызӕн ӕмӕ ӕнӕхицау хилджыты хуызӕн цӕмӕн скодтай?+
15 Се ’ппӕты дӕр хуымӕтӕг ӕнгуырӕй ӕрцахстой+. Сӕ хызы сӕ раласынц, сӕ кӕсагахсӕн стыр хызы сӕ ӕмбырд кӕнынц+. Гъе уый тыххӕй сты хъӕлдзӕг, цин кӕнынц+.
16 Гъе уый тыххӕй сӕ хызӕн нывӕндтӕ хӕссынц, сӕ кӕсагахсӕн хызӕн нывӕндты фӕздӕг суадзынц, уымӕн ӕмӕ уыдоны фӕрцы сӕ хай сойы ӕнхъӕвзы ӕмӕ сӕ хӕринаг у пайда+.
17 Цӕмӕн сӕ уадзыс, цӕмӕй сӕ хызтӕ дзаг кӕной ӕмӕ сӕ ӕвдӕлон кӕной? Ӕнустӕм цӕгъддзысты адӕмты ӕмӕ тӕригъӕд нӕ зондзысты?+
