Захари 12:1—14
12 Тӕрхон:
«Йегъовӕйы ныхас Израилы тыххӕй,– зӕгъы Йегъовӕ, арв чи айтыгъта+ ӕмӕ зӕххӕн бындур чи ӕрӕвӕрдта+, адӕймаджы мидӕг царды тых чи бауадзы+, уыцы Хуыцау.–
2 Ӕз Иерусалим фестын кӕндзынӕн+, йӕ алыварс цӕрӕг адӕмтӕ се ’ппӕт дӕр кӕмӕй срасыг уыдзысты ӕмӕ кӕмӕй рахау-бахау кӕндзысты, ахӕм къус+. Иудӕйыл ӕмӕ Иерусалимыл знӕгтӕ ӕртыхсдзысты+.
3 Ӕз афтӕ бакӕндзынӕн, ӕмӕ уыцы бон+ Иерусалим ӕппӕт адӕмтӕн дӕр уыдзӕн уӕззау дур+. Чи йыл схӕца, уыдон фӕцъӕррӕмыхст уыдзысты, ӕмӕ, зӕххыл цыдӕриддӕр адӕмтӕ ис, уыдон йӕ ныхмӕ рацӕудзысты+.
4 Уыцы бон сын+,– зӕгъы Йегъовӕ,– ӕз сӕ бӕхты сдзӕгъӕлтӕ кӕндзынӕн+ ӕмӕ сын сӕ барджытӕн сӕ сӕрызонд фӕцӕуын кӕндзынӕн+. Ӕз мӕ цӕстытӕ байгом кӕндзынӕн+ ӕмӕ Иудӕйы адӕммӕ лӕмбынӕг кӕсдзынӕн ӕмӕ адӕмтӕн сӕ бӕхты бакуырм кӕндзынӕн.
5 Ӕмӕ Иудӕйы мыггаджы хистӕртӕ+ сӕхинымӕр дзурдзысты: „Иерусалимы цӕрджытӕ сты нӕ хъару, уыцы хъару у ӕфсӕдты хицау Йегъовӕйӕ, сӕ Хуыцауӕй“+.
6 Уыцы бон ӕз Иудӕйы мыггаджы хистӕрты фестын кӕндзынӕн, бӕлӕсты ’хсӕн кӕй бандзарынц+, ахӕм арты хуызӕн ӕмӕ, ногкарст хоры куыристы ’хсӕн кӕй ссудзынц, ахӕм цырагъы хуызӕн+, ӕмӕ сӕ алыварс цӕрӕг адӕмты се ’ппӕты дӕр аныхъуырдзысты, рахизырдыгӕй дӕр ӕмӕ галиуырдыгӕй дӕр+. Иерусалимы адӕм та цӕрдзысты сӕхи горӕты – Иерусалимы+.
7 Йегъовӕ фыццаг Иудӕйы цатыртӕ фервӕзын кӕндзӕн, цӕмӕй Давиды хӕдзары рӕсугъддзинад ӕмӕ Иерусалимы цӕрджыты рӕсугъддзинады раз Иудӕйы рӕсугъддзинад фӕстейӕ ма баззайа.
8 Уыцы бон Йегъовӕ Иерусалимы цӕрджыты алырдыгӕй дӕр хъахъхъӕндзӕн+. Се ’хсӕн цудгӕ чи кӕны, уый уыцы бон суыдзӕн Давидау тыхджын+, ӕмӕ Давиды хӕдзар Хуыцауы хуызӕн+, Йегъовӕйы зӕды хуызӕн цӕудзӕн сӕ разӕй+.
9 Уыцы бон ӕз бындзагъд фӕкӕндзынӕн, Иерусалимы ныхмӕ чи цӕуы, уыцы адӕмты се ’ппӕты дӕр+.
10 Ӕз Давиды хӕдзар ӕмӕ Иерусалимы цӕрджыты мӕ тыхӕй схайджын кӕндзынӕн ӕмӕ сын уымӕй равдисдзынӕн, райгонд сӕ кӕй дӕн+ ӕмӕ сын сӕ лӕгъстӕтӕ кӕй хъусын, уый+. Ӕмӕ уыдон кӕсдзысты, кӕй барӕхуыстой, уымӕ+ ӕмӕ йыл кӕудзысты, иунӕг хъӕбулыл куыд фӕкӕуынц, афтӕ, хъарджытӕ йыл кӕндзысты, фыццаггуырд фыртыл куыд фӕхъарджытӕ кӕнынц, афтӕ+.
11 Уыцы бон Иерусалимы адӕм сӕхи кӕуынӕй мардзысты, Мегиддойы+ дӕлвӕзы Гададриммоны сӕхи кӕуынӕй куыд мардтой, афтӕ.
12 Зӕхх кӕудзӕн+, кӕудзӕн алы хӕдзарвӕндаг дӕр хицӕнӕй: Давиды хӕдзарвӕндаг хицӕнӕй, ӕмӕ сӕ сылгоймӕгтӕ хицӕнӕй+; Нафаны хӕдзарвӕндаг хицӕнӕй+, ӕмӕ сӕ сылгоймӕгтӕ хицӕнӕй;
13 Левийы хӕдзарвӕндаг хицӕнӕй+, ӕмӕ сӕ сылгоймӕгтӕ хицӕнӕй; Шимейы хӕдзарвӕндаг хицӕнӕй+, ӕмӕ сӕ сылгоймӕгтӕ хицӕнӕй;
14 иннӕ хӕдзарвӕндӕгтӕ дӕр, алы хӕдзарвӕндаг дӕр хицӕнӕй, ӕмӕ сӕ сылгоймӕгтӕ хицӕнӕй+.
