Нееми 4:1—23
4 Къул кӕй амайӕм, уый Санаваллат+ куы фехъуыста, уӕд смӕсты+, уыцы хъуыддаг йӕхицӕн стыр ӕфхӕрдыл банымадта, ӕмӕ дзуттӕгтӕй хынджылӕг кӕнын+ райдыдта.
2 Ӕмӕ йе ’фсымӕрты+ раз ӕмӕ Самарийы ӕфсады раз афтӕтӕ дзырдта: «Цы кусынц, цы, ацы ницӕйаг дзуттӕгтӕ? Афтӕ ӕнхъӕлынц, ӕмӕ сын дзы исты рауайдзӕн? Афтӕ хъуыды кӕнынц, ӕмӕ нывӕндтӕ хӕсдзысты?+ Иу бонмӕ йӕ арӕзт фӕуыдзысты? Уыцы хӕлддзӕгты сыгъд дуртӕ ма истӕмӕн сбӕздзысты?»+
3 Йӕ фарсмӕ та лӕууыд аммонаг+ Тови+ ӕмӕ загъта: «Ӕмӕ аразӕнт! Дурӕй цы къул амайынц, уымӕ рувас+ куы сгӕпп кӕна, уӕд дӕр сын ныппырх уыдзӕн».
4 О нӕ Хуыцау, куыд ныл худынц+, уый фехъус+. Сӕ фидистӕ+ сын сӕхи сӕрыл ӕрцӕуын кӕн. Афтӕ сын бакӕн, ӕмӕ се знӕгты амӕттаг куыд фӕуой ӕмӕ сӕ ӕцӕгӕлон бӕстӕмӕ уацары куыд акӕной.
5 Сӕ фыдракӕнд ӕмӕ сын сӕ тӕригъӕдмӕ ӕркӕс. Аразджыты кӕй ӕфхӕрынц, уый сын ма ныххатыр кӕн+.
6 Мах къул дарддӕр амадтам, цалынмӕ йӕ кӕрӕй-кӕронмӕ нӕ сӕхгӕдтам, уӕдмӕ, ӕмӕ йӕ ӕмбисы онг самадтам. Адӕм тынг зӕрдиагӕй куыстой+.
7 Нӕ куыст размӕ кӕй цӕуы, Иерусалимы къултӕ кӕй аразӕм ӕмӕ, пырх кӕм уыд, уыцы бынӕттӕ кӕй ӕхгӕнӕм, уый Санаваллат+ ӕмӕ Тови+, стӕй аравиӕгтӕ+, аммонӕгтӕ+ ӕмӕ азотӕгтӕ+ куы базыдтой, уӕд тынг смӕсты сты
8 ӕмӕ се ’ппӕт дӕр сусӕгвӕнд скодтой+, цӕмӕй Иерусалиммӕ ӕрбабырсой ӕмӕ нӕ ныкъкъуылымпы кӕной.
9 Фӕлӕ мах нӕ Хуыцаумӕ куывтам+ ӕмӕ-иу ӕхсӕв дӕр ӕмӕ бон дӕр хъахъхъӕнджытӕ сӕвӕрдтам, цӕмӕй сӕ нӕхи бахъахъхъӕдтаиккам.
10 Уӕдмӕ дзуттӕгтӕ райдыдтой дзурын: «Уӕззӕуттӕ чи хӕссы, уыдонӕн сӕ бон нал у+, хӕлддзӕгтӕ+ та дзы нырма бирӕ ис. Нӕхӕдӕг нӕ сараздзыстӕм ацы къул».
11 Не знӕгтӕ та дзырдтой: «Зонгӕ дӕр ницыма бакӕндзысты+ ӕмӕ нӕ уынгӕ дӕр нӕ фӕкӕндзысты, афтӕ се ’хсӕн февзӕрдзыстӕм. Ныццӕгъддзыстӕм сӕ ӕмӕ куыст ӕрлӕууын кӕндзыстӕм».
12 Хӕстӕг цӕрӕг дзуттӕгтӕй-иу нӕм чи ӕрбацыд, уыдон нын дӕс хатты загътой: «Знӕгтӕ уӕм алырдыгӕй рацӕудзысты ӕмӕ уыл сӕхи ныццӕвдзысты».
13 Уӕд ӕз къулы ӕдде, ӕнцон ӕрбацӕуӕн кӕуылты уыд ӕмӕ дӕлдӕр кӕм уыд, уыцы рӕтты хъахъхъӕнджытӕ сӕвӕрдтон. Адӕмы сӕвӕрдтон сӕ хӕдзарвӕндӕгтӕм гӕсгӕ, сӕ хъаматӕ+, сӕ ӕрцытӕ+ ӕмӕ сӕ ӕрдынтӕ сӕ къухы, афтӕмӕй.
14 Кӕй тӕрсынц, уый куы бафиппайдтон, уӕд кадджын лӕгтӕн+, дӕлбар хицӕуттӕн+ ӕмӕ иннӕ адӕмӕн загътон: «Ма сӕ тӕрсут+. Уӕ зӕрдыл дарут Йегъовӕйы, адӕймагыл тас чи ’фтауы+, уыцы стыр Хуыцауы+, ӕмӕ уе ’фсымӕрты+, уӕ фыртты, уӕ чызджыты ӕмӕ уӕ устыты сӕрыл, стӕй уӕ хӕдзӕртты сӕрыл тох кӕнут».
15 Не знӕгтӕ фехъуыстой, мах алцыдӕр кӕй зонӕм ӕмӕ сын ӕцӕг Хуыцау сӕ фӕндтӕ кӕй фехӕлдта+. Ӕмӕ уӕд не ’ппӕт дӕр фӕстӕмӕ къулмӕ ӕрбаздӕхтыстӕм ӕмӕ алчи йӕ куыстмӕ бавнӕлдта.
16 Ӕмӕ уыцы бонӕй фӕстӕмӕ, мемӕ цы лӕппутӕ уыд, уыдонӕн се ’мбис+ кодта кусгӕ, сӕ иннӕ ӕмбис та лӕууыд згъӕрхӕдӕтты, алкӕй къухы дӕр сӕ арц, уарт ӕмӕ ӕрдын, афтӕмӕй+. Кънйӕзтӕ+ та лӕууыдысты дзуттӕгты фӕстӕ ӕмӕ сын ӕххуыс кодтой.
17 Къуламайджытӕ ӕмӕ, уӕззӕуттӕ чи хаста, уыдонӕй алчидӕр иу къухӕй кусгӕ кодта, иннӕ къухӕй+ та арцыл хӕцыд+.
18 Куысты+ рӕстӕг аразджытӕй алкӕмӕн дӕр йӕ хъама уыд йӕ астӕуыл+. Мӕ фарсмӕ та лӕууыд, сыкъайӕ чи уасыд+, уый.
19 Ӕмӕ ӕз кадджын лӕгтӕн, дӕлбар хицӕуттӕн+ ӕмӕ иннӕ адӕмӕн загътон: «Къул самайынӕн нырма бирӕ фыдӕбон хъӕуы, мах та алы рӕтты кусӕм, кӕрӕдзийӕ дард стӕм.
20 Гъемӕ-иу сыкъайы уасын кӕцӕй райхъуыса, уырдӕм-иу нӕм ӕрӕмбырд ут. Нӕ Хуыцау тох кӕндзӕн нӕ сӕрыл»+.
21 Боныцъӕхтӕй стъалыты фӕзындмӕ нӕ иу ӕмбис кусгӕ кодта, иннӕ ӕмбис та ӕрцытимӕ лӕууыд.
22 Стӕй ма ӕз адӕмӕн загътон: «Алчидӕр йӕ лӕггадгӕнӕгимӕ ӕхсӕв Иерусалимы баззайӕд+. Ӕхсӕвы нӕ хъахъхъӕндзысты, бонӕй та кусгӕ кӕндзысты».
23 Мах та – ӕз+, ме ’фсымӕртӕ +, мӕ лӕггадгӕнджытӕ+ ӕмӕ, мемӕ цы хъахъхъӕнджытӕ+ уыд, уыдон дӕр – нӕ дзаумӕттӕ нӕ ластам, алкӕмӕн дӕр нӕ йӕ рахиз къухы уыд арц+.
