Тӕрхонгӕнджыты 15:1—20
15 Иуцасдӕры фӕстӕ, мӕнӕугӕрдӕн афон, Самсон ӕрцыд йӕ усы бӕрӕггӕнӕг, йемӕ ӕрхаста иу сӕныкк+. Ӕмӕ загъта: «Бацӕуон мӕ усмӕ йӕ уатмӕ»+. Фӕлӕ йӕ чызджы фыд нӕ бауагъта.
2 Загъта йын: «Ӕз загътон, зӕгъын дзы, ӕвӕццӕгӕн, де сӕфт федтай+, ӕмӕ йӕ дӕ сиахсӕмбалӕн радтон+. Фӕлӕ йӕ кӕстӕр хо йӕхицӕй хуыздӕр нӕу? Йӕ бӕсты уый уӕд дӕ ус».
3 Фӕлӕ сын Самсон загъта: «Ныр филистимӕгтӕн исты фыдбылыз куы ракӕнон, уӕд аххосджын нӕ уыдзынӕн»+.
4 Гъемӕ Самсон ацыд, ӕртӕсӕдӕ рувасы ӕрцахста+, стӕй райста цырӕгътӕ, рувӕсты дыгӕйттӕй сӕ къӕдзилтӕй кӕрӕдзимӕ бабаста ӕмӕ сын сӕ къӕдзилты ’хсӕн фӕйнӕ цырагъы нытътъыста.
5 Уый фӕстӕ цырӕгътӕ ссыгъта ӕмӕ рувӕсты филистимӕгты кӕрдинаг хуымты ауагъта. Ӕмӕ сын ницыуал ныууагъта, басыгъта сын сӕ куыристӕ дӕр ӕмӕ сӕ кӕрдинаг хуымтӕ дӕр, стӕй сӕнӕфсирдӕттӕ ӕмӕ оливӕбӕлӕсты дыргъдӕттӕ дӕр+.
6 Филистимӕгтӕ кӕрӕдзи фӕрсын райдыдтой: «Уый чи бакодта?» Стӕй загътой: «Уый фимнӕйаджы сиахс Самсон уыди, уымӕн ӕмӕ йын йӕ усы йӕ сиахсӕмбалӕн радта»+. Уӕд филистимӕгтӕ ацыдысты ӕмӕ уыцы сылгоймагӕн йӕхи дӕр ӕмӕ йӕ фыды дӕр арты басыгътой+.
7 Самсон та сын загъта: «Кӕд афтӕ кӕнут, уӕд мын ӕндӕр цы гӕнгӕ у: мӕ маст уӕ исдзынӕн+. Ӕмӕ уӕд ӕрсабыр уыдзынӕн».
8 Гъемӕ сӕ цӕгъдын райдыдта ӕмӕ дзы тынг бирӕ фӕцагъта. Уый фӕстӕ ацыд ӕмӕ Етамы къӕдзӕхты ’хсӕн ӕрцард+.
9 Уый фӕстӕ филистимӕгтӕ+ рацыдысты, Иудӕйы+ зӕххыл ӕрбынат кодтой ӕмӕ Лехимӕ+ бабырстой.
10 Иудӕйы цӕрджытӕ сын загътой: «Цӕмӕн рацыдыстут нӕ ныхмӕ?» Уыдон сын дзуапп радтой: «Мах уый тыххӕй ӕрбацыдыстӕм, цӕмӕй Самсоны сбӕттӕм, ӕмӕ нын уый куыддӕриддӕр бакодта, мах дӕр ын афтӕ бакӕнӕм».
11 Уӕд Иудӕйы цӕрджытӕ, ӕртӕ мин лӕджы, ацыдысты Етамы+ къӕдзӕхмӕ ӕмӕ Самсонӕн загътой: «Нӕ йӕ зоныс, филистимӕгты дӕлбар кӕй стӕм, уый?+ Уый нын цы бакуыстай?» Самсон сын дзуапп радта: «Уыдон мын куыд бакодтой, ӕз дӕр сын афтӕ бакодтон»+.
12 Фӕлӕ йын уыдон загътой: «Мах ӕрбацыдыстӕм, цӕмӕй дӕ сбӕттӕм ӕмӕ дӕ филистимӕгты къухмӕ раттӕм». Уӕд сын Самсон загъта: «Расомы мын кӕнут, уӕхӕдӕг мӕ кӕй нӕ амардзыстут».
13 Ӕмӕ йын уыдон дзуапп радтой: «Нӕ, мах дӕ ӕрмӕстдӕр сбӕтдзыстӕм ӕмӕ дӕ сӕ къухмӕ ратдзыстӕм. Маргӕ дӕ нӕ акӕндзыстӕм».
Гъемӕ йӕ дыууӕ ног бӕндӕнӕй+ сбастой ӕмӕ йӕ къӕдзӕхӕй ӕркодтой.
14 Самсон ӕрцыд Лехийы онг, ӕмӕ йӕ филистимӕгтӕ куы федтой, уӕд фырцинӕй хъӕр кӕнын райдыдтой+. Фӕлӕ уыцы рӕстӕг Самсоныл Йегъовӕйы тых*+ ӕрцыд, ӕмӕ, йӕ къухтыл цы бӕндӕнтӕ уыди, уыдон, гӕнӕй конд ӕндах артӕй куыд асудза+, афтӕ аисты ӕмӕ йӕ къухтӕй ӕрхаудтой.
15 Уӕд Самсон ссардта, ӕрӕджы чи амард, ахӕм хӕрӕджы ӕфсӕр, систа йӕ ӕмӕ дзы мин адӕймаджы ныццагъта+.
16 Ӕмӕ уӕд Самсон загъта:
«Хӕрӕджы ӕфсӕрӕй сӕ кӕрӕдзи сӕртыл самадтон!
Хӕрӕджы ӕфсӕрӕй амардтон мин адӕймаджы!»+
17 Уыцы ныхӕстӕ куы загъта, уӕд ӕфсӕр йӕ къухӕй аппӕрста ӕмӕ уыцы бынат схуыдта Рамаф-Лехи*+.
18 Ныр Самсон тынг сдойны ӕмӕ Йегъовӕмӕ сдзынӕзта: «Дӕ цагъары къухмӕ ахӕм стыр ирвӕзындзинад радтай+, ӕмӕ ныр та хъуамӕ дойныйӕ амӕлон ӕмӕ, сунӕтгонд чи нӕу, уыдоны къухмӕ бахауон?»+
19 Уӕд Хуыцау фегом кодта, Лехийы цы дзыхъхъ* уыди, уый, ӕмӕ дзы дон+ ракалд. Самсон дзы нуазын райдыдта, ӕмӕ та дзы тых+ бацыд ӕмӕ йӕм хъарутӕ фӕзынд+. Уый тыххӕй уыцы суадон схуыдта Ен-Гаккоре*. Ӕмӕ абоны онг дӕр уыцы суадон ис Лехийы.
20 Самсон филистимӕгты рӕстӕджы Израилӕн тӕрхон кодта дыууын азы+.
Фиппаинӕгтӕ
^ Дзут. ру́ах. Кӕс Уӕлӕмх. 7.
^ Нысан кӕны «ӕфсӕры къуыпп».
^ Комк. «фӕхты хуызӕн дзыхъхъ».
^ Нысан кӕны «ӕххуысмӕ дзыназӕджы суадон».
