2 Азфыстыты 25:1—28
25 Амаси+ паддзах куы сси, уӕд ыл цыди дыууын фондз азы ӕмӕ дыууын фараст азы уыд паддзах Иерусалимы. Йӕ мад хуынди Йегъоаддан+ ӕмӕ уыд Иерусалимӕй.
2 Амаси арӕзта, Йегъовӕйы цӕсты раст цы уыд, уый+, фӕлӕ ӕппӕт+ зӕрдӕйӕ нӕ.
3 Куыддӕр паддзахы бартӕ йӕ къухы сфидар сты, афтӕ амардта+, паддзахы, ома йын йӕ фыды, чи амардта+, уыцы лӕггадгӕнджыты+.
4 Фӕлӕ сын сӕ фыртты нӕ амардта – уый бакодта, Йегъовӕ сын цы закъон бафӕдзӕхста ӕххӕст кӕнын, уым, ома Моисейы чиныджы+, куыд фыст ис, афтӕ: «Фыд хъуамӕ йӕ фырты тыххӕй ма амӕла+, ӕмӕ фырт дӕр хъуамӕ йӕ фыды тыххӕй ма амӕла+. Алчидӕр хъуамӕ амӕла йӕхи тӕригъӕды тыххӕй»+.
5 Амаси Иудӕйы адӕмы ӕрӕмбырд кодта ӕмӕ Иудӕйы мыггаг ӕмӕ Вениамины мыггаг слӕууын кодта сӕ хӕдзарвӕндӕгтӕм гӕсгӕ+ ӕмӕ сын сӕ сӕргъы сӕвӕрдта минты хистӕрты+ ӕмӕ сӕдӕты хистӕрты+. Стӕй, дыууын+ азы ӕмӕ уымӕй уӕлӕмӕ кӕуыл цыд, уыдоны ныффыста, ӕмӕ уыдысты ӕртӕсӕдӕ мин адӕймаджы. Се ’ппӕт дӕр уыдысты хуыздӕр хӕстонтӕ, ӕрцытӕ+ ӕмӕ стыр уартытӕ+ чи хаста, ахӕмтӕ.
6 Уымӕй уӕлдай ма Израилы сӕдӕ ӕвзист талантӕй баххуырста сӕдӕ мин хъӕбатыр ӕмӕ тыхджын хӕстоны.
7 Ӕмӕ уӕд Амасимӕ ӕрбацыд ӕцӕг Хуыцауы адӕймаг+ ӕмӕ йын загъта: «Паддзах, Израилы ӕфсад демӕ ма акӕн, уымӕн ӕмӕ Йегъовӕ нӕй Израилимӕ+, Ефремы ӕппӕт фырттимӕ.
8 Дӕхӕдӕг ацу ӕмӕ схӕц, у хъӕбатыр+. Кӕннод ӕцӕг Хуыцау афтӕ бакӕндзӕн, ӕмӕ знаджы раз фӕцуддзынӕ. Хуыцауӕн йӕ бон у баххуыс кӕнын+ дӕр ӕмӕ фӕцудын кӕнын дӕр»+.
9 Уӕд Амаси+ ӕцӕг Хуыцауы адӕймагӕн загъта: «Ӕмӕ, Израилы ӕфсӕдтӕн кӕй радтон, уыцы сӕдӕ таланты та?»+ Ӕцӕг Хуыцауы адӕймаг ын дзуапп радта: «Йегъовӕ дын уымӕй бирӕ фылдӕр ратдзӕн»+.
10 Ӕмӕ уӕд Амаси, Ефремӕй йӕм чи ’рцыд, уыцы ӕфсӕдтӕ фӕхицӕн кодта, цӕмӕй сӕ фӕстӕмӕ сӕхимӕ арвыстаид. Фӕлӕ уыдон Иудӕмӕ тынг смӕсты сты ӕмӕ мӕстӕй судзгӕйӕ сӕхимӕ аздӕхтысты+.
11 Ӕмӕ Амаси ныфсджынӕй рацыд, йӕ адӕмы акодта, ӕмӕ ӕрцыдысты Цӕххы дӕлвӕзмӕ+. Ӕмӕ уым Сеиры+ фырттӕй дӕс мины ныццагъта+.
12 Дӕс мин адӕймаджы та дзы Иудӕйы фырттӕ удӕгасӕй ӕрцахстой. Ӕмӕ сӕ къӕдзӕхы цъупмӕ скодтой ӕмӕ сӕ уырдыгӕй раппӕрстой, ӕмӕ се ’ппӕт дӕр ныппырх сты+.
13 Амаси хӕстмӕ йемӕ кӕй нӕ акодта ӕмӕ фӕстӕмӕ кӕй арвыста, уыцы хӕстонтӕ+ та райдыдтой Иудӕйы горӕттӕм лӕбурын, Самарийӕ+ суанг Беф-Ороны+ онг. Ӕмӕ дзы ныццагътой ӕртӕ мин адӕймаджы ӕмӕ бирӕ фӕллой рахастой.
14 Фӕлӕ Амаси едомӕгты куы ныппырх кодта ӕмӕ фӕстӕмӕ куы ’рыздӕхт, уӕд йемӕ ӕрхаста Сеиры фыртты хуыцӕутты+ ӕмӕ сӕ йӕхицӕн сӕвӕрдта, адон мӕ хуыцӕуттӕ уыдзысты+, зӕгъгӕ. Ӕмӕ сын райдыдта кувын, сӕ разы йӕ зонгуытыл лӕууыд+ ӕмӕ сын нывӕндты фӕздӕг уагъта+.
15 Ӕмӕ уӕд Йегъовӕйы маст ссыгъд Амасимӕ ӕмӕ йӕм иу пехуымпары арвыста ӕмӕ йын загъта: «Уыцы адӕмы хуыцӕуттӕн+ цӕмӕн кувыс?+ Сӕхи адӕмы дӕ къухӕй фервӕзын кӕнын сӕ бон куы нӕ баци»+.
16 Пехуымпар йӕ ныхас нӕма фӕци, афтӕ йын паддзах загъта: «Паддзахӕн дӕ уынаффӕгӕнӕгӕй сӕвӕрдтам, мыййаг?+ Ныхъхъус у+, кӕннод дӕ мӕлӕт ссардзынӕ». Ӕмӕ пехуымпар дӕр ныхъхъус, ӕрмӕст ма загъта: «Ӕз ӕй зонын, Хуыцау дӕ фесафынвӕнд кӕй скодта+, уымӕн ӕмӕ ды афтӕ бакодтай+ ӕмӕ мын мӕ уынаффӕмӕ нӕ байхъуыстай»+.
17 Уый фӕстӕ Иудӕйы паддзах Амаси йӕ уынаффӕгӕнджытимӕ бауынаффӕ кодта ӕмӕ Израилы паддзах Иоасмӕ, Ииуйӕн йӕ фырт Иоахазы фыртмӕ, арвыста минӕвӕрттӕ+ ахӕм ныхасимӕ: «Ӕрцу ӕмӕ лӕгӕй-лӕгмӕ фембӕлӕм»+.
18 Израилы паддзах Иоас та Иудӕйы паддзах Амасимӕ ахӕм дзуапп арвыста+: «Ливаны сындзкъутӕр Ливаны кедрмӕ арвыста+, дӕ чызджы, дам, мын мӕ лӕппуйӕн ратт+. Фӕлӕ Ливаны хъӕдӕй хъӕддаг сырд+ рацыд ӕмӕ сындзкъутӕр йӕ къӕхты бын ныссӕста.
19 Ды загътай, ӕз едомӕгты ныппырх кодтон+, зӕгъгӕ. Ӕмӕ дӕ зӕрдӕ+ схъал ӕмӕ дӕхицӕн кад агурыс+. Фӕлтау ӕнцад дӕ хӕдзары бад+. Дӕ бон куы ницы у, уӕд хыл цӕмӕн къахыс?+ Дӕхи дӕр ӕмӕ Иудӕйы дӕр цӕмӕн сафыс?»+
20 Фӕлӕ йӕм Амаси нӕ байхъуыста, уымӕн ӕмӕ уыцы хъуыддаг ӕцӕг Хуыцауӕй уыд+ – Едомы хуыцӕуттӕй ӕххуыс кӕй агуырдтой, уый тыххӕй сӕ знаджы къухмӕ раттынвӕнд скодта+.
21 Ӕмӕ уӕд Израилы паддзах Иоас дӕр ӕрцыд+, ӕмӕ Иудӕйы паддзах Амасиимӕ Иудӕйы зӕххыл Вефсамисы+ раз лӕгӕй-лӕгмӕ фембӕлдысты+.
22 Ӕмӕ Израил Иудӕйы ныппырх кодта+, ӕмӕ Иудӕйы адӕм сӕ цатыртӕм фӕлыгъдысты+.
23 Вефсамисы раз Израилы паддзах Иоас ӕрцахста Иудӕйы паддзах Амасийы+, Иоахазӕн йӕ фырт Иоасы фырты. Стӕй йӕ Иерусалиммӕ ӕркодта+ ӕмӕ Иерусалимы къул Ефремы кулдуарӕй+ суанг Фисыны кулдуары+ онг ныппырх кодта – уыди дзы цыппарсӕдӕ ӕлмӕрины*.
24 Иоас ахаста, ӕцӕг Хуыцауы хӕдзары Овед-Едомы бар цыдӕриддӕр сызгъӕрин, ӕвзист ӕмӕ дзауматӕ уыди, уыдон+, стӕй, паддзахы хӕдзары цы хӕзнатӕ уыд, уыдон дӕр+. Йемӕ акодта уацайрӕгтӕ дӕр ӕмӕ фӕстӕмӕ Самаримӕ ӕрыздӕхт+.
25 Израилы паддзах, Иоахазы фырт Иоас+, куы амард, уый фӕстӕ ма Иудӕйы паддзах Амаси+, Иоасы фырт, фӕцард фынддӕс азы+.
26 Амасийы иннӕ хъуыддӕгты тыххӕй та, фыццӕгты тыххӕй ӕмӕ фӕстӕгты тыххӕй+, фыст ис Иудӕйы ӕмӕ Израилы паддзӕхты+ чиныджы+.
27 Амаси Йегъовӕйы коммӕ куы нал каст, уӕдӕй фӕстӕмӕ Иерусалимы йӕ ныхмӕ кодтой сусӕгвӕнд+. Ӕппынфӕстаг Лахисмӕ алыгъд+, фӕлӕ Лахисмӕ дӕр йӕ фӕдыл арвыстой ӕмӕ йӕ уым амардтой+.
28 Ӕмӕ йын йӕ мард Иудӕйы горӕтмӕ бӕхтыл ӕрластой+ ӕмӕ йӕ уым йӕ фыдӕлты фарсмӕ бавӕрдтой+.
Фиппаинӕгтӕ
^ 178 м бӕрц. Иу ӕлмӕрин у 44,5 см.
