2 Азфыстыты 28:1—27
28 Ахаз+ паддзах куы сси, уӕд ыл цыди дыууын азы ӕмӕ ӕхсӕрдӕс азы уыд паддзах Иерусалимы+. Фӕлӕ, йӕ фыдӕл Давидӕй уӕлдай, Йегъовӕйы цӕсты раст цы уыд, уый нӕ арӕзта+.
2 Ахаз цыди Израилы паддзӕхты фӕндӕгтыл+ ӕмӕ ма Ваалты+ гуымирытӕ+ дӕр сарӕзта.
3 Уый Енномы фырты дӕлвӕзы+ нывӕндты фӕздӕг уагъта+ ӕмӕ йӕ фыртты арты басыгъта*+ – Йегъовӕ Израилы фырттӕн сӕ разӕй кӕй фӕсырдта+, уыцы адӕмты ӕлгъаг митӕ бафӕзмыдта+.
4 Кувӕн бынӕтты+, къуыбыртыл+ ӕмӕ алы пӕлӕхсар бӕласы бын+ нывӕндтӕ хаста+ ӕмӕ-иу уым нывӕндты фӕздӕг суагъта.
5 Гъемӕ йӕ уый тыххӕй йӕ Хуыцау Йегъовӕ Сирийы паддзахы+ къухмӕ радта+, ӕмӕ йӕ ныппырх кодтой, йӕ адӕмӕй йын тынг бирӕ уацары акодтой ӕмӕ сӕ ӕркодтой Дамаскмӕ+. Стӕй йӕ Израилы паддзахы+ къухмӕ дӕр радта, ӕмӕ йын уый дӕр йӕ адӕмӕй тынг бирӕ ныццагъта.
6 Ремалийы+ фырт Факей+ Иудӕйы иу бонмӕ амардта сӕдӕ дыууын мин хъӕбатыр хӕстоны, уымӕн ӕмӕ уыдон ныууагътой сӕ фыдӕлты Хуыцау Йегъовӕйы+.
7 Ефремы мыггагӕй+ тыхджын хӕстон Зихри та амардта паддзахы фырт Маасейӕйы, стӕй Азрикамы – хӕдзары сӕргъы чи лӕууыд, уый, ӕмӕ Елхъаны – паддзахы фӕстӕ дыккаг лӕджы.
8 Уымӕй уӕлдай ма Израилы фырттӕ се ’фсымӕртӕй уацары акодтой дыууӕсӕдӕ мин адӕймаджы – сӕ устыты, сӕ фыртты ӕмӕ сӕ чызджыты. Стӕй сӕ рахастой бирӕ мулк ӕмӕ йӕ Самаримӕ ӕрхастой+.
9 Уым уыди Йегъовӕйы пехуымпар, Одед, зӕгъгӕ. Ӕмӕ, Самаримӕ чи здӕхт, уыцы ӕфсады размӕ рацыд ӕмӕ сын загъта: «Уӕ фыдӕлты Хуыцау Йегъовӕйы маст ссыгъд+ Иудӕмӕ ӕмӕ уын сӕ уӕ къухмӕ уый тыххӕй радта. Фӕлӕ сӕ сымах афтӕ ӕгъатырӕй фӕцагътат+, ӕмӕ уыцы хабар уӕлӕрвтӕм схӕццӕ+.
10 Ӕмӕ ныр та Иудӕйы ӕмӕ Иерусалимы фырттӕй уӕхицӕн лӕггадгӕнӕг-нӕлгоймӕгтӕ+ ӕмӕ лӕггадгӕнӕг-сылгоймӕгтӕ скӕнынмӕ хъавут. Фӕлӕ цымӕ уӕ Хуыцау Йегъовӕйы раз уӕхӕдӕг тӕригъӕд никуы ракодтат?
11 Байхъусут мӕм! Уе ’фсымӕртӕй уацары кӕй ракодтат, уыдоны фӕстӕмӕ арвитут+, уымӕн ӕмӕ уӕм Йегъовӕйы маст судзы»+.
12 Ӕмӕ уӕд Ефремы фыртты+ хистӕртӕй чидӕртӕ+: Йегъохананы фырт Азари, Мешиллемофы фырт Берехи, Шаллумы фырт Езеки ӕмӕ Хадлайы фырт Амессай – ӕрлӕууыдысты, хӕстӕй чи здӕхт, уыдоны размӕ
13 ӕмӕ сын загътой: «Уацайрӕгты ардӕм ма ӕрбакӕнут, кӕннод Йегъовӕйы раз фӕаххосджын уыдзыстӕм. Нӕ тӕригъӕдтӕм ӕмӕ нын нӕ аххосмӕ ноджыдӕр бафтауынмӕ хъавут? Ӕнӕуи дӕр нӕ тӕригъӕдтӕ нӕ сӕрӕй уӕлдӕр куы сты+ ӕмӕ Израилмӕ Хуыцауы маст куы судзы»+.
14 Уӕд гӕрзифтонг лӕгтӕ+ уацайрӕгты+ ӕмӕ, цы мулк рахастой, уый кънйӕзты+ раз ӕмӕ ӕппӕт адӕмы раз ныууагътой.
15 Ӕмӕ, номгай кӕй ранымадтой+, уыцы лӕгтӕ уацайрӕгты ракодтой, бӕгънӕг* сӕ чи уыд, уыдонӕн, цы мулк рахастой, уырдыгӕй дзаумӕттӕ радтой. Радтой сын дзаумӕттӕ+, стӕй дзабыртӕ дӕр, бахӕрын сын кодтой+, дон сын бадардтой+ ӕмӕ сӕ сойӕ байсӕрстой. Йӕ бон цӕуын кӕмӕн нӕ уыд, уыдоны та хӕрджытыл сбадын кодтой+ ӕмӕ сӕ ӕркодтой се ’фсымӕртӕм Иерихонмӕ+, пальмӕбӕлӕсты горӕтмӕ+. Ӕмӕ уый фӕстӕ Самаримӕ ӕрыздӕхтысты+.
16 Уыцы рӕстӕг паддзах Ахаз+ Ассирийы+ паддзӕхтӕм ӕххуысмӕ арвыста.
17 Стӕй ма едомӕгтӕ+ дӕр ӕрбабырстой, Иудӕйы адӕмы ныппырх кодтой ӕмӕ семӕ уацайрӕгты акодтой.
18 Филистимӕгтӕ+ та ӕрбабырстой, Иудӕйы зӕххыл чи ис, уыцы Шефелӕйы+ ӕмӕ Негевы+ горӕттӕм ӕмӕ бацахстой Вефсамис+, Аиалон+, Гедероф+, стӕй Сохо+ ӕмӕ йӕ дӕлбар горӕттӕ, Фимнӕ+ ӕмӕ йӕ дӕлбар горӕттӕ ӕмӕ Гимзо ӕмӕ йӕ дӕлбар горӕттӕ ӕмӕ уым ӕрцардысты.
19 Афтӕ Йегъовӕ Израилы паддзах Ахазы тыххӕй Иудӕйы адӕмы басаста+, уымӕн ӕмӕ сӕ уый сӕхи бар ауагъта+, ӕмӕ фехӕлдысты, стӕй Йегъовӕйы раз стыр тӕригъӕдтӕ арӕзта.
20 Ӕппынфӕстаг ӕм ӕрбацыд Ассирийы паддзах Феглафелласар+ ӕмӕ йӕ фидардӕр нӕ фӕкодта, фӕлӕ йын йӕ уавӕр ноджы фӕуӕззаудӕр кодта+.
21 Ӕмӕ уӕд Ахаз рахаста, Йегъовӕйы хӕдзары+ ӕмӕ паддзахы+ ӕмӕ кънйӕзты хӕдзары+ цы хӕзнатӕ уыд, уыдон ӕмӕ сӕ Ассирийы+ паддзахӕн балӕвар кодта, фӕлӕ йын уый дӕр нӕ баххуыс кодта.
22 Ассирийы паддзах ын йӕ уавӕр куы фӕуӕззаудӕр кодта, уӕд паддзах Ахаз Йегъовӕйы раз ноджы стырдӕр тӕригъӕд сарӕзта+.
23 Нывӕндтӕ хӕссын райдыдта Дамаскы+ хуыцӕуттӕн+, чи йӕ цагъта, уыдонӕн, уымӕн ӕмӕ хъуыды кодта: «Сирийы паддзӕхтӕн сӕ хуыцӕуттӕ ӕххуыс кӕнынц+, ӕмӕ сын ӕз дӕр нывӕндтӕ хӕсдзынӕн, цӕмӕй мӕнӕн дӕр ӕххуыс кӕной»+. Ӕмӕ уыдон йӕхицӕн дӕр ӕмӕ ӕгас Израилӕн дӕр систы цӕлхдур+.
24 Уымӕй уӕлдай ма, ӕцӕг Хуыцауы хӕдзары цы мигӕнӕнтӕ+ уыд, уыдон ӕрӕмбырд кодта ӕмӕ сӕ ныссаста+, Йегъовӕйы хӕдзары дуӕрттӕ сӕхгӕдта+ ӕмӕ йӕхицӕн Иерусалимы алы тигъыл дӕр скодта нывондхӕссӕнтӕ+.
25 Стӕй ӕппӕт горӕтты, Иудӕйы горӕтты, скодта кувӕн бынӕттӕ+, цӕмӕй дзы ӕндӕр хуыцӕуттӕн нывӕндты фӕздӕг уагътаиккой+, ӕмӕ уымӕй ӕфхӕрдта+ йӕ фыдӕлты Хуыцау Йегъовӕйы.
26 Ахазы иннӕ хъуыддӕгты тыххӕй+ ӕмӕ, цы арӕзта, уыдӕтты тыххӕй та, фыццӕгты тыххӕй ӕмӕ фӕстӕгты тыххӕй, фыст ис Иудӕйы ӕмӕ Израилы паддзӕхты чиныджы+.
27 Ӕппынфӕстаг Ахаз йӕ фыдӕлтӕм баиу, ӕмӕ йӕ бавӕрдтой горӕты, Иерусалимы, ӕрмӕст, паддзӕхтӕ ныгӕд кӕм уыдысты, уым нӕ+. Ӕмӕ йӕ фӕстӕ паддзах сси йӕ фырт Езеки.