2 Паддзӕхты 17:1—41
17 Илӕйы фырт Оси+ Самарийы+ Израилӕн паддзах сси, Ахаз Иудӕйы дыууадӕсӕм аз куы уыд паддзах, уӕд ӕмӕ паддзах уыд фараст азы.
2 Оси арӕзта, Йегъовӕйы цӕсты ӕвзӕр цы уыд, уый, фӕлӕ уӕддӕр, Израилы йӕ размӕ цы паддзӕхтӕ уыд, уыдоны хуызӕн нӕ уыд+.
3 Ассирийы+ паддзах Салманассар+ Осийы ныхмӕ рацыд, ӕмӕ Оси йӕ дӕлбар баци ӕмӕ йын хъалон фыста+.
4 Фӕлӕ Ассирийы паддзах базыдта, Оси йӕ ныхмӕ сусӕгвӕнд кӕй скодта+ – Египеты+ паддзах Сомӕ минӕвӕрттӕ арвыста ӕмӕ Ассирийы паддзахӕн хъалон нал фыста, уымӕй размӕ азты йын куыд фыста, афтӕ. Гъемӕ йӕ Ассирийы паддзах ахӕстоны бакодта ӕмӕ йӕ уым бастӕй дардта+.
5 Ассирийы паддзах ӕнӕхъӕн бӕстӕйы ныхмӕ рацыд, Самарийыл ӕртыхст, ӕмӕ йе ’фсад горӕты алыварс ӕртӕ азы лӕууыдысты+.
6 Оси фарӕстӕм аз куы уыд паддзах, уӕд Ассирийы паддзах Самари+ бацахста ӕмӕ израилӕгты Ассиримӕ уацары акодта+. Ӕмӕ сӕ ӕрцӕрын кодта Халахы+ ӕмӕ Хаворы, Гозаны цӕугӕдоны раз+, стӕй мидиӕгты горӕтты+.
7 Ахӕм хабар уый тыххӕй ӕрцыд, ӕмӕ Израилы фырттӕ сӕ Хуыцау Йегъовӕйы раз, Египеты зӕххӕй сӕ чи ракодта ӕмӕ сӕ Египеты паддзах фараоны къухӕй чи фервӕзын кодта+, уыцы Хуыцауы раз, тӕригъӕд ракодтой+, ӕмӕ ӕндӕр хуыцӕуттӕн кувын райдыдтой+.
8 Ӕмӕ цардысты, Йегъовӕ Израилы фырттӕн сӕ разӕй кӕй фӕсырдта, уыцы адӕмты закъӕттӕм гӕсгӕ+ ӕмӕ, Израилы паддзӕхтӕ сӕхӕдӕг кӕй ӕрхъуыды кодтой, уыцы закъӕттӕм гӕсгӕ.
9 Израилы фырттӕ бафтыдысты, сӕ Хуыцау Йегъовӕйы цӕсты ӕвзӕр цы хъуыддӕгтӕ уыдысты, уыдоныл+ ӕмӕ сӕхицӕн алы горӕты – хъахъхъӕнӕн мӕсгуытӕй+ суанг фидаргонд горӕтты онг – кувӕн бынӕттӕ скодтой+.
10 Алы къуыбырыл+ ӕмӕ алы пӕлӕхсар бӕласы бын+ сӕхицӕн кувӕн дуртӕ+ ӕмӕ кувӕн цӕджындзтӕ+ ӕвӕрдтой.
11 Йегъовӕ уыдоны тыххӕй уыцы зӕххӕй кӕй сыстын кодта, уыцы адӕмтау+ алы кувӕн бынаты нывӕндты фӕздӕг уагътой ӕмӕ ӕвзӕр хъуыддӕгтӕ кодтой ӕмӕ афтӕмӕй Йегъовӕйы ӕфхӕрдтой+.
12 Йегъовӕ сын афтӕ кӕмӕй загъта, ма сын кувут+, зӕгъгӕ, уыцы фаджыс-хуыцӕуттӕн+ куывтой.
13 Йегъовӕ Израилы+ ӕмӕ Иудӕйы+ адӕмы йӕ пехуымпарты+ уылты ӕмӕ, цӕстылуайӕнтӕ чи уыдта+, уыдоны уылты фӕдзӕхста+: «Уе ’взӕр хъуыддӕгтӕ ныууадзут+ ӕмӕ уын уӕ фыдӕлтӕн кӕй бафӕдзӕхстон+ ӕмӕ уын мӕ пехуымпарты уылты кӕй радтон+, уыцы закъоны+ цыдӕриддӕр фӕдзӕхстытӕ+ ӕмӕ уагӕвӕрдтӕ+ ис, уыдон ӕххӕст кӕнут».
14 Фӕлӕ йӕм уыдон нӕ хъуыстой – сӕ фыдӕлтау, сӕ Хуыцау Йегъовӕйыл чи не ’ууӕндыд+, уыдонау, сӕхи фӕнд кодтой*+.
15 Цы уагӕвӕрдтӕ сын радта ӕмӕ сӕ ногӕй ӕмӕ ногӕй цӕмӕй фӕдзӕхста+, уый ницӕмӕ дардтой, сӕ фыдӕлтимӕ сын цы бадзырд скодта, ууыл сӕ къух систой+, ӕмӕ сӕ алыварс цӕрӕг адӕмтау, Йегъовӕ сын афтӕ кӕмӕй загъта, ма сӕ бафӕзмут+, зӕгъгӕ, уыдонау ницӕйаг хуыцӕутты фӕдыл цыдысты+ ӕмӕ сӕхӕдӕг дӕр ницӕйаг систы+.
16 Сӕ Хуыцау Йегъовӕйы фӕдзӕхстытӕ иууылдӕр ныууагътой+ ӕмӕ сӕхицӕн скодтой ӕфсӕйнаг хуыцӕуттӕ+, дыууӕ роды+, стӕй ма кувӕн цӕджындз+ дӕр. Арвыл цыдӕриддӕр ис, уыдӕтты* раз сӕ зонгуытыл лӕууыдысты+ ӕмӕ Ваалӕн куывтой+.
17 Сӕ фыртты ӕмӕ сӕ чызджыты арты сыгътой*+, дӕсны фарстой+, нысӕнттӕ хӕлдтой+, ӕмӕ, Йегъовӕйы цӕсты ӕвзӕр цы уыд, уыдӕттыл бафтыдысты+ ӕмӕ йӕ афтӕмӕй ӕфхӕрдтой+.
18 Уый тыххӕй Израилмӕ Йегъовӕйы маст ссыгъд+, ӕмӕ сӕ йӕ разӕй фесӕфта+. Иудӕйы мыггаг йеддӕмӕ дзы никӕйуал ныууагъта+.
19 Фӕлӕ Иудӕйы адӕм дӕр не ’ххӕст кодтой сӕ Хуыцау Йегъовӕйы фӕдзӕхстытӕ+ – израилӕгтӕ сӕхӕдӕг цы закъӕттӕ ӕрхъуыды кодтой, уыдонмӕ гӕсгӕ цардысты+.
20 Ӕмӕ Йегъовӕ дӕр Израилы байзӕддӕгтыл+ се ’ппӕтыл дӕр йӕ къух систа. Ӕфхӕрдта сӕ ӕмӕ-иу сӕ абырджыты къухмӕ радта, цалынмӕ сӕ йӕ разӕй бынтондӕр нӕ фесӕфта, уӕдмӕ+.
21 Израилы адӕмы Давиды хӕдзарвӕндагӕй фӕхицӕн кодта, ӕмӕ уыдон сӕхицӕн паддзахӕй сӕвӕрдтой Наваты фырт Йеровоамы+. Ӕмӕ сын Йеровоам Йегъовӕйы ныууадзын кодта ӕмӕ сӕ стыр тӕригъӕды бафтыдта+.
22 Йеровоам цыдӕриддӕр тӕригъӕдтӕ арӕзта, уыдон Израилы фырттӕ дӕр арӕзтой+. Нӕ сӕ ныууагътой,
23 цалынмӕ сӕ Йегъовӕ, йе ’ппӕт пехуымпарты уылты куыд дзырдта+, афтӕ йӕ разӕй нӕ фесӕфта, уӕдмӕ+. Гъемӕ израилӕгты сӕ зӕххӕй сыстын кодтой ӕмӕ сӕ Ассиримӕ уацары акодтой, ӕмӕ абоны онг дӕр уым сты+.
24 Уый фӕстӕ Ассирийы паддзах Вавилонӕй+, Кутӕй, Аввӕйӕ+, Хаматӕй+ ӕмӕ Сепарваимӕй+ адӕмы ӕркодта ӕмӕ сӕ Самарийы+ горӕтты Израилы фыртты бӕсты ӕрцӕрын кодта. Ӕмӕ уыдон Самари сӕхи бакодтой ӕмӕ йӕ горӕтты цӕрын райдыдтой.
25 Фӕлӕ уым куы ’рцардысты, уӕд Йегъовӕйӕ нӕ тарстысты+. Ӕмӕ сӕм Йегъовӕ домбӕйттӕ ’рвыста+, ӕмӕ сӕ уыдон цагътой.
26 Уӕд Ассирийы паддзахӕн фӕхабар кодтой: «Сӕ зӕххӕй цы адӕмты сыстын кодтай ӕмӕ Самарийы горӕтты кӕй ӕрцӕрын кодтай, уыдон нӕ зонынц, уыцы бӕстӕйы Хуыцауӕн куыд кувын хъӕуы, уый. Ӕмӕ сӕм уыцы Хуыцау домбӕйттӕ ’рвиты+, ӕмӕ сӕ цӕгъдынц, уымӕн ӕмӕ сӕ иу дӕр нӕ зоны, уыцы бӕстӕйы Хуыцауӕн куыд кувын хъӕуы, уый».
27 Уӕд Ассирийы паддзах бардзырд радта: «Уыцы зӕххӕй кӕй сыстын кодтат, уыцы сауджынтӕй+ иуы фӕстӕмӕ уырдӕм арвитут, цӕмӕй уым цӕра ӕмӕ сын амона, уыцы бӕстӕйы Хуыцауӕн кувын куыд хъӕуы, уый».
28 Ӕмӕ, Самарийӕ уацары кӕй акодтой, иу ахӕм сауджын ӕрцыд, Вефилы ӕрцард+ ӕмӕ сын амыдта, Йегъовӕйӕн табу кӕнын куыд хъӕуы, уый+.
29 Фӕлӕ уыцы адӕмтӕ сӕхицӕн хуыцӕуттӕ скодтой+ ӕмӕ сӕ сӕвӕрдтой, самариӕгтӕ кӕй сарӕзтой, уыцы кувӕндӕтты – алы адӕм дӕр сӕ хуыцӕутты сӕвӕрдтой, кӕм цардысты, уыцы горӕтты.
30 Вавилонӕй чи ӕрцыд, уыдон сӕхицӕн сарӕзтой Сокхоф-Бенофы, Кутӕй+ чи ӕрцыд, уыдон – Нергалы, Хаматӕй чи ӕрцыд, уыдон – Ашимӕйы.
31 Аввӕйӕгтӕ+ сарӕзтой Нивхазы ӕмӕ Тартакы. Сепарваимӕгтӕ+ та сӕ фыртты нывондӕн хастой ӕмӕ сӕ арты сыгътой+ Сепарваимы хуыцӕуттӕн – Адрамелехӕн ӕмӕ Анамелехӕн.
32 Фӕлӕ уыцы иу рӕстӕг Йегъовӕйӕ дӕр тарстысты ӕмӕ кувӕн бынӕтты сӕхи адӕмӕй сауджынтӕ дӕр ӕвӕрдтой+, ӕмӕ сын уыдон кувӕндӕтты лӕггад кодтой.
33 Йегъовӕйӕ тарстысты+, фӕлӕ кувгӕ та кодтой сӕхи хуыцӕуттӕн+, цы адӕмты ’хсӕнӕй сӕ сыстын кодтой, уыцы адӕмтӕ куыд кодтой, афтӕ+.
34 Уыдон абоны онг дӕр кувынц, раздӕр куыд куывтой, афтӕ+. Иу дӕр сӕ Йегъовӕйӕ нӕ тарст+ ӕмӕ не ’ххӕст кодта, Йегъовӕ Иаковы фырттӕн+, фӕстӕдӕр Израил кӕй схуыдта+, уый фырттӕн, цы уагӕвӕрдтӕ, тӕрхӕттӕ+, закъӕттӕ+ ӕмӕ фӕдзӕхстытӕ+ радта, уыдон.
35 Йегъовӕ сын уыцы закъӕттӕ радта, семӕ бадзырд куы скодта+, уӕд ӕмӕ сын загъта: «Ӕндӕр хуыцӕуттӕн ма табу кӕнут+, ма сын кувут ӕмӕ сын ма лӕггад кӕнут, нывӕндтӕ дӕр сын ма хӕссут+.
36 Фӕлӕ тӕрсут Йегъовӕйӕ+, Египеты зӕххӕй уӕ йе стыр хъаруйӕ ӕмӕ йӕ тыхджын цонгӕй чи ракодта+, уыцы Хуыцауӕй, уымӕн кувут+ ӕмӕ уымӕн хӕссут нывӕндтӕ+.
37 Цы уагӕвӕрдтӕ+, цы тӕрхӕттӕ+, цы закъон ӕмӕ уын цы фӕдзӕхстытӕ ныффыста+, уыдон алкӕддӕр ӕххӕст кӕнут+ ӕмӕ ӕндӕр хуыцӕуттӕн ма кувут.
38 Ӕз уемӕ цы бадзырд скодтон, уый ма рох кӕнут+ ӕмӕ ӕндӕр хуыцӕуттӕн ма кувут+.
39 Уӕ Хуыцау Йегъовӕйӕ+ тӕрсут, уымӕн ӕмӕ уӕ уе знӕгтӕй се ’ппӕтӕй дӕр уый фервӕзын кӕндзӕн»+.
40 Фӕлӕ уыдон йӕ коммӕ нӕ бакастысты ӕмӕ, раздӕр куыд куывтой, дарддӕр афтӕ куывтой+.
41 Уыцы адӕмтӕ Йегъовӕйӕ тарстысты+, фӕлӕ кувгӕ та кодтой сӕ къухӕйконд хуыцӕуттӕн. Ӕмӕ сӕ цот ӕмӕ сӕ цоты цот абоны онг дӕр кӕнынц, сӕ фыдӕлтӕ куыд кодтой, афтӕ.
Фиппаинӕгтӕ
^ Комк. «сӕ бӕрзӕйтӕ ныхъхъӕбӕр кодтой».
^ Комк. «ӕнӕхъӕн уӕларвон ӕфсады».
^ Комк. «артыл хизын кодтой».
