1, 2. а) Хуыцауӕн организаци хъуамӕ уа ӕви нӕ, уый тыххӕй иуӕй-иутӕ цы фӕзӕгъынц? б) Ацы статьяйӕ цы базондзыстӕм?

ИУӔЙ-ИУТӔ фӕзӕгъынц: «Хуыцауӕн куыд лӕггад кӕнын хъӕуы, уый дын цавӕрдӕр организаци цӕмӕн хъуамӕ амона? Хуыцау хъуамӕ уа дӕ зӕрдӕйы, ӕмӕ дзы ӕндӕр ницы хъӕуы». Цымӕ уыцы хъуыды раст у? Цардӕй та цы у бӕрӕг?

² Ацы статьяйӕ базондзыстӕм, Йегъовӕ алцыдӕр уаг ӕмӕ ӕгъдаумӕ гӕсгӕ кӕй аразы ӕмӕ йӕ адӕмӕн дӕр бӕлвырд разамынд кӕй дӕтты. Стӕй ма аныхас кӕндзыстӕм, йӕ организацийы разамындмӕ цы цӕстӕй хъуамӕ кӕсӕм, ууыл дӕр (1 Кор. 14:33, 40). Нӕ эрӕйы фыццаг ӕнусы Йегъовӕйы адӕм архайдтой, Фыстады цы амындтӕ уыд, уыдонмӕ гӕсгӕ, ӕмӕ уый фӕрцы сӕ бон баци хорз хабар бирӕ бӕстӕты фехъусын кӕнын. Абон мах дӕр архайӕм Библимӕ гӕсгӕ, стӕй нын Хуыцауы организаци цы разамынд дӕтты, уымӕ гӕсгӕ. Уый фӕрцы нӕ бон у хорз хабар ӕгас дунейы дӕр хъусын кӕнын. Стӕй ма уый фӕрцы не ’мбырд у сыгъдӕг ӕмӕ дзы ис фарн ӕмӕ иудзинад.

3. Йегъовӕмӕ алцыдӕр уаг ӕмӕ ӕгъдаумӕ гӕсгӕ кӕй у, уый дӕ цӕмӕн уырны?

³ Йегъовӕмӕ алцыдӕр уаг ӕмӕ ӕгъдаумӕ гӕсгӕ кӕй у, уый ирдӕй  зыны йе сконд хъуыддӕгтӕй. Уый «зонды фӕрцы сӕвӕрдта зӕххӕн бындур, арфуынындзинады фӕрцы сфидар кодта арв» (Ӕмб. 3:19). Мах Хуыцауы сконд хъуыддӕгты тыххӕй нырма бирӕ цыдӕртӕ нӕ зонӕм. Цы зонӕм, уыдӕттӕ сты «йӕ фӕндӕгтӕн ӕрмӕст сӕ кӕрӕттӕ, йӕ кой йын ӕрмӕстдӕр нӕ хъусы кӕронӕй ацахстам» (Иов 26:14). Фӕлӕ уӕддӕр, Дун-дунейы тыххӕй цы зонӕм, уымӕй бӕрӕг у, алцӕмӕн дӕр дзы уаг ӕмӕ ӕгъдау кӕй ис (Пс. 8:3, 4). Галактикӕты цы милуангай стъалытӕ ис, уыдон змӕлынц бӕлвырд ӕгъдаумӕ гӕсгӕ. Хуры алыварс цы планетӕтӕ зилы, уыдон дӕр кӕрӕдзи ӕппындӕр нӕ хъыгдарынц – раст сын цыма чидӕр фӕндаджы ӕгъдӕуттӕ сфидар кодта, афтӕ! Дун-дунейы ахӕм диссаджы уаг ӕмӕ ӕгъдау ис ӕрмӕстдӕр Йегъовӕйы фӕрцы. Уӕлӕрвтӕ ӕмӕ зӕхх цы «стыр зондӕй» сфӕлдыста, ууыл куы фӕхъуыды кӕнӕм, уӕд нӕ фӕфӕнды, цӕмӕй йӕ кадджын кӕнӕм, лӕггад ын кӕнӕм ӕмӕ йыл иузӕрдион уӕм (Пс. 136:1, 5–9).

4. Ахуыргӕндтӕн сӕ бон цӕуылнӕ у бирӕ ахсджиаг фарстатӕн дзуапп раттын?

⁴ Ахуыргӕндтӕ Дун-дунейы тыххӕй ӕмӕ нӕ Зӕххы тыххӕй бирӕ цыдӕртӕ базыдтой, ӕмӕ уый фӕрцы нӕ цард фӕхуыздӕр. Фӕлӕ уыцы ахуыргӕндтӕн сӕ бон нӕу бирӕ ахсджиаг фарстатӕн дзуапп раттын. Зӕгъӕм, астрономтӕн сӕ бон нӕу бӕлвырдӕй зӕгъын, Дун-дуне куыд фӕзынд кӕнӕ Зӕххыл адӕм цӕмӕн цӕрынц, стӕй йыл уыйбӕрц цӕрӕгойтӕ ӕмӕ зайӕгойтӕ цӕмӕн ис, уый. Уымӕй уӕлдай, адӕмӕн сӕ фылдӕр нӕ зонынц, адӕймаджы ӕнустӕм цӕрын афтӕ тынг цӕмӕн фӕнды (Еккл. 3:11). Цымӕ сӕ бон цӕуылнӕ у ахӕм ахсджиаг фарстатӕн дзуапп раттын? Иуӕй уымӕн, ӕмӕ ахуыргӕндтӕ, стӕй иннӕтӕ дӕр дзурынц, Хуыцау кӕй нӕй, ӕмӕ растыл нымайынц эволюцийы ахуырад. Фӕлӕ нын Хуыцау йӕ Ныхасы уыцы фарстатӕн дзуапп дӕтты.

5. Адӕмӕн сӕ цард ӕмӕ сӕ куыст ӕрдзы закъӕттимӕ куыд баст сты?

⁵ Йегъовӕ сфидар кодта ӕрдзы закъӕттӕ, ӕмӕ уыцы закъӕттӕ нӕ ивынц. Ӕмӕ электриктӕй зӕгъай, инженертӕй, хирургтӕй, хӕдтӕхджыты пилоттӕй – се ’ппӕт дӕр сӕ куыст кӕнынц уыцы закъӕтты фӕрцы. Зӕгъӕм, хирургтӕ зонынц, адӕмӕй алкӕмӕн дӕр йӕ алы буары уӕнг дӕр йӕхи бынаты кӕй ис. Ӕмӕ уый фӕрцы, хирург искӕмӕн йӕ зӕрдӕйыл операци куы кӕна, уӕд ын ӕй агургӕ нӕ кӕндзӕн, цымӕ йын цы ран ис, зӕгъгӕ. Стӕй алчидӕр зоны, адӕймаг бӕрзонд ранӕй куы рагӕпп кӕна, уӕд йӕхи кӕй ныппырх кӕндзӕн. Уӕдӕ мах ӕрдзы закъӕтты сӕрты нӕ хизӕм, уымӕн ӕмӕ йӕ зонӕм, нӕ цард уыдонӕй кӕнгӕ кӕй у.

6. Кӕцӕй йӕ зонӕм, Йегъовӕйы кӕй фӕнды, цӕмӕй йын бӕлвырд уаг ӕмӕ ӕгъдаумӕ гӕсгӕ лӕггад кӕнӕм?

⁶ Йегъовӕ Дун-дунейы алцӕмӕн дӕр сӕвӕрдта диссаджы уаг ӕмӕ ӕгъдау. Уӕдӕ фидарӕй зӕгъӕн ис, кӕй йӕ фӕнды, цӕмӕй йын йӕ адӕм дӕр бӕлвырд уаг ӕмӕ ӕгъдаумӕ гӕсгӕ лӕггад кӕной. Ӕмӕ нын Библи дӕр уый тыххӕй радта, цӕмӕй зонӕм, куыд ын хъуамӕ лӕггад кӕнӕм, уый. Хуыцау нын Библийы ӕмӕ йӕ организацийы уылты цы разамынд дӕтты, уымӕ гӕсгӕ куы архайӕм, ӕрмӕстдӕр уӕд уыдзыстӕм амондджын ӕмӕ нӕ цардӕй райгонд.

7. Библи куыд фыст у, уымӕй цы ис базонӕн?

⁷ Библи у Хуыцауы лӕвар ӕмӕ йӕ абарӕн дӕр ницӕимӕ ис. Иуӕй-иу ахуыргӕндтӕ зӕгъынц, зӕгъгӕ, Библийы цы чингуытӕ ис, уыдон дзуттӕгтӕй ӕмӕ чырыстӕттӕй чидӕртӕ ныффыстой ӕмӕ сӕ стӕй адӕм иу чиныг скодтой. Ӕмӕ, дам, уыцы чингуытӕ кӕрӕдзиимӕ баст не сты. Фӕлӕ уыцы чингуытӕ чи ӕмӕ кӕд хъуамӕ ныффыстаид, стӕй дзы цы хъуамӕ ныффыстаид, уый скъуыддзаг кодта Хуыцау. Уымӕ гӕсгӕ нын Библийы чингуытӕ иууылдӕр ӕххуыс кӕнынц Хуыцауы фӕндон бамбарынӕн. Райдианы чиныгӕй суанг Раргомады чиныджы онг Библи ӕргом кӕны, Хуыцау зӕрдӕ кӕмӕй бавӕрдта, уыцы «байзӕддаг» зӕххӕй дзӕнӕт кӕй скӕндзӕн. Библийӕ ма базыдтам, уыцы «байзӕддаг» Йесо Чырысти кӕй у ӕмӕ йӕ Паддзахады фӕрцы кӕй сбӕлвырд кӕндзӕн, Йегъовӕ  Дун-Дунейы Хицау кӕй у, уый. (Бакӕс Райдиан 3:15; Матфейы 6:10; Раргомад 11:15.)

8. Цӕмӕн ис зӕгъӕн, ӕмӕ израилӕгтӕм алцыдӕр уыд уаг ӕмӕ ӕгъдаумӕ гӕсгӕ?

⁸ Израилӕгтӕ Хуыцауы Закъонмӕ гӕсгӕ кӕй цардысты, уый фӕрцы сӕм алцыдӕр уыд уаг ӕмӕ ӕгъдаумӕ гӕсгӕ. Зӕгъӕм, уыди сӕм, «ӕмбырды цатыры бахизӕны раз бӕлвырд ӕгъдаумӕ гӕсгӕ чи лӕггад кодта, уыцы сылгоймӕгтӕ» (Рац. 38:8). Стӕй ма иу ранӕй иннӕ ранмӕ цӕугӕйӕ сӕ цатыртӕ ӕмӕ Хуыцауы цатыр куыд хъуамӕ истаиккой ӕмӕ ӕвӕрдтаиккой, уымӕн дӕр сын уыди бӕлвырд уаг ӕмӕ ӕгъдау. Фӕстӕдӕр паддзах Давид сауджынты ӕмӕ левитты адих кодта къордтыл, кувӕндоны сӕ чи цы куыст хъуамӕ кодтаид, уымӕ гӕсгӕ (1 Аз. 23:1–6; 24:1–3). Ӕмӕ израилӕгтӕ Йегъовӕмӕ куы хъуыстой, уӕд сын уый дӕр арфӕ кодта – алцыдӕр сӕм уыд уаг ӕмӕ ӕгъдауыл, стӕй се ’хсӕн уыди фарн ӕмӕ иудзинад (Дык. з. 11:26, 27; 28:1–14).

9. Фыццаг ӕнусы чырыстон ӕмбырдты алцӕмӕн дӕр уаг ӕмӕ ӕгъдау кӕй уыд, уый цӕмӕй бӕрӕг у?

⁹ Фыццаг ӕнусы чырыстон ӕмбырдты дӕр алцӕмӕн дӕр уыд уаг ӕмӕ ӕгъдау. Уыди сын разамонӕг совет, ома, ӕмбырдтӕн разамынд чи лӕвӕрдта, ахӕм нӕлгоймӕгты къорд. Фыццаг рӕстӕг уыцы советы уыдысты ӕрмӕстдӕр апостолтӕ (Хъуыд. 6:1–6). Фӕстӕдӕр сӕм ӕндӕр хистӕр нӕлгоймӕгтӕ дӕр ӕрбаиу сты (Хъуыд. 15:6). Разамонӕг советы чи уыд, стӕй семӕ ӕмгуыст чи кодта, уыцы ӕфсымӕртӕ Йегъовӕйы фӕндӕй фыстӕджытӕ дӕр фыстой ӕмӕ уыдоны фӕрцы дӕр ӕмбырдтӕн уынаффӕтӕ ӕмӕ амындтӕ лӕвӕрдтой (1 Тим. 3:1–13; Тит. 1:5–9). Цымӕ ӕмбырдтӕн цы пайда хаста, разамонӕг советы уынаффӕтӕм кӕй хъуыстой, уый?

10. Фыццаг ӕнусы-иу ӕмбырдтӕ разамонӕг советы уынаффӕтӕм гӕсгӕ куы архайдтой, уӕд-иу сыл уый куыд фӕзынд? (Кӕс нывмӕ статьяйы райдианы.)

¹⁰ Бакӕс Хъуыддӕгтӕ 16:4, 5. Фыццаг ӕнусы иуӕй-иу ӕфсымӕртӕ разамонӕг советы номӕй ӕмбырдтӕ бӕрӕг кодтой ӕмӕ сын «дзырдтой, Иерусалимы апостолтӕ ӕмӕ хистӕр нӕлгоймӕгтӕ цы уынаффӕтӕ рахастой, уыдон». Ӕмбырдтӕ уыцы уынаффӕтӕм гӕсгӕ кӕй архайдтой, уый фӕрцы сӕ «уырнындзинад фидардӕр кодта ӕмӕ бонӕй-бонмӕ фылдӕр кодтой». Уыцы чырыстӕттӕй цӕуыл ахуыр кӕнӕм ӕмӕ нын уый не ’мбырды куыд баххуыс кӕндзӕн?

11. Бӕрнон ӕфсымӕртӕ цы цӕстӕй хъуамӕ кӕсой, Хуыцауы организаци сын цы разамынд дӕтты, уымӕ?

¹¹ Филиалты комитетты ӕмӕ бӕстӕты комитетты чи ис, уыцы ӕфсымӕртӕ, стӕй районон цӕстдарджытӕ ӕмӕ хистӕр нӕлгоймӕгтӕ хъуамӕ хъусой, Хуыцауы организаци сын цы разамынд дӕтты, уымӕ. Йегъовӕ нын йӕ Ныхасы дзуры, не ’ппӕт дӕр кӕй хъуамӕ хъусӕм, разамынд нын чи дӕтты, уыдонмӕ (Дык. з. 30:16; Дзут. 13:7, 17). Уӕдӕ Йегъовӕйыл иузӕрдион чи у, уый разамынды ныхмӕ нӕ цӕудзӕн, стӕй хъуыр-хъуыр дӕр нӕ кӕндзӕн. Махӕй никӕй фӕндид, цӕмӕй Диотрефы хуызӕн уа. Уый, разамынд чи лӕвӕрдта, уыцы ӕфсымӕрты ницӕмӕ дардта. (Бакӕс 3 Иоанны 9, 10.) Цы разамынд нын дӕттынц, уымӕ куы хъусӕм, уӕд не ’мбырды фарн ӕмӕ иудзинад хъахъхъӕндзыстӕм. Уӕдӕ хорз уаид, куы ахъуыды кӕниккам: «Мӕ хоты ӕмӕ ме ’фсымӕрты разӕнгард кӕнын, цӕмӕй Йегъовӕйыл иузӕрдион уой? Хуыцауы организаци мын цы разамынд ратты, уымӕ уайтагъд байхъусын?»

12. Хистӕр нӕлгоймӕгты ӕмӕ кӕстӕриуӕггӕнӕг ӕфсымӕрты куыд снысан кӕнынц?

¹² Ӕрӕджы Разамонӕг совет фӕивта, ӕмбырдты хистӕр нӕлгоймӕгтӕ ӕмӕ кӕстӕриуӕггӕнӕг ӕфсымӕртӕ нысангонд куыд цӕуынц, уый. Брошюрӕйы «Йесо Чырысти кӕй райгас, уый махӕн цӕуыл дзурӕг у?» (bw552) рубрикӕйы «Кӕсджыты фарстатӕ» фыст уыд, фыццаг ӕнусы разамонӕг совет уыцы хъуыддаг цӕуӕг цӕстдарджыты бар кӕй бакодта. Ӕмӕ уымӕ гӕсгӕ 2014 азы 1 сентябрӕй фӕстӕмӕ хистӕр нӕлгоймӕгты ӕмӕ кӕстӕриуӕггӕнӕг ӕфсымӕрты нысан кӕнынц районон цӕстдарджытӕ. Районон цӕстдарӕг бацархайы, цӕмӕй, хистӕр нӕлгоймӕгтӕ рекомендаци кӕмӕн радтой, уыцы ӕфсымӕры хуыздӕр базона. Зӕгъӕм, йемӕ  хъусын кӕнынмӕ ацӕуы. Кӕд ӕфсымӕр бинонджын у, уӕд та йын йӕ бинонтимӕ дӕр базонгӕ вӕййы, йӕ хъус сӕм фӕдары (1 Тим. 3:4, 5). Уый фӕстӕ районон цӕстдарӕг ӕмӕ хистӕр нӕлгоймӕгтӕ фембӕлынц ӕмӕ лӕмбынӕг ӕркӕсынц, Библимӕ гӕсгӕ кӕстӕриуӕггӕнӕг ӕфсымӕрмӕ кӕнӕ хистӕр нӕлгоймагмӕ цавӕр миниуджытӕ хъуамӕ уа, уымӕ (1 Тим. 3:1–10, 12, 13; 1 Пет. 5:1–3).

13. Хистӕр нӕлгоймӕгты разамындмӕ кӕй хъусӕм, уый цӕмӕй бӕрӕг уыдзӕн?

¹³ Хистӕр нӕлгоймӕгтӕ нын Библийӕ разамынд уымӕн дӕттынц, ӕмӕ ӕмбырдыл тыхсынц ӕмӕ йӕ хъахъхъӕнынц. Ӕмӕ сӕм хъуамӕ хъусӕм, уымӕн ӕмӕ уыцы разамынд нӕ пайдайӕн у (1 Тим. 6:3). Фыццаг ӕнусы чидӕртӕ «кодтой, чи не ’мбӕлд, ахӕм митӕ, кусгӕ ӕппындӕр нӕ кодтой, фӕлӕ сӕхи иннӕты хъуыддӕгты тъыстой». Куыд зыны, афтӕмӕй сӕ хистӕр нӕлгоймӕгтӕ фӕдзӕхстой, фӕлӕ сын уыдон сӕ уынаффӕтӕ ницӕмӕ дардтой. Павел ӕмбырдӕн бамбарын кодта, йӕхи афтӕ чи дары, уымӕ цы цӕстӕй хъуамӕ кӕсой, уый. Павел ныффыста: «Ахӕммӕ та уӕ хъус лӕмбынӕг дарут ӕмӕ йемӕ мауал иу кӕнут». Фӕлӕ йӕм знаджы цӕстӕй дӕр хъуамӕ ма кастаиккой (2 Фес. 3:11–15). Абон дӕр хистӕр нӕлгоймӕгтӕ фӕархайынц, цӕмӕй, Хуыцауы уагӕвӕрдтӕ чи ницӕмӕ дары, зӕгъӕм, ӕнӕуырнӕгимӕ чи ’мбӕлы, уымӕн баххуыс кӕной (1 Кор. 7:39). Ахӕм адӕймаг уынаффӕмӕ куы нӕ хъуса, уӕд хистӕр нӕлгоймӕгтӕ, чи зоны, аскъуыддзаг кӕной ӕмбырды уый фӕдыл раныхас радзурын ӕмӕ бамбарын кӕнын, ахӕм уагахаст ӕмбырдыл ӕвзӕрырдӕм кӕй фӕзыны. Де ’мбырды дӕр хистӕр нӕлгоймӕгтӕ ахӕм раныхас куы радзурой, уӕд куыд бакӕндзынӕ? Кӕй кой кӕнынц, уый куы зонай, уӕд бацархайдзынӕ, цӕмӕй йемӕ рӕстӕг мауал ӕрвитай, кӕд йемӕ дарддӕр уырнындзинадимӕ баст хъуыддӕгтыл ныхас кӕндзынӕ, уӕддӕр? Афтӕ куы бакӕнай, уӕд, чи зоны, бамбара, йӕ хъуыддӕгтӕ йӕхицӕн дӕр зиан кӕй хӕссынц ӕмӕ Йегъовӕйы зӕрдӕмӕ дӕр кӕй нӕ цӕуынц. Ӕмӕ уый фӕрцы, чи зоны, йӕ уагахаст фӕива ¹.

14. Нӕ бон цы у аразын, цӕмӕй ӕмбырд сыгъдӕг уа?

¹⁴ Хуыцауы Ныхас нын ӕмбарын кӕны, алкӕмӕн дӕр нӕ йӕ бон цы у аразын, цӕмӕй ӕмбырд сыгъдӕг уа. Ӕрхъуыды-ма кӕнӕм, Коринфы ӕмбырды цы хабар ӕрцыд, уый. Павелӕн уыцы ӕмбырды хотӕ ӕмӕ ’фсымӕртӕ тынг зынаргъ уыдысты. Бирӕтӕн дзы рӕстдзинад базонынӕн баххуыс кодта (1 Кор. 1:1, 2). Уӕдӕ-ма ахъуыды кӕн, куыд зын ын уыдаид, куы базыдта, чидӕр сӕ кӕй хӕты ӕмӕ уыцы хъуыддагмӕ ӕмбырд ӕнцад кӕй кӕсы! Павел хистӕр нӕлгоймӕгтӕн загъта, цӕмӕй «уыцы адӕймаджы Сайтаны бар бакодтаиккой», ома йӕ ӕмбырдӕй ацух кодтаиккой (1 Кор. 5:1, 5–7, 12). Абон дӕр хистӕр нӕлгоймӕгты хатт бахъӕуы, йӕ тӕригъӕдыл чи нӕ фӕсмон кӕны, ахӕм адӕймаджы ӕмбырдӕй ацух кӕнын. Ӕмӕ мах дӕр ахӕм адӕймагимӕ, Фыстад куыд амоны, нӕхи афтӕ куы дарӕм, уӕд ӕмбырд сыгъдӕг уыдзӕн. Ӕмӕ, чи зоны, уыцы адӕймаг уый фӕрцы ӕрфӕсмон кӕна ӕмӕ Йегъовӕмӕ кувын райдайа, цӕмӕй йын ныххатыр кӕна.

15. Нӕ бон куыд у ӕмбырды фарн хъахъхъӕнын?

¹⁵ Коринфы ӕмбырды ма хъуыди ноджыдӕр иу хъуыддагмӕ ӕркӕсын. Чидӕртӕ-иу дзы се ’фсымӕртыл тӕрхондӕттӕм хъаст бахастой. Ӕмӕ сӕ Павел бафарста: «Хуыздӕр нӕ уаид, ӕмӕ ӕфхӕрды бынаты куы баззаиккат?» (1 Кор. 6:1–8). Абон дӕр ӕмбырды чидӕртӕ ӕфсымӕртимӕ ӕхца бакусыныл баныхас кӕнынц. Фӕлӕ сӕ хъуыддаг куы нӕ ацӕуы ӕмӕ се ’хца куы фесафынц кӕнӕ сӕм афтӕ куы фӕкӕсы, ӕмӕ сӕ ӕфсымӕр фӕсайдта, уӕд тӕрхондонмӕ хъаст бадӕттынц. Фӕлӕ уый тыххӕй, гӕнӕн ис, ӕмӕ адӕм Йегъовӕйыл ӕмӕ йӕ организацийыл цъыф калой. Стӕй афтӕмӕй ӕмбырды фарн дӕр фехӕлы. Хуыцауы Ныхас нын дзуры, не ’фсымӕртимӕ хӕларӕй кӕй хъуамӕ цӕрӕм, суанг нӕ уый тыххӕй не ’хца фесафын куы бахъӕуа, уӕддӕр ². Йесо нын бацамыдта, кӕрӕдзи куы нӕ бамбарӕм кӕнӕ не ’хсӕн исты куы рауайа, уӕд куыд хъуамӕ архайӕм, уый. (Бакӕс Матфейы  5:23, 24; 18:15–17.) Ӕмӕ йын йӕ уынаффӕмӕ куы хъусӕм, уӕд ӕмбырды фарн ӕмӕ иудзинад хъахъхъӕндзыстӕм.

16. Хуыцауы адӕмы ’хсӕн иудзинад цӕй фӕрцы ис?

¹⁶ Йегъовӕйы Ныхасы фыст ис: «Уымӕй хуыздӕр, уымӕй ӕхсызгондӕр ницы ис, ӕмӕ ӕфсымӕртӕ иумӕ ӕмвӕнд-ӕмзондӕй куы цӕрой!» (Пс. 133:1). Израилӕгтӕ Йегъовӕмӕ куы хъуыстой, уӕд сӕм алцыдӕр уыд уаг ӕмӕ ӕгъдауыл ӕмӕ се ’хсӕн уыди иудзинад. Хуыцау йӕ адӕмы тыххӕй загъта: «Се ’ппӕты дӕр иумӕ ӕрӕмбырд кӕндзынӕн, ӕмӕ иумӕ уыдзысты, фыстӕ кӕрты иумӕ куыд вӕййынц... афтӕ» (Мих. 2:12). Йегъовӕ ма загъта, йӕ адӕм ын йӕ Ныхасы фыст рӕстдзинад кӕй ӕмбардзысты ӕмӕ йын иумӕ ӕмвӕнд-ӕмзондӕй кӕй лӕггад кӕндзысты. Уый загъта: «Ӕз адӕмтӕн ратдзынӕн сыгъдӕг ӕвзаг, цӕмӕй се ’ппӕт дӕр Йегъовӕмӕ йӕ номӕй кувой ӕмӕ йын уӕхски-уӕхск лӕггад кӕной» (Соф. 3:9). Йегъовӕйӕн нӕ бон иумӕ лӕггад кӕнын кӕй у, уый тыххӕй дзы бузныг куыннӕ стӕм!

17. Хотӕ ӕмӕ ӕфсымӕртӕй исчи уӕззау тӕригъӕд куы сараза, уӕд хистӕр нӕлгоймӕгтӕ куыд хъуамӕ архайой?

¹⁷ Исчи уӕззау тӕригъӕд куы сараза, уӕд хистӕр нӕлгоймӕгтӕ хъуамӕ уыцы хъуыддаг равзарыныл фӕстиат ма кӕной, ӕрмӕст хъуамӕ архайой фӕлмӕнӕй. Уыдон зонынц, Йегъовӕйы кӕй фӕнды, цӕмӕй хистӕр нӕлгоймӕгтӕ ӕмбырд ӕвзӕрдзинадӕй хъахъхъӕной ӕмӕ архайой, цӕмӕй уа сыгъдӕг ӕмӕ дзы иудзинад уа (Ӕмб. 15:3). Павел Коринфы цӕрӕг ӕфсымӕрты тынг уарзта, ӕмӕ сын уый тыххӕй йӕ фыццаг фыстӕджы ӕргом загъта, сраст кӕнын сӕ цы хъӕуы, уый. Бӕрӕг у, Коринфы ӕмбырды хистӕр нӕлгоймӕгтӕ Павелы разамындмӕ уайтагъд кӕй байхъуыстой, уымӕн ӕмӕ сӕм цалдӕр мӕйы фӕстӕ дыккаг фыстӕг куы ныффыста, уӕд сӕ раппӕлыди. Кӕд ӕфсымӕр кӕнӕ хо, ӕмбаргӕ дӕр ӕй нӕ бакодта, афтӕмӕй рӕдыд къахдзӕф сарӕзта, уӕд ӕй хистӕр нӕлгоймӕгтӕ хъуамӕ фӕлмӕнӕй раст зондыл саразой (Гал. 6:1).

18. а) Хуыцауы Ныхасы фыст разамынд фыццаг ӕнусы ӕмбырдтӕн куыд ӕххуыс кодта? б) Иннӕ статьяйы дзырд цӕуыл цӕудзӕн?

¹⁸ Уӕдӕ бӕрӕг у: фыццаг ӕнусы чырыстӕттӕ-иу Хуыцауы Ныхасы фыст разамындмӕ гӕсгӕ куы архайдтой, уӕд-иу се ’мбырдтӕ уыдысты сыгъдӕг, стӕй-иу дзы уыди фарн ӕмӕ иудзинад (1 Кор. 1:10; Еф. 4:11–13; 1 Пет. 3:8). Уый фӕрцы ӕфсымӕртӕ ӕмӕ хотӕн бантыст хорз хабар «арвы бын ӕппӕт адӕмӕн дӕр» фехъусын кӕнын (Кол. 1:23). Абон дӕр Йегъовӕйы адӕмы ’хсӕн ис иудзинад ӕмӕ сӕм алцыдӕр у уаг ӕмӕ ӕгъдаумӕ гӕсгӕ. Ӕмӕ сын уый фӕрцы хорз хабар хъусын кӕнын ӕнтысы ӕгас зӕххыл дӕр. Уыдоны ӕппӕты тынгдӕр фӕнды, цӕмӕй Йегъовӕйӕн, Дун-дунейы Хицауӕн, кад хӕссой ӕмӕ сын йӕ Ныхасы уылты цы разамынд дӕтты, уымӕ хъусой. Ӕмӕ иннӕ статьяйы дзырд цӕудзӕн, уый ма ноджыдӕр цӕмӕй у бӕрӕг, ууыл (Пс. 71:15, 16).