1, 2. Иннӕты ахуыр кӕнын цӕмӕн хъӕуы?

ЙЕСОЙӔН йӕ сӕйраг хӕс уыд Хуыцауы Паддзахады тыххӕй хорз хабар хъусын кӕнын. Фӕлӕ-иу уӕддӕр йӕ ахуыргӕнинӕгтӕн рӕстӕг ссардта – амыдта сын, куыд хъӕуы иннӕты ахуыр кӕнын, стӕй Хуыцауы адӕмӕн хорз фыййӕуттӕ цӕй фӕрцы уыдзысты, уый (Матф. 10:5–7). Филипп дӕр бирӕ хъусын кодта, фӕлӕ дзы йӕ чызджытӕ дӕр рохуаты нӕ уыдысты. Уыдонӕн дӕр ӕххуыс кодта, цӕмӕй иннӕтӕн Хуыцауы Ныхас арӕхстджынӕй амыдтаиккой (Хъуыд. 21:8, 9). Цымӕ абон дӕр иннӕты ахуыр кӕнын ахсджиаг у?

² Хорз хабар йӕ зӕрдӕмӕ чи айсы, уыцы адӕмы нымӕц ӕгас зӕххыл дӕр фылдӕрӕй-фылдӕр кӕны. Донаргъуыд чи нӕма райста, уыдон хъуамӕ бамбарой, сӕхӕдӕг дӕр ӕнӕмӕнг Библи кӕй хъуамӕ иртасой. Хъӕуы ма сӕ сахуыр кӕнын хъусын кӕнын ӕмӕ адӕмӕн рӕстдзинад амонын. Ӕфсымӕрты та хъӕуы разӕнгард кӕнын, цӕмӕй сӕхиуыл кусой ӕмӕ суой кӕстӕриуӕггӕнӕг ӕфсымӕртӕ ӕмӕ хистӕр нӕлгоймӕгтӕ. Фӕлтӕрд чырыстӕттӕ сын, «хорз цы у, уый» кӕй амонынц, уый фӕрцы сын ӕххуыс кӕнынц, цӕмӕй сын Хуыцауы хъуыддаджы фылдӕр ӕнтыса (Ӕмб. 4:2).

3, 4. а) Павелы ныхӕстӕй куыд зыны, Библи куы иртасӕм, уӕд нӕ лӕггады дӕр ӕнтыстджын кӕй уыдзыстӕм? б) Цӕмӕй, Библи кӕимӕ ахуыр кӕнӕм, уый Библи арфдӕр иртасын бафӕнда, уый тыххӕй нӕхӕдӕг дӕр цы хъуамӕ аразӕм?

³ Библи иртасын куыд ахсджиаг у, уый бӕрӕг у, апостол Павел Колоссты цӕрӕг чырыстӕттӕм цы ныффыста, уымӕй: «Хуыцаумӕ ӕнӕрынцойӕ... кувӕм, ӕмӕ дзы курӕм, цӕмӕй йын йӕ фӕндон бӕлвырдӕй зонат ӕмӕ уӕм уа ӕппӕт зонд ӕмӕ, сыгъдӕг тых цы ӕмбарындзинад дӕтты, уый. Уӕд цӕрдзыстут, Йегъовӕйы раз куыд ӕмбӕлы, афтӕ ӕмӕ йын алцӕмӕй дӕр йӕ зӕрдӕ рухс кӕндзыстут. Стӕй уын бирӕ ӕнтысдзӕн алы хорз хъуыддаджы дӕр ӕмӕ, Хуыцау чи у, уый хуыздӕрӕй-хуыздӕр зондзыстут» (Кол. 1:9, 10). Колоссӕгтӕ Хуыцауы фӕндон бӕлвырдӕй куы зыдтаиккой, уӕд «цардаиккой, Йегъовӕйы раз куыд ӕмбӕлы, афтӕ ӕмӕ йын алцӕмӕй дӕр йӕ зӕрдӕ рухс кодтаиккой». Ӕмӕ сын уый фӕрцы та «бирӕ ӕнтыстаид алы хорз хъуыддаджы дӕр», уӕлдайдӕр хъусын кӕныны хъуыддаджы. Цӕмӕй адӕймаг Йегъовӕйӕн, куыд ӕмбӕлы, афтӕ лӕггад кӕна, уый тыххӕй хъуамӕ ӕдзухдӕр Библи иртаса. Ӕмӕ, Библи кӕимӕ ахуыр кӕнӕм, уыдонӕн уый хъуамӕ бамбарын кӕнӕм.

⁴ Нӕхӕдӕг Библи иртасын ахуыр куы нӕ уӕм, уӕд иннӕтӕн дӕр нӕ бон не суыдзӕн бамбарын кӕнын, уыцы хъуыддаг куыд ахсджиаг у, уый. Библи ӕдзух куы кӕсӕм ӕмӕ йыл куы хъуыды кӕнӕм, уӕд нын уый ӕххуыс кӕндзӕн нӕ царды дӕр ӕмӕ нӕ лӕггады дӕр. Ахъуыды кӕн ахӕм фарстатыл: «Уацамынды исчи, Библийы ахуырӕдтӕм гӕсгӕ раст чи нӕу, ахӕм хъуыды куы фӕзӕгъы, уӕд ын мӕ бон вӕййы дзуапп Библийӕ раттын? Йесо, Павел ӕмӕ иннӕтӕ куыд ныфсджынӕй хъусын кодтой, уый тыххӕй куы фӕкӕсын, уӕд ахъуыды кӕнын, мӕ бон сӕ бафӕзмын куыд у, ууыл?» Не ’ппӕты дӕр ӕнӕмӕнг хъӕуынц, Хуыцауы Ныхасы цы зонындзинӕдтӕ ӕмӕ уынаффӕтӕ ис, уыдон. Библи кӕй иртасӕм, уый нын стыр пайда хӕссы. Ӕмӕ уый тыххӕй иннӕтӕн дӕр куы дзурӕм, уӕд уыдоны дӕр бафӕнддзӕн Библи арфдӕр иртасын ӕмӕ сын уый пайда хӕсдзӕн.

5. Куыд ис ногтӕн баххуыс кӕнӕн, цӕмӕй Библи иртасын сахуыр уой?

⁵ Ахъуыды кӕн ахӕм фарстайыл: «Мӕ бон куыд у мӕ ахуыргӕнинагӕн баххуыс кӕнын, цӕмӕй Библи иртасын сахуыр уа?» Зӕгъӕм, фыццаг уал ын равдисӕн ис, Библийы ахуырмӕ цӕттӕ кӕнын куыд хъӕуы, уый. Дӕ бон у йемӕ аныхас кӕнын статьяйыл «Хуыцауы Ныхас дын цины хос у?» (брошюрӕ «Чырыстон бинонтӕ, „цырддзаст ут“!», bw510). Баххуыс ын кӕн ӕмбырдмӕ бацӕттӕ кӕнынӕн. Йӕ разы ахӕм нысан дӕр сӕвӕрӕд, цӕмӕй дзы дзуапп ратта. Зӕгъ ын, цӕмӕй ног брошюрӕтӕ иууылдӕр кӕса. Кӕд интернеты нӕ библиотекӕтӕй искӕцы йе ’взагыл ис, уӕд ын равдис, йӕ бон дзы куыд у ӕрмӕг агурын ӕмӕ дзы йӕ  фарстатӕн дзуапп ссарын. Афтӕмӕй Библи иртасын бауарздзӕн.

6. а) Дӕ бон куыд у дӕ ахуыргӕнинагӕн баххуыс кӕнын, цӕмӕй Библи бауарза? б) Ахуыргӕнинаг Хуыцауы Ныхас куы бауарза, уӕд ӕй уый цӕмӕ сразӕнгард кӕндзӕн?

⁶ Кӕй зӕгъын ӕй хъӕуы, нӕ бон нӕу искӕмӕн Библи тыххӕй кӕсын кӕнын кӕнӕ иртасын кӕнын. Ахуыргӕнинагӕн уыцы хъуыддаг хъуамӕ йӕ зӕрдӕмӕ цӕуа, стӕй хъуамӕ бамбара, уый фӕрцы Йегъовӕйы хуыздӕр кӕй базондзӕн. Кӕд нӕ фӕнды, ӕмӕ Хуыцауы Ныхас бауарза, уӕд хъуамӕ архайӕм, Йегъовӕйы организаци нын куыд амоны, афтӕ. Ӕмӕ уӕд иу бон дӕ ахуыргӕнинаг псаломзарӕггӕнӕгау зӕгъдзӕн: «Мӕнӕн та хорз у Хуыцаумӕ ӕввахс кӕнын. Ӕз мӕхи бакодтон Дунедарӕг Хуыцау Йегъовӕйы уазӕг» (Пс. 73:28). Хуыцаумӕ ӕввахс кӕнын кӕй фӕнды, ахӕм адӕймагӕн та Хуыцауы сыгъдӕг тых ӕнӕмӕнг баххуыс кӕндзӕн.

7. Йесо хорз хабар хъусынгӕнджыты куыд ахуыр кодта? (Кӕс нывмӕ статьяйы райдианы.)

⁷ Йесо йӕ апостолты куыд ахуыр кодта, уымӕй бирӕ цыдӕртӕ у нӕ бон зондӕн райсын. Йемӕ-иу сӕ хъусын кӕнынмӕ акодта, ӕмӕ-иу уыдтой, адӕмы куыд ахуыр кодта, уый. Стӕй сын радта бӕлвырд амындтӕ, хъусын кӕнын куыд хъӕуы, уый фӕдыл, ӕмӕ уый тыххӕй бакӕсӕн ис Матфейы 10 сӕры ¹. Ӕмӕ цыбыр рӕстӕгмӕ уыдон дӕр систы дӕсны хъусынгӕнджытӕ (Матф. 11:1). Мах дӕр хъуамӕ нӕ ахуыргӕнинӕгты ахуыр кӕнӕм хъусын кӕнын. Нӕ бон сын баххуыс кӕнын у дыууӕ хъуыддаджы.

8, 9. а) Йесо адӕмимӕ куыд ныхас кодта? б) Куыд ис ног хъусынгӕнджытӕн баххуыс кӕнӕн, цӕмӕй адӕмимӕ Йесойау ныхас кӕной?

⁸ Куыд хъӕуы адӕмимӕ ныхас кӕнын. Йесо-иу Хуыцауы Паддзахады тыххӕй арӕх бирӕ адӕмы раз дзырдта. Фӕлӕ-иу иугай адӕймӕгтыл куы фембӕлд, уӕд-иу уыдонимӕ дӕр аныхас кодта, ӕмӕ-иу йӕ ныхас уыд фӕлмӕн. Зӕгъӕм, иухатт хорз аныхас кодта, горӕт Сихары цур цъаймӕ чи ’рбацыд, ахӕм сылгоймагимӕ (Иоан. 4:5–30). Ныхас ма кодта хъалонисӕг Матфеимӕ, кӕнӕ Левиимӕ. Евангелиты уыцы хабары тыххӕй бирӕ фыст нӕй. Фӕлӕ йын Йесо куы загъта, мӕ фӕдыл рацу, зӕгъгӕ, уӕд уый дӕр йӕ фӕдыл ацыд. Стӕй Матфей стыр куывд скодта ӕмӕ Йесойы фӕхуыдта, ӕмӕ Йесо уым дӕр адӕмимӕ ныхас кодта (Матф. 9:9; Лук. 5:27–39).

⁹ Йесо ма фӕлмӕнӕй ныхас кодта Нафанаилимӕ дӕр, кӕд Нафанаил назаретӕгтӕм ӕвзӕр цӕстӕй каст, уӕддӕр. Ӕмӕ Нафанаил йӕ зондахаст фӕивта. Бафӕндыди йӕ, назаретаг Йесо цы амыдта, уый тыххӕй фылдӕр базонын (Иоан. 1:46–51). Уӕдӕ ахсджиаг у, цӕмӕй ног хъусынгӕнджыты ахуыр кӕнӕм адӕмимӕ фӕлмӕнӕй, хӕларзӕрдӕйӕ ныхас кӕнын. Уӕд-иу сӕм сыгъдӕгзӕрдӕ адӕм байхъусдзысты, ӕмӕ сӕ лӕггадӕй сӕхи зӕрдӕ дӕр райдзӕн.

10–12. а) Хорз хабармӕ-иу чи байхъуыста, уыдонӕн Йесо куыд ӕххуыс кодта? б) Ног хъусынгӕнджытӕн куыд ис баххуыс кӕнӕн, цӕмӕй Библи амонынмӕ хуыздӕр арӕхсой?

¹⁰ Куыд ис, чи байхъуса, уыдонӕн ӕххуыс кӕнӕн. Йесойӕн зӕххыл бирӕ куыст уыди. Фӕлӕ-иу уӕддӕр рӕстӕг ссардта, цӕмӕй дарддӕр ӕххуыс кодтаид, хорз хабармӕ-иу чи байхъуыста, уыдонӕн. Зӕгъӕм, иухатт денджызы был йӕ разы дуне адӕм ӕрӕмбырд. Уӕд Йесо Петримӕ бӕлӕгъы сбадт ӕмӕ сӕ уырдыгӕй ахуыр кӕнын райдыдта. Уый фӕстӕ та Петрӕн бамбарын кодта иу хабар. Йесо сарӕзта диссаг: афтӕ бакодта, ӕмӕ Петр ӕрцахста тынг бирӕ кӕсаг. Ӕмӕ йын уӕд Йесо загъта: «Нырӕй фӕстӕмӕ ахсдзынӕ удӕгас адӕймӕгты». Йесойы ныхӕстӕ ӕмӕ хъуыддӕгтӕ Петрыл куыд бандӕвтой? Йе ’мбӕлттимӕ «сӕ бӕлӕгътӕ былмӕ раластой, ӕппӕт дӕр ныууагътой ӕмӕ [Йесойы] фӕдыл ацыдысты» (Лук. 5:1–11).

 ¹¹ Никодимы фӕндыд, Йесо цы амыдта, уый тыххӕй фылдӕр базонын. Фӕлӕ Сӕйраг тӕрхондоны уӕнг кӕй уыд, уымӕ гӕсгӕ тарсти, адӕм ӕй Йесоимӕ ныхасгӕнгӕ куы феной, уӕд цы зӕгъдзысты, уымӕй. Гъемӕ йӕм ӕхсӕвы ӕрбацыд. Йесо йӕ нӕ арвыста, фӕлӕ йемӕ фӕбадти ӕмӕ йын ахсджиаг хабӕрттӕ бамбарын кодта (Иоан. 3:1, 2). Йесо нын фӕзминаг цӕмӕй у? Уый-иу алкӕддӕр рӕстӕг рахицӕн кодта, цӕмӕй адӕмӕн сӕ уырнындзинад фидар кодтаид. Уӕдӕ-иу мах дӕр, чи нӕм байхъуыста, уыдонӕн нӕ рӕстӕг ма ’вгъау кӕнӕм: бабӕрӕг-иу сӕ кӕнӕм, хуыздӕр сын кӕд уыдзӕн, уыцы афон ӕмӕ сын Библи ӕмбарынӕн ӕххуыс кӕнӕм.

¹² Ног хъусынгӕнджытимӕ уацамынды куы цӕуӕм, уӕд уыдон дӕр фӕлтӕрдджындӕр кӕндзысты ӕмӕ Библи амонынмӕ хуыздӕр арӕхсдзысты. Хъуамӕ сын ӕмбарын кӕнӕм, иугыццыл нӕм чи байхъусы, уыдонмӕ дӕр ногӕй бацӕуын кӕй фӕхъӕуы. Хорз уаид, немӕ-иу сӕ дыккаг бацыдтӕм кӕнӕ Библийы ахуыртӕм куы акӕниккам. Афтӕ сӕ куы ахуыр кӕнӕм, уӕд уый фӕстӕ сӕхи дӕр фӕнддзӕн сӕ участокты адӕмы ногӕй бӕрӕг кӕнын ӕмӕ искӕимӕ Библи ахуыр кӕнын. Стӕй ма фӕразондзинадыл дӕр сахуыр уыдзысты: ногӕй бабӕрӕг кӕнын сӕ кӕй фӕндыд, уый-иу цалдӕр хатты хӕдзары куы нӕ баййафой, уӕд дӕр-иу сӕ ныфс уайтагъд нӕ асӕтдзӕн (Гал. 5:22; кӕс рамкӕ «Йӕ ныфс нӕ асаст»).

13, 14. а) Библийы цы удуӕлдай адӕмы кой ис, уыдоны тыххӕй цы хъуыды кӕныс? б) Дӕ бон куыд у ног хъусынгӕнджыты ӕмӕ ӕрыгӕтты ахуыр кӕнын, цӕмӕй, хоты ӕмӕ ӕфсымӕрты кӕй уарзынц, уый хъуыддагӕй ӕвдисой?

¹³ Библийы фыст ис, «ӕфсымӕрты ӕнӕхин уарзтӕй» кӕй хъуамӕ уарзӕм ӕмӕ кӕрӕдзийӕн кӕй хъуамӕ лӕггад кӕнӕм. (Бакӕс 1 Петры 1:22; Лукайы 22:24–27.) Хуыцауы Фырт иннӕты тыххӕй йӕхиуыл ӕппындӕр нӕ ауӕрста. Адӕмы тыххӕй ма суанг йӕ цард дӕр ратта (Матф. 20:28). Доркӕйӕ «иннӕтӕ бирӕ хорздзинӕдтӕ зыдтой, стӕй тынг ӕххуыс кодта мӕгуыртӕн дӕр» (Хъуыд. 9:36, 39). Ромы иу хо, Марийӕ, зӕгъгӕ, «бирӕ бафыдӕбон кодта» ӕмбырды тыххӕй (Ром. 16:6). Нӕ бон куыд у иннӕтӕн баххуыс кӕнын, сӕ хотӕн ӕмӕ се ’фсымӕртӕн кӕй хъуамӕ лӕггад кӕной, уый бамбарынӕн?

¹⁴ Фӕлтӕрд чырыстӕттӕ рынчынты кӕнӕ ацӕргӕты куы бӕрӕг кӕной, уӕд сӕ бон у ногты семӕ акӕнын. Уавӕр куы амона, уӕд сӕ бон у сӕ сывӕллӕтты дӕр акӕнын. Иуӕй-иу хатт ацӕргӕ хотӕн кӕнӕ ӕфсымӕртӕн фӕхъӕуы хӕринаг ӕрбахӕссын кӕнӕ скӕнын, йе та сын сӕ хӕдзары истытӕ бацалцӕг кӕнын. Ӕмӕ уӕд хистӕр нӕлгоймӕгтӕн сӕ бон вӕййы уый ӕрыгӕттӕй кӕнӕ ногтӕй искӕимӕ саразын. Афтӕмӕй уыдон дӕр ахуыр кӕндзысты иннӕтӕн хорздзинад аразын. Иу хистӕр нӕлгоймаг-иу хъӕуты куы хъусын кодта, уӕд-иу дзы йӕ участокы цӕрӕг Ӕвдисӕнты абӕрӕг кодта. Ӕмӕ-иу йемӕ арӕх цы ӕрыгон ӕфсымӕр уыд, уый бамбӕрста, ӕмбырды алчидӕр кӕй хъуамӕ зона, иннӕтӕн зынаргъ кӕй у ӕмӕ йӕ кӕй уарзынц (Ром. 12:10).

15. Ӕмбырдты цы нӕлгоймӕгтӕ ис, уыдоны хистӕр нӕлгоймӕгты ӕххуыс цӕмӕн хъӕуы?

¹⁵ Йегъовӕ ӕмбырдты ахуыргӕнджытӕй сӕвӕрдта нӕлгоймӕгты. Ӕмӕ уымӕ гӕсгӕ ӕфсымӕрты хъӕуы дзырдарӕхстдзинадыл ахуыр кӕнын. Зӕгъӕм, кӕстӕриуӕггӕнӕг ӕфсымӕр раныхас куы цӕттӕ кӕна, уӕд хистӕр нӕлгоймагӕн йӕ бон у, ӕмӕ йӕм байхъуса. Афтӕ йын куы ’ххуыс кӕна, уӕд арӕхстджындӕр кӕндзӕн ӕмӕ Хуыцауы Ныхас хорз амонын сахуыр уыдзӕн (Неем. 8:8).

16, 17. а) Павел Тимофейӕн куыд ӕххуыс кодта? б) Хистӕр нӕлгоймӕгтӕн сӕ бон куыд у кӕстӕриуӕггӕнӕг ӕфсымӕрты ахуыр кӕнын?

¹⁶ Ӕмбырдты хъӕуы фылдӕр хистӕр нӕлгоймӕгтӕ. Ӕмӕ фидӕны хистӕр нӕлгоймагӕй лӕггад кӕнын йӕ бон кӕмӕн уыдзӕн, ахӕм ӕфсымӕрты хъӕуы ахуыр кӕнын. Куыд, уый базонӕн ис, Павел Тимофеймӕ цы ныффыста,  уымӕй: «Мӕ хъӕбул, амӕй фӕстӕмӕ дӕр дӕхи фидар кӕн, Йесо Чырыстиимӕ иудзинады фӕрцы цы стыр хорзӕхӕй стӕм хайджын, уымӕй. Ӕмӕ бирӕ ӕвдисӕнты раз мӕнӕй цы фехъуыстай, уыдӕттӕ бацамон ӕууӕнкджын адӕймӕгтӕн, ӕмӕ уӕд уыдонӕн дӕр сӕ бон уыдзӕн уыдӕттӕ иннӕтӕн амонын» (2 Тим. 2:1, 2). Павел уыди апостол ӕмӕ хистӕр нӕлгоймаг, ӕмӕ дзы Тимофей бирӕ цӕуылдӕрты сахуыр. Ӕмӕ стӕй йӕхӕдӕг дӕр йӕ лӕггады Павелы мадзӕлттӕй пайда кодта (2 Тим. 3:10–12).

¹⁷ Павел Тимофейы йӕхи бар нӕ ныууагъта, дарддӕр ӕй ахуыр кодта. Йемӕ дӕр ма йӕ акодта (Хъуыд. 16:1–5). Уӕдӕ хистӕр нӕлгоймӕгтӕ ӕмбырдӕй искӕй куы бӕрӕг кӕной, уӕд сӕ бон у кӕцыдӕр уавӕрты, кӕстӕриуӕггӕнӕг ӕфсымӕртӕй хъӕугӕ миниуджытӕ кӕмӕ ис, уыдоны семӕ акӕнын. Ӕмӕ уыцы ӕфсымӕртӕ куы уыной, цӕстдарджытӕ иннӕты ахуыр кӕнынмӕ куыд арӕхсынц, цы фидар уырнындзинад сын ис, куыд фӕразон сты ӕмӕ иннӕты куыд уарзынц, уӕд уыдон дӕр уыцы миниуджытыл ахуыр кӕндзысты ӕмӕ «Хуыцауы дзугӕн» суыдзысты хорз фыййӕуттӕ (1 Пет. 5:2).

18. Ӕмбырды иннӕты ахуыр кӕнын ахсджиагыл цӕмӕн хъуамӕ нымайӕм?

¹⁸ Ацы фӕстаг бонты иннӕты ахуыр кӕнын уӕлдай ахсджиаг у, уымӕн ӕмӕ ӕмбырдты нымӕц дӕр ӕмӕ куыст дӕр фылдӕр кӕны. Нӕ бон у Йесо ӕмӕ Павелы бафӕзмын, иннӕты куыд ахуыр кодтой, уымӕй. Йегъовӕйы фӕнды, цӕмӕй йӕ лӕггадгӕнджытӕ хорз арӕхсой сӕ хӕстӕ ӕххӕст кӕнынмӕ. Ӕмӕ нын бабар кодта, цӕмӕй ногтӕн дӕр ӕххуыс кӕнӕм, ӕмӕ фӕлтӕрдджындӕр кӕной. Ӕгас дунейы уавӕртӕ фыддӕр кӕнынц, ӕмӕ фӕзыны ног фадӕттӕ хорз хабар хъусын кӕнынӕн. Уымӕ гӕсгӕ иннӕты ахуыр кӕнын ӕнӕмӕнг хъӕуы ӕмӕ уыцы хъуыддагыл фӕстиат кӕнӕн нӕй.

19. Дӕ бон фидарӕй цӕмӕн у зӕгъын, ӕмӕ, иннӕты куы ахуыр кӕнай, уӕд дӕ фыдӕбон дзӕгъӕлы нӕ уыдзӕн?

¹⁹ Кӕй зӕгъын ӕй хъӕуы, иннӕты ахуыр кӕнын ӕнцон нӕу, стӕй уымӕн рӕстӕг дӕр хъӕуы. Фӕлӕ нын Йегъовӕ ӕмӕ Йесо ӕххуыс кӕндзысты ӕмӕ нын дӕтдзысты зонд, цӕмӕй уыцы хъуыддагмӕ арӕхсӕм. Ӕмӕ, кӕмӕн ӕххуыс кӕнӕм, уыдон куыд фыдӕбон кӕнынц ӕмӕ ӕппӕт хъарутӕй куыд архайынц, уый уынгӕйӕ цин кӕндзыстӕм (1 Тим. 4:10). Уӕдӕ нӕхӕдӕг дӕр хъуамӕ дарддӕр архайӕм, цӕмӕй нын Хуыцауы хъуыддаджы фылдӕр ӕнтыса, чырыстон миниуджытыл кусӕм ӕмӕ Йегъовӕмӕ ӕввахсдӕр кӕнӕм.