«Хъӕбатыр... у ӕмӕ хъуыддагмӕ бавнал»
«Хъӕбатыр ӕмӕ фидар у ӕмӕ хъуыддагмӕ бавнал. Ӕппындӕр мацӕмӕй тӕрс, уымӕн ӕмӕ Йегъовӕ... демӕ ис» (1 АЗ. 28:20).
1, 2. а) Йегъовӕ Соломонӕн йӕ бӕрны цавӕр стыр хъуыддаг бакодта? б) Давид Соломоныл цӕмӕн мӕт кодта?
ЙЕГЪОВӔ Соломонӕн йӕ бӕрны бакодта стыр ӕмӕ ахсджиаг хъуыддаг. Хъуамӕ Иерусалимы сарӕзтаид кувӕндон. Ахӕм диссаджы агъуыстытӕ арӕзт бирӕ не ’рцыд. Уыцы кувӕндон хъуамӕ «ахӕм стыр ӕмӕ ахӕм рӕсугъд» уыдаид, ӕмӕ йӕ кой хъуамӕ ӕппӕт бӕстӕтыл дӕр айхъуыстаид. Уымӕй ахсджиагдӕр та уыд, уыцы кувӕндон кӕй хъуамӕ суыдаид «ӕцӕг Хуыцау Йегъовӕйы хӕдзар» (1 Аз. 22:1, 5, 9–11).
2 Паддзах Давид ӕппындӕр нӕ дызӕрдыг кодта, Хуыцау Соломонӕн кӕй ӕххуыс кӕндзӕн, ууыл. Фӕлӕ Соломон уыд «ӕрыгон ӕмӕ ӕвӕлтӕрд». Цымӕ кувӕндон саразынмӕ йӕ ныфс бахӕсдзӕн? Ӕви, ӕрыгон ӕмӕ ӕвӕлтӕрд кӕй у, уый йӕ бахъыгдардзӕн? Цӕмӕй Соломон ӕнтыстджын уыдаид, уый тыххӕй хъуамӕ уыдаид хъӕбатыр ӕмӕ хъуыддагмӕ бавнӕлдтаид.
3. Соломон йӕ фыды цардыл хъуыды кӕнгӕйӕ хъӕбатырдзинады тыххӕй цы базыдтаид?
3 Хъӕбатырдзинад цы у, уый тыххӕй Соломон, ӕвӕццӕгӕн, йӕ фыды цардыл хъуыды кӕнгӕйӕ бирӕ базыдта. Давид-иу хӕрзӕрыгонӕй йӕ фыды фыстӕ куы хызта, уӕд-иу, фыстӕм чи лӕбурдта, уыцы хъӕддаг сырдты амардта (1 Сам. 17:34, 35). Стӕй ма стыр хъӕбатырдзинад равдыста, уӕйыджы йас фӕлтӕрдджын хӕстон Голиафы ныхмӕ куы рацыд, уӕд дӕр. Ӕмӕ йын Хуыцау баххуыс кодта, цӕмӕй йӕ иу лӕгъз дурӕй амардтаид (1 Сам. 17:45, 49, 50).
4. Соломоны хъӕбатырдзинад цӕмӕн хъуыди?
4 Уӕдӕ Давидӕй хуыздӕр Соломоны ныфс чи хъуамӕ бауагътаид. (Бакӕс 1 Азфыстыты 28:20.) Соломонмӕ фаг хъӕбатырдзинад куы нӕ разындаид ӕмӕ куы фӕтарстаид, уӕд йӕ бон ӕппындӕр ницы уыдаид саразын. Ӕмӕ уӕд уый уыдаид, хъуыддагмӕ куы бавнӕлдтаид, фӕлӕ йын дзы уый фӕстӕ куы ницы рауадаид, уымӕй фыддӕр.
5. Хъӕбатырдзинад нӕ цӕмӕн хъӕуы?
5 Соломонау мах дӕр хъӕуы Йегъовӕйы ӕххуыс, цӕмӕй уӕм хъӕбатыр ӕмӕ-иу, цы нын бахӕс кӕна, уый саразӕм. Цӕй ӕмӕ ӕркӕсӕм, рагзаманты хъӕбатыр ӕмӕ ныфсхаст чи разынд, цалдӕр ахӕм адӕймаджы цӕвиттонмӕ. Уый фӕстӕ та ахъуыды кӕндзыстӕм, махӕн нӕ бон куыд у хъӕбатырдзинад ӕвдисын, стӕй цы хъӕуы, цӕмӕй-иу хъуыддаг кӕронмӕ саразӕм.
УЫДОН УЫДЫСТЫ ХЪӔБАТЫР АДӔЙМӔГТӔ
6. Иосифы хъӕбатырдзинады тыххӕй цы зӕгъис?
6 Потифары ус Иосифы куы рӕдийын кодта, уӕд Иосиф равдыста хъӕбатырдзинад. Ӕвӕццӕгӕн ӕй ӕмбӕрста, куы нӕ йын сразы уа, уӕд йӕ цардӕн дӕр тӕссаг кӕй уыдзӕн. Фӕлӕ уӕддӕр фидар фӕлӕууыд ӕмӕ уыцы сылгоймагӕй ӕнӕ ракӕ-бакӕйӕ алыгъд (Райд. 39:10, 12).
7. Раав хъӕбатырдзинад куыд равдыста? (Кӕс нывмӕ статьяйы райдианы.)
7 Иерихоны чи цард, уыцы Раав дӕр равдыста хъӕбатырдзинад. Израилаг сгарджытӕ йӕм куы бацыдысты, цӕмӕй йӕм ӕхсӕвы ӕрлӕууыдаиккой, уӕд гӕнӕн уыд, ӕмӕ фӕтарстаид, уыцы адӕмы тыххӕй йӕхи фыдбылызы кӕй баппардзӕн, уымӕй ӕмӕ сын ма баххуыс кодтаид. Фӕлӕ йӕ ныфс Йегъовӕйыл кӕй дардта, уый фӕрцы хъӕбатырдзинад равдыста: уыцы дыууӕ лӕджы бамбӕхста ӕмӕ сын стӕй баххуыс кодта горӕтӕй алидзынӕн (Йес. Н. 2:4, 5, 9, 12–16). Раавы уырныдта, Йегъовӕ ӕцӕг Хуыцау кӕй у ӕмӕ уыцы зӕхх израилӕгты къухмӕ ӕнӕмӕнг кӕй ратдзӕн. Уый адӕмӕй кӕнӕ Иерихоны паддзахӕй ӕмӕ йе ’рвыст лӕгтӕй куы фӕтарстаид, уӕд йӕ бон ӕппындӕр ницы уыдаид бакӕнын. Фӕлӕ Раав архайдта хъӕбатырӕй, ӕмӕ йӕхи дӕр ӕмӕ йӕ бинонты дӕр фервӕзын кодта (Йес. Н. 6:22, 23).
8. Йесо хъӕбатыр кӕй уыд, уый йӕ апостолтыл куыд фӕзынд?
8 Йесойы иузӕрдион апостолтӕ дӕр-иу стыр хъӕбатырдзинад равдыстой. Уыдон ууыл Йесойӕ сахуыр сты (Матф. 8:28–32; Иоан. 2:13–17; 18:3–5). Кӕд саддукейтӕ апостолты Йесойы тыххӕй хъусын кӕнын нӕ уагътой, уӕддӕр уыдон нӕ фӕтарстысты ӕмӕ сӕ куыст нӕ ныууагътой (Хъуыд. 5:17, 18, 27–29).
9. 2 Тимофеймӕ 1:7 стих куыд ӕмбарын кӕны, хъӕбатырдзинад нӕм цӕй фӕрцы уыдзӕн, уый?
9 Иосиф, Раав, Йесо ӕмӕ апостолтӕн сӕ фидар фӕнд уыд, раст цы уыд, уый кӕй араздзысты. Уыдон хъӕбатыр ӕмӕ ныфсхаст уыдысты, сӕ ныфс сӕхиуыл нӕ, фӕлӕ Йегъовӕйыл кӕй дардтой, уый фӕрцы. Хъӕбатырдзинад нӕ кӕм бахъӕуы, уыцы уавӕрты мах дӕр хъуамӕ нӕ ныфс нӕхиуыл ма дарӕм, фӕлӕ Йегъовӕйыл. (Бакӕс 2 Тимофеймӕ 1:7.) Ӕркӕсӕм, хъӕбатырдзинад нӕ бинонты царды ӕмӕ ӕмбырды хъуыддӕгты кӕм бахъӕуы, уымӕ.
ХЪӔБАТЫРДЗИНАД КӔД БАХЪӔУЫ
10. Ӕрыгон чырыстӕтты хъӕбатырдзинад цӕмӕн фӕхъӕуы?
10 Йегъовӕйӕн лӕггад кӕнгӕйӕ ӕрыгӕтты бирӕ уавӕрты бахъӕуы хъӕбатырдзинад равдисын. Уыдонӕн сӕ бон у Соломоны бафӕзмын. Цӕмӕй кувӕндон сарӕзтаид, уый тыххӕй-иу ӕй бахъуыди уынаффӕтӕ хӕссын, ӕмӕ цӕмӕй раст уынаффӕтӕ уыдаиккой, уый тыххӕй та йӕ хъуыди хъӕбатырдзинад. Кӕд ӕрыгӕттӕн сӕ ныййарджытӕ зонд фӕамонынц, ӕмӕ уый сӕ хӕс дӕр у, уӕддӕр сӕхи дӕр бахъӕуы ахсджиаг уынаффӕтӕ хӕссын (Ӕмб. 27:11). Зӕгъӕм, фӕхъӕуы сӕ ӕмбӕлттӕ, ирхӕфсӕнтӕ равзарын, ӕнӕгъдау хъуыддӕгтӕй сӕхи хизын, стӕй, донаргъуыд кӕд райсдзысты, уый аскъуыддзаг кӕнын. Цӕмӕй ахӕм хъуыддӕгты раст уынаффӕтӕ рахӕссой, уый тыххӕй сӕ хъӕуы хъӕбатырдзинад. Цӕмӕн? Уымӕн, ӕмӕ афтӕмӕй цӕуынц Хӕйрӕджы ныхмӕ, Хуыцауы ӕмӕ йын йӕ закъӕттӕ чи фауы, уый ныхмӕ.
11, 12. а) Моисей хъӕбатырдзинад куыд равдыста? б) Ӕрыгӕттӕн сӕ бон куыд у Моисейы бафӕзмын?
11 Ӕрыгӕтты ма фӕхъӕуы иу ахсджиаг уынаффӕ рахӕссын – сӕ разы цавӕр нысӕнттӕ сӕвӕрдзысты, уый аскъуыддзаг кӕнын. Иуӕй-иу бӕстӕты ӕрыгӕтты разӕнгард кӕнынц уӕлдӕр ахуырад райсынмӕ ӕмӕ сын хорз кӕм фиддзысты, ахӕм куыст ссарынмӕ. Ӕндӕр бӕстӕты та экономикӕ ӕвзӕр уавӕры кӕй ис, уый тыххӕй ӕрыгӕттӕ, чи зоны, хъуыды кӕной, бирӕ кӕй хъуамӕ кусой, цӕмӕй сӕ бинонтӕн ӕххуыс кӕной. Кӕд ды дӕр ацы дыууӕ уавӕрӕй искӕцыйы дӕ, уӕд ахъуыды кӕн Моисейы цӕвиттоныл. Моисейы схъомыл кодта фараоны чызг, ӕмӕ йӕ бон уыд йӕ хъарутӕ уымӕ саразын, цӕмӕй тынг схъӕздыг уыдаид кӕнӕ стыр ӕмӕ кадджын бынат бацахстаид. Ахъуыды-ма кӕн, Египеты йын йӕ бинонтӕ, йӕ ахуыргӕнджытӕ ӕмӕ зондджын лӕгтӕ уыцы хъуыдытӕ куыд тынг хъардтаиккой! Фӕлӕ йӕм ахӕм ныфс ӕмӕ хъӕбатырдзинад разынд, ӕмӕ аскъуыддзаг кодта, Хуыцауы адӕмимӕ кӕй уыдзӕн. Моисей Египет йе ’ппӕт хӕзнатимӕ куы ныууагъта, уӕд йӕ ныфс сӕвӕрдта Йегъовӕйыл (Дзут. 11:24–26). Ӕмӕ йӕ Йегъовӕ дӕр стыр арфӕдзинӕдтӕй схайджын кодта, фидӕны та йын ноджы тынгдӕр раарфӕ кӕндзӕн.
12 Ӕрыгӕттӕм уыйбӕрц ныфс куы разына, цӕмӕй Йегъовӕйы хъуыддаджы сӕ разы нысӕнттӕ сӕвӕрой, ӕмӕ сӕ царды Хуыцауы Паддзахад фыццаг бынаты куы уа, уӕд сын Йегъовӕ раарфӕ кӕндзӕн. Стӕй сын фӕстӕдӕр сӕхи бинонтӕ куы уа, уӕд сын баххуыс кӕндзӕн, цӕмӕй сӕ сӕ бон фӕдарын уа. Фыццаг ӕнусы ӕрыгон Тимофейӕн йӕ царды сӕйраг уыд Хуыцауӕн лӕггад кӕнын, ӕмӕ дӕуӕн дӕр дӕ бон у ахӕм цард равзарын *. (Бакӕс Филиппӕгтӕм 2:19–22.)
Дӕ царды алы фӕзилӕны дӕр хъӕбатырдзинад ӕвдисдзынӕ? (кӕс 13–17 абзацтӕ)
13. Иу ӕрыгон хойы хъӕбатырдзинад цӕмӕн хъуыди?
13 Иу хойы Алабамӕйӕ (АИШ) бахъуыди хъӕбатырдзинад, цӕмӕй Хуыцауы хъуыддаджы йӕ разы нысӕнттӕ сӕвӕрдтаид. Уый ныффыста: «Гыццылӕй фӕстӕмӕ тынг ӕфсӕрмыгӕнаг уыдтӕн. Паддзахады залы-иу мын тынг зын уыд адӕмимӕ ныхас кӕнын. Уымӕй зындӕр та-иу мын уыди бынтон ӕнӕзонгӕ адӕмы дуар бахойын». Фӕлӕ йӕ ныййарджыты фӕрцы ӕмӕ хотӕ ӕмӕ ’фсымӕрты фӕрцы йӕ нысан йӕ къухы бафтыд – сси пионер. Уыцы хо ма ноджыдӕр ныффыста: «Хӕйрӕджы дуне адӕмы ахӕм зондыл аразы, зӕгъгӕ, адӕймаг хъуамӕ уӕлдӕр ахуырад райса, хъуамӕ йын царды исты бантыса, хъуамӕ йӕм уа бирӕ ӕхца ӕмӕ бирӕ алыхуызон дзауматӕ. Фӕлӕ адӕмӕн арӕх уыцы нысӕнттӕ сӕ къухы нӕ бафтынц, ӕмӕ уӕд фӕфыдӕнхъӕл вӕййынц ӕмӕ масты хай бавӕййынц. Йегъовӕйӕн кӕй лӕггад кӕнын, уый та мын стыр циндзинад хӕссы ӕмӕ тынг амондджын дӕн».
14. Чырыстон ныййарджыты хъӕбатырдзинад кӕд фӕхъӕуы?
14 Чырыстон ныййарджыты дӕр хъӕуы хъӕбатырдзинад. Зӕгъӕм дӕ дӕ куысты хицау фылдӕр рӕстӕг кусын кӕны, бинонты ахуыр ӕмӕ дын ӕмбырдтӕ кӕд вӕййы ӕмӕ хъусын кӕнынмӕ кӕд фӕцӕуыс, уыцы бонты. Уӕд дӕ хъӕуы хъӕбатырдзинад, цӕмӕй ма сразы уай ӕмӕ афтӕмӕй дӕ сывӕллӕттӕн дӕр фӕзминаг уай. Кӕнӕ та, зӕгъӕм, ӕмбырды иуӕй-иу ныййарджытӕ сӕ сывӕллӕтты цавӕрдӕр хъуыддӕгтӕ кӕнын уадзынц, дӕу та нӕ фӕнды, цӕмӕй дӕ сывӕллӕттӕ уыцы хъуыддӕгтӕ аразой. Уыцы ныййарджытӕ дӕ куы бафӕрсой, цӕуылнӕ сӕ уадзыс, зӕгъгӕ, уӕд дӕм фаг хъӕбатырдзинад разындзӕн, цӕмӕй сын ӕй уӕзданӕй бамбарын кӕнай?
15. Псалом 37:25 стих ӕмӕ Дзуттӕгтӕм 13:5 стих ныййарджытӕн куыд баххуыс кӕндзысты?
15 Йӕ сывӕллӕттӕн чи ӕххуыс кӕны, цӕмӕй Хуыцауы хъуыддаджы сӕ разы нысӕнттӕ ӕвӕрой ӕмӕ-иу сӕ къухы бафтой, уыцы ныййарджытӕ ӕвдисынц хъӕбатырдзинад. Зӕгъӕм, иуӕй-иу ныййарджытӕ сӕ сывӕллӕтты нӕ фӕразӕнгард кӕнынц пионерӕй кӕнӕ Вефилы, йе та, хъусынгӕнджытӕ кӕм нӕ фаг кӕны, уым лӕггад кӕнынмӕ, кӕнӕ Паддзахады залтӕ ӕмӕ Конгрессты залтӕ аразынмӕ. Чи зоны, тӕрсынц, зӕрондӕй сӕм сӕ сывӕллӕтты бон кӕсын куы Псалом 37:25; Дзуттӕгтӕм 13:5.) Ахӕм ныййарджытӕ сӕ сывӕллӕттӕн дӕр ӕххуыс кӕнынц, цӕмӕй хъӕбатыр уой (1 Сам. 1:27, 28; 2 Тим. 3:14, 15).
нӕ уа, уымӕй. Фӕлӕ ӕмбаргӕ ныййарджытӕ хъӕбатырдзинад ӕвдисынц ӕмӕ сӕ уырны, Йегъовӕ зӕрдӕ цӕмӕй бавӕрдта, уый кӕй сараздзӕн. (Бакӕс16. Иуӕй-иу ныййарджытӕ сӕ сывӕллӕттӕн куыд ӕххуыс кӕнынц Хуыцауы хъуыддаджы сӕ разы нысӕнттӕ ӕвӕрынӕн? Уый сӕ сывӕллӕттӕн цы пайда хӕссы?
16 Иугонд Штаттӕй иу ӕфсымӕр радзырдта, йӕ бинойнагимӕ сӕ сывӕллӕттӕн куыд баххуыс кодтой, цӕмӕй сӕ разы Хуыцауы хъуыддаджы нысӕнттӕ сӕвӕрдтаиккой, уый тыххӕй: «Нӕ сывӕллӕттӕ цалынмӕ къахӕй ауадысты ӕмӕ дзурын сахуыр сты, уӕдмӕ дӕр-иу сын дзырдтам, пионерӕй лӕггад кӕнын ӕмӕ ӕмбырдӕн лӕггад кӕнын цы стыр циндзинад хӕссы, уый тыххӕй. Ӕмӕ ныр уый у сӕ нысан». Йӕ ныхасмӕ ма бафтыдта, зӕгъгӕ, нӕ сывӕллӕттӕн ахӕм нысӕнттӕ кӕй ис ӕмӕ сӕ къухы кӕй бафтынц, уый фӕрцы сын ӕнцондӕр у, Хӕйрӕджы дунейы цы фӕлварӕнтӕ ис, уыдоны ныхмӕ фидар фӕлӕууын ӕмӕ се ’ргом здахын, ӕцӕгдӕр ахсджиаг цы у, уымӕ – Йегъовӕйӕн лӕггад кӕнынмӕ. Дыууӕ сывӕллоны кӕмӕн ис, иу ахӕм ӕфсымӕр дзуры: «Бирӕ ныййарджытӕ сӕ тыхтӕ ӕмӕ се ’хцатӕ не ’вгъау кӕнынц, цӕмӕй сӕ сывӕллӕттӕн исты бантыса спорты, хорз ахуырад райсой, йе та сахуыр уой музыкалон инструменттыл цӕгъдын кӕнӕ ныв кӕнын. Фӕлӕ уӕд цас ахсджиагдӕр у нӕ сывӕллӕттӕн ӕххуыс кӕнын, цӕмӕй сӕ къухы бафтой, Йегъовӕйы раз сын хорз ном кӕй фӕрцы уыдзӕн, ахӕм нысӕнттӕ, ӕмӕ уымӕн хъуамӕ нӕ тыхтӕ ӕмӕ не ’хцатӕ ма ӕвгъау кӕнӕм. Уыцы нысӕнттӕ сӕ къухы куыд ӕфтынц, уый уынын у стыр цины хос, стӕй ма уыцы арфӕдзинӕдтӕй цыма нӕхӕдӕг дӕр схайджын вӕййӕм, афтӕ вӕййӕм». Кӕд уӕ сывӕллӕттӕн ӕххуыс кӕнут, цӕмӕй Хуыцауы хъуыддаджы сӕ разы нысӕнттӕ сӕвӕрой ӕмӕ сӕ къухы бафтой, уӕд уын Йегъовӕ ӕнӕмӕнг раарфӕ кӕндзӕн.
ХЪӔБАТЫРДЗИНАД ӔМБЫРДЫ ХЪУЫДДӔГТЫ
17. Ӕмбырды хъуыддӕгты хъӕбатырдзинад кӕд фӕхъӕуы?
17 Хъӕбатырдзинад ма нӕ хъӕуы ӕмбырды хъуыддӕгты дӕр. Зӕгъӕм, хистӕр нӕлгоймӕгты хъӕуы хъӕбатырдзинад, уӕззау тӕригъӕдтимӕ баст хъуыддӕгтӕ куы февзарынц кӕнӕ, рынчындонмӕ чи бахауд ӕмӕ йӕ цард тӕссаг уавӕры кӕмӕн ис, уыцы хотӕ ӕмӕ ӕфсымӕртӕн куы феххуыс кӕнынц, уӕд. Иуӕй-иу хистӕр
нӕлгоймӕгтӕ фӕцӕуынц ахӕстӕттӕм, цӕмӕй уым адӕмимӕ Библи ахуыр кӕной ӕмӕ дзы ӕмбырдтӕ уадзой. Ӕмӕ цы зӕгъӕн ис, моймӕдзыд чи нӕу, уыцы хотӕй та? Уыдонӕн дӕр ис бирӕ фадӕттӕ хъӕбатырдзинад ӕвдисынӕн ӕмӕ Йегъовӕйӕн лӕггад кӕнынӕн. Сӕ бон у пионертӕй лӕггад кӕнын, хъусынгӕнджытӕ кӕм нӕ фаг кӕны, уырдӕм ацӕуын, проектты ӕмӕ арӕзтады бынӕттон хайад исты куы араза, уӕд уым ӕххуыс кӕнын ӕмӕ Хуыцауы Паддзахад хъусынгӕнджыты скъолайы сахуыр кӕнын. Кӕйдӕрты та фӕхонынц Галаады скъоламӕ дӕр.18. Ацӕргӕ хотӕн сӕ бон куыд у хъӕбатырдзинад ӕвдисын?
18 Нӕ ацӕргӕ хотӕ ӕмбырдӕн стыр арфӕдзинад сты, ӕмӕ сӕ мах тынг уарзӕм! Кӕд дзы кӕмӕндӕрты сӕ бон нал у, раздӕр цас арӕзтой, уыйбӕрц аразын, уӕддӕр сӕ бон у хъӕбатырдзинад ӕвдисын ӕмӕ ӕмбырдӕн алыхуызон хъуыддӕгты ӕххуыс кӕнын. (Бакӕс Титмӕ 2:3–5.) Зӕгъӕм, хистӕр нӕлгоймаг ацӕргӕ хойӕн куы зӕгъа, цӕмӕй ӕрыгон хоимӕ йӕ дарӕсы тыххӕй аныхас кӕна, уӕд ацӕргӕ хойы бахъӕудзӕн хъӕбатырдзинад. Уый ӕрыгон хойы уайдзӕфты бын нӕ фӕкӕндзӕн, фӕлӕ йын фӕлмӕнӕй зӕгъдзӕн, цӕмӕй ахъуыды кӕна, йӕ уӕлӕдарӕсы тыххӕй иннӕтӕ цы хъуыды кӕнынц, ууыл (1 Тим. 2:9, 10). Ацӕргӕ хотӕ иннӕтыл афтӕ куы тыхсой, уӕд ӕмбырд фидар кӕндзӕн.
19. а) Ӕфсымӕртӕн сӕ бон куыд у хъӕбатырдзинад равдисын? б) Филиппӕгтӕм 2:13 стих ӕмӕ 4:13 стих ӕфсымӕртӕн куыд баххуыс кӕндзысты, цӕмӕй хъӕбатыр суой?
19 Хистӕр нӕлгоймӕгтӕй уӕлдай ма ӕмбырды цы ’фсымӕртӕ ис, уыдоны дӕр фӕхъӕуы хъӕбатырдзинад ӕмӕ хъуыддагмӕ бавналын, ома архайын. Кӕстӕриуӕггӕнӕг ӕфсымӕртӕй ӕмӕ хистӕр нӕлгоймӕгтӕй лӕггад кӕнынмӕ цӕттӕ куы вӕййынц, уӕд уый ӕмбырдӕн стыр ӕххуыс вӕййы (1 Тим. 3:1). Фӕлӕ иуӕй-иутӕ ахӕм хӕстӕ ӕххӕст кӕнынмӕ сӕ ныфс нӕ фӕхӕссынц. Чи зоны, кӕддӕр ӕфсымӕр цавӕрдӕр рӕдыдтытӕ ӕруагъта, ӕмӕ йӕм ныр афтӕ кӕсы, ӕмӕ уый аккаг нӕу, цӕмӕй кӕстӕриуӕггӕнӕг ӕфсымӕрӕй кӕнӕ хистӕр нӕлгоймагӕй лӕггад кӕна. Кӕмӕдӕр та, чи зоны, афтӕ кӕсы, ӕмӕ йӕм уыцы хӕстӕ ӕххӕст кӕнынӕн фаг курдиӕттӕ нӕй. Кӕд ды дӕр афтӕ хъуыды кӕныс, уӕд дын Йегъовӕ баххуыс кӕндзӕн, цӕмӕй дӕ ныфс бацӕуа ӕмӕ мацӕмӕй тӕрсай. (Бакӕс Филиппӕгтӕм 2:13; 4:13.) Иуафон Моисеймӕ дӕр афтӕ каст, ӕмӕ йын Йегъовӕ цы бахӕс кодта, уый йӕ бон нӕ бауыдзӕн саразын (Рац. 3:11). Фӕлӕ йын Йегъовӕ баххуыс кодта, цӕмӕй дзы ныфс бацыдаид ӕмӕ, цы хъуыди, уый сарӕзтаид. Ӕфсымӕрӕн йӕ бон кӕм у ахӕм хъӕбатырдзинад ссарын? Йӕ бон у уый тыххӕй Йегъовӕмӕ кувын, Библи алы бон дӕр кӕсын ӕмӕ, Библийы цы хъӕбатыр адӕймӕгты кой ис, уыдоны цӕвиттонтыл хъуыды кӕнын. Стӕй йӕ бон у хистӕр нӕлгоймӕгтӕн сӕрныллӕгӕй зӕгъын, цӕмӕй йын бацамоной, ӕмбырды цы ӕмӕ куыд хъӕуы аразын. Ӕмӕ хъуамӕ бӕрӕг уа, ӕмбырды цыфӕнды хъуыддаджы дӕр баххуыс кӕнынмӕ цӕттӕ кӕй у, уый. Мах ӕфсымӕрты се ’ппӕты дӕр разӕнгард кӕнӕм, цӕмӕй хъӕбатыр уой ӕмӕ ӕмбырды хъуыддӕгты бирӕ фыдӕбон кӕной!
«ЙЕГЪОВӔ... ДЕМӔ ИС»
20, 21. а) Давид Соломонӕн йӕ зӕрдыл цы ’рлӕууын кодта? б) Хъӕбатырдзинад куы ’вдисӕм, уӕд нӕм цы ӕнхъӕлмӕ кӕсы?
20 Паддзах Давид Соломонӕн йӕ зӕрдыл ӕрлӕууын кодта, Йегъовӕ йемӕ кӕй уыдзӕн ӕмӕ йын кувӕндон саразынӕн кӕй баххуыс кӕндзӕн (1 Аз. 28:20). Соломон уыцы ныхӕстыл кӕй хъуыды кодта, уый фӕрцы, ӕрыгон ӕмӕ ӕвӕлтӕрд кӕй уыд, уый йӕ нӕ бакъуылымпы кодта. Фӕлӕ уый равдыста стыр хъӕбатырдзинад, хъуыддагмӕ бавнӕлдта, ӕмӕ Йегъовӕйы ӕххуысы фӕрцы уыцы диссаджы кувӕндон авд азы ӕмӕ ’рдӕгмӕ арӕзт фӕци.
21 Йегъовӕ Соломонӕн куыд ӕххуыс кодта, афтӕ махӕн дӕр ӕххуыс кӕндзӕн, цӕмӕй хъӕбатыр уӕм ӕмӕ нӕ бинонтимӕ ӕмӕ ӕмбырдимӕ баст хъуыддӕгтӕ аразӕм (Ис. 41:10, 13). Йегъовӕйӕн лӕггад кӕнгӕйӕ хъӕбатырдзинад куы ӕвдисӕм, уӕд нын ӕнӕмӕнг арфӕ кӕндзӕн абон дӕр ӕмӕ фидӕны дӕр. Уымӕ гӕсгӕ хъуамӕ хъӕбатыр уӕм ӕмӕ-иу хъуыддагмӕ бавналӕм.
^ 12 абз. Хуыцауы хъуыддаджы нысӕнттӕ ӕвӕрӕн куыд ис, уый тыххӕй хорз уынаффӕтӕ ссарӕн ис 2004 азы 15 июлы «Сторожевая башня»-йы, статьяйы «Пусть твои духовные цели прославляют Создателя».