1, 2. а) Йесо Хуыцауы закъонмӕ цы цӕстӕй каст? б) Чиныджыдӕснытӕ ӕмӕ фарисейтӕ Хуыцауы лӕвӕрд Закъон куыд сзыгъуыммӕ кодтой?

ЙЕСО уарзта Моисейы закъон. Ӕмӕ уый диссаг дӕр нӕу! Уыцы Закъон радта, Йесойӕн ӕппӕты зынаргъдӕр чи уыд, уый – йӕ Фыд Йегъовӕ. Йесо Хуыцауы закъон куыд тынг уарзта, уый бӕрӕг у, 40-ӕм псаломы 8-ӕм стихы чи ис фыст ӕмӕ Йесойыл чи сӕххӕст, уыцы ныхӕстӕй: «О мӕ Хуыцау, дӕ фӕндон ӕххӕст кӕнын мын у цины хос. Дӕ закъон ис мӕ зӕрдӕйы». Йесо ныхасӕй дӕр ӕмӕ хъуыддагӕй дӕр бӕлвырд кодта, Хуыцауы закъон ӕнаипп кӕй у, адӕймагӕн пайда кӕй хӕссы ӕмӕ дзы цыдӕриддӕр фыст ис, уый ӕнӕмӕнг кӕй сӕххӕст уыдзӕн (Матф. 5:17–19).

² Уӕдӕ Йесойӕн зын куыннӕ уыдаид, йӕ Фыды Закъон ын чиныджыдӕснытӕ ӕмӕ фарисейтӕ кӕй сзыгъуыммӕ кодтой, уый! Йесо сын загъта: «Битъынайӕ, хъонтхорайӕ ӕмӕ зирӕйӕ дӕсӕм хай дӕттут». Уыдон Закъоны ӕппӕты лыстӕгдӕр хабӕрттӕ тынг ӕнувыдӕй ӕххӕст кодтой. Фӕлӕ уым ӕвзӕрӕй цы уыд? Уый Йесо афтӕ бамбарын кодта: «Закъоны сӕйрагдӕр хъуыддӕгтӕ та – рӕстдзинад, фӕлмӕнзӕрдӕдзинад ӕмӕ иузӕрдиондзинад – ницӕмӕ дарут» (Матф. 23:23). Чиныджыдӕснытӕ ӕмӕ фарисейтӕн сӕйрагдӕр уыд сӕхи ӕрымысгӕ фӕдзӕхстытӕ ӕххӕст кӕнын, стӕй сӕхицӕй растдӕр никӕй ӕнхъӕлдтой. Уыдонӕй уӕлдай, Йесо ӕмбӕрста, Моисейы закъон цы уагӕвӕрдтыл арӕзт уыди, уыдон, стӕй  ма ӕмбӕрста, Закъоны алы фӕдзӕхстӕй дӕр Йегъовӕйы тыххӕй цы базонӕн ис, уый дӕр.

3. Ацы статьяйӕ цы базондзыстӕм?

³ Чырыстӕтты Моисейы закъон ӕххӕст кӕнын нӕ хъӕуы (Ром. 7:6). Фӕлӕ уӕддӕр Йегъовӕ уыцы Закъон Библийы ныффыссын кодта. Фӕнды йӕ, цӕмӕй Закъоны «сӕйрагдӕр хъуыддӕгтӕ», ома, йӕ фӕдзӕхстытӕ цы уагӕвӕрдтыл арӕзт сты, уыдон, ӕмбарӕм ӕмӕ сӕ ӕххӕст кӕнӕм. Зӕгъӕм, Моисейы закъоны ӕмбӕхсӕн горӕтты тыххӕй цы фыст уыди, уымӕй цавӕр уагӕвӕрдты тыххӕй у нӕ бон базонын? Айразмӕйы статьяйӕ базыдтам, адӕймаджы-иу барӕй чи нӕ амардта, уый цы саразын хъуыди ӕмӕ уымӕй цӕуыл ахуыр кӕнӕм. Фӕлӕ ма уыцы хабӕрттӕй бирӕ ис базонӕн Йегъовӕйы тыххӕй дӕр, стӕй йын йӕ миниуджытӕ куыд фӕзмӕм, уый тыххӕй дӕр. Ацы статьяйӕ дзуапп базондзыстӕм ӕртӕ фарстайӕн: Израилы ӕмбӕхсӕн горӕттӕ кӕй уыд, уымӕй Йегъовӕйы фӕлмӕнзӕрдӕдзинады тыххӕй цы ис базонӕн? Цы дзы ис базонӕн, цардмӕ цы цӕстӕй кӕсы, уый тыххӕй? Стӕй уыцы хабарӕй куыд у бӕрӕг, йӕ раст тӕрхонмӕ фау ӕрхӕссӕн кӕй нӕ вӕййы, уый? Ацы фарстатыл куы ныхас кӕнӕм, уӕд-иу ахъуыды кӕн, дӕ бон куыд у дӕ уӕларвон Фыды бафӕзмын, ууыл. (Бакӕс Ефесӕгтӕм 5:1.)

4, 5. а) Ӕмбӕхсӕн горӕттӕм ӕнцон лидзӕн цӕмӕн уыд? б) Уымӕй Йегъовӕйы тыххӕй цы ис базонӕн?

⁴ Израилы цы ӕхсӕз ӕмбӕхсӕн горӕты уыд, уыдонмӕ ӕнцон лидзӕн уыди. Йегъовӕ израилӕгтӕн загъта, цӕмӕй уыцы горӕттӕй ӕртӕ уыдаиккой Иорданы иу фарс, ӕртӕ та – иннӕ фарс. Цӕмӕн? Цӕмӕй-иу, адӕймаджы барӕй чи нӕ амардта, уымӕн уыцы горӕттӕй искӕцымӕ алидзын ӕнцондӕр уыдаид ӕмӕ-иу ӕм тагъддӕр бахӕццӕ уыдаид (Ным. 35:11–14). Уыцы горӕттӕм цы фӕндӕгтӕ кодтой, уыдон хорз цалцӕггонд уыдысты (Дык. з. 19:3). Дзуттаг ӕгъдӕутты тыххӕй фыст кӕм ис, иу ахӕм чиныджы дзырдӕуы, зӕгъгӕ, уыцы горӕттӕм цы фӕндӕгтӕ кодтой, уыдоныл уыд амонӕнтӕ, ӕмӕ-иу уый фӕрцы марӕгӕн горӕт ссарын ӕнцондӕр уыд. Ӕмбӕхсӕн горӕтмӕ алидзыны фадат ын кӕй уыд, уымӕ гӕсгӕ йӕ ӕцӕгӕлон бӕстӕйы йӕ сӕр ӕфснайын нӕ хъуыди. Ӕмӕ йын уый фӕрцы тӕссаг нӕ уыд, мӕнгхуыцӕуттӕн кувын кӕй райдайдзӕн, уымӕй дӕр.

⁵ Ахъуыды-ма кӕн: афтӕ чи загъта, лӕгмарӕн йӕхи дӕр амарын хъӕуы, зӕгъгӕ, уыцы Хуыцау батыхст, цӕмӕй, адӕймаджы барӕй чи нӕ амардта, уымӕн фӕтӕригъӕд кодтаиккой ӕмӕ йын йӕ цард бахъахъхъӕдтаиккой. Уыцы закъоны тыххӕй иу библииртасӕг ныффыста: «Алцыдӕр афтӕ бӕлвырд уыд, стӕй афтӕ хуымӕтӕг ӕмӕ афтӕ ӕнцон аразӕн, ӕмӕ уымӕй хуыздӕр ӕрхъуыды кӕнӕн нӕ уыди». Йегъовӕ дурзӕрдӕ тӕрхонгӕнӕг нӕу, ӕмӕ йӕ лӕггадгӕнджыты куыд карздӕр бафхӕра, уымӕ нӕ бӕллы. Уый у «фӕлмӕнзӕрдӕ Хуыцау» (Еф. 2:4).

6. Фарисейтӕ Йегъовӕйы фӕлмӕнзӕрдӕдзинад фӕзмыдтой? Бамбарын ӕй кӕн.

⁶ Фӕлӕ, Йегъовӕйӕ уӕлдай, фарисейтӕ фӕлмӕнзӕрдӕ нӕ уыдысты. Зӕгъӕм, дзуттаг ӕгъдӕутты  тыххӕй фыст кӕм ис, уыцы чингуытӕм гӕсгӕ, ӕртӕ хаттӕй фылдӕр уыцы иу тӕригъӕд чи ракодтаид, уымӕн ӕй нал ныххатыр кодтаикой. Фарисейтӕ уымӕй тынг кӕй рӕдыдысты, уый равдисынӕн Йесо радзырдта фӕсномыг ныхас, хъалонисӕджы раз Хуыцаумӕ чи куывта, ахӕм фарисейы тыххӕй. Фарисей куывта: «О Хуыцау, бузныг, ӕз иннӕты хуызӕн стигъӕг, фыдгӕнӕг, хӕтаг кӕй нӕ дӕн, науӕд мӕнӕ ацы хъалонисӕджы хуызӕн». Афтӕмӕй та уыцы хъалонисӕг Хуыцаумӕ сӕрныллӕгӕй куывта, цӕмӕй йын йӕ тӕригъӕдтӕ ныххатыр кодтаид. Цымӕ фарисейты иннӕтӕн хатыр кӕнын цӕуылнӕ фӕндыд? Уымӕн ӕмӕ «иннӕты... ницӕуыл нымадтой» (Лук. 18:9–14).

7, 8. а) Исчи дӕ куы фӕхъыг кӕна, уӕд дӕ бон куыд у Йегъовӕйы бафӕзмын? б) Цӕмӕй иннӕтӕн хатыр кӕнӕм, уый тыххӕй сӕрныллӕг цӕмӕн хъуамӕ уӕм?

⁷ Фарисейты нӕ, фӕлӕ Йегъовӕйы фӕзм. Иннӕты зын ӕмбар ӕмӕ фӕлмӕнзӕрдӕ у. (Бакӕс Колоссӕгтӕм 3:13.) Ахӕм миниуджытӕ дӕм куы уа, уӕд иннӕтӕн ӕнцон уыдзӕн дӕуӕй хатыр курын (Лук. 17:3, 4). Ахъуыды кӕн: «Чи мӕ фӕхъыг кӕны, уымӕн уайтагъд ӕмӕ ӕппӕт зӕрдӕйӕ ныххатыр кӕнын, кӕд мӕ арӕх фӕхъыг кӕны, уӕддӕр? Фӕфӕнды мӕ, цӕмӕй йемӕ бафидауон?»

⁸ Цӕмӕй иннӕтӕн хатыр кӕнӕм, уый тыххӕй хъуамӕ уӕм сӕрныллӕг. Фарисейтӕм сӕрныллӕгдзинадӕн йӕ кой дӕр нӕ уыд, уымӕн ӕмӕ иннӕтӕм уӕлейӕ дӕлӕмӕ кастысты. Фӕлӕ мах хъуамӕ «иннӕты... [нӕхицӕй] уӕлдӕр ӕвӕрӕм» (Фил. 2:3). Уӕдӕ нӕ бон у ахъуыды кӕнын: «Йегъовӕйы фӕзмын? Сӕрныллӕг дӕн?» Сӕрныллӕг куы уӕм, уӕд, немӕ бафидауынмӕ цы «фӕндаг» кӕны, ууыл ӕнцон цӕуӕн уыдзӕн. Тӕргай кӕнынмӕ-иу ма тагъд кӕн, фӕлӕ хатыр кӕнынмӕ (Еккл. 7:8, 9).

9. Цард табуйаг кӕй у, уый Йегъовӕ израилӕгтӕн куыд бамбарын кодта?

⁹ Ӕмбӕхсӕн горӕттӕ сӕйраджыдӕр уымӕн хъуыдысты, цӕмӕй израилӕгтыл ӕнаххос туг ма уыдаид (Дык. з. 19:10). Йегъовӕ цардӕн тынг аргъ кӕны, ӕмӕ йе сӕфт уыны, «ӕнаххос туг чи калы, ахӕм къухтӕй» (Ӕмб. 6:16, 17). Уый у рӕстаг ӕмӕ сыгъдӕг Хуыцау, ӕмӕ-иу кӕд исчи адӕймаджы барӕй нӕ амардта, уӕддӕр ахӕм хабармӕ йӕ бон ӕнцад кӕсын нӕ уыд. Кӕй зӕгъын ӕй хъӕуы, туджджынӕн-иу йӕ тӕригъӕд ныххатыр кодтой. Фӕлӕ-иу уӕддӕр хъуамӕ йӕ хабар хистӕр лӕгтӕн радзырдтаид. Ӕмӕ-иу, адӕймаджы барӕй кӕй нӕ амардта, уый куы сбӕлвырд, уӕд-иу хъуамӕ хистӕр сауджыны мӕлӕты онг ӕмбӕхсӕн горӕты цардаид. Уый та ууыл дзурӕг уыд, ӕмӕ, чи зоны, уым цӕрӕнбонтӕм баззадаид. Уыцы закъон Израилы адӕмӕн сӕ зӕрдыл лӕууын кодта, цард табуйаг кӕй у, уый. Израилӕгтӕн сӕ бон цыдӕриддӕр уыд, уый хъуамӕ арӕзтаиккой, цӕмӕй иннӕты цард тӕссаг уавӕры ма ӕппӕрстаиккой. Афтӕмӕй Царддӕттӕг Хуыцауӕн кад кодтаиккой.

10. Чиныджыдӕснытӕ ӕмӕ фарисейтӕ адӕймаджы цардӕн кӕй нӕ аргъ кодтой, уый Чырыстийы ныхӕстӕй куыд зыны?

¹⁰ Йегъовӕйӕ уӕлдай чиныджыдӕснытӕ ӕмӕ фарисейтӕ адӕймаджы цардӕн нӕ аргъ кодтой. Цӕмӕ гӕсгӕ ис афтӕ зӕгъӕн? Йесо сын загъта: «Сымах зонындзинӕдты дӕгъӕл уӕхи бакодтат. Уӕхӕдӕг дӕр нӕ бацыдыстут, ӕмӕ, бацӕуын кӕй фӕндыд, уыдоны дӕр нӕ бауагътат» (Лук. 11:52). Уыдон хъуамӕ адӕмӕн Хуыцауы Ныхас ӕмбарын кодтаиккой ӕмӕ сын ӕххуыс кодтаиккой ӕнусон цардмӕ фӕндаг ссарынӕн. Ӕмӕ сӕ уыдон та, «цардмӕ чи кӕны», уый фӕдыл цӕуын нӕ уагътой,  ӕмӕ сӕ афтӕмӕй сӕфтмӕ кодтой (Хъуыд. 3:15). Чиныджыдӕснытӕ ӕмӕ фарисейтӕ уыдысты сӕрбӕрзонд ӕмӕ хиуарзон, ӕмӕ сӕ иннӕты мӕт ӕппындӕр нӕ уыд. Ӕвӕдза, куыд дурзӕрдӕ уыдысты!

11. а) Апостол Павел цардӕн кӕй аргъ кодта, уый цӕмӕй бӕрӕг уыди? б) Хъусын кӕныны хъуыддагмӕ Павелы цӕстӕй цӕй фӕрцы кӕсдзыстӕм?

¹¹ Цы хъуамӕ аразӕм, цӕмӕй Йегъовӕйы фӕзмӕм ӕмӕ чиныджыдӕснытӕ ӕмӕ фарисейты хуызӕн ма суӕм? Хъуамӕ цардӕн аргъ кӕнӕм. Апостол Павел цардӕн кӕй аргъ кодта, уый бӕрӕг уыди, хорз хабар бӕстон кӕй хъусын кодта, уымӕй. Уымӕ гӕсгӕ йӕ бон уыд зӕгъын: «Ӕз ӕппӕт адӕмы тугӕй дӕр сыгъдӕг... дӕн». (Бакӕс Хъуыддӕгтӕ 20:26, 27.) Фӕлӕ Павел уый тыххӕй нӕ хъусын кодта, цӕмӕй йӕхи аххосджыныл ма нымадтаид кӕнӕ уый йӕ хӕс кӕй уыд, уый тыххӕй. Павел хорз хабар хъусын кодта, адӕмы кӕй уарзта ӕмӕ сӕ цард йӕ цӕсты зынаргъ кӕй уыд, уый тыххӕй (1 Кор. 9:19–23). Мах дӕр хъуамӕ цардмӕ Хуыцауы цӕстӕй кӕсӕм. Йегъовӕйы «фӕнды, цӕмӕй се ’ппӕтӕн дӕр уа ӕрфӕсмон кӕныны фадат» (2 Пет. 3:9). Дӕу та? Фӕлмӕнзӕрдӕ куы уӕм, уӕд адӕмӕн хорз хабар зынгзӕрдӕйӕ хъусын кӕндзыстӕм ӕмӕ нын уый стыр цины хос уыдзӕн.

12. Хуыцауы адӕм ӕдасдзинадмӕ уӕлӕнгай цӕстӕй цӕуылнӕ кӕсынц?

¹² Цӕмӕй афтӕ зӕгъӕн уа, ӕмӕ цардмӕ Йегъовӕйы цӕстӕй кӕсӕм, уый тыххӕй хъуамӕ архайӕм, нӕхи цардӕн дӕр ӕмӕ иннӕты цардӕн дӕр тӕссаг куыд мацӕмӕй уа, ууыл. Хъуамӕ алцыдӕр саразӕм, цӕмӕй нӕ машинӕйы ӕдасӕй цӕуӕн уа ӕмӕ нӕ куысты ӕдасӕй кусӕн уа. Уымӕ хъус дарын хъӕуы, Паддзахады залтӕ куы фӕаразӕм, куы сӕ фӕцалцӕг кӕнӕм кӕнӕ ӕмбырдтӕм куы фӕцӕуӕм, уӕд дӕр. Адӕмы цард, ӕдасдзинад ӕмӕ ӕнӕниздзинад ӕхца ӕмӕ рӕстӕгӕй зынаргъдӕр сты. Нӕ рӕстаг Хуыцау алкӕддӕр фӕаразы, раст цы у, уый. Ӕмӕ мах дӕр фӕнды афтӕ архайын. Хистӕр нӕлгоймӕгтӕ уӕлдай тынгдӕр хъуыды кӕнынц сӕхи ӕмӕ, семӕ чи фӕкусы, уыдоны ӕдасдзинадыл (Ӕмб. 22:3). Уӕдӕ дын хистӕр нӕлгоймаг ӕдасдзинады фӕдыл уынаффӕ куы ратта, уӕд-иу ӕм байхъус (Гал. 6:1). Цардмӕ Йегъовӕйы цӕстӕй кӕс, «цӕмӕй дыл туг ма уа».

13, 14. Израилы хистӕр лӕгтӕн сӕ бон Йегъовӕйау рӕстӕй архайын куыд уыд?

¹³ Йегъовӕ Израилы хистӕр лӕгтӕн бафӕдзӕхста, цӕмӕй йӕ раст уагӕвӕрдтӕм гӕсгӕ тӕрхон кодтаиккой. Лӕгмард-иу куы ’рцыд, уӕд-иу хистӕр лӕгтӕ хъуамӕ фыццаджыдӕр алцыдӕр сбӕлвырд кодтаиккой. Уый фӕстӕ-иу хъуамӕ лӕмбынӕг ахъуыды кодтаиккой, адӕймаджы чи амардта, уый афтӕ цӕмӕн бакодта, йӕ къухӕй чи амард, уымӕ цы зӕрдӕ дардта ӕмӕ раздӕр йемӕ куыд уыд, ууыл. Уый ӕнӕмӕнг уыди, цӕмӕй аскъуыддзаг кодтаиккой, лӕгмарӕн ныххатыр кӕнӕн ис ӕви нӕ. Хистӕр лӕгты-иу хъуыди базонын, туджджын иннӕ адӕймагӕй йе сӕфт уыдта ӕмӕ йӕ барӕй амардта ӕви нӕ, уый. (Бакӕс Нымӕцтӕ 35:20–24.) Кӕд-иу хабарӕн ӕвдисӕнтӕ уыд, уӕд-иу дыууӕйӕ къаддӕр хъуамӕ ма уыдаиккой (Ным. 35:30).

¹⁴ Хабар ӕцӕгдӕр куыд уыд, уый-иу хистӕр лӕгтӕ куы сбӕлвырд кодтой, уӕд-иу сӕ хъуыди ахъуыды кӕнын туджджынӕн йӕхиуыл дӕр, цы сарӕзта, ӕрмӕст ууыл нӕ, фӕлӕ. Хъуамӕ арфуынӕг уыдаиккой, цӕмӕй бамбӕрстаиккой, хабар афтӕ цӕмӕн рауад, уый. Сӕйраджыдӕр та сӕ хъуыди Йегъовӕйы сыгъдӕг тых. Уый фӕрцы сӕ бон уыдаид Йегъовӕйы фӕзмын, цӕмӕй уыйау арфуынӕг ӕмӕ фӕлмӕнзӕрдӕ уыдаиккой ӕмӕ рӕстӕй архайдтаиккой (Рац. 34:6, 7).

15. Йесо тӕригъӕдджынтӕм цы цӕстӕй каст, уый куыд хицӕн кодта, фарисейтӕ сӕм цы цӕстӕй кастысты, уымӕй?

¹⁵ Фарисейтӕ та кастысты, адӕймаг цы тӕригъӕд ракодта, ӕрмӕстдӕр уымӕ. Йӕ зӕрдӕйы цы уыд, уый мӕт сӕ ӕппындӕр нӕ уыди. Иухатт Йесойы Матфейы хӕдзары фынгыл бадгӕ куы федтой, уӕд ын йӕ ахуыргӕнинӕгты бафарстой: «Уӕ ахуыргӕнӕг хъалонисджытимӕ ӕмӕ тӕригъӕдджынтимӕ иу фынгыл цӕмӕн бады?» Ӕмӕ сын уӕд Йесо загъта: «Дохтыр рынчынты хъӕуы, ӕнӕниз чи у, уыдоны нӕ, фӕлӕ. Уӕдӕ ацӕут ӕмӕ уал базонут, цӕуыл дзурӕг сты ацы ныхӕстӕ: „Мӕн нывӕндтӕ нӕ хъӕуы, фӕлӕ, фӕлмӕнзӕрдӕ уат, уый“. Ӕз рӕстгӕнджыты ӕрхонынмӕ не ’рцыдтӕн, фӕлӕ тӕригъӕдджынты» (Матф. 9:9–13).  Цымӕ уый ууыл дзурӕг уыд, ӕмӕ адӕмы тӕригъӕдтӕм куыдфӕндыйы цӕстӕй каст? Нӕ, уый фӕндыд, цӕмӕй ӕрфӕсмон кодтаиккой. Ӕмӕ-иу хорз хабар куы хъусын кодта, уӕд-иу уый тыххӕй дӕр арӕх дзырдта (Матф. 4:17). Йесо ӕмбӕрста, уыцы «хъалонисджытӕ ӕмӕ тӕригъӕдджынтӕй» дӕр кӕйдӕрты кӕй фӕндыд аивын. Уыдон Матфеймӕ ӕнӕуи хӕрынмӕ не ’рбацыдысты. Уыдон дӕр цыдысты Йесойы фӕдыл (Мар. 2:15). Хъыгагӕн, фарисейтӕн сӕ фылдӕр адӕммӕ Чырыстийы цӕстӕй нӕ кастысты. Нӕ сӕ уырныдта, тӕригъӕдджын адӕймагӕн йӕ бон аивын кӕй у. Куыд тынг хицӕн кодта фарисейты цӕстӕнгас нӕ рӕстаг ӕмӕ нӕ фӕлмӕнзӕрдӕ Хуыцауы цӕстӕнгасӕй!

16. Тӕригъӕд чи ракодта, уый хъуыддаг ӕвзаргӕйӕ хистӕр нӕлгоймӕгты цы фӕхъӕуы бамбарын?

¹⁶ Абон хистӕр нӕлгоймӕгтӕ хъуамӕ фӕзмой, рӕстдзинад чи уарзы, уыцы Хуыцау Йегъовӕйы (Пс. 37:28). Фыццаг уал-иу хъуамӕ «раиртасой... ӕмӕ... бӕлвырд базоной», адӕймаг ӕцӕгдӕр тӕригъӕд ракодта ӕви нӕ. Уый-иу куы сбӕрӕг кӕной, уӕд-иу хъуамӕ хъуыддаг Библийы уагӕвӕрдтӕм гӕсгӕ равзарой (Дык. з. 13:12–14). Хъуыддаг ӕвзаргӕйӕ хистӕр нӕлгоймӕгтӕ хъуамӕ уой тынг лӕмбынӕг, цӕмӕй бамбарой, адӕймаг йӕ тӕригъӕдыл фӕсмон кӕны ӕви нӕ. Уый бамбарын алы хатт ӕнцон нӕ вӕййы. Адӕймаг кӕй фӕсмон кӕны, уый бӕрӕг вӕййы, цы сарӕзта, уымӕ цы цӕстӕй кӕсы, уымӕй ӕмӕ йӕ зӕрдӕйы уагӕй (Рарг. 3:3). Цӕмӕй йӕ тӕригъӕд хатыргонд ӕрцӕуа, уый тыххӕй хъуамӕ ӕппӕт зӕрдӕйӕ ӕрфӕсмон кӕна *.

17, 18. Адӕймаг ӕппӕт зӕрдӕйӕ фӕсмон кӕны ӕви нӕ, уый хистӕр нӕлгоймӕгтӕн сӕ бон куыд у базонын? (Кӕс нывмӕ статьяйы райдианы.)

¹⁷ Йегъовӕйӕ ӕмӕ Йесойӕ уӕлдай хистӕр нӕлгоймӕгтӕ зӕрдӕтӕ нӕ уынынц. Уӕдӕ кӕд хистӕр нӕлгоймаг дӕ, уӕд дӕ бон куыд у базонын, адӕймаг ӕппӕт зӕрдӕйӕ фӕсмон кӕны ӕви нӕ? Фыццаджыдӕр, Йегъовӕмӕ кув, цӕмӕй дын зонд ӕмӕ арфуынындзинад ратта (1 Пад. 3:9). Дыккаджы та, Хуыцауы Ныхас ӕмӕ ӕууӕнкджын цагъары публикацитӕм ӕркӕс, цӕмӕй бамбарай, «ацы дунейы адӕм куыд ӕрӕнкъард вӕййынц», уый цӕмӕй хицӕн кӕны, «Хуыцауы зӕрдӕмӕ куыд цӕуы, адӕймаг афтӕ куы ӕрӕнкъард вӕййы», уымӕй (2 Кор. 7:10, 11). Ахъуыды кӕн, йӕ тӕригъӕдтыл-иу чи ӕрфӕсмон кодта ӕмӕ-иу чи не ’рфӕсмон кодта, уыдоны тыххӕй Библийы цы фыст ис, ууыл. Хъуыддагмӕ-иу цы цӕстӕй ракастысты? Цавӕр хъуыдытӕ-иу сӕм уыд? Сӕхи-иу куыд дардтой?

¹⁸ Ӕртыккаджы та, ахъуыды кӕн адӕймагӕн йӕхиуыл, цы сарӕзта, ӕрмӕст ууыл нӕ, фӕлӕ. Цы уавӕрты схъомыл? Афтӕ цӕмӕн бакодта? Цавӕр зындзинӕдтыл ӕмбӕлы? Чырыстон ӕмбырды Сӕр Йесо куыд архайдзӕн, уый тыххӕй пехуымпар Исай ныффыста: «Цӕстӕй цы уына, уымӕ гӕсгӕ нӕ кӕндзӕн тӕрхон ӕмӕ, хъусӕй цы хъуса, уымӕ гӕсгӕ нӕ кӕндзӕн уайдзӕф. Уый мӕгуыртӕн кӕндзӕн ӕнӕхӕрам тӕрхон, зӕххыл цы сабыр адӕм ис, уыдоны пайдайӕн уайдзӕф кӕндзӕн рӕстӕй» (Ис. 11:3, 4). Хистӕр нӕлгоймӕгтӕ, сымах Йесо сӕвӕрдта, цӕмӕй йын йе ’мбырдмӕ уӕ хъус дарат, ӕмӕ уын баххуыс кӕндзӕн, йӕхӕдӕг куыд тӕрхон кӕны, афтӕ тӕрхон кӕнынӕн (Матф. 18:18–20). Мах тынг бузныг стӕм, зӕрдӕбынӕй ныл чи тыхсы, ахӕм хистӕр нӕлгоймӕгтӕ нын кӕй ис! Уыдон нын ӕххуыс кӕнынц, цӕмӕй кӕрӕдзимӕ фӕлмӕнзӕрдӕ уӕм ӕмӕ рӕстӕй архайӕм.

19. Ӕмбӕхсӕн горӕтты хабарӕй цӕуыл ахуыр кӕнӕм ӕмӕ дӕ уымӕ гӕсгӕ цы фӕнды аразын?

¹⁹ Моисейы закъонӕй уыд базонӕн «зонындзинӕдтӕ ӕмӕ рӕстдзинады... сӕйраг фӕзилӕнтӕ», ома дзы уыди базонӕн Йегъовӕ ӕмӕ йӕ рӕстаг уагӕвӕрдты тыххӕй (Ром. 2:20). Зӕгъӕм, ӕмбӕхсӕн горӕтты фӕдыл дзы цы фӕдзӕхстытӕ уыд, уыдонӕй хистӕр нӕлгоймӕгтӕ ахуыр кӕнынц «ӕцӕг рӕстдзинадмӕ гӕсгӕ тӕрхон кӕнын», стӕй дзы не ’ппӕт дӕр ахуыр кӕнӕм «кӕрӕдзийы ӕнувыд уарзтӕй уарзын ӕмӕ кӕрӕдзимӕ фӕлмӕнзӕрдӕдзинад ӕвдисын» (Зах. 7:9). Мах Моисейы закъон ӕххӕст кӕнын нӕ хъӕуы. Фӕлӕ Йегъовӕ нӕ аивта, ӕмӕ йын раст тӕрхон ӕмӕ фӕлмӕнзӕрдӕдзинад ныр дӕр тынг ахсджиаг сты. Ахӕм Хуыцауӕн лӕггад кӕнын стыр кад у. Цӕй ӕмӕ йын йӕ диссаджы миниуджытӕ фӕзмӕм ӕмӕ архайӕм, цӕмӕй алкӕддӕр не ’мбӕхсӕн уа!