ӔГАС зӕххыл дӕр хистӕр нӕлгоймӕгтӕ тынг аргъ кӕнынц, Хуыцауы адӕмы ’хсӕн сын цы кадджын хӕстӕ ис, уыдонӕн. Уыцы ӕфсымӕртӕ махӕн сты стыр арфӕдзинад! Фӕлӕ цалдӕр азы размӕ нӕ организаци скодта иу ивындзинад. Уыцы ивындзинадмӕ гӕсгӕ ацӕргӕ хистӕр нӕлгоймӕгтӕ хъуамӕ, ӕмбырды сын цы стыр хӕстӕ ис, уыдонӕй иуӕй-иутӕ ӕрыгондӕр хистӕр нӕлгоймӕгты бар бакодтаиккой.

Ног разамындмӕ гӕсгӕ, районон цӕстдарджытыл ӕмӕ, нӕ организацийы алыхуызон скъолатӕ чи фӕуадзы, уыдоныл 70 азы куы сӕххӕст вӕййы, уӕд уыцы хӕстӕ нал феххӕст кӕнынц. Уымӕй уӕлдай ма, зӕгъӕм, филиалы комитеты координатор кӕнӕ ӕмбырды хистӕр нӕлгоймӕгты советы координатор чи у, уыцы ӕфсымӕртыл 80 азы куы сӕххӕст вӕййы, уӕд сӕ хӕстӕ ӕрыгондӕр хистӕр нӕлгоймӕгты бар бакӕнынц. Цымӕ нӕ зынаргъ ацӕргӕ хистӕр нӕлгоймӕгтӕ уыцы ивындзинадмӕ цы цӕстӕй ракастысты? Уыдон равдыстой, Йегъовӕйыл дӕр ӕмӕ йӕ организацийыл дӕр иузӕрдион кӕй сты!

«Цы уынаффӕ рахастой, уыимӕ ӕз разы уыдтӕн,– загъта, 49 азы бӕрц филиалы комитеты координатор чи уыд, иу ахӕм ӕфсымӕр, Кен.– Уыцы ивындзинады тыххӕй куы базыдтон, уыцы райсом гыццыл раздӕр Йегъовӕмӕ куывтон, зӕгъын, координаторы хӕстӕ ӕрыгондӕр ӕфсымӕр куы ’ххӕст кӕнид, уӕд хуыздӕр уаид». Ӕгас зӕххыл дӕр иузӕрдион ацӕргӕ хистӕр нӕлгоймӕгты ныхӕстӕй куыд зыны, афтӕмӕй  уыдон дӕр уыцы ивындзинадмӕ раст цӕстӕй ракастысты. Фӕлӕ сын фыццаг ӕнцон нӕ уыд, уымӕн ӕмӕ ӕфсымӕртӕн лӕггад кӕнын тынг уарзынц.

«Уыцы ивындзинады тыххӕй куы базыдтон, уӕд мын иу гыццыл зын уыд»,– загъта, хистӕр нӕлгоймӕгты советы координатор чи уыд, иу ахӕм ӕфсымӕр, Эсперандио. Стӕй йӕ ныхӕстӕм бафтыдта: «Иннӕмӕй та, ме ’нӕниздзинад хӕрзтӕй кӕй нал уыд, уымӕ гӕсгӕ ӕмбӕрстон, мӕхи дзӕбӕх кӕнынӕн мӕ фылдӕр рӕстӕг кӕй хъӕуы». Эсперандио Йегъовӕйӕн ныр дӕр иузӕрдионӕй лӕггад кӕны. Ӕмӕ йе ’мбырды хотӕ ӕмӕ ӕфсымӕртӕ стыр арфӕдзинадыл нымайынц, ахӕм ӕфсымӕримӕ кӕй лӕггад кӕнынц, уый.

Ӕмӕ цы ис зӕгъӕн, цӕуӕг цӕстдарджытӕй бирӕ азты дӕргъы чи фӕлӕггад кодта ӕмӕ ныр се ’мбырдтӕн ӕндӕр хуызы чи ӕххуыс кӕны, уыдоны тыххӕй та? 38 азы цӕуӕг цӕстдарӕгӕй чи лӕггад кодта, иу ахӕм ӕфсымӕр, Аллан, загъта: «Уыцы хабар куы базыдтон, уӕд арвыцӕфау фӕдӕн». Фӕлӕ стӕй бамбӕрста, ӕрыгондӕр ӕфсымӕрты куы ахуыр кӕна, цӕмӕй сӕ хӕстӕ хорз ӕххӕст кӕной, уӕд уый се ’ппӕтӕн дӕр стыр пайда кӕй ӕрхӕсдзӕн. Ӕмӕ абоны онг Йегъовӕйӕн иузӕрдионӕй лӕггад кӕны.

Иу ӕфсымӕр, Расселл, лӕггад кодта цӕуӕг цӕстдарӕгӕй ӕмӕ нӕ организацийы скъолатӕ уагъта, ӕмӕ уыцы хӕстӕ ӕдӕппӕтӕй ӕххӕст кодта 40 азы дӕргъы. Расселл загъта, йӕ бинойнагимӕ ног ивындзинады тыххӕй куы базыдтой, уӕд фыццаг сӕ ныфс кӕй асаст. Стӕй ма загъта: «Нӕ лӕггадӕн тынг аргъ кодтам, стӕй нӕм афтӕ каст, ӕмӕ нӕм фаг тыхтӕ уыд, цӕмӕй дарддӕр дӕр нӕ хӕстӕ ӕххӕст кодтаиккам». Ныр Расселл ӕмӕ йӕ бинойнаг се ’мбырдӕн ӕххуыс кӕнынц, цӕуыл сахуыр сты ӕмӕ сӕм цы фӕлтӕрддзинад ис, уый фӕрцы, ӕмӕ хотӕ ӕмӕ ӕфсымӕртӕн семӕ лӕггад кӕнын ӕхсызгон у.

Кӕд ды уыцы ацӕргӕ хистӕр нӕлгоймӕгты уавӕры нӕ дӕ, уӕддӕр дын, 2 Самуилы чиныджы цы хабар фыст ис, уый се ’нкъарӕнтӕ бамбарынӕн баххуыс кӕндзӕн.

Ӕрхъуыды-ма кӕн, паддзах Давидӕн йӕ фырт Авессалом йӕ ныхмӕ куы рацыд, уыцы хабар. Уӕд Давид алыгъд Иерусалимӕй Маханаиммӕ, Иорданы цӕугӕдоны скӕсӕн фарсмӕ. Уым Давид ӕмӕ йӕ адӕм, цардӕн ӕнӕмӕнг цы хъӕуы, уыдӕттӕй цух уыдысты. Хъуыды йӕ кӕныс, уый фӕстӕ цы ’рцыд, уый?

Уыцы ран чи цард, ӕртӕ ахӕм нӕлгоймаджы Давидмӕ ӕмӕ йӕ адӕммӕ рӕдаудзинад равдыстой ӕмӕ сын хуыссӕнтӕ, хӕринӕгтӕ ӕмӕ алыхуызон мигӕнӕнтӕ ӕрбахастой. Сӕ иу уыди Верзели (2 Сам. 17:27–29). Давидӕн Авессаломӕй тӕссаг куы нал уыд, уӕд йӕ бон баци фӕстӕмӕ Иерусалиммӕ аздӕхын, ӕмӕ йӕ Верзели Иорданы цӕугӕдоны онг ахизын кодта. Давид ын загъта, цӕмӕй йемӕ Иерусалиммӕ ацыдаид, ӕмӕ йын зӕрдӕ бавӕрдта, хӕринагцух ӕй кӕй нӕ уадздзӕн. Фӕлӕ Верзели «тынг хъӕздыг лӕг уыд», ӕмӕ хӕринагхъуаг нӕ уыди. Ӕмӕ йӕ цымӕ уӕд Давид йемӕ цӕмӕн кодта? (2 Сам. 19:31–33). Ӕвӕццӕгӕн, уый тыххӕй, ӕмӕ йын йӕ хорз миниуджытӕ федта ӕмӕ йӕ ныфс уыд, хорз уынаффӕгӕнӕг ын кӕй уыдзӕн. Паддзахы хӕдзары цӕрын ӕмӕ лӕггад кӕнын стыр кад куыннӕ уыд!

Верзели уыди бонзонгӕ адӕймаг ӕмӕ йӕ уавӕрмӕ раст цӕстӕй каст. Уый паддзахӕн загъта, 80 азы йыл кӕй цӕуы, ӕмӕ стӕй йӕ ныхӕстӕм бафтыдта: «Ӕмӕ ма хорз ӕвзӕрӕй иртасын?» (2 Сам. 19:35). Цымӕ Верзелийы уымӕй цы зӕгъын фӕндыд? Верзели царды бирӕ цыдӕртӕ федта, ӕмӕ куырыхон  зонды хицау уыдаид. Ӕмӕ ма уыцы карӕнӕй дӕр йӕ бон уыдаид хорз уынаффӕтӕ дӕттын, зӕгъӕм, фӕстӕдӕр паддзах Ровоамӕн «хистӕр лӕгтӕ» куыд лӕвӕрдтой хорз уынаффӕтӕ, афтӕ (1 Пад. 12:6, 7; Пс. 92:12–14; Ӕмб. 16:31). Уӕдӕ Верзелийы ныхӕстӕ, ӕвӕццӕгӕн, ууыл дзурӕг уыдысты, ӕмӕ йыл азтӕ сӕ уӕз кӕй ӕруагътой, уый йе ’нӕниздзинадыл тынг фӕзынд. Верзели ской кодта, зӕронд кӕй у, уый тыххӕй хӕринаджы ад кӕй нал ӕмбары ӕмӕ хъусӕй ӕвзӕр кӕй хъусы (Еккл. 12:4, 5). Ӕмӕ паддзахӕн загъта, цӕмӕй йемӕ Иерусалиммӕ ӕрыгондӕр нӕлгоймаджы, Кимгамы, акодтаид. Кимгам, ӕвӕццӕгӕн, Верзелийӕн йӕ фырт уыди (2 Сам. 19:36–40).

Верзели кадджын хӕстӕ ӕххӕст кӕныныл не сразы, азтӕ йыл сӕ уӕз кӕй ӕруагътой, уый тыххӕй. Ӕмӕ уымӕй бӕрӕг у, йӕ уавӕрмӕ раст цӕстӕй кӕй каст. Статьяйы райдианы цы ивындзинады кой скодтам, уый дӕр адӕймаджы карыл баст у. Фӕлӕ, Верзелийы кой куы кӕнӕм, уӕд уым иу адӕймаджы уавӕртыл цыди дзырд, нӕ рӕстӕджы та ӕфсымӕрты уыцы уынаффӕ хӕсгӕйӕ бирӕты уавӕртыл хъуыди ахъуыды кӕнын. Бамбарын сӕ хъуыд, ӕгас зӕххыл дӕр цы иузӕрдион хистӕр нӕлгоймӕгтӕ ис, уыдонӕн хуыздӕр цы уыдзӕн, уый.

Уыцы ацӕргӕ ӕфсымӕртӕ сты бонзонгӕ, ӕмӕ бамбӕрстой, бирӕ рӕстӕг цы хӕстӕ ӕххӕст кодтой, уыдон ӕрыгондӕр ӕфсымӕрты бар куы бакӕной, уӕд Йегъовӕйы организаци дарддӕр дӕр кӕй рӕздзӕн. Ӕрыгондӕр ӕфсымӕрты фылдӕр хатт, хистӕр кары чи ис, уыцы ӕфсымӕртӕ ахуыр кодтой, Верзели йӕ фырты куыд ахуыр кодтаид, апостол Павел та – Тимофейы, раст афтӕ (1 Кор. 4:17; Фил. 2:20–22). Уыцы ӕрыгондӕр ӕфсымӕртӕ цӕуыл сахуыр сты, уый фӕрцы ныр сты «лӕвӕрттӕ», ӕмӕ сӕ бон у «Чырыстийы буар [ома ӕмбырд] фидар кӕнын» (Еф. 4:8–12, фип.; абар Нымӕцтӕ 11:16, 17, 29).

Ӕгас зӕххыл дӕр ӕмбырдты цы ацӕргӕ ӕфсымӕртӕ ис, уыдонӕй йӕ кадджын хӕстӕй кӕцыдӕртӕ ӕрыгондӕр ӕфсымӕрты бар чи бакодта, уыдонӕй бирӕтӕн сӕ бон у сӕ лӕггады ног фадӕттӕй пайда кӕнын кӕнӕ та цавӕрдӕр хъуыддӕгты фылдӕр архайын.

19 азы цӕуӕг цӕстдарӕгӕй чи лӕггад кодта, иу ахӕм ӕфсымӕр, Марко, загъта: «Мӕ уавӕртӕ кӕй фӕивтой, уый фӕрцы мын ныр фылдӕр рӕстӕг ис, цӕмӕй-иу ме ’мбырды хотӕн се ’нӕуырнӕг лӕгты бабӕрӕг кӕнон ӕмӕ-иу семӕ аныхас кӕнон».

Ӕндӕр ӕфсымӕр та, Жеральду, цӕуӕг цӕстдарӕгӕй лӕггад кодта 28 азы. Уый загъта: «Нӕ разы ног нысӕнттӕ сӕвӕрдтам, зӕгъӕм, чи ’рлӕмӕгъ, уыдонӕн ӕххуыс кӕнын ӕмӕ Библи фылдӕр адӕмимӕ ахуыр кӕнын райдайын». Жеральду куыд ныффыста, афтӕмӕй сын ныр йӕ бинойнагимӕ ис 15 Библийы ахуыры, стӕй, чи ’рлӕмӕгъ, уыцы хъусынгӕнджытӕй кӕмӕн ӕххуыс кодтой, уыдонӕй дӕр бирӕтӕ ногӕй ӕмбырдтӕм цӕуын райдыдтой.

Гыццыл раздӕр цы Алланы кой кодтам, уый ма загъта: «Ныр нын ис фадат, цӕмӕй алыхуызон уавӕрты фылдӕр хъусын кӕнӕм. Нӕ зӕрдӕмӕ цӕуы, бирӕ адӕм кӕм вӕййы, ахӕм рӕтты ӕмӕ куыстуӕтты хъусын кӕнын. Стӕй нӕ сыхӕгтӕн дӕр ӕхсызгонӕй фӕхъусын кӕнӕм. Дыууӕйӕ дзы ӕмбырды дӕр уыдысты».

Кӕд ды дӕр Йегъовӕйы организацийы цавӕрдӕр хӕстӕ нал ӕххӕст кӕныс, фӕлӕ раздӕрау иузӕрдион ӕмӕ арӕхстджын дӕ, уӕд дӕ бон у дӕ фӕлтӕрддзинады фӕрцы де ’мбырды ӕрыгондӕр ӕфсымӕрты ахуыр кӕнын ӕмӕ афтӕмӕй Йегъовӕйы хъуыддагӕн ӕххуыс кӕнын. «Нӕ организацийы ис замманай курдиатджын ӕрыгондӕр ӕфсымӕртӕ, ӕмӕ сӕ Йегъовӕ ахуыр кӕны ӕмӕ сын сӕ бӕрны алыхуызон хъуыддӕгтӕ бакӕны,– загъта, гыццыл раздӕр цы Расселлы кой кодтам, уый.– Уыдон ӕмбырдыл зӕрдиагӕй тыхсынц ӕмӕ йын разамынд дӕттынц, ӕмӕ уый хотӕ ӕмӕ ӕфсымӕртӕн се ’ппӕтӕн дӕр стыр ӕххуыс у!» (Кӕс рамкӕ « Ӕрыгондӕр ӕфсымӕртӕн ӕххуыс кӕн, цӕмӕй сын фылдӕр ӕнтыса».)

Кӕд дӕ уавӕр ӕрӕджы фӕивта, уӕд дарддӕр дӕр Хуыцауы хъуыддаджы зӕрдиагӕй архай. Ды ныронг дӕр бирӕтӕн баххуыс кодтай сӕ цард хуыздӕрырдӕм фӕивынӕн, ӕмӕ дӕ бон у дарддӕр дӕр ууыл архайын. Стӕй хотӕ ӕмӕ ӕфсымӕртӕн дӕр стыр ныфсы хос дӕ, ӕмӕ дӕ бирӕ уарзынц.

Ноджы ахсджиагдӕр та уый у, ӕмӕ Йегъовӕйы зӕрдӕйӕн дӕ зынаргъ. Уый дын «нӕ ферох кӕндзӕн  дӕ фыдӕбон ӕмӕ йын йӕ номмӕ цы уарзондзинад равдыстай, уый – ды лӕггад кодтай ӕмӕ ныр дӕр лӕггад кӕныс сыгъдӕджытӕн» (Дзут. 6:10). Ацы ныхӕстӕй бӕрӕг у, Йегъовӕйӕн тынг зынаргъ кӕй дӕ ӕмӕ дын ӕрмӕст дӕ раздӕры фыдӕбоны тыххӕй кӕй нӕ аргъ кӕны, фӕлӕ йын ныр дӕр зӕрдиагӕй кӕй лӕггад кӕныс, уый тыххӕй дӕр!

Кӕд, ацы статьяйы цы ацӕргӕ ӕфсымӕрты кой цӕуы, уыдонӕй нӕ дӕ, уӕддӕр уыцы ивындзинад, чи зоны, дӕуӕн дӕр дӕ лӕггадыл фӕзына. Цымӕ куыд?

Ахӕм иузӕрдион ацӕргӕ ӕфсымӕртимӕ ӕмгуыст кӕнгӕйӕ сӕ фӕлтӕрддзинадӕй бирӕ цӕуылдӕрты сахуыр уыдзынӕ. Уынаффӕ-иу сӕ ракур, стӕй-иу дӕ хъус дар, ног уавӕрты куыд иузӕрдионӕй лӕггад кӕнынц ӕмӕ сӕ фӕлтӕрддзинады фӕрцы иннӕтӕн куыд ӕххуыс кӕнынц, уымӕ.

Уӕдӕ дӕ кӕд дӕ хӕстӕ ӕндӕр искӕй бар бакӕнын бахъуыд, йе та кӕд де ’мбырды ахӕм ӕфсымӕр ис, уӕд дӕ рох ма уӕд: Йегъовӕ, бирӕ азты дӕргъы йын иузӕрдионӕй чи лӕггад кодта ӕмӕ йын ныр дӕр чи лӕггад кӕны, уыдонӕн тынг аргъ кӕны.