Ацы ран дзуттаг текст бамбарӕн ис афтӕ дӕр ӕмӕ афтӕ дӕр. Цӕй ӕмӕ ӕркӕсӕм, ацы стихтӕ ӕндӕрхуызон цӕмӕн ратӕлмац кодтам, уымӕ.

1. Ацы стихтӕ ногӕй куыд ратӕлмац кодтам, уый раст у дзуттаг ӕвзаджы ӕгъдӕуттӕ ӕмӕ растфыссынадмӕ гӕсгӕ. 144-ӕм псаломы 12-ӕм стихӕй 15-ӕм стихмӕ цы фыст ис, уый ӕмӕ сӕ размӕ стихты цы скъуыддзаг ис, уый кӕрӕдзиимӕ куыд баст сты, уый кӕнгӕ у, 12-ӕм стихы райдианы чи ис, уыцы дзуттаг дзырд ашер-ӕй. Фӕлӕ ацы дзырдӕн ис цалдӕр нысаниуӕджы. Зӕгъӕм, ратӕлмац кӕнӕн ӕй ис номивӕгӕй «уыдон». Ӕмӕ йӕ ацы стихы раздӕр афтӕ тӕлмац кодтам. Уымӕ гӕсгӕ афтӕ уади, ӕмӕ 12-ӕм стихӕй 14-ӕм стихмӕ цы хорздзинӕдты кой цӕуы, уыдон хауынц, уый размӕ стихты цы фыдгӕнӕг адӕмы кой цӕуы, уыдонмӕ. Фӕлӕ ма дзырд ашер, гӕнӕн ис, ӕмӕ амона, цавӕрдӕр хъуыддаг цӕмӕдӕр кӕй ӕркӕндзӕн, уымӕ, ӕмӕ йӕ ратӕлмац кӕнӕн ис дзырдтӕй «уымӕ гӕсгӕ», «гъемӕ» кӕнӕ «уӕд». Ӕмӕ 2013 азы уагъд тӕлмацы, стӕй ма ноджыдӕр ӕндӕр тӕлмацты ацы стихы ӕмбӕлы дзырд «уӕд».

2. Ацы стихтӕ ногӕй куыд ратӕлмац кодтам, уый хорз фидауы 144-ӕм псаломимӕ ӕнӕхъӕнӕй дӕр. Ныр 12-ӕм стихы дзырд «уӕд» кӕй ис, уымӕ гӕсгӕ, 12-ӕм стихӕй 14-ӕм стихмӕ цы хорздзинӕдты кой цӕуы, уыдон хауынц рӕстгӕнджытӕм – афтӕ чи дзуры, «ссӕрибар мӕ кӕн ӕмӕ мӕ фервӕзын кӕн ӕндӕрбӕстӕгты къухӕй», зӕгъгӕ, уыдонмӕ (11-ӕм стих). Уыцы ивындзинад ма фӕзынд 15-ӕм стихыл дӕр. Ныр дзы дыууӕ хъуыдыйады дӕр дзырд «амондджын» хауы уыцы иу адӕммӕ – «сӕ Хуыцау Йегъовӕ кӕмӕн у», уыдонмӕ. Зӕгъын ма хъӕуы уый дӕр, ӕмӕ дзуттаг ӕвзаджы ӕрхӕцӕн нысӕнттӕ, зӕгъӕм, дыкъӕдзгуытӕ, нӕй. Уымӕ гӕсгӕ, Библийы кӕцыдӕр стихы цавӕрдӕр дзырд куыд ратӕлмац кӕнын хъӕуы, уый бамбарыны тыххӕй тӕлмацгӕнджытӕ хъуамӕ сӕ хъус дарой дзуттаг ӕвзаджы поэтикон стильмӕ, контекстмӕ ӕмӕ, уыцы стихимӕ баст чи у, ӕндӕр ахӕм стихтӕм.

3. Ацы стихтӕ ногӕй куыд ратӕлмац кодтам, уый раст у, Библийы ӕндӕр рӕтты Хуыцау йӕ иузӕрдион лӕггадгӕнджытӕн зӕрдӕ цӕмӕй ӕвӕры, уымӕ гӕсгӕ. Дзырд ашер ӕндӕрхуызон кӕй ратӕлмац кодтам, уымӕ гӕсгӕ ныр ацы псаломӕй бӕрӕг у, чи йӕ ныффыста, уый, ома Давиды, ныфс цӕмӕй уыд, уый. Ныфс ӕй уыд, Хуыцау израилӕгты йе знӕгты къухӕй куы ссӕрибар кӕна, уӕд сын кӕй раарфӕ кӕндзӕн – амондджын кӕй уыдзысты ӕмӕ сӕм алцыдӕр парахатӕй кӕй уыдзӕн (Лев. 26:9, 10; Дык. з. 7:13; Пс. 128:1–6). Зӕгъӕм, Дыккаг закъоны 28:4 стихы фыст ис: «Арфӕгонд уыдзынӕ ӕмӕ дын уыдзӕн бирӕ зӕнӕг, тыллӕджы бӕркад ӕмӕ бирӕ фос – бирӕ стурвос ӕмӕ бирӕ лыстӕг фос». Ӕмӕ, Давиды фырт Соломон паддзах куы уыд, уыцы рӕстӕг раст афтӕ уыд – Израилы адӕм фӕрнӕйдзаг уыдысты ӕмӕ сӕм алцыдӕр уыд парахатӕй. Уымӕй уӕлдай ма, Соломоны рӕстӕг адӕм цы хорздзинӕдтӕй уыдысты хайджын, уыдон амыдтой, йӕ сӕргъы Мессийӕ ӕвӕрд кӕмӕн у, уыцы Паддзахад цы арфӕдзинӕдтӕ ӕрхӕсдзӕн, уыдонмӕ (1 Пад. 4:20, 21; Пс. 72:1–20).

Уӕвгӕ, 144-ӕм псаломы ахӕм ивындзинӕдтӕ арӕзт кӕй ӕрцыд, уый, Библийы ахуырӕдтӕ куыд ӕмбарын хъӕуы, ууыл никуыд фӕзынд. Фӕлӕ уый фӕрцы ныр ацы псаломӕй ноджы ирддӕрӕй зыны, Йегъовӕйы лӕггадгӕнджыты рагӕй фӕстӕмӕ дӕр ныфс цӕмӕй ис, уый – Хуыцау фыдгӕнджыты кӕй фесафдзӕн ӕмӕ рӕстгӕнджытӕ ӕнустӕм фӕрнӕйдзаг кӕй уыдзысты ӕмӕ сӕм алцыдӕр парахатӕй кӕй уыдзӕн (Пс. 37:10, 11).