Искуы хъуыды кодтай, дӕумӕ ӕмӕ дӕ бинонтӕм цавӕр фидӕн ӕнхъӕлмӕ кӕсы, ууыл? Хъӕздыгдзинад ӕви мӕгуырдзинад? Стыр уарзт ӕви иунӕджы цард? Бирӕ цӕрӕнбон ӕви гыццыл? Ацы фарстатыл адӕм хъуыды кӕнынц миназты дӕргъы.

Абон иртасджытӕ сӕ хъус дарынц, цард куыд ивы, уымӕ ӕмӕ рагацау фӕзӕгъынц, фидӕны цы уыдзӕн, уый. Ӕмӕ кӕд сӕ ныхӕстӕй бирӕтӕ сӕххӕст вӕййынц, уӕддӕр кӕмдӕрты фӕрӕдийынц, ӕмӕ уый аххосӕй адӕм фӕфыдӕнхъӕл вӕййынц. Зӕгъӕм, 1912 азы Гульельмо Маркони, радиотелеграф чи ӕрхъуыды кодта, уый, загъта: «Радиотелеграфийы фӕрцы хӕстытӕ нал уыдзӕн!» 1962 азы Битлзы зарджытӕ рауадзыныл чи не сразы, уыцы компани «Декка Рекордс»-ы хицау та загъта, тагъд гитаристты группӕтӕ модӕйы нал уыдзысты, зӕгъгӕ.

Фидӕны цы уыдзӕн, уый базоныны тыххӕй бирӕтӕ уынаффӕ фӕагурынц астрологтӕм. Стӕй бирӕ журналтӕ ӕмӕ газетты ӕдзухдӕр вӕййы гороскоптӕ. Иннӕтӕ та фӕфӕрсынц дӕсныты ӕмӕ экстрасенсты – къамтӕ, нымӕцтӕ кӕнӕ, адӕймаджы армытъӕпӕныл цы хӕххытӕ ис, уыдонмӕ гӕсгӕ, фидӕны цы уыдзӕн, уый чи «базоны», уыдоны.

Рагзаманты-иу фидӕн базонын кӕй фӕндыд, уыдонӕй иуӕй-иутӕ фарстой оракулты – афтӕ хуыдтой, цавӕрдӕр хуыцауы номӕй чи дзырдта, уыцы сауджынты кӕнӕ ус-сауджынты. Зӕгъӕм, иухатт, дам, Грецийы горӕт Дельфӕты цы оракул уыд, уымӕн Лидийы паддзах Крёз зынаргъ лӕвӕрттӕ арвыста, цӕмӕй йын загътаид, Персы паддзах Кирыл фӕуӕлахиз уыдзӕн ӕви нӕ. Оракул загъта, Крёз Киры ныхмӕ куы рацӕуа, уӕд «стыр паддзахад» кӕй ныппырх уыдзӕн. Гъемӕ Крёз ахъуыды кодта, ӕнӕмӕнг кӕй фӕуӕлахиз уыдзӕн, ӕмӕ Киримӕ схӕцыд. Фӕлӕ цы стыр паддзахад ныппырх, уый йӕхи паддзахад разынд!

Оракул цы загъта, уый бӕлвырд нӕ уыд – уыцы тохы чифӕнды ма фӕуӕлахиз уыдаид, уӕддӕр йӕ ныхӕстӕ раст разындаиккой. Крёз сыл кӕй баууӕндыд, уый аххосӕй йыл бӕллӕх ӕрцыд. Цымӕ абон алыхуызон мадзӕлтты фӕрцы фидӕн базоныныл чи фӕархайы, уыдон нӕ фӕфыдӕнхъӕл вӕййынц?