1. Исчи уӕззау тӕригъӕд куы сараза, уӕд йӕ хабар, гӕнӕн ис, куыд рауайа?

 АЙРАЗМӔЙЫ статьяйӕ базыдтам, апостол Павел Коринфы ӕмбырдӕн цавӕр уынаффӕ радта, уӕззау тӕригъӕд чи арӕзта, уыцы адӕймаджы тыххӕй. Уый не ’рфӕсмон кодта, ӕмӕ йӕ хъуыди ӕмбырдӕй фӕхицӕн кӕнын. Фӕлӕ ацы статьяйы сӕйраг стихӕй бӕрӕг у, тӕригъӕд чи саразы, уыдонӕй чидӕртӕ Хуыцауы ӕххуысы фӕрцы кӕй ӕрфӕсмон кӕнынц (Ром. 2:4). Йегъовӕ сын хистӕр нӕлгоймӕгты уылты куыд баххуыс кӕны?

2, 3. Не ’мчырыстӕттӕй чидӕр уӕззау тӕригъӕд кӕй сарӕзта, уый куы базонӕм, уӕд-иу куыд хъуамӕ бакӕнӕм ӕмӕ цӕмӕн?

² Хистӕр нӕлгоймӕгтӕ куы нӕ зоной, чырыстон уӕззау тӕригъӕд кӕй сарӕзта, уый, уӕд ын сӕ бон баххуыс кӕнын нӕ уыдзӕн. Уӕдӕ куы базонӕм, ӕмӕ чидӕр ахӕм тӕригъӕд сарӕзта, ӕмӕ йӕ, гӕнӕн ис, уый тыххӕй ӕмбырдӕй фӕхицӕн кӕной, уӕд куыд хъуамӕ бакӕнӕм? Хъуамӕ йын зӕгъӕм, цӕмӕй хистӕр нӕлгоймӕгтимӕ аныхас кӕна (Ис. 1:18; Хъуыд. 20:28; 1 Пет. 5:2).

³ Фӕлӕ куы не сразы уа, уӕд та? Уӕд хистӕр нӕлгоймӕгтимӕ хъуамӕ нӕхӕдӕг аныхас кӕнӕм, цӕмӕй йын баххуыс кӕной. Уый нӕ уарзондзинадыл дзурӕг уыдзӕн, уымӕн ӕмӕ нӕ нӕ фӕнды, цӕмӕй нӕ хо кӕнӕ не ’фсымӕр фесӕфа. Уыцы адӕймаг куы нӕ аива, уӕд Йегъовӕйӕ ноджы тынгдӕр адард уыдзӕн. Стӕй ма, гӕнӕн ис, ӕмбырды номыл дӕр цъыф бакала. Уӕдӕ нын зын куы уа, уӕд дӕр хъуамӕ хистӕр нӕлгоймӕгтимӕ аныхас кӕнӕм, уымӕн ӕмӕ уарзӕм Йегъовӕйы ӕмӕ, тӕригъӕд чи сарӕзта, уый (Пс. 27:14).

 ХИСТӔР НӔЛГОЙМӔГТӔ КУЫД ФЕХХУЫС КӔНЫНЦ, УӔЗЗАУ ТӔРИГЪӔД ЧИ САРАЗЫ, УЫДОНӔН?

4. Хистӕр нӕлгоймӕгтӕ, тӕригъӕд чи сарӕзта, уыцы адӕймагимӕ куы фӕныхас кӕнынц, уӕд сӕ нысан цы вӕййы?

⁴ Ӕмбырды исчи уӕззау тӕригъӕд куы саразы, уӕд хистӕр нӕлгоймӕгты совет снысан кӕны комитет, ома ӕртӕ хистӕр нӕлгоймаджы равзары, цӕмӕй йемӕ аныхас кӕной a. Уыцы ӕфсымӕртӕ хъуамӕ уой бонзонгӕ ӕмӕ сӕрныллӕг. Кӕд адӕймагӕн ӕрфӕсмон кӕнынӕн феххуыс кӕнынц, уӕддӕр ӕй зонынц, уый йын сӕ бон тыххӕй саразын кӕнын кӕй нӕу (Дык. з. 30:19). Уыдон ӕмбарынц, алчи паддзах Давидау кӕй не ’рфӕсмон кӕндзӕн (2 Сам. 12:13). Иуӕй-иутӕ, гӕнӕн ис, Йегъовӕйы уынаффӕ мацӕмӕ ӕрдарой (Райд. 4:6–8). Фӕлӕ уӕддӕр хистӕр нӕлгоймӕгтӕн сӕ нысан вӕййы, цӕмӕй, тӕригъӕд чи ракодта, уымӕн, гӕнӕн уӕвгӕйӕ, ӕрфӕсмон кӕнынӕн баххуыс кӕной. Хистӕр нӕлгоймӕгтӕ ахӕм адӕймагимӕ куы фӕныхас кӕнынц, уӕд-иу сӕ зӕрдыл цы хъуамӕ дарой?

5. Хистӕр нӕлгоймӕгтӕ, тӕригъӕд чи сарӕзта, уыимӕ куы ныхас кӕной, уӕд сӕ зӕрдыл цы хъуамӕ дарой? (2 Тимофеймӕ 2:24–26). (Кӕс нывмӕ дӕр.)

⁵ Хистӕр нӕлгоймӕгтӕ зонынц, тӕригъӕд чи сарӕзта, уый Йегъовӕйӕн зынаргъ кӕй у, кӕд сӕфт фысы хуызӕн у, уӕддӕр (Лук. 15:4, 6). Уымӕ гӕсгӕ йемӕ тызмӕгӕй нӕ фӕныхас кӕнынц ӕмӕ йӕм знаджы цӕстӕй нӕ фӕкӕсынц. Стӕй афтӕ дӕр нӕ фӕхъуыды кӕнынц, ӕмӕ сӕ хӕс у ӕрмӕстдӕр фарстатӕ раттын ӕмӕ, хабар ӕцӕгӕй куыд у, уый базонын. Уыдоны фӕнды, 2 Тимофеймӕ 2:24–26 стихты кӕй кой ис, уыцы миниуджытӕ ӕвдисын. (Бакӕс сӕ.) Хистӕр нӕлгоймӕгтӕ фӕархайынц адӕймаджы зӕрдӕ бацагайыныл, ӕмӕ йемӕ фӕныхас кӕнынц фӕлмӕнӕй ӕмӕ уӕзданӕй ӕмӕ вӕййынц хӕларзӕрдӕ.

6. Хистӕр нӕлгоймӕгтӕ сӕ зӕрдӕтӕ куыд бацӕттӕ кӕнынц, тӕригъӕд чи сарӕзта, уыимӕ аныхас кӕныны размӕ? (Ромӕгтӕм 2:4).

⁶ Хистӕр нӕлгоймӕгтӕ сӕ зӕрдӕтӕ бацӕттӕ кӕнынц. Уыдон фӕархайынц, цӕмӕй, тӕригъӕд чи ракодта, уымӕн йӕ хъуыддаг ӕвзаргӕйӕ Йегъовӕйы фӕзмой. Сӕ зӕрдыл фӕдарынц Павелы ныхӕстӕ: «Хуыцау йӕ хӕларзӕрдӕйӕ ууыл... архайы, цӕмӕй ды ӕрфӕсмон кӕнай». (Бакӕс Ромӕгтӕм 2:4.) Хистӕр нӕлгоймӕгтӕ хъуамӕ сӕ зӕрдыл дарой, фыййӕуттӕ кӕй сты ӕмӕ Йесойы  разамындмӕ гӕсгӕ кӕй хъуамӕ архайой (Ис. 11:3, 4; Матф. 18:18–20). Тӕригъӕд чи ракодта, уыимӕ фембӕлыны размӕ Йегъовӕмӕ скувынц, цӕмӕй йын сӕ бон уа ӕрфӕсмон кӕнынӕн баххуыс кӕнын. Стӕй ма Фыстадмӕ ӕркӕсынц, нӕ публикациты ӕрмӕг бацагурынц ӕмӕ Йегъовӕйӕ арфуынындзинад ракурынц. Уыдон ахъуыды кӕнынц адӕймагӕн йӕ раздӕры цардыл ӕмӕ йӕ уавӕртыл, цӕмӕй бамбарой, ахӕм тӕригъӕдмӕ йӕ цы ’ркодта, уый (Ӕмб. 20:5).

7, 8. Хистӕр нӕлгоймӕгтӕн сӕ бон куыд вӕййы Йегъовӕйы фӕразондзинад фӕзмын, тӕригъӕд чи сарӕзта, уыимӕ куы фембӕлынц, уӕд?

⁷ Хистӕр нӕлгоймӕгтӕ архайынц, цӕмӕй Йегъовӕйау фӕразон уой. Уыдон сӕ зӕрдыл дарынц, рагзаманты-иу тӕригъӕд чи сарӕзта, уыдонӕн-иу Йегъовӕ куыд ӕххуыс кодта, уый. Зӕгъӕм, Йегъовӕ Каинимӕ уыд фӕразон. Загъта йын, куы нӕ аива, уӕд ӕй уый цӕмӕ ’ркӕндзӕн. Стӕй ма йын загъта, куы йӕм байхъуса, уӕд ын кӕй раарфӕ кӕндзӕн (Райд. 4:6, 7). Давидмӕ та арвыста пехуымпар Нафаны. Ӕмӕ йын уый радзырдта, йӕ зӕрдӕ йын чи бацагайдта, ахӕм хабар (2 Сам. 12:1–7). Йӕ пехуымпарты-иу арвыста израилӕгтӕм дӕр, йӕ коммӕ-иу куы нӕ кастысты, уӕд (Йер. 7:24, 25). Йегъовӕ-иу уымӕ не ’нхъӕлмӕ каст, йӕ адӕм кӕд ӕрфӕсмон кӕндзысты. Фӕлӕ-иу сын ӕрфӕсмон кӕнынӕн ӕххуыс кӕнын райдыдта, нырма-иу тӕригъӕд куы арӕзтой, уӕд.

⁸ Хистӕр нӕлгоймӕгтӕ Йегъовӕйы фӕфӕзмынц, уӕззау тӕригъӕд чи ракодта, уымӕн баххуыс кӕныныл куы фӕархайынц, уӕд. 2 Тимофеймӕ 4:2 стихы куыд фыст ис, афтӕмӕй хистӕр нӕлгоймӕгтӕ хъуамӕ уой бирӕфӕразон. Уымӕ гӕсгӕ, тӕригъӕд чи сарӕзта, уыимӕ хъуамӕ сабырӕй ныхас кӕной ӕмӕ фӕразон уой, цӕмӕй йӕ бафӕнда, раст цы у, уый аразын. Мӕсты куы кӕной, уӕд, гӕнӕн ис, уынаффӕмӕ ма байхъуса ӕмӕ йӕ тӕригъӕдыл ма ’рфӕсмон кӕна.

9, 10. Хистӕр нӕлгоймӕгтӕн сӕ бон куыд у адӕймагӕн баххуыс кӕнын, цӕмӕй бамбара, тӕригъӕдмӕ йӕ цы ’ркодта, уый?

⁹ Хистӕр нӕлгоймӕгтӕ фӕархайынц, цӕмӕй бамбарой, адӕймаджы тӕригъӕдмӕ цы ’ркодта, уый. Йегъовӕйӕ цӕмӕн адард? Мыййаг, Библи нал иртӕста кӕнӕ уацамынды нал цыд? Ӕви Йегъовӕмӕ афтӕ арӕх нал куывта? Мыййаг, йӕ зӕрдӕйы фӕндты фӕдыл цӕуын райдыдта? Йӕ рӕстӕг кӕимӕ фервиты? Цавӕр ирхӕфсӕнтӕ ӕвзары? Уыдӕттӕ йӕ зондахастыл куыд фӕзындысты? Ӕмбары йӕ, цы сарӕзта, уымӕй Йегъовӕйы зӕрдӕ кӕй фӕриссын кодта?

¹⁰ Хистӕр нӕлгоймӕгтӕ адӕймагмӕ ахӕм фарстатӕ дӕтдзысты, цӕмӕй ахъуыды кӕна, тӕригъӕдмӕ йӕ цы ’ркодта, ууыл (Ӕмб. 20:5). Уый араздзысты фӕлмӕнӕй ӕмӕ, хъуыддагмӕ цы нӕ хауы, уыдӕттӕй йӕ нӕ фӕрсдзысты. Уымӕй уӕлдай ма йын Нафанау сӕ бон у цӕвиттон ӕрхӕссын, цӕмӕй, цы сарӕзта, ууыл ахъуыды кӕна ӕмӕ йӕ рӕдыд бамбара. Чи зоны, фыццаг хатт йемӕ куы аныхас кӕной, уӕд йӕ зӕрдӕ йӕхиуыл ӕрхуда ӕмӕ ма суанг фӕсмон дӕр ӕркӕна.

11. Тӕригъӕд чи сарӕзта, уыдонмӕ Йесо цы цӕстӕй каст?

¹¹ Хистӕр нӕлгоймӕгтӕ архайынц, цӕмӕй Йесойы фӕзмой. Йесо куы райгас, уӕд Савлмӕ фӕзынд ӕмӕ йӕ бафарста: «Савл, Савл, цӕмӕн зилыс мӕ фӕдыл?» Уыцы фарстайы фӕрцы йын баххуыс кодта, цӕмӕй бамбӕрстаид, цы арӕзта, уый раст кӕй нӕ уыд (Хъуыд. 9:3–6). «Уыцы сылгоймаг Йезавелы» тыххӕй та Йесо загъта: «Ӕз ын радтон рӕстӕг, цӕмӕй ӕрфӕсмон кӕна» (Рарг. 2:20, 21).

12, 13. Хистӕр нӕлгоймӕгтӕн сӕ бон куыд у, тӕригъӕд чи сарӕзта, уымӕн рӕстӕг раттын, цӕмӕй ӕрфӕсмон кӕна? (Кӕс нывмӕ дӕр.)

¹² Хистӕр нӕлгоймӕгтӕ Йесойы кӕй фӕзмынц, уымӕ гӕсгӕ-иу уайтагъд ахӕм хъуыдымӕ не ’рцӕудзысты, зӕгъгӕ, адӕймаг йӕ тӕригъӕдыл не ’рфӕсмон кӕндзӕн. Иутӕ  ӕрфӕсмон кӕнынц, фыццаг хатт семӕ куы аныхас кӕнынц, уӕд. Иннӕты та фӕхъӕуы фылдӕр рӕстӕг. Уымӕ гӕсгӕ хистӕр нӕлгоймӕгтӕн сӕ бон у адӕймагимӕ цалдӕр хатты дӕр фембӕлын. Фыццаг фембӕлды фӕстӕ, гӕнӕн ис, хъуыды кӕнын райдайа, цы йын загътой, ууыл ӕмӕ Йегъовӕйӕ йӕ тӕригъӕды тыххӕй сӕрныллӕгӕй хатыр ракура (Пс. 32:5; 38:18). Ӕмӕ хистӕр нӕлгоймӕгтӕ йемӕ иннӕ хатт куы фембӕлой, уӕд, гӕнӕн ис, йӕ зондахаст бынтон ӕндӕрхуызон уа.

¹³ Цӕмӕй адӕймагӕн йӕ тӕригъӕдыл ӕрфӕсмон кӕнынӕн баххуыс кӕной, уый тыххӕй хистӕр нӕлгоймӕгтӕ фӕархайынц, цӕмӕй йӕ бамбарой ӕмӕ йӕм фӕлмӕнзӕрдӕ уой. Уыдон Йегъовӕмӕ фӕкувынц, цӕмӕй сын сӕ фыдӕбонӕн раарфӕ кӕна. Ӕмӕ сӕ ныфс вӕййы, рӕстдзинады фӕндагӕй чи адзӕгъӕл, уыцы чырыстон йӕхи кӕй ӕрӕмбардзӕн ӕмӕ кӕй ӕрфӕсмон кӕндзӕн (2 Тим. 2:25, 26).

14. Тӕригъӕд чи саразы, уымӕн ӕрфӕсмон кӕнынӕн чи баххуыс кӕны ӕмӕ афтӕ зӕгъӕн цӕмӕн ис?

¹⁴ Се ’ппӕт дӕр тынг фӕцин кӕнынц, адӕймаг куы ’рфӕсмон кӕны, уӕд (Лук. 15:7, 10). Уый тыххӕй бузныг кӕмӕй хъуамӕ уӕм? Хистӕр нӕлгоймӕгтӕй? Ӕрхъуыды-ма кӕнӕм, тӕригъӕд чи ракодта, уыдоны тыххӕй Павел цы ныффыста: «Кӕд сын Хуыцау ӕрфӕсмон кӕныны фадат раттид» (2 Тим. 2:25). Уӕдӕ чырыстонӕн йӕ зондахаст аивынӕн цавӕрдӕр адӕймаг нӕ баххуыс кӕны, фӕлӕ Йегъовӕ. Павел бамбарын кодта, адӕймаг куы ’рфӕсмон кӕны, уӕд уый цавӕр хорз хъуыддӕгтӕм ӕркӕны: рӕстдзинад цы у, уый бӕлвырддӕрӕй базоны, йӕхи ӕрӕмбары ӕмӕ Хӕйрӕджы къӕппӕгӕй раирвӕзы (2 Тим. 2:26).

15. Хистӕр нӕлгоймӕгтӕн сӕ бон куыд у, чи ’рфӕсмон кодта, уымӕн дарддӕр дӕр ӕххуыс кӕнын?

¹⁵ Адӕймаг куы ’рфӕсмон кӕна, уӕд ӕй уый фӕстӕ дӕр хистӕр нӕлгоймӕгтӕ бӕрӕг  кӕндзысты. Ӕмӕ йын ӕххуыс кӕндзысты, цӕмӕй йӕ уырнындзинад фидардӕр кӕна, Хӕйрӕджы къӕппӕджытӕй йӕхи хиза ӕмӕ, раст цы у, уый араза (Дзут. 12:12, 13). Адӕймаг цы сарӕзта, уый тыххӕй хистӕр нӕлгоймӕгтӕ никӕмӕн дзурдзысты. Фӕлӕ ӕмбырдӕн хатт цы фӕхъӕуы фехъусын кӕнын?

«УЫДОНӔН УАЙДЗӔФ КӔН СЕ ’ППӔТЫ РАЗ»

16. Павел, «се ’ппӕт», зӕгъгӕ куы загъта, уӕд кӕй кой кодта? (1 Тимофеймӕ 5:20).

¹⁶ Бакӕс 1 Тимофеймӕ 5:20. Павел хистӕр нӕлгоймаг Тимофеймӕ ныффыста, зӕгъгӕ, тӕригъӕд чи ракодта, уыдонӕн «уайдзӕф кӕн се ’ ппӕты раз». Цымӕ Павелы уый зӕгъын фӕндыд, ӕмӕ ахӕм адӕймагӕн ӕнӕхъӕн ӕмбырды раз хъуыди бауайдзӕф кӕнын? Нӕ, уый ӕнӕмӕнг нӕ уыд. Павел кодта, уыцы тӕригъӕды тыххӕй чи зыдта, уыдоны кой. Гӕнӕн ис, уыдон сӕхӕдӕг федтой, хо кӕнӕ ’фсымӕр тӕригъӕд кӕй ракодта. Йе та сын адӕймаг йӕхӕдӕг радзырдта йӕ тӕригъӕды тыххӕй. Хабар чи зыдта, уыдонӕн хъуамӕ хистӕр нӕлгоймӕгтӕ хибарӕй загътаиккой, уыцы адӕймагӕн йӕ хъуыддаг кӕй равзӕрстой ӕмӕ йын кӕй бауайдзӕф кодтой.

17. Чырыстон цы уӕззау тӕригъӕд сарӕзта, уый тыххӕй кӕд ӕмбырды бирӕтӕ зонынц йе та йӕ, гӕнӕн ис, ӕмӕ базондзысты, уӕд хистӕр нӕлгоймӕгтӕ куыд бакӕндзысты ӕмӕ цӕмӕн?

¹⁷ Иуӕй-иу хатт ӕмбырды бирӕтӕ фӕзонынц, хо кӕнӕ ’фсымӕр цы уӕззау тӕригъӕд сарӕзта, уый тыххӕй йе та йӕ, гӕнӕн ис, ӕмӕ базондзысты. Уӕд, Павел афтӕ кӕмӕй загъта, «се ’ппӕт», зӕгъгӕ, уый уыдзӕн ӕнӕхъӕн ӕмбырд. Хистӕр нӕлгоймаг ӕмбырды фехъусын кӕндзӕн, хо кӕнӕ ’фсымӕрӕн кӕй бауайдзӕф кодтой. Цӕмӕн? Павел бамбарын кодта: «Цӕмӕй иннӕтӕ дӕр тӕрсой тӕригъӕд саразын».

18. Хистӕр нӕлгоймӕгтӕ куыд хъуамӕ бакӕной, 18 азы кӕуыл нӕма цӕуы, ахӕм хо кӕнӕ ’фсымӕр уӕззау тӕригъӕд куы сараза, уӕд? (Кӕс нывмӕ дӕр.)

 ¹⁸ Ӕмӕ, уӕззау тӕригъӕд чи сарӕзта, ахӕм донаргъуыд хо кӕнӕ ’фсымӕрыл 18 азы куы нӕма цӕуа, уӕд та? Ахӕм уавӕры хистӕр нӕлгоймӕгты совет дыууӕ хистӕр нӕлгоймагӕн бахӕс кӕнынц, цӕмӕй йемӕ ӕмӕ йӕ чырыстон ныййарджытимӕ фембӕлой b. Уыдон ныййарджыты бафӕрсдзысты, цы сарӕзтой, цӕмӕй сӕ сывӕллонӕн ӕрфӕсмон кӕнынӕн баххуыс кӕной. Кӕд сывӕллон йӕ ныййарджыты уынаффӕтӕм хъусы ӕмӕ ивы, уӕд, гӕнӕн ис, дыууӕ хистӕр нӕлгоймаджы аскъуыддзаг кӕной, уыдоны бар ӕй кӕй ныууадздзысты. Хистӕр нӕлгоймӕгтӕ зонынц, сывӕллӕттӕн зонд амонын Йегъовӕ ныййарджытӕн кӕй бахӕс кодта (Дык. з. 6:6, 7; Ӕмб. 6:20; 22:6; Еф. 6:2–4). Хистӕр нӕлгоймӕгтӕ-иу уый фӕстӕ рӕстӕгӕй-рӕстӕгмӕ ныййарджытимӕ аныхас кӕндзысты, цӕмӕй базоной, сывӕллонӕн дарддӕр дӕр ӕххуыс кӕнынц ӕви нӕ. Фӕлӕ донаргъуыд ӕрыгон хо кӕнӕ ’фсымӕр куы нӕ фӕсмон кӕна ӕмӕ йӕ ивын куы нӕ фӕнда, уӕд та? Уӕд хистӕр нӕлгоймӕгты комитет фембӕлдзӕн йемӕ ӕмӕ йӕ чырыстон ныййарджытимӕ.

«ЙЕГЪОВӔ ФӔЛМӔН УАРЗТӔЙ... УАРЗЫ ӔМӔ ФӔЛМӔНЗӔРДӔ... У»

19. Уӕззау тӕригъӕд чи сарӕзта, уыдонимӕ ныхас кӕнгӕйӕ хистӕр нӕлгоймӕгтӕн сӕ бон куыд у Йегъовӕйы фӕзмын?

¹⁹ Хистӕр нӕлгоймӕгтӕ зонынц, Йегъовӕйы раз сыл ахӕм хӕс кӕй ис, цӕмӕй ӕмбырды сыгъдӕгдзинад хъахъхъӕной (1 Кор. 5:7). Фӕлӕ ма уымӕй уӕлдай, сӕ бон цы у, уый аразынц, цӕмӕй, тӕригъӕд чи сарӕзта, уымӕн ӕрфӕсмон кӕнынӕн баххуыс кӕной. Ӕмӕ йын куы феххуыс кӕнынц, уӕд сӕ ныфс вӕййы, кӕй аивдзӕн. Афтӕмӕй уыдон фӕзмынц Йегъовӕйы. Йегъовӕ та «фӕлмӕн уарзтӕй... уарзы ӕмӕ фӕлмӕнзӕрдӕ... у» (Иак. 5:11). Апостол Иоанн дӕр хотӕ ӕмӕ ’фсымӕрты бирӕ уарзта. Уый ныффыста: «Мӕ хъӕбултӕ, ацы ныхӕстӕ уӕм уымӕн фыссын, цӕмӕй тӕригъӕд ма ракӕнат. Фӕлӕ уӕ кӕд исчи тӕригъӕд ракодта, уӕд та нын Фыды раз ис ӕххуысгӕнӕг – рӕстгӕнӕг Йесо Чырысти» (1 Иоан. 2:1).

20. Иннӕ статьяйы дзырд цӕуыл цӕудзӕн?

²⁰ Хъыгагӕн, иуӕй-иу хатт хо кӕнӕ ’фсымӕры ӕрфӕсмон кӕнын нӕ бафӕнды. Ӕмӕ йӕ уӕд фӕхъӕуы ӕмбырдӕй фӕхицӕн кӕнын. Хистӕр нӕлгоймӕгтӕ ахӕм хъуыддӕгтӕ куыд равзарынц, ууыл дзырд цӕудзӕн фӕстаг статьяйы.