Фӕнды дӕ, цӕмӕй дын Библи иртасын пайда хӕсса? Кӕд о, уӕд дын ацы уынаффӕтӕ баххуыс кӕндзысты, цӕмӕй-иу Библи иртасгӕйӕ дӕ хъуыдытӕ ма адзӕгъӕл уой.

• Равзар, Библи иртасын дын ӕнцондӕр кӕм уыдзӕн, ахӕм бынат. Гӕнӕн уӕвгӕйӕ, ссар сыгъдӕг ӕмӕ, фаг рухс кӕм ис, ахӕм бынат. Дӕ бон у Библи хӕдзары, стъолы уӕлхъус бадгӕйӕ иртасын, науӕд та ӕддейӕ искуы.

• Хибар бынат ссар. Иухатт Йесо «райсомӕй раджы... хибар ранмӕ» ацыд, цӕмӕй Йегъовӕмӕ скуывтаид (Мар. 1:35). Кӕд иунӕгӕй нӕ цӕрыс ӕмӕ уый гӕнӕн нӕй, цӕмӕй дӕ разы ӕппындӕр мачи уа, уӕд дӕ бинонтӕн кӕнӕ, кӕимӕ цӕрыс, уыдонӕн зӕгъ, Библи кӕй иртасдзынӕ, ӕмӕ-иу дӕ ма бахъыгдарой.

• Дӕ хъуыдытӕ сараз, цы иртасыс, уымӕ. Архай, цӕмӕй-иу Библи иртасгӕйӕ ӕндӕр цӕуылдӕрты ма фӕуай. Телефонӕй кӕнӕ планшетӕй куы пайда кӕнай, уӕд-иу ын йӕ звук ахуыссын кӕн кӕнӕ-иу ӕй авиарежимыл сӕвӕр. Дӕ зӕрдыл куы ’рбалӕууа, цыдӕр саразын дӕ кӕй хъӕуы, уӕд-иу ӕй афысс, цӕмӕй дӕ ма ферох уа. Дӕ хъуыдытӕ-иу куы адзӕгъӕл уой, уӕд-иу гыццыл арауай-бауай кӕн кӕнӕ-иу де уӕнгтӕ айваз.