МЫЙЙАГ дын нӕ уайы Библи алы къуыри дӕр иртасын кӕнӕ дӕ хатт нӕ фӕфӕнды? Ӕвӕццӕгӕн, афтӕ алкӕмӕн дӕр вӕййы. Фӕлӕ-ма ахъуыды кӕн, ӕдзух кӕй фӕаразӕм, уыцы хъуыддӕгтыл. Зӕгъӕм, цӕмӕй нӕхи ныннайӕм, уымӕн хъӕуы рӕстӕг. Хатт уымӕ зивӕг дӕр фӕкӕнӕм. Фӕлӕ нын уый фӕстӕ куыд фенцон вӕййы! Ӕмӕ Библи куы фӕиртасӕм, уӕд дӕр нын афтӕ фенцон вӕййы (Еф. 5:26). Дӕлдӕр ис, чи дын баххуыс кӕндзӕн, цалдӕр ахӕм уынаффӕйы.

• График скӕн. Библи иртасын у, ахсджиагдӕр чи сты, уыцы хъуыддӕгтӕй иу (Фил. 1:10). Ӕмӕ уымӕ хъуамӕ куыдфӕндыйы цӕстӕй ма кӕсӕм. Библи кӕцы бон ӕмӕ цафон иртасдзынӕ, уый гӕххӕттыл ныффысс ӕмӕ йӕ ахӕм ран сӕвӕр кӕнӕ баныхас, цӕмӕй дӕ цӕстыты раз уа, зӕгъӕм, холодильникы дуарыл. Кӕнӕ та дӕ телефоны уыцы рӕстӕгыл сигнал сӕвӕр.

• Ахъуыды кӕн, ӕнцондӕр дын куыд уыдзӕн, ууыл. Иутӕ Библи иртасынӕн рахицӕн кӕнынц бирӕ рӕстӕг. Иннӕтӕ та фӕиртасынц къаддӕр рӕстӕг, фӕлӕ арӕхдӕр, уымӕн ӕмӕ тагъддӕр афӕллайынц. Ды дӕхи хуыздӕр зоныс, ӕмӕ ахъуыды кӕн, ӕнцондӕр дын куыд уыдзӕн, ууыл. Цы рӕстӕг снысан кодтай, уыцы рӕстӕг куы ӕрхӕццӕ уа, ӕмӕ дӕ Библи иртасын куы нӕ фӕнда, уӕддӕр-иу уымӕн иу-10 минуты рахицӕн кӕн. Ӕппын нӕйы бӕсты уый дӕр хорз у. Стӕй 10 минуты куы рацӕуа, уӕд дӕ, чи зоны, ӕрлӕууын мауал бафӕнда (Фил. 2:13).

• Цы иртасдзынӕ, уый-иу рагацау равзар. Библи иртасынмӕ куы ’рбадай, уӕд хъуыды кӕнын куы райдайай, гъа-ма, цы раиртасон, зӕгъгӕ, уӕд афтӕ зӕгъӕн нӕ уыдзӕн, ӕмӕ дӕ «рӕстӕгӕй, хуыздӕр куыддӕриддӕр у, афтӕ пайда кӕныс» (Еф. 5:16). Дӕ бон у рагацау ныффыссын, кӕцы статьятӕ кӕнӕ темӕтӕ раиртасын дӕ фӕнды. Стӕй-иу дӕм цавӕрдӕр фарста куы фӕзына, уӕд-иу уый дӕр дӕхимӕ афысс. Ӕмӕ-иу дӕм Библи иртасгӕйӕ фарстатӕ куы фӕзына, уӕд-иу уыдон дӕр афысс.

• Куы хъӕуа, уӕд-иу дӕ графикы исты фӕив. Сӕйрагдӕр у, цӕмӕй Библи алы къуыри дӕр иртасай. Кӕд, цас рӕстӕг ӕмӕ цы иртасдзынӕ, уый та дӕ бон у дӕ графикы фӕивын, куы хъӕуа, уӕд.

Библи алы къуыри дӕр куы иртасӕм, уӕд Йегъовӕмӕ ӕввахсдӕр кӕндзыстӕм, нӕ хъарутыл-иу хъарутӕ бафтдзӕн ӕмӕ раст уынаффӕтӕ хӕсдзыстӕм (Йес. Н. 1:8).