1, 2. Хистӕр нӕлгоймӕгтӕ цы «хорз хъуыддаг» аразынц, уымӕ цы хауы?

 КӔД цасдӕр рӕстӕг кӕстӕриуӕггӕнӕг ӕфсымӕрӕй лӕггад кӕныс, уӕд дӕ, зӕгъӕн ис, бирӕ нал хъӕуы, цӕмӕй хистӕр нӕлгоймаг суай. Уыцы «хорз хъуыддагмӕ» нӕ тырныс? (1 Тим. 3:1).

² Хистӕр нӕлгоймӕгты хӕстӕм цы хауы? Уыдон ӕмбырдӕн фӕзминаг сты хъусын кӕныны хъуыддаджы, хотӕ ӕмӕ ’фсымӕрты ныфсыл ныфс ӕфтауынц ӕмӕ сӕ ахуыр кӕнынц. Цы дзурынц ӕмӕ цы аразынц, уымӕй ӕмбырд фидар кӕнынц. Библи дӕр сӕ уымӕн хоны «лӕвӕрттӕ» (Еф. 4:8).

3. Цы хъӕуы, цӕмӕй ӕфсымӕры хистӕр нӕлгоймагӕй снысан кӕной? (1 Тимофеймӕ 3:1–7; Титмӕ 1:5–9).

³ Арӕхдӕр адӕймаджы куыстмӕ айсынц, уыцы куыстмӕ куы фӕарӕхсы, уӕд. Фӕлӕ дӕ цӕмӕй хистӕр нӕлгоймагӕй снысан кӕной, уый тыххӕй, цӕмӕдӕр кӕй арӕхсыс, уый фаг нӕу. Зӕгъӕм, фаг нӕу, хорз хъусынгӕнӕг кӕй дӕ ӕмӕ иннӕты ахуыр кӕнынмӕ кӕй арӕхсыс, уый. Хъуамӕ дӕм уа, 1 Тимофеймӕ 3:1–7 стихты ӕмӕ Титмӕ 1:5–9 стихты кӕй кой ис, уыцы миниуджытӕ. (Бакӕс сӕ.) Ацы статьяйы аныхас кӕндзыстӕм, ӕфсымӕры цы хъӕуы аразын, цӕмӕй йын уа хорз ном, уа фӕзминаг бинонты хистӕр ӕмӕ хотӕ ӕмӕ ’фсымӕртӕн лӕггад кӕнынмӕ цӕттӕ уа.

ХОРЗ НОМ ДЫН УӔД

4. Куыд ӕмбаргӕ у, хистӕр нӕлгоймагмӕ хъуамӕ «фау ӕрхӕссӕн мацӕмӕй уа», зӕгъгӕ?

⁴ Цӕмӕй хистӕр нӕлгоймагӕй лӕггад кӕнай, уый тыххӕй дӕм хъуамӕ «фау ӕрхӕссӕн мацӕмӕй уа». Ома хъуамӕ афтӕ цӕрай, цӕмӕй дын хотӕ ӕмӕ ’фсымӕрты раз хорз ном уа. Стӕй дын хъуамӕ «хорз ном уа ӕддагӕтты ’хсӕн  дӕр». Цӕуыл ӕууӕндыс, уый, гӕнӕн ис, адӕмӕн сӕ зӕрдӕмӕ ма цӕуа. Фӕлӕ хъуамӕ афтӕ цӕрай, цӕмӕй сын ӕфсон ма уа, ӕмӕ дызӕрдыг кӕной, хорз ӕмӕ ӕнӕзӕрдӕхудт адӕймаг кӕй дӕ, ууыл (Дан. 6:4, 5). Ахъуыды кӕн: «Цымӕ мын ӕмбырды дӕр ӕмӕ ӕддагӕтты ’хсӕн дӕр хорз ном ис?»

5. Хорздзинад кӕй уарзыс, уый дӕ бон куыд у ӕвдисын?

⁵ «Хъуамӕ... уарза хорздзинад». Хорздзинад чи уарзы, уыцы адӕймаг иннӕтӕн сӕ хорз миниуджытӕ фӕуыны ӕмӕ сӕ раппӕлы. Стӕй уарзы иннӕтӕн хорздзинад аразын ӕмӕ, цас фӕхъӕуы, уымӕй дӕр фылдӕр саразы (1 Фес. 2:8). Уыцы миниуӕг хистӕр нӕлгоймагӕн афтӕ ахсджиаг цӕмӕн у? Уымӕн ӕмӕ уӕд йӕ рӕстӕг хотӕ ӕмӕ ’фсымӕртӕн не ’вгъау кӕндзӕн ӕмӕ йӕ хӕстӕ зӕрдиагӕй ӕххӕст кӕндзӕн (1 Пет. 5:1–3). Бирӕ йӕ хъӕудзӕн фыдӕбон кӕнын. Фӕлӕ йын уый стыр циндзинад хӕсдзӕн (Хъуыд. 20:35).

6. Дӕ бон куыд у ӕвдисын, уазӕгуарзон кӕй дӕ? (Дзуттӕгтӕм 13:2, 16; кӕс нывмӕ дӕр.)

⁶ «Уазӕгуарзон» кӕй дӕ, уый бӕрӕг уыдзӕн, иннӕтӕн хорздзинад куы аразай, уымӕй – де ’ввахс ӕмбӕлттӕ чи не сты, суанг уыдонӕн дӕр (1 Пет. 4:9). Библи чи ӕмбарын кӕны, иу ахӕм дзырдуаты фыст ис: «Уазӕгуарзон адӕймагӕн йӕ хӕдзары ӕмӕ йӕ зӕрдӕйы дуар, кӕй нӕ зоны, уыдонӕн гом вӕййы». Ахъуыды кӕн: «Ӕмбырдмӕ уазӕг куы ’рбацӕуы, уӕд ӕм уазӕгуарзондзинад равдисын?» (Бакӕс Дзуттӕгтӕм 13:2, 16.) Уазӕгуарзон адӕймаг никӕй фӕхъулон кӕны: нӕдӕр, хъӕздыг чи нӕу, уыдоны, нӕдӕр, ӕмбырдмӕ раныхасимӕ чи ’рбацӕуы кӕнӕ иннӕты бафидар кӕныны тыххӕй бирӕ чи фыдӕбон кӕны, уыдоны, зӕгъӕм, районон цӕстдарджыты (Райд. 18:2–8; Ӕмб. 3:27; Лук. 14:13, 14; Хъуыд. 16:15; Ром. 12:13).

7. Хистӕр нӕлгоймагӕн йӕ бон куыд у ӕвдисын, ӕхцауарзаг кӕй нӕу, уый?

⁷ «Ма уа... ӕхцауарзаг». Уый ууыл дзурӕг у, ӕмӕ дын хъуамӕ мулк ӕмӕ ’хца сӕйраг ма уой. Хъӕздыг дӕ ӕви мӕгуыр, уӕддӕр дын хъуамӕ фыццаг бынаты уа Хуыцауы Паддзахад (Матф. 6:33). Йегъовӕйӕн лӕггад кӕн, дӕ бинонтыл тыхс ӕмӕ хотӕ ӕмӕ ’фсымӕртӕн лӕггад кӕн. Уыдӕттӕн дӕ рӕстӕг, дӕ тыхтӕ ӕмӕ дӕм цы ис, уый ма ’вгъау кӕн (Матф. 6:24; 1 Иоан. 2:15–17). Ахъуыды кӕн: «Ӕхцамӕ цы цӕстӕй кӕсын? Цы мын ис, уый фагыл нымайын? Ӕви ӕдзух ӕхца бакусыныл ӕмӕ мӕ мулк фӕфылдӕр кӕныныл фӕхъуыды кӕнын?» (1 Тим. 6:6, 17–19).

8. Куыд ӕмбаргӕ у, хъуамӕ «алцӕмӕй дӕр бӕрц зона» ӕмӕ уа «хиуылхӕцгӕ», зӕгъгӕ?

 ⁸ Хистӕр нӕлгоймаг хъуамӕ «алцӕмӕй дӕр бӕрц зона» ӕмӕ уа «хиуылхӕцгӕ». Хъуамӕ ӕгӕр бирӕ ма нуаза ӕмӕ фырхӕрд ма кӕна, хорз ирхӕфсӕнтӕ ӕвзара ӕмӕ йӕ уынд ӕмӕ йӕ кондӕй дӕр фӕзминаг уа. Хъуамӕ ацы дунейы адӕмы ма фӕзма (Лук. 21:34; Иак. 4:4). Исчи йӕ куы ’фхӕра, уӕддӕр хъуамӕ уа сабыр ӕмӕ-иу йӕхиуыл фӕхӕца. Хъуамӕ ма уа «расыггӕнаг». Стӕй йӕ хъуамӕ нозтуарзаг адӕймагӕй ма зоной. Ахъуыды кӕн: «Бӕрӕг у, алцӕмӕй дӕр бӕрц кӕй зонын ӕмӕ хиуылхӕцгӕ кӕй дӕн?»

9. Хистӕр нӕлгоймаг «уӕззау зонды хицау» уа ӕмӕ йӕм «уаг ӕмӕ... ӕгъдау уа», уый куыд ӕмбаргӕ у?

⁹ «Уӕззау зонды хицау» уынаффӕтӕ фӕхӕссы Библийы уагӕвӕрдтӕм гӕсгӕ. Уыцы уагӕвӕрдтыл лӕмбынӕг кӕй фӕхъуыды кӕны, уый фӕрцы свӕййы арфуынӕг. Хатдзӕгтӕ уайтагъд нӕ акӕны, фӕлӕ алцыдӕр лӕмбынӕг раиртасы (Ӕмб. 18:13). Цы уынаффӕтӕ рахӕссы, уыдонӕй бӕрӕг вӕййы, Йегъовӕ куыд хъуыды кӕны, уый дӕр афтӕ кӕй хъуыды кӕны. Хистӕр нӕлгоймагмӕ хъуамӕ «уаг ӕмӕ... ӕгъдау уа». Уый ууыл дзурӕг у, ӕмӕ алцыдӕр фӕаразы афоныл. Стӕй йын исты куы бахӕс кӕнынц, уӕд уыцы хъуыддаг саразы, цы амындтӕ йын радтой, уыдонмӕ гӕсгӕ. Афтӕ куы фӕкӕны, уӕд ын вӕййы хорз ном. Ныр та аныхас кӕнӕм, ӕфсымӕрмӕ цавӕр миниуджытӕ хъуамӕ уа, цӕмӕй фӕзминаг бинонты хистӕр уа.

У ФӔЗМИНАГ БИНОНТЫ ХИСТӔР

10. Хистӕр нӕлгоймаг хъуамӕ «йӕ бинонтӕн уа хорз уынаффӕгӕнӕг», зӕгъгӕ, куыд ӕмбаргӕ у?

¹⁰ Кӕд дын бинонтӕ ис ӕмӕ дӕ фӕнды хистӕр нӕлгоймагӕй лӕггад кӕнын, уӕд хъуамӕ дӕ бинонтӕ дӕр ӕмбырдӕн фӕзминаг уой. Уый тыххӕй сын хъуамӕ уай хорз уынаффӕгӕнӕг. Иннӕтӕ дӕ хъуамӕ зоной, йӕ бинонты чи уарзы ӕмӕ сӕ хорзыл чи хъуыды кӕны, ахӕм чырыстонӕй. Уый ууыл дзурӕг у, ӕмӕ хъуамӕ дӕ бинонты уырнындзинад фидар кӕнай. Уый ахсджиаг цӕмӕн у? Апостол Павел ныффыста: «Йӕхи бинонтӕн чи нӕ зоны уынаффӕ кӕнын, уый Хуыцауы ӕмбырдӕн цы хъуамӕ баххуыс кӕна?» (1 Тим. 3:5).

11, 12. Хистӕр нӕлгоймагӕй лӕггад кӕнын кӕй фӕнды, уымӕн йӕ сывӕллӕттӕ сӕхи куыд дарынц, уый ахсджиаг цӕмӕн у? (Кӕс нывмӕ дӕр.)

¹¹ Кӕд дын, 18 азы кӕуыл нӕма цӕуы, ахӕм сывӕллӕттӕ ис, уӕд хъуамӕ «уой коммӕгӕс ӕмӕ уӕззау зондыл хӕст». Хъуамӕ сын зонд амонай ӕмӕ сӕ ахуыр кӕнай фӕлмӕнӕй. Иннӕ сывӕллӕттау уыдон дӕр хъазын ӕмӕ худын куыннӕ уарздзысты. Фӕлӕ сӕ раст куы хъомыл кӕнай, уӕд уыдзысты коммӕгӕс, иннӕтӕн кад кӕнын зондзысты ӕмӕ сӕхи, куыд ӕмбӕлы, афтӕ дардзысты. Уымӕй уӕлдай ма хъуамӕ, йӕ бон цы у, уый араза ӕмӕ сын ӕххуыс кӕна, цӕмӕй Йегъовӕйы ӕввахс хӕлӕрттӕ суой, Библийы уагӕвӕрдтӕм гӕсгӕ цӕрой ӕмӕ донаргъуыд райсынмӕ тырной.

¹² Йӕ уырнӕг сывӕллӕтты хъуамӕ ма зоной, «ӕвзӕр митӕ чи кӕны ӕмӕ хивӕнд чи у, ахӕмтӕй». Донаргъуыд чи у кӕнӕ йӕхи донаргъуыдмӕ чи цӕттӕ кӕны, ахӕм сывӕллон уӕззау тӕригъӕд куы сараза, уӕд уый йӕ фыдыл куыд фӕзындзӕн? Кӕд уыцы сывӕллоны йӕ фыд хорз нӕ ахуыр кодта ӕмӕ йын зонд нӕ амыдта, уӕд, ӕвӕццӕгӕн, йӕ бон нал уыдзӕн дарддӕр хистӕр нӕлгоймагӕй лӕггад кӕнын. (Кӕс 1996 азы 15 октябры «Сторожевая башня», 21 фарс, 6, 7 абзацтӕ.)

ЦӔТТӔ У ХОТӔ ӔМӔ ’ФСЫМӔРТӔН ЛӔГГАД КӔНЫНМӔ

13. Куыд ӕмбаргӕ у, хистӕр нӕлгоймаг хъуамӕ уа «ӕмбаргӕ» ӕмӕ «ма уа хивӕнд», зӕгъгӕ?

¹³ Чырыстон миниуджытӕ кӕмӕ ис, ахӕм ӕфсымӕртӕ сты ӕмбырды фидыц. «Ӕмбаргӕ» адӕймаг фӕархайы, цӕмӕй иннӕтимӕ хӕларӕй цӕра. Ӕмӕ иннӕтӕн дӕр ӕххуыс кӕны, цӕмӕй кӕрӕдзиимӕ хӕларӕй цӕрой. Иннӕтӕ цы фӕдзурынц, уымӕ байхъусы ӕмӕ  фӕархайы, афтӕ цӕмӕн хъуыды кӕнынц, уый бамбарыныл. Гъеныр, зӕгъӕм, ды дӕ хистӕр нӕлгоймаг. Ӕмӕ иннӕ хистӕр нӕлгоймӕгтӕн сӕ фылдӕры фӕнды, дӕ зӕрдӕмӕ чи нӕ цӕуы, фӕлӕ Библийы ныхмӕ чи нӕу, ахӕм уынаффӕ рахӕссын. Семӕ сразы уыдзынӕ? Хистӕр нӕлгоймаг хъуамӕ «ма уа хивӕнд», ома-иу йӕхи ныхасыл ма ныллӕууа ӕмӕ-иу иннӕтимӕ дӕр уынаффӕ кӕна (Райд. 13:8, 9; Ӕмб. 15:22). Хъуамӕ «ма уа загъдгӕнаг» ӕмӕ «мӕстыгӕр». Ома хъуамӕ схуыст ныхас ӕмӕ быцӕу ма кӕна, фӕлӕ уа фӕлмӕн ӕмӕ хӕларзӕрдӕ. Хъуамӕ уа фарнуарзаг, ӕмӕ искӕимӕ кӕрӕдзи куы нӕ бамбарой, уӕд фыццаг къахдзӕф йӕхӕдӕг сараза (Иак. 3:17, 18). Фӕлмӕн ныхасӕй арӕх адӕймаджы зӕрдӕ ӕрфӕлмӕн вӕййы, суанг, нӕ ныхмӕ чи цӕуы, уыдоны зӕрдӕтӕ дӕр (Тӕрх. 8:1–3; Ӕмб. 20:3; Ӕмб. 25:15; Матф. 5:23, 24).

14. Куыд ӕмбаргӕ у, зӕгъгӕ, хистӕр нӕлгоймаг «хъуамӕ ма уа, уырнӕг ӕрӕджы чи сси, ахӕм» ӕмӕ уа «иузӕрдион»?

¹⁴ Хистӕр нӕлгоймагӕй лӕггад кӕнын кӕй фӕнды, уый «хъуамӕ ма уа, уырнӕг ӕрӕджы чи сси, ахӕм». Ӕнӕмӕнг нӕу, цӕмӕй уа, рагӕй чи лӕггад кӕны, ахӕм ӕфсымӕр. Фӕлӕ уӕддӕр хъӕуы рӕстӕг, цӕмӕй фӕлтӕрдджын чырыстон суа. Йесойау у сӕрныллӕг, цӕттӕ у алы хӕс дӕр ӕххӕст кӕнынмӕ ӕмӕ фӕразонӕй ӕнхъӕлмӕ кӕс, Йегъовӕ дын дӕ бӕрны фылдӕр хӕстӕ кӕд бакӕндзӕн, уымӕ (Матф. 20:23; Фил. 2:5–8). Хистӕр нӕлгоймаг хъуамӕ уа «иузӕрдион», ома Йегъовӕйы уагӕвӕрдтӕм гӕсгӕ цӕра ӕмӕ йӕ организацийы разамындмӕ гӕсгӕ архайа (1 Тим. 4:15).

15. Ӕнӕмӕнг у, цӕмӕй хистӕр нӕлгоймаг раныхӕстӕ дзурынмӕ дӕсны уа? Дӕ дзуапп бамбарын кӕн.

¹⁵ Библийы фыст ис, зӕгъгӕ, хистӕр нӕлгоймаг хъуамӕ «иннӕты ахуыр кӕнынмӕ арӕхса». Цымӕ уый ууыл дзурӕг у, ӕмӕ ӕнӕмӕнг хъуамӕ раныхӕстӕ дзурынмӕ дӕсны уа? Нӕ. Хистӕр нӕлгоймӕгтӕ се ’ппӕт раныхӕстӕ дзурынмӕ афтӕ дӕсны не сты. (Абар 1 Коринфӕгтӕм 12:28, 29 ӕмӕ Ефесӕгтӕм 4:11.) Фӕлӕ уацамынды куы вӕййынц кӕнӕ хоты ӕмӕ ’фсымӕрты куы бабӕрӕг кӕнынц, цӕмӕй сӕ бафидар кӕной, уӕд хъуамӕ хорз арӕхсой Библийӕ пайда кӕнынмӕ. Ӕмӕ  хъуамӕ ӕдзух сӕхиуыл кусой, цӕмӕй иннӕты ахуыр кӕнынмӕ ноджы хуыздӕр арӕхсой. Уыцы хъуыддаджы дын цы баххуыс кӕндзӕн?

16. Ӕнтыстджын ахуыргӕнӕг цӕй фӕрцы суыдзынӕ? (Кӕс нывмӕ дӕр.)

¹⁶ «Фидар хӕца, ӕууӕндӕн кӕуыл ис, уыцы ныхасыл». Дӕ раныхӕстӕн ӕмӕ, цы уынаффӕтӕ дӕттыс, уыдонӕн сӕ бындур хъуамӕ уа Библи. Библи ӕмӕ нӕ публикацитӕ лӕмбынӕг иртас (Ӕмб. 15:28; 16:23). Дӕ хъус-иу ӕрдар, нӕ публикациты Библийы стихтӕ куыд ӕмбарын кӕнынц, уымӕ. Ӕмӕ сӕ уӕд дӕ бон уыдзӕн раст ӕмбарын кӕнын ӕмӕ, кӕм хъӕуа, уым ӕрхӕссын. Иннӕты куы ахуыр кӕнай, уӕд-иу бацархай, цӕмӕй сын сӕ зӕрдӕ бацагайай. Фӕлтӕрдджын хистӕр нӕлгоймӕгтӕй-иу уынаффӕ ракур ӕмӕ-иу сӕ уынаффӕтӕм гӕсгӕ архай (1 Тим. 5:17). Хистӕр нӕлгоймӕгтӕн хъуамӕ сӕ бон уа хотӕ ӕмӕ ’фсымӕртӕн «зонд амонын». Хатт та сын фӕхъӕуы уынаффӕ раттын ӕмӕ суанг «уайдзӕф бакӕнын дӕр». Фӕлӕ хистӕр нӕлгоймаг алкӕддӕр хъуамӕ уа хӕларзӕрдӕ. Иннӕты куы уарзай ӕмӕ хӕларзӕрдӕ куы уай, стӕй сын цы амоныс, уымӕн йӕ бындур Библи куы уа, уӕд афтӕмӕй фӕзмдзынӕ ӕппӕты хуыздӕр Ахуыргӕнӕг Йесойы. Ӕмӕ дӕхӕдӕг дӕр суыдзынӕ ӕнтыстджын ахуыргӕнӕг (Матф. 11:28–30; 2 Тим. 2:24).

ДАРДДӔР ДӔР ДӔ НЫСАНМӔ ТЫРН

17. а) Кӕстӕриуӕггӕнӕг ӕфсымӕрӕн цы баххуыс кӕндзӕн, цӕмӕй хистӕр нӕлгоймаг суа? б) Ӕфсымӕры тыххӕй рекомендаци дӕтгӕйӕ хистӕр нӕлгоймӕгтӕ сӕ зӕрдыл цы хъуамӕ дарой? (Кӕс рамкӕ « Хистӕр нӕлгоймӕгтӕ, ӕмбаргӕйӕ архайут».)

¹⁷ Кӕстӕриуӕггӕнӕг ӕфсымӕртӕй кӕмӕдӕрты, чи зоны, афтӕ кӕсы, ӕмӕ хистӕр  нӕлгоймӕгтӕ никуы суыдзысты. Уый сӕм, чи зоны, ӕгӕр зын кӕсы. Фӕлӕ дӕ зӕрдыл дар: Йегъовӕ ӕмӕ йӕ организаци уымӕ не ’нхъӕлмӕ кӕсынц, ӕмӕ хъӕугӕ миниуджытӕ ӕххӕстӕй ӕвдисдзынӕ (1 Пет. 2:21). Йегъовӕ дын йӕ сыгъдӕг тыхы фӕрцы ӕххуыс кӕндзӕн, цӕмӕй уыцы миниуджытыл бакусай (Фил. 2:13). Кӕд дӕ бӕлвырдӕй цӕуылдӕр фӕнды бакусын, уӕд Йегъовӕмӕ кув ӕмӕ нӕ публикациты ӕрмӕг бацагур. Ӕмӕ хистӕр нӕлгоймӕгтӕй дӕр искӕй бафӕрс, дӕ бон цы уаид фӕхуыздӕр кӕнын.

18. Кӕстӕриуӕггӕнӕг ӕфсымӕртӕн сӕ бон цы у аразын?

¹⁸ Не ’ппӕты дӕр, уыимӕ хистӕр нӕлгоймӕгты дӕр, дарддӕр дӕр хъӕуы, ацы статьяйы цы миниуджыты кой ракодтам, уыдоныл кусын (Фил. 3:16). Кӕд кӕстӕриуӕггӕнӕг ӕфсымӕр дӕ, уӕд тырн «хорз хъуыддагмӕ». Йегъовӕйӕ кур, цӕмӕй дӕ ахуыр кӕна (Ис. 64:8). Ӕмӕ уӕд дӕ бон уыдзӕн уымӕн дӕр ӕмӕ хотӕ ӕмӕ ’фсымӕртӕн дӕр фылдӕр лӕггад кӕнын. Йегъовӕ дын ахӕм арфӕ ракӕнӕд, цӕмӕй хистӕр нӕлгоймаг суай!