1, 2. Йесойы дыууӕ ахуыргӕнинаджы Еммаусмӕ куы фӕцӕйцыдысты, уӕд цы ’рцыд?

 Н. Э. 33 аз, 16 нисан. Йесойы ахуыргӕнинӕгтӕ маст дӕр кӕнынц ӕмӕ тӕрсгӕ дӕр. Дыууӕйӕ дзы Иерусалимӕй рацыдысты ӕмӕ Емма́усмӕ сӕ ных сарӕзтой. Уыцы хъӕумӕ Иерусалимӕй цӕуын хъуыди 11 километры бӕрц. Уыцы нӕлгоймӕгтӕ тынг ныфссаст уыдысты, уымӕн ӕмӕ Йесойы, кӕй фӕдылдзӕуджытӕ систы, уый, амардтой. Мессийӕйӕ сӕхицӕн цы ныфсытӕ ӕвӕрдтой, уыдон митын мӕсгуытау атадысты. Фӕлӕ мӕнӕ-мӕнӕ хъуамӕ ӕрцыдаид, ӕнхъӕл кӕмӕн нӕ уыдысты, ахӕм хабар.

² Иу ӕнӕзонгӕ нӕлгоймаг сӕм ӕрбаиу ӕмӕ йӕ фӕндаг семӕ акодта. Ахуыргӕнинӕгтӕ йын радзырдтой, Йесойыл цы ’рцыд, уый. Ӕмӕ йын загътой, ӕнкъард уый тыххӕй кӕй сты. Уый фӕстӕ уыцы ӕнӕзонгӕ нӕлгоймаг семӕ цӕуыл аныхас кодта, уыдӕттӕ, ӕвӕццӕгӕн, цӕрӕнбонтӕм сӕ зӕрдыл бадардтой. Уый сын «Моисейы чингуытӕй ӕмӕ Пехуымпарты чингуытӕй се ’ппӕтӕй дӕр» ӕмбарын кӕнын райдыдта, Мессийӕ цӕмӕн хъуамӕ фӕхъизӕмар кодтаид ӕмӕ цӕмӕн хъуамӕ амардаид. Еммаусмӕ куы бахӕццӕ сты, уӕд сын раргом кодта, чи у, уый – Хуыцау кӕй райгас кодта, уыцы Йесо! Куыд тынг бацин кодтаиккой ахуыргӕнинӕгтӕ, Мессийӕ ӕгас кӕй у, уый куы базыдтой, уӕд! (Лук. 24:13–35).

3, 4. Йесойы ахуыргӕнинӕгтӕн сӕ хабар куыд рауад, уый сыл куыд фӕзынд ӕмӕ ацы статьяйӕ цы базондзыстӕм? (Хъуыддӕгтӕ 1:3).

³ Уӕлӕрвтӕм аздӕхыны размӕ ма Йесо зӕххыл фӕци 40 боны. (Бакӕс Хъуыддӕгтӕ 1:3.) Ӕмӕ уыцы рӕстӕг йӕ ахуыргӕнинӕгтӕм бирӕ хӕттыты фӕзынд. Уӕдмӕ маст чи кодта ӕмӕ чи тарст, уыцы ахуыргӕнинӕгтӕ систы хъӕлдзӕг ӕмӕ хъӕбатыр. Ӕмӕ цӕттӕ уыдысты Хуыцауы Паддзахады тыххӕй  хорз хабар хъусын кӕнынмӕ ӕмӕ ахуыргӕнинӕгтӕ цӕттӕ кӕнынмӕ a.

⁴ Ӕркӕсӕм-ма, уыцы рӕстӕг Йесо цы арӕзта, уымӕ. Уый нын стыр пайда ӕрхӕсдзӕн. Ацы статьяйы аныхас кӕндзыстӕм: 1) Йесо йӕ ахуыргӕнинӕгты куыд фидар кодта, 2) куыд сын ӕххуыс кодта, цӕмӕй Фыстад хуыздӕр ӕмбӕрстаиккой, 3) куыд сӕ ахуыр кодта, цӕмӕй сӕхимӕ фылдӕр хӕстӕ истаиккой. Ацы фарстатыл фӕд-фӕдыл аныхас кӕндзыстӕм ӕмӕ базондзыстӕм, нӕ бон куыд у Йесойы фӕзмын.

ИННӔТЫ ФИДАР КӔНУТ

5. Йесойы ахуыргӕнинӕгты фидар кӕнын цӕмӕн хъуыди?

⁵ Йесойы ахуыргӕнинӕгты фидар кӕнын цӕмӕн хъуыд? Иуӕй-иутӕ дзы ныууагътой сӕ хӕдзӕрттӕ, сӕ бинонты ӕмӕ сӕ куыст, цӕмӕй Йесойы фӕдыл цыдаиккой (Матф. 19:27). Чидӕртӕ та, йӕ ахуыргӕнинӕгтӕ кӕй систы, уый тыххӕй ӕфхӕрд ӕййӕфтой (Иоан. 9:22). Йӕ ахуыргӕнинӕгтӕ ахӕм ивындзинӕдтӕ скӕнынмӕ ӕмӕ хъизӕмар кӕнынмӕ цӕттӕ уыдысты, уымӕн ӕмӕ сӕ уырныдта, Йесо зӕрдӕвӕрд Мессийӕ кӕй у (Матф. 16:16). Фӕлӕ Йесойы куы амардтой, уӕд сӕ ныфс асаст ӕмӕ тынг ӕрӕнкъард сты, уымӕн ӕмӕ нӕ зыдтой, дарддӕр цы уыдзӕн, уый.

6. Йесо куы райгас, уӕд цы сарӕзта?

⁶ Йесо ӕмбӕрста: йӕ ахуыргӕнинӕгтӕ уый тыххӕй нӕ ӕрӕнкъард сты, ӕмӕ сын уырнындзинад нӕ фаг кодта, фӕлӕ йӕ кӕй амардтой, уый тыххӕй. Ӕмӕ, цы бон райгас, тӕккӕ уыцы бон райдыдта йӕ хӕлӕртты фидар кӕнын. Зӕгъӕм, фӕзынд Марийӕ Магдалинӕмӕ, зӕппадзы цур куы куыдта, уӕд (Иоан. 20:11, 16). Статьяйы райдианы куыд загътам, афтӕмӕй фӕзынд, Еммаусмӕ чи фӕцӕйцыд, уыцы дыууӕ ахуыргӕнинагмӕ дӕр. Стӕй ма фӕзынд апостол Петрмӕ дӕр (Лук. 24:34). Йесойӕ цӕуыл ахуыр кӕнӕм? Ӕркӕсӕм, Марийӕ Магдалинӕмӕ куы фӕзынд, уӕд цы ’рцыд, уымӕ.

7. Йесо Марийӕмӕ куы каст, уӕд цы федта ӕмӕ стӕй цы сарӕзта? (Иоанны 20:11–16). (Кӕс нывмӕ дӕр.)

⁷ Бакӕс Иоанны 20:11–16. 16 нисаны райсомӕй раджы цалдӕр сылгоймаджы ӕрбацыдысты, Йесойы кӕм бавӕрдтой, уыцы  зӕппадзмӕ (Лук. 24:1, 10). Йесойы мард уым кӕй нал ис, уый куы федтой, уӕд сӕ иу, Марийӕ Магдалинӕ, азгъордта, цӕмӕй Петрӕн ӕмӕ Иоаннӕн хабар радзырдтаид. Уый фехъусгӕйӕ уыдон уайтагъд зӕппадзмӕ азгъордтой, ӕмӕ Марийӕ дӕр сӕ фӕстӕ. Фӕлӕ апостолтӕ зӕппадз афтидӕй куы федтой, уӕд фӕстӕмӕ хӕдзармӕ раздӕхтысты. Марийӕ та уым лӕугӕйӕ баззад ӕмӕ куыдта. Уый ӕнхъӕл кӕцӕй уыдаид, ӕмӕ йӕм уыцы рӕстӕг Йесо каст! Йесо Марийӕйы кӕугӕ куы федта, уӕд ӕй бафӕндыд, цӕмӕй йӕ ӕрсабыр кодтаид. Ӕмӕ йӕм фӕзынд. Йесо йын цалдӕр хуымӕтӕг ныхасӕй йӕ ныфс тынг бафидар кодта. Ӕмӕ йын загъта, цӕмӕй йын йе ’фсымӕртӕм ацыдаид ӕмӕ, кӕй райгас, уый сын фехъусын кодтаид (Иоан. 20:17, 18).

8. Нӕ бон куыд у Йесойы фӕзмын?

⁸ Нӕ бон куыд у Йесойы фӕзмын? Нӕ бон у хотӕн ӕмӕ ’фсымӕртӕн ӕххуыс кӕнын, цӕмӕй дарддӕр дӕр Йегъовӕйӕн лӕггад кӕной. Уый куыд ис аразӕн? Ныфссаст чи у, уыдоны зын-иу Йесойау нӕ зӕрдӕмӕ айсӕм ӕмӕ-иу сӕ нӕ фӕлмӕн ныхасӕй ныфс бауадзӕм. Ӕркӕсӕм хо Джо́селины хабармӕ. Джоселинӕн йӕ кӕстӕр хо ӕнӕнхъӕлӕджы фӕмард. Ӕмӕ уый фӕстӕ цалдӕр мӕйы йӕ бон йӕхимӕ ӕрцӕуын нал уыд. Фӕлӕ йӕ иу ӕфсымӕр ӕмӕ йӕ ус сӕхимӕ фӕхуыдтой ӕмӕ йӕм лӕмбынӕг фӕхъуыстой. Стӕй йын загътой, Йегъовӕйӕн тынг зынаргъ кӕй у. Джоселин загъта: «Цыма абухгӕ денджызы уыдтӕн ӕмӕ мӕ дон йӕ бынмӕ фӕласы, афтӕ мӕм каст. Фӕлӕ мӕ Йегъовӕ уыцы хо ӕмӕ ’фсымӕры уылты фервӕзын кодта. Сӕ фӕрцы мӕ бафӕндыд дарддӕр Йегъовӕйӕн лӕггад кӕнын». Мах дӕр-иу иннӕты бафидар кӕндзыстӕм, сӕ зӕрдӕйы цы ис, уый куы дзурой, уӕд-иу сӕм лӕмбынӕг куы байхъусӕм, уӕд. Уый фӕрцы-иу сӕм тыхтӕ фӕзындзӕн, цӕмӕй дарддӕр дӕр Йегъовӕйӕн лӕггад кӕной (Ром. 12:15).

ИННӔТӔН ӔХХУЫС КӔНӔМ, ЦӔМӔЙ ФЫСТАД ХУЫЗДӔР ӔМБАРОЙ

9. Йесойы ахуыргӕнинӕгтӕн зын цы уыди ӕмӕ сын Йесо куыд баххуыс кодта?

⁹ Йесойы ахуыргӕнинӕгтӕ ӕууӕндыдысты Хуыцауы Ныхасыл ӕмӕ архайдтой, цӕмӕй сӕ цард уымӕ гӕсгӕ арӕзтаиккой (Иоан. 17:6). Фӕлӕ сын сӕ ахуыргӕнӕджы фыдгӕнӕджы мард куы акодтой, уӕд фӕтыхстысты. Йесо зыдта, уырнындзинад сӕм кӕй уыд ӕмӕ Йегъовӕйы кӕй уарзтой, фӕлӕ, Фыстадӕй цыдӕртӕ кӕй не ’мбӕрстой, дызӕрдыг кӕнын уый тыххӕй кӕй райдыдтой (Лук. 9:44, 45; Иоан. 20:9). Уымӕ гӕсгӕ сӕ ахуыр кодта Фыстадыл хъуыды кӕнын. Ӕркӕсӕм-ма, Еммаусмӕ фӕндагыл дыууӕ ахуыргӕнинагмӕ куы фӕзынд, уӕд сӕ куыд ахуыр кодта, уымӕ.

10. Йесо йӕ ахуыргӕнинӕгтӕн куыд баххуыс кодта, цӕмӕй бамбӕрстаиккой, ӕцӕгдӕр Мессийӕ кӕй у, уый? (Лукайы 24:18–27).

¹⁰ Бакӕс Лукайы 24:18–27. Йесо уыцы дыууӕ нӕлгоймагӕн уайтагъд нӕ загъта, чи уыд, уый, фӕлӕ сӕм фарстатӕ лӕвӕрдта. Цӕмӕн? Ӕвӕццӕгӕн ӕй фӕндыд, цӕмӕй, цӕуыл хъуыды кодтой ӕмӕ сӕ зӕрдӕйы цы уыд, уый йын раргом кодтаиккой. Уыдон ын загътой, афтӕ ӕнхъӕл кӕй уыдысты, ӕмӕ Йесо Израилы Ромы ӕфсондзы бынӕй ссӕрибар кӕндзӕн. Цӕуыл мӕт кодтой, уый йын куы радзырдтой, уӕд сын уый Фыстады фӕрцы бамбарын кодта, цы ’рцыди, уыдӕттӕ фыст кӕй уыдысты ӕмӕ ныр кӕй сӕххӕст сты b. Уыцы изӕр фӕстӕдӕр Йесо уый иннӕ ахуыргӕнинӕгтӕн дӕр бамбарын кодта (Лук. 24:33–48). Ацы хабарӕй цӕуыл ахуыр кӕнӕм?

11, 12. а) Нӕ бон куыд у Йесойы фӕзмын, искӕимӕ Библи куы фӕахуыр кӕнӕм, уӕд? (Кӕс нывмӕ дӕр.) б) Иу ӕфсымӕр куыд баххуыс кодта, Библи кӕимӕ ахуыр кодта, уымӕн?

¹¹ Нӕ бон куыд у Йесойы фӕзмын? Фыццаг: Библи кӕимӕ ахуыр кӕныс, уымӕ-иу уӕзданӕй  фарстатӕ дӕтт, цӕмӕй базонай, цӕуыл хъуыды кӕны ӕмӕ йӕ зӕрдӕйы цы ис, уый (Ӕмб. 20:5). Цы йӕ тыхсын кӕны, уый куы базонай, уӕд-иу ын равдис, куыд ис ссарӕн, чи йын баххуыс кӕндзӕн, ахӕм стихтӕ. Фӕлӕ, куыд хъуамӕ бакӕна, уый-иу ын ма дзур. Уый бӕсты йын ӕххуыс кӕн, цӕмӕй-иу стихтыл ахъуыды кӕна ӕмӕ-иу бамбара, Библийы уагӕвӕрдтӕй йӕ царды куыд спайда кӕна, уый. Ӕркӕсӕм ӕфсымӕр Но́ртийы хабармӕ, цӕры Га́нӕйы.

¹² Нортийыл 16 азы куы цыд, уӕд райдыдта Библи ахуыр кӕнын. Бирӕ нӕ рацыд, афтӕ йӕ бинонтӕ йӕ ныхмӕ цӕуын райдыдтой. Цы йын баххуыс кодта фидар фӕлӕууынӕн? Йемӕ Библи чи ахуыр кодта, уыцы ӕфсымӕр уымӕй размӕ йемӕ ныхас кодта Матфейы 10 сӕрыл. Ӕмӕ йын бамбарын кодта, ӕцӕг чырыстӕттӕ ӕфхӕрд кӕй ӕййафдзысты. Норти загъта: «Мӕ ныхмӕ цӕуын куы райдыдтой, уӕд ма мӕ цы бамбарын хъуыди, рӕстдзинад кӕй ссардтон, уый». Ӕфсымӕр ма йын равдыста Матфейы 10:16 стих. Уым фыст ис, нӕхи кӕй хъуамӕ хъахъхъӕнӕм. Стӕй йемӕ аныхас кодта, ацы стих ын куыд баххуыс кӕндзӕн, цӕмӕй-иу, цӕуыл ӕууӕнды, ууыл йӕ бинонтимӕ уӕзданӕй ныхас кӕна. Норти донаргъуыд куы райста, уӕд ӕй фӕндыд пионерӕй лӕггад кӕнын. Йӕ фыды та фӕндыд, цӕмӕй университетмӕ бацыдаид. Ӕфсымӕр Нортийӕн нӕ загъта, куыд хъуамӕ бакӕна, уый. Фӕлӕ йын фарстаты фӕрцы баххуыс кодта, цӕмӕй Библийы уагӕвӕрдтыл ахъуыды кодтаид. Ӕмӕ Норти куыд бакодта? Пионерӕй лӕггад кӕнын райдыдта, ӕмӕ йӕ йӕ фыд хӕдзарӕй ратардта. Афтӕ кӕй рауад, уый тыххӕй Норти цы хъуыды кӕны? Уый зӕгъы: «Раст кӕй бакодтон, ууыл ӕппындӕр нӕ дызӕрдыг кӕнын». Уӕдӕ иннӕтӕн Фыстадыл хъуыды кӕнынӕн куы ’ххуыс кӕнӕм, уӕд сӕ уырнындзинад фидар кӕндзӕн ӕмӕ фӕлтӕрд чырыстӕттӕ суыдзысты (Еф. 3:16–19).

ӔФСЫМӔРТӔН ӔХХУЫС КӔНУТ, ЦӔМӔЙ-ИУ «ЛӔВӔРТТӔ» СУОЙ

13. Йесо цы сарӕзта, цӕмӕй хъусын кӕныны хъуыддаг дарддӕр дӕр размӕ цыдаид? (Ефесӕгтӕм 4:8).

¹³ Йесо зӕххыл куы уыд, уӕд тынг хорз ӕххӕст кодта, йӕ Фыд ын кӕй бахӕс кодта, уыцы хъуыддаг (Иоан. 17:4). Фӕлӕ афтӕ нӕ хъуыды кодта, зӕгъгӕ, цӕмӕй хъуыддаг хорз рауайа, уый тыххӕй йӕ хъуамӕ дӕхӕдӕг саразай. Ӕртӕ азы ӕмӕ ’рдӕг зӕххыл куы лӕггад кодта, уӕд иннӕтӕн амыдта, хорз хабар хъусын кӕнын куыд хъӕуы, уый. Ӕмӕ цалынмӕ уӕлӕрвтӕм нӕ аздӕхт, уӕдмӕ йӕ ахуыргӕнинӕгтӕн ахсджиаг хъуыддаг  бахӕс кодта. Кӕуылдӕрты дзы уӕд 30 азы дӕр нӕма цыдаид. Уыдон хъуамӕ Йегъовӕйы зынаргъ фыстӕм кастаиккой ӕмӕ хъусын кӕныны ӕмӕ ахуыргӕнинӕгтӕ цӕттӕ кӕныны хъуыддаджы разамынд сӕхимӕ истаиккой. (Бакӕс Ефесӕгтӕм 4:8.) Йесо ма фӕстаг 40 боны зӕххыл куы уыд, уӕд уыцы иузӕрдион ӕмӕ удуӕлдай нӕлгоймӕгтӕн куыд ӕххуыс кодта, цӕмӕй суыдаиккой «лӕвӕрттӕ»?

14. Йесо фӕстаг 40 боны зӕххыл куы уыд, уӕд йӕ ахуыргӕнинӕгтӕн сӕ уырнындзинад фидар кӕнынӕн куыд ӕххуыс кодта? (Кӕс нывмӕ дӕр.)

¹⁴ Куы-иу хъуыди, уӕд-иу Йесо йӕ ахуыргӕнинӕгтӕн фӕлмӕнӕй уынаффӕ радта. Зӕгъӕм, иуӕй-иутӕ сӕ дызӕрдыг кодтой, кӕй райгас, ууыл. Ӕмӕ сын уӕд Йесо баххуыс кодта, цӕмӕй сӕм ахӕм хъуыдытӕ мауал уыдаид (Лук. 24:25–27; Иоан. 20:27). Загъта ма сын, Хуыцауы адӕмыл тыхсын сын ӕхца кусынӕй сӕйрагдӕр кӕй хъуамӕ уа (Иоан. 21:15). Ӕмӕ сын сӕ зӕрдыл ӕрлӕууын кодта, алчидӕр сӕ йӕ хӕстӕ кӕй хъуамӕ ӕххӕст кӕна, иннӕтӕн цы хӕстӕ ис, ууыл ма хъуыды кӕна, фӕлӕ (Иоан. 21:20–22). Ахуыргӕнинӕгтӕ Хуыцауы Паддзахады тыххӕй алцы раст не ’мбӕрстой. Ӕмӕ сын Йесо сӕ зондахаст сраст кодта ӕмӕ сын баххуыс кодта, цӕмӕй сӕ тыхтӕ хорз хабар хъусын кӕнынмӕ сарӕзтаиккой (Хъуыд. 1:6–8). Уымӕй хистӕр нӕлгоймӕгтӕ цӕуыл ахуыр кӕнынц?

15, 16. а) Хистӕр нӕлгоймӕгтӕн сӕ бон куыд у Йесойы фӕзмын? Дӕ дзуапп бамбарын кӕн. б) Патрикӕн хистӕр нӕлгоймаджы уынаффӕ куыд баххуыс кодта?

¹⁵ Хистӕр нӕлгоймӕгтӕн сӕ бон куыд у Йесойы фӕзмын? Уыдон хъуамӕ ӕфсымӕрты ахуыр кӕной, уыимӕ ӕрыгӕтты дӕр, цӕмӕй ӕмбырды фылдӕр хӕстӕ ӕххӕст кӕной c. Хистӕр нӕлгоймӕгтӕ ӕмбарынц, уыцы ӕфсымӕрты нырма бирӕ цӕуылдӕрты кӕй хъӕуы ахуыр кӕнын. Ӕмӕ сын хъуамӕ ӕххуыс кӕной, цӕмӕй уой сӕрныллӕг, ӕууӕнчы аккаг ӕмӕ иннӕтӕн лӕггад кӕнынмӕ цӕттӕ уой (1 Тим. 3:1; 2 Тим. 2:2; 1 Пет. 5:5).

¹⁶ Ӕркӕсӕм, ӕфсымӕр Па́трикӕн иу хистӕр нӕлгоймаджы уынаффӕ куыд баххуыс кодта. Патрик ӕрыгондӕр куы уыди, уӕд суанг хотимӕ дӕр куыд ныхас кодта ӕмӕ йӕхи куыд дардта, уымӕ гӕсгӕ йӕ фӕлмӕн  адӕймаг схонӕн нӕ уыди. Иу хистӕр нӕлгоймаг ын йӕ рӕдыдмӕ бацамыдта ӕмӕ йын фӕлмӕнӕй уынаффӕ радта. Патрик загъта: «Тынг дзы фӕбузныг дӕн. Цы хӕстӕм бӕллыдтӕн, уыдон-иу иннӕ ӕфсымӕртӕн куы бахӕс кодтой, уӕд-иу мӕ ныфс асаст. Уыцы уынаффӕ мын баххуыс кодта, цӕмӕй бамбӕрстаин, кадджын хӕстӕ ӕххӕст кӕнынӕй ахсджиагдӕр кӕй у, цӕмӕй хотӕн ӕмӕ ’фсымӕртӕн сӕрныллӕгӕй лӕггад кӕнон». Патрик йӕхиуыл бакуыста, ӕмӕ йыл 23 азы куы цыди, уӕд ӕй хистӕр нӕлгоймагӕй снысан кодтой (Ӕмб. 27:9).

17. Йесо куыд равдыста, йӕ ахуыргӕнинӕгтыл кӕй ӕууӕндыд, уый?

¹⁷ Адӕмӕн хорз хабар хъусын кӕнынӕй уӕлдай ма Йесо йӕ ахуыргӕнинӕгтӕн бахӕс кодта, цӕмӕй сын Фыстад ӕмбарын кодтаиккой. Уыдон, чи зоны, хъуыды кодтой, ӕмӕ уыцы хӕс ӕххӕст кӕнын сӕ бон нӕ бауыдзӕн. Фӕлӕ Йесо нӕ дызӕрдыг кодта, кӕй сын рауайдзӕн, ууыл. Ӕмӕ сын афтӕ дӕр уымӕн загъта: «Мӕ Фыд мӕн куыд рарвыста дунемӕ, афтӕ уӕ ӕз дӕр ӕрвитын дунемӕ» (Иоан. 20:21).

18. Хистӕр нӕлгоймӕгтӕн сӕ бон куыд у Йесойы фӕзмын?

¹⁸ Хистӕр нӕлгоймӕгтӕн сӕ бон куыд у Йесойы фӕзмын? Фӕлтӕрдджын хистӕр нӕлгоймӕгтӕ иннӕтӕн сӕ бӕрны цавӕрдӕр хъуыддӕгтӕ бакӕнынц? (Фил. 2:19–22). Зӕгъӕм, сӕ бон у ӕрыгӕттӕн зӕгъын, цӕмӕй фӕкӕсой Паддзахады зал бафснайынмӕ кӕнӕ йӕм базилынмӕ. Исты саразын сын куы бахӕс кӕнынц, уӕд сын бацамонынц, куыд аразын ӕй хъӕуы, уый. Ӕмӕ сӕ уый фӕстӕ сӕхи бар ныууадзынц, сӕ уӕлхъус нӕ фӕлӕууынц. Афтӕ ахуыр кодтой, ӕрӕджы хистӕр нӕлгоймагӕй кӕй снысан кодтой, уыцы ӕфсымӕр Мэтьюйы дӕр. Ӕмӕ уый тыххӕй фӕлтӕрджын хистӕр нӕлгоймӕгтӕй тынг бузныг у. Мэ́тью загъта: «Куы-иу фӕрӕдыдтӕн, уӕд-иу мын мӕ рӕдыд нӕ ныддиссаг кодтой, фӕлӕ-иу мын баххуыс кодтой, цӕмӕй-иу дзы истӕуыл сахуыр уыдаин» d.

19. Нӕ фидар фӕнд цы хъуамӕ уа?

¹⁹ Йесо зӕххыл фӕстаг 40 боны куы уыд, уӕд йӕ ахуыргӕнинӕгты фидар кодта, ӕххуыс сын кодта, цӕмӕй Фыстад хуыздӕр ӕмбӕрстаиккой ӕмӕ сӕ ахуыр кодта, цӕмӕй сӕхимӕ алыхуызон хӕстӕ истаиккой. Уӕдӕ нӕ фидар фӕнд уӕд Йесойы къахвӕдтыл цӕуын! (1 Пет. 2:21). Йесо нын йӕхӕдӕг ӕххуыс кӕндзӕн, уымӕн ӕмӕ нын зӕрдӕ бавӕрдта: «Цалынмӕ ацы цардӕвӕрды кӕрон не ’рцӕуа, уӕдмӕ ӕз алы бон дӕр уыдзынӕн уемӕ» (Матф. 28:20).