Библи цы зӕгъы. «Царды мидӕг ӕхцауарзаг ма ут, цы уын ис, уый фагыл нымайут» (Дзуттӕгтӕм 13:5).

Абон афтӕ цы дзауматӕй дзурынц, ӕнӕмӕнгӕй дӕ хъӕуынц, зӕгъгӕ, уыдон уыйбӕрц сты, ӕмӕ сын банымайӕн дӕр нӕй. Фӕлӕ Библи зӕгъы, «цы уын ис, уый фагыл нымайут», зӕгъгӕ. Уымӕн гӕнӕн куыд ис?

«Ӕхцауарзаг» ма у. Адӕм сӕхи ныссахъат кӕнынц, сӕ къух сисынц сӕ бинонтыл, се ’мбӕлттыл, уаг ӕмӕ ӕгъдауыл, суанг ма ӕгад хъуыддӕгтӕ дӕр сӕ сӕрмӕ ӕрхӕссынц. Ӕмӕ цӕй тыххӕй? «Ӕхцауарзаг» кӕй вӕййынц, уый тыххӕй (1 Тимофеймӕ 6:10). Ахӕм стыр аргъ фидын цӕмӕн хъӕуы, кӕд ӕмӕ, хъӕздыгдзинад чи уарзы, уый «никуы бафсӕддзӕн», уӕд? (Екклесиаст 5:10).

Фыццаг бынаты дын уӕнт адӕм, дзауматӕ нӕ, фӕлӕ. Кӕй зӕгъын ӕй хъӕуы, дзауматӕ дӕр хъӕуы. Фӕлӕ дзауматӕн сӕ бон нӕу, цӕмӕй нӕ уарзой ӕмӕ нӕ бузныг уой. Уый сӕ бон у ӕрмӕстдӕр адӕмӕн. «Ӕцӕг ӕмбал» нын куы уа, уӕд нын цард фылдӕр циндзинад хӕсдзӕн (Ӕмбисӕндтӕ 17:17).

Библи цы зӕгъы. «Хъӕлдзӕг зӕрдӕ хосау дзӕбӕх кӕны» (Ӕмбисӕндтӕ 17:22).

Хъӕлдзӕг куы уай, уӕд дын дӕ низимӕ тох кӕнын ӕнцондӕр уыдзӕн. Фӕлӕ куыд ис гӕнӕн, ӕмӕ, не ’нӕниздзинад ӕвзӕр куы уа, уӕд-иу хъӕлдзӕг уӕм?

Бузныгзӕрдӕ у. Ӕдзух нӕ зындзинӕдтыл куы хъуыды кӕнӕм, уӕд нӕм нӕ «бонтӕ иууылдӕр» кӕсдзысты ӕвзӕр (Ӕмбисӕндтӕ 15:15). Уый бӕсты хъуамӕ, Библи куыд зӕгъы, афтӕмӕй бузныг уӕм (Колоссӕгтӕм 3:15). Дӕхи ахуыр кӕн, цӕмӕй-иу гыццыл цӕйдӕр тыххӕй дӕр бузныг уай. Рӕсугъд хурныгуылд, рог дымгӕ, уарзон адӕймаджы мидбылхудт – ӕппӕт уыдӕттӕ нын нӕ цард рӕсугъддӕр кӕнынц.

Иннӕтӕн исты араз. Кӕд не ’нӕниздзинад хорз нӕу, уӕддӕр «райсынӕй раттын амондджындӕр хъуыддаг у» (Хъуыддӕгтӕ 20:35). Иннӕтӕ нӕ нӕ фыдӕбоны тыххӕй бузныг куы вӕййынц, уӕд нын уый ӕхсызгон вӕййы ӕмӕ нӕ зындзинӕдтыл къаддӕр фӕхъуыды кӕнӕм. Иннӕтӕн куы ’ххуыс кӕнӕм, цӕмӕй амондджын уой, уӕд нӕхӕдӕг дӕр амондджын уыдзыстӕм.

Библи цы зӕгъы. «Ахсджиагдӕр цы у, уый сбӕлвырд кӕнут» (Филиппӕгтӕм 1:10).

Иумӕ гыццыл рӕстӕг чи ӕрвиты, уыцы лӕг ӕмӕ усӕн тӕссаг у, кӕрӕдзийӕ кӕй адард уыдзысты, уымӕй. Лӕг ӕмӕ ус сӕ бинонты цард хъуамӕ нымайой ӕппӕты ахсджиагдӕр хъуыддӕгтӕй иуыл.

Иумӕ-иу истытӕ аразут. Уӕхи цы фӕнды, уый хицӕнтӕй аразыны бӕсты-иу иумӕ истытӕ аразыныл баныхас кӕнут. «Дыууӕ адӕймагӕн, иунӕгӕй чи у, уымӕй хуыздӕр у»,– фыст ис Библийы (Екклесиаст 4:9). Уӕ бон у иумӕ хӕринаг скӕнын, атезгъо кӕнын, киномӕ бакӕсын кӕнӕ та, уӕ дыууӕйы зӕрдӕмӕ дӕр цы цӕуы, ахӕм истӕмӕй уӕхи аирхӕфсын.

Дӕ цардӕмбалӕн ӕвдис, кӕй йӕ уарзыс, уый. Библи лӕгтӕн ӕмӕ устытӕн зӕгъы, цӕмӕй сӕ кӕрӕдзи уарзой ӕмӕ сӕ кӕрӕдзийӕн аргъ кӕной (Ефесӕгтӕм 5:28, 33). Фӕлмӕн мидбылхудт, уарзӕгой хъӕбыс кӕнӕ исты гыццыл лӕвар лӕг ӕмӕ усы ӕнгомдӕр кӕнынц. Кӕй зӕгъын ӕй хъӕуы, ӕмуат дӕр-иу хъуамӕ ӕрмӕст кӕрӕдзиимӕ ӕрцӕуой (Дзуттӕгтӕм 13:4).