Иу адӕймаг дӕр мӕлӕтӕй хызт нӕу
ДӔ ЦӔСТЫТЫЛ-МА ауайын кӕн, цыма киномӕ кӕсыс. Уыцы кино у, зӕгъӕм, дӕ зӕрдӕмӕ чи цӕуы, ахӕм зындгонд музыканты тыххӕй. Фыццаг ын ӕвдисынц йӕ сабибонтӕ, музыкалон инструментыл цӕгъдын куыд ахуыр кодта ӕмӕ, цӕмӕй хорз цӕгъдын сахуыр уыдаид, уый тыххӕй йӕ цас фыдӕбон кӕнын хъуыд, уый. Дарддӕр ӕвдисынц, алы бӕстӕты концерттӕ куыд дӕтты ӕмӕ дунейыл йӕ кой куыд айхъуыст. Рӕстӕг рацыд, ӕмӕ йӕ сызгъӕрин азтӕ фесты, ӕмӕ кинойы кӕрон – амард.
Ацы кинойы хабӕрттӕ цардӕй ист сты. Ӕмӕ кино кӕйфӕнды тыххӕй ма уыдаид,– фӕнды музыканты, фӕнды ахуыргонды, фӕнды спортсмены кӕнӕ ӕндӕр цавӕрдӕр зындгонд адӕймаджы тыххӕй,– йӕ хабар уӕддӕр афтӕ уыдаид. Уыцы музыкантӕн, ӕвӕццӕгӕн, бирӕ бантыст, фӕлӕ-ма ахъуыды кӕн, цас фылдӕр ын бантыстаид, куы нӕ базӕронд уыдаид ӕмӕ куы нӕ амардаид, уӕд.
Хъыгагӕн, мӕлӕтӕй хызт ничи у (Екклесиаст 9:5). Цыфӕнды ма аразӕм, цӕмӕй ма базӕронд уӕм ӕмӕ ма амӕлӕм, уӕддӕр нӕ кӕрон уымӕ цӕуы. Уымӕй уӕлдай ма, нӕ цард, гӕнӕн ис, аскъуыйа, ӕнӕнхъӕлӕджы ныл исты куы ’рцӕуа кӕнӕ исты низӕй куы фӕрынчын уӕм, уӕд. Библийы куыд фыст ис, афтӕмӕй нӕ цард у райсомы мигъы хуызӕн – «мигъ иу гыццыл рӕстӕгмӕ куыд фӕзыны ӕмӕ стӕй куыд ӕрбайсӕфы», уый хуызӕн (Иаковы 4:14).
Бирӕтӕ нӕ зонынц, адӕймаг цӕй тыххӕй цӕры ӕмӕ сомбон цы ’рхӕсдзӕн, уый, ӕмӕ уымӕ гӕсгӕ цардмӕ кӕсынц ахӕм цӕстӕй, зӕгъгӕ, «хӕрӕм ӕмӕ нуазӕм,– уӕддӕр райсом амӕлдзыстӕм» (1 Коринфӕгтӕм 15:32). Фӕлӕ афтӕ уымӕн цӕрынц, ӕмӕ йӕ зонынц, абон уа ӕви райсом, уӕддӕр кӕй амӕлдзысты. Адӕймагӕн йӕ царды ахӕм рӕстӕджытӕ вӕййы, уӕлдайдӕр та зын уавӕры куы бахауы, уӕд, ӕмӕ фӕхъуыды кӕны: «Райгуыр ӕмӕ стӕй амӕл – цард ӕндӕр ницы у?» Ацы фарстайӕн дзуапп кӕм ис ссарӕн?
Бирӕты ныфс ис, ацы фарстайӕн дзуапп ахуыргӕндтӕ кӕй ссардзысты. Наукӕ ӕмӕ медицинӕйӕн цы бантыст, уый фӕрцы адӕймаг абон фылдӕр цӕры. Ӕмӕ иуӕй-иу ахуыргӕндтӕн сӕ нысан у исты мадзал ссарын, цӕмӕй адӕймаг ноджы фылдӕр цӕра. Фӕлӕ ахуыргӕндтӕн уый сӕ къухы бафта ӕви нӕ, уӕддӕр сӕ бон нӕ бауыдзӕн дзуапп раттын ахӕм фарстатӕн: цӕмӕн зӕронд кӕнӕм ӕмӕ цӕмӕн мӕлӕм? Искуы афтӕ уыдзӕн, ӕмӕ мӕлӕт нал уыдзӕн? Ацы фарстатыл дзырд цӕудзӕн иннӕ статьяты. Уымӕй уӕлдай ма дзуапп базондзыстӕм ацы фарстайӕн дӕр: «Райгуыр ӕмӕ стӕй амӕл – цард ӕндӕр ницы у?»