Ӕнӕ хурӕй зӕххыл цард нӕ уаид. Хуры фӕрцы бӕлӕстӕ сыфтӕр ӕмӕ дидинӕг рафтауынц, раттынц дыргъ ӕмӕ тауинаг. Хуры фӕрцы ма бӕлӕстӕ зӕххӕй дон цъирынц ӕмӕ дзы сӕ сыфтӕр ӕфсадынц, ӕмӕ стӕй уыцы дон уӕлдӕфы байсысы.

Къӕвда у Хуыцауы диссаджы лӕвар. Уый фӕрцы зӕхх тыллӕг ратты. Хуыцау нын къӕвдатӕ ӕмӕ бӕркадджын азтӕ кӕй дӕтты, уый фӕрцы нын ис хӕринаг, ӕмӕ нын афтӕмӕй нӕ зӕрдӕтӕ цинӕй ӕфсады.

Бинонты хистӕртӕй бирӕтӕ фӕмӕт кӕнынц, сӕ бинонты куыд фӕдарой, ууыл. Дӕ хъус-ма ӕрдар, Сыгъдӕг Фыстад цы дзуры, уымӕ: «Акӕсут-ма уӕларвон мӕргътӕм – уыдон нӕдӕр таугӕ кӕнынц, нӕдӕр кӕрдгӕ ӕмӕ нӕдӕр хордӕтты хор ӕфснайынц, фӕлӕ сӕ уӕ уӕларвон Фыд ӕфсады. Ӕмӕ уӕд сымах уыдонӕй зынаргъдӕр не стут?» (Матфейы 6:25, 26).

«Акӕсут-ма, быдыры дидинджытӕ куыд рӕзынц, уымӕ... Фӕлӕ уын зӕгъын: паддзах Соломоны хуызӕн хъӕздыг лӕг нӕ уыд, ӕмӕ-иу уый дӕр уыдоны хуызӕн рӕсугъд нӕ сарӕзта йӕхи. Ӕмӕ кӕд Хуыцау... кӕрдӕг афтӕ сфӕлынды, уӕд сымах ӕнӕ дарӕсӕй ныууадздзӕн?» (Матфейы 6:28–30).

Кӕд нӕ Хуыцау хӕринаг ӕмӕ уӕлӕдарӕсӕй цух нӕ уадзы, уӕд нӕ цух нӕ ныууадздзӕн, цардӕн ма нӕ ӕнӕмӕнг цы хъӕуы, уыдӕттӕй дӕр. Хуыцауы фӕндон ӕххӕст кӕныныл куы архайӕм, уӕд нын нӕ фыдӕбонӕн арфӕ кӕндзӕн, ӕмӕ-иу, цы байтауӕм, уый тыллӕг ратдзӕн. Кӕнӕ та-иу нын баххуыс кӕндзӕн, къӕбӕры фаг ӕхца кӕм бакусӕм, ахӕм куыст ссарынӕн (Матфейы 6:32, 33).

Уӕдӕ хур, къӕвда, мӕргътӕ ӕмӕ дидинджытыл куы хъуыды кӕнӕм, уӕд Хуыцауы куыннӕ уарздзыстӕм. Иннӕ статьяйы дзырд цӕуы, Хуыцау адӕмимӕ куыд ныхас кӕны, ууыл.