АСТРОЛОГИ. Иуӕй-иутӕ афтӕ хъуыды кӕнынц, ӕмӕ адӕймагӕн йӕ фидӕн кӕнгӕ у, йӕ райгуырды рӕстӕг стъалытӕ цы бынӕтты уыдысты, уымӕй. Уыдон фӕкӕсынц гороскоптӕ, уымӕн ӕмӕ сӕ фӕфӕнды базонын, фыдбылызӕй сӕхи цӕй фӕрцы бахиздзысты ӕмӕ ӕнтыстджын цӕй фӕрцы уыдзысты.

КЪАМТӔЙ ФӔРСЫН. Иннӕты хъуыдымӕ гӕсгӕ та, къамтӕй чи фӕрсы, уыдонӕн сӕ бон у базонын, цавӕрдӕр хабӕрттӕ сыл цӕмӕн ӕрцыд, стӕй сын дарддӕр цы кӕнгӕ у, цӕмӕй ӕнтыстджын уой ӕмӕ сын зиан чи ’рхӕсдзӕн, ахӕм хабӕрттӕй сӕхи бахизой.

ФЫДӔЛТӔН КУВЫН. Иннӕтӕ та афтӕ хъуыды кӕнынц, ӕмӕ хъуамӕ сӕ фыдӕлты ӕмӕ алыхуызон хуыцӕутты хорзӕх ссарой, цӕмӕй сӕ хъахъхъӕной ӕмӕ сын арфӕ кӕной. Ван * цӕры Вьетнамы. Уый загъта: «Афтӕ хъуыды кодтон, ӕмӕ мӕ фыдӕлтӕн куы кувон, уӕд мын абон хорз цард уыдзӕн ӕмӕ мӕхӕдӕг дӕр ӕмӕ мӕ сывӕллӕттӕ дӕр рухс фидӕн фендзыстӕм».

РЕИНКАРНАЦИ. Бирӕтӕ афтӕ хъуыды кӕнынц, ӕмӕ адӕймаг куы амӕлы, уӕд та ногӕй райгуыры, ӕмӕ афтӕ ногӕй ӕмӕ ногӕй. Сӕ хъуыдымӕ гӕсгӕ, ацы царды сыл хорзӕй кӕнӕ ӕвзӕрӕй цы ’рцӕуы, уый баст вӕййы, раздӕры царды цы хъуыддӕгтӕ арӕзтой, уыимӕ.

 Кӕд бирӕтӕ афтӕ зӕгъынц, ӕмӕ уыдӕттыл не ’ууӕндынц, уӕддӕр фӕкӕсынц гороскоптӕ кӕнӕ та ацӕуынц дӕсныфӕрсджытӕм, армытъӕпӕны хӕххытӕ чи февзары, йе та мӕрдтимӕ чи ныхас кӕны, уыдонмӕ. Ныфс сӕ вӕййы, уыдӕтты фӕрцы сӕ бон кӕй уыдзӕн сӕ фидӕн базонын.

Ацы хъуыддӕгтыл чи ӕууӕнды ӕмӕ сӕ чи аразы, уыдонӕн цымӕ сӕ къухы бафтыд, цы фидӕнмӕ бӕллыдысты, уый?

Ӕркӕсӕм Хаойы хабармӕ. Уый цӕры Вьетнамы. Хао пайда кодта астрологийӕ, йӕ фыдӕлтӕн куывта ӕмӕ ӕндӕр ахӕм хабӕрттӕ кодта, цӕмӕй йӕ цард хорз цыдаид. Цымӕ йын исты ӕххуыс фесты? Хао загъта: «Ӕнӕ бизнесӕй баззадтӕн, хӕсты бын фӕдӕн, мӕ бинонтимӕ кӕрӕдзи нал ӕмбӕрстам. Ӕмӕ уый тыххӕй уыдтӕн ныфссаст».

Цюмин у Тайванӕй. Уый дӕр ӕууӕндыд астрологийыл, реинкарнацийыл ӕмӕ, алцыдӕр амондӕй кӕнгӕ кӕй у, ууыл. Стӕй куывта йӕ фыдӕлтӕн. Фӕлӕ ацы хъуыддӕгтӕ лӕмбынӕг куы раиртӕста, уӕд загъта: «Ӕз ӕй бамбӕрстон, ахӕм ахуырӕдтӕ кӕрӕдзийыл кӕй нӕ бадынц ӕмӕ сайд йеддӕмӕ кӕй ницы сты. Бамбӕрстон ӕй, астрологтӕ цы фӕзӕгъынц, уый арӕх кӕй нӕ сӕххӕст вӕййы. Реинкарнацийыл дӕр нал ӕууӕндын. Кӕд дӕ раздӕры цард нӕ хъуыды кӕныс, уӕд дӕ бон куыд у дӕ иннӕ царды исты фӕивын, цӕмӕй ӕнтыстджындӕр уай?

Хао, Цюмин ӕмӕ ма бирӕтӕ бамбӕрстой, сӕ фидӕн амондӕй, стъалытӕй, реинкарнацийӕ ӕмӕ, сӕ фыдӕлтӕн кувдзысты ӕви нӕ, уымӕй кӕнгӕ кӕй нӕу. Фӕлӕ цымӕ уый ууыл дзурӕг у, ӕмӕ нӕ фидӕныл нӕ бар ӕппындӕр нӕ цӕуы?

Бирӕты фӕфӕнды уӕлдӕр ахуырад райсын ӕмӕ бирӕ ӕхца бакусын, уымӕн ӕмӕ сӕм афтӕ кӕсы, ӕмӕ уӕд фидӕны амондджын уыдзысты. Фӕлӕ цымӕ уый сӕ къухы бафты?