Йесо йӕ мӕлӕты размӕ изӕр йӕ апостолты фӕдзӕхста, цӕмӕй уымӕ ма бӕлыдаиккой, ӕмӕ сын се ’мчырыстӕтты цӕсты кад уыдаид.Афтӕ сын загъта: «Ацы дунейы паддзӕхтӕ сӕхи адӕмӕн ӕлдӕрттӕ кӕнынц, ӕмӕ, адӕмыл йӕ бар кӕмӕн цӕуы, уыдоны хӕрзгӕнджытӕ хонынц. Сымах та афтӕ ма кӕнут» (Лук. 22:25, 26).

Йесо цы хӕрзгӕнджыты кой кодта, уыдон чи уыдысты? Археологтӕ цы къӕйдуртӕ, къухфыстытӕ ӕмӕ ӕхцатӕ ссардтой, уыдонмӕ гӕсгӕ зӕгъӕн ис, Греци ӕмӕ Ромы ахӕм ӕгъдау кӕй уыд, ӕмӕ-иу номдзыд нӕлгоймӕгты ӕмӕ паддзӕхты хуыдтой Эвергет, ома «хӕрзгӕнӕг». Ахӕм титулӕй-иу сӕ уымӕн хуыдтой, ӕмӕ адӕмы цард фӕхуыздӕр кӕныны тыххӕй цыдӕртӕ арӕзтой.

Уыцы титул уыд, зӕгъӕм, Египеты паддзӕхтӕн – Птолемей Ӕртыккагӕн ӕмӕ Птолемей Ӕстӕмӕн. Уыцы титул ма хастой Ромы паддзӕхтӕ Юлий Цезарь ӕмӕ Август, стӕй Иудейӕйы паддзах Номдзыд Ирод дӕр. Ироды уыцы титулӕй хонын, ӕвӕццӕгӕн, райдыдтой, ӕххормаг заман йӕ бӕстӕйы цӕрджытӕн мӕнӕу куы ӕрбаласын кодта ӕмӕ мӕгуыртӕн уӕлӕдарӕс куы байуарын кодта, уӕд.

Иу немыцаг библииртасӕджы, Адольф Дайсманны, ныхӕстӕй куыд зыны, афтӕмӕй-иу раджы заманты титул Эвергет тынг парахат уыд. Уый ныффыста: «Археологтӕ цы ссардтой, уыдӕттӕ иртасын куы райдайат, уӕд цыбыр рӕстӕгмӕ сӕмбӕлдзыстут, [ацы титулӕй] кӕй пайда кодтой, уымӕн сӕдӕ бӕлвырдгӕнӕнӕй фылдӕрыл».

Уӕдӕ Чырысти йӕ ахуыргӕнинӕгтӕн афтӕ цӕмӕн загъта, «сымах та афтӕ ма кӕнут», зӕгъгӕ? Цымӕ йӕ уый зӕгъын фӕндыд, ӕмӕ хъуамӕ адӕмы мӕт ӕппындӕр ма кодтаиккой? Нӕ, уый афтӕ нӕу. Куыд зыны, афтӕмӕй Чырысти кодта, адӕймаджы иннӕтӕн хорздзинад аразынмӕ цы фӕразӕнгард кӕны, уый кой.

Йесойы заман цы хъӕздгуытӕ цард, уыдон-иу ӕхца радтой, цӕмӕй-иу спектакльтӕ ӕмӕ алыхуызон ерыстӕ цыдаиккой, стӕй-иу цӕмӕй парктӕ ӕмӕ кувӕндӕттӕ арӕзт ӕрцыдаиккой. Афтӕ-иу уымӕн кодтой, цӕмӕй сын адӕмы цӕсты кад уыдаид ӕмӕ-иу сыл ӕвзӕрстыты рӕстӕг схъӕлӕс кодтаиккой. Иу иртасӕн куысты фыст ис: «Кӕд-иу хъӕздгуытӕй чидӕртӕ адӕмӕн хорздзинад сыгъдӕгзӕрдӕйӕ арӕзтой, уӕддӕр бирӕтӕ афтӕ уымӕн кодтой, цӕмӕй-иу стыр бынӕттӕ бацахстаиккой». Ӕмӕ Чырысти дӕр йӕ фӕдылдзӕуджыты ахӕм зондахастӕй фӕдзӕхста, ома цӕмӕй уыдонау хъалзӕрдӕ ӕмӕ хиуарзон ма суыдаиккой.

Уымӕй цалдӕр азы фӕстӕ апостол Павел дӕр бамбарын кодта, адӕймаг иннӕтӕн хорздзинад цавӕр зӕрдӕйы уагимӕ хъуамӕ араза, уый. Павел Коринфы чырыстӕттӕм ныффыста: «Уӕдӕ алчидӕр кӕнӕд, йӕхицӕн куыд загъта, афтӕ – мацы кӕнӕд ӕвӕндонӕй кӕнӕ тыххӕй кӕнӕгау, уымӕн ӕмӕ Хуыцау, зӕрдиагӕй чи дӕтты, уый уарзы» (2 Кор. 9:7).