1–3. Ӕххӕстрӕстӕг чи лӕггад кӕны, уыдонӕн хатт сӕ лӕггады цыдӕр цӕмӕн фӕивы?

«МИССИОНЕРТӔЙ фӕлӕггад кодтам 21 азы. Уый диссаджы рӕстӕг уыди. Фӕлӕ уӕдмӕ нӕ дыууӕйӕн дӕр нӕ ныййарджытӕ базӕронд сты, ӕмӕ сӕм кӕсын хъуыд,– зӕгъынц Роберт ӕмӕ Мэри.– Кӕй сӕм кастыстӕм, уый нын уаргъ нӕ уыд. Фӕлӕ нын зын уыди, кӕм лӕггад кодтам, уырдыгӕй ацӕуын, уымӕн ӕмӕ уыцы бынат тынг бауарзтам».

² «Куы йӕ базыдтам, ӕмӕ не ’нӕниздзинады тыххӕй, кӕм лӕггад кодтам, уырдӕм аздӕхын нӕ бон нал у, уӕд нӕ цӕссыг нал баурӕдтам,– зӕгъынц Уильям ӕмӕ Терри.– Нӕ бӕллиц алкӕддӕр уыд Йегъовӕйӕн ӕндӕр бӕстӕйы лӕггад кӕнын, фӕлӕ уымӕн гӕнӕн нал уыд».

³ «Зыдтам ӕй, хицауад нын нӕ филиал сӕхгӕнынмӕ кӕй хъавы,– зӕгъы Алексей.– Фӕлӕ уӕддӕр, уыцы хабар куы ’рцыд ӕмӕ нӕ Вефилӕй ацӕуын куы бахъуыд, уӕд нын тынг зын уыди».

4. Ацы статьяйы цавӕр фарстатӕм ӕркӕсдзыстӕм?

⁴ Уымӕй уӕлдай, Вефилы чи лӕггад кодта, уыдонӕй ӕмӕ ӕндӕр ӕххӕстрӕстӕг лӕггадгӕнджытӕй * мингӕйтты ӕндӕр рӕттӕм снысан кодтой кӕнӕ сын сӕ бар ӕндӕр хӕстӕ бакодтой *. Уыцы иузӕрдион хотӕ ӕмӕ ӕфсымӕртӕ сӕ лӕггад тынг уарзтой. Ӕмӕ сӕ, кӕм лӕггад кодтой, уырдыгӕй ацӕуын кӕй бахъуыд, уый сын зын куыннӕ уыд. Ног уавӕртыл цӕй фӕрцы сахуыр уыдзысты? Ӕмӕ сын нӕ бон цӕмӕй у баххуыс кӕнын? Ацы фарстатӕн цы дзуаппытӕ  базондзыстӕм, уыдон не ’ппӕтӕн дӕр баххуыс кӕндзысты, нӕ царды-иу исты куы фӕива, уӕд.

5. Ӕххӕстрӕстӕг лӕггад кӕнын йӕ бон кӕмӕн нал вӕййы кӕнӕ ӕндӕр ранмӕ кӕй снысан кӕнынц, уыдонӕн уый хатт зын цӕмӕн вӕййы?

⁵ Ӕххӕстрӕстӕг кӕмфӕнды ма лӕггад кӕнӕм,– Вефилы ӕви ӕндӕр искуы,– мах тынг бауарзӕм, кӕимӕ фӕлӕггад кӕнӕм, уыцы хотӕ ӕмӕ ӕфсымӕрты ӕмӕ, кӕм фӕлӕггад кӕнӕм, суанг уыцы бынат дӕр. Ӕмӕ нӕ уырдыгӕй ацӕуын куы бахъӕуы, уӕд нӕ зӕрдӕ бамӕгуыр вӕййы. Хотӕ ӕмӕ ’фсымӕрты фӕмысӕм ӕмӕ нӕ зӕрдӕ семӕ фӕдзуры, уӕлдайдӕр та нӕ кӕд, хицауад нӕ ныхмӕ цӕуын кӕй райдыдта, уый тыххӕй бахъуыд ацӕуын, уӕд (Матф. 10:23; 2 Кор. 11:28, 29). Ӕндӕр ранмӕ нӕ куы снысан кӕнынц, уӕд ма нӕ арӕх фӕхъӕуы ног ӕгъдӕуттыл ахуыр кӕнын. Ӕмӕ фӕстӕмӕ нӕхи бӕстӕмӕ куы аздӕхӕм, уӕд дӕр нын, гӕнӕн ис, ӕнцон ма уа ногӕй цӕуылдӕрты ахуыр кӕнын. Роберт ӕмӕ Мэри зӕгъынц: «Нӕ адӕмы культурӕ дӕр нал ӕмбӕрстам ӕмӕ, нӕхи ӕвзагыл хъусын кӕнын куыд хъӕуы, уый дӕр нал зыдтам. Раст цыма ӕцӕгӕлӕттӕ уыдыстӕм, афтӕ нӕм каст». Ӕххӕстрӕстӕг лӕггад кӕнын йӕ бон кӕмӕн нал вӕййы кӕнӕ ӕндӕр ранмӕ кӕй снысан кӕнынц, уыдон, гӕнӕн ис, ӕхцайӕ фӕтыхсой. Чи зоны, мӕт кӕной, дарддӕр куыд кӕндзысты, ууыл ӕмӕ сӕ ныфс дӕр асӕтта. Цы сын баххуыс кӕндзӕн ахӕм уавӕры?

6. Нӕ бон цы у аразын, цӕмӕй Йегъовӕмӕ ӕввахс уӕм?

⁶ Йегъовӕмӕ ӕввахс у (Иак. 4:8). Уый тыххӕй дӕ цы хъӕуы аразын? Дӕ ныфс дар, «куывдтытӕ чи хъусы, уыцы Хуыцауыл» (Пс. 65:2). Псаломы 62:8 стихы фыст ис: «Ӕргом ын кӕнут уӕ зӕрдӕтӕ». Йегъовӕйӕн йӕ бон у, «ӕрмӕст хъуыды дӕр цӕуыл акӕнӕм, уымӕй бирӕ фылдӕр саразын» (Еф. 3:20). Цӕй тыххӕй йӕм фӕкувӕм, ӕрмӕст уый нӕ саразы. Йӕ бон у, ӕмӕ, ӕнхъӕл дӕр куыд не стӕм, афтӕ нын баххуыс кӕна нӕ зындзинӕдты сӕрты ахизынӕн.

7. а) Ноджыдӕр ма нын цы баххуыс кӕндзӕн, цӕмӕй Йегъовӕмӕ ӕввахс уӕм? б) Дзуттӕгтӕм 6:10–12 стихтӕм гӕсгӕ, дарддӕр иузӕрдионӕй куы лӕггад кӕнӕм, уӕд нын уый цы пайда ӕрхӕсдзӕн?

⁷ Цӕмӕй Йегъовӕмӕ ӕввахс уай, уый тыххӕй Библи алы бон дӕр кӕс ӕмӕ йыл лӕмбынӕг хъуыды кӕн. Раздӕр миссионерӕй чи лӕггад кодта, иу ахӕм ӕфсымӕр загъта: «Алы къуыри дӕр бинонты ахуыр уадзут ӕмӕ ӕмбырдтӕм уӕхи цӕттӕ кӕнут, раздӕр куыд кодтат, афтӕ». Стӕй дарддӕр дӕр хъусын кӕныны хъуыддаджы зӕрдиагӕй архай ӕмӕ дӕ ног ӕмбырды хотӕ ӕмӕ ӕфсымӕртимӕ уацамынды цу. Йегъовӕ нӕ рох кӕны, иузӕрдионӕй йын чи лӕггад кӕны, уыдоны,  кӕд, раздӕр цас арӕзтой, уыйбӕрц аразын сӕ бон нал у, уӕддӕр. (Бакӕс Дзуттӕгтӕм 6:10–12.)

8. 1 Иоанны 2:15–17 стихтӕ нын куыд баххуыс кӕндзысты, цӕмӕй хуымӕтӕг цард кӕнӕм?

⁸ Хуымӕтӕг цард кӕн. Хӕйрӕджы дунейы бирӕтӕн сӕ сӕйраг мӕт у, фылдӕр мулк ӕмӕ ӕхца куыд самал кӕной, уый. Фӕлӕ ма бауадз, цӕмӕй дӕ ацы царды сагъӕстӕ Йегъовӕйӕн лӕггад кӕнын бахъыгдарой (Матф. 13:22). Йегъовӕйӕн чи нӕ лӕггад кӕны, уыдон дын, гӕнӕн ис, дзурой, зӕгъгӕ дӕ хъӕуы фылдӕр ӕхца бакусын, цӕмӕй хуыздӕр цӕрай. Ӕмӕ дын афтӕ, чи зоны, сӕ хорз зӕрдӕйӕ дзурой де ’мбӕлттӕ ӕмӕ дӕ хиуӕттӕ дӕр. Фӕлӕ-иу сӕ зондыл ма ацу. (Бакӕс 1 Иоанны 2:15–17.) Дӕ ныфс Йегъовӕйыл дар. Уый нын зӕрдӕ ӕвӕры, «бахъуаджы сахат» нын кӕй ратдзӕн, цы нӕ хъӕуы, уый. Йегъовӕ нын ӕххуыс кӕндзӕн, цӕмӕй нӕ уырнындзинад фидар уа ӕмӕ нӕ зӕрдӕйы уа фарн. Стӕй нӕ цух нӕ уадздзӕн, ӕнӕмӕнг нӕ цы хъӕуы, уыдӕттӕй (Дзут. 4:16; 13:5, 6).

9. Ӕмбисӕндты 22:3, 7 стихтӕм гӕсгӕ, хъӕуа-нӕ хъӕуа хӕстӕ цӕуылнӕ хъуамӕ исӕм ӕмӕ нын цы баххуыс кӕндзӕн раст уынаффӕтӕ хӕссынӕн?

⁹ Хъӕуа-нӕ хъӕуа хӕстӕ ма ис. (Бакӕс Ӕмбисӕндтӕ 22:3, 7.) Кӕд дӕ ӕндӕр ранмӕ ацӕуын бахъуыд, уӕд, чи зоны, дӕ хӕрдзтӕ дзӕвгар фӕфылдӕр сты, ӕмӕ уый тыххӕй, гӕнӕн ис, хӕстӕ фӕисай. Цӕмӕй хӕсты бын ма фӕуай, уый тыххӕй, ӕнӕмӕнг дӕ чи нӕ хъӕуы, ахӕм дзауматӕ кредитӕй ма ис. Адӕймаг тыхст уавӕры куы вӕййы, зӕгъӕм ӕй йӕ бинонтӕй искӕмӕ кӕсын куы фӕхъӕуы, уӕд ын хатт зын вӕййы аскъуыддзаг кӕнын, ӕхца ӕфстау цас райса, уый. Ахӕм уавӕрты Хуыцаумӕ зӕрдиагӕй кув, цӕмӕй дӕ бон уа раст уынаффӕтӕ хӕссын. Йегъовӕ дын дӕ куывдтытӕ фехъусдзӕн ӕмӕ дын баххуыс кӕндзӕн, цӕмӕй дӕ зӕрдӕ сабыр уа ӕмӕ дӕ бон уа бамбарын, хуыздӕр куыд уыдзӕн бакӕнын, уый (Фил. 4:6, 7; 1 Пет. 5:7).

10. Ног ӕмбӕлттӕ нын цӕй фӕрцы фӕзындзӕн?

¹⁰ Де ’мбӕлттимӕ ӕмӕ дӕ бинонтимӕ ӕнгом у. Цӕуыл тыхсыс ӕмӕ цы зындзинӕдтыл ӕмбӕлыс, уый тыххӕй-иу де ’мбӕлттӕн радзур, уӕлдайдӕр та, дӕ уавӕры чи уыд, уыдонӕн. Ӕмӕ дын уый фӕрцы дӕр фенцондӕр уыдзӕн (Еккл. 4:9, 10). Раздӕр кӕм лӕггад кодтай, уым дын, кӕй зӕгъын ӕй хъӕуы, ӕмбӕлттӕ фӕзынд. Фӕлӕ, ныр кӕм лӕггад кӕныс, уым дӕр дӕ хъӕуы ӕмбӕлттӕ ссарын. Ӕмӕ уый тыххӕй та дӕхӕдӕг дӕр хъуамӕ уай хорз ӕмбал. Дӕ бон цы у аразын, цӕмӕй дын ног ӕмбӕлттӕ фӕзына? Йегъовӕйӕн лӕггадгӕнгӕйӕ дыл цы цымыдисаг хабӕрттӕ ’рцыд, уыдон-иу хотӕ ӕмӕ ’фсымӕртӕн радзур, цӕмӕй уыдон дӕр уыной, дӕ лӕггад дын цы циндзинад хӕссы, уый. Чи зоны, ӕмбырды алчи ма бамбара, ӕххӕстрӕстӕг лӕггад цӕмӕн уарзыс, уый. Фӕлӕ дӕ чидӕртӕ та дӕ зынгзӕрдӕ лӕггады тыххӕй бауарздзысты, ӕмӕ хорз ӕмбӕлттӕ суыдзыстут. Ӕрмӕст ӕмбаргӕ у ӕмӕ, дӕхицӕн цы бантыст, уыдӕтты кой ӕгӕр арӕх ма кӕн, стӕй ӕдзух дӕ зындзинӕдты тыххӕй ма дзур.

11. Уӕ бон цы у аразын, цӕмӕй уӕ бинонтӕ ӕнгом уой?

¹¹ Чи зоны дӕ дӕ цардӕмбалимӕ, кӕм лӕггад кодтат, уырдыгӕй ацӕуын бахъуыд, йе ’нӕниздзинад  кӕй фӕцудыдта, уый тыххӕй. Фӕлӕ-иу ӕй ма аххосджын кӕн. Ӕмӕ кӕд уый де ’нӕниздзинадимӕ у баст, уӕд та дӕхи ма аххосджын кӕн, мӕ цардӕмбалы фӕфыдӕнхъӕл кодтон, зӕгъгӕ. Рох дӕ ма уӕд: сымах стут «иу буар», ӕмӕ Йегъовӕйы раз дзырд радтат, цыфӕнды куы ’рцӕуа, уӕддӕр кӕрӕдзийыл кӕй тыхсдзыстут (Матф. 19:5, 6). Кӕнӕ та уӕ, чи зоны, уый тыххӕй бахъуыд ацӕуын, ӕмӕ базыдтат, сывӕллон уын кӕй уыдзӕн, афтӕмӕй та цот уадзын нӕ фӕнд кодтат. Уӕд-иу уӕ сывӕллонӕн арӕх дзурут, тынг зынаргъ уын кӕй у ӕмӕ йӕ Хуыцауы «лӕварыл» кӕй нымайут, ӕмӕ уын сӕйраг, кӕм лӕггад кӕнут, уый кӕй нӕу (Пс. 127:3–5). Стӕй-иу ын радзурут, ӕххӕстрӕстӕг куыд лӕггад кодтат, уый тыххӕй. Афтӕмӕй уӕ сывӕллоны дӕр, гӕнӕн ис, бафӕнда ӕххӕстрӕстӕг лӕггад кӕнын.

12. а) Нӕ бон куыд у ӕххӕстрӕстӕг лӕггадгӕнджытӕн ӕххуыс кӕнын, цӕмӕй дарддӕр лӕггад кӕной? б) Нӕ бон цы у саразын, цӕмӕй ног уавӕртыл тагъддӕр сахуыр уой?

¹² Бирӕ ӕмбырдтӕ, стӕй хотӕ ӕмӕ ӕфсымӕртӕ дӕр сӕхӕдӕг ӕххӕстрӕстӕг лӕггадгӕнджытӕн феххуыс кӕнынц, цӕмӕй сӕ бон уа дарддӕр лӕггад кӕнын. Зӕгъӕм сын сӕ ныфсыл ныфс бафтауынц, ӕхцайӕ кӕнӕ сӕм ӕндӕр истӕмӕй фӕкӕсынц. Йе та кӕд дард кӕмдӕр лӕггад кӕнынц, уӕд сын сӕ бинонтӕн феххуыс кӕнынц (Гал. 6:2). Кӕд уе ’мбырдмӕ ӕххӕстрӕстӕг лӕггадгӕнджытӕй искӕйты снысан кодтой, уӕд уый ууыл дзурӕг нӕу, ӕмӕ сӕ хӕстӕ хорз не ’ххӕст кодтой кӕнӕ та цыдӕр рӕдыд ӕруагътой *. Ахӕм лӕггадгӕнджытӕн хъӕуы ӕххуыс кӕнын, цӕмӕй ног уавӕртыл тагъддӕр сахуыр уой. Зӕрдиагӕй-иу сыл бацин кӕн ӕмӕ-иу сӕ раппӕл, цы арӕзтой ӕмӕ цы аразынц, уый тыххӕй, кӕд, зӕгъӕм, ныртӕккӕ се ’нӕниздзинады тыххӕй сӕ бон бирӕ аразын нӕу, уӕддӕр. Семӕ хуыздӕр базонгӕ у.  Сӕ фӕлтӕрддзинад ӕмӕ дын сӕ зонындзинӕдтӕ стыр пайда ӕрхӕсдзысты.

13. Не ’мбырдмӕ ӕххӕстрӕстӕг лӕггадгӕнджытӕй искӕйты куы снысан кӕной, уӕд сын цӕмӕй уыдзӕн баххуыс кӕнӕн?

¹³ Ахӕм хотӕ ӕмӕ ӕфсымӕртӕн арӕх фӕхъӕуы баххуыс кӕнын, цӕмӕй цӕрӕнбынат ӕмӕ куыст ссарой. Йе та сын фӕхъӕуы бацамонын, цавӕр транспортыл ис цӕуӕн, хъалонтӕ фидын куыд хъӕуы ӕмӕ страховкӕ скӕнӕн куыд ис, уый. Фӕлӕ ӕппӕты ахсджиагдӕр у, цӕмӕй-иу сӕ бамбарӕм. Чи зоны, цавӕрдӕр низимӕ тох кӕнынц кӕнӕ сӕ бинонтӕй чидӕр рынчын у. Кӕнӕ та сыл, гӕнӕн ис, зиан ӕрцыд *. Йе та, чи зоны, тынг мысынц, кӕм лӕггад кодтой, уым сын цы ’мбӕлттӕ баззад, уыдоны, кӕд уый ӕргом не ’вдисынц, уӕддӕр. Арӕх сӕхӕдӕг дӕр нӕ фембарынц, сӕ зӕрдӕйы цытӕ фӕцӕуы, уый, ӕмӕ сӕ фӕхъӕуы рӕстӕг, цӕмӕй сӕхимӕ ӕрцӕуой.

14. Иу хойӕн бынӕттон хъусынгӕнджытӕ куыд баххуыс кодтой, цӕмӕй ног уавӕртыл сахуыр уыдаид?

¹⁴ Ахӕм лӕггадгӕнджытимӕ хъусын кӕнынмӕ куы цӕуай ӕмӕ йӕ куы уыной, куыд зынгзӕрдӕйӕ лӕггад кӕныс, уӕд ног уавӕртыл тагъддӕр сахуыр уыдзысты. Бирӕ азты дӕргъы ӕндӕр бӕстӕйы чи лӕггад кодта, иу ахӕм хо дзуры: «Кӕм лӕггад кодтон, уым-иу алы бон дӕр Библийы ахуыртӕ уагътон. Фӕлӕ ӕндӕр ран лӕггад кӕнын куы райдыдтон, уӕд-иу мын уым та искӕмӕн Библийӕ исты бакӕсын кӕнӕ видеоролик равдисын дӕр нӕ бантыст. Фӕлӕ мын бынӕттон хотӕ ӕмӕ ӕфсымӕртӕ ӕххуыс кодтой. Семӕ мӕ кодтой Библийы ахуыртӕм, стӕй, ногӕй бабӕрӕг кӕнын кӕй хъуыд, уыдонмӕ. Уыцы зынгзӕрдӕ ӕмӕ хъӕбатыр хъусынгӕнджытӕ Библийы ахуыртӕ куыд уадзынц ӕмӕ, кӕимӕ ахуыр кодтой, уыдонӕн сӕ уырнындзинад куыд фидар кӕны, уый уынгӕйӕ уыцы территоримӕ ӕндӕр цӕстӕй ракастӕн. Стӕй, адӕмимӕ ныхас куыд райдайынц, уымӕ кастӕн, ӕмӕ ӕз дӕр сахуыр дӕн. Ӕмӕ мын ӕппӕт уыдӕтты фӕрцы мӕ лӕггад ногӕй циндзинад хӕссын райдыдта».

15. Кӕд дӕ ӕндӕр ранмӕ снысан кодтой, уӕд дӕ бон цӕй фӕрцы у уым дӕр ӕнтыстджынӕй лӕггад кӕнын?

¹⁵ Кӕд дӕ ӕндӕр ранмӕ снысан кодтой, уӕд дӕ бон у уым дӕр ӕнтыстджынӕй лӕггад кӕнын. Афтӕ ма хъуыды кӕн, ӕмӕ, кӕм лӕггад кодтай, уым дӕ хӕстӕ хорз не ’ххӕст кодтай кӕнӕ та дӕ  ныр пайда нал ис. Ахъуыды-иу кӕн, Йегъовӕ дӕ царды куыд архайы, ууыл ӕмӕ дарддӕр хорз хабар хъусын кӕн. Фыццаг ӕнусы чи цард, уыцы иузӕрдион чырыстӕтты фӕзм. Уыдон алырдӕмты куы ныххӕлиу сты, уӕд «иу ранӕй иннӕ ранмӕ цыдысты ӕмӕ хъусын кодтой хорз хабар, Хуыцауы ныхас» (Хъуыд. 8:1, 4). Дарддӕр хъусын кӕныны хъуыддаджы куы архайай, уӕд уый хорз тыллӕг ӕрхӕсдзӕн. Зӕгъӕм, иу ран хицауад сӕ бӕстӕйӕ пионертӕй кӕйдӕрты куы рарвыста, уӕд уыдон ацыдысты хӕстӕг бӕстӕтӕй иумӕ. Уым дӕр хъуыди, пионертӕ цы ӕвзаг зыдтой, уыцы ’взагыл дзурӕг хъусынгӕнджыты ’ххуыс. Цалдӕр мӕймӕ дзы уыцы ’взагыл къордтӕ фӕзынд, ӕмӕ сӕм бирӕ адӕм ӕрбаиу.

16. Цы дын баххуыс кӕндзӕн, цӕмӕй ног бынаты дӕр цингӕнгӕйӕ лӕггад кӕнай?

¹⁶ Библийы фыст ис: «Йегъовӕ цы циндзинад дӕтты, уый у уӕ фидар мӕсыг» (Неем. 8:10). Кӕм лӕггад кӕнӕм, уым нӕ зӕрдӕмӕ тынг куы цӕуа, уӕддӕр нӕ циндзинад хъуамӕ ууыл баст ма уа. Не стырдӕр цин хъуамӕ уа, Йегъовӕимӕ нын цы хӕлардзинад ис, уый. Уӕдӕ Йегъовӕмӕ ӕввахс у ӕмӕ дзы зонд, разамынд ӕмӕ ӕххуыс кур. Рох дӕ ма уӕд, раздӕр кӕм лӕггад кодтай, уым дӕ зӕрдӕмӕ уымӕн кӕй цыд, ӕмӕ дзы адӕмӕн ӕппӕт зӕрдӕйӕ ӕххуыс кодтай. Уӕдӕ ног бынаты дӕр ӕппӕт зӕрдӕйӕ лӕггад кӕн, ӕмӕ дын Йегъовӕ ӕнӕмӕнг баххуыс кӕндзӕн, цӕмӕй уым дӕр дӕ лӕггад дӕ зӕрдӕмӕ цӕуа (Еккл. 7:10).

17. Ныртӕккӕ цы хӕстӕ ӕххӕст кӕнӕм, уыдоны тыххӕй цы ис зӕгъӕн?

¹⁷ Хъуамӕ нӕ зӕрдыл дарӕм, Йегъовӕйӕн ӕнустӕм кӕй лӕггад кӕндзыстӕм, ныр цы хӕстӕ ӕххӕст кӕнӕм, уыдон та рӕстӕгмӕ кӕй сты. Ног дунейы, гӕнӕн ис, не ’ппӕт дӕр бынтон ӕндӕр хӕстӕ ӕххӕст кӕнӕм. Статьяйы райдианы кӕй кой кодтам, уыцы Алексей загъта, йӕ лӕггады цы ивындзинӕдтӕ ’рцыд, уыдон ӕй кӕй цӕттӕ кӕнынц, ног дунейы цы ивындзинӕдтӕ ’рцӕудзӕн, уыдонмӕ. «Йегъовӕ удӕгас Хуыцау кӕй у, стӕй ног дуне кӕй уыдзӕн, уый нырмӕ дӕр куыннӕ зыдтон. Фӕлӕ ныр Йегъовӕ ис мӕ цӕстыты раз ӕмӕ мӕ ноджы тынгдӕр уырны, ног дуне къӕсӕрыл кӕй ис»,– загъта Алексей (Хъуыд. 2:25). Уӕдӕ кӕмфӕнды ма лӕггад кӕнӕм ӕмӕ цавӕрфӕнды хӕстӕ ма ӕххӕст кӕнӕм,– цӕй ӕмӕ Йегъовӕмӕ алкӕддӕр ӕввахс уӕм. Йегъовӕ нӕ никуы ныууадздзӕн. Уый нын ӕххуыс кӕндзӕн, цӕмӕй йын кӕмфӕнды дӕр цингӕнгӕйӕ лӕггад кӕнӕм (Ис. 41:13).