1. Фӕстаг азты иуӕй-иу бӕстӕты цы фӕивта?

РАГӔЙ фӕстӕмӕ дӕр дины хабар афтӕ уыд, ӕмӕ зӕххыл цӕрӕг адӕмӕн сӕ фылдӕр динтыл хӕст уыдысты. Фӕлӕ фӕстаг азты уавӕр тынг фӕивта. Фылдӕрӕй-фылдӕр кӕнынц, йӕхи уырнӕгыл чи нӕ нымайы, ахӕм адӕм. Суанг ма кӕцыдӕр бӕстӕты адӕмӕн сӕ фылдӕр сӕхи уырнӕг нӕ хонынц * (Матф. 24:12).

2. Йӕхи уырнӕг чи нӕ хоны, ахӕм адӕм фылдӕрӕй-фылдӕр цӕмӕн кӕнынц?

² Цымӕ цӕмӕн фылдӕр кӕнынц, уырнӕг чи нӕу кӕнӕ йӕхи уырнӕг адӕймагыл чи нӕ нымайы, ахӕм адӕм? * Кӕмӕндӕрты сӕйраг сты ирхӕфсӕнтӕ, кӕмӕндӕрты та царды сагъӕстӕ ӕнцой нӕ дӕттынц (Лук. 8:14). Чидӕртӕ систы атеисттӕ. Кӕйдӕрты та Хуыцау уырны, фӕлӕ фӕзӕгъынц, зӕгъгӕ, дам, дин адӕмы хъуыди раджы заманты, нӕ рӕстӕджы та никӕй хъӕуы ӕмӕ, дам, ницы пайда у. Стӕй ма фӕзӕгъынц, динӕн, дам, наукӕимӕ иумӕйагӕй ницы ис, стӕй, дам, ӕмбаргӕ адӕймаг диныл хӕст куыд хъуамӕ уа. Уыдон се ’мбӕлттӕй, сӕ ахуыргӕнджытӕй йе та телевизоры фехъусынц (кӕнӕ интернеты бакӕсынц), цард эволюцийы фӕрцы кӕй фӕзынд. Фӕлӕ Хуыцауыл ӕууӕндӕн цӕмӕн ис, уымӕн та сын фидар бӕлвырдгӕнӕнтӕ ничи ’рхӕссы. Иуӕй-иутӕн дин фенад дины разамонджыты тыххӕй, уымӕн ӕмӕ сты ӕхцауарзаг ӕмӕ сӕ фӕнды, цӕмӕй сӕ къухы фылдӕр бартӕ уа. Кӕцыдӕр бӕстӕты та хицауад адӕмӕн бар нӕ дӕтты, цӕмӕй Хуыцауӕн сӕрибарӕй лӕггад кӕной.

3. Ацы статьяйӕн йӕ нысан цы у?

 ³ Йесо нын бафӕдзӕхста: «Ӕппӕт адӕмтӕй дӕр цӕттӕ кӕнут ахуыргӕнинӕгтӕ» (Матф. 28:19). Уӕдӕ нӕ бон куыд у, уырнӕг чи нӕу, ахӕм адӕмӕн баххуыс кӕнын, цӕмӕй Хуыцауы бауарзой ӕмӕ Чырыстийы ахуыргӕнинӕгтӕ суой? Хъуамӕ ӕмбарӕм, адӕймаг нӕм куыд байхъусы, уый арӕх баст кӕй вӕййы, кӕм схъомыл, ууыл. Зӕгъӕм, Европӕйӕ чи у, уый хорз хабармӕ иу цӕстӕй ракӕсы, Азийӕ чи у, уый та – ӕндӕр цӕстӕй. Цымӕ цӕмӕн? Европӕйы бирӕтӕ Библийӕ цыдӕртӕ зонынц ӕмӕ фехъуыстой, ӕппӕт дӕр Хуыцау кӕй сфӕлдыста. Азийы та кӕд иуӕй-иутӕ Библийӕ гыццыл цыдӕртӕ фӕзонынц, уӕддӕр бирӕтӕ уый тыххӕй ницы зонынц. Иуӕй-иу азиаг бӕстӕты адӕмӕй бирӕты нӕ уырны, Сфӕлдисӕг кӕй ис, уый. Ӕмӕ ацы статьяйӕн йӕ нысан у, цӕмӕй нын баххуыс кӕна, уацамынды кӕуыл фембӕлӕм, уыцы адӕмы зӕрдӕтӕм фӕндаг ссарынӕн, кӕцӕйфӕнды ма уой ӕмӕ сӕ цыфӕнды ма уырна, уӕддӕр.

4. Афтӕ цӕуылнӕ хъуамӕ хъуыды кӕнӕм, ӕмӕ, йӕхи уырнӕг чи нӕ хоны, уыдон никуы фӕивдзысты?

⁴ Афтӕ ма хъуыды кӕн, ӕмӕ никуы фӕивдзысты. Йӕхи уырнӕг чи нӕ фӕхоны, уыдонӕй алы аз дӕр бирӕтӕ свӕййынц Йегъовӕйы Ӕвдисӕнтӕ. Бирӕтӕ дзы уый размӕ дӕр хӕрзӕгъдау цард кодтой, фӕлӕ сын уырнӕг адӕмы цӕстмӕ митӕ ӕнад уыдысты. Чидӕртӕ та ӕнӕгъдау цард кодтой, ӕмӕ сӕ хъуыди се ’взӕр хъуыддӕгтӕ ныууадзын. Хъуамӕ нӕ фидарӕй уырна, Йегъовӕйы фӕрцы кӕй ссардзыстӕм, «ӕнусон царды фӕндагыл цӕуын кӕй фӕнды», уыцы адӕмы (Хъуыд. 13:48; 1 Тим. 2:3, 4).

5. Арӕх адӕмы зӕрдӕтӕ цӕмӕй бацагайӕм?

⁵ Семӕ фӕлмӕнӕй ӕмӕ уӕзданӕй дзур. Арӕх адӕмы зӕрдӕтӕ бацагайӕм, цы сын фӕдзурӕм, уымӕй нӕ, фӕлӕ, семӕ куыд фӕныхас кӕнӕм, уымӕй. Ӕхсызгон сын вӕййы, семӕ фӕлмӕнӕй ӕмӕ уӕзданӕй куы фӕдзурӕм, стӕй йӕ куы фӕуынынц, сӕ хорзыл кӕй хъуыды кӕнӕм. Цы зӕгъинаг стӕм, уымӕ байхъусын сӕ куы нӕ фӕфӕнды, уӕд сыл нӕ ныттыххӕй вӕййӕм. Хъуамӕ-иу бацархайӕм, динмӕ ахӕм цӕстӕй цӕмӕн кӕсынц, уый бамбарыныл. Зӕгъӕм, иуӕй-иутӕ ӕнӕзонгӕ адӕмимӕ дины тыххӕй ныхас кӕнын нӕ уарзынц. Кӕмӕдӕрты та ӕнахуыр фӕкӕсы, исчи сӕ Хуыцауы тыххӕй куы фӕфӕрсы. Чидӕртӕ фӕтӕрсынц, исчи сӕ Библи кӕсгӕ куы фена, уымӕй, уӕлдайдӕр сын Йегъовӕйы Ӕвдисӕнтӕ Библийӕ цыдӕр куы фӕкӕсынц, уӕд. Куыдфӕнды ма уа,– хъуамӕ адӕмыл хъуыды кӕнӕм ӕмӕ-иу сӕ бамбарӕм (2 Тим. 2:24, фип.).

6. Апостол Павел, кӕмӕн цы дзурын хъӕуы, уый кӕй зыдта, уый цӕмӕй бӕрӕг уыд ӕмӕ йӕ нӕ бон куыд у бафӕзмын?

⁶ Искӕй зӕрдӕмӕ куы нӕ цӕуа, ахӕм ныхӕстӕ кӕй дзурӕм, зӕгъӕм, «Библи», «Хуыцау» кӕнӕ «дин», уӕд та цы ис саразӕн? Нӕ бон у апостол Павелы бафӕзмын ӕмӕ ахӕм адӕмимӕ ӕндӕрхуызон ныхас кӕнын. Дзуттӕгтимӕ куы ныхас кодта, уӕд сын бӕлвырдгӕнӕнтӕ комкоммӕ Фыстадӕй хаста. Фӕлӕ Ареопагыл грекъаг философтимӕ куы ныхас кодта, уӕд сын нӕ загъта, цы дзуры, уый Фыстадӕй кӕй у (Хъуыд. 17:2, 3, 22–31). Нӕ бон куыд у Павелы бафӕзмын? Библийыл чи не ’ууӕнды, ахӕм адӕймагимӕ ныхасгӕнгӕйӕ хуыздӕр уаид, куы нӕ йын дзуриккам, Библийы афтӕ ӕмӕ афтӕ фыст ис, зӕгъгӕ. Кӕнӕ, зӕгъӕм, бамбӕрстам, адӕймаджы кӕй нӕ фӕнды, цӕмӕй исчи фена, Библийӕ йын цыдӕр кӕй кӕсӕм. Уӕд ын ӕй ис телефоны кӕнӕ планшеты равдисӕн.

7. 1 Коринфӕгтӕм 9:20–23 стихты Павелы тыххӕй цы фыст ис ӕмӕ йӕ нӕ бон куыд у бафӕзмын?

⁷ Цавӕрдӕр хъуыдытыл хӕст цӕмӕн сты, уый-иу бамбар ӕмӕ-иу сӕм лӕмбынӕг байхъус. Хъуамӕ-иу бацархайӕм, адӕймаг цавӕрдӕр хъуыдыйыл хӕст цӕмӕн у, уый бамбарыныл (Ӕмб. 20:5). Ногӕй та Павелы цӕвиттоныл ахъуыды кӕнӕм. Уый схъомыл дзуттӕгты ’хсӕн. Ӕмӕ, ӕндӕр адӕмыхӕттытӕй чи уыд, уыдонимӕ-иу ӕй ӕндӕрхуызон хъуыди ныхас кӕнын, уымӕн ӕмӕ уыдон Йегъовӕйы тыххӕй ӕмӕ, Фыстад цы дзуры, уый тыххӕй бирӕ ницы зыдтой, йе та ӕппындӕр ницы зыдтой. Нӕ территорийы адӕм цавӕрдӕр хъуыдытыл хӕст цӕмӕн сты, уый хуыздӕр бамбарыны тыххӕй нӕ бон у уый фӕдыл ӕрмӕг  раиртасын кӕнӕ фӕлтӕрдджын хъусынгӕнджытимӕ аныхас кӕнын. (Бакӕс 1 Коринфӕгтӕм 9:20–23.)

8. Библийы тыххӕй ныхас райдайӕн куыд ис?

⁸ Махӕн нӕ нысан у «аккаг» адӕмы ссарын (Матф. 10:11). Цӕмӕй уыцы хъуыддаджы ӕнтыстджын уӕм, уый тыххӕй хорз уыдзӕн, адӕмы-иу сӕ хъуыдыйӕ куы бафӕрсӕм ӕмӕ-иу сӕм стӕй лӕмбынӕг куы байхъусӕм. Английы иу ӕфсымӕр адӕмы фӕфӕрсы, бинонтӕ амондджын цӕй фӕрцы уыдзысты, сывӕллӕтты хъомыл кӕнын куыд хъӕуы кӕнӕ хӕрам хъуыддӕгтӕн быхсӕн куыд ис, уый фӕдыл цы хъуыды кӕнынц, уымӕй. Дзуапп куы раттынц, уӕд сын фӕзӕгъы: «Мӕнӕ ацы уынаффӕ фыст ӕрцыд 2 000 азы размӕ. Ӕмӕ дӕм куыд кӕсы, хорз уынаффӕ у?» Уый фӕстӕ сын йӕ телефоны равдисы, рагацау кӕй бацӕттӕ кӕны, уыцы стихтӕ. Фӕлӕ, Библийӕ кӕй сты, уый нӕ фӕзӕгъы.

9. Хуыцауы тыххӕй ныхас кӕнын кӕй нӕ фӕфӕнды, уыцы адӕмы зӕрдӕтӕм фӕндаг ссарӕн куыд вӕййы?

⁹ Хуыцауы тыххӕй ныхас кӕнын кӕй нӕ фӕфӕнды, уыцы адӕмы зӕрдӕтӕм дӕр вӕййы фӕндаг ссарӕн. Нӕ бон у семӕ аныхас кӕнын, цымыдисаг сӕм цы кӕсы, ахӕм истӕуыл. Зӕгъӕм, бирӕты дисы ӕфтауынц, ӕрдзы цы ис, уыдӕттӕ. Ӕмӕ ныхас уаид афтӕ райдайӕн: «Ӕвӕццӕгӕн ӕй зоныс, ахуыргӕндтӕ бирӕ цыдӕртӕ кӕй ӕрымысыдысты, ӕрдзы цы ис, уымӕ гӕсгӕ. Зӕгъӕм, ног микрофонтӕ чи ’рхъуыды кӕны, уыдон иртасынц, цӕрӕгойты хъустӕ куыд конд сты, уый. Ног камерӕтӕ чи ’рхъуыды кӕны, уыдон та иртасынц, цӕрӕгойты цӕстытӕ куыд конд сты, уый. Ӕмӕ куыд хъуыды кӕныс, хъус ӕмӕ цӕст та чи скодта?» Адӕймаг нын цы зӕгъдзӕн, уымӕ лӕмбынӕг куы байхъусӕм, уӕд ма уыдзӕн бафтауӕн: «Мӕнмӕ диссаг фӕкастысты иу рагон фыссӕджы ныхӕстӕ: „Ау, адӕймагӕн хъустӕ чи радта, уый ницы хъусы? Кӕнӕ, цӕстытӕ чи скодта, уый ницы уыны? ...Адӕймагӕн зонындзинӕдтӕ чи дӕтты, уый уайдзӕф нӕ бакӕндзӕн?“ Иуӕй-иу ахуыргӕндтӕ дӕр разы сты ацы ныхӕстимӕ ӕмӕ сӕ уырны, ӕппӕт дӕр чидӕр кӕй сфӕлдыста» (Пс. 94:9, 10). Уый фӕстӕ йын нӕ бон у равдисын, нӕ интернет-телеуынынады, рубрикӕйы «Цард куыд фӕзынд» цы видеороликтӕ ис, уыдонӕй искӕцы. (Кӕс ВИДЕОАРХИВ > ИНТЕРВЬЮТӔ ӔМӔ ЦАУТӔ.) Кӕнӕ та йын раттӕн ис брошюрӕ «У истоков жизни. Пять вопросов, которые требуют ответа».

10. Хуыцауы тыххӕй ныхас кӕнын кӕй нӕ фӕфӕнды, уыдонимӕ ма ноджыдӕр цӕуыл ис аныхас кӕнӕн?

¹⁰ Адӕмӕн сӕ фылдӕр бӕллынц хуыздӕр фидӕнмӕ. Фӕлӕ бирӕтӕ тӕрсынц, зӕхх кӕй фесӕфдзӕн кӕнӕ иу бон цӕрынӕн кӕй нал бӕздзӕн, уымӕй. Норвегийӕ иу районон цӕстдарӕг куыд зӕгъы, афтӕмӕй, Хуыцауы тыххӕй ныхас кӕнын кӕй нӕ фӕфӕнды, уыдонӕй бирӕтӕ зӕрдиагдӕрӕй фӕныхас кӕнынц, дунейы цы  хабӕрттӕ цӕуы, уыдоныл. Уыцы ӕфсымӕр адӕймагӕн салам ратты ӕмӕ йӕ стӕй бафӕрсы: «Куыд хъуыды кӕныс, фидӕны нӕм цавӕр цард ӕнхъӕлмӕ кӕсы? Нӕ ныфс кӕуыл хъуамӕ дарӕм: политиктыл, ахуыргӕндтыл ӕви ӕндӕр искӕуыл?» Уый фӕстӕ йӕм лӕмбынӕг байхъусы ӕмӕ йын бакӕсы, хуыздӕр фидӕны кой кӕм ис, Библийӕ ахӕм стих, йе та йын ӕй йӕхи ныхӕстӕй фӕзӕгъы. Иуӕй-иутӕ куы базонынц, зӕхх кӕй никуы фесӕфдзӕн ӕмӕ йыл ӕнустӕм хорз адӕм кӕй цӕрдзысты, уӕд сӕ бафӕнды фылдӕр базонын (Пс. 37:29; Еккл. 1:4).

11. Цӕмӕн хъуамӕ фӕлварӕм адӕмимӕ ныхас алыхуызӕтты райдайыныл? Ромӕгтӕм 1:14–16 стихты Павелы тыххӕй цы фыст ис ӕмӕ йӕ нӕ бон куыд у бафӕзмын?

¹¹ Хорз уаид, адӕмимӕ алыхуызӕтты куы фӕлвариккам ныхас райдайыныл. Цӕмӕн? Уымӕн ӕмӕ адӕм кӕрӕдзийӕ хицӕн кӕнынц. Иу адӕймагмӕ цымыдисаг цы фӕкӕса, ууыл, гӕнӕн ис, иннӕйы дзурын дӕр ма бафӕнда. Иутӕ Хуыцауы кӕнӕ Библийы тыххӕй зӕрдиагӕй фӕныхас кӕнынц, ӕмӕ семӕ вӕййы ныхас уымӕй райдайӕн. Иннӕтимӕ та фыццаг фӕхъӕуы ӕндӕр истӕуыл аныхас кӕнын. Куыдфӕнды ма уа,– хъуамӕ архайӕм алыхуызон адӕмимӕ ныхас кӕныныл. (Бакӕс Ромӕгтӕм 1:14–16.) Фӕлӕ нӕ хъуамӕ рох ма уа, сыгъдӕгзӕрдӕ адӕмы зӕрдӕты рӕстдзинад Йегъовӕ кӕй сырӕзын кӕны (1 Кор. 3:6, 7).

12. Азиаг бӕстӕтӕй чи у ӕмӕ, Сфӕлдисӕг ис ӕви нӕ, ууыл чи никуы хъуыды кодта, уыдоны зӕрдӕтӕм куыд ис фӕндаг ссарӕн?

¹² Ӕгас дунейы дӕр хъусынгӕнджытӕй бирӕтӕ сӕмбӕлынц, Азийы бӕстӕтӕй чи у, ахӕм адӕмыл. Чидӕртӕ сӕ вӕййынц, хицауад динтӕн сӕрибарӕй архайыны бар кӕм нӕ дӕтты, ахӕм бӕстӕтӕй. Иуӕй-иу азиаг бӕстӕты бирӕтӕ арф никуы хъуыды кодтой, Сфӕлдисӕг ис ӕви нӕ, ууыл. Ӕмӕ иуӕй-иутӕн уый кой куы скӕнай, уӕд сӕ бафӕнды фылдӕр базонын, ӕмӕ Библи ахуыр кӕныныл сразы вӕййынц. Фӕлӕ чидӕртӕ та афтӕ сты, ӕмӕ, ног цыдӕр куы фехъусынц, уӕд сӕ фыццаг нӕ бафӕнды ууыл ныхас кӕнын. Куыд ис ахӕм адӕмы зӕрдӕтӕм фӕндаг ссарӕн? Фӕлтӕрд хъусынгӕнджытӕ фӕкӕнынц афтӕ: семӕ уал ӕнӕуи ныхӕстӕ кӕнын райдайынц, сӕхимӕ дӕр сын байхъусынц ӕмӕ равдисынц, кӕй сыл тыхсынц, уый. Стӕй, уавӕр куы фӕамоны, уӕд сын радзурынц, Библийы уагӕвӕрдты фӕрцы сӕхи цард хуыздӕрырдӕм куыд фӕивта, уый тыххӕй.

13. Цы ис саразӕн, цӕмӕй адӕймаджы бафӕнда Библийӕ фылдӕр базонын? (Кӕс нывмӕ ӕддаг цъарыл.)

¹³ Бирӕтӕн фыццаг сӕ зӕрдӕ бацагайынц, Библийы цы зондджын уынаффӕтӕ ис, уыдон (Еккл. 7:12). Нью-Йорчы иу хо фӕхъусын кӕны китайӕгтӕн. Ӕмӕ мӕнӕ цы зӕгъы: «Семӕ афтӕ фӕныхас кӕнын, цӕмӕй-иу бамбарой, кӕй сыл тыхсын, стӕй сӕм лӕмбынӕг байхъусын. Куы йӕ базонын, ӕндӕр бӕстӕйӕ ӕрӕджы кӕй ӕрцыдысты, уӕд сӕ афӕрсын: „Ног бынатыл гыццыл ацахуыр дӕ? Куыст ссардтай? Амы адӕм дӕм цы цӕстӕй кӕсынц?“» Иуӕй-иу хатт ын уый фӕрцы фӕзыны фадат, цӕмӕй сын Библийы ахуырӕдтӕй искӕцымӕ сӕ хъус ӕрдара. Уавӕр куы фӕамоны, уӕд ма фӕзӕгъы: «Куыд хъуыды кӕныс, адӕймагӕн цы баххуыс кӕндзӕн, цӕмӕй иннӕтимӕ хӕларӕй цӕра? Фӕнды мӕ Библийы дын иу ӕмбисонд равдисын: „Хылӕн йӕ райдайӕн у, дон куыд ратона, уый хуызӕн. Уӕдӕ цалынмӕ хыл нӕ райдыдта, уӕдмӕ ацу“. Куыд дӕм кӕсы, ацы уынаффӕ нын нӕ баххуыс кӕнид иннӕтимӕ хӕларӕй цӕрынӕн?» (Ӕмб. 17:14). Адӕмимӕ афтӕ куы ныхас кӕнӕм, уӕд-иу бамбардзыстӕм, ногӕй сӕ бабӕрӕг кӕнын хъӕуы ӕви нӕ.

14. Иу азиаг бӕстӕйы иу ӕфсымӕр, Хуыцау кӕй нӕ уырны, уыцы адӕмимӕ куыд фӕныхас кӕны?

¹⁴ Афтӕ чи фӕзӕгъы, мӕн Хуыцау нӕ уырны, зӕгъгӕ, уыцы адӕмимӕ куыд ис аныхас кӕнӕн? Иу азиаг бӕстӕйы иу ӕфсымӕр рагӕй хъусын кӕны, уырнӕг чи нӕу, ахӕм адӕмӕн, ӕмӕ уый радзырдта: «Ам исчи афтӕ куы фӕзӕгъы, мӕн Хуыцау нӕ уырны, зӕгъгӕ, уӕд ӕй уымӕй арӕхдӕр фӕфӕнды зӕгъын, ӕмӕ, бынӕттон адӕм цы хуыцӕуттӕн кувынц, уыдоныл не ’ууӕнды. Ӕмӕ йын ӕз дӕр фӕзӕгъын, сӕ фылдӕр  ӕрымысгӕ хуыцӕуттӕ кӕй сты ӕмӕ, уӕвгӕ, хуыцӕуттӕ дӕр кӕй не сты. Ахӕм адӕмӕн ма арӕх бакӕсын Йеремийы 16:20 стих: „Зӕххон адӕймагӕн йӕ бон хуыцӕуттӕ скӕнын у? Цы скӕны, уыдон цӕй хуыцӕуттӕ сты!“ Уый фӕстӕ сӕ бафӕрсын: „Куыд ис базонӕн, ӕцӕг хуыцау кӕцы у ӕмӕ ӕрымысгӕ хуыцӕуттӕ кӕцытӕ сты, уый?“ Лӕмбынӕг сӕм байхъусын ӕмӕ сын стӕй бакӕсын Исайы 41:23 стих: „Радзурут нын, уый фӕстӕ цы уыдзӕн, уый, цӕмӕй йӕ базонӕм, хуыцӕуттӕ кӕй стут“. Ӕмӕ сын ӕрхӕссын цӕвиттон, Йегъовӕ-иу фидӕны тыххӕй цы загъта, уый-иу куыд сӕххӕст, уымӕн».

15. Скӕсӕн Азийы иу ӕфсымӕр куыд хъусын кӕны, уымӕй йӕ нӕ бон куыд у бафӕзмын?

¹⁵ Скӕсӕн Азийы иу ӕфсымӕр адӕммӕ ногӕй куы бацӕуы, уӕд семӕ куыд фӕныхас кӕны, уый тыххӕй дзуры: «Равдисын сын, Библийы цы зондджын уынаффӕтӕ ис кӕнӕ Библийы пехуымпарӕдтӕй чи сӕххӕст, уыдонӕй искӕцы. Стӕй ма семӕ фӕныхас кӕнын ӕрдз, стъалытӕ ӕмӕ планетӕты тыххӕй. Уый фӕстӕ сын бамбарын кӕнын, уыдӕттӕ куыд бӕлвырд кӕнынц, удӕгас ӕмӕ зондджын Сфӕлдисӕг кӕй ис. Адӕймаг куы сразы вӕййы, ӕвӕццӕгӕн, Хуыцау ӕцӕгдӕр ис, зӕгъгӕ, уӕд ын равдисын, Библийы Йегъовӕйы тыххӕй цы фыст ис, уый».

16. Дзуттӕгтӕм 11:6 стихмӕ гӕсгӕ, Библи кӕимӕ ахуыр кӕнӕм, уыдон Хуыцауыл ӕмӕ Библийыл цӕмӕн хъуамӕ баууӕндой ӕмӕ сын нӕ бон куыд у уыцы хъуыддаджы баххуыс кӕнын?

¹⁶ Уырнӕг чи нӕу, ахӕм адӕмимӕ Библи куы ахуыр кӕнӕм, уӕд сын хъуамӕ ӕдзух ӕххуыс кӕнӕм, цӕмӕй баууӕндой, Хуыцау кӕй ис, ууыл. (Бакӕс Дзуттӕгтӕм 11:6.) Стӕй ма сын хъуамӕ ӕххуыс кӕнӕм, цӕмӕй Библийыл дӕр баууӕндой. Ӕмӕ уый тыххӕй, гӕнӕн ис, бахъӕуа уыцы иу ахуырӕдтыл цалдӕр хатты дӕр аныхас кӕнын. Чи зоны, хорз уаид алы ахуыры рӕстӕг дӕр аныхас кӕнын, Библи Хуыцауы Ныхас кӕй у, уымӕн цы бӕлвырдгӕнӕнтӕ ис, уыдоныл. Зӕгъӕм, цыбыртӕй аныхас кӕнӕн ис, чи сӕххӕст, уыцы пехуымпарӕдтыл, науӕд та, Библи наукӕмӕ ӕмӕ историмӕ гӕсгӕ раст кӕй у кӕнӕ нын Библийы уынаффӕтӕ царды цы пайда сты, ууыл.

17. Адӕмы куы уарзӕм, уӕд сын афтӕмӕй куыд баххуыс кӕндзыстӕм?

¹⁷ Уӕлдай нӕу, адӕм уырнӕг уой ӕви нӕ,– куы сӕ уарзӕм, уӕд сын баххуыс кӕндзыстӕм, цӕмӕй Чырыстийы ахуыргӕнинӕгтӕ суой (1 Кор. 13:1). Ӕмӕ сын рӕстдзинад куы фӕамонӕм, уӕд нӕ нысан вӕййы, цӕмӕй сын равдисӕм, Хуыцау сӕ кӕй уарзы ӕмӕ йӕ кӕй фӕнды, цӕмӕй йӕ уыдон дӕр бауарзой. Алы аз дӕр донаргъуыд чи райсы, уыдонӕй мингӕйттӕ вӕййынц, раздӕр динмӕ уӕлӕнгай цӕстӕй чи каст кӕнӕ дин нымады дӕр кӕмӕ нӕ уыд, ахӕм адӕм. Цӕмӕн скӕнынц уыцы къахдзӕф? Уымӕн ӕмӕ Хуыцауы бауарзынц. Уӕдӕ алыхуызон адӕммӕ раст цӕстӕй кӕс ӕмӕ-иу равдис, кӕй сӕ уарзыс ӕмӕ сыл кӕй тыхсыс. Лӕмбынӕг-иу сӕм байхъус ӕмӕ-иу бацархай, цавӕрдӕр хъуыдыйыл хӕст цӕмӕн сты, уый бамбарыныл. Фӕзминаг сын у ӕмӕ сын афтӕмӕй баххуыс кӕн, цӕмӕй Чырыстийы ахуыргӕнинӕгтӕ суой.