1. Йегъовӕйы коммӕ цӕмӕн хъуамӕ кӕсӕм?

ЙЕГЪОВӔ не Сфӕлдисӕг кӕй у, уымӕ гӕсгӕ хъуамӕ йӕ коммӕ кӕсӕм. Йегъовӕйӕн уый бар ис, ӕмӕ, кӕй сфӕлдыста, уыдонӕн амона, куыд хъуамӕ цӕрой, уый (Рарг. 4:11). Фӕлӕ ма йӕ коммӕ уый тыххӕй дӕр хъуамӕ кӕсӕм, ӕмӕ уымӕй хуыздӕр Хицау нӕй. Рагӕй фӕстӕмӕ дӕр адӕмӕн бирӕ хицӕуттӕ ӕмӕ паддзӕхтӕ уыд. Фӕлӕ сӕ хицаудзинад Йегъовӕйы хицаудзинадимӕ абарӕн дӕр нӕй. Йегъовӕйы хуызӕн зондджын, уарзӕгой, фӕлмӕнзӕрдӕ ӕмӕ тӕригъӕдгӕнаг хицау никуы уыд (Рац. 34:6; Ром. 16:27; 1 Иоан. 4:8).

2. Дзуттӕгтӕм 12:9–11 стихтӕм гӕсгӕ, Йегъовӕйы коммӕ цӕмӕн хъуамӕ кӕсӕм?

² Йегъовӕйы фӕнды, цӕмӕй йӕ коммӕ кӕсӕм, кӕй йӕ уарзӕм, стӕй нӕ Фыд кӕй у ӕмӕ нӕ уый дӕр кӕй уарзы, сӕйраджыдӕр уый тыххӕй, йӕ зӕрдӕхудты бацӕуынӕй кӕй тӕрсӕм, уый тыххӕй нӕ, фӕлӕ. Павел йӕ фыстӕджы Дзуттӕгтӕм ныффыста, Йегъовӕ нӕ «нӕхи пайдайӕн» кӕй ахуыр кӕны ӕмӕ уымӕ гӕсгӕ йӕ коммӕ кӕй хъуамӕ кӕсӕм. (Бакӕс Дзуттӕгтӕм 12:9–11.)

3. а) Йегъовӕйы коммӕ кӕй кӕсӕм, уый цӕмӕй вӕййы бӕрӕг? б) Цавӕр фарстатӕн базондзыстӕм дзуапп?

³ Йегъовӕйы коммӕ кӕй кӕсӕм, уый цӕмӕй вӕййы бӕрӕг? Алы хъуыддаджы дӕр ӕм фӕхъусӕм ӕмӕ фӕархайӕм, цӕмӕй-иу нӕхи зондӕй ныфсджын ма уӕм (Ӕмб. 3:5). Йегъовӕйы коммӕ кӕсын нын ӕнцондӕр вӕййы, йӕ рӕсугъд миниуджыты тыххӕй йын фылдӕр куы базонӕм ӕмӕ, уыцы миниуджытӕ йе ’ппӕт хъуыддӕгты дӕр кӕй зынынц, уый куы фембарӕм, уӕд (Пс. 145:9). Ӕмӕ Йегъовӕйы тыххӕй фылдӕр куы базонӕм, уӕд ӕй ноджы тынгдӕр бауарзӕм. Йегъовӕйы куы уарзӕм, уӕд нӕ дӕргъӕй-дӕргъмӕ номхыгъд нӕ хъӕудзӕн, цы хъуамӕ аразӕм  ӕмӕ цы хъуамӕ ма аразӕм, уый фӕдыл. Мах архайдзыстӕм, цӕмӕй, хорз цы у, ууыл хъуыды кӕнӕм ӕмӕ хорздзинад уарзӕм, стӕй ӕвзӕрдзинадӕй нӕхи хизӕм (Пс. 97:10). Фӕлӕ нын хатт ӕнцон нӕ вӕййы Йегъовӕйы коммӕ кӕсын. Цымӕ цӕуылнӕ? Ӕмӕ хистӕр нӕлгоймӕгтӕн, стӕй фыдӕн ӕмӕ мадӕн сӕ бон зондӕн райсын цы у Неемийы, паддзах Давиды ӕмӕ Йесойы мад Марийӕйы цӕвиттонтӕй? Ацы статьяйы дзуапп базондзыстӕм ацы фарстатӕн.

4, 5. Ромӕгтӕм 7:21–23 стихты цы фыст ис, уымӕ гӕсгӕ нын хатт ӕнцон цӕуылнӕ вӕййы Йегъовӕйы коммӕ кӕсын?

⁴ Йегъовӕйы коммӕ кӕсын нын хатт ӕнцон нӕ вӕййы, не ’ппӕт дӕр нӕ туджы тӕригъӕд кӕй рахастам ӕмӕ ӕнӕххӕст кӕй стӕм, уый тыххӕй. Уымӕ гӕсгӕ иуӕй-иу хатт разынӕм хивӕнд. Адам ӕмӕ Евӕ Хуыцауы ныхмӕ куы рацыдысты ӕмӕ, хӕрӕн кӕмӕй нӕ уыд, уыцы бӕласы дыргътӕй куы бахордтой, уӕд афтӕмӕй сӕхӕдӕг аскъуыддзаг кодтой, хорз ӕмӕ ӕвзӕр цы у, уый (Райд. 3:22). Абон дӕр адӕмӕн сӕ фылдӕр Йегъовӕйы ницӕмӕ дарынц ӕмӕ сӕ фӕнды, цӕмӕй, хорз ӕмӕ ӕвзӕр цы у, уый сӕхӕдӕг скъуыддзаг кӕной.

⁵ Йегъовӕйы чи зоны ӕмӕ йӕ чи уарзы, уыдонӕн дӕр алы хатт ӕнцон нӕ вӕййы йӕ коммӕ кӕсын. Уый йӕхиуыл апостол Павел дӕр бавзӕрста. (Бакӕс Ромӕгтӕм 7:21–23.) Павелау мах дӕр фӕнды, Йегъовӕйы цӕсты раст цы у, уый аразын. Фӕлӕ нӕ ӕдзух хъӕуы ӕвзӕр фӕндтимӕ тох кӕнын.

6, 7. Йегъовӕйы коммӕ кӕсын ма нын ӕнцон цӕуылнӕ вӕййы? Ӕрхӕсс цӕвиттон.

⁶ Йегъовӕйы коммӕ кӕсын ма нын, чи зоны, ӕнцон нӕ вӕййы, цы адӕмы ’хсӕн схъомыл стӕм, уыдоны ӕгъдӕуттӕ ӕмӕ зондахаст ныл кӕй фӕзындысты, уый тыххӕй дӕр. Адӕм цы хъуыдытыл хӕст сты, уыдонӕй бирӕтӕ тынг хицӕн кӕнынц, Йегъовӕ цы дзуры, уымӕй. Уымӕ гӕсгӕ хъуамӕ ӕдзух архайӕм, цӕмӕй ахӕм зондахастӕй нӕхи хизӕм. Ӕркӕсӕм иу цӕвиттонмӕ.

⁷ Кӕмдӕрты ӕрыгӕтты ахӕм зондыл фӕаразынц, цӕмӕй бирӕ ӕхца бакусынмӕ тырной. Нӕ хо Марийӕйӕн * дӕр йӕ хабар афтӕ уыд. Цалынмӕ Йегъовӕйы нӕ базыдта, уӕдмӕ ахуыр кодта сӕ бӕстӕйы хуыздӕр университеттӕй иуы. Марийӕйы бинонты фӕндыд, цӕмӕй, бирӕ ӕхца кӕм куыстаид ӕмӕ кадджын чи уыдаид, ахӕм куыстмӕ бацыдаид. Ӕмӕ йӕхи дӕр фӕндыд. Фӕлӕ Библи ахуыр кӕнын куы райдыдта ӕмӕ Йегъовӕйы куы бауарзта, уӕд ын фӕзынд ӕндӕр нысӕнттӕ. Фӕлӕ уӕддӕр афтӕ зӕгъы: «Хатт мын фадат фӕзыны бирӕ ӕхца бакусынӕн. Фӕлӕ йӕ зонын, уыцырдӕм куы фӕуон, уӕд мӕ бон Йегъовӕйӕн, ныр ын куыд лӕггад кӕнын, афтӕ лӕггад кӕнын кӕй нал уыдзӕн. Мӕ ныййарджытӕ мӕ мӕ гыццылӕй фӕстӕмӕ цы зондыл арӕзтой, уый тыххӕй мын зын вӕййы уыцы фадӕттыл мӕ къух сисын. Ӕмӕ Йегъовӕмӕ зӕрдиагӕй фӕкувын, цӕмӕй мӕ зӕрдӕйы фӕдыл ма ацӕуон ӕмӕ мӕ лӕггад кӕнын чи хъыгдардзӕн, ахӕм куыстыл ма ныххӕцон» (Матф. 6:24).

8. Дарддӕр цӕмӕ ӕркӕсдзыстӕм?

⁸ Йегъовӕйы коммӕ кӕй кӕсӕм, уый нын стыр пайда хӕссы. Фӕлӕ, бартӕ кӕмӕ ис, уыдон, зӕгъӕм, хистӕр нӕлгоймӕгтӕ, стӕй фыд ӕмӕ мад, Хуыцауы разамындмӕ куы фӕхъусынц, уӕд ма сын афтӕмӕй фадат вӕййы иннӕтӕн ӕххуыс кӕнынӕн дӕр. Ӕркӕсӕм Библийӕ цалдӕр лӕггадгӕнӕджы цӕвиттонтӕм. Уыдон нын баххуыс кӕндзысты нӕ бартӕй афтӕ пайда кӕнынӕн, цӕмӕй Йегъовӕйы зӕрдӕ рухс кӕнӕм.

9. Нееми цавӕр зындзинӕдтыл сӕмбӕлд?

⁹ Йегъовӕ хистӕр нӕлгоймӕгтӕн сӕ бар бакодта ахсджиаг хъуыддаг – йӕ «дзугмӕ» йын  кӕсын (1 Пет. 5:2). Хистӕр нӕлгоймӕгтӕн сӕ бон бирӕ цыдӕртӕ у зондӕн райсын, Нееми Йегъовӕйы адӕмӕн куыд уыд, уымӕй. Нееми ӕвӕрд уыд хицауӕй Иудӕйы бӕстӕйӕн, ӕмӕ йӕм уыди стыр бартӕ (Неем. 1:11; 2:7, 8; 5:14). Ӕрхъуыды-ма кӕнӕм, Нееми цавӕр зындзинӕдтыл сӕмбӕлд. Уый базыдта, адӕм кувӕндон хынджылӕггаг кӕй скодтой ӕмӕ левиттӕн, Закъонмӕ гӕсгӕ сӕм цы мысайнӕгтӕ ӕмбӕлд, уыдон кӕй нӕ лӕвӕрдтой. Уымӕй уӕлдай ма сабаты закъон хӕлдтой, иуӕй-иу нӕлгоймӕгтӕ та сӕхицӕн ӕндӕр адӕмтӕй устытӕ ӕрхастой. Ӕмӕ Неемийы хъуыди уыцы хъуыддӕгтӕм ӕркӕсын (Неем. 13:4–30).

10. Нееми Йегъовӕйы адӕмӕн куыд уыд?

¹⁰ Нееми йӕ бартӕй раст пайда кодта. Уый Хуыцауы адӕмӕн йӕхи закъӕттӕ не ’вӕрдта. Фӕлӕ-иу Йегъовӕмӕ зӕрдӕбынӕй куывта ӕмӕ-иу ын йӕ разамынд агуырдта, стӕй адӕмӕн Хуыцауы Закъон амыдта (Неем. 1:4–10; 13:1–3). Уымӕй уӕлдай ма Нееми йе ’фсымӕртимӕ иумӕ сӕрныллӕгӕй куыста. Суанг ма семӕ Иерусалимы къултӕ дӕр амадта (Неем. 4:15).

11. 1 Фессалоникӕгтӕм 2:7, 8 стихты цы фыст ис, уымӕ гӕсгӕ, хистӕр нӕлгоймӕгтӕ ӕмбырды иннӕтӕн куыд хъуамӕ уой?

¹¹ Чи зоны, хистӕр нӕлгоймӕгтӕ, Нееми цы зындзинӕдтыл сӕмбӕлд, ахӕм зындзинӕдтыл нӕ сӕмбӕлдзысты. Фӕлӕ уӕддӕр уыдон Неемийы бирӕ хъуыддӕгты фӕзмынц. Зӕгъӕм, се ’мбырдты чи ис, уыцы хотӕ ӕмӕ ӕфсымӕртӕн удуӕлдайӕ ӕххуыс кӕнынц. Стӕй, сӕ къухы бартӕ кӕй ис, уый тыххӕй сӕ сӕр бӕрзӕндты нӕ хӕссынц, фӕлӕ сӕ хотӕ ӕмӕ се ’фсымӕрты фӕлмӕн уарзтӕй уарзынц. (Бакӕс 1 Фессалоникӕгтӕм 2:7, 8.) Ахӕм зӕрдӕ сӕм кӕй дарынц ӕмӕ сӕрныллӕг кӕй сты, уымӕ гӕсгӕ семӕ фӕлмӕнӕй фӕныхас кӕнынц. Эндрю бирӕ азты дӕргъы лӕггад кӕны хистӕр нӕлгоймагӕй. Ӕмӕ афтӕ зӕгъы: «Ӕз бафиппайдтон, хистӕр нӕлгоймаг хӕларзӕрдӕ куы вӕййы ӕмӕ хотӕ ӕмӕ ӕфсымӕртыл куы бацин кӕны, уӕд сын уый ӕхсызгон кӕй вӕййы. Ӕмӕ ӕмбырдӕн ӕнцондӕр вӕййы ахӕм хистӕр нӕлгоймӕгты разамындмӕ хъусын». Тони дӕр хистӕр нӕлгоймаг рагӕй у. Уый та мӕнӕ цы зӕгъы: «Филиппӕгтӕм 2:3 стихмӕ гӕсгӕ  ӕдзухдӕр фӕархайын, цӕмӕй иннӕты мӕхицӕй уӕлдӕр ӕвӕрон. Уый мын ӕххуыс кӕны, цӕмӕй ӕгъатыр хицауы хуызӕн ма уон».

12. Хистӕр нӕлгоймӕгтӕ сӕрныллӕг цӕмӕн хъуамӕ уой?

¹² Хистӕр нӕлгоймӕгтӕ хъуамӕ Йегъовӕйау сӕрныллӕг уой. Кӕд уый Дунедарӕг Хуыцау у, уӕддӕр «ӕргуыбыр кӕны», цӕмӕй «ӕххуысхъуаг адӕймаджы зӕххӕй сиса» (Пс. 18:35; 113:6, 7). Стӕй ма Библийы фыст ис, Йегъовӕйӕн хъалзӕрдӕ ӕмӕ сӕрбӕрзонд адӕм ӕнад кӕй сты (Ӕмб. 16:5).

13. Хистӕр нӕлгоймаг «йе ’взаджы рохтыл» цӕмӕн хъуамӕ хӕца?

¹³ Йегъовӕйы коммӕ чи кӕсы, ахӕм хистӕр нӕлгоймаг фӕархайы, цӕмӕй «йе ’взаджы рохтыл... хӕца». Науӕд афтӕ рауайдзӕн, ӕмӕ йын йӕ ныхас исчи куы ницӕмӕ ӕрдара, уӕд ӕм тызмӕгӕй дӕр сдзурдзӕн (Иак. 1:26; Гал. 5:14, 15). Гыццыл раздӕр кӕй кой кодтам, уыцы ӕфсымӕр, Эндрю, зӕгъы: «Афтӕ-иу мӕм куы фӕкаст, ӕмӕ мӕ ӕфсымӕр кӕнӕ хо ницӕмӕ дары, уӕд-иу ӕм хатт тызмӕгӕй сцӕйдзырдтон. Фӕлӕ стӕй хъуыды кӕнын райдыдтон, Библийы цы иузӕрдион нӕлгоймӕгты кой цӕуы, уыдоны цӕвиттонтыл. Ӕмӕ уый фӕрцы бамбӕрстон, куыд ахсджиаг у, цӕмӕй сӕрныллӕг уон ӕмӕ мын фӕлмӕн удыхъӕд уа». Хистӕр нӕлгоймӕгтӕ Йегъовӕйы коммӕ кӕй кӕсынц, уый ӕвдисынц, сӕ хотӕ ӕмӕ се ’фсымӕртимӕ, уыимӕ иннӕ хистӕр нӕлгоймӕгтимӕ дӕр, фӕлмӕнӕй кӕй фӕныхас кӕнынц, уымӕй (Кол. 4:6).

14. Йегъовӕ бинонты хистӕрӕй кӕй сӕвӕрдта ӕмӕ йын цы бахӕс кодта?

¹⁴ Йегъовӕ фыды сӕвӕрдта бинонты хистӕрӕй, ӕмӕ йын бахӕс кодта, цӕмӕй йӕ сывӕллӕтты ахуыр кӕна ӕмӕ сын зонд амона (1 Кор. 11:3; Еф. 6:4). Фӕлӕ уый ууыл дзурӕг нӕу, ӕмӕ йӕ бартӕй йӕ бон у, куыддӕриддӕр ӕй фӕнды, афтӕ пайда кӕнын. Уый дзуапп дӕтты Йегъовӕйы раз – «алы бинонтӕн дӕр номӕвӕрӕг чи у, уый раз» (Еф. 3:14, 15). Фыд Йегъовӕйы коммӕ кӕй кӕсы, уый ӕвдисы, йӕ бартӕй, Хуыцауы зӕрдӕмӕ куыд цӕуы, афтӕ кӕй пайда кӕны, уымӕй. Бирӕ цыдӕртӕ йӕ бон зондӕн райсын у паддзах Давиды цӕвиттонӕй.

15. Фыдӕн паддзах Давид фӕзминаг цӕмӕн у?

¹⁵ Йегъовӕ Давиды ӕрмӕст йӕ бинонтӕн нӕ сӕвӕрдта хистӕрӕй. Сӕвӕрдта ма йӕ паддзахӕй ӕнӕхъӕн Израилы адӕмӕн. Уымӕ гӕсгӕ Давидмӕ уыд стыр бартӕ. Фӕлӕ-иу афтӕ дӕр уыд, ӕмӕ-иу йӕ бартӕй раст не спайда кодта, ӕмӕ стыр рӕдыдтытӕ ӕруагъта (2 Сам. 11:14, 15). Фӕлӕ уӕддӕр Йегъовӕйы коммӕ каст. Йегъовӕ-иу ын зонд куы бацамыдта, уӕд-иу ӕм байхъуыста. Ӕмӕ-иу ын йӕ зӕрдӕйы сагъӕстӕ радзырдта (Пс. 51:1–4). Уымӕй уӕлдай, Давид уыд сӕрныллӕг ӕмӕ-иу ӕрмӕст нӕлгоймӕгты уынаффӕтӕм нӕ байхъуыста, фӕлӕ сылгоймӕгты уынаффӕтӕм дӕр  (1 Сам. 19:11, 12; 25:32, 33). Кӕд-иу Давид фӕрӕдыд, уӕддӕр-иу ын йӕ рӕдыдтытӕ зонды хос фесты. Ӕмӕ йын царды ӕппӕты ахсджиагдӕр уыд Йегъовӕйӕн лӕггад кӕнын.

16. Фыд Давиды цӕвиттонӕй цӕуыл ахуыр кӕны?

¹⁶ Фыд паддзах Давиды цӕвиттонӕй цӕуыл ахуыр кӕны? Мӕнӕ цалдӕр хъуыддаджы. Йегъовӕ дын цы бартӕ радта, уыдонӕй раст пайда кӕн. Дӕ рӕдыдтытыл-иу басӕтт ӕмӕ дын исчи Библимӕ гӕсгӕ уынаффӕ куы ратта, уӕд-иу ӕм байхъус. Афтӕ куы кӕнай, уӕд дын дӕ бинонтӕ дӕ сӕрныллӕгдзинады тыххӕй аргъ кӕндзысты. Дӕ бинонтимӕ иумӕ куы кувай, уӕд-иу Йегъовӕйӕн дӕ зӕрдӕйы сагъӕстӕ радзур. Уадз ӕмӕ уыной, дӕ ныфс Хуыцауыл куыд тынг дарыс, уый. Ӕмӕ сӕйраджыдӕр та архай, цӕмӕй дын ӕппӕты ахсджиагдӕр уа Йегъовӕйӕн лӕггад кӕнын (Дык. з. 6:6–9). Дӕ бинонтӕн фӕзминаг куы уай, уӕд сын уый уыдзӕн стыр лӕвар.

17. Йегъовӕ мадыл цавӕр хӕс сӕвӕрдта?

¹⁷ Йегъовӕ мадыл сӕвӕрдта кадджын хӕс, ӕмӕ уымӕн дӕр йӕ сывӕллӕттыл йӕ бар цӕуы (Ӕмб. 6:20). Мад йӕ сывӕллӕтты цӕуыл сахуыр кӕна, уый сӕ, гӕнӕн ис, цӕрӕнбонтӕм дӕр ма ферох уа ӕмӕ сӕ цардыл тынг фӕзына (Ӕмб. 22:6). Ӕркӕсӕм, мадӕн Йесойы мад Марийӕйы цӕвиттонӕй йӕ бон зондӕн райсын цы у, уымӕ.

18, 19. Марийӕйы цӕвиттонӕй мад цӕуыл ахуыр кӕны?

¹⁸ Марийӕ Фыстад хорз зыдта. Уый Йегъовӕйӕн тынг кад кодта ӕмӕ уыд йе ’ввахс хӕлар. Марийӕ цӕттӕ уыд, Йегъовӕйы цы фӕндыд, уый саразынмӕ, кӕд ӕй ӕмбӕрста, йӕ цард бынтондӕр кӕй фӕивдзӕн, уӕддӕр (Лук. 1:35–38, 46–55).

¹⁹ Мадӕн йӕ бон у Марийӕйы цалдӕр хъуыддаджы бафӕзмын. Фыццаг: хъуамӕ алкӕддӕр Йегъовӕмӕ ӕввахс уа, ӕмӕ уый тыххӕй та хъуамӕ йӕхӕдӕг дӕр Библи иртаса ӕмӕ Йегъовӕмӕ ӕдзухдӕр кува. Дыккаг: хъуамӕ йӕ цард ивынмӕ цӕттӕ уа, цӕмӕй Йегъовӕйы зӕрдӕ рухс кӕна. Чи зоны, йӕхи ныййарджытӕ уыдысты мӕстыгӕр ӕмӕ сӕ схуыст ныхас йеддӕмӕ ницы хъуыста. Ӕмӕ уый тыххӕй, гӕнӕн ис, хъуыды кодта, ӕмӕ, сывӕллӕтты афтӕ хъомыл кӕнай, уым ӕвзӕрӕй ницы ис. Ӕмӕ кӕд базыдта, Йегъовӕ ныййарджытӕн цы фӕдзӕхсы, уый, уӕддӕр ын, чи зоны, ӕнцон ма уа йӕ сывӕллӕттимӕ фӕлмӕнӕй дзурын ӕмӕ хиуыл хӕцын, уӕлдайдӕр, фӕллад куы уа ӕмӕ йӕм уыдон куы нӕ хъусой, уӕд (Еф. 4:31). Ахӕм уавӕры йӕ уӕлдай тынгдӕр хъӕуы Йегъовӕйӕ ӕххуыс курын. Иу хо, Лидийӕ, зӕгъгӕ, дзуры: «Мӕ лӕппу мӕм куы нӕ фӕхъусы, уӕд мӕ хатт фӕхъӕуы Йегъовӕйӕн лӕгъстӕ кӕнын, цӕмӕй мын баххуыс кӕна, ӕмӕ мӕ лӕппумӕ тызмӕгӕй ма сдзурон. Исты йӕм куы сдзурын, уӕд та мӕ бахъӕуы мӕхи фӕуромын ӕмӕ мӕхинымӕр Йегъовӕйӕ ӕххуыс ракурын. Ӕмӕ уый фӕрцы ӕрсабыр вӕййын» (Пс. 37:5).

20. Иуӕй-иу мадӕлтӕн зын цы вӕййы ӕмӕ сын цы баххуыс кӕндзӕн?

 ²⁰ Иуӕй-иу мадӕлтӕн ма зын вӕййы, сӕ сывӕллӕтты кӕй уарзынц, уый ӕргом ӕвдисын (Тит. 2:3, 4). Гӕнӕн ис, сӕхӕдӕг сывӕллӕттӕ куы уыдысты, уӕд сыл сӕ ныййарджытӕ никуы баузӕлыдысты. Кӕд ды дӕр ахӕм бинонты ’хсӕн схъомыл дӕ, уӕд, дӕ ныййарджытӕ цы рӕдыдтытӕ ӕруагътой, ахӕм рӕдыдтытӕй дӕхи хиз. Мады Йегъовӕйы коммӕ кӕсын куы фӕнда, уӕд ӕй хъӕудзӕн бацархайын, цӕмӕй сахуыр уа, йӕ сывӕллӕтты кӕй уарзы, уый ӕвдисын. Чи зоны йын ӕнцон нӕу йӕхи фӕивын. Фӕлӕ уӕддӕр уымӕн гӕнӕн ис. Ӕмӕ уый фӕрцы йӕхӕдӕг дӕр ӕмӕ йӕ бинонтӕ дӕр уыдзысты бирӕ амондджындӕр.

21, 22. Исайы 65:13, 14 стихты цы фыст ис, уымӕ гӕсгӕ, Йегъовӕйы коммӕ кӕсын цы пайда хӕссы?

²¹ Паддзах Давид зыдта, Йегъовӕйы коммӕ кӕсын цы пайда хӕссы, уый. Давид ныффыста: «Йегъовӕйы уагӕвӕрдтӕ сты раст – зӕрдӕ цинӕй дзаг кӕнынц. Йегъовӕйы фӕдзӕхст у ирд – цӕстытӕн дӕтты рухс. Уыдон хъахъхъӕнынц дӕ лӕггадгӕнӕджы. Чи сӕ ӕххӕст кӕны, уый ссары стыр хорзӕх» (Пс. 19:8, 11). Абон нӕхи цӕстӕй уынӕм, Йегъовӕйы коммӕ чи кӕсы, уыдон куыд хицӕн кӕнынц, йӕ уынаффӕтӕ йын чи ницӕмӕ дары, уыдонӕй. Йегъовӕйы коммӕ чи кӕсы, уыдон «цины хъӕр кӕнынц, сӕ зӕрдӕ кӕй райы, уый тыххӕй». (Бакӕс Исайы 65:13, 14.)

²² Хистӕр нӕлгоймӕгтӕ, стӕй фыд ӕмӕ мад алкӕддӕр Йегъовӕйы коммӕ куы фӕкӕсынц, уӕд сӕ цард фӕхуыздӕр вӕййы, сӕ бинонтӕ вӕййынц амондджындӕр, стӕй ӕмбырды хотӕ ӕмӕ ӕфсымӕртӕ вӕййынц ӕнгомдӕр. Ӕппӕты сӕйрагдӕр та уый у, ӕмӕ афтӕмӕй Йегъовӕйы зӕрдӕ фӕрухс кӕнынц (Ӕмб. 27:11). Уымӕй стырдӕр циндзинад та ницы хӕссы!