ИННӔТӔЙ алкӕддӕр бузныг чи вӕййы, дӕхи ахӕм адӕймагыл нымайыс? Ацы фарстайыл алкӕй дӕр хъӕуы ахъуыды кӕнын. Библийы нӕ рӕстӕджы тыххӕй раджы фыст ӕрцыд, бирӕтӕ «хорздзинадӕн аргъ кӕнын [кӕй] нӕ зондзысты» (2 Тим. 3:2). Иуӕй-иутӕ афтӕ ӕнхъӕл сты, ӕмӕ иннӕтӕ хӕсджын сты, цӕмӕй сын истытӕ дӕттой ӕмӕ сын ӕххуыс кӕной. Ӕмӕ, иннӕтӕй бузныг кӕй хъуамӕ уой, уый та цыма сӕ хъуыдыйы кӕрон дӕр нӕ вӕййы. Ӕвӕццӕгӕн, ды дӕр ахӕм адӕмы зоныс. Адӕймаджы ахӕмтӕм хӕстӕг цӕуын дӕр нӕ фӕфӕнды.

Фӕлӕ Йегъовӕ йӕ лӕггадгӕнджытӕн дзуры: «Бузныг ут». Мах хъуамӕ «алцӕй тыххӕй дӕр бузныг дзурӕм» (Кол. 3:15; 1 Фес. 5:18). Хорздзинадӕн аргъ кӕнын куы зонӕм ӕмӕ-иу алцӕй тыххӕй дӕр бузныг куы уӕм, уӕд уый нӕхицӕн дӕр стыр пайда хӕсдзӕн. Цымӕ цӕмӕн? Ӕркӕсӕм цалдӕр хъуыддагмӕ.

Иннӕтӕй бузныг куы вӕййӕм, уӕд сын уый ӕхсызгон вӕййы, стӕй ма уый фӕрцы нӕхицӕн дӕр тынгдӕр фӕаргъ кӕнӕм. Афтӕ цӕмӕн у? Ахъуыды-ма кӕн: исты хорздзинад дын куы саразынц, уӕд уый ууыл дзурӕг нӕ вӕййы, ӕмӕ уый аккаг дӕ, цӕмӕй исчи дӕу тыххӕй йӕхи батыхсын кӕна? Ӕмӕ-иу куы бамбарай, чидӕр дыл кӕй тыхсы, уый, уӕд-иу дӕхицӕн дӕр фылдӕр аргъ кӕндзынӕ. Зӕгъӕм, Вооз Руфӕн куы баххуыс кодта, уӕд Руфӕн тынг ӕхсызгон уыдаид, чидӕр ыл афтӕ кӕй батыхст, уый (Руф 2:10–13).

Уӕлдайдӕр та хъуамӕ Хуыцауӕй уӕм бузныг. Ӕвӕццӕгӕн, иуӕй-иу хатт ахъуыды кӕныс, Йегъовӕ нын цас хорздзинӕдтӕ сарӕзта ӕмӕ аразы, ууыл (Дык. з. 8:17, 18; Хъуыд. 14:17). Фӕлӕ хорз уаид, Хуыцау дын дӕхи дӕр ӕмӕ дӕ бинонты дӕр цас арфӕдзинӕдтӕй схайджын кодта, ууыл-иу арфдӕр ахъуыды кӕнынӕн рӕстӕг куы рахицӕн кӕнис. Не Сфӕлдисӕг куыд хорз ӕмӕ куыд рӕдау у, ууыл арф куы хъуыды кӕнай, уӕд ын йӕ хорздзинӕдтӕн тынгдӕр аргъ кӕндзынӕ. Стӕй хуыздӕр ӕмбардзынӕ, куыд тынг дӕ уарзы ӕмӕ дын куыд тынг аргъ кӕны, уый (1 Иоан. 4:9).

Фӕлӕ ма уымӕй уӕлдай хъуамӕ Йегъовӕйӕн бузныг дӕр дзурӕм, афтӕ хӕларзӕрдӕ нӕм кӕй у, уый тыххӕй (Пс. 100:4, 5). Куыд зӕгъынц, афтӕмӕй, адӕймаг иннӕтӕн бузныг куы фӕзӕгъы, уӕд амондджындӕр свӕййы.

Иннӕтӕй ма бузныг уый тыххӕй хъуамӕ уӕм, ӕмӕ нӕ уый кӕрӕдзийыл тынгдӕр бӕтдзӕн. Алкӕй дӕр фӕнды, цӕмӕй йын аргъ кӕной. Исчи дын хорздзинад куы ракӕны ӕмӕ йын зӕрдиагӕй бузныг куы фӕзӕгъыс, уӕд кӕрӕдзийӕн ноджы адджындӕр свӕййут (Ром. 16:3, 4). Уымӕй уӕлдай ма, хорздзинадӕн чи аргъ кӕны, уыдоны сӕхи дӕр фӕфӕнды иннӕтӕн хорздзинад аразын ӕмӕ сын ӕххуыс кӕнын. Ӕмӕ иннӕтӕн куы феххуыс кӕнӕм, уӕд та вӕййӕм амондджын. Йесо Чырысти дӕр загъта: «Райсынӕй раттын амондджындӕр хъуыддаг у» (Хъуыд. 20:35).

Роберт Эммонс, Калифорнийы университеты профессор, афтӕ загъта: «Цӕмӕй алцӕй тыххӕй дӕр бузныг уӕм, уый тыххӕй хъуамӕ ӕмбарӕм, адӕмӕн ӕнӕ кӕрӕдзийӕ цӕрӕн кӕй нӕй. Куы мах фӕдӕттӕм цыдӕр, куы та махӕн фӕдӕттынц цыдӕр». Цӕмӕй цӕрӕм ӕмӕ амондджын уӕм, уый тыххӕй нӕ бирӕ хъуыддӕгты хъӕуы иннӕты ӕххуыс. Зӕгъӕм, кӕйдӕр фӕрцы нын ис хӕринаг, дохтыртӕ та нӕ дзӕбӕх кӕнынц (1 Кор. 12:21). Иннӕтӕй бузныг чи вӕййы, ахӕм адӕймаг фӕаргъ кӕны, хорзӕй йын чи цы саразы, уымӕн. Ды та иннӕтӕн алкӕддӕр бузныг фӕзӕгъыс, хорзӕй дын цы саразынц, уый тыххӕй?

Иннӕтӕй ма бузныг уый тыххӕй хъуамӕ уӕм, ӕмӕ афтӕмӕй фылдӕр фӕхъуыды кӕнӕм, хорз цы у, ууыл, ӕвзӕр цы у, ууыл нӕ, фӕлӕ. Зӕгъӕн ис, ӕмӕ нӕ сӕрымагъз у фильтры хуызӕн. Ӕмӕ нӕ бон вӕййы, нӕ алыварс цы фӕуынӕм, уыдӕттӕй цӕмӕдӕрты нӕ хъуыдытӕ саразын, цӕмӕдӕрты та нӕ хъус ӕппындӕр не ’рдарӕм. Иннӕтӕй бузныг куы вӕййӕм, уӕд фӕуынӕм хорз цыдӕртӕ, ӕвзӕр цыдӕртӕ та – нӕ. Иннӕтӕй цас тынгдӕр уай бузныг, уыйас тынгдӕр уындзынӕ, хорзӕй дын цы аразынц, уый, ӕмӕ уый фӕрцы та хорздзинадӕн ноджы тынгдӕр аргъ кӕндзынӕ. Хорздзинадӕн аргъ кӕнын куы зонай, уӕд дӕ бон уыдзӕн, апостол Павел куыд загъта, афтӕ кӕнын: «Хицауимӕ иудзинады кӕй стут, уымӕ гӕсгӕ ӕдзухдӕр цин кӕнут» (Фил. 4:4).

Иннӕтӕй бузныг чи у, уымӕн алы ӕвзӕр хъуыдытӕй тӕссаг нӕ уыдзӕн. Дӕхӕдӕг-ма ахъуыды кӕн: ахӕм адӕймаг хӕлӕггӕнаг уыдзӕн, ӕдзух ӕнкъард кӕндзӕн йе та искӕмӕ йӕ зӕрдӕйы маст хӕсдзӕн? Уымӕй уӕлдай ма бузныгзӕрдӕ адӕймаг мулкмӕ нӕ фӕтырны. Цы йын ис, уымӕй разы вӕййы ӕмӕ фылдӕр самал кӕнынмӕ нӕ фӕбӕллы (Фил. 4:12).

Ацы фӕстаг бонты бирӕ зындзинӕдтыл ӕмбӕлӕм, ӕмӕ йӕ зонӕм, Хӕйрӕджы кӕй фӕнды, цӕмӕй нӕ ныфс асӕтта ӕмӕ нӕ къухтӕ ӕруадзӕм. Тынг ӕй фӕнды, цӕмӕй нӕ зондахаст фӕива ӕмӕ алцӕмӕй дӕр хъаст кӕнын райдайӕм. Ӕмӕ чырыстон ахӕм зондыл куы ныххӕца, уӕд йӕ бон нӕ уыдзӕн хорз хабар ӕнтыстджынӕй хъусын кӕнын. Адӕймаг бузныгзӕрдӕ уа, уый ӕнгом баст у, Хуыцауы сыгъдӕг тыхы дыргъмӕ чи хауы, уыцы миниуджытимӕ. Зӕгъӕм, мах фӕцин кӕнӕм, Хуыцау нын хорзӕй цы дӕтты, уыдӕттыл, стӕй ӕууӕндӕм йе ’ппӕт зӕрдӕвӕрдтыл дӕр (Гал. 5:22, 23).

Йегъовӕйы Ӕвдисӕн кӕй дӕ, уымӕ гӕсгӕ, ӕвӕццӕгӕн, разы дӕ, ацы статьяйы цы хъуыдытӕ ис, уыдонимӕ. Кӕй зӕгъын ӕй хъӕуы, ӕнцон нӕу, цӕмӕй алкӕд иннӕтӕй бузныг уай ӕмӕ ӕдзух цардӕй райгонд уай. Фӕлӕ дӕ ныфс ма асӕттӕд. Дӕ бон у, ӕмӕ иннӕты хорздзинадӕн аргъ кӕнын сахуыр уай ӕмӕ сӕ алкӕддӕр бузныг уай. Алы бон дӕр-иу рӕстӕг ссар, цӕмӕй-иу ахъуыды кӕнай, бузныг цӕй тыххӕй хъуамӕ уай, уыдӕттыл. Ӕмӕ афтӕ арӕх куы кӕнай, уӕд сахуыр уыдзынӕ иннӕты хорздзинадӕн аргъ кӕнын ӕмӕ-иу алцӕй тыххӕй дӕр бузныг уыдзынӕ. Ӕмӕ уӕд уыдзынӕ, ӕдзух йӕ зындзинӕдтыл чи фӕхъуыды кӕны, уыдонӕй амондджындӕр. Хъуыды кӕн, Хуыцау ӕмӕ дын иннӕтӕ дӕр цы хорздзинӕдтӕ аразынц, уыдоныл ӕмӕ, уыцы хорздзинӕдты фӕрцы дӕ ныфсыл ныфс, дӕ циныл цин куыд бафты, ууыл. Дӕ бон у, ӕмӕ сӕ дӕхицӕн фысгӕ дӕр кӕнай. Зӕгъӕм, алы бон дӕр-иу ныффысс, уыцы бон бузныг кӕй тыххӕй дӕ, дыууӕ кӕнӕ ӕртӕ ахӕм хъуыддаджы.

Ахуыргӕндтӕ куыд сбӕрӕг кодтой, афтӕмӕй, иннӕтӕн арӕх бузныг куы фӕдзурӕм, уӕд уый нӕ сӕрымагъзы куыстыл афтӕ фӕзыны, ӕмӕ райдайӕм уынын, нӕ царды хорзӕй цы ис, уый. Иннӕтӕй бузныг чи у, уый амондджындӕр вӕййы. Уӕдӕ дӕ арфӕдзинӕдтыл хъуыды кӕн, цы хорз хабӕрттӕ дыл ӕрцӕуы, уыдоныл цин кӕн ӕмӕ иннӕтӕй алкӕддӕр бузныг у! Дӕ царды хорзӕй цы ис, уыдӕттӕм куыдфӕндыйы цӕстӕй ма кӕс, фӕлӕ «арфӕ кӕн Йегъовӕйӕн, уымӕн ӕмӕ у хӕларзӕрдӕ». О, «алцӕй тыххӕй дӕр бузныг дзур»! (1 Аз. 16:34; 1 Фес. 5:18).