1. Давид Йегъовӕйы сӕрныллӕгдзинады тыххӕй цы загъта?

ӔЦӔГДӔР ис зӕгъӕн, ӕмӕ Йегъовӕ сӕрныллӕг у? О, уый афтӕ у. Иухатт Давид загъта: «Ды мын ратдзынӕ дӕ ирвӕзындзинады уарт, дӕ сӕрныллӕгдзинад мӕ бӕрзонд кӕны» (2 Сам. 22:36; Пс. 18:35). Ӕвӕццӕгӕн, Давид ӕрхъуыды кодта, кӕддӕр сӕм пехуымпар Самуил куыд ӕрбацыд, уый. Самуил ӕрбацыд, цӕмӕй, Йегъовӕ Израилӕн паддзахӕй кӕй равзӕрста, уый сойӕ байсӕрстаид. Давид уыд аст фыртӕй ӕппӕты кӕстӕр, фӕлӕ Йегъовӕ Саулы бӕсты паддзахӕй уый равзӕрста (1 Сам. 16:1, 10–13).

2. Ацы статьяйы цӕуыл аныхас кӕндзыстӕм?

² Давид ӕнӕмӕнг сразы уыдаид, иу псаломзарӕггӕнӕг Йегъовӕйы тыххӕй цы загъта, уыимӕ: «Уый ӕргуыбыр кӕны, цӕмӕй ӕркӕса арв ӕмӕ зӕхмӕ. Ӕмӕ ӕххуысхъуаг адӕймаджы зӕххӕй сисы, мӕгуыры сисы фӕныкӕй, цӕмӕй йӕ ӕрбадын кӕна кадджынтимӕ» (Пс. 113:6–8). Ацы статьяйы фыццаг ӕркӕсдзыстӕм, Йегъовӕ сӕрныллӕгдзинад куыд ӕвдыста ӕмӕ мах дӕр сӕрныллӕг цӕмӕн хъуамӕ уӕм, уымӕ. Стӕй та аныхас кӕндзыстӕм, паддзах Саулы, пехуымпар Данелы ӕмӕ Йесо Чырыстийы хабӕрттӕй зондӕн райсӕн цы ис, ууыл. Уый нын баххуыс кӕндзӕн, цӕмӕй бонзонгӕ уӕм.

3. Йегъовӕ йӕ лӕггадгӕнджытӕм цы цӕстӕй кӕсы ӕмӕ уымӕй цы у бӕрӕг?

³ Йегъовӕ ӕнӕххӕст адӕммӕ цы цӕстӕй кӕсы, уымӕй бӕрӕг у, сӕрныллӕг кӕй у. Уый адӕмӕн фадат радта, цӕмӕй йын лӕггад кӕной. Уымӕй уӕлдай ма сӕ банымайы йӕ хӕлӕрттыл (Пс. 25:14). Ӕмӕ уымӕн гӕнӕн ис, йӕ Фырты нӕ тӕригъӕдты тыххӕй нывондӕн кӕй ӕрхаста, уый фӕрцы.  Бӕрӕг у, Йегъовӕ тынг фӕлмӕнзӕрдӕ ӕмӕ тӕригъӕдгӕнаг Хуыцау кӕй у.

4. Йегъовӕ нӕ куыд сфӕлдыста ӕмӕ цӕмӕн?

⁴ Йегъовӕ сӕрныллӕг кӕй у, уый ма цӕмӕй у бӕрӕг? Уымӕн йӕ бон уыд адӕмы афтӕ сфӕлдисын, ӕмӕ сӕ бон нӕ уыдаид ӕвзарын, куыд цӕрдзысты, уый. Фӕлӕ афтӕ нӕ бакодта. Йегъовӕ нӕ сфӕлдыста йӕхимӕ гӕсгӕ ӕмӕ нын радта сӕрибардзинад, цӕмӕй нӕ бон уа уынаффӕтӕ хӕссын. Кӕд йӕ разы зынгӕ дӕр нӕ кӕнӕм, уӕддӕр куыдфӕндыйы цӕстӕй нӕ кӕсы, цавӕр уынаффӕтӕ рахӕссӕм, уымӕ. Йегъовӕйы фӕнды, цӕмӕй йын лӕггад кӕнӕм, кӕй йӕ уарзӕм, уый тыххӕй, стӕй цӕмӕй ӕмбарӕм, йӕ коммӕ кӕсын нӕ пайдайӕн кӕй у (Дык. з. 10:12; Ис. 48:17, 18). Йегъовӕ ахӕм сӕрныллӕг кӕй у, уый тыххӕй дзы бузныг куыннӕ хъуамӕ уӕм!

5. Йегъовӕ нӕ сӕрныллӕгдзинадыл куыд ахуыр кӕны? (Кӕс нывмӕ ӕддаг цъарыл.)

⁵ Йегъовӕ нӕ сӕрныллӕгдзинадыл ахуыр кӕны, йӕхӕдӕг ӕй куыд ӕвдисы, уымӕ гӕсгӕ. Дун-дунейы уымӕй зондджындӕр ничи у. Фӕлӕ уӕддӕр иннӕтимӕ ӕмгуыст кӕны ӕмӕ, уыдон куыд фӕзӕгъынц, афтӕ дӕр бакӕны. Зӕгъӕм, кӕд йӕхи бон уыд алцыдӕр сфӕлдисын, уӕддӕр йӕ Фыртӕн фадат радта, цӕмӕй йын ӕххуыс кодтаид (Ӕмб. 8:27–30; Кол. 1:15, 16). Йегъовӕ у Ӕппӕтхъомысджын Хуыцау, фӕлӕ уӕддӕр иннӕтӕн дӕр бартӕ ратты. Зӕгъӕм, йӕ Паддзахады Йесойы сӕвӕрдта Паддзахӕй. Ӕмӕ 144 мин адӕймагӕн дӕр, Йесоимӕ паддзӕхтӕ чи уыдзысты, уыдонӕн, бартӕ ратдзӕн (Лук. 12:32). Кӕй зӕгъын ӕй хъӕуы, Йегъовӕ Йесойы бацӕттӕ кодта, цӕмӕй суыдаид Паддзах ӕмӕ Хистӕр сауджын (Дзут. 5:8, 9). Ӕмӕ, йемӕ паддзӕхтӕ чи уыдзысты, уыдоны дӕр ахуыр кӕны, цӕмӕй сӕ бон уа сӕ хӕстӕ ӕххӕст кӕнын. Фӕлӕ сын сӕ алы къахдзӕфмӕ йӕ хъус нӕ дардзӕн. Йегъовӕ сыл ӕууӕнды ӕмӕ йӕ зоны, йӕ фӕндон ын кӕй ӕххӕст кӕндзысты (Рарг. 5:10).

6, 7. Бинонты хистӕртӕн, хистӕр нӕлгоймӕгтӕн ӕмӕ ныййарджытӕн сӕ бон куыд у Йегъовӕйы фӕзмын?

 ⁶ Уӕдӕ кӕд нӕ уӕларвон Фыды искӕй ӕххуыс нӕ хъӕуы, ӕмӕ уӕддӕр иннӕтӕн бартӕ ратты, уӕд мах та ноджы тынгдӕр хъӕуы афтӕ кӕнын. Зӕгъӕм, бинонты хистӕртӕн кӕнӕ хистӕр нӕлгоймӕгтӕн сӕ бон вӕййы иннӕтӕн сӕ бар цавӕрдӕр хӕстӕ бакӕнын. Фӕлӕ-иу сын хъуамӕ сӕ алы къахдзӕфмӕ сӕ хъус ма дарой. Йегъовӕйы куы фӕзмой, уӕд-иу хъуыддӕгтӕ иууылдӕр арӕзт ӕрцӕудзысты. Уымӕй уӕлдай ма иннӕты дӕр ахуыр кӕндзысты ӕмӕ сын ӕххуыс кӕндзысты, цӕмӕй ныфсджындӕр суой (Ис. 41:10). Цавӕрдӕр бартӕ кӕмӕ ис, уыдон ма Йегъовӕйӕ ноджыдӕр цӕуыл ахуыр кӕнынц?

⁷ Библийӕ куыд зыны, афтӕмӕй Йегъовӕ йӕ уӕларвон фыртты, ома зӕдты, фӕфӕрсы, цы хъуыды кӕнынц, уымӕй (1 Пад. 22:19–22). Ныййарджытӕ, сымахӕн та уӕ бон куыд у Йегъовӕйы фӕзмын? Хӕдзары исты куы аразат, уӕд-иу уӕ сывӕллӕтты бафӕрсут, куыд ӕй ис саразӕн, уымӕй. Ӕмӕ кӕд гӕнӕн ис, уӕд-иу, уыдон куыд зӕгъынц, афтӕ бакӕнут.

8. Йегъовӕ Авраам ӕмӕ Саррӕмӕ фӕразондзинад куыд равдыста?

⁸ Йегъовӕ сӕрныллӕг кӕй у, уый ма бӕрӕг у йӕ фӕразондзинадӕй дӕр. Зӕгъӕм, йӕ лӕггадгӕнджытӕй исчи куы фӕдызӕрдыг кӕны, Йегъовӕ раст уынаффӕ кӕй рахаста, ууыл, ӕмӕ йын йӕ хъуыды уӕзданӕй куы бамбарын кӕны, уӕд ӕм байхъусы. Йегъовӕ Содом ӕмӕ Гоморрӕ фесафынвӕнд куы скодта, уӕд Авраам дызӕрдыг кодта, уый раст уынаффӕ кӕй у, ууыл. Ӕмӕ уый тыххӕй Йегъовӕйӕн куы загъта, уӕд ӕм уый байхъуыста (Райд. 18:22–33). Кӕнӕ ӕрхъуыды кӕнӕм Саррӕйы хабар. Йегъовӕ йын зӕрдӕ куы бавӕрдта, сывӕллон ын кӕй райгуырдзӕн, уӕд ӕм уый худӕг фӕкаст, уымӕн ӕмӕ ацӕргӕ уыд. Фӕлӕ йӕм Йегъовӕ не смӕсты ӕмӕ йӕ уайдзӕфты бын нӕ фӕкодта (Райд. 18:10–14).

9. Ныййарджытӕн ӕмӕ хистӕр нӕлгоймӕгтӕн сӕ бон ноджыдӕр куыд у Йегъовӕйы бафӕзмын?

⁹ Ныййарджытӕ ӕмӕ хистӕр нӕлгоймӕгтӕ, уӕ бон у ахъуыды кӕнын, уӕ сывӕллӕттӕй кӕнӕ ӕмбырды исчи уӕ уынаффӕимӕ разы куы нӕ вӕййы, уӕд куыд бакӕнут, ууыл. Уайтагъд ын зонд амонынмӕ фӕвӕййут? Ӕви фӕархайут, цӕмӕй бамбарат, афтӕ цӕмӕн хъуыды кӕны, уый? Бартӕ кӕмӕ ис, уыдон Йегъовӕйы куы фӕзмой, уӕд уый бинонтӕн дӕр ӕмӕ ӕмбырдӕн дӕр стыр пайда хӕсдзӕн. Мах ӕркастыстӕм, Йегъовӕ нын йӕ сӕрныллӕгдзинадӕй фӕзминаг цавӕр хъуыддӕгты у, уымӕ. Ныр та аныхас кӕндзыстӕм, бонзонгӕ кӕй хъуамӕ уӕм, ууыл. Ӕркӕсдзыстӕм, Хуыцауы Ныхасы цы лӕггадгӕнджыты кой ис, уыдонӕй цалдӕры хабармӕ.

10. Йегъовӕ нӕ йӕ Ныхасы фӕрцы куыд ахуыр кӕны?

¹⁰ Нӕ «Кадджын Зондамонӕг» йӕ Ныхасы ныффыссын кодта алыхуызон адӕмы тыххӕй, цӕмӕй нӕ цӕуылдӕрты сахуыр кӕна (Ис. 30:20, 21). Кӕмӕдӕрты сӕ уыд, Йегъовӕйы зӕрдӕмӕ чи цӕуы, ахӕм миниуджытӕ, уыимӕ бонзонгӕдзинад, ӕмӕ нын сты фӕзминаг. Ахӕм миниуджытӕ кӕмӕ нӕ уыд, уыдоны хабӕрттӕ та нын сты зондзонӕн (Пс. 37:37; 1 Кор. 10:11).

11. Саулы хабар нын зондзонӕн куыд у?

¹¹ Ахъуыды кӕнӕм Саулы хабарыл. Хуыцау ӕй паддзахӕй куы равзӕрста, уӕд уыд бонзонгӕ адӕймаг ӕмӕ ӕмбӕрста, йӕ бон алцы кӕй нӕу. Суанг ма йӕхимӕ фылдӕр хӕстӕ райсынмӕ дӕр йӕ ныфс нӕ хаста (1 Сам. 9:21; 10:20–22). Фӕлӕ, паддзах куы сси, уымӕй бирӕ нӕ рацыд, афтӕ йӕхиуыл фервӕссыд. Иухатт пехуымпар Самуилмӕ нӕ банхъӕлмӕ каст ӕмӕ судзинаг нывонд ӕрхаста. Саулы хъуамӕ фидарӕй уырныдтаид, Йегъовӕ йӕ адӕмы кӕй фервӕзын кӕндзӕн, уый. Фӕлӕ уый сарӕзта, бар ын кӕмӕн нӕ уыд, ахӕм хъуыддаг. Уый тыххӕй Йегъовӕйы  хорзӕхӕй ӕнӕхай фӕци, ӕмӕ йын Йегъовӕ загъта, йӕ паддзахдзинад бирӕ кӕй нӕ ахӕсдзӕн (1 Сам. 13:8–14). Ацы хабар нӕ зӕрдыл куы дарӕм, уӕд нӕ араздзыстӕм, бар нын цӕмӕн нӕй, ахӕм цыдӕртӕ.

12. Данел бонзонгӕ кӕй уыд, уый цӕмӕй уыд бӕрӕг?

¹² Паддзах Саулӕй уӕлдай нын пехуымпар Данел у фӕзминаг. Уый цӕрӕнбонты уыд сӕрныллӕг ӕмӕ бонзонгӕ адӕймаг. Ӕмӕ-иу ӕдзух агуырдта Йегъовӕйы разамынд. Иухатт Йегъовӕйы фӕрцы Навуходоносоры фын куы райхӕлдта, уӕд йӕхицӕй нӕ ныббуц, фӕлӕ Йегъовӕйы скадджын кодта (Дан. 2:26–28). Ацы хабарӕй цӕуыл ахуыр кӕнӕм? Чи зоны, нӕ раныхӕстӕ хотӕ ӕмӕ ӕфсымӕрты зӕрдӕмӕ цӕуынц кӕнӕ та нын уацамынды бирӕ ӕнтысы. Ӕмӕ уӕд хъуамӕ нӕ зӕрдыл дарӕм, уый тыххӕй Йегъовӕйы кӕй хъуамӕ кадджын кӕнӕм. Хъуамӕ уӕм бонзонгӕ ӕмӕ ӕмбарӕм, Йегъовӕ нын куы не ’ххуыс кӕнид, уӕд нын кӕй ницы бантысид (Фил. 4:13). Уымӕй уӕлдай ма, кӕд бонзонгӕ стӕм, уӕд фӕзмӕм Йесойы дӕр.

13. Иоанны 5:19, 30 стихтӕй цы ис базонӕн?

¹³ Кӕд Йесо Хуыцауы Фырт уыд ӕмӕ ӕххӕст адӕймаг уыд, уӕддӕр йӕ ныфс дардта Йегъовӕйыл. (Бакӕс Иоанны 5:19, 30.) Уый йӕ уӕларвон Фыды бартӕм никуы бабӕллыд. Филиппӕгтӕм 2:6 стихы фыст ис, зӕгъгӕ, Йесомӕ «ахӕм хъуыды никуы фӕзынд, ӕмӕ, Хуыцаумӕ цы бартӕ ис, уымӕ дӕр ахӕм бартӕ хъуамӕ уа». Йесо ӕмбӕрста, йӕ бон алцы кӕй нӕу, ӕмӕ алкӕддӕр йӕ Фыды коммӕ каст.

14. Йесойӕн, йӕ бар кӕуыл нӕ цыд, ахӕм хъуыддаг куы аразын кодтой, уӕд куыд бакодта?

¹⁴ Иухатт ахуыргӕнинӕгтӕ Иаков ӕмӕ Иоанн сӕ мадимӕ Йесомӕ ӕрбацыдысты ӕмӕ йын загътой, цӕмӕй Хуыцауы Паддзахады иуы йӕ рахиз фарс ӕрбадын кодтаид, иннӕйы та – йӕ галиу фарс. Фӕлӕ Йесойӕн ууыл йӕ бар нӕ цыд. Ӕмӕ сын уайтагъд дзуапп радта, уый ӕрмӕст йӕ уӕларвон Фыды бон кӕй у аскъуыддзаг кӕнын (Матф. 20:20–23). Йесо уыд бонзонгӕ ӕмӕ ӕмбӕрста, йӕ бар алцӕуыл кӕй нӕ цӕуы. Йегъовӕ йын бар цӕмӕн нӕ радта, уый никуы сарӕзта (Иоан. 12:49). Нӕ бон куыд у Йесойы бафӕзмын?

15, 16. 1 Коринфӕгтӕм 4:6 стихы цы уынаффӕ ис, уымӕ гӕсгӕ нӕ бон куыд у архайын?

¹⁵ 1 Коринфӕгтӕм 4:6 стихы цы уынаффӕ ис, уымӕ гӕсгӕ куы архайӕм, уӕд равдисдзыстӕм, Йесойау бонзонгӕ кӕй стӕм. Уым ис ахӕм ныхӕстӕ: «Фыст цы у, уый сӕрты ма хизут». Исчи нын куы зӕгъа, цӕмӕй йын  цавӕрдӕр хъуыддаджы фӕдыл уынаффӕ раттӕм, уӕд ын хъуамӕ нӕхи хъуыдытӕ кӕнӕ, нӕ сӕрмӕ фыццаг цы ’рцӕуа, уый ма дзурӕм. Хъуамӕ йын йе ’ргом аздахӕм, Библийы ӕмӕ нӕ публикациты цы уынаффӕтӕ ис, уыдонмӕ. Афтӕмӕй равдисдзыстӕм, бонзонгӕ кӕй стӕм ӕмӕ Йегъовӕйы уынаффӕтӕ нӕхи уынаффӕтӕй хуыздӕрыл кӕй нымайӕм (Рарг. 15:3, 4).

¹⁶ Нӕ бонзонгӕдзинад Йегъовӕйӕн кад хӕссы. Фӕлӕ, сӕрныллӕг ӕмӕ бонзонгӕ куы уӕм, уӕд нын уый ӕххуыс кӕндзӕн ӕндӕр хъуыддӕгты дӕр. Уый фӕрцы нӕ циныл цин ӕфтдзӕн ӕмӕ уыдзыстӕм амондджын, стӕй иннӕтимӕ дӕр хӕларӕй цӕрдзыстӕм. Ӕмӕ ныртӕккӕ ууыл аныхас кӕндзыстӕм.

17. Сӕрныллӕг ӕмӕ бонзонгӕ адӕм амондджын цӕмӕн вӕййынц?

¹⁷ Сӕрныллӕг ӕмӕ бонзонгӕ куы уӕм, уӕд уыдзыстӕм амондджын. Нӕхи бон алцы кӕй нӕу, уый куы ’мбарӕм, уӕд-иу иннӕтӕй бузныг уыдзыстӕм, кӕй нын баххуыс кӕнынц, уый тыххӕй. Нӕ зӕрдыл-ма ӕрлӕууын кӕнӕм, Йесо дӕс хъотырджыны куы сдзӕбӕх кодта, уыцы хабар. Ӕрмӕстдӕр дзы иу ӕрбаздӕхт Йесойӕн бузныг зӕгъынмӕ, уыцы хъизӕмайраг низӕй йӕ кӕй фервӕзын кодта, уый тыххӕй. Йӕхицӕн йӕ бон нӕ уыдаид йӕхи сдзӕбӕх кӕнын. Уыцы сӕрныллӕг ӕмӕ бонзонгӕ адӕймаг Йесойӕ тынг бузныг уыд, кӕй йын баххуыс кодта, уый тыххӕй, ӕмӕ Хуыцауы скадджын кодта (Лук. 17:11–19).

18. Сӕрныллӕг ӕмӕ бонзонгӕ куы уӕм, уӕд нын уый куыд ӕххуыс кӕндзӕн иннӕтимӕ хӕларӕй цӕрынӕн? (Ромӕгтӕм 12:10).

¹⁸ Сӕрныллӕг ӕмӕ бонзонгӕ адӕймагӕн ӕнцондӕр вӕййы иннӕтимӕ хӕларӕй цӕрын ӕмӕ хорз ӕмбӕлттӕ ссарын. Цӕмӕн? Ахӕм адӕймаг фӕуыны, иннӕтӕм бирӕ хорз миниуджытӕ кӕй ис, ӕмӕ сӕ фӕнымайы ӕууӕнкджын адӕймӕгтыл. Ӕмӕ, искӕмӕн йӕ  лӕггады исты хорз куы фӕуайы, уӕд ын ӕхсызгон вӕййы ӕмӕ дзы зӕрдиагӕй раппӕлы. (Бакӕс Ромӕгтӕм 12:10.)

19. Нӕхи сӕрбӕрзонддзинадӕй цӕмӕн хъуамӕ хизӕм?

¹⁹ Сӕрбӕрзонд адӕймагӕн та зын вӕййы иннӕтӕй ӕппӕлын. Уый фӕфӕнды, цӕмӕй йын йӕхицӕй ӕппӕлой. Арӕх ахӕм адӕймаг йӕхи иннӕтимӕ фӕбары ӕмӕ фӕархайы, цӕмӕй уыдонӕй хуыздӕр уа. Уый нӕ фӕфӕнды иннӕты дӕр истӕуыл сахуыр кӕнын ӕмӕ сын йӕ бартӕй фӕхай кӕнын. Афтӕ йӕм фӕкӕсы, ӕмӕ, хъуыддаг йӕхӕдӕг куы нӕ бакӕна, уӕд ӕй, куыд ӕмбӕлы, афтӕ ничи бакӕндзӕн. Сӕрбӕрзонд адӕм арӕх вӕййынц кадуарзаг ӕмӕ, искӕмӕн цыдӕр хуыздӕр куы фӕуайы, уӕд сын хъыг вӕййы (Гал. 5:26). Ӕмӕ сын арӕх ӕнувыд ӕмбӕлттӕ дӕр нӕ вӕййы. Уӕдӕ йӕ куы бамбарӕм, ӕмӕ нӕм сӕрбӕрзонддзинад ис, уӕд хъуамӕ Йегъовӕмӕ зӕрдиагӕй кувӕм, цӕмӕй нын баххуыс кӕна нӕ зонд сног кӕнынӕн, ӕмӕ уыцы ӕвзӕр миниуӕг нӕ зӕрдӕйы уидӕгтӕ ма ауадза (Ром. 12:2).

20. Сӕрныллӕг ӕмӕ бонзонгӕ цӕмӕн хъуамӕ уӕм?

²⁰ Йегъовӕ нын равдыста, ӕцӕг сӕрныллӕгдзинад цы у, уый, ӕмӕ дзы уый тыххӕй тынг бузныг стӕм! Сӕрныллӕг кӕй у, уый бӕрӕг у, йӕ лӕггадгӕнджытӕм цы цӕстӕй кӕсы, уымӕй. Ӕмӕ нӕ фӕнды, цӕмӕй мах дӕр уый хуызӕн уӕм. Уымӕй уӕлдай ма нӕ фӕнды, цӕмӕй уӕм, Хуыцауимӕ бонзонгӕйӕ чи цыд, уыцы лӕггадгӕнджыты хуызӕн дӕр. Йегъовӕ у кад ӕмӕ намысы аккаг! (Рарг. 4:11). Ӕмӕ йӕ хъуамӕ алкӕддӕр кадджын кӕнӕм. Ӕмӕ уӕд нӕ бон уыдзӕн нӕ уӕларвон Фыдимӕ цӕуын, уымӕн ӕмӕ уый уарзы сӕрныллӕг ӕмӕ бонзонгӕ адӕмы.