▪ Уый афтӕ ӕмбаргӕ нӕу. Ахӕм хабӕртты кой нӕдӕр Библийы ис, нӕдӕр историйы чингуыты.

Бирӕ Библиты ацы стих тӕлмац куыд ӕрцыд, уый тыххӕй иуӕй-иутӕ афтӕ хъуыды кӕнынц, ӕмӕ-иу Павелы рӕстӕг чидӕртӕ донаргъуыд райстой мӕрдты тыххӕй кӕнӕ мӕрдты бӕсты. Зӕгъӕм, иу тӕлмацы ацы стих афтӕ у: «Кӕд мӕрдтӕ ӕппындӕр нӕ райгас вӕййынц, уӕд ма мӕрдты тыххӕй цӕмӕн исынц аргъуыд?» («Ног Фӕдзӕхст ӕмӕ Псалтир», 1994 аз).

Фӕлӕ-ма ӕркӕсӕм, дыууӕ библииртасӕджы цы зӕгъынц, уымӕ. Профессор Грегори Локвуд куыд зӕгъы, афтӕмӕй, исчи марды бӕсты аргъуыд райса, уымӕн Библийы кӕнӕ историйы чингуыты бӕлвырдгӕнӕнтӕ нӕй. Ӕмӕ профессор Гордон Фи дӕр ныффыста, зӕгъгӕ, дам, ахӕм аргъуыды тыххӕй нӕй фыст нӕдӕр Библийы, нӕдӕр историйы чингуыты. Ног Фӕдзӕхсты, дам, йӕ кой ӕппындӕр нӕй. Ӕмӕ, дам, нӕй иу бӕлвырдгӕнӕн дӕр, фыццаг чырыстӕттӕ ахӕм аргъуыд кӕй лӕвӕрдтой кӕнӕ, апостолты мӕлӕты хӕдфӕстӕ цы аргъуантӕ фӕзынд, уыдонӕй искӕцыйы афтӕ кӕй кодтой, уымӕн.

Библийы фыст ис, Йесойы фӕдылдзӕуджытӕ ӕппӕт адӕмтӕй дӕр ахуыргӕнинӕгтӕ кӕй хъуамӕ цӕттӕ кодтаиккой ӕмӕ сын донаргъуыд кӕй хъуамӕ лӕвӕрдтаиккой, стӕй сӕ кӕй хъуамӕ ахуыр кодтаиккой, Йесо цы бафӕдзӕхста, ӕппӕт уыдӕттӕ ӕххӕст кӕнын (Матф. 28:19, 20). Цалынмӕ адӕймаг донаргъуыд райстаид ӕмӕ Чырыстийы ахуыргӕнинаг суыдаид, уӕдмӕ хъуамӕ базыдтаид Йегъовӕйы ӕмӕ Йесойы тыххӕй, баууӕндыдаид сыл ӕмӕ сӕ коммӕ кӕсын райдыдтаид. Кӕй зӕгъын ӕй хъӕуы, мардӕн уыдӕттӕ йӕ бон аразын нӕу. Стӕй, ӕгас чи у, уыцы чырыстӕттӕй дӕр йӕ бон никӕмӕн у уыдӕттӕ марды бӕсты саразын (Еккл. 9:5, 10; Иоан. 4:1; 1 Кор. 1:14–16).

Уӕдӕ уӕд Павелы цы зӕгъын фӕндыд?

Коринфӕгтӕй иуӕй-иутӕ дзырдтой, мӕрдтӕ кӕй нӕ райгас уыдзысты (1 Кор. 15:12). Фӕлӕ сын Павел бамбарын кодта, кӕй рӕдыдысты. Уый загъта, алы бон дӕр мӕлӕты цӕстытӕм кӕй каст. Кӕд-иу йӕ цард тӕссаг уавӕры уыд, уӕддӕр ӕй фидарӕй зыдта, куы амӕла, уӕд уый дӕр Йесойау уӕларвон цардмӕ кӕй райгас уыдзӕн (1 Кор. 15:30–32, 42–44).

Коринфӕгтӕ хъуамӕ бамбӕрстаиккой, сӕрст чырыстӕттӕ уӕвгӕйӕ алы бон дӕр фӕлварӕнтыл кӕй ӕмбӕлдзысты ӕмӕ кӕй амӕлдзысты, цӕмӕй уӕларвон цардмӕ райгас уой. Аргъуыд куы райстой, цӕмӕй Йесо Чырыстиимӕ иудзинады уыдаиккой, уӕд аргъуыд уый тыххӕй дӕр райстой, цӕмӕй уыйау амардаиккой (Ром. 6:3). Уый ууыл дзурӕг уыд, ӕмӕ уыдон дӕр хъуамӕ амардаиккой ӕмӕ уӕларвон цардмӕ райгас уыдаиккой.

Йесо донаргъуыд куы райста, уымӕй дыууӕ азӕй фылдӕр куы рацыд, уӕд йӕ апостолтӕй дыууӕйӕн загъта: «Ӕз цы аргъуыд исын, уый сымах дӕр райсдзыстут» (Мар. 10:38, 39). Йесо сын донаргъуыды кой нӕ кодта. Уый зӕгъын ӕй фӕндыд, ӕмӕ, Хуыцауыл иузӕрдионӕй кӕй баззайдзӕн, уый тыххӕй мӕлгӕ кӕй акӕндзӕн. Павел ныффыста, сӕрст чырыстӕттӕ йемӕ кӕй хъизӕмар кӕндзысты, цӕмӕй йемӕ иумӕ кадджын дӕр суой (Ром. 8:16, 17; 2 Кор. 4:17). Уӕдӕ уыдон дӕр хъуамӕ амӕлой, цӕмӕй уӕларвон цардмӕ райгас уой.

Уымӕ гӕсгӕ Павелы ныхӕстӕ растдӕр уыдзӕн афтӕ ратӕлмац кӕнын: «Кӕд афтӕ нӕу, уӕд цы зӕгъӕн ис, цӕмӕй амӕла, уый тыххӕй аргъуыд чи райста, уыдонӕй? Кӕд мӕрдтӕ нӕ райгас уыдзысты, уӕд ахӕм аргъуыд цӕмӕн райстой?»