1. Чи ’рбаздӕхы, уыдонмӕ Йегъовӕ цы цӕстӕй ракӕсы?

АЙРАЗМӔЙЫ статьяйы дзырдтам, Йегъовӕ йӕхи кӕй бары хорз фыййауимӕ. Уый йӕ фыстӕй алкӕй дӕр тынг уарзы. Ӕмӕ исчи куы адзӕгъӕл вӕййы, уӕд ӕй фӕагуры. Чи йӕ ныууагъта, уыцы израилӕгтӕн загъта: «Раздӕхут мӕм, ӕмӕ уӕм ӕз дӕр раздӕхдзынӕн». Ӕмӕ абон дӕр ахӕм зӕрдӕ дары, чи дзы адард, уыдонмӕ. Йегъовӕ зӕгъы: «Ӕз нӕ ивын» (Мал. 3:6, 7). Йесо Чырысти загъта, чи адзӕгъӕл, уыдонӕй иу дӕр куы ’рбаздӕхы, уӕд Йегъовӕ ӕмӕ зӕдтӕ тынг кӕй фӕцин кӕнынц (Лук. 15:10, 32).

2. Ацы статьяйы цӕмӕ ’ркӕсдзыстӕм?

² Ныртӕккӕ аныхас кӕндзыстӕм Йесойы фӕсномыг ныхӕстӕй ӕртӕйыл. Мах базондзыстӕм, Йегъовӕйӕ чи адард, уыдонӕн баххуыс кӕнӕн куыд ис ӕмӕ нӕм уый тыххӕй цавӕр миниуджытӕ хъуамӕ уа. Стӕй аныхас кӕндзыстӕм, ацы хъуыддаг йӕ фыдӕбоны аргъ цӕмӕн у, ууыл.

3, 4. Лукайы 15:8–10 стихты цы сылгоймаджы кой ис, уый йӕ драхмӕ афтӕ зӕрдиагӕй цӕмӕн агуырдта?

³ Мах фӕхъӕуы ӕппӕт тыхтӕй архайын, цӕмӕй-иу ссарӕм, Йегъовӕмӕ ӕрбаздӕхын кӕй фӕнды, уыдоны. Лукайы Евангелийы бакӕсӕн ис Йесойы фӕсномыг ныхас, йӕ драхмӕ кӕмӕн фесӕфт, уыцы сылгоймаджы тыххӕй. Уыцы драхмӕ йын зынаргъ у, ӕмӕ йӕ тынг зӕрдиагӕй агуры. (Бакӕс Лукайы 15:8–10.)

⁴ Сылгоймаг йӕ драхмӕ куы ссардта, уӕд тынг цин кодта. Йесойы рӕстӕджы-иу дзуттӕгтӕм арӕх мад йӕ чызгӕн чындзӕхсӕвы бон балӕвар кодта дӕс драхмӕйы. Ӕмӕ, Йесо фӕсномыг ныхасы цы сылгоймаджы кой ракодта, уымӕн уыцы драхмӕ, ӕвӕццӕгӕн, йӕ мады лӕвар уыд. Сылгоймаг ахъуыды кодта, кӕд мын пъолмӕ ӕрхауд, зӕгъгӕ. Ӕмӕ цырагъ ссыгъта ӕмӕ йӕ агурын райдыдта. Фӕлӕ сойын цырагъы рухсмӕ йӕ бон не сси гыццыл ӕвзист ӕхца ссарын. Уӕд райдыдта хӕдзары алы къуым дӕр мӕрзын. Ӕмӕ, цы рыг рамарзта, уым дын йӕ драхмӕ куы ауынид! Йӕ цырагъы рухсмӕ  ӕрттывта. Йӕ цинӕн ма кӕрон кӕм уыд! Ӕмӕ йе ’мбӕлттӕм ӕмӕ йӕ сыхӕгтӕм фӕдзырдта, цӕмӕй йын йӕ циныл фӕцин кодтаиккой.

5. Ӕмбырдӕй чи адард, уыдоны ссарын хатт ӕнцон цӕуылнӕ вӕййы?

⁵ Йесойы фӕсномыг ныхасӕй куыд зыны, афтӕмӕй, цы фесӕфт, уый ссарыныл бафыдӕбон кӕнын фӕхъӕуы. Ӕмӕ, ӕмбырдӕй чи адард, уыдоны ссарыныл дӕр афтӕ фыдӕбон кӕнын хъӕуы. Чи зоны, ӕмбырдтӕм бирӕ азты дӕргъы нал цӕуынц. Кӕнӕ та ӕндӕр ранмӕ цӕрынмӕ ацыдысты, ӕмӕ сӕ уым ӕфсымӕртӕ нӕ зонынц. Фӕлӕ ахӕм хотӕ ӕмӕ ’фсымӕртӕй кӕйдӕрты тынг фӕнды Йегъовӕмӕ ӕрбаздӕхын. Фӕнды сӕ, цӕмӕй та йын сӕ хотӕ ӕмӕ се ’фсымӕртимӕ лӕггад кӕной. Фӕлӕ сӕ хъӕуы не ’ххуыс.

6. Ӕмбырды алкӕй бон дӕр куыд у, Йегъовӕйӕ чи адард, уыцы хотӕ ӕмӕ ’фсымӕрты агурын?

⁶ Йегъовӕйӕ чи адард, уыцы хотӕ ӕмӕ ’фсымӕрты агурын кӕй бон у? Алкӕмӕн дӕр йӕ бон у уыцы хъуыддаджы ӕххуыс кӕнын – хистӕр нӕлгоймӕгтӕн дӕр, пионертӕн дӕр, бинонтӕн дӕр ӕмӕ иннӕ хъусынгӕнджытӕн дӕр. Чи зоны, де ’мбал кӕнӕ дӕ хиуӕттӕй чидӕр ӕмбырдтӕм рагӕй нал цӕуы. Йе та ахӕм хо кӕнӕ ’фсымӕрыл фембӕлдтӕ хӕдзарӕй-хӕдзармӕ кӕнӕ, бирӕ адӕм кӕм вӕййы, ахӕм ран хъусынгӕнгӕйӕ. Уӕд ын зӕгъӕн ис, ӕмӕ йӕ кӕд фӕнды, цӕмӕй йӕ хистӕр нӕлгоймӕгтӕ бабӕрӕг кӕной, уӕд сын дӕ бон кӕй у йӕ адрис кӕнӕ йӕ телефоны номыр раттын.

7. Иу хистӕр нӕлгоймаг цы загъта, уымӕй дӕхицӕн зондӕн цы райсис?

⁷ Йегъовӕмӕ ӕрбаздӕхын кӕй фӕнды, уыдоны агурын сӕйраджыдӕр хистӕр нӕлгоймӕгты хӕс у. Уый сӕ бон куыд у аразын? Томас * у хистӕр нӕлгоймаг, цӕры Испанийы. Уый ӕмбырдмӕ ӕрбаздӕхынӕн кӕмӕн баххуыс кодта, уыдон сты 40 адӕймагӕй фылдӕр. Томас афтӕ зӕгъы: «Фыццаг уал хотӕ ӕмӕ ’фсымӕрты бафӕрсын, ӕмбырдмӕ рагӕй чи нӕ цӕуы, уыдон ныр кӕм цӕрынц кӕнӕ ма ноджыдӕр ахӕм хотӕ ӕмӕ ’фсымӕртӕй кӕй зонынц, уымӕй. Хъусынгӕнджытӕн ӕхсызгон вӕййы истӕмӕй баххуыс кӕнын. Чи ’рлӕмӕгъ, ахӕм хо кӕнӕ ’фсымӕры куы бабӕрӕг кӕнын, уӕд ма йӕ бафӕрсын йӕ сывӕллӕттӕй ӕмӕ йӕ хӕстӕджытӕй. Чидӕртӕ-иу ӕмбырдтӕм сӕ сывӕллӕтты дӕр кодтой, ӕмӕ дзы иуӕй-иутӕ хъусынгӕнджытӕ дӕр систы. Ӕмӕ уыдонӕн дӕр вӕййы баххуыс кӕнӕн, цӕмӕй Йегъовӕмӕ ӕрбаздӕхой».

8. Лукайы 15:17–24 стихты цы фыды кой ис, уый йӕ фыртмӕ цы цӕстӕй ракаст?

⁸ Цавӕр миниуджытӕ нӕм хъуамӕ уа, цӕмӕй, Йегъовӕмӕ ӕрбаздӕхын кӕй фӕнды, уыдонӕн баххуыс кӕнӕм? Йесо иу фӕсномыг ныхасы радзырдта, хӕдзарӕй чи ацыд, ахӕм фырты тыххӕй. Ӕмӕ уыцы фӕсномыг ныхасӕй цӕуылдӕр ахуыр кӕнӕм. (Бакӕс Лукайы 15:17–24.) Уыцы фырт фӕстагмӕ йӕ рӕдыд бамбӕрста, ӕмӕ хӕдзармӕ ӕрбаздӕхт. Йӕ фыд йӕ размӕ разгъордта ӕмӕ йын ныхъхъӕбыс кодта. Бӕрӕг уыд, тынг ӕй кӕй уарзы. Фыртӕн йӕ зӕрдӕ йӕхиуыл худт, ӕмӕ йӕхи уый аккагыл нӕ нымадта, цӕмӕй йӕ йӕ фыд йӕ фырт хона. Йӕ зӕрдӕйы цы уыд, уыдӕттӕ куы раргом кодта, уӕд ын фыд фӕтӕригъӕд кодта. Уый фӕстӕ хъуыддагӕй равдыста, ӕххуырст кусӕгыл ӕй кӕй нӕ нымайы, фӕлӕ йӕ уарзон хъӕбулыл. Фыд йӕ фыртӕн ӕппӕты хуыздӕр уӕлӕдарӕс рахӕссын кодта ӕмӕ йын куывд скодта.

9. Цавӕр миниуджытӕ нӕм хъуамӕ уа, цӕмӕй, Йегъовӕйӕ чи адард, уыдонӕн фӕстӕмӕ ӕрбаздӕхынӕн баххуыс кӕнӕм? (Кӕс рамкӕ « Ӕрбаздӕхын кӕй фӕнды, уыдонӕн куыд баххуыс кӕнӕм?».)

⁹ Йегъовӕйы абарӕн ис, ацы фӕсномыг ныхасы цы фыды кой ис, уыимӕ. Йегъовӕ тынг  уарзы, чи дзы адард, уыцы хотӕ ӕмӕ ’фсымӕрты, ӕмӕ йӕ фӕнды, цӕмӕй йӕм ӕрбаздӕхой. Мах дӕр Йегъовӕйы куы фӕзмӕм, уӕд сын нӕ бон уыдзӕн баххуыс кӕнын. Уый тыххӕй та хъуамӕ уӕм фӕразон, тӕригъӕд сын кӕнӕм, сӕ зын сын ӕмбарӕм ӕмӕ сӕ уарзӕм. Ацы миниуджытӕ ахсджиаг цӕмӕн сты ӕмӕ сӕ нӕ бон куыд у хъуыддагӕй ӕвдисын?

10. Цӕмӕй адӕймагӕн Йегъовӕмӕ ӕрбаздӕхынӕн баххуыс кӕнӕм, уый тыххӕй фӕразон цӕмӕн хъуамӕ уӕм?

¹⁰ Цӕмӕй адӕймаг Йегъовӕмӕ ӕрбаздӕха, уымӕн фӕхъӕуы рӕстӕг, ӕмӕ уымӕ гӕсгӕ хъуамӕ уӕм фӕразон. Бирӕтӕ куыд зӕгъынц, афтӕмӕй Йегъовӕйӕн ногӕй уайтагъд нӕ райдыдтой лӕггад кӕнын. Хистӕр нӕлгоймӕгтӕ ӕмӕ сӕ иннӕ хотӕ ӕмӕ ’фсымӕртӕ иу ӕмӕ дыууӕ хатты нӕ бабӕрӕг кодтой. Азийӕ иу хо, Нэнси, зӕгъгӕ, ныффыста: «Ӕмбырдӕй мын иу хо тынг баххуыс кодта. Цыма йӕ хистӕр хо уыдтӕн, афтӕ мӕ уарзта. Мӕ зӕрдыл мын-иу ӕрлӕууын кодта, нӕ рӕстӕг-иу иумӕ куыд ӕрвыстам. Мӕ зӕрдӕйы цы уыд, уыдӕттӕ йын-иу куы дзырдтон, уӕд-иу мӕм лӕмбынӕг хъуыста. Стӕй-иу мын уынаффӕ дӕр радта. Уый уыди ӕцӕг ӕмбал, ӕмӕ алкӕддӕр цӕттӕ уыд баххуыс кӕнынмӕ».

11. Иннӕтӕн сӕ зын цӕмӕн хъуамӕ ӕмбарӕм?

¹¹ Адӕймагӕн иннӕтӕ йӕ зын куы фембарынц, уӕд уый йӕ зӕрдӕйы хъӕдгӕмттӕн вӕййы ӕвдадзы хос. Иуӕй-иутӕ Йегъовӕйӕ адард сты, ӕмбырды сӕ чидӕр кӕй фӕхъыг кодта ӕмӕ йӕм сӕ зӕрдӕйы маст хӕссын кӕй райдыдтой, уый тыххӕй. Ӕмӕ кӕд бирӕ азтӕ рацыд, уӕддӕр нырма сӕ маст не ссыд. Ӕмӕ сӕ уый хъыгдары Йегъовӕмӕ ӕрбаздӕхын. Гӕнӕн ис, кӕмӕдӕр афтӕ кӕсы, ӕмӕ сӕ дзӕгъӕлы бафхӕрдтой. Арӕх ахӕм адӕмы фӕхъӕуы, цӕмӕй сӕм исчи байхъуса ӕмӕ сӕ бамбара (Иак. 1:19). Ӕмбырдмӕ чи  ’рбаздӕхт, иу ахӕм хо, Марийӕ, загъта: «Фӕндыд мӕ, цӕмӕй мӕм исчи байхъуыстаид, мӕ зӕрдӕ мын ӕрсабыр кодтаид ӕмӕ мын хорз уынаффӕ раттаид».

12. Йегъовӕйы уарзондзинад бӕттӕнимӕ цӕмӕн ис абарӕн?

¹² Йегъовӕ йӕ адӕмы цы уарзтӕй уарзы, уый Библи бары бӕттӕнимӕ. Цымӕ цӕмӕн? Дӕ цӕстытыл-ма ауайын кӕн, цыма абухгӕ денджызы ныххаудтӕ ӕмӕ ныгъуылыс. Уалынмӕ дӕм лодкӕйӕ чидӕр цыдӕр баппӕрста, цӕмӕй йыл хӕцай ӕмӕ ма аныгъуылай. Бузныг дзы куыннӕ дӕ. Фӕлӕ дон тынг уазал у. Ӕмӕ цӕмӕй фервӕзай, уый тыххӕй дӕм хъуамӕ бӕттӕн баппарой ӕмӕ дӕ донӕй сласой. Йегъовӕ, чи йӕ ныууагъта, уыцы израилӕгты тыххӕй загъта: «Хӕларзӕрдӕйӕ ӕмӕ сӕ уарзондзинады бӕттӕнтӕй мӕхимӕ кодтон» (Оси 11:4, фип.). Абон дӕр Йегъовӕ ахӕм зӕрдӕ дары, чи дзы адард ӕмӕ зындзинӕдты бын чи фӕци, уыдонмӕ. Уый фӕнды, цӕмӕй зоной, кӕй сӕ уарзы. Стӕй йӕ фӕнды, цӕмӕй сӕ фӕстӕмӕ йӕхимӕ ӕрбакӕна. Ӕмӕ сӕ кӕй уарзы, уый йӕ бон у дӕу уылты равдисын.

13. Нӕ уарзондзинад иннӕтӕн Йегъовӕмӕ ӕрбаздӕхынӕн куыд баххуыс кӕны, уымӕн цӕвиттон ӕрхӕсс.

¹³ Ӕмбырдӕй чи адард, уыдонӕн фӕхъӕуы дзурын, Йегъовӕ сӕ кӕй уарзы, стӕй сӕ мах дӕр кӕй уарзӕм, уый. Айразмӕйы статьяйы кӕй кой уыд, уыцы ӕфсымӕр, Пабло, ӕмбырдтӕм 30 азӕй фылдӕр нӕ цыд. Уый зӕгъы: «Иухатт райсомӕй хӕдзарӕй куы рацӕйцыдтӕн, уӕд иу дзӕбӕх ацӕргӕ хойыл амбӕлдтӕн. Мемӕ афтӕ фӕлмӕнӕй ныхас кодта, ӕмӕ гыццыл сывӕллонау кӕуын райдыдтон. Ӕз ын загътон, зӕгъын, дӕ, ӕвӕццӕгӕн, Йегъовӕ рарвыста мӕнмӕ. Ӕмӕ растдӕр уӕд сфӕнд кодтон Йегъовӕмӕ ’рбаздӕхын».

14. Лукайы 15:4, 5 стихтӕм гӕсгӕ, фыййау йӕ фысы куы ссардта, уӕд куыд бакодта?

¹⁴ Ӕмбырдӕй чи адард, уыдонӕн ӕдзух фӕхъӕуы ӕххуыс кӕнын ӕмӕ сӕ фидар кӕнын. Йесо йӕ фӕсномыг ныхасы кӕй кой ракодта, уыцы фырты хабар куыд уыд, афтӕ уыдонӕн дӕр, чи зоны, сӕ зӕрдӕты ис арф хъӕдгӕмттӕ. Стӕй, Хӕйрӕджы дунемӕ кӕй адзӕгъӕл сты, уый тыххӕй сӕ уырнындзинад дӕр, ӕвӕццӕгӕн, ӕрлӕмӕгъ. Ӕмӕ сын хъӕуы ӕххуыс кӕнын, цӕмӕй та Йегъовӕйыл раздӕрау баууӕндой. Йесо йӕ фӕсномыг ныхасы радзырдта, фыййау сӕфт фысы йӕ уӕхсчытыл кӕй сӕвӕрдта ӕмӕ йӕ дзугмӕ кӕй ӕрбахаста. Цӕмӕй йӕ ссардтаид, уый тыххӕй йӕ бирӕ рӕстӕг ӕмӕ тыхтӕ бахъуыд. Фӕлӕ фыййау уӕддӕр ӕмбары, фысы ахӕссын кӕй хъӕуы, уымӕн ӕмӕ йӕхи бон цӕуын нӕу. (Бакӕс Лукайы 15:4, 5.)

15. Йегъовӕмӕ ӕрбаздӕхын кӕй фӕнды, уыдонӕн нӕ бон куыд у баххуыс кӕнын? (Кӕс рамкӕ « Диссаджы брошюрӕ».)

¹⁵ Цӕмӕй адӕймагӕн Йегъовӕмӕ ӕрбаздӕхынӕн баххуыс кӕнӕм, уый тыххӕй нӕ, чи зоны, бахъӕуа бирӕ рӕстӕг ӕмӕ хъарутӕ. Фӕлӕ йын Йегъовӕйы сыгъдӕг тыхы фӕрцы, йӕ Ныхасы ӕмӕ нӕ публикациты фӕрцы нӕ бон у баххуыс кӕнын, цӕмӕй та Йегъовӕмӕ баввахс уа (Ром. 15:1). Иу фӕлтӕрдджын хистӕр нӕлгоймаг загъта: «Йегъовӕмӕ ӕрбаздӕхын кӕй бафӕнды, уыдонӕн сӕ фылдӕримӕ фӕхъӕуы Библи ахуыр кӕнын» *. Уӕдӕ дын хистӕр нӕлгоймаг куы бахӕс кӕна, цӕмӕй ахӕм хо кӕнӕ ’фсымӕримӕ Библи ахуыр кӕнай, уӕд хорз уаид, куы сразы уаис ӕмӕ  уыцы хъуыддаджы куы баххуыс кӕнис. Уыцы хистӕр нӕлгоймаг ма афтӕ загъта: «Ахӕм хо кӕнӕ ’фсымӕримӕ Библи чи ахуыр кӕна, уый йын хъуамӕ суа, кӕуыл ӕууӕнддзӕн ӕмӕ, йӕ зӕрдӕйы цы ис, уый кӕмӕн дзурдзӕн, ахӕм хорз ӕмбал».

16. Зӕдтӕ нын кӕй ӕххуыс кӕнынц, уый кӕцӕй зонӕм?

¹⁶ Йегъовӕмӕ ӕрбаздӕхын кӕй фӕнды, уыдоны ссарынӕн нын зӕдтӕ кӕй баххуыс кӕнынц, уымӕн бирӕ цӕвиттонтӕ ис (Рарг. 14:6). Зӕгъӕм, Эквадорӕй иу ӕфсымӕр, Сильвио, зӕгъгӕ, Йегъовӕмӕ зӕрдӕбынӕй куывта, цӕмӕй йын ӕмбырдмӕ ӕрбаздӕхынӕн баххуыс кодтаид. Нырма кувгӕ кодта, афтӕ йын йӕ дуар чидӕр ӕрбахоста. Куы ракаст, уӕд дзы ауыдта дыууӕ хистӕр нӕлгоймаджы. Уыдон ын уыцы бонӕй фӕстӕмӕ ӕххуыс кодтой Йегъовӕмӕ ӕрбаздӕхынӕн.

17. Йӕ уырнындзинад лӕмӕгъ кӕмӕн у, уыдонӕн куы ӕххуыс кӕнӕм, уӕд цавӕр арфӕдзинадӕй схайджын уыдзыстӕм?

¹⁷ Йӕ уырнындзинад лӕмӕгъ кӕмӕн у, уыдонӕн Йегъовӕмӕ ӕрбаздӕхынӕн куы ’ххуыс кӕнӕм, уӕд нын уый стыр циндзинад ӕрхӕсдзӕн. Пионерӕй чи лӕггад кӕны, иу ахӕм ӕфсымӕр тынг фӕархайы, цӕмӕй ахӕм хотӕ ӕмӕ ’фсымӕртӕн баххуыс кӕна. Уый афтӕ зӕгъы: «Хатт афтӕ фӕцин кӕнын, ӕмӕ мӕ зӕрдӕ суынгӕг вӕййы. Йегъовӕ йӕ зынаргъ фыстӕй иуы дӕр фӕстӕмӕ Хӕйрӕджы дунейӕ куы ракӕны, уӕд мын уый тынг ӕхсызгон вӕййы. Ӕмӕ фӕцин кӕнын, мӕ бон Йегъовӕйӕн уыцы хъуыддаджы баххуыс кӕнын кӕй уыд, ууыл» (Хъуыд. 20:35).

18. Кӕд ӕмбырдтӕм ӕмӕ хъусын кӕнынмӕ рагӕй нал цӕуыс, уӕддӕр дӕм Йегъовӕ цы зӕрдӕ дары?

¹⁸ Кӕд, мыййаг, ды дӕр ӕмбырдтӕм ӕмӕ хъусын кӕнынмӕ рагӕй нал цӕуыс, уӕд ма дызӕрдыг кӕн, Йегъовӕ дӕ ныр дӕр кӕй уарзы, ууыл. Уый фӕнды, цӕмӕй йӕм фӕстӕмӕ ӕрбаздӕхай. Кӕй зӕгъын ӕй хъӕуы, уый тыххӕй дӕ бацархайын хъӕудзӕн. Фӕлӕ Йесойы фӕсномыг ныхасы фыд йӕ фыртмӕ куыд ӕнхъӕлмӕ каст, афтӕ Йегъовӕ дӕр дӕумӕ ӕнхъӕлмӕ кӕсы. Ӕмӕ «хӕдзармӕ» куы ’рбаздӕхай, уӕд тынг цин кӕндзӕн!