1, 2. Йесо ӕвӕрд кӕм уыд, уыцы зӕппадзы цур зӕд сылгоймӕгтӕн цы загъта? Фӕстӕдӕр сын Йесо йӕхӕдӕг цы загъта?

НӔ ЭРӔЙЫ 33 аз, 16 нисан. Райсомӕй раджы цалдӕр сылгоймаджы, Хуыцауы лӕггадгӕнджытӕ, уыцы ӕнкъардӕй фӕцӕуынц, Йесо Чырысти ӕвӕрд кӕм уыд, уыцы зӕппадзмӕ. Йӕ мӕлӕтыл рацыд дыууӕ боны. Фӕнды сӕ Йесойы мардмӕ хӕрздӕфгӕнаг кӕрдӕджытӕ ӕмӕ хӕрздӕф сойтӕй базилын. Фӕлӕ уырдӕм куы бахӕццӕ сты, уӕд кӕсынц, ӕмӕ зӕппадз афтид! Зӕппадзы цур баййӕфтой зӕды, ӕмӕ сын уый загъта, Йесо кӕй райгас. Стӕй ма сын бафӕдзӕхста, цӕмӕй ахуыргӕнинӕгтӕн загътаиккой: «Галилейӕмӕ уӕ разӕй фӕцӕуы, уым ӕй фендзыстут» (Матф. 28:1–7; Лук. 23:56; 24:10).

² Сылгоймӕгтӕ уырдыгӕй куы рацыдысты, уӕд сӕм Йесо фӕзынд ӕмӕ сын загъта: «Цӕут ӕмӕ ме ’фсымӕртӕн зӕгъут, цӕмӕй Галилейӕмӕ ацӕуой. Уым мӕ фендзысты» (Матф. 28:10). Ӕвӕццӕгӕн, Йесойы фӕндыд йӕ ахуыргӕнинӕгтӕн тынг ахсджиаг амындтӕ раттын, уымӕн ӕмӕ, куы райгас, уӕд фыццаг бацархайдта, цӕмӕй семӕ фембӕлдаид.

3, 4. Цӕмӕн ис зӕгъӕн, ӕмӕ, Матфейы 28:19, 20 стихты цы хъуыддаджы кой ис, уый Йесо ӕрмӕст апостолтӕн кӕй нӕ бахӕс кодта? (Кӕс нывмӕ ӕддаг цъарыл.)

³ Бакӕс Матфейы 28:16–20. Йесо йӕ ахуыргӕнинӕгты куы ӕрӕмбырд кодта, уӕд сын загъта, 1 ӕнусы цы ахсджиаг куыст кӕндзысты, уый тыххӕй, ӕмӕ абон мах дӕр уыцы куыст кӕнӕм. Йесо загъта: «Ацӕут ӕмӕ мын ӕппӕт адӕмтӕй дӕр цӕттӕ кӕнут ахуыргӕнинӕгтӕ. ...Ӕмӕ сӕ ахуыр кӕнут, ӕз уын цы бафӕдзӕхстон, ӕппӕт уыдӕттӕ ӕххӕст кӕнын».

⁴ Йесойы фӕнды, цӕмӕй йӕ фӕдылдзӕуджытӕ иууылдӕр хорз хабар хъусын кӕной. Уыцы хъуыддаг ӕрмӕст йӕ иуӕндӕс иузӕрдион апостолӕн нӕ бахӕс кодта. Кӕцӕй йӕ зонӕм? Йесо  Галилейӕйы иу хохыл йӕ фӕдылдзӕуджытӕн куы бафӕдзӕхста, ахуыргӕнинӕгтӕ цӕттӕ кӕнут, зӕгъгӕ, уӕд уым канд апостолтӕ нӕ уыдысты. Хъуыды ма йӕ кӕныс, зӕд сылгоймӕгтӕн кӕй бафӕдзӕхста, цӕмӕй ахуыргӕнинӕгтӕн загътаиккой: «Уым ӕй [ома Галилейӕйы] фендзыстут»? Уӕдӕ иузӕрдион сылгоймӕгтӕ зыдтой, Йесо кӕм уыдзӕн, уый. Ӕмӕ, ӕвӕццӕгӕн, уыдон дӕр уырдӕм ацыдысты. Уымӕй уӕлдай, апостол Павел загъта, Йесо «уыцы иу рӕстӕг [кӕй] фӕзынд фондзсӕдӕ ӕфсымӕрӕй фылдӕрмӕ» (1 Кор. 15:6). Ӕмӕ сӕм цымӕ кӕм фӕзынд?

5. 1 Коринфӕгтӕм 15:6 стихмӕ гӕсгӕ фидарӕй зӕгъӕн цы ис?

⁵ Фидарӕй зӕгъӕн ис, Павел кӕй кодта, Матфейы 28 сӕры цы фембӕлды тыххӕй ис фыст, уый кой. Цӕмӕ гӕсгӕ ис афтӕ зӕгъӕн? Фыццаг уый, ӕмӕ Йесойы ахуыргӕнинӕгтӕн сӕ фылдӕр галилейӕгтӕ уыдысты. Уӕдӕ бирӕ адӕмы ӕрӕмбырд кӕнын ӕнцондӕр уыд, Галилейӕйы чи уыд, ахӕм хохыл, Иерусалимы искӕй хӕдзары нӕ, фӕлӕ. Дыккаг уый, ӕмӕ Йесо йӕ иуӕндӕс апостолимӕ уый размӕ фембӕлд Иерусалимы кӕйдӕр хӕдзары. Уый уыди, куы райгас, уый фӕстӕ. Ӕмӕ йӕ ’рмӕст уыдонӕн куы фӕндыдаид бафӕдзӕхсын, цӕмӕй хъусын кӕной ӕмӕ ахуыргӕнинӕгтӕ цӕттӕ кӕной, уӕд сӕ Иерусалимы ӕрӕмбырд кодтаид. Ӕмӕ апостолты дӕр, стӕй иннӕты дӕр, уыимӕ сылгоймӕгты дӕр, Галилейӕмӕ нӕ цӕуын кодтаид (Лук. 24:33, 36).

6. Матфейы 28:20 стихӕй куыд зыны, ахуыргӕнинӕгтӕ цӕттӕ кӕнын нӕ рӕстӕджы дӕр кӕй хъӕуы ӕмӕ ацы фӕдзӕхст куыд ӕххӕст кӕнӕм?

⁶ Ӕртыккаг та уый, ӕмӕ Йесо ахуыргӕнинӕгтӕ цӕттӕ кӕныны хъуыддаг, 1 ӕнусы чи цард, ӕрмӕст уыцы чырыстӕттӕн нӕ бахӕс кодта. Кӕцӕй йӕ зонӕм? Йесо йӕ фӕдылдзӕуджытӕн амындтӕ куы радта, уӕд ма сын фӕстагмӕ загъта: «Цалынмӕ ацы цардӕвӕрды кӕрон не ’рцӕуа, уӕдмӕ ӕз алы бон дӕр уыдзынӕн уемӕ» (Матф. 28:20). Ӕмӕ Йесо куыддӕриддӕр загъта, афтӕ абон ахуыргӕнинӕгтӕ цӕттӕ кӕныны хъуыддаг йӕ тӕмӕны бацыд. Ахъуыды-ма кӕн, алы аз дӕр иу-300 мин адӕймаджы донаргъуыд райсынц ӕмӕ свӕййынц Йегъовӕйы Ӕвдисӕнтӕ ӕмӕ Чырыстийы ахуыргӕнинӕгтӕ!

7. Ацы статьяйы дзырд цӕуыл цӕудзӕн ӕмӕ нӕ ууыл цӕмӕн хъӕуы аныхас кӕнын?

⁷ Библи кӕимӕ фӕахуыр кӕнӕм, уыдонӕй бирӕтӕ донаргъуыд райсынц. Фӕлӕ сӕ чидӕртӕ, Йесойы ахуыргӕнинӕгтӕ суой, уымӕ сӕ ныфс нӕ хӕссынц. Сӕ зӕрдӕмӕ цӕуы Библи ахуыр кӕнын, фӕлӕ, донаргъуыды размӕ цы къахдзӕфтӕ хъӕуы саразын, уыдон нӕ аразынц. Не ’ппӕты дӕр фӕнды, Библи кӕимӕ ахуыр кӕнӕм, уыдонӕн баххуыс кӕнын, цӕмӕй, цы базонынц, уымӕ гӕсгӕ архайой ӕмӕ Йесойы ахуыргӕнинӕгтӕ суой. Ацы статьяйы дзырд цӕудзӕн, нӕ бон сын куыд у ӕххуыс кӕнын, цӕмӕй Йегъовӕйы бауарзой ӕмӕ сӕ царды хъӕугӕ ивындзинӕдтӕ скӕной. Ууыл цӕмӕн хъӕуы аныхас кӕнын? Чи зоны нӕ иу бон бахъӕуа аскъуыддзаг кӕнын, адӕймагимӕ дарддӕр Библи ахуыр кӕндзыстӕм ӕви нӕ.

8. Хатт зын цӕмӕн вӕййы, Библи кӕимӕ ахуыр кӕнӕм, уыдонӕн баххуыс кӕнын, цӕмӕй Йегъовӕйы бауарзой?

⁸ Йегъовӕйы фӕнды, цӕмӕй йын адӕм лӕггад кӕной, кӕй йӕ уарзынц, уый тыххӕй. Уӕдӕ нӕ нысан у, Библи кӕимӕ ахуыр кӕнӕм, уыдонӕн баххуыс кӕнын, цӕмӕй бамбарой, Йегъовӕ сыл тынг кӕй тыхсы ӕмӕ сӕ тынг кӕй уарзы. Хъуамӕ сын баххуыс кӕнӕм, цӕмӕй феной, Йегъовӕ кӕй у «сидзӕрты фыд ӕмӕ идӕдзты тӕрхонгӕнӕг» (Пс. 68:5). Библи кӕимӕ ахуыр кӕныс, уый куы бамбара, Хуыцау ӕй куыд тынг уарзы, уӕд ӕй, чи зоны, уый дӕр бауарза. Йегъовӕ уарзӕгой Фыд кӕй у, уый кӕмӕндӕр зын вӕййы бамбарын, уымӕн ӕмӕ йӕхи фыдӕй рӕвдыд нӕ зыдта (2 Тим. 3:1, 3). Адӕймагимӕ Библи куы фӕахуыр кӕныс, уӕд-иу ын йе ’ргом раздах Йегъовӕйы рӕсугъд миниуджытӕм. Ӕмбарын ын кӕн, нӕ уарзӕгой Хуыцауы кӕй фӕнды, цӕмӕй ӕнусон цардӕй схайджын уа, ӕмӕ йын ӕнӕмӕнг кӕй баххуыс кӕндзӕн, цӕмӕй  уый йӕ къухы бафта. Нӕ бон ма йын куыд у ӕххуыс кӕнын?

9, 10. Адӕмимӕ Библи цавӕр чингуыты фӕрцы хъуамӕ ахуыр кӕнӕм ӕмӕ цӕмӕн?

⁹ Пайда кӕн чингуытӕй «Нӕ бон цы у Библийӕ базонын?» ӕмӕ «Хуыцауы уарзтӕй дӕхи ӕнӕхай ма фӕкӕн» *. Ацы чингуытӕ уагъд ӕрцыдысты, цӕмӕй, Библи кӕимӕ ахуыр кӕнӕм, уыдонӕн Йегъовӕйы бауарзынӕн баххуыс кӕнӕм. Зӕгъӕм, чиныджы «Нӕ бон цы у базонын» 1 сӕры ис дзуапп ахӕм фарстатӕн: «Хуыцау ныл тыхсы? Хуыцау адӕмы зындзинӕдтӕм цы цӕстӕй кӕсы? Уый гӕнӕн ис, ӕмӕ Йегъовӕйы хӕлар суай?» Чиныг «Хуыцауы уарзтӕй дӕхи ӕнӕхай ма фӕкӕн» та цӕмӕн ӕрцыд уагъд? Ацы чиныджы фӕрцы адӕймаг бамбардзӕн, Библийы уагӕвӕрдтӕм гӕсгӕ куы архайа, уӕд йӕ цард хуыздӕрырдӕм кӕй фӕивдзӕн ӕмӕ Йегъовӕмӕ кӕй баввахс уыдзӕн. Кӕд уый размӕ искӕимӕ Библи ацы чингуыты фӕрцы ахуыр кодтай, уӕддӕр дӕ ныр дӕр хъӕуы алы ахуырмӕ дӕр хорз цӕттӕ кӕнын. Ӕмӕ-иу хъуамӕ дӕ зӕрдыл  дарай, ныр кӕимӕ ахуыр кӕныс, уымӕн цавӕр хъуыддӕгты хъӕуы баххуыс кӕнын, уый.

¹⁰ Фӕлӕ, зӕгъӕм, Библи кӕимӕ ахуыр кӕныс, уымӕ цавӕрдӕр фарста фӕзынд, фӕлӕ уыцы фарстайыл чингуытӕ «Нӕ бон цы у базонын» ӕмӕ «Хуыцауы уарзт»-ы дзырд нӕ цӕуы. Ахӕм уавӕры хорз уаид, уӕ ахуыр куы адарддӕр кӕниккат. Ӕмӕ ахуыргӕнинагӕн та дӕ бон уаид зӕгъын, цӕмӕй йӕхӕдӕг бакӕса, уыцы фарстайыл дзырд кӕм цӕуы, уыцы публикаци.

11. Искӕимӕ Библи куы ахуыр кӕнӕм, уӕд ахуыры размӕ ӕмӕ ахуыры кӕрон кувын кӕд хъуамӕ райдайӕм? Нӕ бон куыд у адӕймагӕн бамбарын кӕнын, уый ахсджиаг кӕй у?

¹¹ Библийы ахуыры размӕ-иу скув. Кӕд искӕимӕ Библи ахуыр кӕнын райдыдтай, уӕд хорз уаид, ахуыры размӕ ӕмӕ-иу ахуыры кӕрон куы скувис. Ӕмӕ афтӕ кӕнын цас раздӕр райдайай, уыйас хуыздӕр. Хъуамӕ адӕймаг бамбара, Хуыцауы Ныхас ӕрмӕстдӕр Хуыцауы сыгъдӕг тыхы фӕрцы кӕй ис ӕмбарӕн. Ахуыры размӕ ӕмӕ ахуыры кӕрон кувын цӕмӕн хъӕуы, уый иуӕй-иу хъусынгӕнджытӕ бамбарын кӕнынц Иаковы 1:5 стихы фӕрцы: «Кӕд искӕмӕ зонд фаг нӕй, уӕд курӕд Хуыцауӕй». Адӕймагӕн ацы стих бакӕсынц ӕмӕ йӕ уый фӕстӕ бафӕрсынц: «Куыд ис Хуыцауӕй зонд курӕн?» Адӕймаг, ӕвӕццӕгӕн, сразы уыдзӕн, Хуыцаумӕ-иу кӕй хъуамӕ скувӕм.

12. Псаломы 139:2–4 стихты фӕрцы дӕ бон куыд у, Библи кӕимӕ ахуыр кӕныс, уымӕн бамбарын кӕнын, йӕ бон кӕй у Йегъовӕйӕн алцыдӕр дзурын?

¹² Библи кӕимӕ ахуыр кӕныс, уый кувын сахуыр кӕн. Бамбарын ын кӕн, Йегъовӕйы кӕй фӕнды, цӕмӕй йӕм зӕрдӕбынӕй кува. Зӕгъ ын, йӕ бон кӕй у Йегъовӕйӕн, йӕ зӕрдӕйы цыдӕриддӕр ис, уый дзурын, суанг, иу адӕймагӕн дӕр цы нӕ зӕгъдзӕн, уыдӕттӕ дӕр. Йегъовӕйӕн алцыдӕр дзурын ӕфсӕрмы кӕнын нӕ хъӕуы. Уый ӕнӕуи дӕр зоны, нӕ зӕрдӕйы арф ӕмбӕхст цы у, уый. (Бакӕс Псалом 139:2–4.) Уымӕй уӕлдай, адӕймагӕн ӕмбарын кӕн, йӕ бон кӕй у Хуыцаумӕ кувын, цӕмӕй йын баххуыс кӕна йӕ зондахаст аивынӕн ӕмӕ йе ’взӕр хъуыддӕгтӕ ныууадзынӕн. Зӕгъӕм, адӕймаг цасдӕр рӕстӕг Библи ахуыр кӕны, фӕлӕ мӕнг динимӕ баст бӕрӕгбӕттӕй кӕцыдӕр йӕ зӕрдӕмӕ цӕуы. Ӕмӕ йӕ кӕд зоны, чырыстӕттӕн ӕй кӕй не ’мбӕлы бӕрӕг кӕнын, уӕддӕр ӕм дзы цыдӕртӕ хорз кӕсынц. Дӕ бон ын куыд уаид баххуыс кӕнын? Ис ын зӕгъӕн, йӕ бон кӕй у Йегъовӕйӕн йӕ зӕрдӕ раргом кӕнын ӕмӕ дзы курын, цӕмӕй йын баххуыс кӕна, Йегъовӕ цы уарзы, ӕрмӕстдӕр уый уарзынӕн (Пс. 97:10).

13. а) Библи кӕимӕ ахуыр кӕнӕм, уый ӕмбырдтӕм кӕд хъуамӕ фӕхонӕм ӕмӕ цӕмӕн? б) Адӕймагӕн куыд ис баххуыс кӕнӕн, цӕмӕй йӕм ӕмбырды афтӕ ма кӕса, цыма ӕцӕгӕлон адӕмы ’хсӕн ис?

¹³ Библи кӕимӕ ахуыр кӕныс, уый ӕмбырдтӕм фӕхон, ӕмӕ цас раздӕр, уыйас хуыздӕр. Ӕмбырды цы фена ӕмӕ цы фехъуса, уый йын, гӕнӕн ис, йӕ зӕрдӕ афтӕ бацагайа, ӕмӕ йӕ бафӕнда Йегъовӕйӕн лӕггад кӕнын. Равдис ын видеоролик «Паддзахады залы цы вӕййы?» ӕмӕ йӕ ӕмбырдмӕ зӕрдиагӕй фӕхон. Кӕд дӕм машинӕ ис, уӕд ын зӕгъ, йӕ бон кӕй у демӕ машинӕйыл ацӕуын. Хорз ма уаид, Библийы ахуырмӕ-иу алыхуызон хъусынгӕнджыты куы фӕхонис. Афтӕмӕй адӕймаг ӕмбырдӕй иннӕтимӕ дӕр базонгӕ уыдзӕн. Ӕмӕ, ӕмбырдтӕм цӕуын куы райдайа, уӕд ӕм афтӕ нӕ кӕсдзӕн, цыма ӕцӕгӕлон адӕмы ’хсӕн ис.

14. Адӕймагӕн йӕ уырнындзинад фидар кӕнын кӕд райдайы?

¹⁴ Махӕн нӕ нысан у, Библи кӕимӕ ахуыр кӕнӕм, уымӕн ӕххуыс кӕнын, цӕмӕй йӕ уырнындзинад фидар кӕна (Еф. 4:13). Чи зоны, чидӕр Библи ахуыр кӕныныл уымӕн сразы вӕййы, ӕмӕ фӕхъуыды кӕны, уый йын цы ӕххуыс фӕуыдзӕн, ууыл. Фӕлӕ Йегъовӕйы куы бауарза, уӕд хъуыды кӕнын райдайдзӕн, иннӕтӕн, уыимӕ ӕмбырды чи ис, уыдонӕн дӕр, йӕ бон баххуыс кӕнын цӕмӕй у, ууыл (Матф. 22:37–39). Афон куы ’рцӕуа, уӕд ын дӕ бон у зӕгъын, нӕ бон ма кӕй у Паддзахады хъуыддагӕн мысайнӕгтӕ дӕттын дӕр.

15. Библи кӕимӕ ахуыр кӕнӕм, уымӕн нӕ бон куыд у ӕххуыс кӕнын, цӕмӕй сахуыр уа зын уавӕрты раст архайын?

 ¹⁵ Библи кӕимӕ ахуыр кӕныс, уый сахуыр кӕн зын уавӕрты раст архайын. Зӕгъӕм, Библи кӕимӕ ахуыр кӕныс, уый ӕнӕаргъуыд хъусынгӕнӕг сси. Ӕмӕ дын иу бон загъта, ӕмбырды йӕ чидӕр кӕй фӕхъыг кодта. Уӕд хорз уаид, куы никӕй сӕрыл рахӕцис, фӕлӕ йын куы бамбарын кӕнис, Библимӕ гӕсгӕ куыд хъуамӕ бакӕна, уый. Ома йӕ бон у йе ’фсымӕрӕн ныххатыр кӕнын ӕмӕ хабар ферох кӕнын. Кӕд йӕ бон афтӕ бакӕнын нӕу, уӕд та хъуамӕ йемӕ фӕлмӕнӕй аныхас кӕна, ӕмӕ йӕ нысан хъуамӕ уа йе ’фсымӕры «ссарын». (Абар Матфейы 18:15.) Хъӕуы йӕ рагацау ахъуыды кӕнын, цы йын зӕгъдзӕн, ууыл, ӕмӕ йын ды дӕр уыцы хъуыддаджы баххуыс кӕн. Равдис ын, ахӕм уавӕры цы ис саразӕн, уый фӕдыл приложенийы JW Library^®, публикацийы «Йегъовӕйы Ӕвдисӕнтӕн ӕрмӕг агурынӕн ӕххуыс» ӕмӕ сайты jw.org^® ӕрмӕг ссарӕн куыд ис, уый. Цалынмӕ донаргъуыд нӕ райста, уӕдмӕ иннӕтимӕ хӕларӕй цӕрын куы сахуыр уа, уӕд донаргъуыды фӕстӕ дӕр афтӕ кӕндзӕн.

16. Хорз цӕмӕн у Библийы ахуырмӕ иннӕ хъусынгӕнджыты дӕр хонын?

¹⁶ Библийы ахуырмӕ-иу ӕмбырдӕй иннӕты дӕр фӕхон. Фӕхон-иу районон цӕстдарӕджы дӕр, уе ’мбырд уын куы бӕрӕг кӕна, уӕд. Уый хорз цӕмӕй у, уый кой ма гыццыл раздӕр кодтам. Фӕлӕ ма уый иу цӕмӕйдӕр у хорз. Иннӕ хъусынгӕнджытӕн сӕ бон уыдзӕн, Библи кӕимӕ ахуыр кӕныс, уымӕн баххуыс кӕнын, дӕуӕн ын цы хъуыддӕгты нӕу дӕ бон баххуыс кӕнын, уыцы хъуыддӕгты. Зӕгъӕм, адӕймаг цалдӕр хатты фӕлвӕрдта йӕ тамако ныууадзын, фӕлӕ йын нӕ рауад. Уӕд Библийы ахуырмӕ фӕхон, раздӕр тамако чи дымдта ӕмӕ йӕ ныууадзын зын кӕмӕн уыд, фӕлӕ йӕ уӕддӕр чи ныууагъта, ахӕм хъусынгӕнӕджы. Гӕнӕн ис, уыцы хъусынгӕнӕг ын ратта, чи йын баххуыс кӕндзӕн, ахӕм уынаффӕ. Кӕд фӕлтӕрдджын хъусынгӕнӕджы раз Библийы ахуыр уадзынмӕ дӕ ныфс нӕ хӕссыс, уӕд-иу ын зӕгъ, цӕмӕй Библийы ахуыр уый ауадза. Библийы ахуырмӕ иннӕты куы хонай, уӕд, кӕимӕ ахуыр кӕныс, уый уыдонӕй дӕр бирӕ цӕуылдӕрты сахуыр уыдзӕн. Дӕ зӕрдыл дар, нӕ нысан кӕй у адӕймагӕн баххуыс кӕнын, цӕмӕй йӕ уырнындзинад фидар кӕна.

17, 18. Адӕймагимӕ Библи дарддӕр ахуыр кӕндзынӕ ӕви нӕ, уый скъуыддзаг кӕнгӕйӕ цӕуыл хъуамӕ ахъуыды кӕнай?

¹⁷ Кӕд адӕймаг йӕ царды ницы ивы, уӕд дӕ хъӕудзӕн ахъуыды кӕнын, йемӕ ма Библи дарддӕр ахуыр кӕндзынӕ ӕви нӕ. Цалынмӕ уынаффӕ рахӕссай, уӕдмӕ-иу ахъуыды кӕн, цавӕр адӕймаг у, ууыл. Иуӕй-иуты фылдӕр рӕстӕг бахъӕуы, цӕмӕй сӕ царды ивындзинӕдтӕ скӕной. Ахъуыды-иу кӕн ахӕм фарстатыл: «Библи кӕимӕ ахуыр кӕнын, уый, йӕ уавӕртӕм ӕмӕ йӕ курдиӕттӕм гӕсгӕ йӕ бон куыд у, афтӕ ивы? Цы базыдта, уыдӕттӕ „ӕххӕст кӕнын“ райдыдта?» (Матф. 28:20). Чи зоны, адӕймаджы бирӕ рӕстӕг бахъӕуа, цӕмӕй Чырыстийы ахуыргӕнинаг суа. Фӕлӕ уӕддӕр хъуамӕ йӕ царды сабыргай ивындзинӕдтӕ кӕна.

¹⁸ Ӕмӕ, зӕгъӕм, адӕймагимӕ цасдӕр рӕстӕг  Библи ахуыр кӕнӕм, фӕлӕ йӕ хъуыддӕгтӕй бӕрӕг нӕу, Библийы ахуырӕн кӕй аргъ кӕны. Уӕд куыд хъуамӕ бакӕнӕм? Ахъуыды кӕнӕм ахӕм цӕвиттоныл: адӕймагимӕ чиныг «Нӕ бон цы у базонын» ахуыр фестут, суанг ма чиныг «Хуыцауы уарзт» дӕр ахуыр кӕнын райдыдтат. Фӕлӕ нырма иу хатт дӕр ӕмбырдмӕ не ’рбацыд, суанг Ӕрымысӕн изӕрмӕ дӕр. Ӕмӕ арӕх ӕфсӕнттӕ ссары, цӕмӕй Библийы ахуыр ма ауадзат. Уӕд хорз уаид, йемӕ ӕргом куы аныхас кӕнис *.

19. Афтӕ дӕм куы кӕса, ӕмӕ адӕймаг Библийы ахуырӕн нӕ аргъ кӕны, уӕд ын дӕ бон цы уаид зӕгъын? Цӕуыл-иу хъуамӕ ахъуыды кӕнай?

¹⁹ Дӕ бон ӕй у бафӕрсын: «Дӕумӕ гӕсгӕ дӕ ӕппӕты тынгдӕр цы хъыгдары, цӕмӕй Йегъовӕйы Ӕвдисӕн суай?» Чи зоны дын зӕгъа: «Библи ахуыр кӕнын мӕ зӕрдӕмӕ цӕуы, фӕлӕ ӕз Йегъовӕйы Ӕвдисӕн никуы суыдзынӕн». Кӕд йемӕ Библи цасдӕр рӕстӕг ахуыр кӕныс ӕмӕ ӕцӕгдӕр афтӕ хъуыды кӕны, уӕд, чи зоны, хуыздӕр уаид, йемӕ Библи куы нал ахуыр кӕнис. Фӕлӕ, гӕнӕн ис, афтӕ дӕр рауайа, ӕмӕ дын фыццаг хатт йӕ зӕрдӕ раргом кӕндзӕн ӕмӕ дын зӕгъдзӕн, цы йӕ хъыгдары, уый. Чи зоны йӕм афтӕ кӕсы, ӕмӕ хӕдзарӕй-хӕдзармӕ хъусын кӕнын йӕ бон никуы бауыдзӕн. Цы хъуыды кӕны, уый куы зонай, уӕд ын дӕ бон уыдзӕн баххуыс кӕнын.

20. Хъуыддӕгтӕ 13:48 стих нын куыд баххуыс кӕндзӕн, цӕмӕй аскъуыддзаг кӕнӕм, адӕймагимӕ дарддӕр Библи ахуыр кӕнын хъӕуы ӕви нӕ?

²⁰ Библи кӕимӕ ахуыр кӕнӕм, уыдонӕй иуӕй-иутӕ, хъыгагӕн, сты, Йезекилы заман чи цард, уыцы израилӕгты хуызӕн. Уыдоны тыххӕй Йегъовӕ Йезекилӕн загъта: «Ды сын дӕ, уарзондзинады зарджытӕ чи кӕны, рӕсугъд хъӕлӕс кӕмӕн ис ӕмӕ хъисфӕндырыл хорз чи цӕгъды, ахӕм адӕймаджы хуызӕн. Уыдон дын дӕ ныхӕстӕ хъусдзысты, фӕлӕ дын сӕ иу дӕр не ’ххӕст кӕндзӕн» (Йез. 33:32). Чи зоны нын ӕнцон ма уа адӕймагӕн зӕгъын, йемӕ Библи кӕй нал ахуыр кӕндзыстӕм. Фӕлӕ «рӕстӕг бирӕ нал баззад» (1 Кор. 7:29). Ӕмӕ, йӕ царды ивындзинӕдтӕ чи нӕ кӕны, уыимӕ ахуыр кӕныны бӕсты хуыздӕр уаид, «ӕнусон царды фӕндагыл цӕуын кӕй фӕнды», ахӕм адӕмы куы агуриккам. (Бакӕс Хъуыддӕгтӕ 13:48.)

21. 2020 азӕн цавӕр стих ӕрцыд ӕвзӕрст ӕмӕ нын цавӕр хъуыддаджы ӕххуыс кӕндзӕн?

²¹ 2020 азӕн цы стих ӕрцыд ӕвзӕрст, уый нын ӕххуыс кӕндзӕн, цӕмӕй-иу ахъуыды кӕнӕм, хуыздӕр ахуыргӕнджытӕ цӕй фӕрцы суыдзыстӕм, ууыл. Цӕй уӕдӕ нӕ зӕрдыл дарӕм, Йесо Галилейӕйы иу хохыл йӕ фӕдылдзӕуджыты куы ӕрӕмбырд кодта, уӕд сын цы ахсджиаг ныхӕстӕ загъта, уыдон: «Ацӕут ӕмӕ... цӕттӕ кӕнут ахуыргӕнинӕгтӕ. Дӕттут сын донаргъуыд» (Матф. 28:19).