1, 2. Ӕмбырды кӕмӕн у йӕ бон, Библи чи ахуыр кӕны, уыдонӕн ӕххуыс кӕнын?

ЭМИ цӕры Фиджийы. Уый загъта: «Библи ахуыр кӕнгӕйӕ-иу цы базыдтон, уый мӕ зӕрдӕмӕ тынг цыд. Зыдтон ӕй, уый рӕстдзинад кӕй у. Фӕлӕ хотӕ ӕмӕ ’фсымӕртимӕ куы базонгӕ дӕн ӕмӕ семӕ фылдӕр рӕстӕг ӕрвитын куы райдыдтон, ӕрмӕстдӕр уӕд скодтон мӕ царды ивындзинӕдтӕ, ӕмӕ донаргъуыд райстон». Эмийы хабарӕй бӕрӕг у, Библи чи ахуыр кӕны, уымӕн цӕмӕй йӕ уырнындзинад рӕза ӕмӕ ӕппынфӕстаг донаргъуыд райса, уый тыххӕй йын ӕмбырды иннӕтӕ дӕр кӕй хъуамӕ ӕххуыс кӕной.

² Алы хъусынгӕнӕгӕн дӕр йӕ бон у ногтӕн ӕххуыс кӕнын (Еф. 4:16). Лейлани цӕры Вануатуйы ӕмӕ лӕггад кӕны пионерӕй. Уый загъта: «Афтӕ фӕзӕгъынц, сывӕллоны, дам, ӕнӕхъӕн хъӕу хъомыл кӕны. Ӕмӕ ахуыргӕнинӕгтӕ цӕттӕ кӕныны хъуыддаг дӕр афтӕ у. Адӕймагӕн йӕ уырнындзинад кӕй сырӕзы ӕмӕ донаргъуыд кӕй райсы, уый вӕййы ӕнӕхъӕн ӕмбырды фыдӕбон». Ныййарджытӕй уӕлдай ма сывӕллоны цӕуылдӕрты фӕахуыр кӕнынц иннӕтӕ дӕр, зӕгъӕм, йӕ ахуыргӕнджытӕ, хиуӕттӕ ӕмӕ ныййарджытӕн се ’мбӕлттӕ. Стӕй дзы ныфс дӕр бауадзынц. Афтӕ хъусынгӕнджытӕ дӕр, Библи чи ахуыр кӕны, уыдонӕн хорз уынаффӕтӕ куы дӕттой, ныфс-иу сӕ куы бауадзой ӕмӕ сын фӕзминаг куы уой, уӕд сын афтӕмӕй ӕххуыс кӕндзысты, цӕмӕй сӕ уырнындзинад фидар кӕна ӕмӕ донаргъуыд райсой (Ӕмб. 15:22).

3. Анӕ, Дорин ӕмӕ Лейлани цы загътой, уымӕй дӕ бон зондӕн райсын цы у?

³ Искӕимӕ Библи куы фӕахуыр кӕнӕм, уӕд нӕ иннӕты ӕххуыс ӕхсызгонӕй фӕхъӕуы. Анӕ лӕггад кӕны Молдавийы сӕрмагонд пионерӕй. Уый загъта: «Библи чи фӕахуыр кӕны, уымӕн фӕхъӕуы алыхуызон хъуыддӕгты баххуыс кӕнын. Ӕмӕ иу  адӕймаг уыдӕттыл нӕ аххӕсдзӕн». Ӕфсымӕр Дорин дӕр уыцы бӕстӕйы лӕггад кӕны сӕрмагонд пионерӕй, ӕмӕ загъта: «Арӕх афтӕ вӕййы, ӕмӕ, Библи кӕимӕ ахуыр кӕнын, уыдонӕн иннӕ хъусынгӕнджытӕ ахӕм цыдӕр фӕзӕгъынц, ӕмӕ ӕз ууыл хъуыды дӕр никуы акодтаин. Ӕмӕ сын сӕ ныхӕстӕ сӕ зӕрдӕтӕ бацагайынц». Лейлани та загъта: «Библи чи ахуыр кӕны, уыдон куы фенынц, хотӕ ӕмӕ ’фсымӕртӕ сӕ кӕй уарзынц ӕмӕ сыл кӕй тыхсынц, уӕд сӕ бирӕтӕ бамбарынц, Йегъовӕйы Ӕвдисӕнтӕ Хуыцауы адӕм кӕй сты» (Иоан. 13:35).

4. Ацы статьяйы цӕуыл аныхас кӕндзыстӕм?

⁴ Чи зоны, хъуыды кӕныс: «Адӕймагимӕ Библи ӕз куы нӕ ахуыр кӕнон, уӕд ын мӕ бон куыд у ӕххуыс кӕнын?» Ныртӕккӕ аныхас кӕндзыстӕм, исчи-иу нӕ Библийы ахуырмӕ куы фӕхона, уӕд-иу нӕ бон куыд уыдзӕн не ’мбалӕн ӕххуыс кӕнын, стӕй, Библи чи ахуыр кӕны, уыцы адӕймаг ӕмбырдтӕм цӕуын куы райдайа, уӕд ын нӕ бон куыд уыдзӕн баххуыс кӕнын. Аныхас ма кӕндзыстӕм, Библи чи ахуыр кӕны, уыдонӕн донаргъуыд райсынӕн хистӕр нӕлгоймӕгтӕ куыд баххуыс кӕнынц, ууыл.

5. Хъусынгӕнӕг дӕ Библийы ахуырмӕ куы фӕхона, уӕд дӕуӕн дӕ хӕс цы уыдзӕн?

⁵ Хъусынгӕнӕг искӕимӕ Библи куы ахуыр кӕна, уӕд ын фыццаджыдӕр уый хъуамӕ ӕххуыс кӕна, Хуыцауы Ныхасы цы фыст ис, уый бамбарынӕн. Библийы ахуырмӕ кӕй фӕхоны, уый та йын вӕййы ӕххуысгӕнӕг (Еккл. 4:9, 10). Дӕ бон цы у аразын, цӕмӕй хорз ӕххуысгӕнӕг уай?

6. Исчи дӕ Библийы ахуырмӕ куы фӕхона, уӕд дӕ бон куыд у, Ӕмбисӕндты 20:18 стихы цы уагӕвӕрд ис, уымӕ гӕсгӕ архайын?

⁶ Дӕхи-иу бацӕттӕ кӕн. Исчи дӕ Библийы ахуырмӕ куы фӕхона, уӕд-иу ын зӕгъ, цӕмӕй дын уыцы адӕймаджы тыххӕй истытӕ радзура. (Бакӕс Ӕмбисӕндтӕ 20:18.) Бафӕрс-иу ӕй, цавӕр ӕрмӕг ӕмӕ кӕцы сӕр ӕвзардзыстут ӕмӕ йӕ фылдӕр цӕмӕ фӕнды йӕ хъус ӕрдарын. Бафӕрс ӕй, ахуыры рӕстӕг дӕхи куыд хъуамӕ дарай, цы дзурай ӕмӕ цы ма дзурай, стӕй уыцы адӕймаджы дӕ бон куыд уаид ныфс бауадзын, цӕмӕй йӕ бафӕнда размӕ цӕуын. Кӕй зӕгъын ӕй хъӕуы, де ’мбал дын уыцы адӕймаджы тыххӕй, иннӕтӕн дзурӕн цы нӕй, уыдӕттӕ нӕ радзурдзӕн. Фӕлӕ дын цы радзура, уый дӕр фаг уыдзӕн, цӕмӕй йын истӕмӕй баххуыс кӕнай. Джой лӕггад кӕны миссионерӕй, ӕмӕ уый дӕр Библийы ахуырмӕ искӕй куы фӕхоны, уӕд ын, кӕимӕ ахуыр кӕны, уый тыххӕй цыдӕртӕ радзуры. Джой загъта: «Уый фӕрцы ме ’мбалы зӕрдиагӕй бафӕнды адӕймагӕн баххуыс кӕнын. Стӕй уӕд хуыздӕр бамбары, Библи ахуыргӕнгӕйӕ хуыздӕр цы уыдзӕн зӕгъын».

7. Исчи дӕ Библийы ахуырмӕ куы фӕхона, уӕд дӕ цӕмӕн хъӕудзӕн, цы ӕрмӕг ӕвзардзыстут, уый бацӕттӕ кӕнын?

⁷ Исчи дӕ Библийы ахуырмӕ куы фӕхона, уӕд хорз уаид, цы ӕрмӕг ӕвзардзыстут, уый рагацау куы бацӕттӕ кӕнис (Езд. 7:10). Гыццыл раздӕр кӕй кой уыд, уыцы ӕфсымӕр,  Дорин, загъта: «Библийы ахуырмӕ мемӕ чи ацӕуы, уыдон сӕхи куы бацӕттӕ кӕнынц, уӕд сӕ бон вӕййы хорз хъуыдытӕ зӕгъын». Уымӕй уӕлдай ма адӕймаг куы фена, уӕ дыууӕ дӕр уӕхи хорз кӕй бацӕттӕ кодтат, уӕд бамбардзӕн, уый дӕр афтӕ кӕнын кӕй хъӕуы. Бӕстон бацӕттӕ кӕныны фадат дын куы нӕ уа, уӕд-иу ӕрмӕгыл дӕ цӕст ахӕсс, цӕмӕй зонай, цавӕр сӕйраг хъуыдытӕ дзы ис.

8. Дӕ бон цы у саразын, цӕмӕй, дӕ куывды цы зӕгъай, уый адӕймаджы зӕрдӕ бацагайа?

⁸ Библийы ахуыр куы уадзай, уӕд ма ахсджиаг вӕййы Хуыцаумӕ скувын дӕр. Уымӕ гӕсгӕ, ахуырмӕ дӕ чи фӕхуыдта, уый дын куы зӕгъа, цӕмӕй акувай, уӕд-иу ахъуыды кӕн, цӕй тыххӕй кувдзынӕ, ууыл. Ӕмӕ уӕд, дӕ куывды цы зӕгъай, уый адӕймаджы зӕрдӕ бацагайдзӕн (Пс. 141:2). Ханае цӕры Японийы. Ӕмӕ ма ныр дӕр хъуыды кӕны, йемӕ Библи чи ахуыр кодта, уыцы хо-иу йемӕ кӕй ӕрбакодта, уыцы хойы куывдтытӕ. Ханае загъта: «Йӕ куывдтытӕй бӕрӕг уыд, Йегъовӕ йе ’ввахс Хӕлар кӕй у. Ӕмӕ мӕн дӕр фӕндыд, цӕмӕй Йегъовӕ ме ’ввахс Хӕлар суыдаид. Кувгӕйӕ-иу мӕ кой куы скодта, уӕд-иу ӕй бамбӕрстон, уыцы хотӕ мӕ кӕй уарзынц».

9. Иаковы 1:19 стихмӕ гӕсгӕ, дӕ бон куыд у ӕххуыс кӕнын, Библийы ахуырмӕ дӕ чи фӕхуыдта, уымӕн?

⁹ Библийы ахуырмӕ дӕ чи фӕхуыдта, уымӕн-иу ахуыры рӕстӕг ӕххуыс кӕн. Омамуйови лӕггад кӕны сӕрмагонд пионерӕй Нигерийы. Уый загъта: «Хорз ӕмбал Библийы ахуыры рӕстӕг лӕмбынӕг фӕхъусы. Стӕй хорз хъуыдытӕ фӕзӕгъы. Фӕлӕ йӕ фембары, Библийы ахуыр уый кӕй нӕ уадзы, ӕмӕ ӕгӕр бирӕ нӕ фӕдзуры». Уӕдӕ куыд ис бамбарӕн, цы хъуамӕ дзурай? Стӕй кӕд вӕййы рӕстӕг дзурынӕн? (Ӕмб. 25:11). Библийы ахуыр чи уадзы, уыцы хъусынгӕнӕгмӕ ӕмӕ, кӕимӕ ахуыр кӕны, уыцы адӕймагмӕ-иу лӕмбынӕг хъус. (Бакӕс Иаковы 1:19.) Ӕмӕ уӕд бамбардзынӕ, дзурын кӕд хъӕуы, уый. Кӕй зӕгъын ӕй хъӕуы, цалынмӕ-иу исты зӕгъай, уӕдмӕ-иу хъуамӕ хорз ахъуыды кӕнай. Зӕгъӕм, Библийы ахуыр чи уадзы, уый-иу исты куы ’мбарын кӕна, уӕд хорз уыдзӕн, куы нӕ йӕ хъыгдарай кӕнӕ ӕндӕр цӕуылдӕр дзурын куы нӕ райдайай, стӕй ӕрмӕст ды куы нӕ дзурай. Цӕмӕй адӕймаг ӕрмӕг хуыздӕр бамбара, уый тыххӕй дӕ бон у цыбыртӕй исты зӕгъын, исты цӕвиттон ӕрхӕссын кӕнӕ йӕм фарста раттын. Чи зоны дӕм хатт афтӕ фӕкӕсы, ӕмӕ ӕрмӕджы фӕдыл уадиссагӕй дӕ бон ницы у зӕгъын. Фӕлӕ адӕймагӕй куы раппӕлай ӕмӕ куы равдисай, зӕрдиагӕй йыл кӕй тыхсыс, уӕд ын афтӕмӕй дӕр дӕ бон уыдзӕн баххуыс кӕнын, цӕмӕй йӕ бафӕнда къахдзӕфтӕ аразын.

10. Библи чи ахуыр кӕны, уымӕн дӕхи тыххӕй исты куы радзурай, уӕд ын уый куыд баххуыс кӕндзӕн?

¹⁰ Дӕхи тыххӕй-иу исты радзур. Дӕ бон у адӕймагӕн цыбыртӕй радзурын, рӕстдзинад куыд базыдтай, цавӕрдӕр зындзинӕдты сӕрты куыд ахызтӕ кӕнӕ дын Йегъовӕ куыд ӕххуыс кӕны, уый тыххӕй (Пс. 78:4, 7). Ӕмӕ, чи зоны, афтӕ рауайа, ӕмӕ йын цы радзырдтай, растдӕр ӕй уый хъуыди фехъусын. Гӕнӕн ис, йӕ  уырнындзинад бафидар уа, ӕмӕ дарддӕр къахдзӕфтӕ кӕна. Стӕй ма, чи зоны, бамбара, цы фӕлварӕныл ӕмбӕлы, уый сӕрты йӕ бон куыд у ахизын (1 Пет. 5:9). Габриель цӕры Бразилийы ӕмӕ лӕггад кӕны пионерӕй. Библи куы ахуыр кодта, уӕд ын цы баххуыс кодта, уый тыххӕй загъта: «Ӕфсымӕртӕ-иу мын сӕхи тыххӕй куы радзырдтой, уӕд-иу ӕй бамбӕрстон, Йегъовӕ кӕй уыны, цы зындзинӕдтыл ӕмбӕлын, уый. Ӕмӕ-иу уӕд ахъуыды кодтон, зӕгъын, кӕд уыдон сӕ зындзинӕдты сӕрты ахызтысты, уӕд мӕнӕн дӕр мӕ бон суыдзӕн».

11, 12. Адӕймаг ӕмбырдтӕм цӕуын куы райдайа, уӕд-иу ыл цӕмӕн хъуамӕ бацин кӕнӕм?

¹¹ Библи чи ахуыр кӕны, уымӕн цӕмӕй йӕ уырнындзинад фидар кӕна ӕмӕ донаргъуыд райса, уый тыххӕй хъуамӕ алы ӕмбырдмӕ дӕр цӕуа (Дзут. 10:24, 25). Йемӕ Библи чи ахуыр кӕны, фыццаг хатт ӕй ӕмбырдмӕ, ӕвӕццӕгӕн, уый фӕхондзӕн. Фӕлӕ ӕмбырдтӕм цӕуын куы райдайа, уӕд нӕ алкӕй бон дӕр уыдзӕн цыдӕр аразын, цӕмӕй йӕ фӕнда дарддӕр дӕр ӕмбырдтӕм цӕуын.

¹² Адӕймагыл-иу зӕрдиагӕй бацин кӕн (Ром. 15:7). Адӕймагыл-иу зӕрдиагӕй куы бацин кӕнӕм, уӕд ӕй ноджы тынгдӕр фӕнддзӕн ӕмбырдтӕм цӕуын. Зӕгъ ын, йӕ уынд дын ӕхсызгон кӕй у, иннӕтимӕ дӕр ӕй базонгӕ кӕн. Афтӕ ма хъуыды кӕн, ӕмӕ, йемӕ Библи чи ахуыр кӕны, уый йӕм йӕ хъус фӕдардзӕн. Чи зоны, уыцы хъусынгӕнӕджы ӕмбырды размӕ цыдӕр хъӕуы саразын кӕнӕ та ӕмбырдмӕ нӕма ’рбацыд. Адӕймагимӕ аныхӕстӕ кӕн ӕмӕ-иу ӕм лӕмбынӕг байхъус. Ӕркӕсӕм Дмитрийы хабармӕ. Донаргъуыд райста цалдӕр азы размӕ ӕмӕ ныр лӕггад кӕны кӕстӕриуӕггӕнӕг ӕфсымӕрӕй. Уый загъта: «Фыццаг хатт Паддзахады залмӕ куы ’рбацыдтӕн, уӕд иу ӕфсымӕр федта, ӕддейӕ кӕй лӕууын. Бамбӕрста йӕ, кӕй тыхсын, ӕмӕ мӕ мидӕмӕ бакодта. Бирӕтӕ мӕм ӕрбацыдысты ӕмӕ мемӕ базонгӕ сты. Ӕз ууыл тынг бадис кодтон. Уый мӕ зӕрдӕмӕ афтӕ тынг фӕцыд, ӕмӕ мӕ фӕндыд, цӕмӕй-иу фембӕлд алы бон дӕр уыдаид. Паддзахады залы цы федтон, ахӕм цыдӕр уый размӕ никуы федтон».

13. Библи чи ахуыр кӕны, уыдоныл куыд фӕзыны, Библимӕ гӕсгӕ кӕй цӕрӕм, уый?

¹³ Фӕзминаг у. Библи чи ахуыр кӕны, уыдон куы фӕуынынц, Библимӕ гӕсгӕ кӕй цӕрӕм, уый, уӕд бирӕтӕ бамбарынц, рӕстдзинад кӕй ссардтой (Матф. 5:16). Виталий цӕры Молдавийы ӕмӕ лӕггад кӕны пионерӕй. Уый загъта: «Ӕз уыдтон, ӕмбырды иннӕтӕ сӕхи куыд дарынц, стӕй куыд цӕрынц, уый. Уый фӕрцы бамбӕрстон, Йегъовӕйы Ӕвдисӕнты дин раст дин кӕй у».

14. Адӕймагӕн фӕзминаг куы уай, уӕд ма йын ноджыдӕр куыд баххуыс кӕндзынӕ?

¹⁴ Цалынмӕ адӕймаг донаргъуыд райса, уӕдмӕ хъуамӕ райдайа, цы базоны, уымӕ гӕсгӕ цӕрын. Уый алкӕд ӕнцон нӕ вӕййы. Фӕлӕ адӕймаг куы уына, иннӕтӕ Библийы уагӕвӕрдтӕм  гӕсгӕ кӕй цӕрынц ӕмӕ сын уый стыр пайда кӕй хӕссы, уӕд уый дӕр, чи зоны, бафӕнда афтӕ цӕрын (1 Кор. 11:1). Гыццыл раздӕр кӕй кой уыд, уыцы хо, Ханае, загъта: «Хотӕ ӕмӕ ’фсымӕртӕм кӕсгӕйӕ-иу бамбӕрстон, мӕ бон куыд у иннӕты ныфсыл ныфс ӕфтауын, хатыр сын кӕнын ӕмӕ сӕ уарзын. Стӕй-иу искӕй кой кӕнгӕйӕ ӕрмӕстдӕр йӕ хорзы кой кодтой. Ӕмӕ мӕ фӕндыд, цӕмӕй сӕ уыцы хъуыддаджы дӕр фӕзмыдтаин».

15. Адӕймаг ӕмбырдтӕм цӕуын куы райдайа, уӕд йе ’мбӕлттӕ цӕмӕн хъуамӕ суӕм? (Ӕмбисӕндтӕ 27:17).

¹⁵ Библи чи ахуыр кӕны, уымӕн йе ’мбал су. Библи чи ахуыр кӕны, уый ӕмбырдтӕм куы цӕуа, уӕд-иу йемӕ хуыздӕр базонгӕ у (Фил. 2:4). Йемӕ-иу аныхӕстӕ кӕн. Куы йӕ уынай, йӕ царды цыдӕртӕ кӕй аивта, уӕд-иу дзы зӕрдиагӕй раппӕл. Афӕрс-иу ӕй йӕ Библийы ахуыры тыххӕй, йӕ бинонты тыххӕй кӕнӕ йӕ куысты тыххӕй. Фӕлӕ, цы не ’мбӕлы, уыдӕттӕй-иу ӕй ма фӕрс. Афтӕ-иу йемӕ куы аныхӕстӕ кӕнай, уӕд, гӕнӕн ис, балымӕн уат. Ӕмӕ йын ӕмбырды ӕмбӕлттӕ куы уа, уӕд ын ӕнцондӕр уыдзӕн къахдзӕфтӕ кӕнын, ӕмӕ ӕппынфӕстаг донаргъуыд райсдзӕн. (Бакӕс Ӕмбисӕндтӕ 27:17.) Ханае ныр лӕггад кӕны пионерӕй. Ӕмбырдтӕм цӕуын куыд райдыдта, уый тыххӕй радзырдта: «Ӕмбырды мын ӕмбӕлттӕ куы фӕзынд, уӕд-иу ӕнхъӕлмӕ кастӕн, иннӕ фембӕлд кӕд уыдзӕн, уымӕ. Ӕмӕ-иу фӕллад куы уыдтӕн, уӕддӕр-иу фембӕлдмӕ ацыдтӕн. Мӕ ног ӕмбӕлттӕ мӕ зӕрдӕмӕ тынг цыдысты, ӕмӕ мын уый баххуыс кодта, цӕмӕй мауал лымӕн кодтаин, Йегъовӕйӕн чи нӕ лӕггад кодта, уыдонимӕ. Мӕн фӕндыди, цӕмӕй Йегъовӕмӕ, стӕй хотӕ ӕмӕ ’фсымӕртӕм ноджы тынгдӕр баввахс уыдаин. Ӕмӕ мӕ бафӕндыд донаргъуыд райсын».

16. Дӕ бон цы у аразын, цӕмӕй адӕймагмӕ ӕмбырды афтӕ ма кӕса, ӕмӕ ӕцӕгӕлӕтты ’хсӕн ис?

¹⁶ Библи чи ахуыр кӕны, уый йӕ цард куы ива ӕмӕ къахдзӕфтӕ куы кӕна, уӕд ын баххуыс кӕн, цӕмӕй бамбара, ӕмбырды йын йӕхи бынат кӕй ис. Уый дӕ бон уыдзӕн аразын, уазӕгуарзон куы уай, уӕд (Дзут. 13:2). Денис лӕггад кӕны Молдавийы. Уый радзырдта: «Библи куы ахуыр кодтон, уӕд мӕ хотӕ ӕмӕ ’фсымӕртӕ мӕ бинойнагимӕ цалдӕр хатты фӕхуыдтой семӕ рӕстӕг арвитынмӕ. Уыдон-иу нын радзырдтой, Йегъовӕ-иу сын куыд баххуыс кодта, уый тыххӕй. Ӕмӕ-иу тынг бафидар стӕм. Мах бамбӕрстам, ӕцӕгдӕр нӕ кӕй фӕнды Йегъовӕйӕн лӕггад кӕнын ӕмӕ йын чи лӕггад кӕны, уыдонмӕ диссаджы цард кӕй ӕнхъӕлмӕ кӕсы». Библи чи ахуыр кӕны, уый хъусынгӕнӕг куы суа, уӕд-иу ӕй уацамынды акӕн. Диего лӕггад кӕны Бразилийы. Уый загъта: «Ӕфсымӕртӕй-иу мӕ бирӕтӕ семӕ хъусын кӕнынмӕ акодтой. Уый фӕрцы сӕ хуыздӕр базыдтон. Ӕз уыдонӕй бирӕ цӕуылдӕрты сахуыр дӕн, ӕмӕ Йегъовӕмӕ ӕмӕ Йесомӕ баввахсдӕр дӕн».

17. Хистӕр нӕлгоймӕгтӕн сӕ бон куыд у баххуыс кӕнын, Библи чи ахуыр кӕны, уыдонӕн?

¹⁷ Библи чи ахуыр кӕны, уыдонӕн-иу рӕстӕг  ссарут. Хистӕр нӕлгоймӕгтӕ, адӕймагыл-иу зӕрдиагӕй куы батыхсат, уӕд ын баххуыс кӕндзыстут, цӕмӕй йӕ уырнындзинад фидар кӕна. Хорз уаид, йемӕ-иу алы ӕмбырды дӕр куы аныхас кӕниккат. Йӕ ном-иу ын бахъуыды кӕнут. Уӕлдайдӕр уый хорз уыдзӕн, дзуаппытӕ дӕттын куы райдайа, уӕд. Рӕстӕг-иу рахицӕн кӕнут, цӕмӕй-иу хъусынгӕнджытимӕ сӕ Библийы ахуыртӕм ацӕуат. Арӕх хистӕр нӕлгоймӕгтӕ, Библи чи ахуыр кӕны, уыдонӕн афтӕ баххуыс кӕнынц, ӕмӕ сӕхӕдӕг дӕр уый ӕнхъӕл нӕ вӕййынц. Хо Джекки цӕры Нигерийы ӕмӕ лӕггад кӕны пионерӕй. Уый радзырдта: «Бирӕтӕм тынг диссаг фӕкӕсы, мемӕ Библийы ахуырмӕ хистӕр нӕлгоймаг кӕй ӕрбацыд, уый». Джекки Библи кӕимӕ ахуыр кӕны, уыдонӕй иу афтӕ загъта: «Махӕн нӕ сауджын афтӕ никуы бакодтаид. Уый ӕрмӕстдӕр хъӕздгуытӕм фӕцӕуы, уымӕн ӕмӕ йын фидгӕ бакӕнынц!» Ныр уыцы адӕймаг цӕуы ӕмбырдтӕм.

18. Хистӕр нӕлгоймӕгтӕн сӕ бон куыд у Хъуыддӕгтӕ 20:28 стихмӕ гӕсгӕ архайын?

¹⁸ Библийы ахуыр кӕмӕн ис, уыдоны ахуыр кӕнут ӕмӕ сын сӕ ныфсыл ӕфтаут. Хистӕр нӕлгоймӕгтӕ, уӕ хӕс у хъусынгӕнджытӕн ӕххуыс кӕнын, цӕмӕй хъусын кӕныны хъуыддаджы ӕнтыстджын уой ӕмӕ хорз ахуыргӕнджытӕ уой. (Бакӕс Хъуыддӕгтӕ 20:28.) Кӕд хъусынгӕнӕг хистӕр нӕлгоймаджы раз Библийы ахуыр уадзын ӕфсӕрмы кӕны, уӕд хистӕр нӕлгоймагӕн йӕ бон у зӕгъын, уый йӕ кӕй ауадздзӕн. Джекки загъта: «Хистӕр нӕлгоймӕгтӕ мӕ арӕх афӕрсынц, Библи кӕимӕ ахуыр кӕнын, уыдонӕй. Ӕххуыс мӕ куы фӕхъӕуы, уӕд мын хорз уынаффӕтӕ раттынц». Хистӕр нӕлгоймӕгтӕн сӕ бон у хъусынгӕнджытӕн сӕ ныфсыл ныфс ӕфтауын (1 Фес. 5:11). Джекки ма загъта: «Ӕхсызгон мын вӕййы, хистӕр нӕлгоймӕгтӕ мӕ куы раппӕлынц ӕмӕ мын куы фӕзӕгъынц, мӕ фыдӕбоны тыххӕй мын кӕй аргъ кӕнынц. Сӕ ныхӕстӕ вӕййынц, цыма тӕвд бон уазал дон банызтай, афтӕ. Кӕй мӕ раппӕлынц, уый фӕрцы фӕныфсджындӕр вӕййын, стӕй мын иннӕтимӕ Библи ахуыр кӕнын ноджы фылдӕр циндзинад фӕхӕссы» (Ӕмб. 25:25).

19. Не ’ппӕтӕн дӕр циндзинад цы хӕссы?

¹⁹ Кӕд нӕхӕдӕг Библи никӕимӕ ахуыр кӕнӕм, уӕддӕр нӕ бон у, иннӕ хъусынгӕнджытӕ кӕимӕ ахуыр кӕнынц, уыдонӕн ӕххуыс кӕнын. Исчи дӕ Библийы ахуырмӕ куы фӕхона, уӕд-иу дӕхи хорз бацӕттӕ кӕн, цӕмӕй дӕ бон уа ахуыры рӕстӕг хорз хъуыдытӕ дзурын. Адӕймаг ӕмбырдтӕм цӕуын куы райдайа, уӕд йе ’мбал су. Стӕй архай, цӕмӕй йын фӕзминаг уай. Хистӕр нӕлгоймӕгтӕн дӕр сӕ бон у, хъусынгӕнджытӕ Библи кӕимӕ ахуыр кӕнынц, уыдонӕн ӕххуыс кӕнын. Хорз уыдзӕн, рӕстӕг-иу сын куы ссарой. Стӕй сӕ бон у, Библийы ахуыртӕ чи уадзы, уыцы хъусынгӕнджыты ахуыр кӕнын ӕмӕ сӕ ӕппӕлын. Ӕмӕ, Библи чи ахуыр кӕны, уыдон Йегъовӕйы куы бауарзынц ӕмӕ йын лӕггад кӕнын куы райдайынц, уӕд нын куыд ӕхсызгон вӕййы, мах дӕр сын цӕмӕйдӕр кӕй баххуыс кодтам, уый!