1. Адӕймагӕн йӕ бинонтӕй искӕй ӕмбырдӕй куы ацух кӕнынц, уӕд цы фенкъары?

КӔД дын дӕ бинонтӕй искӕй ӕмбырдӕй ацух кодтой, уӕд дын, ӕвӕццӕгӕн, тынг зын у. Адӕймаг ахӕм хабарӕй зӕрдӕсаст фӕвӕййы. Хо Хильдӕ зӕгъы: «Мӕ сӕрыхицауимӕ фӕцардыстӕм 41 азы *. Ӕмӕ куы фӕзиан, уӕд мӕм афтӕ каст, ӕмӕ уымӕй зындӕр ницы ис. Фӕлӕ мӕ фырт Йегъовӕйы, йӕ бинойнаджы ӕмӕ йӕ сывӕллӕтты куы ныууагъта, уӕд уый, цы зиан мыл ӕрцыд, уымӕй фыддӕр уыд».

2, 3. Псалом 78:40, 41 стихтӕм гӕсгӕ, Йегъовӕ цы фенкъары, йӕ лӕггадгӕнджытӕй йӕ исчи куы ныууадзы, уӕд?

² Ахъуыды-ма кӕн, Йегъовӕйӕн куыд зын уыди, йӕ бинонтӕй йӕм чидӕртӕ, ома зӕдтӕй чидӕртӕ, сӕ чъылдым куы сыздӕхтой, уӕд (Иуд. 6). Стӕй-иу ын куыд зын уыдаид, йе ’взӕрст адӕм-иу, израилӕгтӕ, йӕ ныхмӕ ногӕй ӕмӕ ногӕй куы рацыдысты. (Бакӕс Псалом 78:40, 41.) Ӕмӕ нӕ уарзӕгой уӕларвон Фыдӕн абон дӕр афтӕ зын вӕййы, исчи йӕ куы ныууадзы, уӕд. Уый дын дӕ зӕрдӕйы рыст хорз ӕмбары. Ӕмӕ дын ӕнӕмӕнг баххуыс кӕндзӕн, цӕмӕй ахӕм зын рӕстӕг фидар фӕлӕууай.

³ Ацы статьяйы аныхас кӕндзыстӕм, нӕ бон цы у аразын, цӕмӕй нын Йегъовӕ ӕххуыс кӕна нӕ маст сфӕразынӕн. Стӕй ма базондзыстӕм, нӕ бон куыд у ӕххуыс кӕнын, ӕмбырдӕй кӕй ацух кодтой, уыдоны бинонтӕн. Фӕлӕ уал фыццаг ӕркӕсӕм, нӕхи цавӕр хъуыдытӕй хъуамӕ хизӕм, уымӕ.

4. Ныййарджытӕй бирӕтӕ цы фӕхъуыды кӕнынц, сӕ хъӕбул Йегъовӕйы куы ныууадзы, уӕд?

⁴ Ныййарджытӕн сӕ зынаргъ хъӕбул Йегъовӕйы куы ныууадзы, уӕд арӕх фӕхъуыды кӕнынц, фылдӕр сӕ кӕй хъуыд бацархайын, цӕмӕй хабар афтӕ ма рауадаид. Ӕфсымӕр Люкӕн йӕ фырты ӕмбырдӕй куы ацух кодтой, уӕд уый фӕстӕ  загъта: «Мӕхи аххосджын кодтон. Хатт-иу фыдфынты хай фӕдӕн. Мӕ зӕрдӕ скъуыдтӕ кодта, ӕмӕ-иу кӕугӕ дӕр фӕкодтон». Хо Элизабетӕн дӕр йӕ лӕппуйы ӕмбырдӕй куы ацух кодтой, уӕд йӕхицӕн бынат нал ардта. Уый загъта: «Хъуыды-иу кодтон, цымӕ раст цы нӕ сарӕзтон, зӕгъгӕ. Афтӕ мӕм каст, ӕмӕ мӕ лӕппуйӕн Йегъовӕйы ӕмӕ рӕстдзинад нӕ бауарзын кодтон».

5. Исчи Йегъовӕйы куы ныууадзы, уӕд уый искӕй аххос кӕнын цӕуылнӕ хъӕуы?

⁵ Хъуамӕ нӕ зӕрдыл дарӕм, Йегъовӕ нӕ сӕрибардзинадӕй кӕй схайджын кодта. Ӕмӕ алчидӕр йӕхӕдӕг скъуыддзаг кӕны, йӕ коммӕ кӕсдзӕн ӕви нӕ. Вӕййы афтӕ, ӕмӕ, хорз ныййарджытӕ схонӕн кӕй нӕй, уыдонӕн сӕ сывӕллӕттӕ Йегъовӕйӕн лӕггад кӕнын райдайынц ӕмӕ йыл вӕййынц иузӕрдион. Фӕлӕ вӕййы афтӕ дӕр, ӕмӕ ныййарджытӕ сӕ сывӕллӕтты фӕхъомыл кӕнынц, Йегъовӕ куыд амоны, афтӕ. Фӕлӕ уыдон куы сыстыр вӕййынц, уӕд рӕстдзинады фӕндаг ныууадзынц. Куыдфӕнды ма уа, алчидӕр йӕхӕдӕг скъуыддзаг кӕны, Йегъовӕйӕн лӕггад кӕндзӕн ӕви нӕ (Йес. Н. 24:15). Ныййарджытӕ, кӕд уӕ хъӕбул Йегъовӕйы ныууагъта, уӕд уӕхи ма аххосджын кӕнут.

6. Ныййарджытӕй исчи Йегъовӕйы куы ныууадзы, уӕд уый сывӕллӕттыл куыд фӕзыны?

⁶ Хатт вӕййы афтӕ, ӕмӕ ныййарджытӕй исчи Йегъовӕйы ӕмӕ ма суанг йӕ бинонты дӕр ныууадзы (Пс. 27:10). Уый сывӕллӕтты зӕрдӕты ныууадзы арф хъӕдгом. Сывӕллонӕн йӕ ныййарджытӕ вӕййынц алкӕмӕй хуыздӕр ӕмӕ йӕм афтӕ фӕкӕсы, ӕмӕ никуы фӕрӕдийынц. Эстерӕн йӕ фыды ӕмбырдӕй ацух кодтой. Уый афтӕ загъта: «Арӕх-иу куыдтон, уымӕн ӕмӕ йӕ ӕмбӕрстон, мӕ фыд ӕнӕуи кӕй нӕ адард Йегъовӕйӕ, фӕлӕ йӕ зонгӕ-зонын кӕй ныууагъта. Мӕ фыды бирӕ уарзын, ӕмӕ йӕ ӕмбырдӕй куы ацух кодтой, уӕд ыл тынг мӕт кодтон. Мӕхи мидӕг-иу сонтӕй ратыхстӕн ӕмӕ-иу мӕхицӕн ӕнцой нал ардтон».

7. Йегъовӕ цы зӕрдӕ дары, йӕ мады кӕнӕ йӕ фыды ӕмбырдӕй кӕмӕн ацух кодтой, уыцы ӕрыгӕттӕм?

⁷ Нӕ зынаргъ ӕрыгон хотӕ ӕмӕ ’фсымӕртӕ, кӕд уын уӕ ныййарджытӕй искӕй ӕмбырдӕй ацух кодтой, уӕд ӕй зонут, уӕ зын махӕн дӕр зын кӕй у. Макуы дызӕрдыг кӕнут, Йегъовӕ дӕр уын уӕ зын кӕй ӕмбары. Уый уӕ бирӕ уарзы ӕмӕ уын уӕ иузӕрдиондзинадӕн тынг аргъ кӕны. Стӕй уын мах дӕр, уӕ хотӕ ӕмӕ уе ’фсымӕртӕ, тынг аргъ кӕнӕм, Йегъовӕйыл иузӕрдион кӕй стут, уый тыххӕй. Уӕ зӕрдыл дарут: уӕ ныййарджытӕ цы уынаффӕтӕ рахӕссынц, уыдоны тыххӕй дзуапп сымах нӕ дӕттут. Йегъовӕ алкӕмӕн дӕр радта уынаффӕтӕ хӕссыны бар. Ӕмӕ, йӕхи Йегъовӕйӕн чи снывонд кодта ӕмӕ донаргъуыд чи райста, уыцы чырыстӕттӕй алчидӕр хъуамӕ «йӕхи хӕссинаг» йӕхӕдӕг ахӕсса, ома, йӕ хӕс цы у, уый йӕхӕдӕг хъуамӕ араза (Гал. 6:5).

8. Ӕмбырдӕй кӕй ацух кодтой, уыцы адӕймаджы бинонтӕн сӕ бон цы у аразын? (Ноджыдӕр кӕс рамкӕ « Йегъовӕмӕ ӕрбаздӕх».)

⁸ Нӕ бинонтӕй исчи Йегъовӕйы куы ныууадзы, уӕд нӕ, кӕй зӕгъын ӕй хъӕуы, ныфс вӕййы, иу бон ӕм фӕстӕмӕ кӕй ӕрбаздӕхдзӕн. Фӕлӕ цалынмӕ не ’рбаздӕхт, уӕдмӕ нӕ бон цы у аразын? Хъуамӕ ӕппӕт тыхтӕй архайӕм нӕ уырнындзинад фидар кӕныныл. Ӕмӕ уӕд нӕ бинонтӕн ӕмӕ ма суанг, кӕй ацух кодтой, уымӕн дӕр фӕзминаг уыдзыстӕм. Стӕй ма нӕм уый фӕрцы тыхтӕ уыдзӕн, цӕмӕй нӕ зӕрдӕйы рыст сфӕразӕм. Ӕркӕсӕм, бӕлвырдӕй нӕ бон цы у аразын, уымӕ.

9. Дӕ бон куыд у дӕ уырнындзинад фидар кӕнын? (Ноджыдӕр кӕс рамкӕ « Ныфсы хос дын чи уыдзысты, уыцы стихтӕ».)

⁹ Дӕ уырнындзинад фидар кӕныныл архай. Тынг ахсджиаг у, цӕмӕй дӕхи уырнындзинад дӕр ӕмӕ дӕ бинонты уырнындзинад дӕр фидар кӕнай. Алы бон дӕр Хуыцауы Ныхас кӕс ӕмӕ йыл хъуыды кӕн, стӕй ӕмбырдтӕм цу. Афтӕмӕй дын Йегъовӕ хъарутӕ дӕтдзӕн. Джоаннӕйӕн йӕ фыд ӕмӕ йӕ хо рӕстдзинад ныууагътой. Уый афтӕ зӕгъы: «Авигейӕйы, Есфиры, Иовы, Иосифы ӕмӕ Йесойы тыххӕй куы фӕкӕсын, уӕд мӕ зӕрдӕ ӕрсабыр вӕййы. Сӕ хабӕрттӕ кӕсгӕйӕ мӕ ныфсыл ныфс бафты ӕмӕ мӕ зӕрдӕйы рыст дӕр фӕкъаддӕр вӕййы. Стыр ӕххуыс ма мын сты, нӕ телеуынынады цы зарджытӕ ис, уыдон дӕр».

10. Псалом 32:6–8 стихтӕм гӕсгӕ дын цы баххуыс кӕндзӕн, куы мӕт кӕнай, уӕд?

¹⁰ Дӕ сагъӕстӕ-иу Йегъовӕйӕн ракӕн. Нӕ уарзӕгой Хуыцаумӕ кув, цӕмӕй дын баххуыс кӕна уавӕрмӕ йӕ цӕстӕй ракӕсынӕн, стӕй дын ӕмбаргӕдзинад ратта «ӕмӕ дӕ цы фӕндагыл цӕуын хъӕуы, ууыл дӕ сараза». (Бакӕс Псалом 32:6–8.) Чи зоны дын тынг зын уа, цы ӕнкъарыс, уый Йегъовӕйӕн радзурын. Фӕлӕ дын Йегъовӕ дӕ зӕрдӕйы рыст хорз ӕмбары. Уый дӕ бирӕ уарзы ӕмӕ дын йӕхӕдӕг дзуры, цӕмӕй йын дӕ зӕрдӕ ӕргом кӕнай (Рац. 34:6; Пс. 62:7, 8).

11. Дзуттӕгтӕм 12:11 стихмӕ гӕсгӕ, Йегъовӕ искӕмӕн зонд куы амона, уӕд-иу уымӕ цы цӕстӕй хъуамӕ ракӕсӕм ӕмӕ цӕмӕн? (Ноджыдӕр кӕс рамкӕ « Адӕймаджы ӕмбырдӕй кӕй ацух кӕнынц, уый дзурӕг у Йегъовӕйы уарзондзинадыл».)

¹¹ Хистӕр нӕлгоймӕгтӕ цы уынаффӕ рахастой, уыимӕ разы у. Адӕймаджы ӕмбырдӕй кӕй ацух кӕнынц, уый дӕр хауы, Йегъовӕ йын зонд кӕй амоны, уымӕ. Уый ууыл дзурӕг у, ӕмӕ йӕ Йегъовӕ уарзы, ӕмӕ йӕ фӕнды, цӕмӕй йӕ рӕдыд бамбара. (Бакӕс Дзуттӕгтӕм 12:11.) Стӕй тыхсы ӕмбырды алкӕуыл дӕр. Чи зоны дын хотӕ кӕнӕ ’фсымӕртӕй исчи дзура,  хистӕр нӕлгоймӕгтӕ раст уынаффӕ нӕ рахастой, зӕгъгӕ. Фӕлӕ дӕ хъуамӕ рох ма уа, ахӕм ныхӕстӕ чи кӕны, уый хъуыддагмӕ ӕрмӕстдӕр иуырдыгӕй кӕй кӕсы. Мах алцы нӕ фӕзонӕм. Ӕмӕ хъуамӕ ма дызӕрдыг кӕнӕм, барадон комитет Библийы уагӕвӕрдтӕм лӕмбынӕг кӕй ӕркаст ӕмӕ «Йегъовӕйы номӕй» кӕй тӕрхон кодта (2 Аз. 19:6).

12. Ӕмбырдӕй кӕй ацух кӕнынц, уыцы адӕймагимӕ кӕй нӕ фӕдзурӕм, уый пайда цӕмӕй вӕййы? Ӕрхӕсс цӕвиттон.

¹² Хистӕр нӕлгоймӕгты уынаффӕимӕ разы куы уай, уӕд, ӕмбырдӕй кӕй ацух кодтой, уыцы адӕймагӕн баххуыс кӕндзынӕ Йегъовӕмӕ ӕрбаздӕхынӕн. Ацы статьяйы кӕй кой кодтам, уыцы хо Элизабет загъта: «Тынг зын нын уыди, нӕ фыртимӕ кӕй нал дзырдтам ӕмӕ йӕ кӕй нал уыдтам, уый. Фӕлӕ Йегъовӕмӕ куы ’рбаздӕхт, уӕд загъта, кӕй йӕ ацух кодтой, уый раст уынаффӕ кӕй уыд. Фӕстӕдӕр ма загъта, уый фӕрцы бирӕ цӕуылдӕрты кӕй сахуыр. Ӕмӕ ӕз дӕр бамбӕрстон, Йегъовӕ зонд куыд фӕамоны, уый алкӕддӕр раст кӕй вӕййы». Йӕ сӕрыхицау Марк дӕр зӕгъы: «Рӕстӕг куы рацыд, уӕд мын нӕ фырт загъта, йемӕ кӕй нӕ дзырдтам, уый дӕр ын кӕй баххуыс кодта Йегъовӕмӕ ӕрбаздӕхынӕн. Йегъовӕйӕ тынг бузныг дӕн, кӕй нын ӕххуыс кодта, цӕмӕй йӕ коммӕ кастаиккам».

13. Цы дын баххуыс кӕндзӕн, цӕмӕй дӕ зӕрдӕйы рыст фӕкъаддӕр уа?

¹³ Дӕ рыст дын чи бамбардзӕн, ахӕм ӕмбӕлттимӕ-иу аныхас кӕн. Дӕ рӕстӕг ӕрвит фӕлтӕрдджын чырыстӕттимӕ. Уыдон дын дӕ ныфсыл ныфс ӕфтаудзысты (Ӕмб. 12:25; 17:17). Гыццыл раздӕр кӕй кой кодтам, уыцы хо Джоаннӕ загъта: «Мӕхимӕ иунӕг кастӕн. Фӕлӕ-иу ме ’мбӕлттимӕ кӕй аныхас кодтон, уый мын тынг ӕххуыс кодта». Искӕй ныхӕсты тыххӕй дӕ ныфс куы асӕтта, уӕд та дӕ бон куыд у бакӕнын?

14. Кӕрӕдзийӕн цӕмӕн хъуамӕ барӕм ӕмӕ зӕрдӕйӕ цӕмӕн хъуамӕ хатыр кӕнӕм?

¹⁴ Дӕ хотӕ ӕмӕ де ’фсымӕртӕй ӕгӕр бирӕ ма дом. Хъуамӕ йӕ ӕмбарӕм, уый гӕнӕн кӕй нӕй, ӕмӕ алчидӕр алкӕддӕр раст ныхӕстӕ кӕна (Иак. 3:2). Мах не ’ппӕт дӕр ӕнӕххӕст стӕм. Ӕмӕ хатт адӕймаг, цы зӕгъа, уый нӕ фӕзоны. Кӕнӕ нын, гӕнӕн ис, йӕ ныхӕстӕй нӕ зӕрдӕ фӕриссын кӕна, кӕд уый йӕ хъуыдыйы кӕрон дӕр нӕ уыд, уӕддӕр. Дӕ зӕрдыл дар апостол Павелы ныхӕстӕ: «Исчи уӕ истӕмӕй куы фӕхъыг кӕна, уӕддӕр кӕрӕдзийӕн барут ӕмӕ зӕрдӕйӕ хатыр кӕнут» (Кол. 3:13). Йӕ фырты ӕмбырдӕй кӕмӕн ацух кодтой, иу ахӕм хо загъта: «Хотӕ ӕмӕ ’фсымӕрты-иу фӕндыд, цӕмӕй мӕ бафидар кодтаиккой, фӕлӕ-иу сын хатт иннӕрдӕм рауад. Ӕмӕ мын Йегъовӕ ӕххуыс кодта, цӕмӕй сын барстаин». Ӕмбырдӕн та йӕ бон куыд у ӕххуыс кӕнын, кӕй ацух кодтой, уый бинонтӕн?

15. Ӕмбырдӕй ӕрӕджы кӕй ацух кодтой, уый бинонтӕн нӕ бон куыд у баххуыс кӕнын?

¹⁵ Ӕмбырдӕй кӕй ацух кодтой, уый бинонтӕм хӕларзӕрдӕ у ӕмӕ-иу сыл зӕрдиагӕй бацин кӕн. Мириамӕн йе ’фсымӕры куы ацух кодтой, уӕд Мириам ӕмбырдмӕ ацӕуынмӕ йӕ ныфс нӕ хаста. Уый зӕгъы: «Хотӕ ӕмӕ ’фсымӕртӕ цы дзурдзысты, уымӕй тарстӕн.  Фӕлӕ уыдон мемӕ мӕ мастыл маст кодтой ӕмӕ мын ме ’фсымӕры тыххӕй ӕвзӕрӕй ницы дзырдтой. Уыдоны фӕрцы мын ӕнцондӕр уыди мӕ маст сфӕразын, ӕмӕ сӕ тынг бузныг дӕн». Ӕндӕр хо та радзырдта: «Нӕ фырты нын ӕмбырдӕй куы ацух кодтой, уӕд нӕм нӕ зынаргъ ӕмбӕлттӕ ӕрбацыдысты, цӕмӕй нын нӕ ныфсыл ныфс бафтыдтаиккой. Чидӕртӕ сӕ загътой, зын сын кӕй у хъӕугӕ ныхӕстӕ ссарын. Фӕлӕ-иу куы куыдтон, уӕд-иу уыдон дӕр мемӕ куыдтой. Чидӕртӕ та мӕм писмо ныффыстой. Уыцы хотӕ ӕмӕ ’фсымӕртӕ мын тынг баххуыс кодтой».

16. Ӕмбырдӕн йӕ бон куыд у, кӕй ацух кодтой, уый бинонтӕн дарддӕр дӕр ӕххуыс кӕнын?

¹⁶ Ӕмбырдӕй кӕй ацух кодтой, уый бинонтӕн дарддӕр дӕр ӕххуыс кӕн. Уыдоны ныр тынг хъӕуы, цӕмӕй сӕ фарсмӕ уай, сӕ ныфсыл сын ныфс ӕфтауай ӕмӕ сӕ дӕ уарзтӕй тавай (Дзут. 10:24, 25). Кӕй ацух кодтой, уыцы адӕймаджы бинонтӕм хатт афтӕ фӕкӕсы, цыма уыдоны дӕр ӕмбырдӕй ацух кодтой, уымӕн ӕмӕ сӕм чидӕртӕ дзыхӕй нал фӕдзурынц. Фӕлӕ мах нӕ фӕнды, цӕмӕй-иу афтӕ рауайа. Сӕ ныййарджыты кӕмӕн ацух кодтой, уыцы ӕрыгӕтты та уӕлдай тынгдӕр хъӕуы, цӕмӕй сӕ ӕппӕлӕм ӕмӕ-иу сын сӕ ныфсыл ныфс бафтауӕм. Марийӕйӕн йӕ сӕрыхицауы ӕмбырдӕй ацух кодтой, стӕй йӕ бинонты дӕр ныууагъта. Марийӕ радзырдта: «Ме ’мбӕлттӕ-иу нӕм ӕрбацыдысты ӕмӕ-иу нын хӕринаг скодтой. Стӕй мын ӕххуыс кодтой мӕ сывӕллӕттимӕ бинонты ахуыр уадзынӕн. Уыдон мын мӕ рыст сӕ зӕрдӕмӕ айстой ӕмӕ-иу мемӕ кӕугӕ дӕр кодтой. Исчи-иу мӕ кой куы кодта, уӕд-иу мӕ сӕрыл рахӕцыдысты. Ме ’мбӕлттӕ мын стыр ныфсы хос уыдысты!» (Ром. 12:13, 15).

17. Хистӕр нӕлгоймӕгтӕн сӕ бон куыд у баххуыс кӕнын, ӕмбырдӕй кӕй ацух кодтой, уый бинонтӕн?

¹⁷ Хистӕр нӕлгоймӕгтӕ, уӕ бон цыдӕриддӕр у, уый аразут, цӕмӕй, ӕмбырдӕй кӕй ацух кодтой, уымӕн йӕ бинонты фидар кӕнат ӕмӕ сын сӕ ныфсыл ныфс ӕфтауат. Уый фыццаджыдӕр сымах хӕс у (1 Фес. 5:14). Ӕмбырды размӕ ӕмӕ-иу ӕмбырды фӕстӕ семӕ аныхас кӕнут. Бабӕрӕг-иу сӕ кӕнут ӕмӕ-иу семӕ иумӕ скувут, хъусын кӕнынмӕ-иу сӕ фӕхонут. Уӕ бон сӕ у бинонты ахуырмӕ дӕр фӕхонын. Уыцы хотӕ ӕмӕ ’фсымӕртӕ хъуамӕ уыной, хистӕр нӕлгоймӕгтӕ сӕ кӕй уарзынц ӕмӕ сын сӕ рыст кӕй ӕмбарынц (1 Фес. 2:7, 8).

18. 2 Петры 3:9 стихмӕ гӕсгӕ, Йегъовӕ цы цӕстӕй кӕсы, чи йӕ ныууагъта, уыдонмӕ?

¹⁸ Йегъовӕйы «нӕ фӕнды, цӕмӕй исчи фесӕфа, фӕлӕ йӕ фӕнды, цӕмӕй се ’ппӕтӕн дӕр уа ӕрфӕсмон кӕныны фадат». (Бакӕс 2 Петры 3:9.) Кӕд адӕймаг уӕззау тӕригъӕд сарӕзта, уӕддӕр йӕ цард Йегъовӕйӕн зынаргъ у. Ахъуыды-ма кӕн, Йегъовӕ мах тыххӕй, тӕригъӕдджын адӕмы тыххӕй, цы стыр аргъ бафыста, ууыл – йӕ уарзон Фырты нывондӕн ӕрхаста! Йегъовӕ ӕххуыс кӕны, чи йӕ ныууагъта, уыдонӕн, цӕмӕй йӕм фӕстӕмӕ ӕрбаздӕхой. Уый сӕм ӕнхъӕлмӕ кӕсы. Ныфс ӕй ис, кӕй ӕрбаздӕхдзысты. Ӕмӕ уый бӕрӕг у, Йесо, сӕфт чи уыд, уыцы фырты тыххӕй цы фӕсномыг ныхас радзырдта, уымӕй (Лук. 15:11–32). Рӕстдзинад чи ныууагъта, уыдонӕй бирӕтӕ фӕстӕмӕ сӕ уарзӕгой уӕларвон Фыдмӕ ӕрбаздӕхтысты, ӕмӕ се ’мбырдты цинӕн кӕрон дӕр нал уыд. Ацы статьяйы кӕй кой кодтам, уыцы хо Элизабетӕн йӕ фырт куы ’рбаздӕхт, уӕд уымӕй амондджындӕр нӕ уыд. Элизабет загъта: «Афтӕ-иу мын чи дзырдта, ӕнхъӕлмӕ кӕс, зӕгъгӕ, уыдонӕй тынг бузныг дӕн».

19. Цӕуылнӕ хъуамӕ дызӕрдыг кӕнӕм, Йегъовӕ цы дзуры, уый раст кӕй вӕййы, ууыл?

¹⁹ Хъуамӕ макуы дызӕрдыг кӕнӕм, Йегъовӕ цы дзуры, уый алкӕддӕр раст кӕй вӕййы, ууыл. Зиан нын цы ’рхӕсса, ахӕмӕй нын никуы ницы фӕаразын кӕны. Уый у рӕдау ӕмӕ тӕригъӕдгӕнаг Фыд. Ӕмӕ йӕ чи уарзы ӕмӕ йын чи лӕггад кӕны, уыдоны се ’ппӕты дӕр тынг уарзы. Зон ӕй: Йегъовӕ дӕ зын сахат нӕ ныууадздзӕн (Дзут. 13:5, 6). Марк, уый размӕ кӕй кой кодтам, уыцы ’фсымӕр, афтӕ загъта: «Йегъовӕ нӕ иунӕгӕй никуы ныууагъта. Ӕмӕ зындзинӕдтӕ куы февзарӕм, уӕд махӕй дард никуы вӕййы». Йегъовӕ дын дарддӕр дӕр дӕтдзӕн, «адӕймагмӕ чи нӕй, ахӕм хъару» (2 Кор. 4:7). Ӕмӕ кӕд дӕ бинонтӕй исчи Йегъовӕйы ныууагъта, уӕддӕр дӕ бон у, ӕмӕ дарддӕр дӕр иузӕрдион уай ӕмӕ фӕразонӕй ӕнхъӕлмӕ кӕсай, фӕстӕмӕ кӕд ӕрбаздӕхдзӕн, уымӕ.