Развӕлгъау куыд загъдӕуыд, афтӕ аразын ӕппӕтдӕр ног

«Паддзахы бадӕныл Бадӕг загъта: мӕнӕ аразын ӕппӕтдӕр ног. Ӕмӕ зӕгъы мӕнӕн: ...ацы дзырдтӕ сты ӕцӕг ӕмӕ раст» (РАРГОМАД 21:5).

1, 2. Фидӕны цы ’рцӕудзӕн, ууыл хъуыды кӕнын адӕмӕй бирӕты цӕуылнӕ фӕнды?

«РАЙСОМ цы уыдзӕн, уымӕн чи цы зоны?» Ахӕм ныхӕстӕ никуы фехъуыстай кӕнӕ дӕхӕдӕг афтӕ никуы хъуыды кодтай? Диссаг нӕу, сомбон цы уыдзӕн, ууыл рагацау хъуыды кӕнын адӕмы цӕуылнӕ фӕнды, кӕнӕ фидӕны тыххӕй чи рагзагъд кӕны, уыдоныл цӕмӕн дызӕрдыг кӕнынц, уый. Хъуыддаг уый мидӕг ис, ӕмӕ адӕмӕн сӕ бон нӕу, цалдӕр мӕйы, йе та цалдӕр азы фӕстӕ цы ’рцӕудзӕн, уый развӕлгъау зонын.

² Иу журналы («Forbes ASAP») иу номыры ӕгасӕй дӕр дзырд цыд рӕстӕгыл. Телералӕвӕрдтӕуадзӕг Роберт Крингли фыста: «Ӕппынфӕстаг рӕстӕг худинаджы бынаты сӕвӕры махӕй алкӕйдӕр, фӕлӕ рӕстӕджы къухӕй, фидӕны цы уыдзӕн, уый тыххӕй развӕлгъау чи дзуры, уыдонӕй стырдӕр цӕфтӕ никӕуыл сӕмбӕлы. Фидӕны цы уыдзӕн, уый развӕлгъау зӕгъын у базон-базонтӕй хъазыны хуызӕн, ӕмӕ уыцы хъазты, зӕгъӕн ис, мах алыхатт дӕр фембылд вӕййӕм. [...] Фӕлӕ уыцы хъуыддаджы йӕхи стыр дӕсныйыл чи нымайы, уыдон уӕддӕр дзурынц, сомбон цы уыдзӕн, уый тыххӕй».

3, 4. а) Ног миназы хорзмӕ кӕй ис ӕнхъӕлмӕ кӕсӕн, уый иуӕй-иутӕ куыд ӕвдисынц? ӕ) Иннӕтӕ фидӕны тыххӕй цы хъуыды кӕнынц?

³ Чи зоны фӕхатыдтӕ, адӕм тынг бирӕ кӕй дзурынц ног миназыл, ӕмӕ уымӕ гӕсгӕ афтӕ  зыны, цыма абон фылдӕр адӕм хъуыды кӕны фидӕныл. Ивгъуыд азы райдианы журнал «Маклинз»-ы дзырдӕуыд: «Канадӕйы цӕрджытӕн сӕ фылдӕрӕн 2000 аз уыдзӕн ӕрмӕстдӕр ног къӕлиндарон аз, фӕлӕ ацы аз гӕнӕн ис, ӕмӕ бынтон ног цыдӕр райдайа». Йоркы университеты профессор Крис Дьюдни, фидӕны хорзмӕ кӕй ис ӕнхъӕлмӕ кӕсӕн, уый тыххӕй ахӕм ныхӕстӕ загъта: «Ног миназы къӕсӕрыл кӕй лӕууӕм, уый нысан кӕны, афтӕ бирӕ ӕгъатыр хъуыддӕгтӕ кӕм ӕрцыд, уыцы ӕнусӕй кӕй фервӕзтыстӕм».

⁴ Фӕлӕ цардмӕ куы ’ркӕсӕм, уӕд та цымӕ цы уынӕм? Канадӕйы иу ӕрфарсты хайадисджытӕй ӕрмӕстдӕр 22 проценты загътой, зӕгъгӕ сӕ «уырны, 2000 аз дунейӕн кӕй уыдзӕн ног дуджы райдиан». Се ’рдӕг та 50 азы ӕмгъуыды «ӕнхъӕлмӕ кӕсынц ног дунеон быцӕумӕ» — дунеон хӕстмӕ. Куыд зыны, афтӕмӕй адӕмӕн сӕ фылдӕр ӕмбарынц, ног миназ нӕ нӕ зындзинӕдтӕй кӕй нӕ фервӕзын кӕндзӕн, ӕмӕ ӕппӕтдӕр ног кӕй не скӕндзӕн, уый. Сэр Майкл Этия, Британийы Къаролты ӕхсӕнады раздӕры президент фыста: «Цард афтӕ тагъд кӕй ивы... уый ууыл дзурӕг у, ӕмӕ XXI ӕнус адӕймагады раз ӕвӕрдзӕн, ӕвӕстиатӕй кӕй хъӕуы алыг кӕнын, ахӕм фарстатӕ. Ныридӕгӕн ӕмбӕлӕм тынг стыр зындзинӕдтыл. Зӕгъӕм зӕххыл цӕрджыты нымӕц ӕнӕрынцойӕ рӕзы, ӕрдзы хъӕздыгдзинӕдтӕ фӕуд кӕнынц, ӕрдз чъизи кӕны ӕмӕ дунейы алы къуымты мӕгуырдзинады хызы хауы фылдӕрӕй-фылдӕр адӕм; уыцы фарстатыл фӕстӕмӕ хӕцӕн нал ис».

5. Сомбон нӕм цы ’нхъӕлмӕ кӕсы, уый тыххӕй раст информаци кӕм ис ссарӕн?

⁵ Чи зоны дӕм ӕвзӕры фарст: кӕд нӕм сомбон цы ’нхъӕлмӕ кӕсы, уый адӕмӕн сӕ бон нӕу базонын, уӕд цымӕ хуыздӕр нӕ уаид, ӕмӕ йыл бынтондӕр куы нӕ хъуыды кӕниккам? Ницы хуызы! Фидӕны цы уыдзӕн, уый адӕмӕн сӕ бон бӕлвырд зӕгъын кӕй нӕу, уый ууыл дзурӕг нӕу, ӕмӕ бынтондӕр никӕй бон у уый саразын. Уӕдӕ уый кӕй бон у ӕмӕ нӕм фидӕны хуыздӕр рӕстӕджытӕ кӕй ӕнхъӕлмӕ кӕсы, уымӕн исты бындур ис? Ацы фарстытӕн раст дзуаппытӕ нӕ бон ссарын у цыппар сӕрмагонд рагзагъды. Уыдон фыст сты, иууыл зындгонддӕр чи у, иууыл фылдӕр адӕм кӕй кӕсынц, ӕмӕ уыимӕ арӕх раст кӕй не ’мбарынц ӕмӕ кӕй ницӕмӕ дарынц, уыцы чиныджы — Библийы. Абоны онг Библийы тыххӕй куыдфӕнды ма хъуыды кодтаис, ӕмӕ цасфӕнды хорз зонгӕ ма уыдаис йемӕ, уӕддӕр хорз уаид уыцы цыппар бындурон тексты лӕмбынӕг равзарын. Цы фидӕны кой дзы цӕуы, уый у тынг амондджын. Уымӕй дарддӕр уыцы цыппар сӕйраг пехуымпарады ӕвдыст цӕуы, фидӕны дӕумӕ дӕр ӕмӕ дӕ уарзон адӕммӕ дӕр цы ӕнхъӕлмӕ кӕсы, уый.

6, 7. Кӕд пехуымпариуӕг кодта Исай ӕмӕ йӕ рагзагъдтӕ диссаджы хуызы куыд сӕххӕст сты?

⁶ Уыцы пехуымпарӕдтӕй фыццаг ис Исайы чиныджы 65-ӕм сӕры. Ацы сӕр кӕсгӕйӕ, хорз уаид нӕ зӕрдыл куы дариккам, кӕд ӕрцыд фыст ӕмӕ дзы цавӕр уавӕр цӕуы ӕвдыст, уый. Ныффыста йӕ Хуыцауы пехуымпар Исай. Уый цард Иудейы паддзахадӕн йӕ кӕрон куы ӕрцыд, уымӕй иу ӕнусӕй фылдӕры размӕ. Уыцы ӕвирхъау хабар та ӕрцыд, Иегъовӕ мӕнгард иудейты куы нал хъахъхъӕдта, ӕмӕ вавилойнӕгтӕн уый бар куы ратта, цӕмӕй Иерусалим ныппырх кодтаиккой ӕмӕ йын йӕ цӕрджыты уацары акодтаиккой, уӕд. Уыцы хабар ӕрцыд, Исай йӕ куы ныффыста, уымӕй фондзӕссӕдз азӕй фылдӕры фӕстӕ (2 Паралипоменон 36:15—21).

⁷ Уыцы пехуымпарад куыд сӕххӕст, ууыл ныхас кӕнгӕйӕ, ӕрхъуыды кӕнын хъӕуы уый, ӕмӕ Хуыцауы разамындӕй Исай развӕлгъау загъта персайнаг лӕг Киры ном, уӕд йӕ кой дӕр кӕмӕн нӕма уыд ӕмӕ фӕстагмӕ Вавилон чи басаста, уый ном (Исай 45:1). Кир ӕппӕт фадӕттӕ дӕр сарӕзта, цӕмӕй н. э. агъоммӕ 537 азы иудейтӕ сӕ райгуырӕн зӕхмӕ ӕрыздӕхтаиккой. Диссаг уый у, ӕмӕ Ис 65-ӕм сӕры куыд кӕсӕм, афтӕмӕй Исай уый тыххӕй развӕлгъау загъта. Уый банысан кодта, израилӕгтӕ сӕ райгуырӕн зӕхмӕ куы ’рыздӕхой, уӕд дзы цы уавӕр уыдзӕн, уый.

8. Цавӕр амондджын фидӕны тыххӕй загъта развӕлгъау Исай ӕмӕ дзы махӕн иууыл цымыдисагдӕр цавӕр ныхӕстӕ сты?

⁸ Исайы 65:17—19-ӕм стихты мах кӕсӕм: «Мӕнӕ Ӕз фӕлдисын ног арв ӕмӕ ног зӕхх, раздӕр чи уыд, уыдон хъуыды дӕр нал ӕркӕндзыстут ӕмӕ уӕ зӕрдыл дӕр нал ӕрлӕудзысты. Фӕлӕ сымах, ӕнустӕм цин кӕндзыстут, Ӕз цы фӕлдисын, ууыл: уымӕн ӕмӕ мӕнӕ Ӕз Иерусалим фӕлдисын циндзинадӕн ӕмӕ йӕ адӕмы хъӕлдзӕгдзинадӕн. Ӕмӕ цин кӕндзынӕн Иерусалимыл ӕмӕ Мӕ адӕмыл, ӕмӕ дзы кӕуын ӕмӕ дзыназын никуыуал райхъуысдзӕн». Исай ам цы уавӕрты кой кӕны, уыдон, кӕй зӕгъын ӕй хъӕуы, иудейтӕ Вавилоны цы уавӕрты цардысты, уыдонӕй бирӕ хуыздӕр уыдысты. Уый развӕлгъау загъта циндзинад ӕмӕ хъӕлдзӕгдзинады тыххӕй. Ныр та нӕ хъус ӕрдарӕм, «ног  арв ӕмӕ ног зӕхмӕ». Библийы ацы ныхӕстӕ кӕм ӕмбӕлынц, уыцы цыппар бынатӕй уый у фыццаг ӕмӕ уыцы цыппар скъуыдздзаджы комкоммӕ хауынц нӕ фидӕнмӕ, стӕй йӕм канд хаугӕ нӕ кӕнынц, фӕлӕ ма цыхуызӕн уыдзӕн, уый дӕр нын дзурынц развӕлгъау.

9. Исайы 65:17—19-ӕм стихты ныхӕстӕ рагон иудейтыл куыд сӕххӕст сты?

⁹ Исайы 65:17—19-ӕм стихты ныхӕстӕ фыццаг сӕххӕст сты рагзаманы цӕрӕг иудейтыл. Растдӕр Исай куыд загъта, афтӕ уыдон сӕ райгуырӕн зӕхмӕ ӕрыздӕхтысты ӕмӕ ӕцӕг кувынад фӕстӕмӕ йӕ къахыл слӕууын кодтой (Ездрӕ 1:1—4; 3:1—4). Кӕй зӕгъын ӕй хъӕуы, сӕ райгуырӕн зӕхмӕ ӕрыздӕхгӕйӕ, иудейтӕ ӕндӕр планетӕйыл нӕ фестадысты. Уый нын ӕххуыс кӕны, Исай ног арв ӕмӕ ног зӕххы тыххӕй куы фыста, уӕд цӕй кой кодта, уый бамбарынӕн. Иуӕй-иу адӕймӕгтау мах нӕ хъӕуы Нострадамусы кӕнӕ ӕндӕр рагзагъдгӕнӕг адӕймаджы дӕлӕ-уӕлӕ ныхӕстыл нӕ сӕр цъӕл кӕнын. Исайы цы зӕгъын фӕндыд, уый нын ӕмбарын кӕны Библи йӕхӕдӕг.

10. Исай развӕлгъау цы ног «зӕххы» тыххӕй загъта, уый куыд ӕмбарын хъӕуы?

¹⁰ Библийы дзырд «зӕхх» алыхатт зӕххы къоримӕ нӕ фӕхауы. Зӕгъӕм, Псалом 95:1-ӕм стихы ис ахӕм ныхӕстӕ: «Сзарут Хицауӕн ӕппӕт зӕхх». Куыд зонӕм, афтӕмӕй нӕ планетӕйӕн, ома сурзӕхх ӕмӕ ӕгӕрон океантӕн сӕ бон зарын нӕу. Заргӕ кӕнынц адӕм. Уӕдӕ Псалом 95:1-ӕм стихы дзырд цӕуы зӕххыл цӕрӕг адӕмыл *. Фӕлӕ ма Исайы 65:17-ӕм стихы «ног арвы» кой дӕр цӕуы. Кӕд «зӕхх», сӕ райгуырӕн бӕстӕм чи ӕрыздӕхт, уыцы иудейты ног адӕймагон ӕхсӕнад у, уӕд цымӕ «ног арв» та цы у?

11. Цы ӕвдисы дзырдбаст «ног арв»?

¹¹ Макклинток ӕмӕ Стронгы уагъд энциклопедийы дзырдӕуы: «Пехуымпарадон цӕстылуайӕны арвы кой куы фӕцӕуы, уӕд уый февдисы... хицауиуӕггӕнджыты ӕмткӕй райсгӕйӕ... арв зӕххы сӕрмӕ куыд ис ӕмӕ йын разамынд куыд дӕтты, афтӕ уыдон дӕр сты, сӕ дӕлбар чи ис, уыдонӕй уӕлдӕр ӕмӕ сыл хицауиуӕг кӕнынц» («Cyclopædia of Biblical, Theological, and Ecclesiastical Literature»). «Арв ӕмӕ зӕххы» тыххӕй уыцы энциклопедийы дзырдӕуы, зӕгъгӕ, «пехуымпарадон ӕвзаджы ацы ныхӕстӕ ӕвдисынц, ӕхсӕнады алыхуызон бартӕ кӕмӕн ис, уыцы адӕмы политикон уавӕр. Арв амоны хицӕуттӕм, зӕхх та — кӕуыл къухдариуӕг кӕнынц, сӕ дӕлбар чи ис, уыцы адӕммӕ».

12. Рагон иудейтӕн «ног арв ӕмӕ ног зӕхх» цы хуызы уыд?

¹² Иудейтӕ сӕ райгуырӕн зӕхмӕ куы ’рыздӕхтысты, уӕд уыдон бахаудтой ног цардыуагон системӕмӕ. Уым уыд ног хицауад. Паддзах Давиды байзӕддаг Зоровавель дзы уыд хицауиуӕггӕнӕг, Иоседекы фырт Йесо та — хистӕр  сауджын (Аггей 1:1, 12; 2:21; Захари 6:11). Уыдон уыдысты «ног арв». Кӕй сӕрмӕ? «Ног зӕххы» сӕрмӕ, ома Иерусалим ӕмӕ Иегъовӕйӕн кӕм куывтой, уыцы кувӕндон фӕстӕмӕ йӕ къахыл слӕууын кӕнынмӕ йӕ райгуырӕн зӕхмӕ чи ӕрыздӕхт, уыцы ссыгъдӕггонд адӕмы ӕхсӕнады сӕрмӕ. Уӕдӕ пехуымпарад уӕды дуджы иудейтыл куы сӕххӕст, уӕд дзы ӕцӕгдӕр уыд ног арв ӕмӕ ног зӕхх.

13, 14. а) «Ног арв ӕмӕ ног зӕхх» кӕм ӕмбӕлы, ахӕм бынӕттӕй ма нӕ цавӕр ӕндӕр бынат хъӕуы равзарын? ӕ) Петры пехуымпарадӕн абон уӕлдай стыр нысаниуӕг цӕмӕн ис?

¹³ Уӕлдӕр цӕуыл дзырдтам, уый нӕ хъуыдыйы дарӕм, уымӕн ӕмӕ нӕ нӕ дарддӕры ныхасы йӕ сӕр бахъӕудзӕн. Ныртӕккӕ мах ууыл нӕ архайӕм, цӕмӕй Библи нӕхирдыгонау рафӕлгъауӕм, уӕдӕ нӕ нысан уый дӕр нӕу, ӕмӕ рагзаманты цы хабӕрттӕ ’рцыд, уыдоныл нӕ цӕст ахӕссӕм. Уый хуыздӕр бамбардзынӕ, «ног арв ӕмӕ ног зӕхх» ма кӕм ӕмбӕлы, иу ахӕм бынатмӕ куы ’ркӕсӕм, уӕд. Уый ис Петры 2-аг ӕрвысты 3-ӕм сӕры, ӕмӕ куыд фендзыстӕм, афтӕмӕй уым дзырд цӕуы нӕ фидӕныл.

¹⁴ Апостол Петр йе ’рвыст ныффыста, иудейтӕ сӕ райгуырӕн зӕхмӕ куы ’рыздӕхтысты, уымӕй 500 азӕй фылдӕры фӕстӕ. Йесойы апостол уӕвгӕйӕ, Петр фыста, йӕ 2-аг ӕрвысты 2Пт 3:2-ӕм стихы кӕй кой кодта, уыцы «Хицауы» — Чырыстийы фӕдылдзӕуджытӕм. 2Пт 3:4-ӕм стихы (НД) Петр дзуры, Йесо «адӕмы ’хсӕн ӕнӕуынгӕ хуызы кӕй уыдзӕн, уыцы зӕрдӕвӕрды» тыххӕй, ӕмӕ йӕ пехуымпарадӕн абон растдӕр уымӕ гӕсгӕ ис ахӕм стыр нысаниуӕг. Фыццаг дунеон хӕстӕй фӕстӕмӕ Йесо куыд Хуыцауы уӕларвон Паддзахады Сӕргълӕууӕг, афтӕ адӕмы ’хсӕн ӕнӕуынгӕ хуызы кӕй ис, уымӕн ис ӕнӕнымӕц бӕлвырдгӕнӕнтӕ (Раргомад 6:1—8; 11:15, 18). Ӕмӕ уыцы хабарӕн уӕлдай стырдӕр нысаниуӕг ис, уыцы сӕры ма Петр развӕлгъау ноджыдӕр цы загъта, уый тыххӕй.

15. Куыд ӕххӕст кӕны Петры пехуымпарад «ног арвы» тыххӕй?

¹⁵ 2 Петры 3:13-ӕм стихы мах кӕсӕм: «Йӕ зӕрдӕвӕрдмӕ гӕсгӕ, [мах] ӕнхъӕлмӕ кӕсӕм ног арв ӕмӕ ног зӕхмӕ, кӕцытыл цӕры рӕстдзинад». Ӕвӕццӕгӕн зоныс, уӕлӕрвты, ома «ног арвыл», Хицауӕй Йесо кӕй ӕрцыд ӕвӕрд (Лукайы 1:32, 33). Фӕлӕ ма нын Библийы ӕндӕр бынӕттӕ ӕвдисынц, Йесо иунӕгӕй кӕй нӕ хицауиуӕг кӕны, уый дӕр. Йесо загъта, зӕгъгӕ, йӕ апостолтӕн ӕмӕ уыдон хуызӕн ӕндӕр адӕмӕн цӕттӕ у бынат арвыл. Дзуттытӕм ӕрвысты апостол Павел ахӕм адӕймӕгты хоны «уӕларвон хуынды хайджынтӕ». Йесо та загъта, зӕгъгӕ, уыцы къордмӕ чи хауы, уыдон уӕларвыл йемӕ ӕрбаддзысты паддзахы бадӕнтыл (Дзуттытӕм 3:1; Матфейы 19:28; Лукайы 22:28—30; Иоанны 14:2, 3). Уӕдӕ ног арвыл Йесоимӕ паддзахиуӕг кӕндзысты ӕндӕртӕ дӕр. Уӕд цы нысан кӕны Петр цы «ног зӕххы» кой кӕны, уый та?

16. Цавӕр «ног зӕхх» ис абон?

¹⁶ Пехуымпарад фыццаг хатт куы сӕххӕст, ома иудейтӕ сӕ райгуырӕн зӕхмӕ куы ’рыздӕхтысты, уӕд куыд уыд, афтӕ нырыккон сӕххӕсты дӕр 2 Петры 3:13-ӕм стихы дзырд цӕуы, йӕхи ног арвы дӕлбар чи кӕны, уыцы адӕмыл. Абон «ног арвӕн» ӕнӕзивӕгӕй дӕлбариуӕг кӕнынц милуангай адӕймӕгтӕ. Уыдон стыр пайда исынц, «ног арв» цы ахуырадон программӕ уадзы, уымӕй ӕмӕ архайынц Библийы закъӕттӕм гӕсгӕ цӕрыныл (Исай 54:13). Уыцы адӕм сты «ног зӕххы» бындур — ӕппӕтдунеон ӕхсӕнад; уым алы адӕмты, ӕвзӕгты ӕмӕ расӕты минӕвӕрттӕ иумӕ уӕхски-уӕхск лӕггад кӕнынц, ныридӕгӕн чи хицауиуӕг кӕны, уыцы Паддзах Йесо Чырыстийы коммӕ кӕсгӕйӕ. Дӕуӕн дӕр у дӕ бон, ӕмӕ уыцы ӕхсӕнады хай уай! (Михей 4:1—4).

17, 18. 2 Петры 3:13-ӕм стихы ныхӕстӕ нын фидӕнмӕ кӕсыны ныфс цӕмӕн дӕттынц?

¹⁷ Фидӕны тыххӕй не ’мбарынад иумӕйаг зонындзинӕдтыл нӕ ахицӕн: цыдӕртӕ дзы нӕ бон фенын у хӕстӕгдӕр, бӕстондӕр. Зӕгъӕм, Петры 2-аг ӕрвысты 3-ӕм сӕры контекстмӕ куы ’ркӕсӕм, уӕд фендзыстӕм, дзырд кӕй цӕуы, фидӕны цы диссаджы ивындзинад хъуамӕ ӕрцӕуа, ууыл. 2Пт 3:5-ӕм ӕмӕ 6-ӕм стихты Петр дзуры, Нойы бонты Доны хъаймӕты тыххӕй, цыран сӕфт ӕрцыд уӕды фыддуне. Петр 2Пт 3:7-ӕм стихы дзуры, зӕгъгӕ, «ныры ӕрвтӕ ӕмӕ зӕхх», ома хицауиуӕг чи кӕны, уыдон, ӕмӕ дзыллӕтӕ дӕр хъахъхъӕд цӕуынц «тӕрхоны бонмӕ ӕмӕ ӕнӕраст адӕймӕгты фесафынмӕ». Уӕдӕ та уымӕй дӕр бӕлвырд кӕны, дзырдбаст «ныры ӕрвтӕ ӕмӕ зӕхх» кӕй хауы Дун-дунемӕ нӕ, фӕлӕ дзыллӕттӕм ӕмӕ сӕ хицауиуӕгады формӕтӕм.

¹⁸ Дарддӕр Петр ӕмбарын кӕны, Иегъовӕйы ӕрхӕстӕггӕнӕг бон стыр ивындзинӕдтӕ кӕй ӕрцӕудзӕн, ӕмӕ уый фӕрцы, 2Пт 3:13-ӕм стихы кӕй кой цӕуы, уыцы ног арв ӕмӕ ног зӕххӕн фӕндаг кӕй байгом уыдзӕн, уый. Дӕ хъус ма ӕрдар стихы кӕронмӕ: «Кӕцытыл цӕры рӕстдзинад». Цымӕ уый ууыл дзурӕг нӕу, ӕмӕ тагъд хорзырдӕм стыр ивындзинӕдтӕ кӕй ӕрцӕудзӕн? Цымӕ нын уый ныфс нӕ дӕтты, ӕппӕтдӕр ног  кӕй уыдзӕн ӕмӕ адӕм цардӕй абонӕй бирӕ фылдӕр циндзинад кӕй исдзысты? Кӕд уый фенын дӕ бон у, уӕд уый нысан кӕны, ӕмӕ адӕмӕн сӕ фылдӕр кӕй не ’мбарынц, уыцы библион пехуымпарӕдтӕ ды арфдӕр кӕй бамбӕрстай, уый.

19. Раргомады чиныджы фидӕны «ног арв ӕмӕ ног зӕххы» тыххӕй цавӕр уавӕртыл дзырдӕуы?

¹⁹ Фӕлӕ ацӕуӕм дарддӕр. Мах базыдтам, «ног арв ӕмӕ ног зӕххы» тыххӕй Исайы чиныджы 65-ӕм сӕры ӕмӕ Петры 2-аг ӕрвысты 3-ӕм сӕры кӕй дзырдӕуы, уый. Ныр та бакӕнӕм Библи Раргомады чиныджы 21-ӕм сӕр. Уым дӕр ӕмбӕлынц уыцы ныхӕстӕ. Ӕмӕ та нын ам дӕр йӕ бамбарынӕн баххуыс кӕндзӕн контекст. Дыууӕ сӕр раздӕр, Раргомады 19-ӕм сӕры, символикон ӕвзагӕй дзырд цӕуы хӕсты тыххӕй, ӕрмӕст уыцы хӕст знагиуӕггӕнӕг адӕмты ’хсӕн нӕ цӕуы. Хӕсты иуырдыгӕй лӕууы «Хуыцауы Дзырд». Ӕвӕццӕгӕн бамбӕрстай, Йесо Чырыстийы кой кӕй цӕуы, уый (Иоанны 1:1, 14). Йесо ис уӕлӕрвтыл, ӕмӕ уыцы цӕстылуайӕны йемӕ ӕвдыст цӕуынц йӕ уӕларвон ӕфсӕдтӕ дӕр. Фӕлӕ кӕй ныхмӕ хӕцынц? Рар 19-ӕм сӕры дзырд цӕуы «паддзӕхтӕ», «минты хицӕуттӕ» ӕмӕ ӕхсӕнады алыхуызон уавӕрты чи ис, уыцы адӕмыл — «ныллӕджытыл ӕмӕ цытджынтыл». Уыцы хӕстмӕ хауы Иегъовӕйы бон дӕр, цыран куынӕггонд ӕрцӕудзысты фыдгӕнджытӕ (2 Фессалоникӕгтӕм 1:6—10). Дарддӕр, Раргомады 20-ӕм сӕры райдианы ӕвдыст цӕуы, «рагон калм... хӕйрӕг ӕмӕ сайтан» иуварсгонд куыд ӕрцӕудзӕн, уый. Ныр та, ацы хуыдытӕ нӕ зӕрдыл даргӕйӕ, рахизӕм Раргомады 21-ӕм сӕрмӕ.

20. Раргомады 21:1-ӕм стихы цавӕр бындурон ивындзинады тыххӕй дзырдӕуы?

²⁰ Апостол Иоанн йӕ ныхас райдыдта ахӕм зӕрдӕмӕхъаргӕ ныхӕстӕй: «Федтон ӕз ног арв ӕмӕ ног зӕхх; уымӕн ӕмӕ раздӕры арв ӕмӕ раздӕры зӕхх аивгъуыдтой, ӕмӕ денджыз дӕр нал ис». Исайы 65-ӕм сӕры ӕмӕ Петры 2-аг ӕрвысты 3-ӕм сӕры цы бакастыстӕм, уый бындурыл фидарӕй нӕ бон у зӕгъын, ӕмӕ ам дзырд ууыл нӕ цӕуы, арв ӕмӕ нӕ планетӕ — сурзӕхх ӕмӕ дунеон океан — ӕндӕртӕй кӕй ӕрцӕудзысты ивд. Ацы сӕры размӕ цы сӕртӕ ис, уыдонӕй куыд базыдтам, афтӕмӕй куынӕггонд ӕрцӕудзысты ӕвзӕр адӕм ӕмӕ сӕ хицауиуӕгады формӕтӕ, уыимӕ се ’нӕуынгӕ хицау Сайтан дӕр. О, ацы зӕрдӕвӕрд хауы ног цардыуагмӕ, уыимӕ зӕххыл цӕрӕг адӕммӕ дӕр.

21, 22. Цавӕр арфӕдзинӕдты тыххӕй нын дзуры Иоанн ӕмӕ цавӕр цӕссыгтӕ ӕрцӕудзысты сӕрфт?

²¹ Уый нӕ тынгдӕр бауырндзӕн, ацы диссаджы пехуымпарадмӕ дарддӕр куы ’ркӕсӕм, уӕд. Рар 21:3-аг стихы кӕрон дзырд цӕуы, Хуыцау адӕймагадимӕ куы уа, ӕмӕ йын йӕ фӕндон чи ӕххӕст кӕна, уыдоны тынг бирӕ хорзӕхтӕй куы схайджын кӕна, уыцы рӕстӕгыл (Иезекиль 43:7). Рар 21:4-ӕм ӕмӕ 5-ӕм стихты Иоанн дзуры: «Ныссӕрфдзӕн Хуыцау алы цӕстысыг сӕ цӕстытӕй, мӕлӕт дӕр нал уыдзӕн; нӕдӕр кӕуын, нӕдӕр дзыназын, нӕдӕр низ нал уыдзӕн; уымӕн ӕмӕ раздӕрыон аивгъуыдта. Ӕмӕ паддзахы бадӕныл Бадӕг загъта: мӕнӕ аразын ӕппӕтдӕр ног. Ӕмӕ зӕгъы мӕнӕн: ныффыс; уымӕн ӕмӕ ацы дзырдтӕ сты ӕцӕг ӕмӕ раст». Ӕцӕг зӕрдӕфидаргӕнӕн пехуымпарад!

²² Ахъуыды ма кӕн, Библи цы рӕстӕджы кой кӕны, ууыл. «Ныссӕрфдзӕн Хуыцау алы цӕстысыг сӕ цӕстытӕй». Ам дзырд нӕ цӕуы, нӕ цӕсты гагуытӕ нын цы цӕссыгтӕ ӕхсынц, уыдоныл. Нӕ дзы цӕуы дзырд цины цӕссыгтыл дӕр. Фӕлӕ Хуыцау цы цӕссыгтӕ ныссӕрфдзӕн, уыдон сты: удхар, хъыгдзинад, фыдӕнхъӕлдзинад, рис ӕмӕ хъизӕмары цӕссыгтӕ. Афтӕ кӕй у, уый кӕцӕй зонӕм? Ацы диссаджы пехуымпарады, Хуыцау адӕмы цӕссыгтӕ куы сӕрфа, уӕд нӕдӕр «мӕлӕт... нӕдӕр кӕуын, нӕдӕр дзыназын, нӕдӕр низ» кӕй нал уыдзӕн, уымӕй (Иоанны 11:35).

23. Иоанны пехуымпарадмӕ гӕсгӕ ӕнӕмӕнг кӕрон цӕмӕн ӕрцӕудзӕн?

²³ Цымӕ уый ууыл дзурӕг нӕу, ӕмӕ рак, паралич (инсульт), зӕрдӕйы низтӕ ӕмӕ ма суанг мӕлӕт дӕр кӕй фесӕфдзысты? Не ’хсӕн ахӕм ис, йӕ зӕрдиаг адӕймаг исты низӕй, ӕнамонд цауы азарӕй, кӕнӕ цавӕрдӕр ӕрдзон бӕллӕххы бахаугӕйӕ, кӕмӕн нӕ амард? Хуыцау нын  зӕрдӕ ӕвӕры, мӕлӕт нал уыдзӕн, зӕгъгӕ. Уый та нысан кӕны, уыцы рӕстӕджы, чи зоны, цы сывӕллӕттӕ гуыра, уыдон зӕронд дӕр кӕй нӕ кӕндзысты ӕмӕ мӕлгӕ дӕр. Уый ӕддейӕ ма ацы пехуымпарад ӕвдисы уый дӕр, ӕмӕ нал уыдзӕн, зӕрондыбонты чи фӕзыны, ахӕм низтӕ: ацӕргӕ адӕймаджы сӕрымагъзы чырӕгтӕ дзӕбӕх куынӕуал фӕкусынц ӕмӕ уый аххосӕй рох кӕнын куы райдайы (Альцгеймеры низ), стджытӕ хырыз кӕнын куы райдайынц (остеопороз), адӕймаджы ӕнӕмӕнг мӕлӕтмӕ чи нӕ кӕны, ахӕм рӕсыд (фибромӕ), цӕстыты туджы ӕлхъывдад бӕрзонд куы уа, уый аххосӕй расайгӕ цӕстыты низ (глаукомӕ), ӕмӕ ма суанг цӕсты фӕрдыг тар кӕнын куы райдайы (катарактӕ), уый дӕр.

24. «Ног арв ӕмӕ ног зӕхх» арфӕдзинад цӕмӕн уыдзысты ӕмӕ ма нӕ цы хъӕуы равзарын?

²⁴ Кӕй зӕгъын ӕй хъӕуы, сразы уыдзынӕ, адӕймаг зӕронд куы нал кӕна, низтӕ ӕмӕ мӕлӕт куы нал уой, уӕд маст ӕмӕ кӕуын дӕр къаддӕр кӕй уыдзӕн. Уӕдӕ цы ис зӕгъӕн, афтӕ бирӕ адӕм фырмӕгуырӕй кӕй ӕрвитынц сӕ бонтӕ, сывӕллӕттӕн фыдмитӕ кӕй кӕнынц, кӕнӕ адӕмыл сӕ равзӕрдмӕ кӕнӕ сӕ хуызмӕ гӕсгӕ дӕлӕмӕ кӕй хӕцынц ӕмӕ сын сӕ бартӕ кӕй ссӕндынц, уый тыххӕй та? Цалынмӕ ӕппӕт уыдӕттӕ нӕ царды уой, уӕдмӕ, ай-гъайдӕр, хъыг дӕр кӕндзыстӕм ӕмӕ кӕугӕ дӕр. Уымӕ гӕсгӕ «ног арв ӕмӕ ног зӕхх» куы уа, уӕд нын нӕ цард не ’рхӕндӕг кӕндзысты, абон адӕмӕн маст цы хъуыддӕгтӕ хӕссынц, уыдон. Диссаджы ивындзинад! Фӕлӕ Библийы «ног арв ӕмӕ ног зӕхх» кӕм ӕмбӕлы, уыцы бынӕттӕй мах ӕркастыстӕм ӕрмӕстдӕр ӕртӕмӕ. Ис ма ноджыдӕр иу бынат, ӕмӕ уый дӕр баст у, кӕй равзӕрстам, уыдонимӕ. Уыцы бынат нын ноджы бӕлвырддӕр ӕвдисы, Хуыцау «ӕппӕтдӕр ног саразыны» зӕрдӕвӕрд куыд ӕмӕ кӕд сӕххӕст кӕндзӕн, уый нӕ бон нӕхи цӕстӕй фенын кӕй у, уый. Уыцы пехуымпарад дӕр ӕмӕ нӕ амондимӕ куыд баст у, уый дӕр ӕвзӕрст цӕудзысты иннӕ статьяйы.

[Фиппаинаг]

Цавӕр дзуапп раттис?

• Библийы цавӕр ӕртӕ бынаты дзырдӕуы «ног арв ӕмӕ ног зӕххы» тыххӕй?

• «Ног арв ӕмӕ ног зӕххы» тыххӕй пехуымпарад рагон иудейтыл куыд сӕххӕст?

• Петр кӕй кой кодта, уыцы «ног арв ӕмӕ ног зӕххы» тыххӕй пехуымпарад куыд хъуамӕ сӕххӕст уа?

• Раргомады чиныджы 21-ӕм сӕр амондджын фидӕнмӕ куыд амоны?

[Фарстатӕ ахуыр кӕнынӕн]

[Ныв 10 фарсыл]

Иегъовӕ развӕлгъау куыддӕриддӕр загъта, афтӕ Кир сарӕзта фадӕттӕ, цӕмӕй н. э. агъоммӕ 537 азы иудейтӕ фӕстӕмӕ сӕ райгуырӕн бӕстӕм ӕрыздӕхтаиккой.