Фидар хӕц Хуыцауы ахуырӕдтыл

«Иегъовӕйыл ӕппӕт зӕрдӕйӕ ӕууӕнд ӕмӕ дӕ зондӕй ныфсджын ма у. Алы хъуыддаджы дӕр ын агур йӕ разамынд, ӕмӕ дын уый раст кӕндзӕн дӕ фӕндӕгтӕ» (ФӔСНОМЫГ НЫХӔСТӔ 3:5, 6, НД).

1. Адӕймаджы зонындзинӕдты ӕндӕвдадӕй нын абоны хуызӕн тӕссаг кӕй никуы уыд, уый цӕмӕй бӕрӕг у?

АБОН дунейы цы ӕрвылбонон газеттӕ цӕуы, уыдонӕн сӕ нымӕц у 9 000 бӕрц. Ӕрмӕст Иугонд Штатты алы аз дӕр мыхуыры рацӕуы 200 000 ног чиныджы. Иу нымадмӕ гӕсгӕ 1998 азы мартъийы мӕймӕ Интернеты уыдис 275 милуан Web-фарсы. Куыд зӕгъынц, афтӕмӕй уыцы нымӕцыл иу мӕймӕ бафты 20 милуан сыфы. Цавӕрфӕнды фарсты фӕдыл дӕр адӕмӕн сӕ бон райсын у, нырмӕ куыд никуы уыд, афтӕ бирӕ информаци. Афтӕ бирӕ информаци кӕй ис, уый кӕд иуырдыгӕй пайда дӕр у, уӕддӕр инӕрдыгӕй уый хӕссы стыр зындзинӕдтӕ.

2. Афтӕ бирӕ информаци кӕй ис, уый цӕмӕй тӕссаг у?

² Иуӕй-иутӕ исты ног информаци райсыныл афтӕ фӕцахуыр сты, ӕмӕ дзы сӕ цӕст нал ӕфсӕды. Уый аххосӕй сӕ царды ахсджиагдӕр хъуыддӕгтӕ ферох вӕййынц. Иннӕтӕ та вазыгджын фарстаты тыххӕй райсынц ӕрмӕстдӕр иувӕрсыг зонындзинӕдтӕ ӕмӕ стӕй сӕхи афтӕ фӕдарынц, цыма уыдонӕй зондджындӕр нӕй. Уымӕ гӕсгӕ царды ахсджиагдӕр уынаффӕтӕ рахӕссынц, хъуыддаг дзӕбӕх нӕ бамбарынц, афтӕмӕй, ӕмӕ сӕхицӕн дӕр ӕрхӕссынц зиан ӕмӕ иннӕтӕн дӕр. Уый ӕддейӕ ма тӕссаг у, адӕймаг мӕнг кӕнӕ ӕнӕбындур информацийы ӕндӕвдады куы бахауа, уымӕй дӕр. Арӕх нӕ вӕййы сбӕлвырдгӕнӕн, къӕртайӕ калӕгау ныл цы информаци кӕлы, уый цас раст ӕмӕ ӕууӕнчы аккаг у, уый.

3. Цӕмӕй адӕймаджы зонды фӕдыл ма цӕуӕм, уый тыххӕй Библийы цавӕр фӕдзӕхстытӕ ис?

³ Адӕм рагӕй фӕстӕмӕ дӕр цымыдисгӕнаг сты. Суанг ма паддзах Соломоны рӕстӕджы дӕр тӕссаг уыд, ӕнӕпайда, ӕмӕ ма чи зоны зианхӕссӕг информаци агурыныл ӕгӕр бирӕ рӕстӕг хардз кӕнынӕй. Соломон загъта: «Дӕхи хиз: бирӕ чингуытӕ аразынӕн кӕрон нӕй, стӕй бирӕ кӕсын дӕр хорз нӕу буарӕн» (Екклесиаст 12:12). Уымӕй бирӕ ӕнусты фӕстӕ апостол Павел та фыста Тимофеймӕ: «Дӕ быгъдуан дын цы бакодтон, уый-иу хъахъхъӕн! Здах дӕхи ӕнахъаз дзӕгъӕл ныхӕстӕй ӕмӕ мӕнг зонды дзырдтӕгтӕй. Чидӕртӕ сӕ зӕрдӕ адӕттӕм раттой ӕмӕ уырниадӕй фӕиппӕрд сты» (1 Тимофеймӕ 6:20, 21, НФ). Ӕцӕгдӕр, абон чырыстӕтты сӕхи хизын хъӕуы зианхӕссӕг хъуыдытӕй.

4. Иегъовӕйыл ӕмӕ йӕ ахуырӕдтыл фидарӕй кӕй ӕууӕндӕм, уый куыд у нӕ бон равдисын?

⁴ Уый ӕддейӕ ма хорз уаид, Иегъовӕйы адӕм сӕ зӕрдыл куы дариккой, Фӕсномыг ныхӕсты 3:5, 6-ӕм стихты (НД) ныхӕстӕ: «Иегъовӕйыл ӕппӕт зӕрдӕйӕ ӕууӕнд, ӕмӕ дӕ зондӕй ныфсджын ма у. Алы хъуыддаджы дӕр ын агур йӕ разамынд ӕмӕ дын уый раст кӕндзӕн дӕ фӕндӕгтӕ». Иегъовӕйыл ӕууӕндын ма нысан кӕны, Хуыцауы Ныхасы ныхмӕ цы хъуыдытӕ сты, уыдон иуварс кӕнын дӕр, стӕй уыцы хъуыдытӕ нӕхицӕй цӕуой ӕви ӕндӕр искӕмӕй, уӕлдай нӕу. Цӕмӕй нӕ духовон ӕнӕниздзинад ма фӕцуда, уый тыххӕй мах хъуамӕ уӕм ӕмбаргӕ, уымӕн ӕмӕ уӕд нӕ бон уыдзӕн, зиан цы информаци хӕссы, уый ӕвзарын ӕмӕ дзы хи хизын (Дзуттытӕм 5:14). Ӕркӕсӕм, ахӕм информаци кӕцӕй цӕуы, уыцы мадзӕлттӕй цалдӕрмӕ.

Дуне ис Сайтаны къухы

5. Зианхӕссӕг хъуыдыты ратӕдзӕнтӕй иу цы у ӕмӕ кӕмӕй цӕуы?

⁵ Сайтаны дунейӕ афтӕ бирӕ зианхӕссӕг хъуыдытӕ цӕуы, ӕмӕ сын нымӕц дӕр нӕй  (1 Коринфӕгтӕм 3:19). Йесо Чырысти куывта йӕ ахуыргӕнинӕгты тыххӕй: «Нӕ кувын, цӕмӕй Ды акӕнай уыдоны дунейӕ, фӕлӕ сӕ цӕмӕй бахъахъхъӕнай фыддзинадӕй [«Фыдбылызӕй», НД]» (Иоанны 17:15). Йесо кӕй куырдта, цӕмӕй йӕ ахуыргӕнинӕгтӕ хызт уыдаиккой «Фыдбылызӕй», уымӕй бӕрӕг кӕны, Сайтан ацы дунейыл куыд тынг ӕндавы, уый. Чырыстӕттӕ кӕй систӕм, уый ууыл дзурӕг нӕу, ӕмӕ дунейы ӕвзӕр ӕндӕвдадӕй хызт уыдзыстӕм. Иоанн фыста: «Мах зонӕм, мах кӕй стӕм Хуыцауӕй, ӕмӕ ӕппӕт дуне кӕй ис фыддзинады [«Фыдбылызы къухы», НД]» (1 Иоанны 5:19). Ацы фӕстаг бонты фӕуды мах хъуамӕ ӕмбарӕм, Сайтан ӕмӕ йӕ хӕйрӕджытӕ дунейыл зианхӕссӕг информацийы зӕйтӕ уӕлдай тынгдӕр кӕй уадздзысты, уый.

6. Уый гӕнӕн куыд ис, ӕмӕ дунейы хиирхӕфсӕнтӕ адӕймаджы ӕнӕгъдаудзинадыл сахуыр кӕной?

⁶ Уӕдӕ уый дӕр хъуамӕ зонӕм, ӕмӕ зианхӕссӕг информаци хаттӕй-хатт ахӕм хуызы кӕй цӕудзӕн лӕвӕрд, цыма дзы бынтондӕр ӕвзӕрӕй ницы ис (2 Коринфӕгтӕм 11:14). Цӕвиттонӕн райсӕм, дунейы хиирхӕфсӕнтӕ: телералӕвӕрдтӕ, кинонывтӕ, музыкӕ ӕмӕ мыхуыры цы рацӕуы, уый. Бирӕтӕ сразы уыдзысты, фылдӕрӕй-фылдӕр кӕй кӕнынц, хӕлд хъуыддӕгтӕм — хӕтын, тыхми ӕмӕ наркотиктӕм — цы хиирхӕфсӕнтӕ разӕнгард кӕнынц, уыдон. Ахӕм цӕуылдӕртыл адӕймаг фыццаг хатт куы сӕмбӕлы, уӕд сӕ ӕнӕгъдаудзинадӕй арвыцӕфау фӕвӕййы. Фӕлӕ ма дыккаг-ӕртыккаг хатт дӕр куы баппары йӕхи ахӕм ӕндӕвдады, уӕд ӕм ӕвзӕр нал фӕкӕсынц, сахуыр сыл вӕййы. Макуы сразы уӕм ахӕм хъуыдыйыл, ома ӕвзӕр хъуыддӕгтӕм цы хиирхӕфсӕнтӕ разӕнгард кӕнынц, уыдон нын ницы зиан ӕрхӕсдзысты (Псалом 118:37).

7. Цавӕр зондджындзинады аххосӕй райдайы адӕймаг дызӕрдыг кӕнын Библийыл?

⁷ Ӕркӕсӕм, зианхӕссӕг информаци ма кӕцӕй цӕуы, уымӕ — Библийы дырысдзинад дызӕрдыггаг чи кӕны, ахӕм ахуыргӕндтӕ цы хъуыдытӕ мыхуыр кӕнынц, уыдонмӕ. (Абар Иаковы 3:15.) Ахӕм ӕрмӕг арӕх фӕзыны сӕйраг журналты ӕмӕ зындгонд чингуыты, ӕмӕ тӕссаг у, Библийыл дызӕрдыг кӕнын куы райдайӕм, уымӕй. Иуӕй-иутӕ тынг сӕрыстыр сты, сӕ ӕнӕкӕрон ӕнӕбындур зонадон хъуыдытӕй адӕмы цӕсты Хуыцауы Ныхасы тых кӕй лӕмӕгъдӕр кӕнынц, уымӕй. Уыцы хъуыддагӕй тас уыд апостолты рӕстӕджы дӕр. Уый бӕрӕг у апостол Павелы ныхӕстӕй: «Кӕсут ӕфсымӕртӕ, цӕмӕй уӕ мачи аздаха философийӕ ӕмӕ афтид сайдӕй, адӕймаджы рагон таурӕгътӕм гӕсгӕ, дунейы ӕгъдаумӕ гӕсгӕ, фӕлӕ Чырыстимӕ гӕсгӕ нӕ» (Колоссӕгтӕм 2:8).

Ӕцӕгады знӕгтӕ

8, 9. Аздӕхынад абон йӕхи куыд ӕвдисы?

⁸ Нӕ духовон ӕнӕниздзинадӕн ма тынг тӕссаг у, ӕцӕгады фӕндаг чи ныууагъта, уыдонӕй дӕр. Апостол Павел развӕлгъау загъта, зӕгъгӕ, чырыстӕтты ’хсӕн апарахат уыдзӕн аздӕхынад (Куыстытӕ 20:29, 30; 2 Фессалоникӕгтӕм 2:3). Ӕмӕ ӕцӕгдӕр, апостолты мӕлӕты фӕстӕ аздӕхынад афтӕ тынг апарахат, ӕмӕ дзы сырӕзт ӕгас чырыстон дуне. Абон Хуыцауы адӕмы ’хсӕн аздӕхынад афтӕ тынг парахат нӕу. Фӕлӕ уӕддӕр чидӕртӕ ацӕуы не ’хсӕнӕй, ӕмӕ сӕ иуӕй-иутӕ цъыф калынц Иегъовӕйы Ӕвдисӕнтыл, гӕдыныхӕстӕ ӕмӕ сзыгъуыммӕгонд информаци кӕй парахат кӕнынц, уымӕй. Иннӕтӕ та сиу сты, ӕцӕг кувынады ныхмӕ чи тох кӕны, ахӕм къордтимӕ. Афтӕ аразгӕйӕ уыдон слӕууынц, ӕцӕгады ныхмӕ ӕппӕты фыццаг чи рацыд, уый фарс, ома Сайтаны фарс.

⁹ Иегъовӕйы Ӕвдисӕнты тыххӕй ӕнӕраст информаци парахат кӕнынӕн аздӕхджытӕй иуӕй-иутӕ арӕх фӕпайда кӕнынц дзыллон бастдзинады фӕрӕзтӕй, уыимӕ Интернетӕй дӕр. Уымӕ гӕсгӕ сыгъдӕгзӕрдӕ адӕймӕгты нӕ уырнындзинӕдты тыххӕй базонын куы фӕфӕнды, уӕд гӕнӕн ис ӕнӕнхъӕлӕджы фӕхӕст уой, аздӕхджытӕ цы хъуыдытӕ хӕлиу кӕнынц, уыдоныл. Суанг ма Ӕвдисӕнтӕй дӕр иуӕй-иутӕ се ’нӕрхъуыдыйӕ бахаудысты ахӕм зианхӕссӕг информацийы ӕндӕвдады. Уый ӕддейӕ аздӕхджытӕ арӕх хайад фӕисынц теле- кӕнӕ радиоралӕвӕрдты. Цымӕ цы кӕнын хъӕуы ахӕм уавӕрты?

10. Аздӕхджытӕ цы хъуыдытӕ хӕлиу кӕнынц, уыдонмӕ нын хъуамӕ цавӕр ахаст уа?

¹⁰ Апостол Иоанн фӕдзӕхста чырыстӕттӕн, цӕмӕй аздӕхджыты сӕ хӕдзӕрттӕм ма уагътаиккой. Уый фыста: «Чи уӕм ӕрбацӕуы ӕмӕ ацы ахуырад нӕ ӕрбахӕссы, уый хӕдзармӕ ма уадзут ӕмӕ йын салам дӕр ма дӕттут; уымӕн  ӕмӕ уымӕн салам дӕттӕг уый ӕвзӕр хъуыддӕгтӕй хайджын свӕййы» (2 Иоанны 10, 11). Цӕмӕй не знӕгты зианхӕссӕг ӕндӕвдады ма бахауӕм, уый тыххӕй сӕ хъуамӕ алырдыгӕй дӕр нӕхи хизӕм. Ӕмӕ аздӕхӕг ахуырӕдтӕн дзыллон бастдзинады фӕрӕзты уылты нӕхиуыл ӕндавыны бар куы дӕттӕм, уӕд уый уыдзӕн, нӕ хӕдзармӕ аздӕхӕгӕн йӕхи куыд ӕрбахонӕм, афтӕ тӕссаг. Уыйас цымыдисгӕнаг хъуамӕ ма уӕм, ӕмӕ уый аххосӕй уыцы сӕфты фӕндагыл ацӕуӕм! (Фӕсномыг ныхӕстӕ 22:3).

Ӕмбырды

11, 12. a) I ӕнусы ӕмбырды зианхӕссӕг хъуыдытӕ кӕцӕй цыдысты? ӕ) Иуӕй-иу чырыстӕттӕ Хуыцауы ахуырӕдтыл, куыд ӕмбӕлы, афтӕ цӕуылнӕ хӕцыдысты?

¹¹ Зианхӕссӕг хъуыдытӕ ма цӕуынц ӕндӕр кӕцӕйдӕр дӕр. Кӕд иузӕрдион чырыстонӕн йӕ хъуыдыйы нӕй, раст цы нӕу, ууыл ахуыр кӕнын, уӕддӕр гӕнӕн ис, ӕмӕ ӕнӕрхъуыды ныхӕстӕ кӕнын фӕцахуыр уа (Фӕсномыг ныхӕстӕ 12:18). Не ’ппӕт дӕр ӕнӕххӕст кӕй стӕм, уымӕ гӕсгӕ хаттӕй-хатт фӕдзурӕм, цы не ’мбӕлы, уый (Фӕсномыг ныхӕстӕ 10:19; Иаковы 3:8). Ӕвӕццӕгӕн апостол Павелы рӕстӕджы дӕр чырыстон ӕмбырды уыдис, йе ’взаг уромын йӕ бон кӕмӕн нӕ уыд, ахӕм адӕймӕгтӕ, ӕмӕ-иу уый аххосӕй арӕх цавӕрдӕр ныхӕстыл карз быцӕу рауад (1 Тимофеймӕ 2:8, НД). Уыдис ма, йӕхи сӕрмагонд хъуыдытӕн ӕгӕр стыр нысаниуӕг чи лӕвӕрдта ӕмӕ ма суанг Павелы ном дзырддаг чи кодта, ахӕмтӕ дӕр (2 Коринфӕгтӕм 10:10—12). Ахӕм зондахаст кодта ӕнӕхъуаджы быцӕутӕм.

¹² Хаттӕй-хатт та-иу ахӕм дзырддаг ныхӕстӕ рахызтысты «карз хъаугъатӕм ницӕй тыххӕй» ӕмӕ уый аххосӕй хӕлд ӕмбырды сабырдзинад (1 Тимофеймӕ 6:5, НД; Галатӕгтӕм 5:15). Уыцы быцӕутӕ кӕй аххосӕй уыдысты, уыдоны тыххӕй Павел фыста: «Ӕндӕргомау чи амоны, ӕмӕ нӕ Хицау Йесо Чырыстийы зондджын дзырдты ӕмӕ Хуыцауы ӕфсармы ахуыры фӕдыл чи нӕ цӕуы, уый сӕрыстыр у, ницы зоны, дзырдтӕгты ӕмӕ дзӕгъӕлдзырды низ ыл бахӕцыд; адӕттӕй та гуыры хӕлӕг, хъӕлӕбатӕ, фыдкой, хинӕйдзаг зӕрдӕхсайд» (1 Тимофеймӕ 6:3, 4, НФ).

13. I ӕнусы чырыстӕттӕн сӕ фылдӕр сӕхи куыд дардтой?

¹³ Фӕлӕ уӕддӕр апостолты рӕстӕджы чырыстӕттӕн сӕ фылдӕр баззадысты иузӕрдионӕй ӕмӕ сӕйраджыдӕр хъуыды кодтой Хуыцауы Паддзахады тыххӕй хорз уацхъуыд хъусын кӕныныл. Уыдон сӕ рӕстӕг дзӕгъӕл быцӕутыл нӕ хардз кодтой, фӕлӕ «сидзӕртӕ ӕмӕ идӕдзтӕн» сӕ тыхст сахаты цӕстуарзонӕй ӕххуыс кодтой ӕмӕ сӕхи «хъахъхъӕдтой ацы дунейӕ счъизи уӕвынӕй» (Иаковы 1:27). Уыдон сӕхи дард ластой «ӕвзӕр ӕмбаладтӕй», суанг чырыстон ӕмбырды дӕр, ӕмӕ уый фӕрцы хъахъхъӕдтой сӕ духовон ӕнӕниздзинад (1 Коринфӕгтӕм 15:33; 2 Тимофеймӕ 2:20, 21).

14. Къӕрцхъус куы нӕ уӕм, уӕд куыд ис гӕнӕн, ӕмӕ ӕнӕзӕрдӕхудт ныхас зианхӕссӕг быцӕумӕ рахиза?

¹⁴ Абон Иегъовӕйы Ӕвдисӕнты ӕмбырдты арӕх не сты, 11-ӕм абзацы цӕй тыххӕй дзырдӕуы, ахӕм хъуыддӕгтӕ дӕр. Фӕлӕ уӕддӕр мах хъуамӕ ӕмбарӕм, ахӕм ӕнӕхъуаджы быцӕутӕй бынтон хызт кӕй не стӕм, уый. Кӕй зӕгъын ӕй хъӕуы, Библийы стихтыл кӕнӕ зӕрдӕвӕрд ног дунейы цард куыд уыдзӕн, уый тыххӕй цы нӕма зонӕм, уыдӕттыл ныхас кӕнын ӕвзӕр нӕу. Уӕдӕ, дӕхи сӕрмагонд хъуыддӕгтыл, зӕгъӕм дарӕс, ӕддаг бакаст кӕнӕ хиирхӕфсӕнтыл искӕимӕ куы ныхас кӕнай, уымӕй дӕр ӕвзӕр у, зӕгъгӕ, ничи зӕгъы. Фӕлӕ тыхдзырд куы кӕнӕм ӕмӕ иннӕтӕ немӕ куы нӕ разы кӕной, уӕд сӕм куы  хъыг кӕнӕм, уӕд тӕссаг у, ӕмбырд ницӕйаг фарстаты тыххӕй куы ныддихтӕ уа, уымӕй. Афтӕмӕй, ӕвзӕрӕй кӕм ницы ис, ахӕм ныхӕстӕ гӕнӕн ис хорзмӕ ма ӕркӕной.

Нӕ бӕрны нын цы бакодтой, уый хъахъхъӕнӕм

15. «Хӕйрӕджыты ахуырӕдтӕ» нӕ духовон ӕнӕниздзинадӕн цас тӕссаг сты ӕмӕ уый фӕдыл Фыстады цавӕр уынаффӕ ис?

¹⁵ Апостол Павел фӕдзӕхсы: «Фӕстаг афонты иутӕ... аздӕхдзысты уырнындзинадӕй, сайӕг удтӕм ӕмӕ хӕйрӕджыты ахуырӕдтӕм хъусгӕйӕ» (1 Тимофеймӕ 4:1). О, зианхӕссӕг ахуырӕдтӕ сты тынг тӕссаг. Уӕдӕ ӕмбӕрстгонд у, Павел йӕ зынаргъ ӕмбал Тимофейӕн цӕмӕн лӕгъстӕ кодта: «О Тимофей! Дӕ быгъдуан дын цы бакодтон, уый-иу хъахъхъӕн! Здах дӕхи ӕнахъаз дзӕгъӕл ныхӕстӕй ӕмӕ мӕнг зонды дзырдтӕгтӕй. Чидӕртӕ сӕ зӕрдӕ адӕттӕм раттой ӕмӕ уырниадӕй фӕиппӕрд сты» (1 Тимофеймӕ 6:20, 21, НФ).

16, 17. Хуыцау нын нӕ бӕрны цы бакодта ӕмӕ йӕ куыд хъуамӕ хъахъхъӕнӕм?

¹⁶ Куыд у нӕ бон уыцы уарзӕгой уынаффӕйӕ абон спайда кӕнын? Тимофейӕн йӕ бӕрны уыд тынг зынаргъ хӕзна, уый йыл хъуамӕ аудыдтаид ӕмӕ йӕ хъахъхъӕдтаид. Цы уыд уыцы хӕзна? Павел ӕмбарын кӕны: «Хӕц раст ахуырады хуызӕгыл, кӕцы ды фехъуыстай мӕнӕй, уырнындзинад ӕмӕ уарзондзинадимӕ Йесо Чырыстийы мидӕг. Хъахъхъӕн дӕ бӕрныгонд зынаргъ хӕзна, нӕ мидзӕрдӕйы чи цӕры, уыцы Сыгъдӕг Удӕй» (2 Тимофеймӕ 1:13, 14, НФ). О, Тимофейы бӕрны цы уыд, уымӕ хауд «раст ахуырад», «Хуыцауы ӕфсармы ахуырад» (1 Тимофеймӕ 6:3, НФ). Уымӕ гӕсгӕ абоны чырыстӕттӕ дӕр хъахъхъӕнынц сӕ уырнындзинад ӕмӕ тох кӕнынц, Хуыцау сын сӕ бӕрны цы ӕцӕгад бакодта, уый сӕрыл.

¹⁷ Цӕмӕй нӕ бӕрны цы ис, уый хъахъхъӕнӕм, уый тыххӕй нӕхи хъуамӕ сахуыр кӕнӕм Библи лӕмбынӕг ахуыр кӕнын, ӕдзухдӕр кувын ӕмӕ «алкӕмӕн дӕр, уӕлдайдӕр та нӕхионтӕн, уырнындзинады иу кӕимӕ стӕм», уыдонӕн хорздзинад кӕнын (Галатӕгтӕм 6:10; Ромӕгтӕм 12:11—17). Дарддӕр Павел дӕтты ахӕм уынаффӕ: «Ӕнтыстджын у рӕстдзинады, хорз намысы, уырнындзинады, уарзондзинады, фӕразондзинады, фӕлмасдзинады; архай уырнындзинады хорз скуыхтӕй [«хъӕбатырӕй тох кӕн уырнындзинадыл», НД], хӕц [«фидар хӕц», НД] мыггагмӕйы цардыл, кӕцымӕ ды хуынд дӕр дӕ ӕмӕ хорз ӕргомзӕрдӕ ныхас раттай бирӕ ӕвдисӕнты раз» (1 Тимофеймӕ 6:11, 12). Павел ахӕм ныхӕстӕй кӕй пайда кӕны, зӕгъгӕ, «хъӕбатырӕй тох кӕн» ӕмӕ «фидар хӕц», уый ирдӕй ӕвдисы, нӕ духовон ӕнӕниздзинад зианхӕссӕг ӕндӕвдадӕй ӕппӕт тыхтӕй ӕмӕ зӕрдиагӕй кӕй хъуамӕ хъахъхъӕнӕм.

Хъӕуы ӕмбаргӕдзинад

18. Дунейы информацийӕ пайдагӕнгӕйӕ нӕ ӕмбарӕгдзинад цӕмӕн хъӕуы?

¹⁸ Цӕмӕй нӕ уырнындзинадыл хъӕбатырӕй тох кӕнӕм, уый тыххӕй нӕ ӕнӕмӕнг хъӕуы ӕмбаргӕдзинад (Фӕсномыг ныхӕстӕ 2:11; Филиппӕгтӕм 1:9, НД). Зӕгъӕм, раст нӕ уаид  афтӕ хъуыды кӕнын, зӕгъгӕ, дунейӕ цы информаци цӕуы, уый иууылдӕр ӕвзӕр у ӕмӕ йыл бынтондӕр нӕй ӕууӕндӕн (Филиппӕгтӕм 4:5, НД; Иаковы 3:17, НД). Адӕмы хъуыдытӕ иууыл не сты Хуыцауы Ныхасы ныхмӕ. Зӕгъӕм, Йесойы ныхӕстӕй бӕрӕг у, рынчынты дӕсны дохтыр кӕй хъӕуы, уый кӕй ӕмбӕрста; ӕмӕ уыцы дӕсныйадыл та адӕймаг дунейы сахуыр вӕййы (Лукайы 5:31). Кӕд Йесойы рӕстӕджы медицинӕ абоны хуызӕн размӕцыд нӕ уыд, уӕддӕр уый зыдта, дохтырӕн йӕ бон кӕй у баххуыс кӕнын. Абоны чырыстӕттӕ дӕр дунейы информацийыл бынтон нӕ исынц сӕ къух, фӕлӕ сӕхи хизынц, сӕ духовон ӕнӕниздзинадӕн тӕссаг кӕмӕй у, ахӕм информацийӕ.

19, 20. а) Ӕнӕрхъуыды ныхӕстӕ чи кӕны, уыдонӕн ӕххуысгӕнгӕйӕ, хистӕр нӕлгоймӕгтӕ ӕмбаргӕдзинад куыд хъуамӕ равдисой? ӕ) Цалдӕр фӕдзӕхсты фӕстӕ дӕр ма мӕнг ахуырӕдтӕ чи фӕпарахат кӕны, уыдоны тыххӕй ӕмбырд цы уынаффӕ рахӕссы?

¹⁹ Ӕмбаргӕдзинад тынг ӕхсызгонӕй хъӕуы хистӕр ӕфсымӕрты дӕр, ӕнӕрхъуыды ныхӕстӕ чи кӕны, уымӕн баххуыс кӕнын сӕ куы фӕхъӕуы, уӕд (2 Тимофеймӕ 2:7). Хаттӕй-хатт ӕмбырды уӕнгты ’хсӕн рауайы быцӕу ницӕйаг хъуыддӕгтӕ кӕнӕ бӕлвырд цы нӕу, ахӕм фарстатыл. Цӕмӕй ӕмбырд ма ныддихтӕ уа, уый тыххӕй хистӕр ӕфсымӕртӕ ахӕм фарстатӕ хъуамӕ лыг кӕной ӕвӕстиатӕй. Фӕлӕ уыимӕ сӕхи хъуамӕ хизой ӕфсымӕртӕй ӕвзӕр хъуыды кӕнынӕй ӕмӕ сыл уайтагъд аздӕхджыты гакк хъуамӕ ма ӕвӕрой.

²⁰ Уыцы адӕймӕгтӕн цавӕр зӕрдӕйыуагимӕ хъӕуы ӕххуыс кӕнын, уый Павел равдыста ахӕм ныхӕстӕй: «Ӕфсымӕртӕ! кӕд адӕймаг бахауы исты тӕригъӕды, сымах, удонтӕ [«духовон ӕгъдауӕй фӕлтӕрд чи у, уыдон», НД] ахӕмы раст кӕнут фӕлмас удӕй» (Галатӕгтӕм 6:1). Дызӕрдыгдзинӕдты цы чырыстӕттӕ бахаудысты, сӕрмагондӕй уыдоны тыххӕй Иудӕ фыста: «Дызӕрдыгдзинӕдты чи ис, уыдонмӕ дарддӕр дӕр ут фӕлмӕнзӕрдӕ; ирвӕзын сӕ кӕнут, арты дзыхӕй сӕ скъӕфгӕйӕ» (Иудӕйы 22, 23, НД). Фӕлӕ адӕймаг цалдӕр хатт куы ’рцӕуа фӕдзӕхст, ӕмӕ уӕддӕр мӕнг ахуырӕдтӕ куы парахат кӕна, уӕд ӕмбырд бахъахъхъӕныны сӕраппонд хистӕр нӕлгоймӕгты бахъӕудзӕн уыцы адӕймаджы тыххӕй фарст цӕхгӕр ӕрӕвӕрын (1 Тимофеймӕ 1:20; Титмӕ 3:10, 11).

Хорз цы у, ууыл хъуыды кӕнӕм

21, 22. Кӕм нӕ хъӕуы ӕмбаргӕдзинад ӕмӕ цӕуыл хъуамӕ хъуыды кӕнӕм?

²¹ Чырыстон ӕмбырды уӕнгтӕ сӕхи хизынц, «ракау» чи хӕлиу кӕны, ахӕм зианхӕссӕг ныхӕстӕй (2 Тимофеймӕ 2:16, 17; Титмӕ 3:9). Бӕлвырддӕр зӕгъгӕйӕ та дунейы зыгъуыммӕ «зондӕй», аздӕхджытӕ цы хъуыдытӕ хӕлиу кӕнынц, уыдонӕй ӕмӕ ӕмбырды мидӕг ӕнӕрхъуыды ныхӕстӕй. Адӕймаджы ногӕй исты базонын куы фӕнда, уый хорз у, фӕлӕ ӕгӕр цымыдисгӕнаг куы уа, уӕд тӕссаг у, зианхӕссӕг хъуыдыты ахӕсты куы бахауа, уымӕй. Сайтаны фӕндтӕ нын ӕнӕзонгӕ не сты (2 Коринфӕгтӕм 2:11). Мах зонӕм, йӕ тых йӕ бонӕй кӕй архайы, цӕмӕй нӕ истӕмӕй йӕ фӕдыл асайа ӕмӕ Хуыцауӕн зӕрдиагӕй мауал лӕггад кӕнӕм.

²² Цӕй уӕдӕ, куыд хорз кусджытӕ, афтӕ фидар хӕцӕм Хуыцауы ахуырадыл (1 Тимофеймӕ 4:6). Раст пайда кӕнӕм нӕ рӕстӕгӕй ӕмӕ цы информацийыл ӕмбӕлӕм, уый зондджынӕй ӕвзарӕм. Ӕмӕ нӕ уӕд, Сайтан цы хъуыдытӕ хӕлиу кӕны, уыдон раст фӕндагӕй никуы фӕиппӕрд кӕндзысты. Цӕй уӕдӕ, «цы у ӕрмӕст ӕцӕг, цы у намысджын, цы у рӕстдзинад, цы у сыгъдӕг, цы у ӕгъдауджын, цы у кады аккаг, цы у ӕрмӕст хорз миниуӕг ӕмӕ ӕппӕлинаг», ууыл хъуыды кӕнӕм. Кӕд нӕ зонд ӕмӕ нӕ зӕрдӕйы ӕрмӕстдӕр ахӕм хъуыдытӕн уа бынат, уӕд фарны Хуыцау кӕддӕриддӕр уыдзӕн немӕ (Филиппӕгтӕм 4:8, 9).

Цы базыдтам?

• Дунейы зондджындзинад нӕ духовон ӕнӕниздзинадӕн тӕссаг цы хуызы у?

• Аздӕхджыты зианхӕссӕг информацийӕ нӕ бон куыд у нӕхи бахизын?

• Ӕмбырды уӕнгтӕ сӕхи цавӕр ныхӕстӕй хъуамӕ хизой?

• Абон афтӕ бирӕ информаци кӕй ис, уымӕ гӕсгӕ чырыстӕттӕн сӕ бон куыд у ӕмбаргӕдзинад равдисын?

[Фарстатӕ ахуыр кӕнынӕн]

[Ныв 25 фарсыл]

Бирӕ зындгонд журналтӕ ӕмӕ чингуытӕ сты нӕ чырыстон намысы ныхмӕ.

[Ныв 26 фарсыл]

Чырыстӕттӕн сӕ бон у сӕ хъуыдытӕ кӕрӕдзийӕн дзурын, ӕрмӕст тыхдзырд хъуамӕ ма кӕной.