Кад кӕн, кӕй дӕлбар дӕ, уыдонӕн
Кад кӕн, кӕй дӕлбар дӕ, уыдонӕн
«Кад кӕнут ӕппӕтӕн дӕр, ӕфсымӕрдзинад уарзут, Хуыцауӕй тӕрсут, паддзахы нымайут» (1 ПЕТРЫ 2:17).
1, 2. Абон адӕмӕн цавӕр ахаст ис хицӕуттӕм, хистӕртӕм ӕмӕ цӕмӕн?
«СЫВӔЛЛӔТТЫ цы фӕнды, уый кӕнынц. Сӕ ныййарджыты та хъуыды дӕр нӕ кӕнынц»,— хъаст кӕны иу мад. «Мацӕмӕ дар хицауады»,— ахӕм ныхӕстӕ ис ныхӕст иу машинӕйы бамперыл. Мах ӕрхастам ӕрмӕстдӕр дыууӕ цӕвиттоны, фӕлӕ уыдон дӕр, куыд зоныс, афтӕмӕй иттӕг хорз ӕвдисынц абоны уавӕр. Ӕгас дунейы адӕм ницӕмӕ дарынц ныййарджыты, ахуыргӕнджыты, хицӕутты ӕмӕ ма суанг хицауады бӕрнон кусджыты дӕр.
2 Чи зоны исчи зӕгъа: «Уӕдӕ ӕндӕр куыд хъуамӕ уа, кӕд ӕмӕ хицӕуттӕ уый аккаг не сты, цӕмӕй сын кад кӕнон». Ӕмӕ ӕцӕгдӕр, уыцы хъуыдыйы ныхмӕ исты зӕгъын ӕнцон нӕ вӕййы. Арӕх фехъусӕм, хицауады бӕрнон кусджытӕ уӕййаг кӕй сты, куыстуӕтты хицӕуттӕ ӕфсис кӕй нӕ зонынц, ахуыргӕнджытӕ сӕ куыстӕн кӕй ницы ӕмбарынц ӕмӕ ныййарджытӕ сӕ сывӕллӕтты хъомыл кӕнын кӕй нӕ зонынц, уый тыххӕй. Фӕлӕ махӕн ӕхсызгон у, чырыстӕттӕн сӕ фылдӕр ахӕм ахаст кӕй нӕ дарынц, ӕмбырды бартӕ кӕмӕн ис лӕвӕрд, уыцы нӕлгоймӕгтӕм (Матфейы 24:45—47).
3, 4. Чырыстӕтты хицӕуттӕн кад кӕнын цӕмӕн хъӕуы?
3 Чырыстӕттӕ кӕй стӕм, уымӕ гӕсгӕ нӕ кад кӕнын хъӕуы дунейы хицӕуттӕн. Апостол Павел ӕрсидт чырыстӕттӕм, зӕгъгӕ, ут «коммӕгӕс уӕлдӕр хицауадӕн; уымӕн ӕмӕ Хуыцауӕй чи нӕу, ахӕм хицауад нӕй, цы хицӕуттӕ ис, уыдон та Хуыцауӕй ӕвӕрд сты» (Ромӕгтӕм 13:1, 2, 5; 1 Петры 2:13—15). Уый ӕддейӕ Павел равдыста, хӕдзары хистӕры коммӕ кӕсын ахсджиаг цӕмӕн у, уый дӕр: «Устытӕ, уӕ лӕгты коммӕ кӕсут, аив куыд у Хицауы мидӕг, афтӕ. Сывӕллӕттӕ, коммӕгӕс ут уӕ ныййарджытӕн алцӕмӕй дӕр, уымӕн ӕмӕ уый у Хицауӕн хорз фӕндон» (Колоссӕгтӕм 3:18, 20). Ӕмбырды хистӕр нӕлгоймӕгтӕн уый тыххӕй хъуамӕ кад кӕнӕм, ӕмӕ сӕ «Сыгъдӕг Уд... сӕвӕрдта хъахъхъӕнджытӕй, хизын Хицау Хуыцауы Аргъуан» (Куыстытӕ 20:28). Иегъовӕйы ӕфсӕрмӕй кад кӕнӕм зӕххон хицӕуттӕн. Иегъовӕйӕн кад кӕнын та нын алыхатт дӕр иууыл ахсджиагдӕр у (Куыстытӕ 5:29).
4 Ӕппӕт бартӕ дӕр Иегъовӕйы къухы кӕй сты, уый нӕ зӕрдыл даргӕйӕ, ӕркӕсӕм, бартӕ кӕмӕн уыд лӕвӕрд, уыдонӕн чи нӕ кад кодта, ӕмӕ сын чи кад кодта, ахӕм адӕймӕгты дӕнцӕгтӕм.
Чи нӕ кад кӕны, уый исы фыдӕх
5. Мелхолӕ Давидӕн кӕй нӕ кад кодта, уый куыд равдыста, ӕмӕ йыл уый тыххӕй цы ’рцыд?
5 Паддзах Давиды цард нын ирдӕй ӕвдисы, Хуыцауӕй нысангонд хицӕуттӕн чи нӕ аргъ кӕны, уыдонмӕ Иегъовӕ цы цӕстӕй кӕсы, уый. Давиды бардзырдмӕ гӕсгӕ фӕдзӕхсты ковчег Иерусалиммӕ куы ’рбахастой, уӕд йӕ ус Мелхолӕ «паддзах Давиды федта Иегъовӕйы раз гӕппытӕгӕнгӕ ӕмӕ кафгӕ; ӕмӕ йыл йӕ зӕрдӕ фӕхудт». Мелхолӕ Давидӕн хъуамӕ кад кодтаид, бинонты хистӕр кӕй уыд, ӕрмӕст уый тыххӕй нӕ, фӕлӕ ма ӕгас бӕстӕйы паддзах кӕй уыд, уый тыххӕй дӕр. Мелхолӕ та йӕ зӕрдӕйы цы уыд, уый скалдта йӕ ӕлхыскъ ныхӕстӕй: «Куыд фесгуыхт, ӕвӕдза, абон Израилы паддзах, йӕ фӕсдзӕуин нӕлгоймӕгтӕ ӕмӕ сылгоймӕгты раз йӕхи ӕдылыйау кӕй ныббӕгънӕг кодта, уымӕй!» Мелхолайӕн йӕ сӕрыхицаумӕ ахӕм ахаст кӕй уыд, уый тыххӕй йын зӕнӕг никуы рацыд (2 Паддзахӕдты 6:14—23).
6. Цавӕр ахаст уыд Иегъовӕйӕн, Корей ын Йӕ сӕрстытӕн кӕй не скад кодта, уымӕ?
6 Хуыцауы нысангонд теократон разамындӕн бынтондӕр чи нӕ аргъ кодта, уыдонӕй иу уыд Корей. Уый уыд Каафӕйы фырттӕй ӕмӕ Иегъовӕйӕн лӕггад кодта скинийы раз. Ахъуыды ма кӕн, цы кадджын хӕслӕвӕрд ын уыд! Фӕлӕ уый хъӕндзинӕдтӕ агурын райдыдта Хуыцауы сӕрстытӕм, израилӕгты фӕтӕгтӕм. Уый Израилы адӕмы хистӕртимӕ иумӕ рацыд Моисей ӕмӕ Аароны ныхмӕ: «Ацы адӕм иууылдӕр сыгъдӕг сты ӕмӕ Иегъовӕ се ’хсӕн ис. Уӕдӕ ма уӕд сымах уӕхи Иегъовӕйы ӕмбырдӕй уӕлдӕр цӕмӕн ӕвӕрут?» Цы цӕстӕй ракаст Иегъовӕ Корей ӕмӕ йӕ хъузӕттӕм? Иегъовӕ уыцы хъуыддаг банымадта, раст цыма йӕхи ныхмӕ растадысты, афтӕ. Сӕ фарс чи уыд, уыдон иууылдӕр зӕххы скъуыды куы аирвӕзтысты, уый фӕстӕ Корей ӕмӕ уыцы 250 хистӕры басыгъдысты, Иегъовӕйӕ цы зынг ӕрцыд, уымӕй (Нымӕцтӕ 16:1—3, 28—35).
7. «Уӕлдӕр „апостолтӕ“» Павелы кӕй фаудтой, уымӕн исты бындур уыдис?
7 Н.э. I ӕнусы чырыстон ӕмбырды дӕр уыдис, теократон разамындӕн чи нӕ кад кодта, ахӕмтӕ. Зӕгъӕм, Коринфы ӕмбырды «уӕлдӕр „апостолтӕ“» нӕ нымадтой Павелы. Йӕ фыдкой кодтой, зӕгъгӕ, дзырдарӕхст нӕу. Уыдон дзырдтой: «Лӕгӕй-лӕгмӕ... ӕдых у, ӕмӕ йӕ ныхас дӕр ницӕйаг у» (2 Коринфӕгтӕм 10:10, НФ; 11:5). Павел бынтондӕр куы нӕ арӕхстаид дзурынмӕ, уӕддӕр апостол кӕй уыд, уымӕ гӕсгӕ уыд кады аккаг. Фӕлӕ цымӕ йӕ ныхас ӕцӕгдӕр уыд «ницӕйаг»? Йӕ раныхӕстӕй Библийы фыст чи ӕрцыд, уыдонӕй бӕрӕг у, йӕ ныхасы стыр тых кӕй уыд, уый. Иухатт Павел ӕвдисӕнад лӕвӕрдта Ирод Агриппӕ II-ӕн, «Иудеӕгтӕн сӕ алы... дзырддӕгтӕ» чи зыдта (НФ), уымӕн. Ӕмӕ иу цасдӕр куы аныхас кодтой, уӕд паддзах басаст: «Иу гыццыл ма ӕмӕ ды сразы кӕндзынӕ мӕн Чырыстон суӕвыныл»! (Куыстытӕ 13:15—43; 17:22—34; 26:1—28). Фӕлӕ йӕ уӕддӕр Коринфы «уӕлдӕр „апостолтӕ“» фаудтой, зӕгъгӕ, дзурын нӕ зоны! Цымӕ сӕм цы цӕстӕй ракаст Иегъовӕ? Йесо Чырысти Ефесы ӕмбырды цӕстдарджытӕм цы фыстӕг арвыста, уым раппӕлыд, «сӕхи Апостолтӕ чи хоны, фӕлӕ ахӕмтӕ [чи] не сты», уыдоны фӕдыл чи нӕ ацыд, уыцы адӕймӕгтӕй (Раргомад 2:2).
Кӕд ӕнӕххӕст сты, уӕддӕр сын ӕмбӕлы кад кӕнын
8. Куыд равдыста Давид, Иегъовӕ Саулы цы бынаты сӕвӕрдта, уымӕн кӕй аргъ кодта, уый?
8 Суанг ма йӕ бартӕй раст чи нӕ пайда кодта, уыдонӕн дӕр чи кад кодта, ахӕм дӕнцӕгтӕ бирӕ ис Библийы. Уыцы диссаджы дӕнцӕгтӕй иу уыд Давид. Кӕй дӕлбар уыд, уыцы паддзах Саул ӕм хӕлӕг кӕнын райдыдта, йӕ къухы стыр уӕлахизтӕ кӕй ӕфтыд, уый тыххӕй ӕмӕ йӕ марынмӕ хъавыд (1 Паддзахӕдты 18:8—12; 19:9—11; 23:26). Давидӕн цалдӕр хатты уыд Саулы амарыны фадат, фӕлӕ уый загъта: «Иегъовӕйы зӕрдӕмӕ чи нӕ цӕуы, ахӕм хъуыддаг ӕз нӕ бакӕндзынӕн, Иегъовӕйы сӕрстмӕ мӕ къух нӕ сисдзынӕн» (1 Паддзахӕдты 24:3—6; 26:7—13). Саул раст кӕй нӕ уыд, уый Давид зыдта, фӕлӕ йыл йӕхӕдӕг не стӕрхон кодта, Иегъовӕйы бар ӕй бакодта (1 Паддзахӕдты 24:12, 15; 26:22—24). Уый Саулӕй ӕвзӕр никуы загъта, йӕ фыдкой никуы ракодта.
9. а) Куыд хатыд йӕхи Давид, Саул йӕ фӕдыл куы зылд, уӕд? ӕ) Давид Саулӕн ӕцӕгӕй кӕй кад кодта, уый цӕмӕй бӕрӕг у?
9 Цымӕ ахӕм уавӕры Давидӕн зын нӕ уыд? «Тыхджынтӕ агурынц мӕ уды»,— дзынӕзта Давид Иегъовӕмӕ кувгӕйӕ (Псалом 53:5). Уый Иегъовӕйӕн дзырдта йӕ зӕрдӕйы рис: «Фервӕзын кӕн мӕн ме знӕгтӕй, мӕ Хуыцау... ӕмбырд кӕнынц мӕныл тыхджынтӕ, мӕ фыдракӕнд ӕмӕ мӕ тӕригъӕды тыххӕй нӕ, Хицау. Ӕнаххос уӕвгӕйӕ мыл ӕмбырд кӕнынц ӕмӕ хӕстифтонг кӕнынц; ӕрбалӕуу мӕнӕн баххуысмӕ, ӕмӕ ӕркӕс» (Псалом 58:2—5). Искуы ды дӕр уыдтӕ ахӕм уавӕры: бартӕ кӕй къухы ис, ахӕм адӕймагӕн ӕвзӕрӕй ницы сарӕзтай, афтӕмӕй дӕ ӕфхӕры? Давид Саулӕн уӕддӕр кад кодта. Саул куы амард, уӕд Давид цин нӕ кодта, фӕлӕ хъарджытӕ: «Саул ӕмӕ Ионафан, сӕ удӕгасӕй уыдысты уарзон ӕмӕ кадджын... Цӕргӕстӕй уыдысты цӕрдӕгдӕр, домбӕйттӕй — тыхджындӕр. Израилы чызджытӕ, марой кӕнут Саулыл» (2 Паддзахӕдты 1:23, 24). Диссаджы дӕнцӕг! Кӕд Давиды Саул ӕфхӕрдта, уӕддӕр Иегъовӕйы сӕрст кӕй уыд, уый тыххӕй йын ӕцӕгӕй кад кодта.
10. Хуыцауӕй нысангонд разамонӕг советӕн кад кӕныны хъуыддаджы нын Павел цавӕр хорз дӕнцӕг равдыста ӕмӕ ахӕм ахастӕн йӕ фӕстиуӕг цы уыд?
10 Чырыстон дуджы дӕр бирӕ уыд, Хуыцауы нысангонд разамонджытӕн чи кад кодта, ахӕм адӕймӕгтӕ. Цӕвиттонӕн райсӕм Павелы. Уый аргъ кодта, фыццаг ӕнусы чырыстон ӕмбырды разамонӕг советы уынаффӕтӕн. Павел Иерусалимы фӕстаг хатт куы уыд, уӕд ын разамонӕг совет бауынаффӕ кодта, зӕгъгӕ, ӕгъдаумӕ гӕсгӕ дӕхи ссыгъдӕг кӕн, цӕмӕй адӕм феной, Моисейы закъонӕн кӕй аргъ кӕныс, уый. Павелӕн йӕ бон уыд ахъуыды кӕнын: «Раздӕр мын мӕлӕтӕй тас куы уыд, уӕд мӕ ацы ӕфсымӕртӕ Иерусалимӕй ӕрвитгӕ акодтой. Ныр та сӕ фӕнды, цӕмӕй адӕмӕн равдисон, Моисейы Закъонӕн кӕй аргъ кӕнын, уый. Афтӕмӕй та галатӕгтӕм мӕхӕдӕг фысгӕ ныккодтон, зӕгъгӕ, Закъон ӕххӕст кӕнын нал хъӕуы. Ныр ӕз кувӕндонмӕ куы бацӕуон, уӕд мӕ адӕм раст нӕ бамбардзысты, зӕгъдзысты, сунӕт чи у, уыдонимӕ сусӕгӕй бадзырдта, зӕгъгӕ». Фӕлӕ Павел афтӕ нӕ хъуыды кодта. Уыцы уавӕры чырыстон принципты сӕрты кӕй нӕ хызт, уымӕ гӕсгӕ фыццаг ӕнусы разамонӕг советы уӕнгтӕм байхъуыста, ӕмӕ уымӕй равдыста, сӕ уынаффӕйӕн сын кӕй аргъ кодта, уый. Иудейтӕ уый куы федтой, уӕд Павелмӕ афтӕ тынг смӕсты сты, ӕмӕ ма сын ӕй сӕ къухтӕй тыхӕй байстой. Уый фӕстӕ дыууӕ азы арвыста ахӕстоны. Фӕлӕ ӕппынфӕстаг сӕххӕст Хуыцауы фӕндон. Павел ӕвдисӕнад радта Кесарийы хицӕутты раз, уый фӕстӕ йӕ хицауады хардзӕй фӕхӕццӕ кодтой Роммӕ ӕмӕ уым та ӕвдисӕн лӕууыд кесарӕн йӕхи раз (Куыстытӕ 9:26—30; 21:20—26; 23:11; 24:27; Галатӕгтӕм 2:12; 4:9, 10).
Ды кад кӕныс?
11. Куыд у нӕ бон дунейы хицауадӕн кад кӕнын?
11 Хицауадӕн куыд ӕмбӕлы, афтӕ кад кӕныс? Чырыстӕттӕн лӕвӕрд у ахӕм бардзырд: «Алкӕмӕн дӕр дӕттут цы ӕмбӕлы: ...кӕмӕн намыс, намыс [«кӕмӕн кад — кад», НФ]». «Уӕлдӕр хицауадӕн» ӕрмӕст уымӕй нӕ кад кӕнӕм, ӕмӕ хъалонтӕ фидӕм, фӕлӕ нӕ уагахаст ӕмӕ нӕ ныхасӕй дӕр (Ромӕгтӕм 13:1—7). Ӕмӕ нӕм хицауады кусджытӕ ӕвзӕр цӕстӕй куы кӕсой, уӕд та? Мексикӕйы, штат Чьяпасы иу хъӕуы хицауад Иегъовӕйы Ӕвдисӕнтӕй 57 бинонтӕн байста сӕ хуымзӕххытӕ, уыцы чырыстӕттӕ дины бӕрӕгбӕтты хайад кӕй нӕ истой, уый тыххӕй. Ацы фарста алыг кӕныны фӕдыл цы фембӕлдтӕ ӕрцыд уагъд, уырдӕм-иу Ӕвдисӕнтӕ ӕрбацыдысты сыгъдӕг ӕмӕ аив уӕлӕдарӕсы, алкӕимӕ дӕр ныхас кодтой уӕзданӕй ӕмӕ сабырӕй. Иу азы фӕстӕ хъуыддаг ахицӕн сӕ пайдайӕн ӕмӕ сын адӕмӕй чидӕртӕ афтӕ тынг райдыдтой кад кӕнын, ӕмӕ сӕхи дӕр бафӕндыд Иегъовӕйы Ӕвдисӕнтӕ суӕвын!
12. Цӕмӕн афтӕ ахсджиаг у ӕнӕуырнӕг лӕгӕн «цыт кӕнын»?
12 Хуыцау бинонты ’хсӕн цы фӕтк сӕвӕрдта, уымӕн та куыд у нӕ бон кад кӕнын? Йесо, фыддзинӕдтӕ ӕвзаргӕйӕ, йӕхи куыд дардта, уый тыххӕй ӕрдзургӕйӕ, дарддӕр апостол Петр загъта: «Афтӕ сымах дӕр устытӕ, коммӕ кӕсут уӕ лӕгтӕн, цӕмӕй уыдонӕй исчитӕ, кӕцытӕ коммӕ нӕ кӕсынц дзырдӕн, сӕ устыты цардӕй ӕнӕдзырдӕй басӕттой, куы феной уӕ сыгъдӕг хуыцауы тасы мидӕг цард [«уӕ хорз уагахаст ӕмӕ сын стыр кад кӕй кӕнут, уый», НД], уӕд» (1 Петры 3:1, 2; Ефесӕгтӕм 5:22—24). Петр банысан кодта, куыд ахсджиаг у, цӕмӕй ус йӕ лӕгӕн уисӕн кӕна «стыр кадимӕ», кӕд иуӕй-иу лӕгтӕ уый аккаг не сты, уӕддӕр. Ӕнӕуырнӕг лӕг, йӕ ус ын кӕй цыт кӕны, уый куы уына, уӕд, гӕнӕн ис, йӕ зӕрдӕ ӕрфӕлмӕн уа.
13. Устытӕн сӕ бон куыд у сӕ сӕрыхицӕуттӕн кад кӕнын?
13 Дарддӕр Петр дзуры Саррӕйы тыххӕй. Уымӕн йӕ сӕрыхицау Авраам уыд уырнындзинады диссаджы дӕнцӕг (1 Петры 3:6, НФ; Ромӕгтӕм 4:16, 17; Галатӕгтӕм 3:6—9). Цымӕ ӕнӕуырнӕг лӕгтӕй чырыстон лӕгтӕ къаддӕр кады аккаг сты? Дӕ лӕгимӕ цыдӕр хъуыддаджы разы куы нӕ уай, уӕд куыд бакӕндзынӕ? Йесо радта иу уынаффӕ, ӕмӕ дзы спайдагӕнӕн ис ацы уавӕры дӕр. Уый загъта: «Тыххӕй [дӕ] чи акӕна йемӕ иу бонцау, уыимӕ дыууӕ бонцауы дӕр ацу» (Матфейы 5:41, НФ). Дӕ сӕрыхицауы зӕрдӕмӕ цы цӕуы, уый аразыс, ӕмӕ йын уымӕй цыт кӕныс? Кӕд дын зын у афтӕ аразын, уӕд йемӕ аныхас кӕн уый тыххӕй. Афтӕ ма хъуыды кӕн, зӕгъгӕ, мӕ зӕрдӕйы уаг мын йӕхӕдӕг зоны, цы ма йын ӕй дзурон. Ӕрмӕст цы зӕгъинаг дӕ, уый дзур сабырӕй. Библи нын амоны: «Уӕ ныхас ӕдзухдӕр уӕд арфӕдзинадимӕ, цӕххӕй хъацӕнгонд, цӕмӕй сымах зонат куыд хъӕуы алкӕмӕн дӕр дзуапп дӕттын» (Колоссӕгтӕм 4:6).
14. Цы нысан кӕны ныййарджытӕн кад кӕнын?
14 Цы зӕгъӕн ис сывӕллӕтты тыххӕй та? Хуыцауы Ныхас зӕгъы: «Сывӕллӕттӕ, коммӕ кӕсут уӕ ныййарджытӕн Хицауы мидӕг, уымӕн ӕмӕ афтӕ домы рӕстдзинад. „Кад кӕн дӕ мад ӕмӕ дӕ фыдӕн“, уый — фыццаг фӕдзӕхст зӕрдӕвӕрдимӕ» (Ефесӕгтӕм 6:1—3). Банысан кӕнинаг у уый, ӕмӕ дӕ ныййарджыты коммӕ кӕсын нысан кӕны «дӕ мад ӕмӕ дӕ фыдӕн кад кӕнын». Грекъаг дзырд «кад кӕнын» нысан кӕны «тынг аргъ кӕнын» кӕнӕ «зынаргъыл нымайын». Уӕдӕ цӕмӕй коммӕгӕс уай, уый тыххӕй фаг нӕу ныййарджыты фӕдзӕхстытӕ хъуыр-хъуыргӕнгӕйӕ ӕххӕст кӕнын, химидӕг та хъуыды кӕнын, ех ӕвӕдза, куыд ӕнӕхъуаджы сты адӕттӕ иууылдӕр. Хуыцау дӕуӕй домы, цӕмӕй дӕ ныййарджытӕн цыт кӕнай ӕмӕ сӕ разамындӕн аргъ кӕнай (Фӕсномыг ныхӕстӕ 15:5).
15. Сывӕллӕттӕм афтӕ куы кӕса, цыма сӕ ныййарджытӕ рӕдийынц, уӕддӕр сын сӕ бон куыд у кад кӕнын?
15 Дӕ ныййарджытӕ ахӕм цыдӕр куы саразой, ӕмӕ сын уый фӕстӕ дӕ бон куы нал уа кад кӕнын, уӕд та? Бацархай, цӕмӕй сӕ уавӕры бацӕуай ӕмӕ сӕ бамбарай, ууыл. Ау, уыдон дӕ нӕ «ныййардтой» ӕмӕ дыл нӕ фӕфыдӕбон кодтой? (Фӕсномыг ныхӕстӕ 23:22). Уый гӕнӕн куыд ис, ӕмӕ дӕ ма уарзой? (Дзуттытӕм 12:7—11). Аныхас кӕн семӕ уӕзданӕй ӕмӕ сын сабырӕй бамбарын кӕн, цы дӕ тыхсын кӕны, уый. Сӕ ахаст дӕ зӕрдӕмӕ куы нӕ фӕцӕуа, уӕддӕр сӕм схуыст ныхас ма скӕн (Фӕсномыг ныхӕстӕ 24:29). Дӕ зӕрдыл дар, Давид Саулӕн кӕй кад кодта, уый Хуыцауы фӕдзӕхстытӕ куы нӕ ӕххӕст кодта, уӕд дӕр. Иегъовӕйӕ кур ӕххуыс, цӕмӕй дӕ зӕрдӕйы фӕдыл ма ацӕуай. «Уӕ зӕрдӕтӕ хъарут Уый раз [«ӕргом кӕнут уымӕн», НД],— загъта Давид,— Хуыцау махӕн ӕрлидзӕндон» (Псалом 61:9; Иеремийы куыд 3:25—27).
Кад кӕн, йӕхимӕ бӕрндзинад чи исы, уыдонӕн
16. Цӕуыл ахуыр кӕнӕм мӕнг ахуыргӕнджытӕ ӕмӕ зӕдты цӕвиттонӕй?
16 Ӕмбырды хистӕр нӕлгоймӕгтӕ нысангонд сты сыгъдӕг удӕй, фӕлӕ уӕддӕр сты ӕнӕххӕст ӕмӕ рӕдийгӕ дӕр фӕкӕнынц (Псалом 129:3; Екклесиаст 7:20; Куыстытӕ 20:28; Иаковы 3:2). Уый аххосӕй ӕмбырды уӕнгтӕй исчи, гӕнӕн ис, разы ма уа хистӕр нӕлгоймӕгтӕй. Ӕмбырды цыдӕр, куыд ӕмбӕлы, афтӕ кӕй нӕ цӕуы арӕзт, уый куы фӕхатӕм, йе та махмӕ куы фӕкӕса афтӕ, уӕд куыд кӕнӕм? Ӕркӕсӕм, зӕдтӕ ӕмӕ фыццаг ӕнусы цӕрӕг мӕнг ахуыргӕнджыты ахаст кӕрӕдзийӕ куыд тынг хицӕн кодта, уымӕ: «[Мӕнг ахуыргӕнджытӕ] сты къӕйных, хивӕнд ӕмӕ нӕ тӕрсынц уӕлдӕрты фыдкой кӕнынӕй, кӕд ӕмӕ Зӕдтӕ дӕр, уӕлдӕр уӕвгӕйӕ уыдонӕй фидардзинад ӕмӕ тыхӕй, нӕ кӕнынц Хицауы раз [«Иегъовӕйы ӕфсӕрмӕй», НД] уыдонӕн уайдзӕфы тӕрхон» (2 Петры 2:10—13). Уыцы мӕнг ахуыргӕнджытӕ «уӕлдӕрты» — фыццаг ӕнусы чырыстон ӕмбырды бӕрндзинад йӕхимӕ чи иста, уыцы хистӕр нӕлгоймӕгты фыдкой кодтой; фӕлӕ уыцы мӕнг ахуыргӕнджытӕ кӕд ӕмбырды ӕфсымӕрты кӕрӕдзийы ныхмӕ кодтой, уӕддӕр сӕ зӕдтӕ ӕвзӕр нӕ загътой. Зӕдтӕ адӕмӕй бирӕ уӕлдӕр лӕууынц ӕмӕ раст аразын куыд хъӕуы, уый дӕр махӕй хуыздӕр ӕмбарынц. Уыдон иттӕг хорз зыдтой, ӕмбырды чи цы арӕзта, уый. Фӕлӕ «Иегъовӕйы ӕфсӕрмӕй» уыдон тӕрхоны хъуыддаг Хуыцауы бар бакодтой (Иудӕйы 9; Дзуттытӕм 2:6, 7).
17. Хистӕр нӕлгоймӕгтӕ цыдӕр хъуыддаджы раст кӕй нӕ архайынц, уый куы хатай, уӕд дын дӕ уырнындзинад куыд баххуыс кӕндзӕн?
17 Цыдӕр хъуыддаг раст куы нӕ цӕуа арӕзт, уӕддӕр цымӕ чырыстон ӕмбырды цардӕгас Хистӕр Йесо Чырыстийыл хъуамӕ ма ӕууӕндӕм? Йӕ ӕппӕтдунеон ӕмбырды кӕм цы цӕуы, уый йӕхӕдӕг нӕ зоны? Уавӕр куыд алыг кӕнынмӕ хъавы, уымӕн хъуамӕ ма аргъ кӕнӕм ӕмӕ хъуыддаг аскъуыддзаг кӕнын йӕ бон кӕй у, ууыл хъуамӕ ма ӕууӕндӕм? Уӕвгӕ «чи стӕм мах, ӕмӕ иннӕтӕн тӕрхон кӕнӕм?» (Иаковы 4:12; 1 Коринфӕгтӕм 11:3; Колоссӕгтӕм 1:18). Цымӕ хуыздӕр нӕ уаид, цы дӕ тыхсын кӕны, уый дӕ куывды Иегъовӕйӕн куы зӕгъис?
18, 19. Цыдӕр хъуыддаджы дӕм афтӕ куы кӕса, цыма хистӕр нӕлгоймаг рӕдийы, уӕд дӕ цы бакӕнын хъӕуы?
18 Ӕнӕххӕст кӕй стӕм, уымӕ гӕсгӕ цыдӕр зындзинӕдтӕ гӕнӕн ис фӕзына. Хаттӕй-хатт хистӕр нӕлгоймаг дӕр фӕрӕдийы, ӕмӕ уый тыххӕй чидӕр йӕхицӕн бынат нал фӕары. Фӕлӕ тагъд кӕнын нӕ хъӕуы, уымӕн ӕмӕ афтӕмӕй уавӕр нӕ фӕхуыздӕр уыдзӕн. Уый нӕ, фӕлӕ ма, гӕнӕн ис, ноджы фӕфыддӕр уа. Ахӕм уавӕры чырыстон ӕмбаргӕдзинад кӕмӕ ис, уый ӕнхъӕлмӕ кӕсдзӕн, фарста Иегъовӕ йӕ рӕстӕджы кӕй аскъуыддзаг кӕндзӕн, ӕмӕ кӕд хъӕуа, уӕд, раст чи нӕ уыд, уыдон кӕй бафхӕрдзӕн, уымӕ (2 Тимофеймӕ 3:16; Дзуттытӕм 12:7—11).
19 Цыдӕр хъуыддаг дын ӕнцой куы нӕ дӕтта, уӕд куыд кӕнгӕ у? Уый тыххӕй ӕмбырды уӕнгтӕй алкӕмӕн дзурыны бӕсты хуыздӕр нӕ уаид хистӕр нӕлгоймӕгтӕм бацӕуын ӕмӕ сӕ сӕрныллӕгӕй ӕххуыс ракурын? Макӕй фыдкой кӕн, афтӕмӕй сын радзур, цы дӕ тыхсын кӕны, уый. У сӕм «тӕригъӕдгӕнаг», дӕ ныфс сыл дар ӕмӕ сын кад кӕн (1 Петры 3:8). Цы дын дзурынц, ууыл худгӕ ма кӕн, фӕлӕ дӕ ныфс дар сӕ чырыстон фӕлтӕрддзинадыл. Хӕларзӕрдӕйӕ дын цы ныфсдӕттӕг хъуыдытӕ зӕгъой Библийӕ, уыдонмӕ лӕмбынӕг байхъус ӕмӕ сӕ разы у. Ӕмӕ дӕм уӕддӕр афтӕ куы кӕса, цыма хъуыддагмӕ ноджыдӕр хъӕуы ӕркӕсын, уӕд та фидарӕй ӕууӕнд, Иегъовӕйы ӕххуысӕй хистӕр нӕлгоймӕгтӕ, куыд ӕмбӕлы ӕмӕ хуыздӕр куыд у, афтӕ кӕй бакӕндзысты, ууыл (Галатӕгтӕм 6:10; 2 Фессалоникӕгтӕм 3:13).
20. Цӕуыл ныхас кӕндзыстӕм иннӕ статьяйы?
20 Фӕлӕ ма куыд хъуамӕ кад кӕнӕм ӕмӕ куыд хъуамӕ цыт кӕнӕм, уыцы хъуыддаджы ӕркӕсын хъӕуы ноджыдӕр иу фарстамӕ. Цымӕ бартӕ кӕй къухы ис, уыцы хистӕртӕ, сӕ дӕлбар чи ис, уыдонӕн хъуамӕ ма кад кӕной? Ууыл дзырд цӕудзӕн иннӕ статьяйы.
Цавӕр дзуапп радтис?
• Хицӕуттӕн цӕмӕн хъуамӕ кад кӕнӕм?
• Хуыцау бартӕ кӕмӕн дӕтты, уыдонӕн чи нӕ кад кӕны, уымӕ Иегъовӕ ӕмӕ Йесо цы цӕстӕй кӕсынц?
• Бартӕ кӕй къухы уыд, уыдонӕн кад кӕныны хъуыддаджы нын хорз дӕнцӕгтӕ чи равдыста?
• Бартӕ кӕй къухы ис, уый нӕ хъуыдымӕ гӕсгӕ куы рӕдийа, уӕд цы хъуамӕ аразӕм?
[Фарстатӕ ахуыр кӕнынӕн]
[Ныв 8 фарсыл]
Саррӕ цыт кодта йӕ сӕрыхицау Арваамӕн ӕмӕ уыд амондджын.
[Ныв 9 фарсыл]
Мелхолӕ не скад кодта Давидӕн куыд хӕдзары хистӕрӕн ӕмӕ куыд паддзахӕн, афтӕ.
[Ныв 10 фарсыл]
«Иегъовӕйы зӕрдӕмӕ чи нӕ цӕуы, ахӕм хъуыддаг ӕз нӕ бакӕндзынӕн, Иегъовӕйы сӕрстмӕ мӕ къух нӕ сисдзынӕн».
[Ныв 12 фарсыл]
Цымӕ хуыздӕр нӕ уаид, цы дӕ тыхсын кӕны, уый дӕ куывды Иегъовӕйӕн куы зӕгъис?
