Сымах иууылдӕр — ӕфсымӕртӕ
Сымах иууылдӕр — ӕфсымӕртӕ
«Уӕхи ма хонут ахуыргӕнджытӕ, уымӕн ӕмӕ иу Ахуыргӕнӕг ис сымахӕн — Чырысти, сымах та иуылдӕр — ӕфсымӕртӕ» (МАТФЕЙЫ 23:8).
1. Цавӕр фарстмӕ нӕ хъӕуы ӕркӕсын?
«ТЫНГДӔР кӕмӕн хъӕуы кад кӕнын, миссионерӕн ӕви Вефилы лӕггадгӕнӕгӕн?» — ахӕм ӕнӕхин фарста радта Скӕсӕны бӕстӕтӕй иуы цӕрӕг чырыстон хо австралиаг миссионермӕ. Уый базонын фӕндыд, кӕмӕн хъуамӕ кад кӕна тынгдӕр, ӕндӕр бӕстӕй ӕрцӕуӕг миссионерӕн ӕви Хъахъхъӕнӕг Мӕсыджы Ӕхсӕнады бынӕттон филиалы чи лӕггад кӕны, уымӕн. Уыцы ӕнӕхин фарсты ирдӕй зыны ӕгас дзыллӕйы зондахаст, цыран стыр нысаниуӕг лӕвӕрд цӕуы, адӕмӕй ӕхсӕнады чи цы бынат ахсы, уымӕн. Ӕмӕ кӕд хойы фарсты ӕвзӕрӕй ницы уыд, уӕддӕр миссионермӕ диссаг фӕкаст. Фӕлӕ адӕймаг куы бафӕрсы «чи у стырдӕр?», зӕгъгӕ, уӕд уый ууыл дзурӕг у, ӕмӕ йӕ фӕнды, стырдӕр бынат чи ахсы, фылдӕр бартӕ кӕмӕ ис ӕмӕ иннӕтыл йӕ бар тынгдӕр кӕмӕн цӕуы, уый базонын.
2. Не ’муырнджытӕм нын цавӕр ахаст хъуамӕ уа?
2 Ӕцӕг уыцы фарст ног нӕу. Суанг ма Йесойы ахуыргӕнинӕгтӕ дӕр быцӕу кодтой, стырдӕр сӕ чи у, ууыл (Матфейы 20:20—24; Маркы 9:33—37; Лукайы 22:24—27). Уыдон цардысты фыццаг ӕнусы иудейаг адӕмы ’хсӕн, ӕмӕ уыцы ӕхсӕнады та, чи цы бынат ахста, уый тынг ахсджиаг уыд. Йесо уый йӕ зӕрдыл дардта, ӕмӕ уымӕ гӕсгӕ йӕ ахуыргӕнинӕгтӕн бафӕдзӕхста: «Сымах... уӕхи ма хонут ахуыргӕнджытӕ, уымӕн ӕмӕ иу Ахуыргӕнӕг ис сымахӕн — Чырысти, сымах та иуылдӕр — ӕфсымӕртӕ» (Матфейы 23:8). Дины кады ном «раввин», ома «ахуыргӕнӕг» «кӕмӕ фӕдзурынц, уый йӕхимӕ фӕкӕсы иннӕтӕй уӕлдӕр ӕмӕ кадджындӕр, уыцы номӕй кӕмӕ нӕ фӕдзурынц, уыдон та хӕлӕг кӕнын райдайынц ӕмӕ сӕхимӕ фӕкӕсынц тынг ӕгуыдзӕг; ӕмӕ ахӕм зондахастӕн та „Чырыстийы хуымӕтӕгдзинадимӕ“ иумӕйагӕй ницы ис»,— загъта библииртасӕг Альберт Барнз. Уымӕ гӕсгӕ чырыстон цӕстдарджытӕм нӕ дзурынц «Хистӕр нӕлгоймаг уый ӕмӕ уый», зӕгъгӕ, уыцы дзырдӕй сын сӕ зӕрдӕ балхӕнынӕн пайдагӕнгӕйӕ (Иов 32:21, 22). Иннӕрдыгӕй Йесойы уынаффӕмӕ гӕсгӕ чи цӕры, уыцы хистӕр нӕлгоймӕгтӕ та кад кӕнынц ӕмбырды иннӕ уӕнгтӕн, Иегъовӕ йӕ иузӕрдион лӕггадгӕнджытӕн куыд кад кӕны ӕмӕ Йесо та — йе ’нувыд фӕдылдзӕуджытӕн, афтӕ.
Иегъовӕ ӕмӕ Йесойы дӕнцӕг
3. Иегъовӕ йӕ уӕларвон фӕлдисондтӕн куыд скад кодта?
3 Кӕд Иегъовӕ «Ӕппӕтбӕрзонд» Хуыцау у, уӕддӕр иууыл райдианӕй дӕр кад кодта, кӕй сфӕлдыста, уыдонӕн, йӕ хъуыддӕгты сын хайад исыны бар кӕй лӕвӕрдта, уымӕй (Псалом 82:19). Иегъовӕ фыццаг адӕймаджы сфӕлдыста йӕ иунӕггуырд Фыртимӕ, йӕ «дӕсны ӕххуысгӕнӕгимӕ» (Фӕсномыг ныхӕстӕ 8:27—30; Уӕвынад 1:26). Хуыцау ӕвзӕр паддзах Ахавы фесафынвӕнд куы скодта, уӕд та йӕ уӕларвон зӕдты бафарста сӕ хъуыдыйӕ, уыцы хъуыддаг хуыздӕр куыд ис бакӕнӕн, уый тыххӕй (3 Паддзахӕдты 22:19—23).
4, 5. Куыд кад кӕны Иегъовӕ адӕмӕн?
4 Иегъовӕ Дунескӕнӕг Хуыцау у (Дыккаг закъон 3:24). Уый нӕ хъӕуы адӕмимӕ уынаффӕ кӕныны сӕр. Фӕлӕ уӕддӕр, зӕгъӕн ис, кӕй сӕм ӕргуыбыр кӕны, цӕмӕй сӕм йӕ хъус ӕрдара. Псаломзарӕггӕнӕг зарыд: «Чи у афтӕ куыд нӕ Иегъовӕ, Хуыцау, бӕрзондыл чи бады, ӕмӕ чи ӕргуыбыр кӕны, цӕмӕй фена, арвтыл ӕмӕ зӕххыл цы ис, уый? Уый рыгӕй сыстын кӕны мӕгуыры» (Псалом 112:5—8, СПб).
5 Содом ӕмӕ Гомор скуынӕг кӕныны размӕ уал Иегъовӕ байхъуыста Авраамы фарстытӕм ӕмӕ уый фӕрцы Авраам баззад райгондӕй, уый йӕхи цӕстӕй федта, Хуыцау алцыдӕр рӕстдзинадмӕ гӕсгӕ кӕй аразы, уый (Уӕвынад 18:23—33). Кӕй зӕгъын ӕй хъӕуы, Иегъовӕ зыдта, Авраамы куырдиатӕй кӕй ницы фӕивдзӕн, уый, фӕлӕ йӕм уӕддӕр сабырӕй байхъуыста ӕмӕ йын бахынцыдта йӕ хъуыдытӕ.
6. Иегъовӕ Аввакумы фарстӕн дзуапп куы радта ӕмӕ йын уымӕй куы скад кодта, уый фӕстӕ цы ’рцыд?
6 Иегъовӕ ма байхъуыста Аввакуммӕ дӕр, уый йӕ куы фарста: «О Иегъовӕ, бирӕ ма дӕм дзыназдзынӕн, ӕмӕ мӕ ды нӕ хъусдзынӕ?» Цымӕ Иегъовӕ уыцы фарст афтӕ бамбӕрста, ӕмӕ Аввакум дызӕрдыг кӕны йӕ тыхыл? Нӕ, уый бацыд Аввакумы уавӕры ӕмӕ йын раргом кодта, йӕ тӕрхон халдейӕгты уылты кӕй хъавы сӕххӕст кӕнынмӕ, уый. Иегъовӕ йӕ пехуымпарӕн фидарӕй загъта, зӕгъгӕ, уыцы рагзагъд тӕрхон «ӕнӕмӕнг сӕххӕст уыдзӕн» (Аввакум 1:1, 2, 5, 6, 13, 14; 2:2, 3). Иегъовӕ Аввакумы тыхстдзинадмӕ ӕнӕмӕты цӕстӕй кӕй нӕ ракаст ӕмӕ йын дзуапп кӕй радта, уымӕй йын скад кодта. Ныфсаст пехуымпарӕн йӕ уӕнгты тых бацыд, бахъӕлдзӕг ӕмӕ ныр иу мисхал дӕр нал дызӕрдыг кодта, Хуыцау ӕй кӕй фервӕзын кӕндзӕн, ууыл. Уый ирдӕй зыны, Хуыцауы удцырынӕй фыст Аввакумы чиныджы. Уыцы чиныджы хъуыдытӕ абон махӕн дӕр ӕххуыс кӕнынц Иегъовӕйыл фидарӕй ӕууӕндынӕн (Аввакум 3:18, 19).
7. Н. э. 33 азы Фӕндзайӕм бон цы цаутӕ ӕрцыд, уым Петрӕн ахӕм стыр ахадындзинад кӕй уыд, уый цӕуыл дзурӕг у?
7 Иннӕтӕн куыд кад кӕнын хъӕуы, уый нын хорз равдыста Йесо Чырысти дӕр. Уый загъта йӕ ахуыргӕнинӕгтӕн: «Адӕмы раз Мӕныл ӕвдисӕн чи бакӕна, ууыл ӕвдисӕн бакӕндзынӕн Ӕз дӕр Мӕ Уӕларвон Фыды раз» (Матфейы 10:32, 33). Фӕлӕ йӕ куы ’рцахстой, уыцы ӕхсӕв йӕ ахуыргӕнинӕгтӕй иу дӕр нӕ баззад йӕ фарсмӕ, апостол Петр та йыл ӕртӕ хатты ӕвдисӕн бакодта, нӕ зонын ацы адӕймаджы, зӕгъгӕ (Матфейы 26:34, 35, 69—75). Фӕлӕ Йесо, цы ’рцыд, ӕрмӕст ууыл нӕ хъуыды кодта. Уый федта, Петрӕн арф йӕ зӕрдӕйы цы уыд, фӕсмонӕй йӕхи куыд хордта, уый (Лукайы 22:61, 62). Уымӕй 51 боны йеддӕмӕ нӕ рацыд, афтӕ Чырысти скад кодта ӕрфӕсмонгӕнӕг апостолӕн, Фӕндзайӕм боны йын 120 ахуыргӕнинаджы номӕй ныхасы рацӕуыны бар кӕй радта, ӕмӕ «Паддзахады дӕгъӕлтӕй» фыццагӕй уый кӕй спайда кодта, уымӕй (Матфейы 16:19; Куыстытӕ 2:14—40). Ныр Петрӕн йӕ бон уыд, «раздӕхгӕйӕ, йе ’фсымӕрты сфидар кӕнын» (Лукайы 22:31—33, НФ).
Кад кӕн дӕ бинонтӕн
8, 9. Лӕг йӕ усӕн кӕй кад кӕны, уымӕй йӕ бон куыд у Иегъовӕ ӕмӕ Йесойы фӕзмын?
8 Хуыцау лӕг ӕмӕ усӕн сӕ бӕрны кӕй бакодта, уыцы бартӕ ӕмӕ хӕстӕ ӕххӕстгӕнгӕйӕ, уыдон хъуамӕ фӕзмой Иегъовӕ ӕмӕ Йесо Чырыстийы. Петр фыста: «Сымах... лӕгтӕ, уӕ устытӕм здӕхут ӕмбарындзинады [«уӕ устытимӕ цӕрут кӕрӕдзи ӕмбаргӕйӕ», НФ], куыд ӕдыхдӕр мигӕнӕнмӕ, цытджын даргӕйӕ уыдоны, куыд амондджын царды бынтӕй ӕмхайджынтӕ, цӕмӕй уын уӕ куывды къуылымпытӕ ма уа» (1 Петры 3:7). Кӕй зӕгъын ӕй хъӕуы, хъӕдын мигӕнӕнӕй урс ӕлыгӕй (фарфорӕй) конд мигӕнӕнимӕ арӕхстдджындӕр хъӕуы архайын. Уӕдӕ иугӕр афтӕ у, уӕд хорз уаид, хӕдзары хуыддӕгтӕ лыггӕнгӕйӕ-иу лӕг йӕ бинойнаджы хъуыдымӕ дӕр куы байхъусид ӕмӕ афтӕмӕй куы фӕзмид Иегъовӕйы. Хъуыды кӕныс, Иегъовӕ Авраамимӕ ныхас кӕнынӕн рӕстӕг кӕй ссардта, уый. Лӕг дӕр ӕнӕххӕст адӕймаг у, ӕмӕ уымӕ гӕсгӕ, гӕнӕн ис, хъуыддаг бакӕнын хуыздӕр куыд уыдзӕн, уый кӕронмӕ ма ’мбара. Уӕдӕ хуыздӕр нӕу, дӕ бинойнаджы хъуыдымӕ лӕмбынӕг байхъусын ӕмӕ йын уымӕй скад кӕнын?
9 Сылгоймаг бынтондӕр нымад кӕм нӕу, уыцы бӕстӕты лӕг хъуамӕ йӕ зӕрдыл дара, йӕ бинойнагӕн ӕнцон кӕй нӕу, йӕ зӕрдӕйы цы ис, уый ӕргом дзурын. Йесо Чырысти зӕххыл куы уыд, уӕд ын йӕ ахуыргӕнинӕгтӕм, йӕ «чындзаджы къорды» уӕнгтӕм цавӕр ахаст уыд, дӕуӕн дӕр ахӕм ахаст уӕд дӕ бинойнагмӕ. Йесойӕн йӕ ахуыргӕнинӕгтӕ тынг зынаргъ уыдысты, уый ӕмбӕрста, цы сын амыдта, уыдӕттӕй алцы сӕ бон кӕй нӕ уыд бамбарын ӕмӕ сӕххӕст кӕнын, уый, ӕмӕ сӕ фылдӕр никуы домдта. Уый ӕддейӕ иу сӕ цы хъуыд, цы иу сӕ тыхсын кодта, уый-иу ын зӕгъгӕ дӕр нӕма кодтой, афтӕ-иу сын ӕй Йесо сарӕзта (Маркы 6:31; Иоанны 16:12, 13; Ефесӕгтӕм 5:28—30). Цы ма ис ноджыдӕр саразӕн? Дӕ хъус дар, дӕ бинойнаг дӕуыл дӕр ӕмӕ ӕппӕт бинонтыл дӕр куыд тыхсы, цы аразы, уымӕ, ӕмӕ дзы бузныг кӕй дӕ, уый ӕвдис дӕ ныхӕстӕй ӕмӕ дӕ хъуыддӕгтӕй. Иегъовӕ ӕмӕ Йесо дӕр аргъ кодтой ӕмӕ ӕппӕлыдысты, уый аккаг чи уыд, уыдонӕй (3 Паддзахӕдты 3:10—14; Иов 42:12—15; Маркы 12:41—44; Иоанны 12:3—8). Скӕсӕны иу чырыстон сылгоймагӕн йӕ лӕг Иегъовӕйы Ӕвдисӕн куы сси, уӕд ахӕм ныхӕстӕ загъта: «Раздӕр-иу мӕ сӕрыхицауимӕ искуыдӕм куы ацыдыстӕм, уӕд-иу йӕ къухтӕ йӕ дзыппыты нытътъыста ӕмӕ-иу мӕнӕй дыууӕ-ӕртӕ къахдзӕф разӕй цыд, хӕссинӕгтӕ та-иу иууылдӕр ӕз хастон. Ныр та хызынтӕ фӕхӕссы уый ӕмӕ мӕ бузныг у, хӕдзары куыстытӕ кӕй кӕнын, уый тыххӕй!» Дӕ усӕй зӕрдӕбынӕй куы раппӕлай, уӕд ын уый стыр ӕххуыс уыдзӕн, уымӕн ӕмӕ уындзӕн, йӕ фыдӕбонӕн ын кӕй аргъ кӕнынц, уый (Фӕсномыг ныхӕстӕ 31:28).
10, 11. Иегъовӕ Израилы хивӕнд адӕммӕ цы цӕстӕй каст, уымӕй ныййарджытӕ цӕуыл ахуыр кӕнынц?
10 Сывӕллӕтты хъомылгӕнгӕйӕ, уӕлдайдӕр та сӕ бафхӕрын куы фӕхъӕуы, уӕд ныййарджытӕ хъуамӕ фӕзмой Хуыцауы. «Иегъовӕ фӕдзӕхста Израиль ӕмӕ Иудӕйы», цӕмӕй ныууагътаиккой сӕ ӕвзӕр хъуыддӕгтӕ, фӕлӕ уыдон «сӕ бӕрзӕйтӕ нысхъӕл кодтой» (4 Паддзахӕдты 17:13—15). Израилӕгтӕ ма суанг «зӕрдӕлхӕнӕн кодтой Уымӕн сӕ дзыхтӕй, ӕмӕ се ’взагӕй мӕнг дзырдтой Уый раз». Ныййарджытӕй бирӕтӕ ӕмбарынц, хаттӕй-хатт сӕ сывӕллӕттӕ дӕр сӕхи афтӕ кӕй фӕдарынц, уый. Израилӕгтӕ «фӕлвӕрдтой Хуыцауы» ӕмӕ йӕ мӕсты кодтой, риссын ын кодтой йӕ зӕрдӕ. Фӕлӕ сӕм уӕддӕр Иегъовӕ уыд «фӕлмӕнзӕрдӕ, хатыр кодта тӕригъӕд, ӕмӕ сӕ нӕ сӕфта» (Псалом 77:36—41).
11 Уый нӕ, фӕлӕ ма Иегъовӕ йӕхӕдӕг ӕрхатыд израилӕгтӕм: «Ӕрцӕут ныр, адӕм, ӕмӕ равзарӕм уӕ хъуыддӕгтӕ... Уӕ тӕригъӕдтӕ сырх-сырхид куы уой, уӕддӕр уын митау урс фестдзысты» (Исай 1:18). Кӕд Иегъовӕ раст уыд, уӕддӕр ӕрсидт уыцы хивӕнд адӕммӕ, ӕрцӕут ӕмӕ равзарӕм, зӕгъгӕ. Цӕй хорз дӕнцӕг у уый ныййарджытӕн, сӕ сывӕллӕттӕн зонд куы фӕамонынц, уӕд! Куы хъӕуа, уӕд сын фадат дӕттут, цӕмӕй, афтӕ цӕмӕн бакодтой, уый тыххӕй сӕхӕдӕг зӕгъой сӕ хъуыды, ӕмӕ сын уый фӕстӕ ӕмбарын кӕнут, сӕ уагахаст сӕ фӕивын цӕй тыххӕй хъӕуы, уый.
12. а) Иегъовӕйӕ нӕ сывӕллӕттӕн тынгдӕр кад кӕнӕм, уый гӕнӕн цӕуылнӕ ис? ӕ) Нӕ сывӕллӕтты ӕфхӕргӕ куы фӕкӕнӕм, уӕддӕр нӕ бон куыд у, кӕй сын аргъ кӕнӕм, уый ӕвдисын?
12 Кӕй зӕгъын ӕй хъӕуы, хаттӕй-хатт сывӕллӕтты бахъӕуы карзӕй бафхӕрын дӕр. Ныййарджытӕ, Илий куыд бакодта, сымах афтӕ макуы бакӕнут. Уый «[Иегъовӕйӕ] йӕ фырттӕн тынгдӕр кад кодта» (1 Паддзахӕдты 2:29). Фӕлӕ цыфӕнды карз ӕфхӕрды дӕр кӕстӕртӕ хъуамӕ уыной, кӕй сыл тыхсынц, уый. Уыдон хъуамӕ ӕмбарой, сӕ ныййарджытӕ сӕ тынг кӕй уарзынц, уый. Павел фӕдзӕхсы фыдӕлты: «Ма мӕсты кӕнут уӕ цӕуӕты, фӕлӕ ахуыр кӕнут уыдоны Хицауы ахуырады ӕмӕ зондамынды» (Ефесӕгтӕм 6:4). О, кӕд фыдӕн йӕ сывӕллӕттыл йӕ бар цӕуы, уӕддӕр дзы хъуамӕ макуы рох кӕна, уыдон дӕр адӕймӕгтӕ кӕй сты, уый, ӕмӕ сӕ ӕнӕхъуаджы тызмӕг ахастӕй удхарӕй ма мара. Бӕгуыдӕр, цӕмӕй дӕ сывӕллон йӕхи адӕймагыл нымайа ӕмӕ йӕхицӕн аргъ кӕна, уый тыххӕй ӕвӕллайгӕйӕ алы бон дӕр хъӕуы архайын. Фӕлӕ уый фӕрцы дӕ сывӕллон сомбон амондджын кӕй уыдзӕн, ууыл куы хъуыды кӕнай, уӕд дӕм цыфӕнды стыр фыдӕбӕттӕ дӕр ницы кӕсдзысты.
13. Библимӕ гӕсгӕ хӕдзары ацӕргӕ адӕймӕгтӕм цавӕр ахаст хъуамӕ уа?
13 Бинонтӕн кад кӕнын, канд уый нӕ нысан кӕны, ӕмӕ дӕ бинойнаг ӕмӕ дӕ сывӕллӕттыл дӕлӕмӕ ма хӕцай, ӕппӕлай сӕ. Иу япойнаг ӕмбисонд афтӕ зӕгъы: «Куы базӕронд уай, уӕд-иу дӕ сывӕллӕттӕм хъус». Ацы ӕмбисонд ууыл дзурӕг у, ӕмӕ ацӕргӕ ныййарджытӕ сӕ хъомыл сывӕллӕттӕн ӕдзух сӕхи зондамонӕг кӕй хъуамӕ ма кӕной ӕмӕ сын сӕ ныхасӕн кӕй хъуамӕ аргъ кӕной. Бӕгуыдӕр, Хуыцауы фӕнды, цӕмӕй ныййарджытӕ сӕ сывӕллӕттӕн кад кӕной, сӕ хъуыдымӕ сын кӕй хъусынц, уымӕй. Фӕлӕ сывӕллӕттыл дӕр цас фӕнды ма цӕуа, уӕддӕр сӕ хӕдзары хистӕртӕн хъуамӕ кад кӕной, нымайой сӕ. «Дӕ ныййарӕг мад куы базӕронд уа, уӕддӕр ыл былысчъил ма кӕн»,— афтӕ дзырдӕуы Фӕсномыг ныхӕсты 23:22-ӕм стихы. Паддзах Соломон ацы ныхӕстӕм гӕсгӕ цард йӕхӕдӕг. Йӕ мад ӕм цыдӕр хъуыддаджы тыххӕй куы бацыд, уӕд ын скад кодта: йӕ къӕлӕтджыны рахизфарс сӕвӕрын кодта ноджыдӕр иу къӕлӕтджын, уым сбадын кодта йӕ зӕронд мад Вирсавийы ӕмӕ йын афтӕмӕй байхъуыста йӕ фӕндонмӕ (3 Паддзахӕдты 2:19, 20).
14. Куыд у нӕ бон не ’мбырды ацӕргӕ ӕфсымӕртӕ ӕмӕ хотӕн кад кӕнын?
14 Чырыстон ӕмбырды, не стыр бинонты ’хсӕн нын кӕддӕриддӕр ис фадат, цӕмӕй ацӕргӕ ӕфсымӕртӕ ӕмӕ хотӕн кад кӕнынмӕ нӕ «иу иннӕмӕй раздӕр» уа (Ромӕгтӕм 12:10, НФ). Ныр уыдон раздӕрау цӕрдӕг нал сты, стӕй аразын дӕр сӕ бон уыйбӕрц ницыуал у, ӕмӕ уый тыххӕй тынг тыхсынц (Екклесиаст 12:1—7). Ӕдзухдӕр рынчындоны чи ис ӕмӕ йӕ уат чи нӕ исы, ахӕм ацӕргӕ сӕрст хо афтӕ тынг сфӕлмӕцыд, ӕмӕ иухатт загъта: «Тӕхуды куы амӕлин, уӕд та уӕларвыл ногӕй кусынхъом уаин». Ахӕм ацӕргӕ ӕфсымӕртӕ ӕмӕ хотӕ цы сарӕзтой, уый тыххӕй сын куы аргъ кӕнӕм ӕмӕ сын куы кад кӕнӕм, уӕд сын уый уыдзӕн стыр ӕххуыс. Хуыцау израилӕгтӕн ахӕм фӕдзӕхст радта: «Урссӕр адӕймаджы раз сыст ӕмӕ зӕрондӕн ӕгъдау дӕтт» (Левит 19:32). Кад кӕнут ацӕргӕ адӕймӕгтӕн, цӕмӕй зоной, кӕйдӕр кӕй хъӕуынц, кӕй сын аргъ кӕнынц, уый. «Сыстын» ӕнӕмӕнг уый нӕ нысан кӕны, ӕмӕ ацӕргӕ адӕймаджы раз лӕугӕ кӕнай, фӕлӕ ма йӕ фарсмӕ ӕрбадын ӕмӕ йӕ царды дӕргъы цы федта, цы сарӕзта, уымӕ байхъусын дӕр. Уымӕй хистӕртӕн кад кӕндзыстӕм, нӕхӕдӕг та бирӕ цӕуылдӕрты ахуыр кӕндзыстӕм сӕ зонд ӕмӕ сӕ фӕлтӕрддзинадӕй.
Кад кӕнынмӕ уӕ иу иннӕмӕй уӕд раздӕр
15. Хистӕр нӕлгоймӕгтӕн сӕ бон куыд у ӕмбырды уӕнгтӕн кад кӕнын?
15 Ӕмбырды уӕнгтӕн хорз ӕнтыстытӕ вӕййы, хистӕр нӕлгоймӕгтӕ сын фӕзминаг дӕнцӕг куы февдисынц, уӕд (1 Петры 5:2, 3). Кӕд хистӕр нӕлгоймӕгтӕ алыхатт дӕр тынг ӕнӕвдӕлон вӕййынц, уӕддӕр сӕхи хъӕппӕрисӕй бацӕуынц сабитӕм, ӕрыгӕттӕм, бинонты хистӕртӕм, йӕ сывӕллӕтты иунӕгӕй чи хъомыл кӕны, ахӕм мадӕлтӕм, хӕдзары ӕфсинтӕм. Ӕмӕ истӕуыл куы фӕтыхсынц, канд уӕд нӕ, фӕлӕ ӕнӕуи дӕр. Хистӕр нӕлгоймӕгтӕ ӕфсымӕртӕ ӕмӕ хоты афӕрстытӕ кӕнынц, байхъусынц сӕм ӕмӕ сӕ зӕрдӕбынӕй раппӕлынц сӕ ӕнтыстыты тыххӕй. Афтӕ аразгӕйӕ, ӕрхъуыдыджын хистӕр нӕлгоймӕгтӕ фӕзмынц, йӕ зӕххон лӕггадгӕнджытӕн чи кад кӕны, уыцы Хуыцау Иегъовӕйы.
16. Хистӕр нӕлгоймӕгты дӕр ӕмбырды иннӕ уӕнгтӕй уӕлдӕр цӕуылнӕ хъуамӕ ӕвӕрӕм?
16 Иегъовӕйы фӕзмгӕйӕ, хистӕр нӕлгоймӕгтӕ ӕххӕст кӕнынц Павелы фӕдзӕхст: «Ут ӕфсымӕруарзӕг кӕрӕдзимӕ, рӕвдаугӕйӕ; нымдгӕнгӕйӕ кӕрӕдзийӕн рагфӕдзӕхст кӕнут [«хорз ӕгъдау раттыны уӕ иу иннӕмӕй фӕраздӕр кӕнӕд йӕхи», НФ]». Ӕмӕ уымӕй дӕнцӕг дӕттынц иннӕтӕн дӕр (Ромӕгтӕм 12:10). Фӕлӕ, чи зоны, афтӕ аразын хистӕр нӕлгоймӕгтӕн ӕнцон нӕу, адӕмы, ӕхсӕнады сӕ чи цы бынат ахсы, уымӕ гӕсгӕ кӕм дих кӕнынц, ахӕм бӕстӕты. Зӕгъӕм, Скӕсӕйнаг бӕстӕтӕй иуы «ӕфсымӕр» цы дзырд нысан кӕны, уыдон сты дыууӕ. Иуӕй дзы фӕпайда кӕнынц уӕздӕттимӕ, хицӕуттимӕ ныхасгӕнгӕйӕ, иннӕмӕй та — хуымӕтӕг адӕммӕ. Хӕрзӕрӕджы онг дӕр ма ӕмбырды уӕнгтӕ, хистӕр нӕлгоймӕгтӕ ӕмӕ иннӕ хистӕр кары адӕймӕгтимӕ ныхасгӕнгӕйӕ, пайда кодтой фыццаг дзырдӕй, иннӕтимӕ та — дыккаг дзырдӕй. Фӕлӕ сын уый фӕстӕ загътой, цӕмӕй ӕрмӕстдӕр хуымӕтӕг дзырдӕй пайда кӕной, уымӕн ӕмӕ Йесойы ныхӕстӕм гӕсгӕ «иуылдӕр ӕфсымӕртӕ» стӕм (Матфейы 23:8). Кӕд иннӕ бӕстӕты адӕмы афтӕ тынг нӕ дихтӕ кӕнынц, уӕддӕр хъуамӕ нӕ зӕрдыл дарӕм, адӕмы ӕвзарын, хицӕн къордтыл сӕ дихтӕ кӕнын ӕнӕххӕст адӕймагӕн йӕ туджы кӕй ис, уый (Иаковы 2:4, НФ).
17. а) Хистӕр нӕлгоймӕгтӕ хуымӕтӕг цӕмӕн хъуамӕ уой? ӕ) Ӕмбырды уӕнгтимӕ ныхасгӕнгӕйӕ хистӕр нӕлгоймӕгтӕн сӕ бон куыд у Иегъовӕйы фӕзмын?
17 Раст у, Павел нӕм ӕрсидт, цӕмӕй кӕцыдӕр хистӕр нӕлгоймӕгтӕн «уӕлдай кад» кӕнӕм, фӕлӕ уӕддӕр уыдон ӕфсымӕртӕ сты (1 Тимофеймӕ 5:17). Кӕд ӕмӕ Дунескӕнӕг Хуыцауы паддзахбадӕны раз нӕ бон «уӕндонӕй» ӕрлӕууын у, уӕд Иегъовӕйы чи фӕзмы, уыцы хистӕр нӕлгоймӕгтӕм хъуамӕ нӕ бон ма уа ӕдӕрсгӕйӕ бацӕуын? (Дзуттытӕм 4:16; Ефесӕгтӕм 5:1). Цӕстдарджытӕ цас хуымӕтӕг ӕмӕ хӕларзӕрдӕ сты, уый базонӕн ис, ӕмбырды уӕнгтӕ сӕм исты уынаффӕ кӕнӕ фарсты фӕдыл куыд арӕх бацӕуынц, уымӕй. Хистӕр нӕлгоймӕгты хъӕуы ахуыр кӕнын, Иегъовӕ куыд архайы, уымӕ кӕсгӕйӕ. Уый йӕ хъуыддӕгтӕ иунӕгӕй нӕ кӕны, фӕлӕ иннӕты дӕр хоны йемӕ ӕмгуыст кӕнынмӕ. Алыхуызон хӕстӕ сын кӕны сӕ бӕрны, ӕмӕ уымӕй ӕвдисы, кӕй сын кад кӕны, уый. Ӕфсымӕр цыдӕр хъуыддаджы тыххӕй йӕ фӕндон куы бахӕсса, фӕлӕ йын афтӕ куы нӕ уа саразӕн, уӕддӕр дзы хистӕр нӕлгоймӕгтӕ хъуамӕ уой бузныг йе ’ххуысы тыххӕй. Ӕрхъуыды ма кӕн, Иегъовӕйы Авраам хынцфарст куы кодта кӕнӕ йӕм Аввакум куы дзынӕзта, уӕд йӕхи куыд дардта, уый.
18. Сраст кӕнын кӕй хъӕуы, уыдонӕн ӕххуысгӕнгӕйӕ хистӕр нӕлгоймӕгтӕн сӕ бон куыд у Иегъовӕйы фӕзмын?
18 Хаттӕй-хатт ӕфсымӕртӕ ӕмӕ хоты фӕхъӕуы бараст кӕнын (Галатӕгтӕм 6:1). Фӕлӕ уӕддӕр уыдон зынаргъ сты Иегъовӕйӕн ӕмӕ уый аккаг сты, цӕмӕй сӕм иннӕтӕ хорз цӕстӕй кӕсой. «Зонд мын чи фӕамоны, уый мын кад куы фӕкӕны, уӕд ӕм дыккаг хатт бацӕуын дӕр зын нӕ вӕййы»,— загъта иу ӕфсымӕр. Адӕмӕн сӕ фылдӕр афтӕ сты, ӕмӕ сын уынаффӕ райсын ӕнцондӕр вӕййы, аргъ сын куы фӕкӕнынц, уӕд. Кӕй зӕгъын ӕй хъӕуы, чырыстон фӕндагыл чи фӕкалд, уымӕ лӕмбынӕг байхъусынӕн рӕстӕг хъӕуы, фӕлӕ йын уӕд цыфӕнды зондамынд дӕр ӕнцондӕр уыдзӕн райсын. Нӕ зӕрдыл дарӕм, Иегъовӕ израилӕгтӕн цал хатты фӕтӕригъӕд кодта ӕмӕ та иу сӕм йе ’ргом куыд раздӕхта, уый (2 Паралипоменон 36:15; Титмӕ 3:2). Баххуыс кӕнын кӕмӕн хъӕуы, ахӕм адӕймагӕн йӕ уавӕры куы бацӕуай ӕмӕ йын йӕ уды рис куы бамбарай, уӕд дын дӕ уынаффӕ йӕ зӕрдӕмӕ тынгдӕр айсдзӕн (Фӕсномыг ныхӕстӕ 17:17; Филиппӕгтӕм 2:2, 3; 1 Петры 3:8).
19. Хуыцауӕн махау чи нӕ лӕггад кӕны, уыцы адӕммӕ нын цавӕр ахаст хъуамӕ уа?
19 Кад кӕнын ма нӕ хъӕуы, чи зоны, ӕмӕ райсом нӕ чырыстон ӕфсымӕртӕ чи суой, уыдонӕн дӕр. Ахӕм адӕм кӕд хорз уацхъуыд нырма нӕ исынц, уӕддӕр сӕм мах хъуамӕ уӕм фӕразон ӕмӕ сын сӕ бартӕн аргъ кӕнӕм. Иегъовӕйы «нӕ фӕнды, цӕмӕй исчи фесӕфа, фӕлӕ цӕмӕй иуылдӕр ӕрцӕуой фӕсмонмӕ» (2 Петры 3:9). Цымӕ махӕн дӕр Иегъовӕйы цӕстӕнгас хъуамӕ ма уа? Адӕммӕ нын алыхатт дӕр уӕздан ӕмӕ хӕларзӕрдӕ ахаст куы уа, уӕд-иу нын фӕстӕдӕр ӕнцондӕр уыдзӕн ӕвдисӕнад дӕттын. Ӕрмӕст хъуамӕ нӕхи хизӕм нӕ уырнындзинадӕн тӕссаг кӕмӕй у, ахӕм хӕлар ахастытӕй (1 Коринфӕгтӕм 15:33). Фӕлӕ уӕддӕр Хуыцауӕн махау чи нӕ лӕггад кӕны, уыдоныл нӕхи кӕй нӕ атигъ кӕнӕм, уымӕй ӕвдисӕм «адӕймагуарзондзинад» (Куыстытӕ 27:3).
20. Иегъовӕ ӕмӕ нӕ Йесо Чырыстийы дӕнцӕг хъуамӕ цӕмӕ сразӕнгард кӕна?
20 О, Иегъовӕ ӕмӕ Йесо Чырысти махӕй алкӕйдӕр нымайынц кады аккаг адӕймӕгтыл. Уый алкӕддӕр нӕ зӕрдыл дарӕм, ӕмӕ мах дӕр кӕрӕдзийӕн кад кӕнӕм иу иннӕмӕй раздӕр. Стӕй макуы рох кӕнӕм нӕ Хицау Йесо Чырыстийы ныхӕстӕ дӕр: «Сымах... иуылдӕр — ӕфсымӕртӕ» (Матфейы 23:8).
Цавӕр дзуапп радтис?
• Не ’мчырыстӕттӕм нын цавӕр ахаст хъуамӕ уа?
• Иегъовӕ ӕмӕ дӕ Йесойы дӕнцӕг куыд разӕнгард кӕны иннӕтӕн кад кӕнынмӕ?
• Лӕгтӕ ӕмӕ ныййарджытӕн сӕ бон куыд у иннӕтӕн кад кӕнын?
• Хистӕр нӕлгоймӕгтӕн се ’мчырыстӕттӕм ӕфсымӕрон ахаст куы уа, уӕд сӕхи куыд дардзысты?
[Фарстатӕ ахуыр кӕнынӕн]
[Ныв 15 фарсыл]
Дӕ усӕн кад кӕн адджын ныхасӕй.
[Ныв 15 фарсыл]
Дӕ сыввӕлӕттӕн кад кӕн, цы зӕгъын сӕ фӕнды, уымӕ хъусгӕйӕ.
[Ныв 15 фарсыл]
Ӕмбырды уӕнгтӕн кад кӕн.
