Хорз уацхъуыд хъусын кӕнӕм зӕрдиагӕй

«Удӕй арт уадзут; Хицауӕн кусут» (РОМӔГТӔМ 12:11).

1, 2. Чырыстӕттӕ хорз уацхъуыд хъусын кӕнынмӕ кӕддӕриддӕр цы цӕстӕй хъуамӕ кӕсой?

ӔВЗОНГ адӕймаджы куыстмӕ айстой ӕмӕ фырцинӕй йӕхицӕн бынат нал ары. Фыццаг бон ӕнӕрхъӕцӕй ӕнхъӕлмӕ кӕсы хицауы амындтӕм. Тагъддӕр ма куы райсид йӕ фыццаг хӕслӕвӕрд, уӕд уӕхскуӕзӕй бавналид йӕ сӕххӕст кӕнынмӕ. Хъуамӕ цӕсгомджынӕй, куыд хуыздӕр гӕнӕн ис, афтӕ бакӕна йӕ куыст.

² Куыд чырыстӕттӕ, афтӕ мах дӕр цӕмӕйдӕр стӕм ног кусджыты хуызӕн. Ӕнусон цардмӕ кӕй ӕнхъӕлмӕ кӕсӕм, уымӕ гӕсгӕ зӕгъӕн ис, ӕмӕ Иегъовӕйӕн нырма ныртӕккӕ райдыдтам кусын. Кӕй зӕгъын ӕй хъӕуы, ӕнусон царды дӕргъы нын не Скӕнӕг Хуыцау нырма бирӕ хъуыддӕгтӕ бакӕндзӕн нӕ бӕрны. Фӕлӕ нӕ иууыл фыццаг хӕслӕвӕрд у Паддзахады тыххӕй хорз уацхъуыд хъусын кӕнын (1 Фессалоникӕгтӕм 2:4). Цы цӕстӕй кӕсӕм уыцы куыстмӕ? Уыцы ӕвзонг адӕймагау мах дӕр хъӕуы нӕ куыстмӕ нӕ зӕрдӕ радтын, зӕрдиагӕй ӕмӕ йӕ ӕнӕзивӕгӕй кӕнын — о, нӕ удӕй арт уадзын!

3. Цӕмӕй хорз уацхъуыд ӕнтыстджынӕй хъусын кӕнӕм, уый тыххӕй цы хъӕуы?

³ Кӕй зӕгъын ӕй хъӕуы, алыхатт ахӕм хорз зӕрдӕйы уагимӕ лӕггад кӕнын ӕнцон нӕу. Уацамындӕй дарддӕр ма нын царды ис ӕндӕр хӕстӕ дӕр. Ӕмӕ нын уыдон дӕр исынц нӕ хъарутӕ. Фылдӕр хатт нын бантысы сӕ бакӕнын ӕмӕ ма уыимӕ хъусын кӕнынӕн дӕр фаг рӕстӕг ссарын. Фӕлӕ уӕддӕр уый тыххӕй ӕдзухдӕр хъӕуы тох кӕнын (Маркы 8:34). Йесойы ныхӕстӕм гӕсгӕ, цӕмӕй чырыстон фӕндагыл ӕнтыстджынӕй цӕуӕм, уый тыххӕй нӕ хъӕуы ӕппӕт тыхтӕй архайын (Лукайы 13:24).

4. Ӕрвылбоны сагъӕстӕ куыд ис гӕнӕн, ӕмӕ бандавой нӕ ахастыл Хуыцауы хъуыддӕгтӕм?

⁴ Утӕппӕт хъуыддӕгтӕ нӕ кӕй хъӕуы кӕнын, уымӕ гӕсгӕ диссаг нӕу, хаттӕй-хатт кӕй бафӕллайӕм ӕмӕ нӕм тыхы мур кӕй нал вӕййы, уый. «Царды мӕт» нӕ, гӕнӕн ис, афтӕ бадома, ӕмӕ Хуыцауы хъуыддӕгтӕн мауал аргъ кӕнӕм ӕмӕ сӕ зӕрдиагӕй мауал ӕххӕст кӕнӕм (Лукайы 21:34, 35; Маркы 4:18, 19). Ӕнӕххӕст кӕй стӕм, уый аххосӕй гӕнӕн ис ӕмӕ нӕ «фыццаг уарзондзинад» ферох кӕнӕм (Раргомад 2:1—4). Ӕмӕ уӕд Иегъовӕйы тыххӕй цы аразӕм, уый араздзыстӕм ӕнӕрайгӕ, ӕрмӕстдӕр афтӕ кӕй ӕмбӕлы, уый тыххӕй. Цӕмӕй ӕдзухдӕр нӕ удӕй арт уадзӕм, уый тыххӕй нын Библи куыд ӕххуыс кӕны?

Нӕ зӕрдӕты — «пиллон артау»

5, 6. Павелӕн хъусын кӕныны фадат кӕй уыд, уымӕ цы цӕстӕй каст?

⁵ Иегъовӕ нын нӕ бӕрны цы лӕггаддзинад бакодта, уый афтӕ зынаргъ у, ӕмӕ йӕм ӕнӕбары, куыдфӕндыйы цӕстӕй кӕсӕн нӕй. Апостол Павелӕн хорз уацхъуыд хъусын кӕныны фадат кӕй уыд, уымӕн тынг аргъ кодта ӕмӕ йӕхи уый аккагыл нӕ нымадта, цӕмӕй ахӕм хъуыддаг уыдаид йӕ бӕрны. Уый загъта: «Мӕнӕн, ӕппӕт сыгъдӕджытӕй къаддӕрӕн, лӕвӕрд у ацы хорз лӕвар — хъусын кӕнын муртаттӕн Чырыстийы ӕнӕкӕрон хъӕздыгдзинады [хорз уацхъуыд] ӕмӕ раргом кӕнын ӕппӕтӕн, цӕй мидӕг ис хӕдзарарӕзтады сусӕггад, ӕнустӕй нырмӕ ӕхгӕд цы уыд Хуыцауы мидӕг, ӕппӕт дӕр Йесо Чырыстийӕ скӕнӕг» (Ефесӕгтӕм 3:8, 9).

⁶ Павелӕн йӕ лӕггаддзинадмӕ цы раст ахаст уыд, уый махӕн у диссаджы дӕнцӕг. Уый йе ’рвысты Ромӕгтӕм ахӕм ныхӕстӕ загъта: «Мӕнмӕ цы хауы, ӕз цӕттӕ дӕн хорз уацхъуыд хъусын кӕнынмӕ». Павел хорз уацхъуыдӕй ӕфсӕрмы нӕ кодта (Ромӕгтӕм 1:15, 16). Уымӕн уыди раст ахаст: уый цӕттӕ уыд йӕ куыст ӕххӕст кӕнынмӕ.

7. Павел йе ’рвысты Ромӕгтӕм чырыстӕтты цӕмӕй фӕдзӕхсы?

 ⁷ Апостол Павел, зӕрдиагӕй кӕй хъӕуы хъусын кӕнын, уый хорз ӕмбӕрста ӕмӕ Ромы чырыстӕттӕн дӕр фӕдзӕхста: «Зӕрдиагдзинады лӕмӕгъ ма кӕнут; удӕй арт уадзут; Хицауӕн кусут» (Ромӕгтӕм 12:11). «Лӕмӕгъ кӕнын»-ӕй тӕлмац грекъаг дзырдӕн йӕ нысаниуӕг у зивӕг кӕнын, уӕзбын. Чи зоны, нӕ лӕггаддзинад иумӕйагӕй ӕвзӕр нӕ цӕуы, фӕлӕ уӕддӕр алчидӕр хъуамӕ кӕса йӕхимӕ, цӕмӕй йӕ уырнындзинад гыццылдӕр куы фӕцуда, уӕд ӕй фӕхата ӕмӕ цӕттӕ уа йӕ ахаст фӕивынмӕ (Фӕсномыг ныхӕстӕ 22:3).

8. а) Иеремийы зӕрдӕйы «пиллон артау» цы сси ӕмӕ цӕмӕн? ӕ) Иеремийыл цы ’рцыд, уый нӕ цӕуыл ахуыр кӕны?

⁸ Нӕ ныфс куы асӕтта, уӕд нын стыр ӕххуыс уыдзӕн Хуыцауы сыгъдӕг уд дӕр. Зӕгъӕм, иухатт пехуымпар Иеремийӕн йӕ ныфс афтӕ асаст, ӕмӕ йын Хуыцау йӕ бӕрны цы хӕслӕвӕрд бакодта, уый ныууадзынмӕ дӕр ӕрхъавыд. Мӕнӕ куыд загъта уый Иегъовӕйӕ: «Нал кӕндзынӕн Йӕ кой ӕмӕ нал дзурдзынӕн амӕй фӕстӕмӕ Йӕ номӕй». Цымӕ уый ууыл дзурӕг уыд, ӕмӕ Иеремийӕн Хуыцауимӕ йӕ ахастытӕ бынтондӕр фехӕлдысты? Нӕ. Ахӕм тыхст уавӕры дӕр Иеремийӕн йӕ уырнындзинад афтӕ фидар уыд, Иегъовӕйы афтӕ тынг уарзта ӕмӕ ӕцӕгадыл афтӕ ӕнувыд уыд, ӕмӕ йӕхимӕ уыйас хъарутӕ ссардта, цӕмӕй дарддӕр дӕр адӕмӕн дзырдтаид Иегъовӕйы тӕрхӕтты тыххӕй. Уый загъта: «Йӕ [Иегъовӕйы] дзырд мӕ зӕрдӕйы уыд пиллон артау, ахызт ме стджыты, мӕхимидӕг ӕй кӕй дарын, уымӕй бафӕлладтӕн, нал ӕй уромын» (Иереми 20:9). Хуыцауӕн иузӕрдионӕй чи лӕггад кӕны, уыдон дӕр рӕстӕгӕй-рӕстӕгмӕ сӕхи фӕхатынц лӕмӕгъ, ныфссаст, ӕмӕ уым диссагӕй ницы ис. Фӕлӕ Иегъовӕйӕ ӕххуыс куы курой, уӕд сын уый уындзӕн сӕ зӕрдӕтӕ, ӕмӕ кӕд Иеремийау уыдонӕн дӕр Хуыцауы ныхас сӕ зӕрдӕты ис, уӕд сӕ йӕ сыгъдӕг удӕй цух нӕ уадздзӕн (Лукайы 11:9—13; Куыстытӕ 15:8).

Хуыцауы сыгъдӕг «уды мынӕг ма кӕнут»

9. Хуыцауы сыгъдӕг уды цы бахъыгдардзӕн махӕн ӕххуыс кӕнынӕй?

⁹ Апостол Павел сидтис фессалоникӕгтӕм, зӕгъгӕ, Хуыцауы сыгъдӕг «уды мынӕг ма кӕнут» (1 Фессалоникӕгтӕм 5:19). Ӕмӕ ӕцӕгдӕр, Хуыцауы сӕйраг уагӕвӕрдты ныхмӕ цы у, ууыл куы хъуыды кӕнӕм ӕмӕ уый куы аразӕм, уӕд Хуыцауы сыгъдӕг удӕн уый фадат нӕ уыдзӕн, цӕмӕй нӕ нӕ лӕггаддзинады фидар кӕна (Ефесӕгтӕм 4:30). Абон махӕн, чырыстӕттӕн, нӕ бӕрны ис хорз уацхъуыд хъусын кӕнын. Ӕмӕ уый мах нымайӕм тынг стыр кадыл. Махмӕ диссаг нӕ кӕсы, Хуыцауы чи нӕ зоны, уыдон хорз уацхъуыдӕн кӕй нӕ аргъ кӕнынц, уый. Фӕлӕ хорз уацхъуыды ахадындзинад цы чырыстон ӕмбары, уый йӕ царды фыццаг бынаты куы не ’вӕра, уӕд тӕссаг у, йӕ зӕрдӕйы Хуыцауы разӕнгардгӕнӕг тыхы зынг куы ахуысса, уымӕй.

10. а) Адӕм хорз уацхъуыдмӕ цы цӕстӕй кӕсынц, уый ныл куыд гӕнӕн ис, ӕмӕ бандава? ӕ) 2 Коринфӕгтӕм 2:17-ӕм стихмӕ гӕсгӕ нын нӕ лӕггаддзинадмӕ цавӕр ахаст хъуамӕ уа?

¹⁰ Чи зоны адӕмӕй иутӕ хъуыды кӕнынц, зӕгъгӕ, нӕ уацамынды нысан ӕрмӕстдӕр уый мидӕг ис, цӕмӕй литературӕ парахат кӕнӕм. Иннӕты хъуыдымӕ гӕсгӕ та хӕдзарӕй-хӕдзармӕ ӕрмӕстдӕр уый тыххӕй цӕуӕм, цӕмӕй мысайнӕгтӕ ӕмбырд кӕнӕм. Ахӕм ӕнӕраст хъуыдытӕ нӕ зӕрдӕмӕ ӕгӕр хӕстӕг куы исӕм, уӕд уый ӕвзӕрырдӕм фӕзындзӕн нӕ лӕггаддзинадыл. Цӕй уӕдӕ уыцы ныхӕстыл ӕгӕр ма мӕт кӕнӕм, фӕлӕ нӕ зӕрдыл дарӕм, нӕ лӕггаддзинадмӕ Иегъовӕ ӕмӕ Йесо цы цӕстӕй кӕсынц, уый, ӕмӕ йӕм мах дӕр ахӕм цӕстӕй кӕсӕм. Уыцы хъуыддаджы нын дӕнцӕг у апостол Павел. Уый загъта: «Мах нӕ халӕм Хуыцауы ныхӕстӕ, куыд бирӕтӕ, фӕлӕ хъусын кӕнӕм зӕрдиагӕй, куыд Хуыцауӕй, Хуыцауы раз, Чырыстийы мидӕг» (2 Коринфӕгтӕм 2:17).

11. Фыццаг чырыстӕттӕ ӕфхӕрд куы ӕййӕфтой, уӕд дӕр зӕрдиагӕй цӕй фӕрцы хъусын кодтой ӕмӕ уыдоны дӕнцӕг махыл куыд хъуамӕ ӕндава?

¹¹ Йесо куы амард, уӕд Иерусалимы йӕ ахуыргӕнинӕгтӕ цасдӕр рӕстӕг ӕййӕфтой карз ӕфхӕрд. Ӕдзух сӕ фӕдыл зылдысты ӕмӕ сын хъусын кӕныны бар нӕ лӕвӕрдтой. Фӕлӕ Библийы дзырдӕуы, зӕгъгӕ, ахуыргӕнинӕгтӕ «сӕххӕст сты Сыгъдӕг Удӕй иуылдӕр ӕмӕ Хуыцауы ныхас дзырдтой уӕндонӕй» (Куыстытӕ 4:17, 21, 31). Цалдӕр азы фӕстӕ Павел Тимофеймӕ цы ныхӕстӕ ныффыста, уыдон ирдӕй ӕвдисынц, чырыстӕттӕн сӕ лӕггаддзинадмӕ цавӕр раст ахаст хъуамӕ уа, уый. Павел загъта: «Хуыцау ратта махӕн тӕрсыны уды [«зӕрдӕ», НФ] нӕ, фӕлӕ тыхы, уарзондзинады ӕмӕ ӕнӕхӕлды. Уӕдӕ ӕфсӕрмы  ма кӕн нӕ Хицау Йесо Чырыстийыл ӕвдисӕнадӕй, нӕдӕр мӕнӕй, Йӕ ахӕстӕй; фӕлӕ фыдӕбон кӕн Чырыстийы хорз уацхъуыды тыххӕй, Хуыцауы хъаруйӕ» (2 Тимофеймӕ 1:7, 8).

Цы хӕс ныл ис адӕмы раз?

12. Хорз уацхъуыд сӕйраджыдӕр цӕй тыххӕй хъусын кӕнӕм?

¹² Цӕмӕй нын нӕ лӕггаддзинадмӕ раст ахаст уа, уый тыххӕй нӕ архайын хъӕуы сыгъдӕг зӕрдӕйӕ. Цӕй тыххӕй хъусын кӕнӕм? Йӕ сӕйраг аххосаг бӕрӕг у псаломзарӕггӕнӕджы ныхӕстӕй: «Арфӕ кӕнӕнт Дӕуӕн [Иегъовӕ] Дӕ сыгъдӕджытӕ. Уадз хъусын кӕнӕнт Дӕ паддзахады кад, ӕмӕ уац хӕссӕнт Дӕ стыр хъомысы тыххӕй, цӕмӕй базонын кӕной адӕймӕгты фырттӕн Дӕ стыр хъомысы тыххӕй ӕмӕ Дӕ паддзахады кадджын стырады тыххӕй» (Псалом 144:10—12). О, мах уый тыххӕй хъусын кӕнӕм, цӕмӕй ӕппӕт адӕймагады раз кадджын кӕнӕм Иегъовӕйы ӕмӕ йын бӕрзонд кӕнӕм йӕ ном. Уӕдӕ иугӕр афтӕ у, уӕд нӕм адӕмӕй бынтон куы ничи хъуса, уӕддӕр ирвӕзындзинады хабар иузӕрдионӕй кӕй хъусын кӕнӕм, уымӕй бӕрзонд кӕны Иегъовӕйы ном.

13. Цы нӕ разӕнгард кӕны адӕмӕн ирвӕзындзинады ныфсы тыххӕй дзурынмӕ?

¹³ Уый ӕддейӕ мах уарзӕм адӕмы, стӕй нӕ нӕ фӕнды, цӕмӕй сӕ туг махыл уа, ӕмӕ нӕ уый дӕр разӕнгард кӕны хъусын кӕнынмӕ (Иезекиль 33:8; Маркы 6:34). Чырыстон ӕмбырды ӕдде цы адӕм ис, уыдоны тыххӕй Павел афтӕ загъта: «Ӕз хӕсджын дӕн Еллинтӕй, фыдгӕнджытӕй, зондджынтӕй ӕмӕ ницы зонджытӕй» (Ромӕгтӕм 1:14). Ам Павел дзуры, адӕмӕн  хорз уацхъуыд хъусын кӕнын хӕсджын кӕй уыд, ууыл, уымӕн ӕмӕ Хуыцауы фӕндон уый мидӕг ис, «цӕмӕй ӕппӕт адӕмтӕ фервӕзой» (1 Тимофеймӕ 2:4). Абон нӕ алыварс цы адӕм ис, уыдоны мах дӕр афтӕ уарзӕм ӕмӕ сӕ разы нӕхи нымайӕм хӕсджыныл. Иегъовӕ адӕймагады афтӕ тынг уарзы, ӕмӕ йӕ Фырты зӕхмӕ ӕрӕрвыста уыдоны сӕрвӕлтау амӕлынмӕ (Иоанны 3:16). Хуыцауы ’рдыгӕй уый тынг стыр удуӕлдай хъуыддаг уыд. Уӕдӕ нӕ алыварс цы адӕм ис, уыдонӕн Йесойы нывонды уылты сӕ бон ирвӕзындзинад райсын кӕй у, уый тыххӕй сын хъусынгӕнгӕйӕ нӕ рӕстӕг ӕмӕ нӕ хъарутӕ куы фӕхардз кӕнӕм, уӕд мах дӕр ӕвдисӕм, Иегъовӕ цы уарзондзинад равдыста, ахӕм уарзондзинад.

14. Чырыстон ӕмбырды ӕдде цы дуне ис, уый тыххӕй Библийы цы дзырдӕуы?

¹⁴ Иегъовӕйы Ӕвдисӕнтӕ адӕмы нымайынц сӕ фидӕны чырыстон ӕфсымӕртӕ ӕмӕ хотыл. Раст у, уӕндонӕй хъуамӕ хъусын кӕнӕм, фӕлӕ уый ууыл дзурӕг нӕу, ӕмӕ адӕмимӕ тох кӕнӕм. Библийы дзырд куы фӕцӕуы ӕгас дунейыл, уӕд дзы арӕхдӕр ӕмбӕлы карз ныхӕстӕ. Дзырд «дунейӕ» Павел спайда кодта ӕвзӕр нысаниуӕджы, «ацы дунейы зонд» ӕмӕ «дунейы цыбӕлты» кой куы кодта, уӕд (1 Коринфӕгтӕм 3:19; Титмӕ 2:12, НФ). Афтӕ ма Павел Ефесы чырыстӕттӕн сӕ зӕрдыл ӕрлӕууын кодта, зӕгъгӕ, сымах «ацы дунейы ӕгъдаумӕ гӕсгӕ» куы цардыстут, уӕд Хуыцауӕн уыдыстут «мард» (Ефесӕгтӕм 2:1—3). Ацы ныхӕстӕ дӕр ӕмӕ ма ӕндӕр ахӕм ныхӕстӕ дӕр ӕмхуызон сты апостол Иоанн цы загъта, уыимӕ, зӕгъгӕ, «ӕгас дуне дӕр ис Фыдбылызы къухы» (1 Иоанны 5:19, НД).

15. Чырыстон ӕмбырды ӕдде цы адӕм ис, уыдонмӕ нын цавӕр ахаст хъуамӕ ма уа ӕмӕ цӕмӕн?

¹⁵ Ӕрмӕст хъуамӕ нӕ зӕрдыл дарӕм, ахӕм ныхӕстӕ хицӕн адӕймӕгтӕм кӕй нӕ хауынц, фӕлӕ Хуыцауӕй иппӕрд дунемӕ ӕмткӕй райсгӕйӕ. Чырыстӕттӕ развӕлгъау нӕ дзурынц, уӕртӕ уыцы адӕймагӕн ахӕм ахаст уыдзӕн хорз уацхъуыдмӕ, иннӕмӕн та ахӕм, зӕгъгӕ. Махӕн нӕ бон ницы хуызы у искӕй «сӕгъ» схонын. Йесо «фысты сӕгътӕй» ахицӕн кӕнынмӕ куы ’рцӕуа, уӕд чи цы уыдзӕн, уый махӕй кӕнгӕ нӕу (Матфейы 25:31—46). Иегъовӕ тӕрхонгӕнӕгӕй Йесойы сӕвӕрдта, мах нӕ, фӕлӕ. Уый ӕддейӕ хорз уацхъуыд арӕх ахӕм сӕфт адӕймӕгтӕ райсынц, ӕмӕ сын сраст уӕвын ӕнхъӕл бынтондӕр ничиуал вӕййы. Фыдгӕнджытӕ ӕмӕ ӕгъдаухалджытӕ кӕй уыдысты, уый ныр зонгӕ дӕр ничиуал бакӕны — хӕрзӕгъдау, ӕцӕг чырыстон адӕймӕгтӕ свӕййынц. Уымӕ гӕсгӕ кӕд иуӕй-иу адӕймӕгтимӕ нӕ иу кӕнӕм, уӕддӕр нын фадат куы вӕййы, уӕд сын ӕхсызгонӕй радзурӕм Паддзахады ныфсы тыххӕй. Сыгъдӕг Фыстады дзырдӕуы, уырнӕг чи нӕма уыд, афтӕмӕй «ӕнусон цардмӕ раст ахаст» кӕмӕн уыдис, ахӕм адӕймӕгты тыххӕй. Ӕппынфӕстаг-иу уыдон систы чырыстӕттӕ (Куыстытӕ 13:48, НД). Цалынмӕ адӕймагӕн хорз уацхъуыд, чи зоны, цалдӕр хатты дӕр, нӕ радзурм, уӕдмӕ нӕй зӕгъӕн, ӕнусон цардмӕ йын раст ахаст ис ӕви нӕ. Уымӕ гӕсгӕ нӕ зӕрдӕ дарӕм, ирвӕзындзинады уацхъуыд чи нӕма райста, уыдонӕй йӕ исчи уӕддӕр кӕй райсдзӕн, ууыл, ӕмӕ сын уымӕ гӕсгӕ дарддӕр дӕр «фӕлмас ӕмӕ уӕзданӕй» хъусын кӕнӕм (1 Петры 3:15, НФ; 2 Тимофеймӕ 2:25).

16. Цӕй тыххӕй тырнӕм нӕ «амоныны дӕсныйад» хуыздӕр кӕнынмӕ?

¹⁶ Хуыцауы Ныхас хуыздӕр амоныныл куы кусӕм, уӕд нӕ хъусын кӕнын дӕр тынгдӕр фӕнддзӕн. Цӕвиттон, адӕймаг цыдӕр цымыдисаг хъазтӕй хъазын куы нӕ фӕзоны, уӕд ӕй хъазын дӕр нӕ фӕфӕнды. Фӕлӕ хъазын чи зоны, уый та дзы йӕ мондӕгтӕ суадзы. Афтӕ чырыстӕттӕ дӕр сӕ «амоныны дӕсныйад» фӕхуыздӕр кӕныныл куы фӕкусынц, уӕд  сӕ лӕггаддзинадӕй райсынц фылдӕр циндзинад (2 Тимофеймӕ 4:2, НД; Титмӕ 1:9). Павел фӕдзӕхста Тимофейӕн: «Архай дӕхи равдисын Хуыцауӕн аккагӕй, ӕнӕуайдзӕф кусӕгӕй, ӕцӕгады дзырд раст ахуыргӕнӕгӕй [«ӕцӕгады дзырд раст чи амоны, ахӕмӕй», НФ]» (2 Тимофеймӕ 2:15). Цы нын баххуыс кӕндзӕн нӕ амоныны курдиӕттӕ фӕхуыздӕр кӕнынӕн?

17. Куыд у нӕ бон Библийы зонындзинӕдтӕ «бауарзын» ӕмӕ нын уыцы зонындзинӕдтӕ уацамынды куыд ӕххуыс кӕндзысты?

¹⁷ Зӕгъӕм, нӕ раст зонындзинӕдтӕ фылдӕр кӕнын. Апостол Петр нӕ разӕнгард кӕны: «Куыд ноггуырд сывӕллӕттӕ, [афтӕ] бауарзут сыгъдӕг дзырды ӕхсыр, цӕмӕй уымӕй сымах сырӕзат ирвӕзындзинадӕн» (1 Петры 2:2). Ӕнӕниз саби йӕхи ӕхсырмӕ фӕивазы ӕнӕахъуыдыйӕ. Фӕлӕ чырыстоны та Библийы зонындзинӕдтӕ хъӕуы «бауарзын». Ӕмӕ цӕмӕй уый къухы бафта, уый тыххӕй та хъуамӕ нӕхи сахуыр кӕнӕм Библи лӕмбынӕг кӕсын ӕмӕ иртасыныл (Фӕсномыг ныхӕстӕ 2:1—6). Цӕмӕй Хуыцауы Ныхас иннӕтӕн арӕхстджынӕй амонӕм, уый тыххӕй хъӕуы ӕппӕт тыхтӕй архайын ӕмӕ хиуыл бирӕ кусын, фӕлӕ уыцы фыдӕбӕттӕ дзӕгъӕлы не сты. Хуыцауы Ныхас лӕмбынӕг иртасгӕйӕ цы циндзинад исӕм, уый нӕ разӕнгард кӕндзӕн Хуыцауы сыгъдӕг удӕй арт уадзынмӕ ӕмӕ цы базонӕм, уый иннӕтӕн зӕрдиагӕй дзурынмӕ.

18. Чырыстон фембӕлдтӕ нын куыд ӕххуыс кӕнынц ӕцӕгады дзырд раст амонынӕн?

¹⁸ Цӕмӕй Хуыцауы Ныхас нӕ къухы ахадгӕ хотых уа, уымӕн тынг ахъаз сты чырыстон фембӕлдтӕ дӕр. Раныхӕсты, йе та фембӕлдты иннӕ хӕйтты Библийӕ стихтӕ каст куы фӕцӕуынц, уӕд хорз уаид, мах дӕр-иу сӕ нӕ Библиты куы ссариккам, уый. Программӕйы алы хаймӕ дӕр, уыимӕ комкоммӕ уацамынды тыххӕй кӕм цӕуы дзырд, уыдонмӕ дӕр лӕмбынӕг куы хъусӕм, уӕд нын уый стыр пайда уыдзӕн. Уӕдӕ уазал цӕстӕй хъуамӕ ма кӕсӕм, сценӕйыл цы равдыстытӕ вӕййы, уыдонмӕ дӕр. Уый та арӕх бӕрӕг вӕййы, ӕндӕр цӕуылдӕр кӕй фӕхъуыды кӕнӕм, йе та истытӕ кӕй фӕхыбар-хыбур кӕнӕм, уымӕй. Ӕмӕ та нӕ ам дӕр хъӕуы нӕхиуыл кусын ӕмӕ лӕмбынӕг хъусын (1 Тимофеймӕ 4:16). Чырыстон фембӕлдтӕ нын фидар кӕнынц нӕ уырнындзинад, ӕххуыс нын кӕнынц Хуыцауы Ныхас уарзынӕн ӕмӕ нӕ цӕттӕ кӕнынц хорз уацхъуыд зӕрдиагӕй хъусын кӕнынмӕ.

Ныфс нӕ ис Иегъовӕйы ӕххуысӕй

19. Уацамынды иудадзыг цӕуын ахсджиаг цӕмӕн у?

¹⁹ Уацамынды йӕ «удӕй арт чи уадзы», уыдон тырнынц иудадзыг хъусын кӕнынмӕ  (Ефесӕгтӕм 5:15, 16). Кӕй зӕгъын ӕй хъӕуы, алкӕмӕндӕр йӕ уавӕртӕ алыхуызон сты ӕмӕ ирвӕзын кӕныны куысты иуӕн цас рӕстӕг у йӕ бон хайад исын, иннӕмӕн уыйбӕрц нӕу (Галатӕгтӕм 6:4, 5). Фӕлӕ уӕддӕр ӕдӕппӕт цал сахаты хъусын кӕнӕм, уымӕй бирӕ ахсджиагдӕр у, нӕ ныфсы тыххӕй адӕмимӕ куыд арӕх фӕныхас кӕнӕм, уый (2 Тимофеймӕ 4:1, 2). Цас фылдӕр хъусын кӕнӕм, уыйас тынгдӕр ӕмбарӕм уыцы куыст куыд ахсджиаг у, уый (Ромӕгтӕм 10:14, 15). Ацы дунейы ӕнӕ ныфсӕй чи уынӕргъы ӕмӕ чи хъӕрзы, уыцы сыгъдӕгзӕрдӕ адӕмыл цас арӕхдӕр ӕмбӕлӕм, уыйас сын тынгдӕр тӕригъӕд кӕндзыстӕм ӕмӕ нӕ тынгдӕр фӕнддзӕн, цӕмӕй сын баххуыс кӕнӕм (Иезекиль 9:4; Ромӕгтӕм 8:22).

20, 21. а) Цас куыст ма нӕм ӕнхъӕлмӕ кӕсы? ӕ) Нӕхӕдӕг зӕрдӕбынӕй куы архайӕм, уӕд нын Иегъовӕ куыд ӕххуыс кӕндзӕн?

²⁰ Иегъовӕ нын бахӕс кодта хорз уацхъуыд хъусын кӕнын. Уыцы куыст у, Хуыцау нын куыд йӕ «ӕмкусджытӕ», афтӕ нӕ бӕрны цы фыццаг хӕслӕвӕрд бакодта, уый (1 Коринфӕгтӕм 3:6—9). Мах фӕнды уыцы хӕслӕвӕрд зӕрдӕбынӕй ӕмӕ ӕппӕт тыхтӕй ӕххӕст кӕнын (Маркы 12:30; Ромӕгтӕм 12:1). Ацы дунейы нырма бирӕ ис, раст ахаст кӕмӕн ис ӕмӕ ӕцӕгад чи агуры, ахӕм адӕм. Куыст бирӕ ис нырма, фӕлӕ ӕнӕзӕрдӕхудтӕй куы архайӕм, уӕд нын Иегъовӕ ӕнӕмӕнг ӕххуыс кӕндзӕн (2 Тимофеймӕ 4:5).

²¹ Иегъовӕ нын радта «удон кард», йӕ Ныхас, ӕмӕ нӕ фидар кӕны йӕ тыхӕй. Хуыцауы фӕрцы у нӕ бон «уӕндонӕй хорз уацхъуыды сусӕггад» хъусын кӕнын (Ефесӕгтӕм 6:17—20). Гъе ӕмӕ нын Хуыцау ахӕм арфӕ ракӕнӕд, цӕмӕй махыл дӕр сӕххӕст уой, апостол Павел Фессалоникӕйы чырыстӕттӕм кӕй ныффыста, уыцы ныхӕстӕ, зӕгъгӕ, хорз уацхъуыд хъусын кӕнӕм «ӕрмӕст дзырды нӕ, фӕлӕ тыхы мидӕг ӕмӕ Сыгъдӕг Уды, ӕмӕ бирӕ бӕлвырдгӕнӕнимӕ [«фидарӕй», НД]» (1 Фессалоникӕгтӕм 1:5). Цӕй уӕдӕ зӕрдиагӕй хъусын кӕнӕм хорз уацхъуыд!

Цыбыр афӕлгӕст

• Царды бирӕ сагъӕстӕ кӕй ис, уый аххосӕй нӕ лӕггаддзинадӕн тӕссаг цӕмӕй у?

• Хорз уацхъуыд хъусын кӕныны фӕндон нӕ зӕрдӕты «пиллон артау» цыхуызы у?

• Цавӕр ахаст нын хъуамӕ ма уа нӕ лӕггадзинадмӕ?

• Хуыцауыл мах хуызӕн чи не ’ууӕнды, уыцы адӕммӕ нын цавӕр ахаст хъуамӕ уа?

• Цӕмӕй дарддӕр дӕр зӕрдиагӕй хъусын кӕнӕм, уый тыххӕй нын Иегъовӕ куыд ӕххуыс кӕны?

[Фарстатӕ ахуыр кӕнынӕн]

[Нывтӕ 21 фарсыл]

Чырыстӕттӕ дӕр Павел ӕмӕ Иеремийау зӕрдиагӕй хъусын кӕнынц.

[Нывтӕ 23 фарсыл]

Уацамынды зӕрдиагӕй архайӕм, Хуыцау ӕмӕ нӕ алыварс цы адӕм ис, уыдон кӕй уарзӕм, уый тыххӕй.