Иегъовӕ ӕххуыс кӕны фӕллад адӕймагӕн
Иегъовӕ ӕххуыс кӕны фӕллад адӕймагӕн
«[Иегъовӕ] дӕтты тых фӕллад адӕймагӕн ӕмӕ стыр хъару — ӕдыхӕн» (ИСАЙ 40:29).
1. Радзур, Хуыцауы сфӕлдыстады мидӕг цы тых ис, уый тыххӕй.
ИЕГЪОВӔ ӕгӕрон тыхы хицау у. Йе стыр хъару зыны йе сконд дунейы! Нӕ алыварс цыдӕриддӕр уынӕм, уыдон конд сты гыццылмур атомтӕй. Атом та афтӕ чысыл у, ӕмӕ дзы иу доны ӕртахы ис сӕдӕ квинтиллионы бӕрц *. Зӕххыл цард баст у, хуры хуылфы атомон реакцитӕй цы энерги сӕвзӕры, ууыл. Фӕлӕ цӕмӕй зӕххыл цард уа, уый тыххӕй нӕ цас хъӕуы хуры энерги? Хурӕй цы энерги цӕуы, уымӕй зӕхх исы ӕрмӕстдӕр йӕ хӕрзчысыл хай. Фӕлӕ «Хуры энергийӕ Зӕхмӕ цы гыццыл хай хӕццӕ кӕны... уый 100 000 хатты фылдӕр у, ӕппӕт дунейы куыстуӕттӕ ӕмткӕй райсгӕйӕ цы энерги хардз кӕнынц, уымӕй»,— загъта математик Фред Хойл йӕ чиныг «Астрономи»-йы («Astronomy»).
2. Исайы 40:26-ӕм стихы Иегъовӕйы хъаруйы тыххӕй цы дзырдӕуы?
2 Атомы скондмӕ ӕркӕсӕм ӕви цӕст кӕуыл не ’ххӕссы, уыцы дун-дунейы скондмӕ, алыран дӕр нӕ дисы ӕфтауы Иегъовӕйы ӕгӕрон тых. Диссаг нӕу, Исай афтӕ кӕй загъта: «Схӕц ма дӕ цӕстытыл бӕрзонд ӕмӕ акӕс. Чи сфӕлдыста ӕппӕт уыдӕттӕ? Стъалыты бӕрдзтӕн Уый зоны сӕ нымӕц ӕмӕ дзы алкӕйдӕр хоны йӕ номӕй. Йӕ хъомысӕн кӕрон кӕй нӕй ӕмӕ хъаруйӕ фидар кӕй у, уымӕ гӕсгӕ дзы иу дӕр нӕ сӕфы» (Исай 40:26). О, Иегъовӕ «хъаруйӕ фидар у», уый у, дун-дуне ӕгасӕй дӕр кӕй фӕрцы фӕзынд, уыцы «стыр хъомысы» Суадон.
Хъӕуы нӕ, нӕхимӕ цы хъару ис, уымӕй фылдӕр хъару
3, 4. а) Адӕймаг цӕмӕй фӕллайы? ӕ) Цавӕр фарстӕн хъӕуы ссарын дзуапп?
3 Хуыцаумӕ цас хъару ис, уыйас хъару адӕймагмӕ нӕй, Хуыцауӕй хъауджыдӕр уый зоны фӕллайын. Алыран дӕр фенӕн ис фӕллад адӕмы. Уыдон сыстынц фӕлладӕй, куыстмӕ йе та скъоламӕ ацӕуынц фӕлладӕй, хӕдзармӕ дӕр ӕрбаздӕхынц фӕлладӕй, ӕхсӕв та хуысгӕ скӕнынц ӕнӕуи фӕлладӕй нӕ, фӕлӕ уӕнгмард ӕмӕ тыхсастӕй. Иуӕй-иуты фӕфӕнды искуыдӕм ацӕуын ӕмӕ иугыццыл баулӕфын. Иегъовӕйы лӕггадгӕнджытӕ уӕвгӕйӕ мах дӕр фӕллайӕм, уымӕн ӕмӕ Хуыцауы рӕстаг домӕнтӕм гӕсгӕ цӕрын ӕнцон нӕу (Маркы 6:30, 31; Лукайы 13:24; 1 Тимофеймӕ 4:8). Уымӕй уӕлдай ма нӕ хъару хъӕуы бирӕ ӕндӕр хъуыддӕгтӕн дӕр.
4 Кӕд чырыстӕттӕ стӕм, уӕддӕр мах дӕр тыхсӕм, ӕппӕт иннӕ адӕм цы зындзинӕдтӕй тыхсынц, уыдонӕй (Иов 14:1). Адӕймагӕн йӕ ныфс сӕттынц ӕмӕ йын йӕ тых исынц алыхуызон низтӕ, цӕрын афтӕ тынг зын кӕй сси, уый ӕмӕ ӕндӕр зындзинӕдтӕ. Уымӕй дарддӕр ма чырыстӕттӕй иуӕй-иутӕ ӕфхӕрд цӕуынц сӕ рӕстаг царды тыххӕй дӕр (1 Петры 3:14; 2 Тимофеймӕ 3:12). Ацы дуне ӕмӕ нӕ Паддзахады уацхъуыды ныхмӕлӕуджытӕ алыбон дӕр кӕй ссӕндынц, уый аххосӕй нӕ иуӕй-иутӕ афтӕ бафӕллайынц, ӕмӕ сӕ бон нал вӕййы, Иегъовӕйӕн раздӕр цас лӕггад кодтой, уыйбӕрц лӕггад кӕнын. Уымӕй уӕлдай ма Сайтан Хӕйрӕг ӕппӕт тыхтӕй архайы, цӕмӕй нӕ Хуыцауы раз фӕрӕдийын кӕна. Уӕдӕ цӕмӕй ма ӕрлӕмӕгъ уӕм ӕмӕ ма фӕцудӕм, уымӕн духовон тых куыд ис райсӕн?
5. Чырыстон лӕггаддзинад ӕххӕст кӕнынӕн адӕймаджы, йӕхимӕ цы хъару ис, уымӕй фылдӕр хъару цӕмӕн хъӕуы?
5 Духовон тых нӕ бон у ссарын Иегъовӕмӕ, ӕппӕтхъомысджын Сфӕлдисӕгмӕ. Адӕймагӕн чырыстон лӕггаддзинад ӕххӕст кӕнын йӕхи хъарутӕй йӕ бон кӕй ницы хуызы у, уый бамбарын кодта апостол Павел. Уый фыста: «Ацы хӕзна мах хӕссӕм ӕлыгӕй мигӕнӕнты, цӕмӕй уыцы стыр хъару [«нӕхимӕ цы хъару ис, уымӕй фылдӕр хъару», НД] махыл нымад ма уа, фӕлӕ Хуыцауыл» (2 Коринфӕгтӕм 4:7). Сӕрст чырыстӕттӕ, зӕххон ныфс кӕмӕн ис, уыцы ӕмбӕлццӕттимӕ кӕнынц «фидыддзинады куыст» (2 Коринфӕгтӕм 5:18; Иоанны 10:16; Раргомад 7:9). Ӕнӕххӕст уӕвгӕйӕ ӕмӕ алыхуызон ӕфхӕрд ӕййафгӕйӕ дӕр Хуыцауы куыст кӕй кӕнӕм, уый ууыл дзурӕг нӕу, ӕмӕ уый ӕрмӕстдӕр нӕхи хъарутӕй ӕфты нӕ къухы. Иегъовӕ нын ӕххуыс кӕны йӕ сыгъдӕг уды фӕрцы ӕмӕ уымӕ гӕсгӕ цас лӕмӕгъдӕр стӕм, уыйас тынгдӕр зыны йӕ хъомыс. Цӕй стыр ныфс дӕтты, Хуыцау нын йӕ Ныхасы кӕй дзуры: «Рӕстгӕнджыты... фидар кӕны Хицау»! (Псалом 36:17).
«Иегъовӕ у не стыр тых»
6. Иегъовӕ нӕ тыхы Суадон кӕй у, уый Фыстад куыд бӕлвырд кӕны?
6 Нӕ уӕларвон Фыдмӕ ис «стыр тых» ӕмӕ йын мах бафидар кӕнын зын нӕу. Ӕцӕгдӕр нӕ бон у зӕгъын: «[Иегъовӕ] дӕтты тых фӕллад адӕймагӕн ӕмӕ стыр хъару — ӕдыхӕн. Лӕппутӕ дӕр бафӕллайынц ӕмӕ ӕрлӕмӕгъ вӕййынц, йӕ тӕккӕ тыхыл чи ис, уыдон дӕр зонынц фӕкӕлын, Иегъовӕйыл йӕ ныфс чи дары, уыдон та стыхджын уыдзысты. Цӕргӕстау сӕ базыртыл схӕцдзысты, размӕ тындздзысты ӕмӕ нӕ бафӕллайдзысты, цӕудзысты ӕмӕ нӕ бафӕлмӕцдзысты» (Исай 40:29—31). Бонӕй-бонмӕ дунейы ӕндӕвдад алырдыгӕй тыхджындӕр кӕй кӕны, уымӕ гӕсгӕ хаттӕй-хатт вӕййӕм, йӕ къӕхтӕ кӕмӕ нал фӕхъусынц ӕмӕ кӕй нал фӕхӕссынц, ахӕм тыхсаст згъорӕджы хуызӕн. Фӕлӕ цард райсыны оххыл дугъ йӕ кӕронмӕ кӕй фӕхӕццӕ кӕны, уымӕ гӕсгӕ нӕхи хъуамӕ ма ӕруадзӕм (2 Паралипоменон 29:11). Нӕ цыфыддӕр знаг Хӕйрӕг лӕбуры «богътӕгӕнаг домбайау» ӕмӕ йӕ фӕнды, цӕмӕй нӕ ӕрлӕууын кӕна (1 Петры 5:8, НФ). Уӕдӕ нӕ зӕрдыл дарӕм, Иегъовӕ «нӕ фидардзинад ӕмӕ нӕ уарт» кӕй у ӕмӕ уӕлдайджынтӕй кӕй «дӕтты тых фӕллад адӕймагӕн» (Псалом 27:7).
7, 8. Иегъовӕ Давид, Аввакум ӕмӕ Павелы кӕй бафидар кодта, уымӕн цавӕр бӕлвырдгӕнӕнтӕ ис?
7 Иегъовӕ Давидӕн лӕвӕрдта тых, ӕмӕ уый фӕрцы уыд йӕ бон цыфӕнды стыр зындзинадӕн дӕр бафӕразын. Уымӕ гӕсгӕ Давид фидарӕй загъта: «Хуыцауимӕ мах тыхджын стӕм; Уый ныммур кӕны не знӕгты» (Псалом 59:14, СПб). Иегъовӕ ма тых лӕвӕрдта пехуымпар Аввакумӕн дӕр, цӕмӕй пехуымпар уӕвгӕйӕ йӕ хӕс кӕронмӕ сӕххӕст кодтаид. Аввакумы 3:19-ӕм стихы дзырдӕуы: «Дунескӕнӕг Хуыцау Иегъовӕ у ме стыр тых, мӕ къӕхтӕ мын фестын кӕндзӕн саджы къӕхтӕ, ӕмӕ мӕ схизын кӕндзӕн бӕрзӕндтӕм». Махӕн ма хорз дӕнцӕг у Павел дӕр. Уый фыста: «Алцыдӕр мӕ бон у бафӕразын, хъару мын чи дӕтты, уый [Хуыцауы] фӕрцы» (Филиппӕгтӕм 4:13, НД).
8 Давид, Аввакум ӕмӕ Павелау мах дӕр хъуамӕ фидар кӕнӕм нӕ уырнындзинад, Хуыцауӕн йӕ бон мах бафидар кӕнын ӕмӕ нӕ фервӕзын кӕнын кӕй у, ууыл. «Стыр тых» нын Дунескӕнӕг
Хуыцау Иегъовӕ кӕй дӕтты, уый зонгӕйӕ, ӕркӕсӕм, нӕ уырнындзинад бафидар кӕнынӕн нын Хуыцау рӕдауӕй цы мадзӕлттӕ аразы, уыдонӕй цалдӕрмӕ.Духовон мадзӕлттӕ нӕ фидардзинадӕн
9. Нӕ уырнындзинад фидар кӕнынӕн чырыстон публикацитӕ цас ахъаз сты?
9 Сыгъдӕг Фыстад чырыстон публикациты ӕххуысӕй лӕмбынӕг кӕй ахуыр кӕнӕм, уый нын дӕтты ног тыхтӕ ӕмӕ нӕ фидар кӕны. Псаломзарӕггӕнӕг зарыд: «Тӕхудиаг [у] лӕг... Хицауы закъоны йӕ фӕндон [кӕмӕн ис], ӕмӕ Уый закъоныл хъуыды кӕны уый ӕхсӕвӕй-бонӕй. Ӕмӕ уыдзӕн уый куыд бӕлас, цӕугӕдоны цур сагъд, кӕцы ӕрхӕссы йӕ дыргъ йӕхи афон, ӕмӕ кӕцыйы сыф не руайы; ӕмӕ йын ӕппӕт уый цы кӕны, бантысдзӕн» (Псалом 1:1—3). Цӕмӕй не уӕнгты хъару уа, уый тыххӕй нӕ хӕрын куыд хъӕуы, раст афтӕ нӕм цӕмӕй духовон хъару уа, уый тыххӕй та хӕрын хъӕуы, Иегъовӕ нын йӕ Ныхас ӕмӕ чырыстон публикациты уылты цы хӕринаг дӕтты, уый. Уымӕ гӕсгӕ Библи ахуыр кӕнынмӕ уазал цӕстӕй нӕй кӕсӕн, хъуамӕ йӕ лӕмбынӕг ахуыр кӕнӕм ӕмӕ-иу цы базонӕм, ууыл хъуыды кӕнӕм.
10. Кӕд у нӕ бон ссарын рӕстӕг Библи ахуыр кӕнынӕн ӕмӕ йыл хъуыды кӕнынӕн?
10 «Хуыцауы арфадтыл» хъуыды кӕнын хӕссы стыр арфӕдзинӕдтӕ (1 Коринфӕгтӕм 2:10). Фӕлӕ кӕд у нӕ бон ссарын рӕстӕг хъуыды кӕнынӕн? Авраамы фырт Исахъ «изӕрырдӕм ацыд быдырмӕ ӕмӕ хъуыды кодта» (Уӕвынад 24:63—67). Псаломзарӕггӕнӕг Давид та «хъуыды кодта... [Хуыцауы] тыххӕй ӕхсӕвы хъахъхъӕныны афон» (Псалом 62:7). Хуыцауы Ныхас ахуыр кӕнын ӕмӕ йыл хъуыды кӕнын нӕ бон у райсомӕй, изӕры, ӕхсӕвы — иудзырдӕй, кӕдфӕнды дӕр. Библи афтӕ куы ахуыр кӕнӕм ӕмӕ йыл куы хъуыды кӕнӕм, уӕд нӕ уый та кӕны, Иегъовӕ духовон фидардзинадӕн цы мадзӕлттӕ аразы, уыдонӕй ӕндӕрмӕ — кувынмӕ.
11. Иудадзыг кувын ахсджиаг хъуыддагыл цӕмӕн хъуамӕ нымайӕм?
11 Хуыцаумӕ ӕппынӕдзухдӕр куы кувӕм, уӕд нӕ уый фидар кӕндзӕн. Уымӕ гӕсгӕ нӕ хъӕуы «кувыны ӕдзух лӕууын» (Ромӕгтӕм 12:12, НФ). Хаттӕй-хатт нӕ фӕхъӕуы уӕлдай зӕрдиагӕй зонд ӕмӕ тых курын, цӕмӕй фӕлварӕнты ма фӕцудӕм (Иаковы 1:5—8). Цӕй уӕдӕ бузныг уӕм Хуыцауӕй ӕмӕ йӕ кадджын кӕнӕм, йӕ фӕндтӕ кӕй ӕххӕст кӕны ӕмӕ нын йӕ хъуыддаг кӕнынӕн хъару кӕй дӕтты, уый тыххӕй (Филиппӕгтӕм 4:6, 7). Куывды уылты Иегъовӕимӕ нӕ ахастытӕ куы фидар кӕнӕм, уӕд нӕ уый никуы ныууадздзӕн. «Мӕнӕ,— зарыд Давид,— Хуыцау мӕ ӕххуысгӕнӕг» (Псалом 53:6).
12. Хуыцаумӕ йӕ сыгъдӕг уды тыххӕй кувын цӕмӕн хъӕуы?
12 Нӕ уӕларвон Фыд нын хъару ӕмӕ ныфс дӕтты йӕ сыгъдӕг уды, ома йӕ архайгӕ тыхы уылты. Павел фыста: «Мӕ уӕрджытыл ӕрлӕууын нӕ... Фыды раз. Уадз раттӕд сымахӕн Йӕ кады хъӕздыгдзинадмӕ гӕсгӕ, хъӕддых сфидар уӕвын, Йӕ Удӕй, мидӕггаг адӕймаджы [«цӕмӕй Йӕ Уды фӕрцы хъаруджын суат мидзӕрдӕйон адӕймагӕй», НФ]» (Ефесӕгтӕм 3:14—16). Мах хъуамӕ Иегъовӕмӕ кувӕм, цӕмӕй нӕ йӕ архайгӕ тыхӕй хайджын кӕна, ӕмӕ фидарӕй ӕууӕндӕм, кӕй нын ӕй дӕтдзӕн, ууыл. Ӕркӕсӕм, Йесо цы цӕвиттон ӕрхаста, уымӕ. Уый бафарста, зӕгъгӕ, сывӕллон кӕсаг куы ракура, уӕд ын йӕ уарзӕгой фыд калм ратдзӕн? Кӕй зӕгъын ӕй хъӕуы, нӕ. Уымӕ гӕсгӕ Йесо скодта ахӕм хатдзӕг: «Уӕдӕ сымах кӕд [тӕригъӕдджын стут ӕмӕ уымӕ гӕсгӕ чи тынгдӕр, чи та къаддӕр] фыдзӕрдӕ уӕвгӕйӕ, зонут хорз лӕвӕрттӕ дӕттын уӕ сывӕллӕттӕн, уӕд уӕлдайдӕр Уӕларвон Фыд ратдзӕн Сыгъдӕг Уды, уымӕй чи кура, уыдонӕн» (Лукайы 11:11—13). Цӕй уӕдӕ алыхатт дӕр нӕ куывтыты бӕлвырдӕй зынӕд ахӕм фидар уырнындзинад ӕмӕ макуы ферох кӕнӕм, Хуыцау иузӕрдион лӕггадгӕнджыты йӕ архайгӕ тыхӕй кӕй «хъаруджын кӕны», уый.
Ӕмбырд — тыхдӕттӕг
13. Цавӕр ахаст нын хъуамӕ уа чырыстон фембӕлдтӕм?
13 Иегъовӕ нӕ фидар кӕны чырыстон ӕмбырды фембӕлдты уылты. Йесо загъта: «Дыууӕ кӕнӕ ӕртӕйӕ ӕмбырд кӕм уой Мӕ Номыл, уым Ӕз Дӕн се ’хсӕн» (Матфейы 18:20). Йесо ацы зӕрдӕвӕрд куы радта, уӕд дзырдта, ӕмбырды разамынд йӕхимӕ чи иста, уыдон сӕ хъус лӕмбынӕг кӕмӕ хъуамӕ дардтаиккой, ахӕм фарстатыл (Матфейы 18:15—19). Фӕлӕ ма йын йӕ ныхӕстӕ ахӕссӕн ис нӕ фембӕлдтӕ ӕмӕ конгрестӕм дӕр, цыран райдианы дӕр ӕмӕ йӕ фӕуды дӕр Хуыцаумӕ фӕкувӕм Йесойы номӕй (Иоанны 14:14). Уымӕ гӕсгӕ чырыстон фембӕлдты мингӕйттӕ ӕрӕмбырд уой ӕви цалдӕр адӕймаджы, уӕддӕр нын уыцы фембӕлдтӕм цӕуыны бар кӕй ис, уый махӕн у стыр кад. Цӕй уӕдӕ кӕддӕриддӕр бузныг уӕм, нӕ уырнындзинад нын чи фидар кӕны, уарзондзинад ӕмӕ нӕ хорз хъуыддӕгтӕм чи разӕнгард кӕны, уыцы фадаты тыххӕй (Дзуттытӕм 10:24, 25).
14. Куыд нын ӕххуыс кӕнынц чырыстон хистӕр нӕлгоймӕгтӕ?
14 Стыр ӕххуыс ӕмӕ ныфс ма нын сты чырыстон хистӕр нӕлгоймӕгтӕ дӕр (1 Петры 5:2, 3). Павел ӕххуыс кодта ӕмӕ фидар кодта, кӕм-иу лӕггад кодта, уыцы ӕмбырды уӕнгты, ӕмӕ раст афтӕ кӕнынц абон цӕуӕг цӕстдарджытӕ дӕр. Кӕй зӕгъын ӕй хъӕуы, уый-иу тынг фӕндыд фенын йе ’мчырыстӕтты, уымӕн ӕмӕ афтӕмӕй сӕ бон уыд кӕрӕдзийы фидар кӕнын (Куыстытӕ 14:19—22; Ромӕгтӕм 1:11, 12). Цӕй уӕдӕ алкӕддӕр аргъ кӕнӕм не ’мбырды хистӕр нӕлгоймӕгтӕн ӕмӕ иннӕ чырыстон цӕстдарджытӕн, уымӕн ӕмӕ уыдонӕн стыр ахадындзинад ис нӕ уырнындзинад фидар кӕныны хъуыддаджы.
15. Не ’мбырды ӕфсымӕртӕ ӕмӕ хотӕ «нӕ циндзинадӕн» куыд сты?
15 Не ’мбырды чырыстон ӕфсымӕртӕ ӕмӕ хотӕ сты «нӕ циндзинадӕн» (Колоссӕгтӕм 4:10, 11). Зын уавӕры куы бахауӕм, уӕд нӕм «ӕцӕг хӕлӕрттау» ӕххуысмӕ фӕзынынц (Фӕсномыг ныхӕстӕ 17:17). Цӕвиттон, 1945 азы Хуыцауы лӕггадгӕнджытӕй 220 адӕймаджы концентрацион лагерь Заксенхаузенӕй куы ссӕрибар сты, уӕд сӕ фистӕгӕй цӕуын бахъуыд 200 километры, сӕ фӕрсты нацисттӕ, афтӕмӕй. Уыдон цыдысты иумӕ, къордӕй, тыхджындӕр чи уыд, уыдон цалдӕр гыццыл уӕрдоныл ластой рынчынты. Цӕмӕ ӕркодта уый? Концлагеры цы ахӕстытӕ уыд, уыдонӕй мӕлӕты фӕндагыл цӕугӕйӕ амард 10 000 адӕймагӕй фылдӕр, Иегъовӕйы Ӕвдисӕнтӕй та дзы иу дӕр нӕ амард. Ахӕм цауты кой цӕуы Хъахъхъӕнӕг Мӕсыджы Ӕхсӕнады уагъд публикациты, уыдонимӕ «Иегъовӕйы Ӕвдисӕнты ӕрвылазон чиныджы» ӕмӕ чиныг «Иегъовӕйы Ӕвдисӕнтӕ — Хуыцауы Паддзахады хъусынгӕнджытӕ»-йы. Уыцы цаутӕ бӕлвырдгӕнӕн сты, Хуыцау йӕ адӕмы кӕй фидар кӕны ӕмӕ цыфӕнды зындзинӕдты дӕр сӕ ныфс кӕй нӕ сӕтты, уымӕн (Галатӕгтӕм 6:9) *.
Фидар нӕ кӕны нӕ уацамындон лӕггаддзинад
16. Иудадзыг куы хъусын кӕнӕм, уӕд нын уый нӕ уырнындзинад куыд фидар кӕндзӕн?
16 Паддзахады тыххӕй иудадзыг куы хъусын кӕнӕм, уӕд нын уый фидар кӕндзӕн нӕ уырнындзинад. Уый фӕрцы нӕ царды фыццаг бынаты лӕууы Хуыцауы Паддзахад, нӕ зӕрдыл фидарӕй дарӕм ӕнусон царды ныфс ӕмӕ нӕм уыцы царды цы диссаджы арфӕдзинӕдтӕ ӕнхъӕлмӕ кӕсы, уыдон (Иудӕйы 20, 21). Фыстады цы зӕрдӕвӕрдтӕ ис, уыдоны тыххӕй адӕмӕн куы дзурӕм, уӕд уый махӕн дӕр фидар кӕндзӕн нӕ ныфс ӕмӕ мах дӕр хӕст уыдзыстӕм пехуымпар Михейы зондахастыл, афтӕ чи загъта: «Мах... цӕудзыстӕм нӕ Хуыцау Иегъовӕйы номӕй алкӕддӕр, ӕнусӕй-ӕнустӕм» (Михей 4:5).
17. Цавӕр хорз уынаффӕтӕ цӕуы лӕвӕрд, Библи искӕимӕ хӕдзары куыд ахуыр кӕнын хъӕуы, уый тыххӕй?
17 Нӕ ахастытӕ Иегъовӕимӕ ӕнгомдӕр кӕндзысты,
адӕмы ахуыргӕнгӕйӕ Библийӕ арӕхдӕр куы пайда кӕнӕм, уӕд. Зӕгъӕм, искӕимӕ хӕдзары Библи куы ахуыр кӕнай чиныг «Ӕнусон цардмӕ кӕнӕг базонынад»-ы ӕххуысӕй, уӕд хорз уаид, цы стихтӕ дзы вӕййы амынд, уыдонӕй иуӕй-иутӕ бакӕсын ӕмӕ сыл иумӕ ӕрныхас кӕнын. Уый стыр ӕххуыс уыдзӕн, Библи кӕимӕ ахуыр кӕныс, уымӕн дӕр ӕмӕ дӕхӕдӕг дӕр хуыздӕр ӕмбардзынӕ Библийы хъуыдытӕ. Ахуыргӕнинагӕн Библийы цавӕрдӕр ахуырад кӕнӕ цӕвиттон зын ӕмбарӕн куы уа, уӕд чиныг «Базонынад»-ӕй иу сӕр ис адих кӕнӕн цалдӕр хайыл ӕмӕ йӕ цалдӕр хаттӕн сахуыр кӕнын. Фӕлӕ нын куыд ӕхсызгон вӕййы, хорз цӕттӕ кӕй вӕййӕм ӕмӕ зӕрдӕбынӕй кӕй фӕархайӕм, уый фӕрцы искӕмӕн Хуыцауимӕ ӕнгом ахастытӕ кӕй фӕзыны, уый!18. Ӕрхӕсс цӕвиттон, чиныг «Базонынад» ӕнтыстджынӕй пайдагонд куыд цӕуы, уымӕн.
18 Чиныг «Базонынад»-ы ӕххуысӕй алы аз дӕр донаргъуыд райсынц ӕмӕ Иегъовӕйӕн лӕггад кӕнын райдайынц мингай адӕймӕгтӕ, ӕмӕ дзы афтӕмӕй бирӕтӕ Библийы тыххӕй раздӕр хъусгӕ дӕр нӕ фӕкодтой. Цӕвиттон, Шри-Ланкайӕ иу индусаг нӕлгоймаг, сывӕллон ма куы уыд, уӕд иу сылгоймаг-Ӕвдисӕнӕй фехъуыста, Дзӕнӕт кӕй уыдзӕн, уый тыххӕй. Цалдӕр азы фӕстӕ ногӕй сӕмбӕлд уыцы сылгоймагыл, ӕмӕ уымӕй бирӕ нӕ рацыд, афтӕ йӕ лӕг йемӕ райдыдта Библи ахуыр кӕнын. Уыцы ӕвзонг нӕлгоймаг ахуыр кодта алыбон дӕр ӕмӕ хӕрз гыццыл рӕстӕгмӕ рацыдысты «Базонынад». Уый райдыдта цӕуын алы фембӕлдмӕ дӕр, ныууагъта йӕ раздӕры дин ӕмӕ сси Паддзахады хъусынгӕнӕг. Донаргъуыд куы райста, уӕдмӕ уый Библи хӕдзары ахуыр кодта йӕ зонгӕ нӕлгоймагимӕ.
19. Паддзахады хъуыддаг фыццаг бынаты куы ӕвӕрӕм, уӕд нӕ бон цӕуыл у фидарӕй ӕууӕндын?
19 Паддзахад фыццаг бынаты кӕй ӕвӕрӕм, уый нын хӕссы стыр циндзинад (Матфейы 6:33). Ӕмӕ кӕд алыхуызон фӕлварӕнты бахауӕм, уӕддӕр дарддӕр дӕр цингӕнгӕйӕ ӕмӕ зӕрдӕбынӕй хъусын кӕнӕм хорз уацхъуыд (Титмӕ 2:14). Бирӕтӕн сӕ бон у ӕххӕстрӕстӕг пионертӕй лӕггад кӕнын, чидӕртӕ та лӕггад кӕнынц, хъусынгӕнджыты ӕххуыс тынгдӕр кӕм хъӕуы, уыцы рӕтты. Цыфӕнды хуызы ма архайӕм цингӕнгӕйӕ Паддзахады хъуыддаджы, мах фидарӕй уырны, Иегъовӕ кӕй нӕ ферох кӕндзӕн нӕ куыст ӕмӕ нӕ уарзондзинад йӕ номмӕ (Дзуттытӕм 6:10—12).
Иегъовӕйы тыхӕй дӕхи цух ма уадз
20. Иегъовӕйы тыхыл кӕй дарӕм нӕ ныфс, уый нӕ бон куыд у ӕвдисын?
20 Цӕй уӕдӕ ӕппӕт зӕрдӕйӕ нӕ ныфс дарӕм Иегъовӕйыл ӕмӕ йӕ тыхыл. Уый нӕ бон аразын у, «ӕууӕнкджын... цагъары» уылты нын нӕ уырнындзинад фидар кӕнынӕн цытӕ дӕтты, уыдонӕй ӕххӕст пайда куы исӕм, уӕд (Матфейы 24:45). Хуыцауы Ныхас чырыстон публикациты ӕххуысӕй иунӕгӕй дӕр ӕмӕ ӕмбырды дӕр куы ахуыр кӕнӕм, зӕрдӕбынӕй куы кувӕм, хистӕр нӕлгоймӕгтӕй духовон ӕххуыс куы исӕм, не ’нувыд чырыстон ӕфсымӕртӕ ӕмӕ хоты хорз дӕнцӕгӕй куы ахуыр кӕнӕм ӕмӕ иудадзыг куы хъусын кӕнӕм, уӕд Иегъовӕимӕ нӕ ахастытӕ кӕндзысты ӕнгомдӕр ӕмӕ дарддӕр дӕр нӕ бон уыдзӕн йӕ сыгъдӕг лӕггаддзинады хайад исын.
21. Апостолтӕ Петр ӕмӕ Павел куыд равдыстой, Хуыцауы тых сӕ кӕй хъуыд, уый?
21 Кӕд ӕнӕбон зӕххон адӕймӕгтӕ стӕм, уӕддӕр Иегъовӕйы ӕххуысыл нӕ ныфс куы дарӕм, уӕд нын уый дӕтдзӕн тых, цӕмӕй нӕ бон уа йӕ фӕндон ӕххӕст кӕнын. Хуыцауы лӕггадгӕнӕджы ахӕм ӕххуыс куыд тынг хъӕуы, уый ӕмбаргӕйӕ, апостол Петр ныффыста: «Кӕд исчи лӕггад кӕны, лӕггад кӕн хъарумӕ гӕсгӕ, кӕцы дын Хуыцау дӕтты» (1 Петры 4:11). Хуыцау йӕ лӕггадгӕнджытӕн тых кӕй дӕтты, уый фидарӕй уырныдта апостол Павелы, ӕмӕ уый бӕрӕг у йӕ ныхӕстӕй: «Ӕз зӕрдӕйы дзӕбӕхӕн цӕрын [«зӕрдӕрухс вӕййын», НФ] ӕдыхдзинӕдты, ӕфхӕрдтыты, хъуагдзинӕдты, сурындзинӕдты, ӕлхъывдтыты Чырыстийы тыххӕй: уымӕн ӕмӕ ӕз ӕдых куы вӕййын, уӕд тыхджын дӕн» (2 Коринфӕгтӕм 12:10). Цӕй уӕдӕ мах дӕр афтӕ фидарӕй ӕууӕндӕм ӕмӕ кадджын кӕнӕм, фӕллад адӕймагӕн тых чи дӕтты, уыцы Хуыцауӕн, иунӕг кадджын Иегъовӕйӕн (Исай 12:2).
[Фиппаинӕгтӕ]
^ 1 абз. Ацы нымӕц фыссынц 1 ӕмӕ йӕ фӕстӕ 20 нулы.
^ 15 абз. Мыхуыры сӕ рауагъта Хъахъхъӕнӕг Мӕсыджы Ӕхсӕнад.
Цавӕр дзуапп радтис?
• Иегъовӕйы адӕмы цӕмӕн хъӕуы, сӕхимӕ цы хъару ис, уымӕй фылдӕр хъару?
• Хуыцау йӕ лӕггадгӕнджытӕн хъару кӕй дӕтты, уый цавӕр библион стихтӕй у бӕрӕг?
• Цавӕр мадзӕлттӕ скодта Иегъовӕ нӕ уырнындзинад фидар кӕнынӕн?
• Нӕ ныфс Хуыцауы тыхыл кӕй дарӕм, уый нӕ бон куыд у ӕвдисын?
[Фарстатӕ ахуыр кӕнынӕн]
[Ныв 22 фарсыл]
Нӕ ахастытӕ Иегъовӕимӕ ӕнгомдӕр кӕндзысты, адӕмы ахуыргӕнгӕйӕ Библийӕ арӕхдӕр куы пайда кӕнӕм, уӕд.