«Хицау ӕцӕг... райгас»

Ахъуыды ма кӕн, Йесойы ахуыргӕнинӕгтӕ куыд маст кодтаиккой, сӕ Хицауы сын куы амардтой, уӕд. Афтӕ зынд, цыма Аримафейаг Иосиф зӕппадзы кӕй ӕдзард буар бавӕрдта, уыцы Йесоимӕ амард сӕ ныфс дӕр. Уӕдӕ Йесо иудейӕгты Ромы цагъарадӕй кӕй ссӕрибар кӕндзӕн, уый ӕнхъӕл дӕр нал уыдысты.

ХЪУЫДДАГ ууыл куы фӕуыдаид, уӕд Йесойы ахуыргӕнинӕгтӕ дӕр мӕнг мессиаты фӕдылдзӕуджытау ныппырхытӕ уыдаиккой. Фӕлӕ Йесо уыд ӕгас! Фыстад куыд дзуры, уымӕ гӕсгӕ уый, йӕ мӕлӕтӕй бирӕ нӕ рацыд, афтӕ цалдӕр хатты фӕзынд йӕ фӕдылдзӕуджытӕм. Уымӕ гӕсгӕ сӕ иуӕй-иутӕ разӕнгард уыдысты зӕгъынмӕ: «Хицау ӕцӕг... райгас» (Лукайы 24:34).

Ахуыргӕнинӕгтӕ Йесойыл, куыд Мессиайыл, афтӕ, кӕй ӕууӕндыдысты, уымӕ гӕсгӕ сӕ уымӕн ӕдзухдӕр хъуыд бӕлвырдгӕнӕнтӕ хӕссын. Афтӕмӕй, Йесо Мессиа кӕй уыд, уымӕн сӕйраг бӕлвырдгӕнӕнӕн хастой, мӕрдтӕй кӕй райгас, уый. Ӕцӕгӕйдӕр, «апостолтӕ... стыр хъаруимӕ ӕвдисӕн лӕууыдысты Хицау Йесо Чырыстийы райгасдзинадыл» (Куыстытӕ 4:33).

Уыцы райгасы хабар цӕстфӕлдахӕн ми кӕй у, уый искуы исчи куы сбӕлвырд кодтаид — зӕгъӕм, йӕ ахуыргӕнинӕгтӕй исчи ахӕм ӕвдисӕнад куы радтаид кӕнӕ Йесойы буар зӕппадзы кӕй баззад, уымӕн бӕлвырдгӕнӕнтӕ куы ӕрхастаид,— уӕд чырыстон дин суанг йӕ райдианы фесӕфтаид. Фӕлӕ хъуыддаг афтӕ нӕ рауад. Чырысти ӕгас кӕй у, уый зонгӕйӕ йӕ  фӕдылдзӕуджытӕ алыран дӕр хъусын кодтой, кӕй райгас, уый тыххӕй, ӕмӕ райгасуӕвӕг Чырыстийыл бирӕтӕ баууӕндыдысты.

Цӕмӕ гӕсгӕ у дӕуӕн дӕр дӕ бон, Йесо кӕй райгас, ууыл ӕууӕндын? Уыцы хабар ӕцӕгӕйдӕр кӕй ӕрцыд, уымӕн цавӕр бӕлвырдгӕнӕнтӕ ис?

Цӕмӕ нӕ хъӕуы бӕлвырдгӕнӕнтӕм ӕркӕсын?

Цыппар Евангелийы дӕр дзурынц, Йесо кӕй райгас, ууыл (Матфейы 28:1—10; Маркы 16:1—8; Лукайы 24:1—12; Иоанны 20:1—29) *. Чырыстон Грекъаг Фыстыты ӕндӕр чингуыты дӕр ма бӕлвырдӕй зыны, Чырысти мӕрдтӕй кӕй райгас, уый.

Куыннӕ хъуамӕ хъусын кодтаиккой, Йесо кӕй райгас, уый тыххӕй йӕ фӕдылдзӕуджытӕ! Кӕд ӕй Хуыцау ӕцӕгдӕр райгас кодта, уӕд уымӕй диссагдӕр хабар нырма никуы ничи фехъуыста. Уый нысан кӕны, ӕмӕ Хуыцау ис. Уымӕй уӕлдай ма уый ууыл дзурӕг у, ӕмӕ Йесо ныртӕккӕ дӕр у ӕгас.

Уыдӕттӕ ныл куыд ӕндавынц? Йесо куывта: «Ӕнусон цард та уый у, цӕмӕй зоной Дӕу, иунӕг ӕцӕг Хуыцауы, ӕмӕ Дӕуӕй ӕрвыст Йесо Чырыстийы» (Иоанны 17:3, «Мах дуг» № 5, 1992). О, нӕ бон у царддӕттӕг зонындзинӕдтӕ Йесо ӕмӕ йӕ Фыды тыххӕй исын. Уыцы зонындзинӕдтӕй царды куы пайда кӕнӕм, уӕд суанг мӕлгӕ дӕр куы акӕнӕм, уӕддӕр, гӕнӕн ис, Йесойау райгас уӕм (Иоанны 5:28, 29). Нӕ бон у, ӕмӕ нӕ ныфс дарӕм, кӕй нӕм ӕнхъӕлмӕ кӕсы ӕнусон цард дзӕнӕтон зӕххыл, цыран хицауиуӕг кӕндзӕн Хуыцауы уӕларвон Паддзахад йӕ кадджын Фырт, паддзӕхты Паддзах Йесо Чырыстийы къухдариуӕгадӕй (Исай 9:6, 7; Лукайы 23:43; Раргомад 17:14).

Афтӕмӕй, Йесо ӕцӕгӕйдӕр мӕрдтӕй райгас ӕви нӕ, уыцы фарста у ахсджиаг. Ууыл баст у нӕ цард абон дӕр ӕмӕ фидӕны дӕр. Растдӕр нӕ уымӕ гӕсгӕ фӕнды, цӕмӕй ӕркӕсай, Йесо кӕй амард ӕмӕ кӕй райгас, уымӕн цы цыппар бӕлвырдгӕнӕны ис, уыдонмӕ.

Йесо ӕцӕгдӕр амард цӕджындзыл

Хуыцауыл чи не ’ууӕнды, уыдонӕй иуӕй-иутӕ дзурынц, зӕгъгӕ, кӕд Йесойы байтыгътой, уӕддӕр уый цӕджындзыл нӕ амард. Уыдон куыд хъуыды кӕнынц, афтӕмӕй уыд ӕрдӕгмард ӕмӕ, зӕппадзы уазал кӕй уыд, уымӕ гӕсгӕ йӕхимӕ ӕрцыд. Фӕлӕ цы бӕлвырдгӕнӕнтӕ ис, уыдон иууылдӕр ӕвдисынц, зӕппадзы кӕй сӕвӕрдтой Йесойы ӕдзард буар.

Йесойы адӕмы раз кӕй байтыгътой, уымӕ гӕсгӕ, цӕджындзыл кӕй амард, уымӕн уыд ӕвдисӕнтӕ. Йӕ мӕлӕт ын сбӕлвырд кодта, мӕлӕты тӕрхонӕн дзуапп чи лӕвӕрдта, уыцы сӕдӕйы хицау. Уыцы ӕфсӕддон хицау йӕ куыст хорз зыдта, ӕмӕ уымӕ хауд, цӕмӕй сбӕлвырд кодтаид, Йесо ӕцӕгӕйдӕр кӕй амард, уый. Уымӕй уӕлдай ма ромаг хицау Понти Пилат Аримафейаг Иосифӕн Йесойы баныгӕныны бар радта, Йесо кӕй амард, уый бӕлвырд куы базыдта, ӕрмӕстдӕр уӕд (Маркы 15:39—46).

Зӕппадз разынд афтид

Афтид зӕппадз ахуыргӕнинӕгтӕн уыд фыццаг бӕлвырдгӕнӕн, Йесо кӕй райгас, уымӕн, ӕмӕ уыцы бӕлвырдгӕнӕн дызӕрдыггаг нӕу. Йесойы баныгӕдтой ног, нырма кӕмӕй нӕ пайда кодтой, ахӕм зӕппадзы. Уый уыд, Йесойы кӕм байтыгътой, уыцы бынатмӕ хӕстӕг, ӕмӕ йӕ уӕды рӕстӕджы ӕнцонтӕй уыд ссарӕн (Иоанны 19:41, 42). Цыппар Евангелийы дӕр дзырдӕуы, зӕгъгӕ, Йесойы ӕмбӕлттӕ йӕ мӕлӕты фӕстӕ дыккаг бон райсомӕй зӕппадзмӕ куы ӕрбацыдысты, уӕд йӕ буар уым нал уыд (Матфейы 28:1—7; Маркы 16:1—7; Лукайы 24:1—3; Иоанны 20:1—10).

Зӕппадз афтид кӕй уыд, уый канд йе ’мбӕлттӕм нӕ фӕкаст диссаг, фӕлӕ йе знӕгтӕм дӕр. Йе знӕгтӕ цы нӕ бакодтой, цӕмӕй йӕ федтаиккой мардӕй ӕмӕ ныгӕдӕй. Сӕ фӕнд куы сӕххӕст, уӕд ма, цӕмӕй сӕ зӕрдӕ ма ’хсайдтаид, уый тыххӕй зӕппадзыл мыхуыр сӕвӕрдтой, йӕ бахизӕны та йын хъахъхъӕнджыты слӕууын  кодтой. Фӕлӕ уӕддӕр къуырийы фыццаг бон райсомӕй зӕппадз разынд афтид.

Цымӕ Йесойы буар йе ’мбӕлттӕ рахастаиккой зӕппадзӕй? Кӕй зӕгъын ӕй хъӕуы, нӕ, уымӕн ӕмӕ Евангелиты дзырдӕуы, зӕгъгӕ, уыдон йӕ мӕлӕты фӕстӕ тынг хъыг кодтой. Уымӕй уӕлдай ма йӕ ахуыргӕнинӕгты ницӕй тыххӕй бафӕндыдаид, мӕнг цы уыд, уый тыххӕй ӕфхӕрд ӕвзарын ӕмӕ сӕ цард дӕттын.

Уӕдӕ буар зӕппадзӕй цы фӕци? Йесойы знӕгтӕ йӕ ницӕй тыххӕй рахастаиккой. Афтӕ куы бакодтаиккой, уӕд та йын йӕ буар фӕстӕдӕр равдыстаиккой, цӕмӕй ахуыргӕнинӕгты ныхӕстӕ, зӕгъгӕ, Йесо райгас ӕмӕ у ӕгас, ӕцӕг ма разындаиккой. Фӕлӕ, кӕй зӕгъын ӕй хъӕуы, ахӕмӕй ницы ӕрцыд, уымӕн ӕмӕ уыцы хъуыддаджы архайдта Хуыцау.

Цалдӕр къуырийы фӕстӕ Йесойы знӕгтӕн сӕ бон ницы сси зӕгъын, Петр ӕвдисӕн куы лӕууыд, уӕд: «Израилаг лӕгтӕ! байхъусут ацы ныхӕстӕм: Назорейаг Йесойы, Лӕджы, бӕрӕггонд сымахӕн Хуыцауӕй, тыхтимӕ, диссӕгтимӕ ӕмӕ нысӕнттимӕ, кӕцыты Хуыцау скодта Уый сӕрты уе ’хсӕн, уӕхӕдӕг сымах куыд зонут, афтӕ, Уый, Хуыцауы бӕрӕг уынаффӕ ӕмӕ раззындмӕ гӕсгӕ лӕвӕрды, сымах райстат, ӕмӕ зӕгӕлтӕй ныххойгӕйӕ, ӕнӕзакъонты къухтӕй амардтат; фӕлӕ Хуыцау райгас кодта Уый, мӕлӕты бӕттӕнтӕ аскъуынгӕйӕ, уымӕн ӕмӕ Уый бауромын мӕлӕты бон нӕ уыд. Уымӕн ӕмӕ Давид зӕгъы Уый тыххӕй: „уыдтон ӕз мӕ размӕ Хицауы [«Иегъовӕйы», НД] ӕдзух... суанг мӕ буар дӕр ӕрынцой уыдзӕн ӕнхъӕлцаудзинады, уымӕн ӕмӕ Ды нӕ ныууадздзынӕ мӕ уды зындоны [«мӕрдты», НФ], ӕмӕ нӕ ратдзынӕ Дӕ сыгъдӕгӕн фенын ӕмбийын“» (Куыстытӕ 2:22—27).

Йесо куы райгас, уӕд ӕй бирӕтӕ федтой

Евангелиты фысджытӕй иу, Лука, Куыстыты чиныджы ныффыста: «[Йесо апостолтӕм] равдыста Йӕхи ӕгасӕй, Йӕ зындзинӕдты фӕстӕ бирӕ раст ӕвдисӕндзинӕдтимӕ, цыппор боны дӕргъы фӕзынгӕйӕ иу уыдонмӕ ӕмӕ дзургӕйӕ Хуыцауы Паддзахады тыххӕй» (Куыстытӕ 1:2, 3). Йесо куы райгас, уӕд ӕй ахуыргӕнинӕгтӕй иуӕй-иутӕ федтой алыхуызон уавӕрты — дыргъдоны, фӕндагыл, хӕрды рӕстӕджы, Тивериады денджызы раз (Матфейы 28:8—10; Лукайы 24:13—43; Иоанны 21:1—23).

Уыцы цаутӕ ӕцӕгӕйдӕр кӕй ӕрцыдысты, уый критиктӕ гуырысхойаг кӕнынц. Уыдон дзурынц, зӕгъгӕ сӕ Евангелиты фысджытӕ сӕхӕдӕг ӕрымысыдысты кӕнӕ ма зӕгъынц, иуӕй-иу хабӕрттӕ дзы кӕрӕдзийыл кӕй нӕ бадынц, уый. Ӕцӕгӕй та, Евангелиты фыст хабӕрттӕ кӕрӕдзийӕ иу гыццыл кӕй хицӕн кӕнынц, уый ууыл дзурӕг у, ӕмӕ фысджытӕ сӕ кӕрӕдзиимӕ кӕй нӕ баныхас кодтой, афтӕ ӕмӕ йӕ афтӕ ныффысдзыстӕм, зӕгъгӕ. Евангелиты фысджытӕй иу Йесойы зӕххон царды тыххӕй цы ныффыста, уый тыххӕй ма иннӕ цы лыстӕгдзинӕдтӕ ӕрхаста, уыдон кӕсгӕйӕ нӕ бон у Йесойы тыххӕй фылдӕр базонын.

Цымӕ, Йесо куы райгас, уӕд цалдӕр хатты кӕй фӕзынд, уый адӕмӕн сӕ цӕстытыл ауад? Ахӕм хъуыдыйыл ӕууӕндӕн нӕй, уымӕн ӕмӕ Йесойы федтой тынг бирӕ адӕм. Уыдоны ’хсӕн уыд кӕсагахсджытӕ, сылгоймӕгтӕ, лӕггадгӕнӕг ӕмӕ ма суанг, гуырысхо чи кодта, уыцы апостол Фома дӕр, кӕцы, Йесо мӕрдтӕй кӕй райгас, ууыл нӕ баууӕндыд, цалынмӕ йӕ йӕхи цӕстӕй нӕ федта, уӕдмӕ (Иоанны 20:24—29). Цалдӕр хатты афтӕ рауад, ӕмӕ-иу Йесойы ахуыргӕнинӕгтӕ сӕ райгасуӕвӕг Хицауы фыццаг нӕ базыдтой. Иухатт та йӕ федтой фондзсӕдӕ адӕймагӕй фылдӕр, ӕмӕ апостол Павел райгасдзинады тыххӕй дзургӕйӕ уыцы хабар бӕлвырдгӕнӕнӕн куы ӕрхаста, уӕд ма сӕ бирӕтӕ уыдысты ӕгас (1 Коринфӕгтӕм 15:6).

 Йесо у ӕгас ӕмӕ ӕндавы адӕмыл

Йесо кӕй райгас, уый нӕу, ӕрмӕстдӕр цымыдис кӕмӕй кӕнынц кӕнӕ быцӕу кӕуыл кӕнынц, ахӕм хабар. Йесо ӕгас кӕй у, уый алыран дӕр адӕмыл ӕндавы хорзырдӕм. Суанг фыццаг ӕнусӕй фӕстӕмӕ, чырыстон дин нымады дӕр кӕмӕ нӕ уыд кӕнӕ йӕ ныхмӕ чи цыд, уыдонӕй бирӕтӕ баууӕндыдысты, уый раст дин кӕй у, ууыл. Цы сын аивта сӕ цӕстӕнгас? Фыстад ахуыргӕнгӕйӕ ссардтой бӕлвырдгӕнӕнтӕ, Хуыцау Йесойы кӕй райгас кодта кадджын ӕнӕуынгӕ уӕларвон фӕлдисондӕй, уымӕн (Филиппӕгтӕм 2:8—11). Уыдон ӕууӕндынц Йесойыл ӕмӕ, Иегъовӕ Хуыцау Чырыстийы ӕлхӕнӕг нывонды руаджы адӕмӕн цы ирвӕзындзинад дӕтты, ууыл (Ромӕгтӕм 5:8). Уыцы адӕм Хуыцауы фӕндон кӕй ӕххӕст кӕнынц ӕмӕ Йесойы ахуырӕдтӕм гӕсгӕ кӕй цӕрынц, уымӕ гӕсгӕ сты амондджын.

Ӕркӕсӕм, фыццаг ӕнусы чырыстон уӕвын цы нысан кодта, уымӕ. Уый нӕ лӕвӕрдта уӕлдай кад, бартӕ кӕнӕ хъӕздыгдзинад, фӕлӕ ма рагон чырыстӕттӕй бирӕтӕ сӕ уырнындзинады сӕраппонд «сӕ исбон байстыл дӕр цин кодтой» (Дзуттытӕм 10:34). Чырыстоны цард нысан кодта удӕлдай цард кӕнын ӕмӕ ӕфхӕрд ӕййафын, суанг ма хъизӕмаргӕнӕджы цард кӕнын дӕр.

Иуӕй-иутӕ цалынмӕ чырыстӕттӕ нӕ систы, уӕдмӕ сын уыд бирӕ гӕнӕнтӕ хорз бынат бацахсынӕн кӕнӕ бирӕ мулк самал кӕнынӕн. Зӕгъӕм, Савл Тарсӕй ахуыр кодта дзырддзӕугӕ ахуыргӕнӕг Гамалиилмӕ ӕмӕ иудейты цӕсты уыд кадджын (Куыстытӕ 9:1, 2; 22:3; Галатӕгтӕм 1:14). Фӕлӕ Савл сси апостол Павел. Уый ӕмӕ ма ноджыдӕр бирӕтӕ ныууагътой, ацы дуне сын зӕрдӕ цы кадджын бынӕттӕ ӕмӕ бартӕй ӕвӕрдта, уыдон. Цымӕ цӕмӕн? Цӕмӕй хъусын кодтаиккой, Хуыцауы зӕрдӕвӕрдтыл ӕмӕ Йесо Чырыстийы райгасы хабарыл чи бындуриуӕг кӕны, уыцы ӕцӕг ныфсы тыххӕй (Колоссӕгтӕм 1:28). Уыдон зыдтой, сӕ хъуыддаг ӕцӕгадыл кӕй бындуриуӕг кодта, уый, ӕмӕ цӕттӕ уыдысты уый тыххӕй хъизӕмӕрттӕ ӕвзарынмӕ дӕр.

Абон дӕр милуантӕй афтӕ ис зӕгъӕн. Дӕ бон сӕ у ӕгас дунейы дӕр Иегъовӕйы Ӕвдисӕнты ӕмбырдты фенын. Ӕвдисӕнтӕ дӕ зӕрдиагӕй хонынц, алы аз дӕр кӕй фӕбӕрӕг кӕнынц, уыцы цаумӕ — Чырыстийы мӕлӕты бонмӕ. Уый уыдзӕн 2001 азы 8 апрелы, хуыцаубоны, хурныгуылды фӕстӕ. Уыдонӕн тынг ӕхсызгон уыдзӕн, уыцы цаумӕ, стӕй ма Паддзахады залты Библи цы фембӕлдты фӕахуыр кӕнынц, уыдонмӕ дӕр куы ӕрбацӕуай, уӕд.

Уӕдӕ хорз нӕ уаид, фылдӕр куы базонис, ӕрмӕст Йесойы мӕлӕты ӕмӕ райгасы тыххӕй нӕ, фӕлӕ ма йӕ цард ӕмӕ йӕ ахуырӕдты тыххӕй дӕр? Уый нӕ хоны, цӕмӕй йӕм ӕрцӕуӕм (Матфейы 11:28—30). Хъуамӕ ныртӕккӕ архайай Иегъовӕ Хуыцау ӕмӕ Йесо Чырыстийы тыххӕй бӕлвырд зонындзинӕдтӕ исыныл. Уый нысан кӕны ӕнусон цард, цыран хицауиуӕг кӕндзӕн Хуыцауы Паддзахад йӕ зынаргъ Фырты къухдариуӕгадӕй.

[Фиппаинаг]

[Нывтӕ 7 фарсыл]

Милуантӕ свӕййынц ӕцӕг амондджын, Йесо Чырыстийы фӕдылдзӕуджытӕ куы свӕййынц, уӕд.

[Ныв барлӕвӕрдӕй 6 фарсыл]

From the Self-Pronouncing Edition of the Holy Bible, containing the King James and the Revised versions