Хуыцауы амындтӕ, цардӕмбал чи агуры, уыдонӕн

«Бамбарын кӕндзынӕн дӕуӕн, сӕвӕрдзынӕн дӕ фӕндагыл, кӕцыйыл дӕу цӕуын хъӕуы; разамынд дын дӕтдзынӕн, Мӕ цӕстӕнгас дӕ сӕрмӕ» (ПСАЛОМ 31:8).

1. Цӕмӕй бинонтӕ амондджынӕй цӕрой, уый тыххӕй цы хъӕуы?

АКРОБАТ дыууӕ бӕндӕныл фидаргонд амадхъӕдӕй йӕхи рауагъта, йӕ къухтӕ йӕ къӕхтыл куыд аныдзӕвой, афтӕ йӕхи фӕкъӕдз кодта ӕмӕ уӕлдӕфы цалдӕр хатты ӕрзылд. Уый фӕстӕ йӕхи уайтагъд амраст кодта, йӕ къухтӕ адаргъ кодта ӕмӕ иннӕ амадхъӕдыл къӕхтӕй ауыгъдӕй цы акробат уыд, уый йӕ ацахста. Ихыл кафӕг лӕппу ӕмӕ чызг та дыууӕ бӕлонау рӕсугъд кафынц ихыл. Ӕваст лӕппу йе ’мбалы фелвӕста ӕмӕ йӕ хӕрдмӕ сӕппӕрста. Чызг уӕлдӕфы цъилау ныззылд, фӕстӕмӕ йӕ къӕхтыл уыцы ӕнцонӕй алӕууыд ӕмӕ дарддӕр иумӕ зилдух кӕнынц ихыл. Фӕрсырдыгӕй кӕсгӕйӕ афтӕ зыны, цыма уыцы акробаттӕ ӕмӕ ихыл кафджытӕ цы сарӕзтой, уым бынтондӕр зынӕй ницы ис, ницы йын хъӕуы. Фӕлӕ чи бахӕссид йӕ ныфс, ӕдзӕттӕйӕ, ӕнӕ арӕхстджын, дӕсны ӕмбалӕй, ӕмӕ сӕйрагдӕр та ӕнӕ раст амындтӕ кӕнӕ фӕдзӕхстытӕй, уыдон цы сарӕзтой, уый сфӕлхат кӕнынмӕ. Уӕдӕ фыццаг бакастӕй афтӕ фӕзыны, ӕмӕ амондджын бинонты цардӕн дӕр ницы хъӕуы. Ӕцӕгӕй та уымӕн дӕр хъӕуы хорз цардӕмбал, ӕмвӕнд ӕмӕ ӕмзонд архайд ӕмӕ, иууыл сӕйраг та — зондджын амындтӕ. Ай-гъай дӕр, уыцы хъуыддаджы раст разамынд ӕнӕмӕнг хъӕуы.

2. а) Бинонты цардӕн бындур чи сӕвӕрдта ӕмӕ цӕмӕн? ӕ) Бинонтӕ скӕныны хъуыддаг иуӕй-иу хатт куыд скъуыддзаг кодтой?

² Ӕвзонг адӕймаг йӕхицӕн цардӕмбал кӕй фӕагуры, уым ӕвзӕрӕй ницы ис. Иегъовӕ Хуыцау фыццаг дыууӕ адӕймаджы куы баиу кодта, уӕдӕй фӕстӕмӕ бинонтӕ скӕныны хъуыддаг алы адӕммӕ дӕр у фӕтк. Фӕлӕ фыццаг адӕймаг, Адам, йӕхицӕн ус йӕхӕдӕг нӕ равзӕрста. Йӕ уарзӕгой Фыд Иегъовӕ йын ӕй радта (Уӕвынад 2:18—24). Уыцы фыццаг лӕг ӕмӕ ус хъуамӕ зӕнӕг кодтаиккой, ӕмӕ афтӕмӕй ӕгас зӕххы къори дӕр байдзаг уыдаид адӕмӕй. Уӕдӕй фӕстӕмӕ, лӕппу кӕй ракурдзӕн кӕнӕ чызг кӕмӕй смой кӕндзӕн, уый скъуыддзаг кодтой ныййарджытӕ, хаттӕй-хатт-иу сын сӕхи дӕр куы бафарстой, уый фӕстӕ (Уӕвынад 21:21; 24:2—4, 58; 38:6; Йесо Навин 15:16, 17). Кӕд иуӕй-иу бӕстӕты абоны онг дӕр афтӕ у, уӕддӕр бирӕтӕ сӕхӕдӕг ӕвзарынц сӕхицӕн цардӕмбал.

3. Цардӕмбал агургӕйӕ, цӕмӕ хъӕуы кӕсын?

³ Цардӕмбал агургӕйӕ цӕмӕ хъӕуы кӕсын? Иуӕй-иутӕн сӕйраг у ӕддаг бакаст — цӕсты цы ахады ӕмӕ зӕрдӕйӕн ӕхсызгон цы у, уый. Иннӕтӕ та кӕсынц хъӕздыгдзинадмӕ, уыдон фӕагурынц, цы сӕ хъӕуа ӕмӕ сӕ зӕрдӕ цы зӕгъа, уый сын чи араздзӕн, ахӕм адӕймаджы. Фӕлӕ цымӕ амондджын, ӕмуд бинонты цардӕн ӕрмӕст уыдӕттӕ фаг сты? «Рӕсугъддзинад цӕст сайы ӕмӕ ӕддаг бакастыл ӕууӕнк нӕй,— дзырдӕуы Фӕсномыг ныхӕсты 31:30.— Фӕлӕ Иегъовӕйӕ цы сылгоймаг тӕрсы, уый у ӕппӕлды аккаг». Ацы ныхӕсты ис тынг ахсджиаг хъуыды: цардӕмбал агургӕйӕ, дӕ зӕрдыл дар Иегъовӕйы.

Уарзӕгой Хуыцауы амындтӕ

4. Цардӕмбал чи агуры, уыдонӕн Хуыцау куыд ӕххуыс кӕны?

⁴ Нӕ уарзӕгой уӕларвон Фыд Иегъовӕ нын радта йӕ Ныхас, цӕмӕй дзы царды алы хъуыддаджы  дӕр нӕ бон ссарын уа амындтӕ. Уый нын дзуры: «Ӕз дӕн Иегъовӕ, дӕ Хуыцау, пайда дын цы у, уый дын Чи амоны, цы фӕндагыл дӕ хъӕуы цӕуын, ууыл дӕ Чи кӕны» (Исай 48:17). Уӕдӕ диссаг нӕу, Библийы кӕй ис ссарӕн, сӕ ахадындзинад царды кӕмӕн сбӕлвырд, ахӕм хорз уынаффӕтӕ цардӕмбал чи агуры, уыдонӕн дӕр. Иегъовӕйы фӕнды, цӕмӕй бинонтӕ цӕрой хъӕрмудӕй ӕмӕ амондджынӕй. Уымӕ гӕсгӕ нын уый ӕххуыс кӕны уыцы уынаффӕтӕ ӕмбарынӕн ӕмӕ сӕ царды пайда кӕнынӕн. Ӕниу нӕ уарзӕгой Сфӕлдисӕг ӕндӕрхуызон дӕр куыд хъуамӕ бакодтаид? (Псалом 18:9).

5. Цӕмӕй дыууӕ уды цӕрӕнбонтӕм иумӕ амондджын уой, уый тыххӕй цы хъӕуы?

⁵ Иегъовӕйы фӕндонмӕ гӕсгӕ иугӕр нӕлгоймаг ӕмӕ сылгоймаг сӕ цард баиу кодтой, уӕд хъуамӕ иумӕ цӕрой цӕрӕнбонтӕм (Маркы 10:6—12; 1 Коринфӕгтӕм 7:10, 11). «Хицӕн кӕныны хъуыддаг ын ӕнӕуынон» дӕр уымӕн у; уый хицӕн кӕныны бар дӕтты ӕрмӕстдӕр «хӕтындзинады» тыххӕй (Малахи 2:13—16; Матфейы 19:9). Уӕдӕ цардӕмбал ссарын у царды ахсджиагдӕр хъуыддӕгтӕй иу, ӕмӕ йӕм уӕлӕнгай цӕстӕй кӕсӕн нӕй. Царды мидӕг амондджын уыдзыстӕм ӕви ӕнамонд, ууыл уый хуызӕн тынг ницы ӕндавы. Адӕймаг хорз цардӕмбал куы ссары, уӕд вӕййы амондджын ӕмӕ райгонд, ӕвзӕр куы вӕййы — уӕд та ӕнамонд ӕмӕ фӕсмойнаг (Фӕсномыг ныхӕстӕ 21:19; 26:21). Цӕмӕй дыууӕ уды цӕрӕнбонтӕм амондджынӕй ӕмӕ ӕмудӕй цӕрой, уый тыххӕй, фыццаджыдӕр, хъӕуы хорз цардӕмбал ссарын, стӕй та бинонты цард алкӕй раз дӕр цы хӕстӕ ӕвӕры, уыдон ӕрвылбон дӕр зӕрдӕбынӕй ӕххӕст кӕнын, уымӕн ӕмӕ Хуыцау бинонты хъуыддаг афтӕ скодта, ӕмӕ дыууӕ уды амондджын ӕрмӕстдӕр уӕд уыдзысты, кӕд ӕмӕ ӕмзонд ӕмӕ ӕмвӕндӕй архайой (Матфейы 19:6).

6. Цардӕмбал агургӕйӕ ӕрыгӕтты сӕхи цӕмӕй хъӕуы хизын ӕмӕ сын раст уынаффӕ рахӕссынӕн цы баххуыс кӕндзӕн?

⁶ Цардӕмбал агургӕйӕ, ӕрыгӕтты уӕлдай тынгдӕр хъӕуы сӕхи хизын, цӕмӕй сын сӕ зӕрдӕйы тыхджын монцтӕ ӕмӕ искӕй рӕсугъддзинад сӕ сӕр ма разилын кӕной. Дыууӕ адӕймаджы ӕндӕр куы ницы иу кӕна, уӕд цыбыр рӕстӕгмӕ, гӕнӕн ис, сӕ кӕрӕдзийӕн сӕнад уой, йе та кӕрӕдзийӕн ӕнӕуынон дӕр фестой (2 Паддзахӕдты 13:15). Уый хыгъд, цас хуыздӕр базонӕм нӕ фидӕны цардӕмбалы, ӕмӕ уыимӕ нӕхи дӕр, уыйас тыхджындӕр кӕны не ’хсӕн уарзондзинад. Стӕй ма рох кӕнын нӕ хъӕуы, райдианы афтӕ тынг цӕмӕ бӕллыдыстӕм, уый гӕнӕн ис, ӕмӕ нӕ ӕцӕгӕй цы хъӕуы, уый ма разына (Иереми 17:9). Хуыцау нын Библийы уылты цы амындтӕ дӕтты, уыдон афтӕ ахсджиаг дӕр уымӕн сты. Уыдон нын ӕххуыс кӕнынц, цыфӕнды уавӕры дӕр, иууыл хуыздӕр нын куыд у, ахӕм уынаффӕ рахӕссынӕн. Иегъовӕйы номӕй псаломзарӕггӕнӕг ахӕм ныхӕстӕ загъта: «Бамбарын кӕндзынӕн дӕуӕн, сӕвӕрдзынӕн дӕ фӕндагыл, кӕцыйыл дӕу цӕуын хъӕуы; разамынд дын дӕтдзынӕн, Мӕ цӕстӕнгас дӕ сӕрмӕ» (Псалом 31:8; Дзуттытӕм 4:12). Дыууӕ уды сӕ цард куы баиу кӕнынц, уӕд ссарынц алы  адӕймаг дӕр цӕмӕ бӕллы, уыцы уарзондзинад ӕмӕ ӕмуддзинад, фӕлӕ ма сын уыимӕ фӕзыны зындзинӕдтӕ дӕр, ӕмӕ уыдон лыг кӕнынӕн адӕймагмӕ хъуамӕ уа царды цыдӕр фӕлтӕрддзинад ӕмӕ ӕмбаргӕдзинад.

7. Цардӕмбал агургӕйӕ иуӕй-иутӕ Библийы бындурыл лӕвӕрд уынаффӕмӕ цӕуылнӕ байхъусынц ӕмӕ уый арӕх цӕмӕ ӕркӕны?

⁷ Цардӕмбал агургӕйӕ, бинонты царды Бындурӕвӕрӕджы уынаффӕтӕм чи хъусы, уый зондджын адӕймаг у. Фӕлӕ нын нӕ ныййарджытӕ кӕнӕ чырыстон хистӕр нӕлгоймӕгтӕ Библийы бындурыл уынаффӕ куы дӕттой, уӕд гӕнӕн ис, ӕмӕ сӕм цӕхгӕр ныллӕууӕм. Уӕд нӕм, чи зоны, афтӕ фӕкӕса, уыдон нӕ дзӕбӕх не ’мбарынц, ӕмӕ афтӕмӕй гӕнӕн ис, нӕ хивӕнд зӕрдӕйы фӕдыл ацӕуӕм. Къайады фыццаг цинтӕ куы фӕвӕййынц, уӕд та нӕхи фӕсмонӕй фӕхӕрӕм, хуыздӕр мын куыд уыд, уый мын куы дзырдтой, уӕд ӕм куыннӕ байхъуыстон, зӕгъгӕ (Фӕсномыг ныхӕстӕ 23:19; 28:26). Ныр нӕ бонтӕ ӕрвитӕм ӕнӕ уарзт ӕмӕ ӕнӕ рӕвдыдӕй, удхар кӕнӕм нӕ сывӕллӕттӕ хъомыл кӕнгӕйӕ, уыимӕ ма ӕнӕуырнӕг цардӕмбалимӕ. Куыд зын вӕййы, ӕвӕдза, афтӕ ӕнхъӕл цӕмӕй вӕййӕм, ӕмӕ нын стыр амонд ӕрхӕсдзӕн, уый нын маст ӕмӕ цӕссыгӕй дарддӕр куы ницы ӕрхӕссы!

Хуыцауыл иузӕрдиондзинад — сӕйраг дӕгъӕл

8. Бинонтӕ Хуыцауыл иузӕрдион куы уой, уӕд уый куыд уыдзӕн ахъаз сӕ иудзинад ӕмӕ амондӕн?

⁸ Дзырд дӕр ыл нӕй, дыууӕ уды кӕрӕдзийы зӕрдӕмӕ куы цӕуой, уӕд сын ӕнгомдӕр ахастытӕ кӕй уыдзӕн. Фӕлӕ бинонтӕ иууыл фидардӕр ӕмӕ ӕнгомдӕр уыдзысты, царды иу нысанмӕ куы тырной, иу цыдӕр сын куы уа ахсджиаг, уӕд. Лӕг дӕр ӕмӕ ус дӕр Иегъовӕ Хуыцауыл иузӕрдион куы уой, уӕд сӕ уымӕй тынгдӕр ницы иу кӕндзӕн (Екклесиаст 4:12). Чырыстон къайӕн сӕ царды нысан Иегъовӕйӕн лӕггад кӕнын куы вӕййы, уӕд вӕййынц ӕмвӕнд ӕмӕ ӕмзонд, стӕй сӕ ӕгъдау ӕмӕ сӕ уаг дӕр вӕййы иу. Уыдон иумӕ ахуыр кӕнынц Хуыцауы Ныхас. Иумӕ фӕкувынц, ӕмӕ сын уый иу кӕны сӕ зӕрдӕты фӕндтӕ. Иумӕ цӕуынц чырыстон фембӕлдтӕм ӕмӕ хъусын кӕнынмӕ. Ӕппӕт уыдӕтты фӕрцы ӕнгомдӕр кӕнынц сӕ ахастытӕ Хуыцауимӕ ӕмӕ сӕ кӕрӕдзиимӕ дӕр. Сӕйраг та уый у, ӕмӕ афтӕмӕй арфӕгонд цӕуынц Иегъовӕйӕ.

9. Исахъӕн ус курыны афон куы ӕрцыд, уӕд Авраам цы сарӕзта ӕмӕ уый хорзӕй цы ӕрхаста?

 ⁹ Нӕ фыдӕл Авраам Хуыцауыл иузӕрдион кӕй уыд, уымӕ гӕсгӕ йӕ фырт Исахъӕн ус курыны афон куы ӕрцыд, уӕд архайдта, Хуыцауы зӕрдӕмӕ куыд цӕуы, афтӕ. Авраам, йӕ фӕсдзӕуинты хистӕрӕн, йӕ ныфс кӕуыл дардта, уымӕн бахӕс кодта: «Арв ӕмӕ зӕхх Скӕнӕг Хуыцау Иегъовӕйӕ мын расомы кӕн, мӕ фырт Исахъӕн мын ханаайнаг чызджытӕй, цы адӕмы ӕхсӕн цӕрын, уыдоны чызджытӕй кӕй не ’рхӕсдзынӕ ус, фӕлӕ кӕй ацӕудзынӕ мӕ райгуырӕн зӕхмӕ, мӕ хӕстӕджытӕм ӕмӕ мын уырдыгӕй кӕй ӕркӕндзынӕ ус мӕ фырт Исахъӕн... [Иегъовӕ] йӕ зӕды арвитдзӕн дӕ разӕй ӕмӕ мын ӕнӕмӕнг уырдыгӕй ӕркӕндзынӕ ус мӕ фыртӕн». Ревеккӕ разынд диссаджы бинойнаг ӕмӕ йӕ Исахъ бирӕ уарзта (Уӕвынад 24:3, 4, 7, 14—21, 67).

10. Библимӕ гӕсгӕ лӕг ӕмӕ усыл цавӕр хӕстӕ ис?

¹⁰ Чырыстӕттӕй бинонтӕ кӕмӕн нӕма ис, уыдонӕн та Хуыцауыл иузӕрдион кӕй сты, уый ӕххуыс кӕндзӕн хорз миниуджытыл ахуыр кӕнынӕн, цӕмӕй фӕстӕдӕр сӕ бон уа, Библимӕ гӕсгӕ лӕг кӕнӕ усыл цы хӕстӕ ис, уыдон ӕххӕст кӕнын. Уыцы хӕстӕй апостол Павел ранымадта ахӕмтӕ: «Устытӕ, уӕ лӕгтӕн коммӕ кӕсут, куыд Хицауӕн... Лӕгтӕ, уарзут уӕ устыты, Чырысти Аргъуан куыд бауарзта ӕмӕ Йӕхи уый тыххӕй [куыд] ратта, афтӕ... Афтӕ хъуамӕ уарзой лӕгтӕ сӕ устыты, куыд сӕхи буӕртты... Афтӕ алчидӕр сымахӕй уарзӕд йӕ усы, куыд йӕхӕдӕг йӕхи; ус та тӕрсӕд йӕ лӕгӕй [«тынг аргъ кӕнӕд йӕ лӕгӕн», НД]» (Ефесӕгтӕм 5:22—33). Куыд уынӕм, афтӕмӕй Павел Хуыцауы удцырынӕй кӕй ныффыста, уыцы ныхӕсты сӕйраг нысаниуӕг лӕвӕрд цӕуы уарзондзинад ӕмӕ аргъ кӕнынӕн. Цӕмӕй адӕймаг афтӕ араза, уый тыххӕй та йӕм хъуамӕ Иегъовӕ Хуыцауы ӕфсарм уа. Уӕд лӕг ӕмӕ ус куыд циндзинады, афтӕ зындзинӕдты дӕр кӕрӕдзийыл уыдзысты ӕнувыд. Бинонтӕ скӕнынвӕнд цы чырыстон кӕны, уымӕ хъуамӕ йӕхицӕй ныфс уа, йӕ бон уыцы хӕс ӕххӕст кӕнын кӕй у, уымӕй.

Кӕд у афон?

11. а) Ус курын кӕнӕ чындзы цӕуын хуыздӕр кӕд у, уый тыххӕй Библи цы дзуры? ӕ) 1 Коринфӕгтӕм 7:36-ӕм стихы Библи цы уынаффӕ дӕтты, уымӕ байхъусын хорз кӕй у, уый цавӕр дӕнцӕг ӕвдисы?

¹¹ Адӕймаг бинонтӕ скӕнынмӕ цӕттӕ кӕд уыдзӕн, уый йӕ ӕнӕмӕнг хъӕуы зонын. Алчидӕр йӕхи афоны кӕй вӕййы цӕттӕ уыцы хъуыддагмӕ, уымӕ гӕсгӕ Фыстад бӕлвырдӕй ницы дзуры, ус курын кӕнӕ чындзы цӕуын цал аздзыдӕй хъӕуы, уый тыххӕй. Фӕлӕ нын уӕддӕр ӕмбарын кӕны, хуыздӕр кӕй у банхъӕлмӕ кӕсын, «цалынмӕ нӕ аивгъуыйа ӕвзонджы сонты дуг» — адӕймаг зондӕй куы нӕ фӕархайы, фӕлӕ йӕ зӕрдӕйы монцты фӕдыл куы фӕцӕуы, уӕд (1 Коринфӕгтӕм 7:36, НД). «Уыцы уынаффӕмӕ хъусын мын ӕнцон нӕ уыд, куы уыдтон, ме ’мбӕлттӕ лӕппутимӕ куыд ӕмбӕлдысты ӕмӕ чындзы куыд цыдысты, бирӕтыл ссӕдз азы дӕр нӕ цыд, афтӕмӕй,— дзуры чырыстон хо Мишель.— Фӕлӕ ӕз ӕмбӕрстон, уыцы уынаффӕ мын Иегъовӕ кӕй дӕтты, ӕмӕ уымӕн та йӕ зӕрдӕ хорзӕй дарддӕр кӕй ницы зӕгъы. Мой скӕныныл кӕй нӕ фӕтагъд кодтон, уый фӕрцы мӕ бон сси Иегъовӕимӕ мӕ ахастытӕ бӕрӕг фенгомдӕр кӕнын ӕмӕ адӕймагмӕ рӕзгӕ кары цы фӕлтӕрддзинад нӕ вӕййы, уыцы фӕлтӕрддзинад райсын. Цалдӕр азмӕ хуыздӕр бацӕттӕ дӕн, бинонты цард адӕймагыл цы хӕстӕ ӕвӕры ӕмӕ дзы цы зындзинӕдтӕ фӕзыны, уыдонмӕ».

12. Ус курын кӕнӕ чындзы цӕуыныл тагъд кӕнын цӕуылнӕ хъӕуы?

¹² Ус курын кӕнӕ чындзы цӕуыныл чи фӕтагъд кӕны, уыдон арӕх бамбарынц, азтӕ куыд цӕуынц, афтӕ сӕ домӕнтӕ ӕмӕ сӕ фӕндтӕ кӕй фӕивынц, уый. Райдианы сӕм афтӕ бӕллиццаг цы каст, уымӕн ницыуал нысаниуӕг вӕййы. Иу ӕрыгон чырыстон хо сфӕнд кодта 16-аздзыдӕй смой кӕнын. Уыцы кары смой кодтой йӕ мады мад ӕмӕ йӕ мад дӕр. Йӕ зӕрдӕмӕ цы лӕппу цыд, уый йӕ ракурыныл куы нӕ сразы, уӕд ссардта ӕндӕры ӕмӕ дзы смой кодта. Фӕлӕ фӕстӕдӕр, афтӕ талф-тулфты кӕй амой кодта, ууыл фӕсмонӕй йӕхи хордта.

13. Ӕгӕр ӕрыгонӕй чи ракуры ус кӕнӕ чындзы чи ацӕуы, уыдонӕн арӕх цы нӕ фӕфаг кӕны?

¹³ Бинонтӕ скӕнынвӕнд чи кӕны, уый хъуамӕ дзӕбӕх ӕмбара, цы хӕстӕ йыл уыдзӕн ӕмӕ йӕ цы аразын хъӕудзӕн, уыдӕттӕ иууылдӕр. Дыууӕ адӕймаджы сӕ цард ӕгӕр раджы куы баиу кӕнынц, уӕд сын арӕх уый ӕрхӕссы, бынтондӕр цӕттӕ кӕмӕ нӕма сты, ахӕм зындзинӕдтӕ. Уыцы зындзинӕдтӕ лыг кӕнынӕн ӕмӕ сывӕллӕттӕ хъомыл кӕнынӕн сӕм фылдӕр хатт нӕдӕр фӕлтӕрддзинад вӕййы, нӕдӕр ӕмбаргӕдзинад. Уӕдӕ ус курӕн кӕнӕ чындзы цӕуӕн ӕрмӕстдӕр уӕд ис, кӕд ӕмӕ адӕймаг алцӕмӕйдӕр цӕттӕ уа йӕ цард искӕимӕ цӕрӕнбонтӕм баиу кӕнынмӕ.

14. Бинонты царды цы зындзинӕдтӕ фӕзыны, уыдон лыг кӕнынӕн цы хъӕуы?

¹⁴ Павел фыста, зӕгъгӕ, бинонтӕ кӕмӕн уа,  «ахӕмтӕ буарӕй домд уыдзысты» (1 Коринфӕгтӕм 7:28, НФ). Быцӕутӕ фӕзыны, дыууӕ адӕймаджы ӕмхуызон кӕй не сты ӕмӕ сӕ цӕстӕнгӕстӕ дӕр иухуызон кӕй не сты, уый тыххӕй. Ӕнӕххӕст кӕй стӕм, уый аххосӕй алыхатт ӕнцон нӕ вӕййы, Библи лӕг ӕмӕ усыл цы хӕстӕ ӕвӕры, уыдон ӕххӕст кӕнын (1 Коринфӕгтӕм 11:3; Колоссӕгтӕм 3:18, 19; Титмӕ 2:4, 5; 1 Петры 3:1, 2, 7). Ӕмӕ цӕмӕй ахӕм уавӕрты адӕймаг Хуыцауӕй кура зонд ӕмӕ уарзондзинадӕй архайа, уый тыххӕй йӕм хъуамӕ уа чырыстон фӕлтӕрддзинад ӕмӕ йын Хуыцауимӕ уа ӕнгом ахастытӕ.

15. Сывӕллӕтты бинонты цардмӕ бацӕттӕ кӕныны хъуыддаджы ныййарджытӕн цавӕр ахадындзинад ис? Ӕрхӕсс дӕнцӕг.

¹⁵ Ныййарджытӕ сӕ сывӕллӕттӕн куы ӕххуыс кӕной, Хуыцауы амындтӕм хъусын куыд ахсджиаг у, уый ӕмбарынӕн, уӕд сӕ уымӕй цӕттӕ кӕндзысты бинонты цардмӕ. Библи ӕмӕ чырыстон публикацитӕй арӕхстджынӕй пайда кӕнгӕйӕ, ныййарджытӕн сӕ бон у сӕ цотӕн баххуыс кӕнын, бинонты цард адӕймагыл цы бӕрндзинад ӕвӕры, уый райсынмӕ сӕхӕдӕг кӕнӕ сӕ фидӕны цардӕмбал цӕттӕ сты ӕви нӕ, уый сбӕрӕг кӕнынӕн *. Блоссом, 18-аздзыд хо, йе ’мбырдӕй иу лӕппуйы бауарзта. Уыцы ӕфсымӕр уыд пионер, ӕмӕ сӕ фӕндыд сӕ цард баиу кӕнын. Фӕлӕ йын йӕ ныййарджытӕ загътой, зӕгъгӕ дын нырма ӕгӕр раджы у ӕмӕ ма иу аз банхъӕлмӕ кӕс. Фӕстӕдӕр Блоссом фыста: «Куыд амондджын дӕн, уыцы зондджын уынаффӕмӕ кӕй байхъуыстон, уымӕй. Афӕдзмӕ ӕз бирӕ фембаргӕдӕр дӕн ӕмӕ хатын райдыдтон, уыцы лӕппу мӕ хорз цардӕмбалӕн кӕй нӕ бӕззыд, уый. Ӕппынфӕстаг уый ныууагъта Иегъовӕйы организаци, ӕз та мӕхи бахызтон, мӕ цард мын ӕнӕхъӕнӕй дӕр чи фехӕлдтаид, ахӕм рӕдыдӕй. Цы хорз у, кӕддӕриддӕр мын хорз зонд чи бацамондзӕн, ахӕм ӕмбаргӕ ныййарджытӕ мын кӕй ис, уый!»

«Ӕрмӕст Хицауы мидӕг»

16. а) Чырыстонӕн бинонтӕ «ӕрмӕст Хицауы мидӕг» скӕнын ӕнцон цы уавӕрты нӕ вӕййы? ӕ) Чырыстоны йӕ цард ӕнӕуырнӕг адӕймагимӕ баиу кӕнын куы фӕнда, уӕд цӕуыл хъуамӕ ахъуыды кӕна?

¹⁶ Чырыстӕттӕн Иегъовӕ дӕтты ахӕм амынд: «Ӕрмӕст Хицауы мидӕг» (1 Коринфӕгтӕм 7:39). Чырыстон ныййарджытӕ ӕмӕ сӕ сывӕллӕттӕн, гӕнӕн ис, уый ӕнцон ма уа. Цӕуылнӕ? Ӕвзонг лӕппу кӕнӕ чызджы, гӕнӕн ис, фӕнда ус ракурын кӕнӕ чындзы ацӕуын, фӕлӕ ӕмбырды уый аккаг мачи уа. Кӕд афтӕ нӕу, уӕддӕр уымӕ афтӕ кӕсы. Кӕцыдӕр ӕмбырдты нӕлгоймӕгтӕ вӕййы къаддӕр, йе та адӕймаг йӕхицӕн аккаг никӕй фӕкӕны. Уыцы уавӕры ӕмбырды уӕнг чи нӕу, ахӕм адӕймаджы чырыстон ӕфсымӕр кӕнӕ хоимӕ йӕ цард баиу кӕнын куы фӕнда, уӕд, гӕнӕн ис, ӕвзонг адӕймаг йӕхӕдӕг дӕр ӕмӕ йӕ ныййарджытӕ дӕр ахъуыды кӕной, Иегъовӕ куыд дзуры, афтӕ куы нӕ бакӕнӕм, уӕддӕр дзы ӕвзӕрӕй ницы уыдзӕн. Фӕлӕ уӕд хорз уаид Авраамы дӕнцӕг ӕрхъуыды кӕнын. Авраамӕн Хуыцауимӕ йӕ ахастытӕ тынг зынаргъ кӕй уыдысты, уымӕ гӕсгӕ батыхсти, цӕмӕй йӕ фырт Исахъ ракуырдтаид, Иегъовӕйыл иузӕрдион чи уыд, ахӕм сылгоймаджы. Афтӕ сарӕзта Исахъ дӕр, йӕ фырт Иаков ус курыны кары куы бацыд, уӕд. Раст у, уый сӕ ӕнцон никӕмӕн уыд, фӕлӕ афтӕ фӕндыд Хуыцауы, ӕмӕ уый тыххӕй арфӕгонд дӕр ӕрцыдысты (Уӕвынад 28:1—4).

17. Цӕмӕн ис зӕгъӕн, ӕмӕ ӕнӕуырнӕгимӕ цард хорзӕй кӕй ницы ӕрхӕсдзӕн, ӕмӕ, сӕйраджыдӕр, цӕмӕн хъӕуы бинонтӕ «ӕрмӕст Хицауы мидӕг» скӕнын?

¹⁷ Хаттӕй-хатт ӕнӕуырнӕг цардӕмбал ӕппынфӕстаг слӕууы чырыстон фӕндагыл. Фӕлӕ фылдӕр хатт, йӕ цард ӕнӕуырнӕгимӕ чи баиу кӕны, уый фӕсмойнаг фӕвӕййы. Йӕхи ӕнӕуырнӕгимӕ ӕнӕмсӕр ӕфсондзы бын чи баифтындзы, уыдонӕн сӕ цардӕмбӕлттимӕ иумӕйагӕй ницы вӕййы, нӕдӕр сӕ цы фӕуырны, нӕдӕр цы ӕгъдауыл хӕст вӕййынц ӕмӕ нӕдӕр царды цӕмӕ фӕтырнынц, уый (2 Коринфӕгтӕм 6:14). Афтӕмӕй дыууӕ удӕн тынг зын у кӕрӕдзиимӕ зӕрдӕбын ныхас кӕнын ӕмӕ амондджын цард кӕнын. Зӕгъӕм, иу чырыстон хо тынг маст кодта, чырыстон фембӕлды фӕстӕ-иу хӕдзармӕ куы  ӕрбацыд, уӕд-иу дзы цы хорз хъуыдытӕ фехъуыста, уыдон тыххӕй йӕ бон йе ’нӕуырнӕг лӕгимӕ аныхас кӕнын кӕй нӕ уыд, ууыл. Иууыл ахсджиагдӕр та уый у, ӕмӕ адӕймаг бинонты хъуыддаг «ӕрмӕст Хицауы мидӕг» кӕй кӕны, уымӕй ӕвдисы, Иегъовӕйыл иузӕрдион кӕй у, уый. Ӕмӕ нын Хуыцауы Ныхас куыд амоны, афтӕ куы саразӕм, уӕд та нӕ нӕ зӕрдӕ нӕ фӕзылын кӕны, уымӕн ӕмӕ «Йын ӕхцон цы у, уый кӕнӕм Йӕ разы» (1 Иоанны 3:21, 22, НФ).

18. Ус курын кӕнӕ чындзы цӕуыныл хъуыдыгӕнгӕйӕ, фыццаджыдӕр, цӕмӕ хъӕуы кӕсын ӕмӕ цӕмӕн?

¹⁸ Ус курын кӕнӕ чындзы цӕуыныл хъуыдыгӕнгӕйӕ, сӕйраджыдӕр, кӕсын хъӕуы, адӕймагӕн йӕ удыхъӕдмӕ ӕмӕ йын Хуыцауимӕ цавӕр ахастытӕ ис, уымӕ. Чырыстон миниуджытӕ, стӕй Хуыцауы кӕй уарзы ӕмӕ йыл ӕппӕт зӕрдӕйӕ иузӕрдион кӕй у, уый ӕддаг бакастӕй бирӕ ахсджиагдӕр у. Хуыцауы хорзӕх ӕмӕ арфӕдзинадӕй хайджын сты, адӕймагӕн Иегъовӕимӕ ӕнгом ахастытӕ кӕй хъуамӕ уа, уый чи ӕмбары ӕмӕ уымӕ ӕппӕт зӕрдӕйӕ чи тырны, уыцы лӕгтӕ кӕнӕ устытӕ. Лӕг ӕмӕ ус иууыл ӕнгомдӕр та уӕд уыдзысты, кӕд ӕмӕ дыууӕйӕ дӕр иузӕрдион уой се Сфӕлдисӕгыл ӕмӕ йын алы хъуыддаджы дӕр йӕ амындтӕм хъусой. Уый Иегъовӕйӕн хӕссы кад, бинонты цардӕн та ӕвӕры фидар бындур ӕмӕ ахъаз у цӕрӕнбонтӕм дыууӕ уды амондӕн.

[Фиппаинаг]

Цавӕр дзуапп ратдзынӕ?

• Хорз цардӕмбал ссарынӕн Хуыцауы амындтӕ цӕмӕн хъӕуынц?

• Лӕг дӕр ӕмӕ ус дӕр Хуыцауыл иузӕрдион куы уой, уӕд сӕ бинонты цард фидардӕр цӕмӕн уыдзӕн?

• Ныййарджыты бон куыд у сӕ сывӕллӕтты бинонты цардмӕ цӕттӕ кӕнын?

• Бинонтӕ «ӕрмӕст Хицауы мидӕг» скӕнын ӕнӕмӕнг хъуыддаг цӕмӕн у?

[Фарстатӕ ахуыр кӕнынӕн]

[Нывтӕ 11 фарсыл]

Цардӕмбал агургӕйӕ Хуыцауы амындмӕ гӕсгӕ куы архайай, уӕд уыдзынӕ ӕцӕг амондджын.

[Нывтӕ 12 фарсыл]

Бинонтӕ «ӕрмӕст Хицауы мидӕг» куы скӕнай, уӕд дӕм ӕнхъӕлмӕ кӕсы стыр арфӕдзинӕдтӕ.