Ӕнусты дӕргъы чи лӕууы, ахӕм бӕлӕстӕ

Хӕдзар аразынӕн айнӕг къӕдзӕх бынтон хорз бынат нӕу, уӕлдайдӕр та йӕ цъупп. фӕлӕ, ӕвзӕр уавӕртӕм нӕкӕсгӕйӕ, иуӕй-иу хӕххон бӕлӕстӕ ныффидар сты ахӕм айнӕг къӕдзӕхты фӕхстыл ӕмӕ лӕууынц зымӕджы хъызты дӕр ӕмӕ сӕрды тӕвды дӕр.

ФЫЛДӔР хатт ацы фӕразон бӕлӕстӕ, дӕлвӕзты сын цы «хӕстӕджытӕ» зайы, уыдонау бӕрзонд ӕмӕ рӕсугъд нӕ вӕййынц. Сӕ зӕнгтӕ вӕййынц къуызыртӕ ӕмӕ зылынтӕ, уӕдӕ рӕзгӕ дӕр, куыд ӕмбӕлы, афтӕ нӕ фӕкӕнынц. Иуӕй-иутӕ дзы сты дзигло бӕлӕсты хуызӕн — афтӕ сӕ скодта карз ӕрдзыхъӕд ӕмӕ цы мӕгуыр мӕры зайынц, уый.

Уыцы бӕлӕстӕ, ӕрдзы уавӕртӕ иууыл карздӕр кӕм сты, ахӕм бынаты кӕй зайынц, уымӕ гӕсгӕ, чи зоны, ахъуыды кӕнай, бирӕ нӕ цӕрынц, зӕгъгӕ. Ӕцӕгӕй та афтӕ нӕу. «Мафусал», сыгджын нӕзы бӕлас, зайы Калифорнийы хӕхты, Уайт-Маунтинсы, 3 000 метры бӕрзӕндыл, ӕмӕ йыл иуӕй-иу бӕрӕггӕнӕнтӕм гӕсгӕ цӕуы 4 700 азы. Уыцы бӕлас хаст ӕрцыд Гиннесы рекордты чиныгмӕ 1997 азӕн, куыд нӕ планетӕйыл иууыл зӕронддӕр бӕлас. Эдмунд Шульман, уыцы рагон бӕлӕстӕ чи иртасы, уый загъта: «Куыд зыны, афтӕмӕй сыгджын нӕзы бӕлас... уыйбӕрц фӕцӕры, ӕвзӕр уавӕрты кӕй зайы, уый руаджы. Уайт-Маунтинсы цы зӕронд [нӕзы] бӕлӕстӕ ис, уыдон зайынц 3 000 метры бӕрзӕндыл хус, дурджын, афтид ран». Шульман ма ноджыдӕр раиртӕста, иннӕ нӕзы бӕлӕстӕй зӕронддӕр чи у, уыдон дӕр ӕвзӕр уавӕрты кӕй зайынц, уый.

Уыцы фидар бӕлӕсты кӕд ӕвзӕр уавӕрты фӕразын хъӕуы, уӕддӕр сын цы дыууӕ хорз мадзалы ис, уыдонӕй сӕ бон куыд у, афтӕ пайда кӕнынц. Зайӕгойтӕ бирӕ кӕм нӕй, ахӕм ран хибарӕй кӕй зайынц, уымӕ гӕсгӕ хъӕд куы ссудзы, уӕд сӕ уый бахъахъхъӕны зынгӕй. Уый та рагон бӕлӕстӕн у сӕ иууыл стырдӕр знӕгтӕй иу. Дыккаг та уый, ӕмӕ сӕ уидӕгтӕй айнӕг къӕдзӕхты фӕхстыл афтӕ фидар хӕцынц, ӕмӕ сӕ ӕрмӕстдӕр зӕххӕнкъуысты бон у базмӕлын кӕнын.

Библийы Хуыцауы иузӕрдион лӕггадгӕнджытӕ барст цӕуынц бӕлӕстимӕ (Псалом 1:1—3; Иереми 17:7, 8). Уыдон дӕр уӕззау уавӕрты кӕй бахауынц, уымӕ гӕсгӕ бирӕ зындзинӕдтӕ  бавзарынц. Фӕдылзылд, ӕвзӕр ӕнӕниздзинад кӕнӕ сын фырмӕгуырдзинад, гӕнӕн ис, сӕ уырнындзинадӕн уӕззау фӕлварӕн суой, уӕлдайдӕр та азӕй-азмӕ куы ницы ива, уӕд. Фӕлӕ се Сфӕлдисӕг, ӕвзӕр уавӕрты фидар чи лӕууы, уыцы бӕлӕстӕ дӕр чи сфӕлдыста, уый йӕ лӕггадгӕнджытӕн зӕрдӕ ӕвӕры, кӕй сын ӕххуыс кӕндзӕн, уымӕй. Уырнындзинады ӕнӕфӕцудгӕ чи у, уыдонӕн Библи зӕрдӕ ӕвӕры: «Бафидар уӕ кӕндзӕн, тых уын ратдзӕн» (1 Петры 5:9, 10, НД).

Библийы арӕх «фӕразын»-ӕй цы грекъаг мивдисӕг фӕцӕуы тӕлмац, уый нысан кӕны «нӕ фӕцудын, фидар лӕууын, нӕ сӕттын». Хӕххон бӕлӕстау мах дӕр сӕйраджыдӕр хъӕуы арф уидӕгтӕ ауадзын, цӕмӕй нӕ бон фӕразын уа. Цӕмӕй чырыстӕттӕ фидар лӕууой, уый тыххӕй хъуамӕ арф уидӕгтӕ ауадзой Йесо Чырыстийы. Павел фыста: «Сымах куыд райстат Хицау Йесо Чырыстийы, афтӕ цӕут Уый мидӕг, уидӕгтӕ ауадзгӕйӕ фидаргонд стут уырнындзинады Уый мидӕг, ахуыр дӕр куыд стут, ӕнтыстджын уӕвгӕйӕ арфӕ кӕнгӕйӕ» (Колоссӕгтӕм 2:6, 7).

Павел ӕмбӕрста, уырнындзинады уидӕгтӕ куыд ахсджиаг сты, уый. Уый йӕхӕдӕг дӕр тох кодта «йӕ буары иу сындзимӕ», ӕмӕ цас лӕггад кодта, уыйбӕрц фӕрӕзта карз ӕфхӕрдӕн (2 Коринфӕгтӕм 11:23—27; 12:7, НФ). Фӕлӕ уый бамбӕрста, Хуыцау ын цы тых лӕвӕрдта, уый руаджы йӕ бон дарддӕр дӕр размӕ цӕуын кӕй уыд, уый. «Алцыдӕр мӕ бон у бафӕразын, хъару мын чи дӕтты, уый фӕрцы»,— загъта Павел (Филиппӕгтӕм 4:13, НД).

Павелы дӕнцӕгӕй куыд зыны, афтӕмӕй чырыстоны фӕразондзинад уавӕртӕй кӕнгӕ нӕу. Ӕнусты дӕргъы хӕххон бӕлӕстӕ карз дымгӕты ныхмӕ куыд фидар лӕууынц, афтӕ мах дӕр нӕ уырнындзинады фидар лӕудзыстӕм, Чырыстийы уидӕгтӕ куы ауадзӕм ӕмӕ нӕ ныфс, Хуыцау нын цы хъару дӕтты, ууыл куы дарӕм, уӕд. Уымӕй уӕлдай ма кӕронмӕ куы бафӕразӕм, уӕд нӕхи цӕстӕй фендзыстӕм, Хуыцау цы зӕрдӕвӕрдтӕ радта, уыдонӕй ма ӕндӕр зӕрдӕвӕрд дӕр куыд сӕххӕст уыдзӕн, уый: «Мӕ адӕмы бонтӕ уыдзысты бӕласы бонтау» (Исай 65:22; Матфейы 24:13).