Ӕххуыс Библи ӕмбарынӕн

БИБЛИ у диссаджы чиныг, дыккаг ахӕм чиныг нӕй. Чи йӕ фыста, уыдон дзурынц, зӕгъгӕ йӕ фыстой Хуыцауы удцырынӕй, ӕмӕ уый бӕрӕг у, цы хабӕрттӕ дзы ис фыст, уыдонӕй (2 Тимофеймӕ 3:16). Бирӕ хъуыддӕгтӕй фӕстӕмӕ ма Библи ӕмбарын кӕны, кӕцӕй фӕзындыстӕм, а зӕххыл цӕмӕн цӕрӕм ӕмӕ нӕм фидӕны цы ӕнхъӕлмӕ кӕсы, уый. Кӕй зӕгъын ӕй хъӕуы, ацы чиныгмӕ ӕмбӕлы лӕмбынӕгдӕр ӕркӕсын.

Чи зоны, дӕхӕдӕг дӕр архайдтай Библи кӕсыныл, фӕлӕ дӕм зынӕмбарӕн фӕкаст. Чи зоны, ӕмӕ нӕ зоныс, дӕ фарстытӕн дзы дзуаппытӕ кӕм ис ссарӕн, уый. Кӕд афтӕ у, уӕд ма дын ис ӕмбӕлттӕ. Дӕ уавӕр у, фыццаг ӕнусы иу лӕг цы уавӕры уыд, уый хуызӕн. Уыцы лӕг бӕхуӕрдоныл фӕцӕйцыд Иерусалимӕй йӕ райгуырӕн бӕстӕм, Эфиопимӕ. Стыр бынат чи ахста, уыцы эфиопаг лӕг хъӕрӕй каст Фыстытӕй Исайы пехуымпарадон чиныг, кӕцы фыст ӕрцыд авдсӕдӕ азӕй фылдӕры размӕ.

Ӕнӕнхъӕлӕджы йӕ бӕхуӕрдоны фарсмӕ февзӕрди иу лӕг ӕмӕ йын салам радта. Уый уыд Филипп, Йесойы ахуыргӕнинаг, ӕмӕ эфиопаг лӕджы афарста: «Цы кӕсыс, уый ӕмбарыс?» Эфиопаг дзуапп радта: «Куыд ӕй бамбарон, исчи мын ӕй куы нӕ бамбарын кӕна, уӕд?» Стӕй Филиппы йӕ бӕхуӕрдоны сбадын кодта. Филипп ын бамбарын кодта, цы бынат каст, уый, ӕмӕ йын радзырдта «хорз уацхъуыд Йесойы тыххӕй» (Куыстытӕ 8:30—35).

Бирӕ ӕнусты размӕ Филипп эфиопаг лӕгӕн Хуыцауы Ныхас бамбарынӕн куыд баххуыс кодта,  афтӕ абон дӕр Иегъовӕйы Ӕвдисӕнтӕ ӕххуыс кӕнынц адӕмӕн Библи ӕмбарынӕн. Дӕуӕн дӕр ӕхсызгонӕй баххуыс кӕндзысты. Хорз уаид, фыццаджыдӕр, Фыстады бындурон ахуырӕдтӕ базонын ӕмӕ стӕй Библи иудадзыг ахуыр кӕнын (Дзуттытӕм 6:1). Дӕ зонындзинӕдтӕ куыд фылдӕр кӕной, афтӕ дӕ бон суыдзӕн, апостол Павел «хъӕбӕр хӕринаг» кӕй схуыдта, уый хӕрын, ома ӕцӕгад арфдӕр ӕмбарын (Дзуттытӕм 5:14). Кӕй зӕгъын ӕй хъӕуы, ахуыр кӕндзынӕ Библи, фӕлӕ дын алыхуызон темӕтӕм Библийӕ стихтӕ ссарынӕн ӕмӕ сӕ бамбарынӕн баххуыс кӕндзысты ӕндӕр публикацитӕ — ӕххуысчингуытӕ.

Ахуыр кӕнӕн ис, дӕу кӕд ӕмӕ кӕм фӕнды, уым. Иуӕй-иутӕ ма ахуыр кӕнынц телефонӕй дӕр. Уыцы ахуыр нӕ вӕййы, скъолайы куыд фӕахуыр кӕнынц, афтӕ; алкӕимӕдӕр ахуыр кӕнынц хицӕнӕй, йӕ уавӕртӕ кӕмӕн куыд амонынц, уымӕ гӕсгӕ, уыимӕ уӕлдай нӕу, адӕймаг цавӕр бинонты ’хсӕн схъомыл ӕмӕ цавӕр ахуырад райста, уый. Библи ахуыр кӕнынӕн дӕ ӕхца фидын нӕ хъӕуы (Матфейы 10:8). Экзаментӕ дӕттын дӕ нӕ хъӕудзӕн, ӕмӕ дӕ къӕмдзӕстыг дӕр ничи фӕкӕндзӕн. Дӕ фарстытӕн ссардзынӕ дзуаппытӕ ӕмӕ базондзынӕ, Хуыцаумӕ баввахс уӕвӕн куыд ис, уый. Фӕлӕ дӕ цӕмӕ хъӕуы Библи ахуыр кӕнын? Ӕркӕс, Библи ахуыргӕнгӕйӕ амондджындӕр цӕмӕ гӕсгӕ суыдзынӕ, уымӕ.