Сфӕлындут бирӕфӕразондзинады

«Сфӕлындут... фӕлмӕн зӕрдӕйы... [ӕмӕ] бирӕфӕразондзинады» (КОЛОССӔГТӔМ 3:12).

1. Ӕрхӕсс, йӕ бирӕфӕразондзинадӕй фӕзминаг чи у, ахӕм адӕймаджы дӕнцӕг.

РЕЖИ цӕры хуссар-ныгуылӕн Францы. 1952 азы уый райста донаргъуыд ӕмӕ сси Иегъовӕйы Ӕвдисӕн. Бирӕ азты дӕргъы йӕ ус алы хуызы архайдта йӕ ныхмӕ, нӕ йӕ уагъта Иегъовӕйӕн лӕггад кӕнын. Цӕмӕй фембӕлдтӕм ма цыдаид, уый тыххӕй йын йӕ машинӕйы цӕлхытӕ фӕхуынкъ кӕныныл дӕр архайдта. Иу хатт та лӕг хъусын кӕнынмӕ куы уыд, уӕд йӕ фӕдыл цыд, ӕмӕ-иу хӕдзары цӕрджытимӕ Паддзахады тыххӕй куы ныхас кодта, уӕд-иу ыл худын байдыдта. Кӕд Режийӕн йӕ ус ӕппынӕдзух дӕр афтӕ йӕ ныхмӕ цыди, уӕддӕр уыд бирӕфӕразон. Ӕмӕ уымӕй фӕзминаг у ӕппӕт чырыстӕттӕн дӕр, уымӕн ӕмӕ  Иегъовӕ йӕ лӕггадгӕнджытӕй алкӕмӕй дӕр домы, цӕмӕй иннӕтӕм бирӕфӕразон уой.

2. «Бирӕфӕразондзинадӕй» тӕлмац грекъаг дзырд комкоммӕ цы нысан кӕны ӕмӕ цы амоны?

² «Бирӕфӕразондзинад»-ӕй тӕлмац грекъаг дзырд комкоммӕ нысан кӕны «уды фидардзинад». Библийӕ ирон ӕвзагыл цы чингуытӕ ис, уым фараст хатты ӕмбӕлы «бирӕфӕразондзинадӕй», цыппар хатты та ахӕм дзырдтӕй: «алы фӕразондзинад», «стыр бирӕфӕразондзинад», «ӕппӕт бирӕфӕразондзинад» ӕмӕ «фӕразондзинад». Дзырд «бирӕфӕразондзинадмӕ» дзуттаг ӕвзаджы дӕр ӕмӕ грекъаг ӕвзаджы дӕр хауы фӕлмасдзинад, быхсын ӕмӕ мӕсты кӕнынмӕ тагъд нӕ кӕнын дӕр.

3. Фыццаг ӕнусы цӕрӕг грекъӕгтӕй хъауджыдӕр бирӕфӕразондзинадмӕ чырыстӕттӕ цы цӕстӕй кастысты?

³ Бирӕфӕразондзинад фыццаг ӕнусы цӕрӕг грекъӕгтӕм лӕгдзинадыл нымад нӕ уыди. Ацы дзырдӕй философтӕ-стоиктӕ никуы пайда кодтой. Ахуыргонд ӕмӕ Библиӕмбарынгӕнӕг Уильям Баркли фыссы, зӕгъгӕ, бирӕфӕразондзинад «тынг ӕцӕгӕлон уыди грекъаг лӕджыхъӕдӕн», уымӕн ӕмӕ уыдон сӕрыстыр уыдысты, «фидис кӕнӕ ӕфхӕрд кӕй никӕмӕн барстой», уымӕй. Баркли дзуры: «Грекъӕгтӕм кадджын адӕймагыл нымад уыди, цыфӕндыйӕ дӕр йӕ маст райсын чи зыдта, уый. Чырыстӕтты ’хсӕн та кадджын адӕймагыл нымад у, йӕ маст райсын йӕ бон куы уа, уӕд дӕр ӕй уромын чи фӕразы, уый». Бирӕфӕразон адӕймаджы грекъӕгтӕ нымадтой лӕмӕгъ адӕймагыл, фӕлӕ ӕндӕр хъуыддӕгты куыд вӕййы, афтӕ ам дӕр «Хуыцауӕн Йӕ ӕнӕзонддзинад дӕр уӕлзондджындӕр у адӕймӕгтӕй, ӕмӕ Хуыцауы ӕдыхдзинад у тыхджындӕр адӕймӕгтӕй» (1 Коринфӕгтӕм 1:25).

Чырысти — бирӕфӕразондзинады дӕнцӕг

4, 5. Цавӕр стыр фӕразондзинады дӕнцӕг нын равдыста Йесо?

⁴ Иегъовӕйы фӕстӕ Йесо Чырысти у бирӕфӕразондзинады иууыл хуыздӕр дӕнцӕг. Иууыл зын уавӕры дӕр уый уыд диссаджы хиуылхӕцгӕ. Йесойы тыххӕй развӕлгъау загъд уыди ахӕм ныхӕстӕ: «Уый уыд тынг уынгӕджы, ӕмӕ хъизӕмар кодта барвӕндӕй; фӕлӕ йӕ дзыхӕй уддзӕф дӕр не схауд. Фыс ӕргӕвдынмӕ куыд фӕкӕнынц, афтӕ акодтой уый дӕр; ӕмӕ уӕрыкк йе ’лвынджыты раз куыд ӕгомыгӕй фӕлӕууы, афтӕ уддзӕф дӕр не схуад йӕ дзыхӕй» (Исай 53:7).

⁵ Ӕвӕдза, диссаг куыннӕ у, Йесо зӕххыл лӕггад кӕнгӕйӕ цы стыр фӕразондзинад равдыста, уый! Уый быхста йе знӕгты ӕлхыскъ фарстытӕн ӕмӕ йӕ ныхмӕлӕуджыты ӕфхӕрдӕн (Матфейы 22:15—46; 1 Петры 2:23). Фӕрӕзта йӕ ахуыргӕнинӕгтӕн, кӕд ӕппынӕдзух, уӕлдӕр сӕ чи уыд, ууыл быцӕу кодтой, уӕддӕр (Маркы 9:33—37; 10:35—45; Лукайы 22:24—27). Цӕй стыр хиуылхӕцындзинад равдыста, йӕ мӕлӕты ӕхсӕв Петр ӕмӕ Иоаннӕн куы загъта, «ма бафынӕй ут», зӕгъгӕ, фӕлӕ куы бафынӕй сты, уӕд! (Матфейы 26:36—41, НД).

6. Йесойы бирӕфӕразондзинад Павелӕн куыд фӕахъаз ӕмӕ уый мах цӕуыл ахуыр кӕны?

⁶ Йесо бирӕфӕразон уыди йӕ райгасы фӕстӕ дӕр. Уый йӕхиуыл уӕлдай тынг банкъардта апостол Павел, раздӕр йӕхӕдӕг чырыстӕтты ӕфхӕрӕг кӕй уыди, уымӕ гӕсгӕ. «Раст ӕмӕ алыхуызы райсын аккаг у дзырд,— фыста уый,— Йесо Чырысти кӕй ӕрцыд дунемӕ тӕригъӕдджынты фервӕзын кӕнынмӕ, кӕцытӕй ӕз дӕн фыццаг. Фӕлӕ уый тыххӕй ӕз хатыргонд дӕр дӕн, цӕмӕй Йесо Чырысти мӕн мидӕг фыццагыл равдиса ӕппӕт бирӕфӕразондзинад, дӕнцӕн уыдонӕн, кӕцытӕ ӕууӕнддзысты Ууыл, мыггагмӕйы цардмӕ» (1 Тимофеймӕ 1:15, 16). Кӕд нӕ царды мидӕг цыфӕнды ӕвзӕр хъуыддӕгтӕ дӕр сарӕзтам, уӕддӕр ныртӕккӕ Йесойыл куы ’ууӕндӕм, уӕд нын уый быхсдзӕн, цас хъӕуа, уыйбӕрц — ӕрмӕст нӕ хъӕуы «фӕсмондзинады аккаг хъуыддӕгтӕ кӕнын» (Куыстытӕ 26:20; Ромӕгтӕм 2:4). Чырысти Къаннӕг Азийы авд ӕмбырдмӕ Иоаннӕн кӕй ныффыссын кодта, уыцы ныхӕстӕй бӕрӕг у, кӕд бирӕфӕразон у, уӕддӕр уымӕ кӕй ӕнхъӕлмӕ кӕсы, ӕмӕ адӕймаг хуыздӕрыдӕм кӕй фӕивдзӕн (Раргомады чиныг, 2-аг ӕмӕ 3-аг сӕртӕ).

Сыгъдӕг уды дыргъ

7. Бирӕфӕразондзинад сыгъдӕг удимӕ куыд баст у?

⁷ Павел йе ’рвысты галатӕгтӕм 5-ӕм сӕры ныхӕй-ныхмӕ ӕрӕвӕрдта буары хъуыддӕгтӕ ӕмӕ сыгъдӕг уды дыргъ (Галатӕгтӕм 5:19—23). Бирӕфӕразондзинад иууыл райдианӕй Иегъовӕмӕ кӕй уыд, уымӕ гӕсгӕ ацы миниуӕг уымӕй цӕуы ӕмӕ йӕ сыгъдӕг уды дыргъ у (Рацыд 34:6, 7). Павел, уды дыргъмӕ  цы миниуджытӕ хауы, уыдон куы ранымадта, уӕд бирӕфӕразондзинад сӕвӕрдта цыппӕрӕм бынаты; уыимӕ ма ӕрхаста «уарзондзинад, циндзинад, фидыддзинад, [...] хорздзинад, фӕлмӕн зӕрдӕ, уырнындзинад, фӕлмасдзинад, хиуыл хӕцын» дӕр (Галатӕгтӕм 5:22, 23). Уӕдӕ Хуыцау куыд бирӕфӕразон у, йӕ лӕггадгӕнджытӕ дӕр афтӕ фӕразон куы вӕййынц, уӕд уый сыгъдӕг уды руаджы вӕййы.

8. Цы хъӕуы, цӕмӕй хӕссӕм сыгъдӕг уды дыргъ, уыимӕ бирӕфӕразондзинад дӕр?

⁸ О, фӕлӕ уый афтӕ ӕмбарын нӕ хъӕуы, ӕмӕ нын Иегъовӕ йӕ сыгъдӕг уд тыххӕй хъары. Хъуамӕ йын нӕхӕдӕг дӕттӕм бар, цӕмӕй ныл ӕндава (2 Коринфӕгтӕм 3:17; Ефесӕгтӕм 4:30). Сыгъдӕг уд нӕ цардыл ӕрмӕстдӕр уӕд ӕндавдзӕн, кӕд ӕмӕ йын алы хъуыддаджы дӕр йӕ дыргъ хӕссӕм. Павел буары хъуыддӕгтӕ ӕмӕ сыгъдӕг уды дыргътӕ куы ранымадта, уӕд дарддӕр загъта: «Кӕд мах цӕрӕм удӕй, уӕд хъуамӕ удмӕ гӕсгӕ кӕнӕм. Уӕхи ма сайут: Хуыцау хынджылӕггаг нӕ вӕййы. Цы байтауа адӕймаг, уый ӕркӕрддзӕн: йӕ буармӕ тауӕг ӕркӕрддзӕн буарӕй ӕмбийын; Удмӕ тауӕг та ӕркӕрддзӕн Удӕй мыггагмӕйы цард» (Галатӕгтӕм 5:25; 6:7, 8). Кӕд нӕ фӕнды, цӕмӕй бӕрифӕразон уӕм, уӕд хъуамӕ кусӕм, чырыстӕтты мидӕг сыгъдӕг уд цы миниуджытӕ ӕвзӕрын кӕны, уыдонӕй алкӕцыйыл дӕр.

«Уарзондзинад бирӕ фӕразы»

9. Павел коринфӕгтӕн цӕмӕн афтӕ загътаид, зӕгъгӕ, «уарзондзинад бирӕ фӕразы»?

⁹ Адӕймагӕн ӕнӕ уарзондзинадӕй йӕ бон бирӕ фӕразын кӕй нӕу, уый равдыста Павел. «Уарзондзинад бирӕ фӕразы»,— фыста уый (1 Коринфӕгтӕм 13:4). Библиӕмбарынгӕнӕг Альберт Барнзы хъуыдымӕ гӕсгӕ, Павел уыцы бастдзинад уымӕн банысан кодта, ӕмӕ Коринфы ӕмбырды чырыстӕттӕ быцӕу кодтой, нӕ фидыдтой (1 Коринфӕгтӕм 1:11, 12). Барнз фыссы: «Ацы дзырдӕн [бирӕфӕразондзинадӕн] бынтондӕр иумӕйагӕй ницы ис тагъд кӕнынимӕ: адӕймаг сонтӕй цыдӕртӕ куы дзура кӕнӕ куы араза, кӕнӕ йӕм сдзырд куы нӕ уа, уыимӕ дӕр. Уый у ахӕм зондахаст, цӕй фӕрцы адӕймагӕн йӕ бон у тыхст уавӕрты кӕнӕ ӕфхӕрдӕн БИРӔ РӔСТӔГ БЫХСЫН». Уӕдӕ уарзондзинад ӕмӕ бирӕфӕразондзинад иухуызон стыр ахъаз сты чырыстон ӕмбырды фарн ӕмӕ иудзинадӕн.

10. а) Бирӕ фӕразынӕн нын уарзондзинад куыд ӕххуыс кӕны, ӕмӕ нын уый фӕдыл Павел цы бауынаффӕ кодта? ӕ) Хуыцау куыд бирӕфӕразон у ӕмӕ куыд хатыр кӕны, уый тыххӕй иу Библиӕмбарынгӕнӕг цы загъта? (Кӕс фиппаинаг.)

¹⁰ «Уарзондзинад бирӕ фӕразы, хатыргӕнаг [«хӕларзӕрдӕ», НД] у, уарзондзинад... йӕхион нӕ агуры, мӕсты нӕ кӕны». Уӕдӕ нын уарзондзинад царды бирӕ фӕзилӕнты ӕххуыс кӕны, цӕмӕй бирӕфӕразон уӕм * (1 Коринфӕгтӕм 13:4, 5). Уарзондзинад нӕм куы уа, уӕд кӕрӕдзиимӕ цӕрын фӕраздзыстӕм, нӕ рох кӕндзыстӕм, не ’ппӕт дӕр ӕнӕххӕст кӕй стӕм, кӕй рӕдийӕм, уый. Ӕмӕ нӕм уый куы уа, уӕд та уыдзыстӕм ӕрхъуыдыджын ӕмӕ хатыргӕнаг. Апостол Павел нӕ разӕнгард кӕны, цӕмӕй  «алы ’гъдауӕй сабырӕй, ӕмӕ фӕлмасӕй ӕмӕ бирӕбаронӕй, уарзгӕйӕ, кӕрӕдзимӕ-иу фӕкӕсӕм; хъарӕм нӕхи ӕмудӕй бавӕрын фарны ӕмдзинады» (Ефесӕгтӕм 4:1—3, НФ).

11. Чырыстӕтты ’хсӕн бирӕфӕразондзинад афтӕ ахсджиаг цӕмӕн у?

¹¹ Ӕмбырды уа, Вефилы уа, миссионерты хӕдзары уа, аразджыты бригады уа ӕви Ӕхсӕнады скъолатӕй искӕцыйы ахуыр кӕнӕм, алкуыдӕр бирӕфӕразондзинад стыр ахъаз у, цӕмӕй чырыстӕтты ’хсӕн уа фарн. Алы адӕймагӕн дӕр йӕхи удыхъӕд ис, иуӕн цы цӕуы йӕ зӕрдӕмӕ, уый иннӕмӕн нӕ цӕуы; иу куыд схъомыл, иннӕ афтӕ нӕ; иу афтӕ дары йӕхи, иннӕ та ӕндӕрхуызон; суанг сыгъдӕгдзинадмӕ дӕр иу цы цӕстӕй кӕсы, иннӕ ахӕм цӕстӕй нӕ кӕсы, ӕмӕ уый тыххӕй хаттӕй-хатт нӕ фӕфидауӕм. Афтӕ рауайы иу хӕдзары бинонты ’хсӕн дӕр. Уымӕ гӕсгӕ мӕсты кӕнынмӕ хъуамӕ тагъд ма кӕнӕм (Ӕмбисӕндтӕ 14:29; 15:18; 19:11). Алкӕй дӕр нӕ хъӕуы бирӕфӕразондзинад, ома уавӕр хуыздӕрырдӕм кӕй фӕивдзӕн, ууыл фидарӕй ӕууӕндгӕйӕ, быхсын (Ромӕгтӕм 15:1—6).

Бирӕфӕразондзинад ӕххуыс кӕны фидар лӕууынӕн

12. Бирӕфӕразондзинад уӕззау уавӕрты тынг ахсджиаг цӕмӕн у?

¹² Бирӕфӕразон куы уӕм, уӕд цыфӕнды уӕззау уавӕры ма бахауӕм кӕнӕ нӕ зындзинӕдтӕ цыфӕнды бирӕ ма уой, уӕддӕр нӕ бон уыдзӕн фидар лӕууын. Афтӕ уыди, райдианы кӕй кой ракодтам, уыцы Режийы хабар. Бирӕ азты дӕргъы йӕ йӕ ус хъыгдӕрдта Иегъовӕйӕн лӕггад кӕнын. Фӕлӕ иу бон куы уыд, уӕд ӕм цӕссыгкалгӕйӕ бацыд ӕмӕ йын загъта: «Ӕз зонын, ай ӕцӕгад кӕй у, уый. Баххуыс мын кӕн. Мӕн фӕнды Библи ахуыр кӕнын». Куыдфӕстагмӕ уый райста донаргъуыд, ӕмӕ сси Иегъовӕйы Ӕвдисӕн. «Афтӕ мын раарфӕ кодта Иегъовӕ, уыцы азтӕ дӕргъы кӕй нӕ басастӕн, кӕй быхстон ӕмӕ фидар кӕй лӕууыдтӕн, уый тыххӕй»,— дзуры Режи. Ай-гъай дӕр, дзӕгъӕлы нӕ уыд йе стыр фӕразондзинад.

13. Павелӕн цӕй фӕрцы уыди йӕ бон фидар лӕууын, ӕмӕ йӕ дӕнцӕг махӕн куыд ӕххуыс кӕны?

¹³ Н. э. фыццӕгӕм ӕнусы ма йе стыр фӕразондзинадӕй фӕзминаг уыди апостол Павел дӕр (2 Коринфӕгтӕм 6:3—10; 1 Тимофеймӕ 1:16). Йӕ царды кӕрон йе ’рыгон ӕрдхорд Тимофейы фӕдзӕхста, чырыстӕттӕй иу дӕр фӕлварӕнтӕй хызт кӕй нӕ уыдзӕн. Павел ракодта йӕхи кой ӕмӕ ранымадта, фидар лӕууынӕн тынг ӕхсызгонӕй цы чырыстон миниуджытӕ хъӕуы, уыдон. Уый фыста: «Ды... рацыдтӕ мӕ фӕдыл ахуырады, царды, зӕрдӕйы уагӕй, уырнындзинады, хӕлар зӕрдӕйӕ, уарзондзинады, фӕразондзинады, сурындзинӕдты, зындзинӕдты, кӕцытӕ мӕныл ӕрцыдысты Антиохийы, Иконийы, Листрӕйы; цавӕр сурындзинӕдтӕ бавзӕрстон ӕз, ӕмӕ мӕ сеппӕтӕй дӕр фервӕзын кодта Хицау. Ӕмӕ иуылдӕр, кӕй фӕнды хорз намысимӕ цӕрын Йесо Чырыстийы мидӕг, уыдзысты сырд» (2 Тимофеймӕ 3:10—12; Куыстытӕ 13:49—51; 14:19—22). Уӕдӕ цӕмӕй фидар лӕууӕм, уый тыххӕй нӕ алкӕйдӕр хъӕуы уырнындзинад, уарзондзинад ӕмӕ бирӕфӕразондзинад.

Сӕхи сфӕлыстой бирӕфӕразондзинады

14. Бирӕфӕразондзинад ӕмӕ иннӕ чырыстон миниуджытӕ Павел куыд схуыдта ӕмӕ Колоссы чырыстӕттӕн цавӕр уынаффӕ радта?

¹⁴ Павел бирӕфӕразондзинад ӕмӕ иннӕ чырыстон миниуджытӕ схуыдта, чырыстон «зӕронд  адӕймаджы» йӕ зӕронд митимӕ куы ныууадзы, уӕд кӕй хъуамӕ скӕна, ахӕм уӕлӕдарӕс (Колоссӕгтӕм 3:5—10). Уый фыста: «Сфӕлындут, куыд Хуыцауы ӕвзӕрстытӕ, сыгъдӕджытӕ ӕмӕ уарзонтӕ, фӕлмӕн зӕрдӕйы, хорз кӕныны, сабыр зонды, фӕлмасдзинады, бирӕфӕразондзинады, кӕрӕдзийӕн баргӕйӕ ӕмӕ иу иннӕмӕн хатыр кӕнгӕйӕ, кӕд искӕмӕ искӕуыл хъаст ис уӕд: Чырысти сымахӕн куыд бахатыр кодта, афтӕ сымах дӕр. Ӕппӕтӕй фылдӕр та сфӕлындут уарзондзинады, кӕцы у ӕххӕстдзинады ӕмдзыгуыр» (Колоссӕгтӕм 3:12—14).

15. Чырыстӕттӕ сӕхи бирӕфӕразондзинад ӕмӕ ӕндӕр чырыстон миниуджыты кӕй «сфӕлындынц», уый цӕмӕн у ахъаз?

¹⁵ Ӕмбырды ӕфсымӕртӕ ӕмӕ хотӕ сӕхи фӕлмӕнзӕрдӕйы, хорз кӕныны, сабыр зонды, фӕлмасдзинады, бирӕфӕразондзинады ӕмӕ уарзондзинады куы «сфӕлындынц», уӕд сын ӕнцондӕр вӕййы, се ’хсӕн цы зындзинӕдтӕ сӕвзӕры, уыдон иуварс кӕнын ӕмӕ Иегъовӕйӕн иумӕ ӕмвӕндӕй лӕггад кӕнын. Бирӕфӕразондзинад уӕлдай ӕхсызгонӕй хъӕуы чырыстон цӕстдарджыты. Чырыстӕттӕй кӕмӕндӕр бахъӕуы бауайдзӕф кӕнын дӕр, фӕлӕ уыцы хъуыддаг алыхуызӕтты ис саразӕн. Иууыл хуыздӕр цавӕр зондахастимӕ уыдзӕн бауайдзӕф кӕнын, уый бамбарын кодта Павел. Уый фыста Тимофеймӕ: «Хъусын кӕн дзырд, афонӕй ӕнафонӕй хъӕддых у, уайдзӕф кӕн, бар ма дӕтт, амон бирӕ фӕразондзинадимӕ ӕмӕ фӕдзӕхстимӕ [«арӕхстджынӕй», НД]» (2 Тимофеймӕ 4:2). Уӕвгӕ, Иегъовӕ домы, цӕмӕй йӕ фыстӕм алкӕддӕр уа бирӕфӕразон ӕмӕ фӕлмӕнзӕрдӕ ахаст, аргъ сын кӕной (Матфейы 7:12; 11:28; Куыстытӕ 20:28, 29; Ромӕгтӕм 12:10).

Ут бирӕфӕразон алкӕмӕдӕр

16. Алкӕмӕдӕр бирӕфӕразон куы уӕм, уӕд уый хорзӕй цы ӕрхӕсдзӕн?

¹⁶ Иегъовӕ ӕппӕт адӕммӕ дӕр бирӕфӕразон кӕй у, уый ныл ахӕм хӕс ӕвӕры, цӕмӕй алкӕмӕдӕр «уӕм бирӕфӕразон» (1 Фессалоникӕгтӕм 5:14). Уырдӕм хауынц, нӕ бинонтӕй Иегъовӕйы фӕндагыл чи нӕ лӕууы, уыдон, стӕй нӕ сыхӕгтӕ, кӕимӕ кусӕм йе та кӕимӕ ахуыр кӕнӕм, уыдон дӕр. Иегъовӕйы Ӕвдисӕнтӕ арӕх цалдӕргай азты дӕргъы быхстой, се ’мкусджытӕн кӕнӕ кӕимӕ ахуыр кодтой, уыдоны рӕхуыст ныхӕстӕн, фидистӕн ӕмӕ суанг ӕргом кӕй цыдысты сӕ ныхмӕ, уымӕн дӕр, ӕмӕ сын уый фӕрцы сӕ бон сси баххуыс кӕнын, раст сӕ кӕй нӕ хъуыды кодтой, уый бамбарынӕн (Колоссӕгтӕм 4:5, 6). «Ӕрвитут хӕрзуаг цард муртатты ’хсӕн,— фыста апостол Петр,— цӕмӕй уыдон уый тыххӕй, цӕй тыххӕй уӕ фыдкой кӕнынц, куыд фыдгӕнджыты, уӕ хорз хъуыддӕгтӕ фенгӕйӕ, скадджын кӕной Хуыцауы бабӕрӕг кӕныны бон» (1 Петры 2:12).

17. Цӕмӕй Иегъовӕ куыд уарзы, афтӕ уарзӕм ӕмӕ уыйау бирӕфӕразон уӕм, уый тыххӕй нӕ цы кӕнын хъӕуы ӕмӕ цӕмӕн?

¹⁷ Иегъовӕйы бирӕфӕразондзинад милуантӕн ӕрхӕсдзӕн ирвӕзындзинад (2 Петры 3:9, 15). Мах дӕр Иегъовӕ куыд уарзы, афтӕ куы уарзӕм ӕмӕ уыйау бирӕфӕразон куы уӕм, уӕд адӕмӕн дарддӕр дӕр фӕразонӕй хъусын кӕндзыстӕм Хуыцауы Паддзахады хорз уацхъуыд ӕмӕ сын амондзыстӕм, цӕмӕй сӕхи Чырыстийы Паддзахады хицаудзинады дӕлбар бакӕной (Матфейы 28:18—20; Маркы 13:10).  Куы нал хъусын кӕнӕм, уӕд уый дзурӕг уыдзӕн, кӕй нӕ фӕнды, цӕмӕй Иегъовӕйы бирӕфӕразондзинадӕн кӕрон ӕрцӕуа ӕмӕ кӕй не ’мбарӕм, адӕмӕн ӕрфӕсмон кӕныны фадат цӕмӕй уа, уый тыххӕй кӕй быхсы (Ромӕгтӕм 2:4).

18. Колоссӕгты тыххӕй кувгӕйӕ Павел цы куырдта?

¹⁸ Колоссы (Къаннӕг Ази) цӕрӕг чырыстӕттӕм Павел фыста: «Уымӕ гӕсгӕ мах дӕр, уыдон куы фехъуыстам, уыцы бонӕй фӕстӕмӕ нӕ кувынӕй нӕ ӕнцайӕм сымах тыххӕй ӕмӕ курӕм, цӕмӕй сымах ӕххӕст кӕнат Уый фӕндон бамбарыны алы уӕлзонды ӕмӕ удӕй ӕмбарынады, цӕмӕй кӕнат Хуыцауӕн аккаг, алцӕмӕй дӕр Уый зӕрдӕ ӕлхӕнгӕйӕ, алкӕцы хорз хъуыддаджы дыргъ хӕсгӕйӕ ӕмӕ Хуыцауы бамбарыны рӕзгӕйӕ, фидар кӕнгӕйӕ алы тыхӕй Йӕ кады хъомысӕй, алы фӕразондзинады ӕмӕ зӕрдӕхӕлардзинады циндзинадимӕ [«цӕмӕй кӕронмӕ фидар лӕууат ӕмӕ бирӕфӕразон уат зӕрдӕрайгӕйӕ», НД]» (Колоссӕгтӕм 1:9—11).

19, 20. а) Иегъовӕ дӕрддӕр дӕр бирӕ кӕй фӕразы, уый нын фӕлварӕн кӕд не суыдзӕн? ӕ) Нӕ бирӕфӕразондзинад цӕмӕн уыдзӕн ахъаз?

¹⁹ Иегъовӕйы фӕндон кӕй у, «цӕмӕй ӕппӕт адӕмтӕ фервӕзой ӕмӕ бахӕццӕ уой ӕцӕгдзинад базонынмӕ», уый куы ӕмбарӕм, уӕд дарддӕр дӕр кӕй фӕразы, уый нын фӕлварӕн никуы суыдзӕн (1 Тимофеймӕ 2:4). Уӕд мах «алкӕцы хорз хъуыддаджы дыргъ хӕсдзыстӕм», уӕлдайдӕр та «Паддзахады Евангели» хъусын кӕнгӕйӕ (Матфейы 24:14). Уыцы хъуыддаджы дарддӕр дӕр нӕ удӕй арт куы цӕгъдӕм, уӕд нӕ Иегъовӕ «фидар кӕндзӕн йӕ алы тыхӕй», ӕмӕ уый фӕрцы «фидар лӕудзыстӕм ӕмӕ уыдзыстӕм бирӕфӕразон зӕрдӕрайгӕйӕ». Уӕд алцыдӕр кӕндзыстӕм «Хуыцауӕн аккаг» куыд у, афтӕ, ӕмӕ йӕ зӕрдӕмӕ куыд цӕуы, афтӕ кӕй аразӕм, уый нӕхицӕн дӕр уыдзӕн удӕнцой.

²⁰ Цӕй уӕдӕ макуы фӕдызӕрдыг уӕм, Иегъовӕйы бирӕфӕразондзинад йе стыр зондыл дзурӕг кӕй у, ууыл. Уый фӕрцы ис фервӕзӕн махӕн дӕр ӕмӕ цы хъусын кӕнӕм, цы амонӕм, уымӕ чи хъусы, уыдонӕн дӕр (1 Тимофеймӕ 4:16). Сыгъдӕг уды дыргъ куы хӕссӕм: иннӕты куы уарзӕм, фӕлмас куы уӕм, хатыр кӕнын куы зонӕм, хорздзинад куы кӕнӕм ӕмӕ хиуылхӕцгӕ куы уӕм, уӕд нӕ бон уыдзӕн зӕрдӕрайгӕйӕ фӕразын дӕр. Ӕмӕ бирӕфӕразон куы уӕм, уӕд та нын нӕ бинонтимӕ дӕр, стӕй ӕмбырды ӕфсымӕртӕ ӕмӕ хотимӕ дӕр ӕмудӕй цӕрын ӕнцондӕр уыдзӕн. Уӕд быхсдзыстӕм, кӕимӕ кусӕм кӕнӕ кӕимӕ ахуыр кӕнӕм, уыдонӕн дӕр. Ӕмӕ ӕппынфӕстаг, нӕ бирӕфӕразондзинад дзӕгъӕлы нӕ уыдзӕн: уымӕй кадджын кӕндзыстӕм бирӕфӕразон Хуыцау Иегъовӕйы ном ӕмӕ ӕвзӕргӕнджытӕн дӕтдзыстӕм фадат фервӕзынӕн.

[Фиппаинаг]

Бамбарын кӕндзынӕ?

• Бирӕфӕразондзинады нын Чырысти фӕзминаг цӕмӕн у?

• Цы нын баххуыс кӕндзӕн, цӕмӕй бирӕфӕразон уӕм?

• Бирӕфӕразондзинад бинонтӕн, чырыстон ӕмбырдӕн ӕмӕ хистӕр нӕлгоймӕгтӕн куыд ӕххуыс кӕны?

• Бирӕфӕразон куы уӕм, уӕд нын уый нӕхицӕн дӕр ӕмӕ иннӕтӕн дӕр цы пайда ӕрхӕсдзӕн?

[Фарстатӕ ахуыр кӕнынӕн]

[Ныв 29 фарсыл]

Тынг тыхст уавӕры дӕр Йесо йӕ ахуыргӕнинӕгтӕм уыди фӕразон.

[Ныв 30 фарсыл]

Чырыстон цӕстдарджытӕ хъуамӕ бирӕфӕразон уой се ’фсымӕртӕм ӕмӕ сын уымӕй уой фӕзминаг.

[Ныв 31 фарсыл]

Иегъовӕ куыд уарзы, афтӕ куы уарзӕм ӕмӕ уыйау бирӕфӕразон куы уӕм, уӕд хорз уацхъуыд дарддӕр дӕр хъусын кӕндзыстӕм.

[Ныв 32 фарсыл]

Павел куывта, цӕмӕй чырыстӕттӕ уыдаиккой «бирӕфӕразон зӕрдӕрайгӕйӕ».